Read Southern Kisi Māsāā Bɛ̍ndūāā Tāsi̍a̍a̍ 1 Bible Online

Māsāā Bɛ̍ndūāā Tāsi̍a̍a̍ 1 - Southern Kisi bible

Māsāā Bɛ̍ndūāā Tāsi̍a̍a̍ 1

¹Mi̍ ī yɔ̄ŋ mi̍ Māsā Bɛ̍ndōo̍ Dēēve̍ o̍ yu̍wā ni᷅ŋ ku̍ndɛ̍ɛ̄ bɛ̄ndū. Mɛ̄ɛ̍ o̍ yu̍wa̍ ni᷅ŋ te̍i̍, bu̍ɛ̍i̍yāā ndūa̍a̍ nda̍ a̍a̍ ku̍u̍mbu̍u̍ ndu̍ ni᷅ŋ bɛ̍ɛ̍ bi̍lāla̍ŋ, hūēīye̍ ndi̍ i̍i̍ ki̍o̍lū lɛ̍ ndu̍ lēkɔ̄ɔ̍ le̍.

²O̍ ko̍ŋ, mi̍ bu̍ɛ̍i̍yāā ndūāā dīmūl ndu̍ āā, “Fāllo̍, a̍ yu̍wa̍ ni᷅ŋ ō bɔ̄ɔ̍. Le̍la̍ŋ ŋ̄ nūūvīāl lɔ̍ nu̍m chūāāmbɔ̄ lāāndū pɔ̄mbɔ̄ mbō hu᷄ŋ wa᷅ nu̍m īkɛ̄i̍, mbō mānda̍ nu̍m ndu̍yɛ̍, mbō hīnī nu̍m īkɛ̄i̍ le̍ nu̍m dīāllo̍ŋ tūūlōo̍.”

³Ma̍ kēēlā hɔ̄lte̍ŋ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ kpo̍u̍, ma̍ sāālu᷄ŋ chu̍ā lāāndū pīlɛ̍ dīōla̍ŋ āā Ābi̍si̍a̍kī, wānā wa̍ā Si̍u̍nɛ̄m chi̍e̍e̍. Ndu̍yɛ̍ nāŋɔ̄ɔ̍ pīla̍ chūa̍a̍ ho̍ō ndu̍ o̍o̍ na̍nu᷄ŋ ni̍. Ma̍ yīl ndu̍ le̍ Dēēve̍ le̍ mbō wa̍ ndu̍ īkɛ̄i̍ mbō mānda̍ ndu̍. Kɛ̍ dɛ̍nɛ̍ o̍ dɛ̍nɛ̍ ke̍e̍ku̍ nda̍ tɛ̄ɛ̄ŋ nda̍ Dēēve̍ le̍.

⁴

⁵Ndu̍yɛ̍ o̍ pūa̍a̍ Dēēve̍ wa̍ tɛ̄ɛ̄ŋ ki̍nɛ̍i̍, Ādo̍ni̍chā wa̍ ni᷅ŋ wānā ba̍nāa̍ kpo̍u̍ ni̍. Ndu̍ A̍bi̍sa̍lɔ̄m ndu̍ o̍o̍ chu̍u̍ o̍kɔ̄ɔ̄ ni̍. Ādo̍ni̍chā ko̍ŋ kāla̍ ndɔ̍ wa̍ Ha̍kāā ni̍. Ndu̍yɛ̍ Ādo̍ni̍chā bɛ̍ɛ̍ nāŋɔ̄ɔ̍ pīla̍ ndu̍ o̍o̍ na̍nu᷄ŋ ni̍. Ndu̍yɛ̍ Dēēve̍ fi̍nyā ndɔ̄ yɛ̍ ndu̍ o̍o̍ chɔ̍ bɛ̍ɛ̍ Ādōna̍i̍chā sūɛ̍i̍ wɔ̍ɔ̍ŋnde̍ tōsāa̍ ndu̍ o̍o̍ do̍u̍nūŋ tu̍mbe̍ a̍ ndu̍ le̍, fo̍ndōle̍ māā yɔ̄ŋi̍ o̍ tɛ̍ɛ̍mbu̍u̍ ndu̍ kɔ̄l. Pāa̍le̍ pi᷅lɛ̍, mi̍ Ādo̍ni̍chā o̍ di̍mī āā, “I̍ si̍nā māā ya̍ nɔ̍ ni̍ mī si̍mnu᷄ŋ māsāa̍ o̍ fōōfo̍ kɛ̄ki̍ɔ̍ɔ̍.” O̍ ko̍ŋ, mbo̍ chūūŋgīāā nyɛ̄lā nyāāna᷄ŋnda̍ su̍a̍a̍ ā nāŋ nda̍ŋ a̍ su̍a̍a̍ na᷅ŋ nyɛ̍lā lāŋ nda̍, ndu̍yɛ̍ o̍ ko̍ŋ kɔ̍ɔ̍lī, mbo̍ hɛ̄lī pūa̍a̍ kūā o̍ su̍a̍a̍ chōo̍ wa̍ ŋ̄wāŋ be̍le̍-ŋu̍ɛ̍ɛ̍nu̍ le̍ ndu̍ wa̍ā kɔ̄ɔ̄lī.

