Read Southern Kisi Sa̍a̍mi̍ɛ̍ɛ̄ Di̍i̍ŋ Ndɔ̄ɔ̍ 23 Bible Online

Sa̍a̍mi̍ɛ̍ɛ̄ Di̍i̍ŋ Ndɔ̄ɔ̍ 23 - Southern Kisi bible

Sa̍a̍mi̍ɛ̍ɛ̄ Di̍i̍ŋ Ndɔ̄ɔ̍ 23

¹Māsa̍ Mɛ̄lɛ̄ka̍ sōli̍ tɔ̍ɔ̍ I̍sɔ̄lūɛ̄ī mbo̍ hīāū kpo̍u̍ wo̍ wa̍ Dēēve̍ po̍ Chɛ̄ɛ̍se̍ wo̍ ni̍. Mɛ̄lɛ̄ka̍ Che̍kɔ̍pū ndu̍ o̍o̍ pi̍ɛ̍ī yo̍, ndu̍ pi̍la̍ kpe̍e̍kpe̍i̍ ndu̍ o̍o̍ hɛ̍li̍ ndu̍ ni̍. Ndu̍yɛ̍ ō wa̍ wāna̍ ŋ̄ chōndu̍ kɛ̍ndɛ̄. Dīōmndā mɛ̄ɛ̄lāālā Dēēve̍ mɛ̍ɛ̍lu̍ dīmī lɔ̍ɔ̍ pa̍ mbo̍ wū la̍ŋ la̍ŋ wa̍ la᷅ŋ ni̍. Mbo̍ dīmī āā,

²“Nyi̍na̍ Mɛ̄lɛ̄ka̍ Ya̍a̍wɛ̄ɛ̄ wo̍ ke᷄ ya̍ yōōŋgōo̍ le̍ mī di̍mi̍. Ō dɔ̄ū ya̍ lēdīōm o̍ sōndō.

³Mɛ̄lɛ̄ka̍ I̍sɔ̄lūɛ̍i̍ya̍ pīɛ̄īyo̍ ō dīmu̍l la̍ Īsɔ̄ɔ̍.” Wāna̍ ma̍ndā I̍sɔ̄lūɛ̍i̍ wo̍ ō dīmi̍ āā, “Wānā o̍ wāna̍ wa̍ pɛ̍ wa᷅ŋnda̍ chīla̍ŋ, mbō wa̍ sa̍kpō a̍ nda̍, ndu̍yɛ̍ mbo̍ nɔ̄ bɛ̄ɛ̄le̍ŋ le̍ ya̍ Mɛ̍lɛ̄ka̍,

⁴wānā wa̍ā le̍nde̍ yōōmū ndɔ̄ɔ̍ ō wā ma̍wa̍ā mɛ̄ɛ̍ yɛ̄ŋndē īdīi̍le̍ŋ lē wā nu̍a̍ā yɛ̍. Yōōmū ndɔ̄ɔ̍ ō wā ma̍wa̍ā mɛ̄ɛ̍ chōo̍ ō wā nu̍a̍ā ō tēŋgāā wa̍ke̍e̍ mī pāa̍le̍ŋ lē wa̍ fūlā bɛ̄ndōo̍ yɛ̍. Mɛ̄ɛ̍ pīɔ̍ɔ̍ sīā nu̍a̍ā mī bīllo̍ wa̍ pūīyo̍ ītɛ̍ɛ̍ tɛ̍ɛ̍ye̍ yɛ̍, le̍nde̍ yōōmū ndɔ̄ɔ̍ ō wā ni̍.”

⁵Wānāa̍ fu̍la̍ o̍ pūlālē nīle̍ŋ chōo̍ wa̍, nu̍a̍ā yōōmūlā ndāla̍ŋ lā wā ni̍ŋ ni̍ a̍ sa̍lā bɛ̄ndū, Mɛ̄lɛ̄ka̍ dūāū ni̍ŋ nda̍ wo̍. Kpe̍ma̍ Mɛ̄lɛ̄ka̍ yi̍i̍ a̍ ya̍ wo̍ ō cho̍ kpe̍ma̍ ta̍mbu̍ le̍ o̍ cho̍ le̍. Kpe̍ma̍ cho̍ le̍ fɛ̍ɛ̍ŋ a̍ fɛ̍ɛ̍ŋ ndo̍ o̍ cho̍ ni̍. Mɛ̄lɛ̄ka̍ chō būŋgɛ̄ī ndūɛ̍i̍ pēēlū, ndu̍yɛ̍ mbō hīōū lāchī a̍ ya̍ mālāa̍ le̍ te̍le̍ŋ o̍ te̍le̍ŋ.

