Read Southern Kisi Sa̍a̍mi̍ɛ̍ɛ̄ Di̍i̍ŋ Ndɔ̄ɔ̍ 24 Bible Online

Sa̍a̍mi̍ɛ̍ɛ̄ Di̍i̍ŋ Ndɔ̄ɔ̍ 24 - Southern Kisi bible

Sa̍a̍mi̍ɛ̍ɛ̄ Di̍i̍ŋ Ndɔ̄ɔ̍ 24

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ du̍a̍a̍ŋ vɛ̍lɛ̄ tu̍mbe̍ a̍ wāŋnda̍ I̍sɔ̄lūɛ̄ī. O̍ ko̍ŋ, mbo̍ tōsā mi̍ Dēēve̍ ma᷅l nda̍ o̍ kpūndɔ̍ɔ̍ ni᷄ŋ. Mbo̍ dīmūl Dēēve̍ āā, “Ba̍lu̍ wa᷅ŋnda̍ I̍sɔ̄lūɛ̄ī cho̍o̍ a̍ wāŋnda̍ Chu̍dā mā chɔ̍m nda̍ mɛ̄ɛ̍ nda̍ chō bōllē pīlɛ̍ yɛ̍.”

²O̍ ko̍ŋ, mi̍ Dēēve̍ di̍mūl Cho̍wa̍bī, wāna̍ wa̍ pūa̍a̍ ndūa̍a̍ bōlle̍ŋ ndo̍ a̍ wānāā bɛ̄ndūa̍a̍ ā ti᷄ŋ āā, “Lā bālu̍ I̍sɔ̄lūɛ̍i̍ya̍ chōo̍ kpo̍u̍ ka̍ndu̍ŋ a̍ Da᷅ŋ chi̍e̍e̍ mbō kūɛ̄ a̍ lɛ̄ŋndē I̍sɔ̄lūɛ̍i̍le̍ŋ mɛ̄ɛ̄lu̍la̍ŋ, mī lā chɔ᷄m wāŋndā chīe̍e̍ya̍ kpo̍u̍ bo̍llē pīlɛ̍. I̍ ye̍e̍ma̍ mī si̍na̍ mɛ̄ɛ̍ nda̍ chō bōllē pīlɛ̍ yɛ̍.”

³Kɛ̍ mi̍ Cho̍wa̍bī di̍mūl ndu̍ āā, “Fāllo̍ ŋ̄ chō Mɛ̄lɛ̄ka̍ Ya̍a̍wɛ̄ɛ̄, o̍ cho̍ Mɛ̄lɛ̄ka̍ nūmndo̍ wo̍ pīɛ̄īyo̍ mbō tōsa̍ a̍ sa̍bū mī wāŋnda̍ I̍sɔ̄lūɛ̄ī a̍ hi̍o̍ū lāchī a̍ kūīyo̍ mbō hīōū mɛ̄ɛ̍ nda̍ chō nu̍a̍ā yɛ̍. Ndu̍yɛ̍ ŋ̄ chō pīɛ̄īyo̍ mbō tōsa̍ mā lo̍ yōōmū ha̍a̍a̍ mī he̍ī ī yɔ̄nu̍ŋ. Kɛ̍ I̍ chi̍ le̍ sa̍bū o̍ sābū ŋ̄ yēēma̍ le̍ wāŋnda̍ ha̍ā chɔ̄mndo̍ wo̍ le̍.

⁴Kɛ̍ Dēēve̍ ye̍ŋ ndu̍ lānī le̍. Mbo̍ dīmūl nda̍ māā ā kɔ̍. O̍ ko̍ŋ mi̍ Cho̍wa̍bī nda̍ wāŋ bɛ̄ndūāā o̍ hɛ̍li̍ wa̍ ā mālnu᷄ŋ ma̍ kūā.”

⁵Ma̍ tāŋ Chɔ̍ɔ̍dāŋ le̍e̍lōo̍ ma̍ kɔ̍ ka̍ndū wāŋnda̍ chɔ̄mndo̍ a̍ A̍lo̍yā chi̍e̍e̍, ma̍ kūā a̍ chi̍e̍e̍ wa̍ o̍ lɛ̄ŋndē dɛ̍ŋgbɛ̍le̍ŋ o̍ pēmbo᷄ŋ tɛ̄ɛ̄ŋ Chɔ̍ɔ̍dāŋ ndo̍ ni᷄ŋ ndo̍. Ma̍ cha᷄ŋ lo̍ŋ ma̍ kūā Ka̍a̍dī chi̍e̍e̍, ma̍ hīāū Cha̍sɛ̄ɛ̄.