⁶

⁷Mi̍ Ādo̍ni̍chā ka̍ndū bɛ̍ɛ̍ wa᷅ŋnda̍ kɔ̄lta̍ŋ mūlīo̍o̍ le̍ mā hīōū ndu̍ kɔ̄ɔ̄lī. Mbo̍ sūūki̍āŋ a̍ Cho̍wa̍bī wāna̍ wa̍ pūa̍a̍ chɔ̄ūwāa̍ Dēēve̍ fi̍nyā ndɔ̄ wa̍ kpo̍u̍ bo᷅lle̍ŋ ndo̍. Cho̍wa̍bī ko̍ŋ kāla̍ ndɔ̍ wa̍ Sɛ̄lu̍i̍yā ni̍. O̍ ko̍ŋ kɔ̍ɔ̍lī, mbo̍ sūūki̍āŋ vɛ̍lɛ̄ a̍ Ābīa̍a̍tā wāna̍ ndu̍ o̍o̍ so̍lī sa̍lāa̍ o̍ Mɛ̄lɛ̄ka̍ lo̍ wo̍, nda̍ kpo̍u̍ mbo̍ mūlī nda̍ kūmbū ndɔ̄ɔ̍, ma̍ hīāū ndu̍ kɔ̄ɔ̄lī.

⁸Kɛ̍ Sa̍dɔ̍kī, ō ndu̍ o̍o̍ so̍lī vɛ̍lɛ̄ sa̍lāa̍ o̍ Mɛ̄lɛ̄ka̍ lo̍ wo̍ ni̍, a̍ Bɛ̄na̍yā po̍ Chɛ̄hōwa̍dā wo̍, a̍ Ne̍tāŋ wāna̍ ndu̍ o̍o̍ su̍a̍ā le̍ Mɛ̄lɛ̄ka̍ wo̍, a̍ Si̍mɛ̄ī, a̍ Lu̍ɛ̍ī, a̍ pūa̍a̍ chɔ̄ūwāa̍ nda̍ a̍a̍ ma̍ndā Dēēve̍ wa̍, nda̍ ki̍nɛ̍i̍ nda̍ hīu̍ ndu̍ kɔ̄ɔ̄lī le̍.

⁹Pāa̍le̍ pi᷅lɛ̍, mi̍ Ādo̍ni̍chā bɛ̍ɛ̍ndīa̍ŋ le̍ sa̍lāa̍ sōlīo̍o̍ o̍ fo̍ndāŋndo̍ dīōla̍ŋ āā pōū Lākɛ̄ū o̍ pēē pɔ̍mbɔ̄ɔ̍ īkɛ̄i̍ dīōla̍ŋ āā Ɛ̄nīlo̍kɛ̄ɛ̄. Mbo̍ vēēlū pɔ̄mbūāā ndūa̍a̍ ā pīli̍a̍a̍ kpo̍u̍, a̍ wāŋ bɛ̄ndūāā lēlɛ̄ŋnda̍ Chu̍dā o̍ sa̍lāa̍ ho̍ō sōlīo̍o̍. Mbo̍ dīī sāa̍, a̍ nāūwa̍, o̍ ko̍ŋ kɔ̍ɔ̍lī, a̍ nāūwāā chēlu̍lɛ̍i̍ya̍a̍ kɛ̍ndɛ̄ kɛ̍ndīa̍a̍ mbo̍ sōlī nda̍ sa̍lāa̍.

¹⁰Kɛ̍ Sɔ̍lɔ̍mɔ̄ŋ pɔ̍mbɔ̄ ndɔ̄ ni̍, a̍ Ne̍tāŋ wāna̍ ndu̍ o̍o̍ su̍a̍ā le̍ Mɛ̄lɛ̄ka̍ wo̍, a̍ Bɛ̄na̍yā, a̍ pūa̍a̍ chɔ̄ūwāā nda̍ a̍a̍ ma̍ndā Dēēve̍ wa̍, nda̍ nda̍ ki̍nɛ̍i̍ ō vēēlu̍ nda̍ o̍ sa̍lāa̍ ho̍ō le̍.

¹¹Mɛ̄ɛ̍ Ne̍tāŋ wāna̍ ndu̍ o̍o̍ su̍a̍ā le̍ Mɛ̄lɛ̄ka̍ wo̍ ō chē nyɛ̍ yɔ̍nu̍ŋ ndo̍, mbo̍ mālnu᷄ŋ mbo̍ kūā nāa̍ Bāāsi̍ɛ̍bā kālāa̍ Sɔ̍lɔ̍mɔ̄ŋ chu̍a̍. Mbo̍ kɔ̍ di̍mūl ndu̍ āā, “Bāāsi̍ɛ̍bā, ā sīnā pa̍ māā Ādo̍ni̍chā po̍ Ha̍kāā wo̍ ō sīīŋgu̍u̍ ndu̍ pi̍la̍ māsāa̍? Ndu̍yɛ̍ sīnā bɛ̍ɛ̍ Māsā Bɛ̍ndōo̍ Dēēve̍ o̍ si̍na̍ a̍ ndi̍ o̍kɔ̄ɔ̄ le̍.