⁶Kɛ̍ wānāa̍ kɛ̍ɛ̍ Mɛ̄lɛ̄ka̍ wa̍ nda̍ ki̍nɛ̍i̍, mɛ̄ɛ̍ nda̍ vīāū nu̍a̍ā bīllo̍ o̍ sa᷄llo̍ chōo̍ yɛ̍ le̍nde̍ nda̍ wā ni̍ŋ a̍ vi̍a̍u̍wāā ni̍. Mɛ̄ɛ̍ nda̍ wō nu̍a̍ā yɔ̄ɔ̍ le̍ ndu̍ pīla᷄ŋndo̍ a̍ bā yɛ̍, le̍nde̍ nda̍ wō nda̍ ni᷄ŋ le̍ pīla᷄ŋndo̍ ni̍.

⁷Ā chō nda̍ hūnɔ̄ɔ̄ nyīndɔ̄ɔ̄ o̍ yīŋ mɛ̄ɛ̍ nda̍ nyīndū nu̍a̍ā yɔ̄ɔ̍ŋ a̍ lɛ̍ɛ̍ŋndo̍ ɔ̄ɔ̄ a̍ tīīnda᷄ŋndo̍ le̍ mu̍ŋ lōmɔ̄ɔ̍ yɛ̍ mā ŋūɛ̄ kpo̍u̍.

⁸Dēēve̍ so̍vɛ̄i̍ya̍a̍ ndūa̍a̍ sɔ̍ŋga̍ sɔ̍ŋgā bɛ̄ndōo̍ ma̍ fūlā tɔ̍ɔ̍ wa̍ a̍ wa̍ ha̍ā ni̍. Ō tāso̍o̍ dīōla̍ŋ āā Chōōsɛ̍bī Bāsi̍ɛ̍bɛ̍tī, wānā wa̍ā Tɛ̍kɛ̍mɔ̄ŋ. Dēēve̍ so̍vɛ̄i̍ya̍a̍ ndūāā ya̍a̍wa̍a̍ fu̍la̍ tɔ̍ɔ̍ ma̍ hīāū ha̍ā kpo̍u̍ wa̍ pōo̍ ho̍ō o̍ wa̍ nda̍ bōlle̍ŋ ni̍. Te̍le̍ŋ pi᷅lɛ̍ o̍ sɔ̍ŋgɔ̄ pūm, pōo̍ ho̍ō ndu̍ pīlɛ̍ kpe̍ mbo̍ dīī ya̍a̍mɔ̍ɔ̍wa̍ kɛ̄mɔ̄ɔ̍ lē ŋɔ̄ma̍a̍ (800) a̍ ba̍l ndɔ̄ɔ̍.

⁹So̍vɛ̄i̍ya̍a̍ ya̍a̍wa̍a̍ ka̍ŋ ō dīi̍ŋ ndɔ̄ɔ̍ wa̍ Ɛ̄li̍a̍a̍sā po̍ Do̍dō wo̍ ni̍. O̍ ku̍nda̍ A̍hi̍o̍ō wo̍ chōo̍ pōo̍ ho̍ō ndu̍ o̍o̍ fu̍la̍ ni̍. Pāa̍le̍ pi᷅lɛ̍ le̍ wa̍, mi̍ Fīli̍i̍tīāŋnda̍ chūūŋgi̍āŋ kpo̍u̍ le̍ sɔ̍ŋgɔ̄ɔ̍ a̍ I̍sɔ̄lūɛ̍i̍ya̍. I̍sɔ̄lūɛ̍i̍ya̍ kpo̍u̍ ma̍ nyāānu᷄ŋ. Kɛ̍ Ɛ̄li̍a̍a̍sā ndu̍ nye̍e̍nu̍ŋ te̍. Ndu̍ ni̍, Dēēve̍ ni̍, mā sīmūl Fīli̍i̍tīāŋnda̍ ha̍ā, ma̍ kīālū nda̍ īchīɛ̍ɛ̍.