⁶O̍ ko̍ŋ kɔ̍ɔ̍lī ma̍ māl lo̍ŋ ma̍ kūā Ki̍li̍a̍a̍dī, ma̍ cha᷄ŋ lo̍ŋ ma̍ kūā Ka̍dɛ̍sī, o̍ lɛ̄ŋndē Hi̍ta̍i̍tīi̍ya̍ ni᷄ŋ ma̍ māl vɛ̄lɛ̄ lo̍ŋ ma̍ kūā Da᷅ŋ. Ma̍ cha᷄ŋ Da᷅ŋ ma̍ kūā kūmbū pāa̍le̍ŋ lē dēllo̍ o̍ lɛ̄ŋndē Sa̍i̍dɔ̄ŋ le̍ŋ ni᷄ŋ.

⁷Mɛ̄ɛ̍ nda̍ chɛ᷄ŋ lo̍ŋ ma̍ kūā Ta̍a̍yā, chi̍e̍e̍ wa̍ ō bālāā a̍ kpākī ka̍lā ka̍lā bɛ̄ndōo̍ wo̍. O̍ ko̍ŋ kɔ̍ɔ̍lī, ma̍ bālū chi̍e̍e̍ŋ Hi̍va̍i̍tīi̍ya̍ chōo̍ a̍ chi̍e̍e̍ŋ Ke̍na̍na̍i̍tīi̍ya̍ kpo̍u̍. Mɛ̄ɛ̍ nda̍ chīi̍ a̍ chi̍e̍e̍ŋ mu̍ŋ ma̍ kūā Bīɛ̄ɛ̄si̍ɛ̍bā chi̍e̍e̍ kūmbū tōūwo̍, le̍ kɔ̄la̍ŋ Chu̍dā.

⁸Lɛ̄ŋndē lēŋ kpo̍u̍ ma̍ chīī le̍ŋ bālɔ̄ɔ̄. Ā chīi̍ pāŋgo̍ŋ ŋ̄ ŋɔ̍ma̍hīɔ̍ɔ̍lu̍ a̍ mālɔ̄ bi̍di̍i̍ŋ ma̍lāŋ nda̍ bɔ̄ŋā. O̍ ko̍ŋ kɔ̍ɔ̍lī, ma̍ cha᷄ŋ ma̍ mīīŋgū Chūlu̍sɛ̄lɛ̄m.

⁹Ma̍ kɔ̍ do̍o̍ŋ Dēēve̍ ko̍na̍ mɛ̄ɛ̍ wāŋnda̍ chi̍e̍e̍ya̍ ā wa̍ bōllē pīlɛ̍ kpo̍u̍ kpo̍u̍ yɛ̍. Ma̍ dīmūl Dēēve̍ māā pūa̍a̍ bɛ̍nda̍ le̍ kɔ̄lā wāā o̍ chɔ̄ū wa̍ ā chō kpo̍u̍ kpo̍u̍ I̍sɔ̄lūɛ̄ī wāa̍la̍ŋ kɛ̄mɔ̄ɔ̍ lē ŋɔ̄ma̍a̍ (800,000), Chu̍dā wāa̍la̍ŋ kɛ̄mɔ̄ɔ̍ lē ŋūɛ̍ɛ̍nu̍ (500,000).

¹⁰Kɛ̍ mɛ̄ɛ̍ Dēēve̍ chi̍i̍ wāŋnda̍ chɔ̄m kpo̍u̍, mbo̍ sɔ̄lā sīna᷄ŋndo̍ māā nyɛ̄ o̍ to̍sa̍ wo̍ ō bɛ̄nda̍ le̍. Mbo̍ dīmūl Mɛ̄lɛ̄ka̍ Ya̍a̍wɛ̄ɛ̄ āā, “Mɛ̄lɛ̄ka̍, I̍ to̍sa̍ yɔ̄ŋ wɔ̄ɔ̍ŋ bɛ̄ndū. Ya̍ i̍i̍ nɔ̍ mī ya̍ i̍i̍ to̍sa̍ he̍ī le̍. Kɛ̍ yāndi̍i̍ Mɛ̄lɛ̄ka̍ Ya̍a̍wɛ̄ɛ̄, me̍e̍nu̍ŋ ya̍ le̍ nyɛ̄ ya̍ I̍ to̍sa̍ wo̍. Sūɛ̍i̍ īdīɔ̄mnde̍ pīla̍ ya̍ I̍ to̍sa̍ ni̍.”

