Read Southern Kisi Sa̍a̍mi̍ɛ̍ɛ̄ Di̍i̍ŋ Ndɔ̄ɔ̍ 5 Bible Online

Sa̍a̍mi̍ɛ̍ɛ̄ Di̍i̍ŋ Ndɔ̄ɔ̍ 5 - Southern Kisi bible

Sa̍a̍mi̍ɛ̍ɛ̄ Di̍i̍ŋ Ndɔ̄ɔ̍ 5

¹O̍ ko̍ŋ kɔ̍ɔ̍lī, mi̍ yu̍ŋgu̍la̍ŋ I̍sɔ̄lūɛ̄ī kpo̍u̍ la̍ cha̍ŋ ma̍ kūā Hi̍būlɔ̄ŋ chi̍e̍e̍ nāa̍ Dēēve̍ chu̍a̍. Ma̍ kɔ̍ di̍mūl Dēēve̍ āā, “Dēēve̍, na̍a̍ na̍a̍ nya̍ā wānāā pi̍la̍ kpe̍ na̍a̍ ŋ̄ chō ni̍, kōo̍ma̍ pi᷅li̍a̍ŋ kpe̍.

²Bōōndi̍i̍ Sɔ̍ɔ̄ o̍ wa̍ na̍a̍ chōo̍ māsāa̍ ve̍ bɛ̍ɛ̍ nūm ko̍ nūm o̍o̍ ku̍ā a̍ pūa̍a̍ chɔ̄ūwa̍ I̍sɔ̄lūɛ̄ī o̍ chɔ̄ūwo̍ ni̍. Ndu̍yɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ chu̍ēl nu̍m būŋgɛ̄i̍ māā ō chō tōsā mā wa̍ māsāa̍ wānāā ndūa̍a̍ chōo̍ I̍sɔ̄lūɛ̄ī, ndu̍yɛ̍ mā ma̍nda̍ nda̍ mɛ̄ɛ̍ wānā ma̍ndāā lāsāa̍ ō māndā nu̍a̍ā sāa̍ ndūa̍a̍ yɛ̍.”

³Wāŋ bɛ̄ndūa̍a̍ I̍sɔ̄lūɛ̄ī kpo̍u̍, ma̍ chūūŋgi̍āŋ Hi̍būlɔ̄ŋ nāa̍ Dēēve̍ chu̍a̍. O̍ ko̍ŋ, mi̍ Dēēve̍ si᷅m Mɛ̄lɛ̄ka̍ Ya̍a̍wɛ̄ɛ̍ o̍ hɔ̄l Hi̍būlɔ̄ŋ lo̍ŋ mbo̍ tōsā chɛ̄la᷅ŋ kɔ̄l nyūlōo̍ a̍ nda̍. O̍ ko̍ŋ kɔ̍ɔ̍lī, ma̍ tālā ndu̍ chūɛ̄īya̍ŋ o̍ lēbōl le̍ mbō wa̍ māsāa̍ I̍sɔ̄lūɛ̄ī. O̍ ko̍ŋ, mi̍ Dēēve̍ si̍mnu᷄ŋ ma̍sā bɛ̍ndōo̍ le̍ I̍sɔ̄lūɛ̄ī kpo̍u̍.

⁴Dēēve̍ wa̍ wɔ̄sīla̍ŋ be̍le̍-ya̍a̍ (30) mbo̍ sīmnu᷄ŋ ma̍sāa̍ I̍sɔ̄lūɛ̄ī. Ndu̍yɛ̍ mbo̍ tōsā māsāle̍ŋ le̍ wɔ̄sīla̍ŋ be̍le̍ hi̍ɔ̍ɔ̍lu̍ (40).