¹⁰Mi̍ Ɛ̄li̍a̍a̍sā o̍ sɔ̍ŋgā sɔ̍ŋgāa̍ pīla̍ a̍ nda̍. Mɛ̄ɛ̍ o̍ sɔ̍ŋga̍ a̍ nda̍ te̍i̍ mi̍ bāa̍ kīāndū ndu̍ ni᷅ŋ pe᷅ŋ o̍ mūɛ̍i̍ chōo̍. Ndu̍yɛ̍ mi̍ Mɛ̄lɛ̄ka̍ mālā nda̍ ma̍ yām Fīli̍i̍tīāŋnda̍ ma̍ dīū nda̍ dīūwo̍ pīla̍ pa̍a̍le̍ le̍ŋ. Mɛ̄ɛ̍ sɔ̍ŋgɔ̄ɔ̍ chūū kpo̍u̍, mi̍ I̍sɔ̄lūɛ̍i̍ya̍a̍ nya̍a̍nu̍ŋ nda̍ a̍ mīīŋgū ni᷅ŋ le̍ wōlɔ̄ɔ̄lā chɔ̄ūlā Fīli̍i̍tīāŋāa̍ nda̍ dīu̍ wa̍ chɔ̄ɔ̄vi̍a̍a̍.

¹¹So̍vɛ̄i̍ya̍a̍ ya̍a̍wa̍a̍ ka̍ŋ ō yāa̍ ndɔ̄ɔ̍ wa̍ Si̍a̍māā ni̍, fi̍nyā ndɔ̍ dīōla̍ŋ āā Āki̍ī, wānā wa̍ā Ha̍lūāā chi̍e̍e̍. Te̍le̍ŋ pi᷅lɛ̍ wa̍ mi̍ Fīli̍i̍tīāŋnda̍ chūūŋgīāā pūa̍a̍ ndāa̍ chɔ̄ūwa̍ Lɛ̍hī, chi̍e̍e̍, le̍ sɔ̍ŋgɔ̄ɔ̍ a̍ I̍sɔ̄lūɛ̍i̍ya̍. Ma̍ chīŋa̍la᷅ŋ I̍sɔ̄lūɛ̍i̍ya̍ o̍ kpe̍le̍ la᷄m wa̍ o̍ chi̍o̍o̍ ho̍ō īkɛ̄i̍ yo̍ ni᷄ŋ. I̍sɔ̄lūɛ̍i̍ya̍ kpo̍u̍ ma̍ nyāānu᷄ŋ.

¹²Kɛ̍ Si̍a̍māā ndu̍ nye̍e̍nu̍ŋ te̍. Mbo̍ kɔ̍ si᷅m o̍ kpe̍lo̍o̍ ho̍ō tɛ̄ɛ̄ŋ kpe̍e̍kpe̍i̍, mbo̍ chīŋa̍la᷅ŋ Fīli̍i̍tīāŋnda̍ a̍ sɔ̍ŋgɔ̄ɔ̍. Ndu̍yɛ̍ mbo̍ dīū nda̍ dīūwo̍ pīla̍. Mi̍ Mɛ̄lɛ̄ka̍ Ya̍a̍wɛ̄ɛ̄ to̍sā mbo̍ yām Fīli̍i̍tīāŋnda̍.

¹³Te̍le̍ŋ pi᷅lɛ̍ wa̍, mi̍ Dēēve̍ nya̍a̍nu᷄ŋ ya̍a̍mɔ̍ɔ̍wa̍a̍ ndūa̍a̍ mbo̍ kɔ̍ vi̍o̍ŋnu᷄ŋ A̍du̍lām o̍ būūlōo̍ ni᷄ŋ. Fīli̍i̍tīāŋnda̍ nda̍ wa̍ o̍ ki̍a̍mbūe̍i̍ ndāa̍ ni᷄ŋ o̍ lɛ̄ŋndē dɛ̍ŋgbɛ̍ le̍ŋ Lu̍ɛ̍fēm Dēēve̍ ndu̍ o̍o̍ nɔ̍ pūa̍a̍ nda̍ a̍a̍ sɔ̍ŋgā sɔ̍ŋgā sɔ̍ŋgā bɛ̄ndōo̍ wa̍ ŋ̄wāŋ be̍le̍-ya̍a̍ (30). O̍ pūa̍a̍ ka̍ŋ tɛ̄ɛ̄ŋ mi̍ wānāā yāa̍ a̍ ma̍lnu᷄ŋ a̍ te̍le̍ŋ wāŋnda̍ kāndū nu̍a̍ā wi̍tīi̍yo̍ŋ kōwɔ̄ɔ̍ wo̍ ki̍nɛ̍i̍, ma̍ kūā nāa̍ Dēēve̍ wa̍ ō vīāŋna᷄ŋ nda̍.