¹²Le̍la̍ŋ nyɛ̄ ya̍ I̍ cho̍ nu̍m dīmūl lo̍, tē ā ye̍e̍ma̍ pɛ̍ nūm ni̍, Sɔ̍lɔ̍mɔ̄ŋ po̍ nu̍m ni̍ mī lā lo̍ yōōmū, mɛ̄ɛ̍ chɔ̍ŋ mā kɔ̍ di̍mūl Māsā Bɛ̍ndōo̍ Dēēve̍ a̍ ndi̍ o̍kɔ̄ɔ̄.

¹³Chɔ̍ŋ le̍ pi᷅lɛ̍ kpe̍ mā ko̍ma̍l Dēēve̍, mā kɔ̍ di̍mūl ndu̍ āā, ‘Māsāa̍, a̍ chu̍e̍l la̍ būŋgɛ̄i̍ ma̍ mēnāla᷄ŋ ya̍ māā tē a̍ hu̍ŋ fa̍ŋā pɛ̍, po̍ nūu̍ Sɔ̍lɔ̍mɔ̄ŋ cho̍ mīīŋgū māsāa̍ o̍ fōōfō nu̍mndo̍ ni̍. Kɛ̍ mi̍ chē mɛ̄ɛ̍ Ādo̍ni̍chā po̍ nu̍m ndo̍ ō si̍i̍ŋgu̍ŋ ndu̍ pi̍la̍ māsā yɛ̍.

¹⁴Bōōndi̍i̍ ŋ̄ chō wā māsāa̍ sūɛ̍i̍ he̍ī chɔ̄mndo̍ ve̍, ya̍ pi̍la̍ I̍ lu̍ɛ̍ī I̍ di̍mu̍l ndu̍ māā nyɛ̄ o̍ nyɛ̄ ŋ̄ chō dīmīo̍o̍ tōnya̍ o̍ cho̍ ni̍.’ ”

¹⁵Mi̍ Bāāsi̍ɛ̍bā ma̍lnu᷄ŋ mbo̍ kūā o̍ Māsāa̍ Dēēve̍ lo̍ chi̍ɛ̍ī ni̍ŋ. Dēēve̍ wa̍ īhīni̍ chi̍ɛ̍ī ni̍ŋ, ō wa̍ ni᷅ŋ ō yūwɛ̍i̍ ku̍ndɛ̄ɛ̄ bɛ̄ndū. Ābi̍si̍a̍kī, chūāāmbɔ̄ nda̍ nūūvi̍a̍l ndu̍ le̍ ndu̍ māndāa̍ wo̍ ō wa̍ ndu̍ īkɛ̄i̍.

¹⁶Mi̍ Bāāsi̍ɛ̍bā lu̍ɛ̍ī mbo̍ kɔ̍ tu̍ndu̍ŋ Dēēve̍ o̍ lābɛ̄ŋgu̍ ni̍ŋ le̍ ndu̍ bɛ̄ɛ̄le̍ŋ kīo̍o̍. Mi̍ Dēēve̍ nyu̍nā ndu̍ āā, “Vɛ᷅ hūnɔ̄ɔ̍ ho̍ō Bāāsi̍ɛ̍bā, īsɔ̄ɔ̍ ni̍?”

¹⁷Mi̍ Bāāsi̍ɛ̍bā di̍mūl ndu̍ āā, “Māsāa̍, a̍ chu̍e̍l la̍ būŋgɛ̄i̍ ma̍ mēnāla᷄ŋ ya̍ o̍ Mɛ̄lɛ̄ka̍ Ya̍a̍wɛ̄ɛ̄ nūmndo̍ lo̍ po̍, māā tē a̍ hu̍ŋ yu̍wā fɛ̍ɛ̍ŋ pɛ̍, māā Sɔ̍lɔ̍mɔ̄ŋ po̍ nu̍m ŋ̄ chō mīŋgī māsāa̍ o̍ fōōfō nu̍mndo̍ ni̍.

¹⁸Kɛ̍ Ādo̍ni̍chā po̍ nu̍m sīīŋgu̍ŋ ndu̍ pi̍la̍ māsāa̍, ā sīnā pa̍ a̍ ndi̍ o̍kɔ̄ɔ̄?