⁵O̍ tōsa̍ māsāle̍ŋ Hi̍būlɔ̄ŋ le̍ lɛ̄ŋndē Chu̍dāle̍ŋ ki̍nɛ̍i̍, wɔ̄sīla̍ŋ lā ŋɔ᷄mmɛ̍ū a̍ pāŋgo̍ŋ ŋ̄ ŋɔ᷄mpu᷅m. O̍ ko̍ŋ kɔ̍ɔ̍lī, mbo̍ tōsā māsāle̍ŋ Chūlu̍sɛ̄lɛ̄m chi̍e̍e̍ le̍ lɛ̄ŋndē I̍sɔ̄lūɛ̍i̍le̍ŋ a̍ lɛ̄ŋndē Chu̍dāle̍ŋ kpo̍u̍, le̍ wɔ̄sīla̍ŋ be̍le̍-ya̍a̍ a̍ lā yāa̍ (33)

⁶Ndu̍yɛ̍, a̍ te̍le̍ŋ ko̍ŋ Chɛ̄bu̍sa̍i̍tīi̍ya̍ nda̍ wa̍ Chūlu̍sɛ̄lɛ̄m chi̍e̍e̍ ni̍. O̍ ko̍ŋ, mi̍ Dēēve̍ chūā pūa̍a̍ ndūa̍a̍ chɔ̄ūwa̍ mbo̍ kūā a̍ nda̍ le̍ Chūlu̍sɛ̄lɛ̄m dēlɔ̄ɔ̍ chōo̍ le̍ mbō sōli̍ Chɛ̍bu̍sa̍i̍tīi̍ya̍a̍ wa̍ lo̍ŋ nda̍. Chɛ̄bu̍sa̍i̍tīi̍ya̍ wa̍ yīya᷄ŋndo̍ māā Dēēve̍ nɔ̍lā mbō lūɛ̄ī lo̍ŋ a̍ sɔ̍ŋgɔ̄ɔ̍ le̍. Ma̍ dīmūl Dēēve̍ āā, “Bɔ̄ɔ̄, nu᷄m nɔ̍lā mā lūɛ̄ī Chūlu̍sɛ̄lɛ̄m a̍ sɔ̍ŋgɔ̄ɔ̍ ni̍? Wānāā sūmɛ̍i̍ya̍ a̍ nāmtāa̍ cho̍ chi̍e̍e̍ na̍nu᷄ŋ nda̍ bɛ̍ɛ̍ ā nɔ̄lā mā sīmu̍l nu̍m mā tōsa̍ a̍ lu̍e̍ī na̍nu᷄ŋ a̍ sɔ̍ŋgɔ̄ɔ̍ le̍.”

⁷Ndu̍yɛ̍ Sa̍a̍yɔ̄ŋ, ndu̍ yɔ̍nūŋ māā Chūlu̍sɛ̄lɛ̄m ni̍, ō nda̍ a̍a̍ ve̍e̍lū vɛ̍lɛ̄ a̍a̍ chi̍e̍e̍ Dēēvi̍o̍o̍ wo̍, ō wa̍ ō bɛ̄ɛ̄ndīāā ō kālā ka̍lā le̍ yɔ̄ŋi̍ ya̍a̍mɔ̍ɔ̍wa̍ ā lūɛ̍i̍. Mi̍ Dēēve̍ di̍mūl pūa̍a̍ ndūa̍a̍ āā, “Lā lūɛ̍i̍ o̍ ku̍a̍tɛ̄i̍ māmɛ̄ŋ nda̍ tɛ̄nda̍ ho̍ō wo̍ ni᷄ŋ mī lā lo̍ kɔ̄la̍ŋ lēni᷄ŋ ha̍a̍a̍ mī lā he᷄l chi̍e̍e̍ mī lā kɔ̍ bi̍ī chi̍o̍o̍. Chɛ̍bu̍sa̍i̍tīi̍ya̍a̍ cho̍ ha̍ā māā wānāā bɛ̄vɛ̍i̍ ndu̍yɛ̍, ma̍ wā māā wānāā sūmɛ̍i̍ ya̍, I̍ tu̍l nda̍ lēyɛ̄ bɔ̄ɔ̍.” Le̍la̍ŋ, mi̍ sūɛ̍i̍ he̍ī sīmnu᷄ŋ ni̍ko̍ māā tāle̍ āā, “Wānā bɛ̍vɛ̍i̍ ni̍ wānā su̍mɛ̍i̍ ni̍, ā lu̍e̍ī o̍ chi̍ɛ̍ī lēmāsāa̍ ni᷄ŋ te̍.” O̍ ko̍ŋ mi̍ Dēēve̍ nda̍ pūa̍a̍ ndūa̍a̍ chɔ̄ūwa̍ ā nɔ̄lā ma̍ bīī chi̍o̍o̍ ho̍ō.