¹¹Mi̍ Mɛ̄lɛ̄ka̍ Ya̍a̍wɛ̄ɛ̄ lō o̍ ko̍ŋ mbo̍ dīmūl Dēēve̍ wāna̍ ndɔ̍ su̍a̍ā le̍ Mɛ̄lɛ̄ka̍ wo̍, ndu̍ yɔ̍nūŋ māā Ka̍a̍dī ni̍ āā, “Kɔ̍ mā kɔ̍ di̍mūl Dēēve̍ māā ya̍ Mɛ̄lɛ̄ka̍ Ya̍a̍wɛ̄ɛ̄ di̍mi̍ māā I̍ cho̍ ndu̍ yɛ̄ pālāa̍ hāndɔ̄ɔ̄ chōo̍ le̍ nyɛ̄ o̍ to̍sa̍ wo̍. Le̍la̍ŋ I̍ cho̍ ndu̍ būŋga᷄ŋ kē ŋ̄gāa̍ mbō chūa̍ ī o̍ ye̍e̍mā ve̍. Ī kɛ᷅ o̍ kɛ᷅ o̍ chu̍a̍ pɛ̍ ndi̍ ya̍ I̍ to̍sāl ndu̍ ni̍.” Īdīi̍yo̍ pu̍ŋ dīi̍mā ndɔ̄ɔ̍ pīlɔ̍ɔ̍, mɛ̄ɛ̍ Dēēve̍ chɛ̍ŋ ndɔ̍ɔ̍ o̍ lūa̍ŋ,

¹²

¹³mi̍ Ka̍a̍dī ku̍ā nāa̍ ndu̍ chu̍a̍. Mbo̍ kɔ̍ do̍o̍ŋ ndu̍ ko̍na̍ kpo̍u̍. Mbo̍ dīmūl Dēēve̍ āā, “Būŋgāŋ Mɛ̄lɛ̄ka̍ ke̍ nu̍m ndo̍ŋ ŋ̄ chō mu᷅ŋ ni̍. Būŋgɛ̄ī tāse̍i̍, wɔ̄sīla̍ŋ ŋ̄gāa̍ yīa̍a̍ŋ mā chō o̍ lɛ̄ŋndē nūmnde̍ŋ ni᷄ŋ. Ī dīi̍ŋ ndūɛ̍i̍, pāŋgo̍ŋ ŋ̄gāa̍ ā chō ya̍a̍mɔ̍ɔ̍wa̍a̍ nu̍nmda̍ kīlta̍ŋ. Ŋgāa̍ ndɔ̄ɔ̍ nāā wɔ̄ɔ̍ŋ di̍ū wa᷅ŋnda̍ wo̍ dēlɔ̄ɔ̍ o̍ lɛ̄ŋndē nūmnde̍ŋ ni᷄ŋ mbō tīu̍ lɛ̄ŋnde̍ŋ kpo̍u̍, pālɛ̍i̍ ī yāa̍ wāŋnda̍ chō pīɔ̍mnda̍ŋ. Būŋgāŋ ŋgāa̍ wo̍ŋ mu᷅ŋ ki̍nɛ̍i̍, ī ŋ̄ chō chūā ve̍ a̍ di̍mu̍l la̍, I̍ kɔ̍ di̍mūl Mɛ̄lɛ̄ka̍ Ya̍a̍wɛ̄ɛ̄.”

¹⁴Dēēve̍ tūēīyɔ̄ɔ̍ yōōŋgōo̍ ho̍ō, mbo̍ dīmī āā, “Kpūndɛ̍ bɛ̄ndōo̍ kōma̍l la̍ fɔ̍. I̍ si̍nā mɛ̄ɛ̍ ya̍ I̍ cho̍ tōsā le̍. Kɛ̍ ndu̍yɛ̍ ō wa̍ bɛ̍ɛ̍ le̍nde̍, yɔ̄ŋi̍ wāna̍ chīo̍o̍ tūsi̍ ya̍ nyɛ̄ pālāa̍ chōo̍ yɛ̍, Mɛ̄lɛ̄ka̍ Ya̍a̍wɛ̄ɛ̄ pi̍la̍ tu̍si̍ ya̍ nyɛ̄ pālāa̍ chōo̍. Fo̍ndōle̍ ndu̍ ndu̍ mbō nɔ̄ nyīɛ̍ɛ̍ye̍.”