¹⁹Ō bīī mbo̍ dīū sāa̍ a̍ nāūwa̍, o̍ ko̍ŋ kɔ̍ɔ̍lī, a̍ nāūwāā chēlu̍lɛ̍i̍ya̍a̍ kɛ̍ndɛ̄ kɛ̍ndīa̍a̍ ta̍u̍ ta̍u̍ mbo̍ sōlī sa̍lāla̍ŋ. Ndu̍yɛ̍ Cho̍wa̍bī, wāna̍ cho̍ pūa̍a̍ nu̍m a̍ chɔ̄ūwa̍ bōlle̍ŋ ndo̍ ni̍, a̍ Ābīa̍a̍tā wāna̍ so̍lī sa̍lāa̍ o̍ Mɛ̄lɛ̄ka̍ lo̍ wo̍, mbo̍ vēēlū nda̍ o̍ sa̍lā kōŋ sōlīo̍o̍ lātūlu̍ a̍ pūa̍a̍ nu̍m ā pīāāndūa̍a̍ ā pīli̍a̍a̍ kpo̍u̍, mɛ̄ɛ̍ Sɔ̍lɔ̍mɔ̄ŋ po̍ nu̍m ō vēēlu̍ le̍.

²⁰Ndu̍yɛ̍ su̍ŋ su̍ŋ nūm wāŋnda̍ I̍sɔ̄lūɛ̄ī kpo̍u̍ a̍ cho̍ tōfāa̍ ni̍, le̍ mā chɔ̍m nda̍ wāna̍ mi̍i̍ŋgū ni̍ŋ ma̍sāa̍ o̍ fōōfō nu̍mndo̍ wo̍. Le̍la̍ŋ mɛ̄ɛ̍ mā to̍sa̍ īsɔ̄ɔ̍ o̍ sūɛ̍i̍ he̍ī ni᷅ŋ.

²¹Tē ō cho̍ ko̍ŋ te̍, tē a̍ hu̍ŋ fa̍ŋa᷄ŋ pɛ̍, ya̍ ni̍, Sɔ̍lɔ̍mɔ̄ŋ po̍ nī ni̍, wāŋnda̍ chō na̍a̍ chūā māā wānāā lākpūndi̍a̍a̍ na̍a̍ ŋ̄ cho̍ ni̍.”

²²Bāāsi̍ɛ̍bā lo̍ Dēēve̍ sūɛ̍i̍ he̍ī chɔ̄mndo̍, mi̍ Ne̍tāŋ wānāa̍ su̍a̍ā le̍ Mɛ̄lɛ̄ka̍ wo̍ ō hūŋ.

²³Ma̍ dīmūl Dēēve̍ māā Ne̍tāŋ ye̍e̍ma̍ mbō chē ndu̍. Mi̍ Ne̍tāŋ lu̍ɛ̍ī mbo̍ kɔ̍ tu̍ndu᷄ŋ Dēēve̍ o̍ lābɛ̄ŋgu̍ ni᷄ŋ le̍ ndu̍ bɛ̄ɛ̄le̍ŋ kīo̍o̍.

²⁴Mbo̍ dīmūl Dēēve̍ āā, “Māsāa̍, nu᷄m di̍mi̍ ni̍ māā Ādo̍ni̍chā nɔ̍ mbō wa̍ māsāa̍ o̍ fōōfō nu̍mndo̍ ni̍?

²⁵Ō mālnu̍ŋ ha̍ū mbo̍ kɔ̍ dīū sāa̍ ta̍u̍ ta̍u̍ a̍ nāūwa̍, o̍ ko̍ŋ kɔ̍ɔ̍lī, a̍ nāūwāā chēlu̍lɛ̍i̍ya̍a̍ kɛ̍ndɛ̄ kɛ̍ndīa̍a̍ mbo̍ sōlī sa̍lāla̍ŋ. Ndu̍yɛ̍ Cho̍wa̍bī wāna̍ cho̍ pūa̍a̍ nu̍m ā chɔ̄ūwa̍ bōlle̍ŋ ndo̍ ni̍, a̍ Ābīa̍a̍tā wāna̍ so̍lī sa̍lāa̍ o̍ Mɛ̄lɛ̄ka̍ lo̍ wo̍ a̍ pūa̍a̍ nu̍m ā pīāāndūa̍a̍ ā pīli̍a̍a̍ nda̍ kpo̍u̍ mbo̍ yōōŋgū nda̍. Wāŋnda̍ chō kūūlīāāla̍ŋ lo̍ŋ kpe̍e̍kpe̍i̍ mɛ̄ɛ̍ na̍a̍ ŋ̄ sūāā nu̍a̍ā yɛ̍ mā dīmī āā, ‘Vi̍o̍u̍ na̍a̍ chōo̍ Māsā Bɛ̍ndōo̍ Ādo̍ni̍chā’.

²⁶Kɛ̍ ya̍ ni̍, Sa̍dɔ̍kī wāna̍ so̍lī sa̍lāa̍ o̍ Mɛ̄lɛ̄ka̍ lo̍ wo̍ ni̍, Bɛ̄na̍yā po̍ Chɛ̄hōwa̍dā wo̍ ni̍, a̍ Sɔ̍lɔ̍mɔ̄ŋ po̍ nu̍m na̍a̍ ki̍nɛ̍i̍ ō vēēlu̍ na̍a̍ le̍.