⁸

⁹Mɛ̄ɛ̍ nda̍ bīī chi̍e̍e̍ wa̍ ho̍ō ō bɛ̄ɛ̄ndīāā ō kālā ka̍lā le̍ yɔ̄ŋi̍ ya̍a̍mɔ̍ɔ̍wa̍ ā lūɛ̍i̍ yo̍, mi̍ Dēēve̍ kɔ̍ cha᷅l ni̍ko̍ lo̍ŋ, mbo̍ sīīŋgūū ndu̍ chi̍e̍e̍ ndɔ̍ lēmāsā. Mbo̍ kē ndu̍ dīōla̍ŋ āā, “Chi̍e̍e̍ Dēēvi̍o̍o̍.” O̍ ko̍ŋ kɔ̍ɔ̍lī, mi̍ Dēēve̍ chɔ̍ɔ̍lū chi̍o̍o̍ ho̍ō kūmbī a̍ ndu̍ tāŋgūllo̍ bālɔ̄ɔ̍ chɛ̍ chɛ̍, chɔ̍ŋ nāa̍ nda̍ pēēlu̍ fo̍ndāa̍ a̍ pūūlōo̍ wa̍, mbo̍ kūā a̍ ndu̍ chɔ̄ɔ̄lōo̍ le̍nde̍ kɛ᷅.

¹⁰Ndu̍yɛ̍ mi̍ Dēēve̍ chɔ̄ɔ̄lū sīmnɔ᷄ŋ ma̍sa̍ kpāāyā bɛ̍ndū, kāni̍ fo̍ndōle̍, Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ kpu̍lu̍ŋgūma̍ bɛ̄ndōo̍ ō wa̍ ndu̍ kɔ̄ɔ̄lī.

¹¹Mi̍ Māsāa̍ Hi̍lūām, o̍ wa̍ lɛ̄ŋndē Ta̍a̍yāle̍ŋ ndo̍ ō vīām pūa̍a̍ ndūa̍a̍ a̍ yɔ̄mīī si̍dāā ve̍, yɔ̄mīī tāŋgūlɛ̄ī kɛ̄ndɛ̄ kɛ̍ndɛ̄i̍, le̍ mā yōō Dēēve̍. O̍ ko̍ŋ kɔ̍ɔ̍lī, mbo̍ yɔ̄ŋ vɛ̄lɛ̄ ka̍a̍pi̍ndɛ̄i̍ya̍, a̍ wānāā ndūa̍a̍ to̍sā wa̍llo̍ a̍ pōūta̍ŋ nda̍, le̍ chīɛ̄ī lēmāsa̍ Dēēvi̍o̍o̍ tāŋgūllo̍.

¹²O̍ ko̍ŋ, mi̍ Dēēve̍ si̍nā kpe̍e̍kpe̍i̍ māā Mɛ̄lɛ̄ka̍ Ya̍a̍wɛ̄ɛ̍ hɛ̍li̍ ndu̍ le̍ wāa̍ māsāa̍ I̍sɔ̄lūɛ̄ī ni̍, ndu̍yɛ̍ mbo̍ sīnā māā le̍ sa̍bū wāŋnda̍ I̍sɔ̄lūɛ̍i̍, Mɛ̄lɛ̄ka̍ wānāā ndūa̍a̍, māā le̍la̍ŋ Mɛ̄lɛ̄ka̍ tōsa̍ ni̍ mi̍ māsāle̍ ndɔ̄le̍ŋ lē sīmnu᷄ŋ ma̍sāle̍ kpāāyā bɛ̍ndū.

