Read Southern Kisi Māsāā Bɛ̍ndūāā Tāsi̍a̍a̍ 12 Bible Online

Māsāā Bɛ̍ndūāā Tāsi̍a̍a̍ 12 - Southern Kisi bible

Māsāā Bɛ̍ndūāā Tāsi̍a̍a̍ 12

¹Mɛ̄ɛ̍ Sɔ̍lɔ̍mɔ̄ŋ o̍ vi᷅, mi̍ Lūɛ̄hōbo̍wām po̍ ndɔ̄ o̍ ku̍ā Si̍ɛ̍kɛ̄m chi̍e̍e̍, nāa̍ I̍sɔ̄lūɛ̍i̍ya̍ kpo̍u̍ ā wa̍ ā chūūŋgi̍āŋ le̍ ndu̍ kɔ̄la̍ŋ chūa̍a̍ o̍ lēmāsā wa̍.

²Ndu̍yɛ̍ a̍ te̍le̍ŋ ko̍ŋ Chɛ̄lōbo̍wām po̍ Ne̍ba̍tī wo̍ o̍ wa̍ wɔ̄ I̍chi̍pī o̍ nyāānɔ᷄ŋ Sɔ̍lɔ̍mɔ̄ŋ ndo̍ ni᷄ŋ. Mɛ̄ɛ̍ o̍ tu̍e̍ī a̍ sūɛ̍i̍ he̍ī o̍kɔ̄ɔ̍, ndu̍ bɛ̍ɛ̍ mbo̍ mālnu᷄ŋ nāa̍ o̍ wa̍ I̍chi̍pī wa̍ mbo̍ mīīŋgū.

³Mɛ̄ɛ̍ o̍ mi̍i̍ŋgu̍, mi̍ I̍sɔ̄lūɛ̍i̍ya̍a̍ wa̍ bā lūāŋndo̍ wa̍ ā yōōŋgū ndu̍. Nda̍ kpo̍u̍ ma̍ cha᷄ŋ ma̍ kūā nāa̍ Lūɛ̄hōbo̍wām chu̍a̍, ma̍ kɔ̍ di̍mūl ndu̍ āā,

⁴“Bōōndi̍i̍ fi̍nyā nūm a̍ wa̍ na̍a̍ chōo̍ ve̍, mbo̍ bɛ̄pɛ̄lā na̍a̍ bɛ̄pɛ̄lāa̍ pīla̍, a̍ wōlɔ̄ɔ̄lā lūsu̍lɛ̍i̍la̍ o̍ ha̍ndu̍ na̍a̍ chōo̍ la̍ŋ. Le̍la̍ŋ tē a̍ ye̍e̍ma̍ pɛ̍ mī ŋ̄ lūɛ̄ī nu̍m o̍ bā bɛ̄ŋgu̍, mī ŋ̄ sāāŋgi̍a̍l nu̍m, mɛ̄ɛ̍ fa̍ŋa̍ na̍a̍ wōlɔ̄ɔ̄lā lūsu̍lɛ̍i̍la̍ la̍ŋ chōo̍.”

⁵Mi̍ Lūɛ̄hōbo̍wām di̍mūl nda̍ āā, “Bālā tīɔ̍ɔ̍ŋ, I̍ tu̍e̍ī, lā kɔ̍ hu᷅ŋ o̍ lɔ̍ɔ̍ le̍ya̍a̍ mī hu̍ŋ mu̍lī nya̍ dīōm.” Mi̍ wāŋnda̍ cha᷄ŋ ma̍ mīīŋgū.

⁶O̍ ko̍ŋ, mi̍ Lūɛ̄hōbo̍wām o̍ ko̍ma̍ ve̍e̍lū bɛ̄ndūāā wa̍ Sɔ̍lɔ̍mɔ̄ŋ fi̍nyā ndɔ̍ wa̍llo̍ o̍ bā bɛ̄ŋgu̍ māā wānāā ndūāā si̍lāā wa̍ ki̍nɛ̍i̍, mbo̍ nyūnā nda̍ āā, “Sīlā yɛ̄ɛ̍nɛ̍ nya̍ nɔ̄ yɛ̄ le̍ ya̍, le̍ mī mu̍lu̍l ke̍ wāŋnda̍ ha̍ā dīōm?”

⁷Mi̍ bɛ̄ndūa̍a̍ ha̍ā lō o̍ ko̍ŋ ma̍ dīmūl ndu̍ āā, “Tē a̍ ye̍e̍ma̍ pɛ̍ mī wāŋnda̍ ha̍ā ā lūɛ̄ī nu̍m o̍ bā bɛ̄ŋgu̍, mā wa̍ nu̍m sāāŋgīāllo̍ le̍ te̍le̍ŋ o̍ te̍le̍ŋ, mɛ̄ɛ̍ māā wa̍ wānā kɛ̍ndɛ̄ nāa̍ nda̍ chūā, mā ke̍ nda̍ mūli̍ hi̍nī nda̍ kɔ̄lta̍ŋ. O̍ ko̍ŋ, mā sīmnu᷄ŋ bu̍ɛ̍i̍yāā nūm le̍ te̍le̍ŋ o̍ te̍le̍ŋ.”