²⁷Fāllo̍ māsāa̍, nu᷄m di̍mi̍ ni̍ māā ā sīīŋgu̍u̍ Ādōna̍i̍chā māsāa̍, o̍ fōōfō nu̍mndo̍ na̍a̍ cho̍ nu̍m wa̍llo̍ o̍ bā bɛ̄ŋgu̍ wa̍ a̍ di̍mu̍l na̍a̍ le̍?”

²⁸A̍ te̍le̍ŋ Ne̍tāŋ o̍ wa̍ sūūki̍āŋndo̍ nda̍ Dēēve̍ wo̍, Bāāsi̍ɛ̍bā ndu̍ ndu̍ o̍o̍ fu̍la̍ŋ ni᷅ŋ. Mi̍ Dēēve̍ dīmī āā, “Lā vēēlu̍l lɔ̍ ya̍ Bāāsi̍ɛ̍bā mbō mīīŋgu̍ na̍nu᷄ŋ.” Ma̍ vēēlū Bāāsi̍ɛ̍bā mbo̍ lūɛ̄ī mbo̍ kɔ̍ si᷅m Dēēve̍ lāchī.

²⁹Mi̍ Dēēve̍ di̍mūl ndu̍ āā, “Bāāsi̍ɛ̍bā, I̍ me̍na̍ŋ Mɛ̍lɛ̄ka̍ Ya̍a̍wɛ̄ɛ̄ lo̍ po̍, Mɛ̄lɛ̄ka̍ pi̍ŋi̍ ya̍ o̍ kpūndɛ̍la̍ŋ tɛ̄ɛ̄ŋ ndo̍,

³⁰būŋgɛ̄ī ya̍ I̍ chu̍e̍l nu̍m mi̍ me̍na᷄ŋ o̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍ lo̍ ve̍, ī lɔ᷅l ha̍ū le̍ pēēlōo̍ le̍. Sɔ̍lɔ̍mɔ̄ŋ po̍ nu̍m chō hāū si̍mnɔ᷄ŋ ma̍sāa̍ mbō mi̍i̍ŋgū o̍ fōōfo̍ nūu̍.”

³¹Mi̍ Ba̍a̍si̍ɛ̍bā kālāa̍ Sɔ̍lɔ̍mɔ̄ŋ o̍ tu̍ndu᷄ŋ Dēēve̍ o̍ lābɛ̄ŋgu̍ ni̍ŋ mbo̍ dīmūl Dēēve̍ āā, “Mbɔ̄ fāllo̍, wa̍ na̍a̍ chōo̍ le̍ fɛ̍ɛ̍ŋ a̍ fɛ̍ɛ̍ŋ fɔ̍.”

³²O̍ ko̍ŋ kɔ̍ɔ̍lī, mi̍ Dēēve̍ di̍mūl bu̍ɛ̍i̍yāā ndūa̍a̍ āā, “Lā ve̍e̍lūl la̍ Sa̍dɔ̍kī, wāna̍ so̍lī sa̍lāa̍ o̍ Mɛ̄lɛ̄ka̍ lo̍ wo̍, a̍ Ne̍tāŋ, wāna̍ su̍a̍ā le̍ Mɛ̄lɛ̄ka̍ wo̍, a̍ Bɛ̄na̍yā po̍ Chɛ̄hōwa̍dā.” O̍ ko̍ŋ, ma̍ vīām le̍ nda̍ ma̍ hūŋ Dēēve̍ lāchī.

³³Mi̍ Dēēve̍ di̍mūl nda̍ āā, “Lā vēēlu̍ la᷅ŋgba̍ā kālla̍ mī lā tōsa̍ mī Sɔ̍lɔ̍mɔ̄ŋ po̍ nī he̍l o̍ Sōfɛ̍lɛ̍ nūu̍ chōo̍ mī lā kūɛ̄ a̍ ndu̍ Ki̍hɔ̄ŋ o̍ pēēlo̍.

³⁴Tē lā kūɛ̄ pɛ̍, Ne̍tāŋ nya̍ Sa̍dɔ̍kī lā kɔ̍ tālā Sɔ̍lɔ̍mɔ̄ŋ chūɛ̄īya̍ŋ o̍ lēbōl le̍ mbō sīmnu᷄ŋ ma̍sāa̍ le̍ I̍sɔ̄lūɛ̄ī. Tē lā chīi̍ pɛ̍ kpo̍u̍ lā tōl ndu̍ kɔ̄ɔ̄lī, lā mīŋgi̍ ndu̍ na̍nu᷄ŋ a̍ bu̍lu̍la̍ŋ hɔ̄ŋndo̍, mī lā dīmī āā, ‘Māsā Bɛ̍ndōo̍ Sɔ̍lɔ̍mɔ̄ŋ vi̍o̍u̍ na̍a̍ chōo̍ kɛ̍ndi̍a̍a̍.’ Ndu̍ cho̍ wā māsāa̍ o̍ fōōfo̍ nūu̍ ni̍. Ndu̍ ya̍ I̍ hɛ̍li̍ ni̍ le̍ mbō wa̍ māsāa̍ I̍sɔ̄lūɛ̄ī a̍ Chu̍dā kpo̍u̍.”