¹³Mɛ̄ɛ̍ Dēēve̍ fāŋa̍ŋ Hi̍būlɔ̄ŋ mbo̍ kɔ̍ cha᷅l Chūlu̍sɛ̄lɛ̄m, mbo̍ kɔ̍ chu̍ā vɛ̄lɛ̄ lāāndūāā pɔ̄mbūāā chēle̍ŋ lo̍ŋ ta̍u̍. Ndu̍yɛ̍ mbo̍ vīālū vɛ̄lɛ̄ chūāūwa̍ ta̍u̍ a̍ nda̍.

¹⁴Chūāūwāā o̍ ve̍lū ka̍ŋ lo̍ŋ nda̍, nda̍ cho̍ ha̍ā ni̍. Si̍a̍mūāā, a̍ Si̍o̍ba̍bī, a̍ Ne̍tāŋ, a̍ Sɔ̍lɔ̍mɔ̄ŋ,

¹⁵a̍ I̍bi̍hāā, a̍ Īli̍sīāā, a̍ Nɛ̍fɛ̍kī, a̍ Chāfi̍yā,

¹⁶a̍ Ɛ̄līsi̍a̍mā, a̍ Ɛ̄li̍a̍a̍dā, a̍ Ɛ̄līfɛ̍lɛ̍tī.

¹⁷Mɛ̄ɛ̍ Fīli̍i̍tīāŋnda̍ tūēī māā ā sīīŋgu̍u̍ Dēēve̍ māsāa̍ le̍ I̍sɔ̄lūɛ̄ī, ma̍ chūā pūa̍a̍ ndāa̍ chɔ̄ūwa̍ kpo̍u̍, ma̍ kūā Dēēve̍ nūūwāa̍ le̍ ndu̍ bīyɔ̄ɔ̍. Kɛ̍ mi̍ Dēēve̍ tu̍ɛ̍ī māā Fīli̍i̍tīāŋnda̍ cho̍ ndu̍ nūūwāa̍. O̍ ko̍ŋ, mbo̍ kɔ̍ lu̍ɛ̍i̍nu᷄ŋ o̍ fo̍ndāŋ wa̍ ō bɛ̄ɛ̄ndīāā ō kālā ka̍lā le̍ yɔ̄ŋi̍ ya̍a̍mɔ̍ɔ̍wa̍ ā lūɛ̍i̍ yo̍.

¹⁸Mi̍ Fīli̍i̍tīāŋnda̍ hūŋ ma̍ hu᷄ŋ ti̍ū o̍ dɛ̍ŋgbɔ̍ɔ̍ Lu̍ɛ̍fēm ni̍ŋ kpo̍u̍.

¹⁹Mi̍ Dēēve̍ lō o̍ ko̍ŋ, mbo̍ nyūnā Mɛ̄lɛ̄ka̍ Ya̍a̍wɛ̄ɛ̍ dīōm āā, “Bāā I̍ kɔ̍ mī kɔ̍ sa̍ā Fīli̍i̍tīāŋnda̍ ha̍ā a̍ sɔ̍ŋgɔ̄ɔ̍? Ā kē ya̍ ni̍ŋ kpa̍a̍yāa̍ mī ye᷅m nda̍?” Mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl ndu̍ āā, “E̍ī, kɔ̍ sa̍ā nda̍ a̍ sɔ̍ŋgɔ̄ɔ̍. I̍ cho̍ nu̍m kpāāyāa̍ kē mā yēm nda̍.”