¹⁵O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ yɔ᷅ŋ nāā wɔ̄ɔ̍ŋ di̍ū wa᷅ŋnda̍ wo̍ mbo̍ tīū lɛ̄ŋndē I̍sɔ̄lūɛ̍i̍le̍ŋ kpo̍u̍. Chɔ̍ŋ i̍di̍i̍yo̍ mbo̍ kūā pālɛ̍i̍ ī yāa̍ wāŋndā chīe̍e̍ya̍ chō wūo̍o̍ tu̍ŋ. Wāŋndā chi̍e̍e̍ya̍ a̍ vi᷅ o̍ pālɛ̍i̍ ya̍a̍ i̍ ke̍ŋ bɛ̄ŋgu̍ I̍sɔ̄lūɛ̄ī kpo̍u̍ wa̍ ā kpo̍u̍ kpo̍u̍ wāa̍la̍ŋ be̍le̍ ŋɔ̍mmɛ̍ū (70,000).

¹⁶Mɛ̄ɛ̍ ki̍i̍la̍nɔ̍ Mɛ̄lɛ̄ka̍ wa̍ ko̍ŋ ba̍lɔ̄ɔ̍ a̍ nāā kōŋ ndo̍ ō wa̍ le̍ kɔ̄la̍ŋ Chūlu̍sɛ̄lɛ̄m tɛ̄ɛ̄mbūūwo̍, mi̍ nyīɛ̍ɛ̍ye̍ bīī Mɛ̄lɛ̄ka̍ Ya̍a̍wɛ̄ɛ̄ mbo̍ māŋgālā kɔ̄llo̍. Mbo̍ dīmūl ki̍i̍la̍nɔ̍ ndɔ̄ ko̍ŋ āā, “Hi̍a̍ū lɛ̄ lāchī le̍, nyɛ̄ ŋ̄ tōsa̍ wo̍ chō tūu̍le̍ŋ.” Ki̍i̍la̍nɔ̍ Mɛ̄lɛ̄ka̍ Ya̍a̍wɛ̄ɛ̄ ko̍ŋ ndu̍ o̍o̍ wa̍ nāa̍ Ālu̍a̍nā Chɛ̄būsa̍i̍tīi̍nɔ̍ ndu̍ o̍o̍ lu̍a̍ā wi̍tīi̍ŋ ndɔ̍ŋ nda̍ kpɛ᷅ŋ.

¹⁷Mɛ̄ɛ̍ Dēēve̍ chɛ̍ ki̍i̍la̍nɔ̍ Mɛ̄lɛ̄ka̍a̍ ho̍ō, mbo̍ dīmūl Mɛ̄lɛ̄ka̍ Ya̍a̍wɛ̄ɛ̄ āā, “Mɛ̄lɛ̄ka̍ ya̍ to̍sa̍ yɔ̄ŋ wɔ̄ɔ̍ŋndo̍ ho̍ō ni̍, mi̍ tɛ̍ɛ̍mbūū a̍ nūm. Ō cho̍ wa᷅ŋnda̍ ha̍ā le̍. Wāŋnda̍ ha̍ā ā chō māchūāā māā lāsāā, mɛ̄ɛ̍ wānā ma̍ndāā lāsāa̍ ō wā nu̍a̍ā o̍ sāa̍ ndūa̍a̍ bā o̍ ye̍e̍mā nda̍ le̍ kɔ̄la̍ŋ ndo̍ lo̍ŋ nda̍ kūā ni̍ yɛ̍, le̍nde̍ nda̍ chō ya̍ o̍ bāni̍. Ō cho̍ nda̍ le̍ tɛ̍ɛ̍mbu̍u̍ a̍ nūm te̍. Le̍la̍ŋ ya̍ a̍ yu̍ŋgu̍ nūu̍ nāa̍ ŋ̄ nɔ̄ ni̍ mā tu̍si̍ nyɛ̄ pālāa̍ chōo̍.”

¹⁸Pāa̍le̍ pi᷅lɛ̍ lē lēŋ kpe̍, mi̍ wāna̍ su̍a̍ā le̍ Mɛ̄lɛ̄ka̍ wo̍ Ka̍a̍dī o̍ ku̍ā nāa̍ Dēēve̍ chu̍a̍ a̍ yōōŋgōo̍. Mbo̍ kɔ̍ di̍mūl ndu̍ āā, “Kɔ̍ nāa̍ Ālu̍a̍nā o̍ lu̍a̍ā ba̍a̍līi̍ŋ ndɔ̍ŋ nda̍ mā kɔ̍ ta̍ŋgūl ndo̍ lo̍ŋ le̍ Mɛ̄lɛ̄ka̍ Ya̍a̍wɛ̄ɛ̄.”

¹⁹O̍ ko̍ŋ mi̍ Dēēve̍ to̍sā mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l Ka̍a̍dī mi̍ Ka̍a̍dī di̍mūl ndu̍ yɛ̍, mbo̍ cha᷄ŋ mbo̍ kūā.