³⁵

³⁶Mi̍ Bɛ̄na̍yā di̍mūl Dēēve̍ āā, “Mbɔ̄ ī yɔ̄nu̍ŋ mɛ̄ɛ̍ ŋ̄ dīmi̍ yɛ̍ fɔ̍. Mbɔ̄ māā Mɛ̄lɛ̄ka̍ Ya̍a̍wɛ̄ɛ̄, ō ŋ̄ chō pīɛ̄īyo̍ wo̍ ō chɛ᷄l nu̍m dīōm fɔ̍.

³⁷Ndu̍yɛ̍ mbɔ̄ māā Mɛ̄lɛ̄ka̍ Ya̍a̍wɛ̄ɛ̄ o̍ wa̍ Sɔ̍lɔ̍mɔ̄ŋ kɔ̄ɔ̄lī mɛ̄ɛ̍ o̍ wa̍ nu̍m kɔ̄ɔ̄lī yɛ̍ fɔ̍. Mbɔ̄ māā Mɛ̄lɛ̄ka̍ tōsa̍ mbō wa̍ māsa̍ kpāāyā mbō hīōū bɛ̍ɛ̍ mɛ̄ɛ̍ nūm wa̍ yɛ̍ fɔ̍.”

³⁸O̍ ko̍ŋ kɔ̍ɔ̍lī, Sa̍dɔ̍kī ni̍, a̍ Ne̍tāŋ, a̍ Bɛ̄na̍yā, a̍ pūa̍a̍ chɔ̄ūwāa̍ ma̍ndā Dēēve̍ wa̍ nda̍ yɔ̍nūŋ ni̍ māā Chɛ̄lu̍i̍ta̍i̍tīi̍ya̍ a̍ Pɛ̄lɛ̄ta̍i̍tīi̍ya̍ ma̍ hēēlū Sɔ̍lɔ̍mɔ̄ŋ o̍ Sōfɛ̍lɛ̍ Dēēve̍ fi̍nyā ndɔ̄ wo̍ chōo̍, ma̍ kūā a̍ ndu̍ Ki̍hɔ̄ŋ o̍ pēēlo̍.

³⁹Mɛ̄ɛ̍ nda̍ wa̍ kɔ̄la̍ŋ, mi̍ Sa̍dɔ̍kī chu̍ā lēē chūɛ̄īmā ɔ̄li̍fīi̍ wo̍ o̍ tɛ̍ndɛ̄i̍ Mɛ̄lɛ̄ka̍a̍ ni᷄ŋ, mbo̍ kūā a̍ ndu̍. Mɛ̄ɛ̍ nda̍ fūūlu̍u̍ o̍ pēēlo̍, mi̍ Sa̍dɔ̍kī chu̍ā lēē māchūɛ̄ī kōŋ mbo̍ tālā Sɔ̍lɔ̍mɔ̄ŋ chūɛ̄īya̍ŋ o̍ lēbōl. O̍ ko̍ŋ kɔ̍ɔ̍lī, ma̍ hɔ̄ŋ būlo̍o̍ le̍ chɔ̄mndo̍ māā Sɔ̍lɔ̍mɔ̄ŋ cho̍ ni᷅ŋ māsāa̍ ni̍. Ma̍ dēŋī chōo̍ cho̍o̍ āā, “Māsā Bɛ̍ndōo̍ Sɔ̍lɔ̍mɔ̄ŋ vi̍o̍u̍ na̍a̍ chōo̍ kɛ̍ndi̍a̍a̍.”

⁴⁰O̍ ko̍ŋ kɔ̍ɔ̍lī, nda̍ kpo̍u̍ ma̍ tūāl ndu̍ kɔ̄ɔ̄lī ma̍ mīīŋgū chi̍e̍e̍ a̍ kɔ̄l kɛ̄ndɛ̄ bɛ̄ndōo̍ tōsāa̍. Ā wa̍ kɔ̄la̍ŋ a̍ chōndo̍ŋ mā hɔ̄ŋ sɛ᷅ŋnda̍ŋ mā kūā a̍ yōla̍ŋ. Mi̍ lɛ̄ŋnde̍ŋ lē nyīīyā a̍ dēŋī nda̍ wa̍ wo̍.