²⁰Mi̍ Dēēve̍ chūā pūa̍a̍ ndūa̍a̍ mbo̍ kūā o̍ fo̍ndāŋndo̍ dīōla̍ŋ āā Ba̍a̍l Pɛ̍lu̍a̍sīm,[1] mbo̍ kɔ̍ sa̍ā Fīli̍i̍tīāŋnda̍ a̍ sɔ̍ŋgɔ̄ɔ̍, ndu̍yɛ̍ mbo̍ yām nda̍ ma̍ nyāānu᷄ŋ. Mi̍ Dēēve̍ lō o̍ ko̍ŋ mbo̍ dīmī āā, “Mɛ̄lɛ̄ka̍ Ya̍a̍wɛ̄ɛ̄ o̍ pu̍u̍si̍a̍a̍ ya̍a̍mɔ̍ɔ̍wa̍a̍ nīa̍a̍ ya̍ lāchī, a̍ kpāāya̍ ndɔ̄ bɛ̍ndōo̍.” Mɛ̄ɛ̍ nyɛ̄ ko̍ŋ to̍sa̍ ni̍ ma̍ kē fo̍ndāŋ kōŋ dīōla̍ŋ āā Bāāl Pɛ̍lu̍a̍sīm.

²¹Ndu̍yɛ̍ mɛ̄ɛ̍ Fīli̍i̍tīāŋnda̍ wa̍ nyāānɔ᷄ŋndo̍, nyɛ̄m nda̍ a̍a̍ so̍o̍lūū māā mɛ̄lɛ̄ka̍ā ndā wo̍ŋ, ma̍ mɛ̄ī mu̍ŋ kpo̍u̍ ma̍ nyāānu᷄ŋ. Mi̍ Dēēve̍ nda̍ pūa̍a̍ ndūa̍a̍ ā chɔ̄ɔ̄vīāā mu̍ŋ ma̍ kūānu᷄ŋ a̍ mu̍ŋ.

²²O̍ ko̍ŋ kɔ̍ɔ̍lī, mi̍ Fīli̍i̍tīāŋnda̍ chūūŋgi̍āŋ vɛ̍lɛ̄ o̍ dɛ̍ŋgbɔ̍ɔ̍ Lu̍ɛ̍fēm, ma̍ tīū lo̍ŋ kpo̍u̍.

²³Mi̍ Dēēve̍ lo᷅ o̍ ko̍ŋ, mbo̍ nyūnā vɛ̄lɛ̄ Mɛ̄lɛ̄ka̍ Ya̍a̍wɛ̄ɛ̄ dīōm a̍ ndi̍ o̍kɔ̄ɔ̄. Mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl ndu̍ āā, “Tē a̍ wa̍ nda̍ ni᷅ŋ chīŋa̍la᷅ŋndo̍ pɛ̍, fu̍lā nda̍ o̍ hɔ̄l sa̍kpō le̍. Kɔ̍ ke̍ī nda̍ a̍ mākɔ̄ɔ̄ mā chīŋa̍la᷅ŋ nda̍ o̍ yɔ̄mīī bāli̍sām nde̍ īkɛ̄i̍.

²⁴Tē lā tūēī pɛ̍ pe̍lo᷄ŋ sūɛ̍i̍ o̍ yɔ̄mīī bāli̍sām nde̍ chōo̍, mɛ̄ɛ̍ ya̍ pi̍la̍ Mɛ̄lɛ̄ka̍ Ya̍a̍wɛ̄ɛ̄ hi̍o̍ū nyā lāchī ni̍ le̍ mī kɔ̍ sɔ̍ŋgā a̍ Fīli̍i̍tīāŋnda̍ mī ye᷅m nda̍. Lā kɔ̍ ni̍ko̍ chɔ̍ chɔ̍ mī lā kɔ̍ chi᷅ŋa̍la᷅ŋ nda̍”

²⁵Ndu̍yɛ̍ mi̍ Dēēve̍ to̍sā mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l ndu̍ yɛ̍. Ma̍ kɔ̍ chi᷅ŋa̍la᷅ŋ Fīli̍i̍tīāŋnda̍, ndu̍yɛ̍ ma̍ yām nda̍. Ma̍ chūā nda̍ tōūwɔ̄ɔ̍ Ɛ̄sīɔ̄ŋkɛ̍bɛ̄ chi̍e̍e̍ ka̍ū ma̍ fūūlūū a̍ nda̍ Kɛ̍sɛ̄ɛ̄ chi̍e̍e̍ ndi̍.