¹⁴Ndu̍yɛ̍ a̍ te̍le̍ŋ ko̍ŋ Fīli̍i̍tīāŋnda̍ ā chūa̍ Bɛ̍ti̍lɛ̍hɛ̄m ni̍, ma̍ wā īchāli̍ lo̍ŋ. Dēēve̍ ndu̍ wa̍ ō vīāŋna᷄ŋ nda̍ pūa̍a̍ ndūa̍a̍.

¹⁵Pāa̍le̍ pi᷅lɛ̍ mi̍ kōlɔ̄ɔ̍ bīī Dēēve̍. Mbo̍ dīmūl pūa̍a̍ ndūa̍a̍ āā, “Kōlɔ̄ɔ̍ bīī ya̍ ō bɔ̄ɔ̍. Tē ya̍ i̍i̍ sɔ̍la̍ pɛ̍ wa̍nā mī ndu̍ o̍o̍ ku̍e̍l la̍ Bɛ̍ti̍lɛ̍hɛ̄m mī ndu̍ o̍o̍ kɔ̍ ko̍ndūl la̍ mɛ̄ŋnda̍ŋ o̍ kpāki̍ chi̍o̍o̍ īkɛ̄i̍ ndu̍ o̍o̍ bɛ̍ndā bɔ̍ɔ̍.”

¹⁶O̍ ko̍ŋ, mi̍ so̍vɛ̄i̍ya̍a̍ ya̍a̍wa̍ nda̍ a̍a̍ fu̍la̍ ha̍ā tɔ̍ɔ̍ le̍ sɔ̍ŋgɔ̄ɔ̍ wa̍, ā mālnu᷄ŋ ma̍ kɔ̍ chi᷅ŋa̍la᷅ŋ Fīli̍i̍tīāŋnda̍ a̍ sɔ̍ŋgɔ̍ɔ̍. Ma̍ kīndī kīndī ma̍ kēī Fīli̍i̍tīāŋnda̍ tɛ̄ɛ̄ŋ ma̍ kūā Bɛ̍ti̍lɛ̍hɛ̄m ma̍ kɔ̍ kɔ̍ndū mɛ̄ŋnda̍ŋ māŋ ma̍ hūŋ a̍ ma̍ŋ. Kɛ̍ Dēēve̍ chɛ̍l mbō ko᷄l ma̍ŋ te̍. Mbo̍ tālā ma̍ŋ lɛ̄ŋ, māā sa̍lā sōlīāā nāa̍ Mɛ̄lɛ̄ka̍ Ya̍a̍wɛ̄ɛ̄ chu̍a̍.

¹⁷Mbo̍ dīmī āā, “Mɛ̄lɛ̄ka̍ Ya̍a̍wɛ̄ɛ̄, I̍ ko᷅l mɛ᷅ŋnda̍ŋ māŋ te̍. Tē ī ko̍l ma̍ŋ pɛ̍, so̍vɛ̄i̍ya̍a̍ ya̍a̍wa̍a̍ pi̍si̍ ha̍ā yōōmūlā ndāla̍ chi̍ ma̍ kūā le̍ ma̍ŋ nda̍ mɛ̄ɛ̍ tē ō wa̍ māā yɔ̄ŋɔ̄ɔ̄ pɛ̍ kōo̍ma̍ nda̍ŋ, ya̍ I̍ kɔ̍l ma̍ŋ ni̍.” Dēēve̍ chɛ̍l mbō ko᷄l mɛ̄ŋmā mā te̍. Ndu̍yɛ̍ pūa̍a̍ ya̍a̍wa̍ ha̍ā, sɔ̄ɔ̍ŋ tɔ̍ɔ̍ŋ nda̍ a̍a̍ to̍sā wo̍ŋ ŋ̍ wa̍ mu᷅ŋ ni̍. Mi̍ tɔ̍ɔ̍ ndāa̍ tīū lɛ̄ŋnde̍ŋ kpo̍u̍.