⁴¹A̍ te̍le̍ŋ Ādo̍ni̍chā nda̍ ku̍ndā ndɔ̄ɔ̍ ā chīī nu̍a̍ā dīo̍la̍ŋ ndo̍ ki̍nɛ̍i̍, ma̍ tūɛ̄ī bɔ̄ɔ̄lūū bɛ̄ndōo̍ chi̍e̍e̍. Mɛ̄ɛ̍ Cho̍wa̍bī tu̍e̍ī bu̍lo̍o̍ sūɛ̍i̍, mbo̍ nyūnā āā, “ko̍ni̍ bɔ̄ɔ̄lūū bɛ̄ndū yɛ̄ɛ̍nɛ̍ su̍a̍ā yɛ̍ ho̍ō chi̍e̍e̍?”

⁴²O̍ mēi̍ bɛ̍ɛ̍ so̍ndō le̍ mi̍ Chōna̍ta᷅ŋ, po̍ Ābīa̍a̍tā wo̍ fūlā lēbōl. Mɛ̄ɛ̍ Ādo̍ni̍chā che᷅ ndu̍, mbo̍ kɔ̍ yi᷅l ndu̍ āā, “I̍sɛ̄ Chōna̍ta᷅ŋ. I̍ si̍nā māā wānā kɛ̍ndɔ̄ɔ̍ ŋ̄ chō ni̍, I̍ nɔ̍ o̍ kɔ̄l māā yōōŋgū kɛ̄ndɔ̄ɔ̍ ŋ̄ hīŋ ni̍.”

⁴³Mi̍ Chōna̍ta᷅ŋ di̍mūl ndu̍ āā, “Ō cho̍ yo̍o̍ŋgū kɛ̄ndɛ̄ le̍ ya̍ I̍ hi᷅ŋ te̍. Māsāa̍ Dēēve̍ ō sīīŋgu̍u̍ hāū Sɔ̍lɔ̍mɔ̄ŋ Māsāa̍.

⁴⁴Ō bīī mbo̍ dīmūl Sa̍dɔ̍kī nda̍ Ne̍tāŋ a̍ Bɛ̄na̍yā a̍ pūa̍a̍ chɔ̄ūwāa̍ ma̍ndā ndu̍ wa̍ ma̍ kūā a̍ Sɔ̍lɔ̍mɔ̄ŋ Ki̍hɔ̄ŋ o̍ pēēlo̍, mi̍ Sa̍dɔ̍kī nda̍ Ne̍tāŋ a̍ kɔ̍ ta̍lā ndu̍ chūɛ̄īya̍ŋ o̍ lēbōl māā ndu̍ cho̍ ni᷅ŋ māsāa̍ ni̍. O̍ ko̍ŋ kɔ̍ɔ̍lī, ma̍ chūā ndu̍ ma̍ hēēlū ndu̍ o̍ Sōfɛ̍lɛ̍ Māsāa̍ Dēēve̍ pi̍la̍ o̍ ku̍ā cho̍o̍ wo̍ chōo̍, ma̍ mīīŋgū a̍ ndu̍ chi̍e̍e̍ a̍ chōndo̍ŋ kpu̍ū bɛ̄ndū. Bɔ̄ɔ̄lūū bɛ̄ndū kōŋ kpo̍sōŋ nya̍ tūɛ̄ī nu̍a̍ā chi̍e̍e̍ ni̍. Chi̍o̍o̍ kpo̍u̍ ō yɔ̄nu̍ŋ wo̍o̍lūŋ wo̍o̍lūŋ.

⁴⁵

⁴⁶Sɔ̍lɔ̍mɔ̄ŋ cho̍ ni᷅ŋ māsāa̍ o̍ fōōfo̍ Dēēve̍ fi̍nyā ndɔ̄ wo̍ ni̍.

⁴⁷Ndu̍yɛ̍ Dēēve̍, wānāā ndūāā bɛ̍ndūa̍a̍ cho̍ ndu̍ wa̍llo̍ o̍ bā wa̍, ā hi᷄ŋ ma̍ hīnī kɔ̄l a̍ nyɛ̄ Dēēve̍ to̍sa̍ wo̍. Nda̍ kpo̍u̍ ma̍ mālnu᷄ŋ ma̍ kɔ̍ me᷅l Dēēve̍ ba̍li̍ka̍ le̍ nyɛ̄ o̍ to̍sa̍ wo̍. Ndu̍yɛ̍ ma̍ dūāū sa̍lāa̍ ma̍ dīmī āā, ‘Mbɔ̄ māā Mɛ̄lɛ̄ka̍ nu̍m ŋ̄ chō pīɛ̄īyo̍ wo̍ ō tōsa̍ mi̍ Māsā Bɛ̍ndōo̍ Sɔ̍lɔ̍mɔ̄ŋ o̍ fu̍la̍ tɔ̍ɔ̍ mbō hīōū bɛ̍ɛ̍ mɛ̄ɛ̍ nūm o̍o̍ fu̍la̍ tɔ̍ɔ̍ yɛ̍. Mbɔ̄ māā māsāle̍ ndɔ̄le̍ŋ lē sīmnu̍ŋ ma̍sāle̍ kpāāyā bɛ̍ndū mī lē hīōū bɛ̍ɛ̍ māsāle̍ nu̍mnde̍ŋ fɔ̍.’ Ndu̍yɛ̍ Dēēve̍ pi̍la̍ bɛ̍ɛ̍ mbo̍ bāŋ wūla̍ŋ o̍ kpēle̍ ndɔ̄ɔ̍, mbo̍ mēl Mɛ̄lɛ̄ka̍ ba̍li̍ka̍,