²⁰Mɛ̄ɛ̍ Ālu̍a̍nā chɛ̍ Dēēve̍ hūnɔ̄ɔ̍ nda̍ pūa̍a̍ ndūa̍a̍ mbo̍ kūā mbo̍ kɔ̍ tu̍ndu᷄ŋ Dēēve̍ lābɛ̄ŋgu̍ ni̍ŋ, mbo̍ fūūlūū hɔ̄lla̍ lɛ̄ŋ di̍, le̍ ndu̍ bɛ̄ɛ̄le̍ŋ kīo̍o̍.

²¹Mbo̍ nyūnā Dēēve̍ āā, “vɛ᷅ ya̍ kōmāllo̍ ho̍ō fāllo̍?” Mi̍ Dēēve̍ di̍mūl ndu̍ āā, “I̍ hi᷅ŋ mā ke̍ ya̍ fo̍ndāa̍ ho̍ō mī pe̍ndū. I̍ ye̍e̍ma̍ mī te̍ŋgu̍l Mɛ̄lɛ̄ka̍ Ya̍a̍wɛ̄ɛ̍ ma̍āŋndo̍ na̍nu᷄ŋ, mī nyɔ̍ɔ̍lu̍ ndu̍ mbō fāŋa̍ na̍a̍ kpūndɔ̍ɔ̍ ho̍ō chōo̍.”

²²Mi̍ Ālu̍a̍nā di̍mūl ndu̍ a̍a̍, “Fāllo̍, tē le̍ fo̍ndāa̍ ho̍ō ni̍ chu̍a̍. Nyɛ̄ o̍ nyɛ̄ ŋ̄ yēēma̍ na̍nu᷄ŋ pɛ̍ le̍ Mɛ̄lɛ̄ka̍ kēi̍ chu̍a̍ mā ke̍ Nāūvāā nīa̍a̍ chō na̍nu᷄ŋ, tē a̍ ye̍e̍ma̍ sa̍lā lūāmāā sōlī pɛ̍ ā bīī ā dīī. Yɔ̄mīī na̍a̍ ŋ̍ lūāā ba̍a̍līi̍yo̍ŋ nde̍ ni̍, ī na̍a̍ ŋ̄ yīī na̍ūwa̍ o̍ lākɛ̄su̍ ve̍ ni̍, ndi̍ kpo̍u̍ ī chō na̍nu᷄ŋ, chu̍a̍ mā so̍li̍ sa̍lāa̍ lēcho̍ō.”

²³Mi̍ Ālu̍a̍nā hi̍a̍ū lāchī a̍ sūɛ̍i̍ mbo̍ dīmūl Dēēve̍ āā, “Mbɔ̄ māā Mɛ̄lɛ̄ka̍ Ya̍a̍wɛ̄ɛ̄ o̍ bi̍i̍lu̍ sa̍lā nūmndo̍ fɔ̍.”

²⁴Kɛ̍ mi̍ Māsāa̍ Dēēve̍ di̍mūl ndu̍ āā, “Sāko̍, I̍ ye̍e̍ma̍ mā ke̍ ya̍ nyɛ̄ o̍ nyɛ̄ nūm fo̍ndō le̍. Chɔ̍m ya̍ ba̍a̍ I̍ pi̍a̍ndū. I̍ ye̍e̍ma̍ mi̍ so̍lī sa̍lāa̍ nāa̍ Mɛ̄lɛ̄ka̍ chūā a̍ nyɛ̄ kīāā le̍.” O̍ ko̍ŋ mi̍ Dēēve̍ pi̍a̍ndū ndu̍ fo̍ndāŋ ko̍ŋ o̍ bā a̍ nāūvāā kāŋ le̍ ka̍ni̍ŋ hu̍mbo̍ŋ be̍le̍-ŋu̍ɛ̍ɛ̍nu̍.

²⁵O̍ ko̍ŋ kɔ̍ɔ̍lī, mi̍ Dēēve̍ ta̍ŋgūl ma̍āŋndo̍ lo̍ŋ mbo̍ sōlī sa̍lā lūāmāa̍ a̍ sa̍lā kɔ̄l nyūlōo̍ nāa̍ Mɛ̄lɛ̄ka̍ Ya̍a̍wɛ̄ɛ̄ chu̍a̍ lēcho̍ō. Ndu̍yɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ mu̍lī pīɛ̄īlē ndɔ̄le̍ŋ, mbo̍ fāŋā I̍sɔ̄lūɛ̍i̍ya̍ nāā wɔ̄ɔ̍ŋ kōŋ chōo̍.