¹⁸Ābi̍sīāā, pɔ̄mbɔ̄ɔ̍ Cho̍wa̍bī ndu̍ wa̍ pūa̍a̍ ŋ̍wa᷅ŋ be̍le̍-ya̍a̍ ka̍ŋ bōlle̍ŋ kpo̍u̍ ni̍. Ābi̍sīāā ko̍ŋ nda̍ Cho̍wa̍bī kālā nda̍ wa̍ (Sɛ̄lu̍i̍yā ni̍.) Te̍le̍ŋ pi᷅lɛ̍ Ābi̍sīāā ko̍ŋ ndu̍ pīlɛ̍ kpe̍ mbo̍ dīī ya̍a̍mɔ̍ɔ̍wa̍a̍ ndāa̍ kɛ̄mɔ̄ɔ̍ le̍ yāa̍ (300) a̍ ba̍l ndɔ̄ɔ̍. Ndu̍ bɛ̍ɛ̍ mi̍ tɔ̍ɔ̍ ndɔ̄ɔ̍ tīū kpo̍u̍ mɛ̄ɛ̍ so̍vɛ̄i̍ya̍a̍ ya̍a̍wa̍ ā fūla̍ tɔ̍ɔ̍ yɛ̍.

¹⁹O̍ so̍vɛ̄i̍ya̍a̍ ŋ̍wa᷅ŋ be̍le̍-ya̍a̍ ka̍ŋ tɛ̄ɛ̄ŋ ndu̍ ndu̍ o̍o̍ hi̍o̍ū tɔ̍ɔ̍ fu̍lā. O̍ ko̍ŋ, ma̍ hāndū ndu̍ so̍vɛ̄i̍ya̍a̍ ka̍ŋ kpo̍u̍ bɔ̍lle̍ŋ. Kɛ̍ a̍ tɔ̍ɔ̍ ko̍ŋ kpo̍u̍, ndu̍ o̍o̍ fu̍la̍ tɔ̍ɔ̍ māā so̍vɛ̄i̍ya̍a̍ ya̍a̍wa̍ le̍.

²⁰So̍vɛ̄i̍ya̍a̍ nda̍ a̍a̍ fu̍la̍ ka̍ŋ tɔ̍ɔ̍ bɛ̍ndōo̍ wa̍, ō pīlɔ̍ɔ̍ dīōla̍ŋ āā Bɛ̄na̍yā, fi̍nyā ndɔ̍ dīōla̍ŋ āā Chɛ̄hōwa̍dā, wānā wa̍ā Ka̍bi̍sɛ̄ɛ̄l. Ndu̍ bɛ̍ɛ̍ mbo̍ tōsā sɔ̄ɔ̍ŋ tɔ̍ɔ̍ŋ bɛ̍ndo̍ŋ ta̍u̍ ta̍u̍. Ku̍u̍ba̍a̍ ŋi̍ɔ̍ɔ̍ŋāā pūm wa̍ Mo̍wa̍bī sɔ̍ŋgāa̍ pīla̍ nda̍ a̍a̍ sɔ̍ŋgā ni̍. Bɛ̄na̍yā ko̍ŋ ndu̍ di̍u̍ ku̍u̍ba̍a̍ ka̍ŋ ni̍. Pāa̍le̍ pi᷅lɛ̍ lē wa̍ vɛ̄lɛ̄ mi̍ mɔ᷄mndo̍ chūchū chūchɔ̄ɔ̍ pīla̍. Lāŋu̍nɔ̄ɔ̍ ho̍ō lo̍ bālɔ̄ɔ̍ mbo̍ kōmāl kpɔ̍kūŋndo̍ o̍ būūlōo̍. Mbo̍ dēl kpɔ̍kūŋndo̍ ho̍ō chōo̍ ndu̍ pīlɛ̍ mbo̍ dīī ndu̍.

²¹Te̍le̍ŋ pi᷅lɛ̍ wa̍ vɛ̄lɛ̄, nda̍ lāŋu̍nɔ̄ I̍chi̍pīnɔ̄ pīlɛ̍ ma̍ sa̍āŋ sɔ̍ŋgɔ̄ɔ̍. Ndu̍yɛ̍ chēlu̍llo̍ pīla̍ I̍chi̍pīnɔ̄ɔ̍ ho̍ō ndu̍ o̍o̍ che̍lu̍l ni̍. Lāŋu̍nɔ̄ I̍chi̍pīnɔ̄ɔ̍ ho̍ō ndu̍ ndu̍ o̍o̍ nɔ̍ ba̍llo̍ o̍ bā. Bɛ̄na̍yā ndu̍ ndu̍ o̍o̍ nɔ̍ ba̍l te̍, yɔ̄m bīŋgīo̍o̍ ko̍ wa̍ ndu̍ o̍ bā ni̍. Kɛ̍ mi̍ Bɛ̄na̍yā si̍mūl ndu̍ ndu̍yɛ̍ mbo̍ nɔ̄lā mbo̍ pūū ndu̍ ba̍l ko̍ŋ o̍ bā, mbo̍ dīī ndu̍ a̍ ba̍l ndɔ̄ ko̍ŋ.