⁴⁸mbo̍ dīmī āā, ‘Ōo̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍ pīɛ̄īyo̍, sāŋgālāa̍ chō o̍ dīōlā nūmnda̍ŋ chōo̍, fo̍ndōle̍ le̍ mɛ̄ɛ̍ ŋ̄ tōsa̍ mi̍ pūa̍a̍ nīa̍a̍ ō pīlɛ̍ sīmnu᷄ŋ ha̍ū ma̍sāa̍ o̍ fōōfo̍ nūu̍ yɛ̍. Ba̍li̍ka̍ Mɛ̄lɛ̄ka̍ le̍ ya̍ kɛ̄sīo̍o̍ yōōmū mi̍ cha᷅ mi̍ he̍ī ī yɔ̄nu᷄ŋ.’ ”

⁴⁹Mɛ̄ɛ̍ wānāā wa̍ a̍ Ādo̍ni̍chā la̍tu̍lu̍ wa̍ ā tūēī sūɛ̍i̍ he̍ī, mi̍ sīōōŋnde̍ bīī nda̍ ma̍ pīɔ̄l mi̍ wānā o̍ wānā mi̍i̍ŋgū o̍ ndu̍ lo̍.

⁵⁰Mi̍ sīōōŋnde̍ bīī Ādo̍ni̍chā. Mbo̍ nyāānu᷄ŋ o̍ tɛ̍ndīi̍ cho̍ le̍ Mɛ̄lɛ̄ka̍ wo̍ ni᷄ŋ mbo̍ kɔ̍ sa̍ā[1] nyɛ̄lā nda̍ tūūla̍ o̍ ma̍āŋndo̍ chōo̍ māā lālēē la̍ŋ, yɔ̄ŋi̍ nda̍ dīi̍ ndu̍.

⁵¹Mi̍ wāŋndo̍ mālnu᷄ŋ mbo̍ kɔ̍ di̍mūl Māsā Bɛ̍ndōo̍ Sɔ̍lɔ̍mɔ̄ŋ āā, “Sīōōŋnde̍ bīī Ādo̍ni̍chā le̍ nūm, mbo̍ nyāānu᷄ŋ o̍ tɛ̍ndīi̍ Mɛ̄lɛ̄ka̍a̍ mbo̍ sa̍ā nyɛ̄lā nda̍ tūūla̍ o̍ ma̍āŋndo̍ māā lālēē la̍ŋ. Ō dīmi̍ māā ō fe̍ŋāŋ lo̍ŋ te̍, mɛ̄ɛ̍ mī nūm chu̍e̍l ndu̍ būŋgɛ̄i̍ māā a̍ cho̍ ndu̍ dīyɔ̄ɔ̄ le̍.”

⁵²Mi̍ Māsā Bɛ̍ndōo̍ Sɔ̍lɔ̍mɔ̄ŋ di̍mī āā, “Tē Ādo̍ni̍chā chɛ̍l māsāle̍ nīle̍ŋ pɛ̍, yīīŋnde̍ŋ lē pīlɛ̍ bɛ̍ɛ̍ le̍ ke̍ndīŋ ndu̍ o̍ lēbōl te̍. Kɛ̍ tē ō chɛ᷄l te̍ mbō nɔ̄ kɛ̄ɛ̄sīāā o̍ kɛ̄ɛ̄sīāā chēle̍ŋ le̍ ya̍ nyɛ̄ yɔ̄ŋ pɛ̍, pīɔ̍mndo̍ o̍ sɔ̍lā ni̍.”

⁵³O̍ ko̍ŋ, mi̍ Māsā Bɛ̍ndōo̍ Sɔ̍lɔ̍mɔ̄ŋ yɔ᷅ŋ le̍ Ādo̍ni̍chā ma̍ kɔ̍ hu᷅ŋ a̍ ndu̍. Mɛ̄ɛ̍ Ādo̍ni̍chā hi᷅ŋ, mbo̍ tūndu᷄ŋ Sɔ̍lɔ̍mɔ̄ŋ o̍ lābɛ̄ŋgu̍ ni̍ŋ le̍ ndu̍ bɛ̄ɛ̄le̍ŋ kīo̍o̍. Mi̍ Māsā Bɛ̍ndōo̍ Sɔ̍lɔ̍mɔ̄ŋ di̍mūl ndu̍ āā, “Chɔ̍ŋ mā kūɛ̄nu᷄ŋ o̍ chīɛ̄ī nūmndo̍.”