²²Sɔ̍ɔ̍ŋ tɔ̍ɔ̍ bɛ̍ndūŋ Bɛ̄na̍yā ndu̍ o̍o̍ to̍sā wo̍ŋ ŋ̍ wa̍ mu᷅ŋ ni̍. Mi̍ tɔ̍ɔ̍ ndɔ̄ɔ̍ tīū kpo̍u̍ mɛ̄ɛ̍ tɔ̍ɔ̍ pūa̍a̍ ya̍a̍wa̍ ō tīu̍ yɛ̍.

²³Ndu̍ bɛ̍ɛ̍ mbo̍ fūlā tɔ̍ɔ̍ ta̍u̍ ta̍u̍ o̍ pūa̍a̍ ŋ̍ wa᷅ŋ be̍le̍-ya̍a̍ ka̍ŋ tɛ̄ɛ̄ŋ. Kɛ̍ ndu̍ o̍o̍ si̍i̍ma᷅ŋ tɔ̍ɔ̍ a̍ pūa̍a̍ ya̍a̍wa̍ le̍. Pūa̍a̍ nda̍ a̍a̍ ma̍ndā Dēēve̍ wa̍ ki̍nɛ̍i̍, ndu̍ Dēēve̍ ndu̍ o̍o̍ kɛ̍si̍ nda̍ bōlle̍ŋ kpo̍u̍ ni̍.

²⁴So̍vɛ̄i̍ya̍a̍ ŋ̍wa᷅ŋ be̍le̍-ya̍a̍ nda̍ a̍a̍ fu̍la̍ ka̍ŋ tɔ̍ɔ̍ bɛ̍ndōo̍ wa̍ a̍ wa̍ ha̍ā ni̍. A̍sa̍hɛ̄l pɔ̄mbɔ̄ɔ̍ Cho̍wa̍bī, a̍ Ɛ̄līha̍nāŋ po̍ Do̍dō wo̍, fūlāa̍ Bɛ̍ti̍lɛ̍hɛ̄m chi̍e̍e̍, a̍ Si̍a̍māā nda̍ Ɛ̄li̍kā, wānāā wāā Ha̍lɔ̍dī chi̍e̍e̍, a̍ Hɛ̍lɛ̍sī, wānā wa̍ā Bɛ̍tɛ̄ɛ̄ a̍ I̍lūā po̍ I̍kɛ̍sīī wo̍, fūlāa̍ Tɛ̄ko̍wā, a̍ Ābīɛ̍ɛ̍sā, wānā wa̍ā A̍na̍tɔ̍tī, a̍ Mɛ̍bu̍nāī fūlāa̍ Hu̍sīāā, a̍ Sa̍li̍mɔ̄ŋ fūlāa̍ A̍hɔ̄ɔ̄, a̍ Ma̍ha̍lāī fūlāa̍ Nɛ̍to̍fā, a̍ Hɛ̍lɛ̍bī po̍ Ba̍nā wo̍, fūlāa̍ Nɛ̍to̍fā, a̍ I̍tāī po̍ Lu̍i̍bāī wo̍, wānā wa̍ā Ki̍bīāā o̍ būŋgɛ̄i̍ Bɛ̍ŋnja̍mīŋnde̍ ni᷄ŋ, a̍ Bɛ̄na̍yā, fūlāa̍ Pi̍lu̍a̍tɔ̄ŋ, a̍ Hi̍dāī fūlāa̍ o̍ lɛ̄ŋnde̍ cho̍ o̍ pēmbo᷄ŋ tɛ̄ɛ̄ŋ le̍ kɔ̄la̍ŋ Ka̍a̍sī le̍ŋ, a̍ Ābīa̍a̍bɔ̄ŋ wānā wa̍ā A̍lu̍a̍bī, a̍ A̍si̍ma̍vɛ̄ɛ̄, fūlāa̍ Ba̍hu̍lūīm, a̍ Ɛ̄li̍a̍a̍bā, wānā wa̍ā Si̍a̍a̍bɔ̄ŋ, a̍ Pūa̍a̍ Cha̍sīɛ̄ŋ nda̍, a̍ Chōna̍ta᷅ŋ, a̍ Si(...)