⁸Kɛ̍ Lūɛ̄hōbo̍wām o̍ ye̍ŋ bɛ̄ndūa̍a̍ ha̍ā lānī le̍. Mbo̍ vēēlū chūāā pīāāndūāā nda̍ chɛ᷄ŋ nda̍ nda̍ā, ma̍ sīmnu᷄ŋ ni᷅ŋ wānāā ndūāā si̍lāa̍ wa̍ ki̍nɛ̍i̍.

⁹Mbo̍ nyūnā nda̍ āā, “Wānāa̍ di̍mi̍ ha̍ā māā ya̍ I̍ fa̍ŋa̍ nda̍ wōlɔ̄ɔ̄lā lūsūlāālā fi̍nyā nūu̍ ha̍ndu̍ nda̍ chōo̍ la̍ŋ chōo̍ wa̍, sīlā yɛ̄ɛ̍nɛ̍ nya̍ nɔ̄ yɛ̄ le̍ ya̍ le̍ mī mu̍li̍ nda̍ dīōm?”

¹⁰Mi̍ chūāā pīāāndūa̍a̍ ha̍ā lō o̍ ko̍ŋ ma̍ dīmūl ndu̍ āā, “Nyɛ̄ ŋ̄ dīmūl nda̍ wo̍ cho̍ ho̍ō ni̍, di̍mu̍l nda̍ āā, sūēī nīī mɛ̍ɛ̍lɛ̄i̍ ndi̍ bɛ̍ɛ̍ hi̍a̍ū ni̍ŋ che̍lu̍l a̍ chāŋāa̍ fi̍nyā nūu̍.

¹¹Wōlɔ̄ɔ̄lā lūsūlāā fi̍nyā nūu̍ hāndu̍ nya̍ chōo̍ la̍ŋ, lā cho̍ bɛ̍ɛ̍ la̍ bɔ̍ɔ̍ le̍, lā ya̍ I̍ ha̍ndū ni̍ŋ nya̍ chōo̍ la̍ŋ bɛ̍ɛ̍ la̍ hi̍a̍ū ni̍ŋ. Fi̍nyā nūu̍ ndu̍ ndu̍ a̍ kpātūēī yɔ̄ŋɛ̄i̍ ndu̍ o̍o̍ lu̍a̍ā nya̍ ni̍, kɛ̍ ya̍ ya̍ kpātūe̍i̍ nɔ̍ chīli̍ŋndo̍ŋ o̍ bōlle̍ ve̍, a̍ ndi̍ ya̍ I̍ wa᷅ ni̍ŋ nya̍ sɔ᷄ŋnde̍ ni̍.”

¹²O̍ ko̍ŋ, mi̍ lɔ̍ɔ̍ le̍ya̍a̍ wo̍ fūūlūū. Chɛ̄lōbo̍wām po̍ Ne̍ba̍tī wo̍ ni̍, a̍ wānāā tūa̍a̍ kpo̍u̍ ma̍ cha᷄ŋ ma̍ kūā nāa̍ Lūɛ̄hōbo̍wām chu̍a̍.

¹³Sīlā bɛ̄ndūa̍a̍ ha̍ā ā sīla̍ Lūɛ̄hōbo̍wām ndo̍ ō ye᷄ŋ nda̍ lānī le̍, mbo̍ mūlūl wāŋnda̍ ŋu̍a̍sū ŋūāsū.

¹⁴Nyɛ̄ chūāā pīāāndūa̍a̍ ā dīmu̍l ndu̍ wo̍, ndu̍ ko̍ni̍ o̍ to᷅l kɔ̄ɔ̄lī ni̍. Mbo̍ dīmūl nda̍ āā, “Fi̍nyā nūu̍ hāndu̍ nya̍ wōlɔ̄ɔ̄lā lūsu̍lɛ̍i̍la̍ŋ chōo̍, kɛ̍ lā ya̍ I̍ ha̍ndū ni̍ŋ nya̍ chōo̍ la̍ŋ, la̍ŋ bɛ̍ɛ̍ la̍ hi̍a̍ū ni̍ŋ lu̍su̍l. Fi̍nyā nūu̍ ndu̍ ndu̍, a̍ kpātūēī yɔ̄ŋɛ̄i̍ ndu̍ o̍o̍ lu̍a̍ā nya̍ ni̍, kɛ̍ ya̍ ya̍, kpātūe̍i̍ nɔ̍ chīli̍ŋndo̍ŋ o̍ bōlle̍ ve̍, a̍ ndi̍ ya̍ I̍ wa᷅ ni̍ŋ nya̍ sōŋgɔ̄ɔ̍ ni̍.”

¹⁵O̍ ko̍ŋ, mi̍ Chɛ̄lōbo̍wām o̍ kɛ̍ɛ̄ nyɛ̄ wāŋnda̍ ā dīmu̍l ndu̍ le̍ tōsāa̍ wo̍. Ndu̍yɛ̍ Mɛ̄lɛ̄ka̍ Ya̍a̍wɛ̄ɛ̄ pi̍la̍ kpe̍e̍kpe̍i̍ to̍sa̍ ni̍ mi̍ he̍ī ī yɔ̄nu᷄ŋ. Kāni̍ fo̍ndōle̍, nyɛ̄ o̍ dɔ̍ū sīndɛ̄ A̍hi̍chā, wāna̍ su̍a̍ā le̍ Mɛ̄lɛ̄ka̍ wo̍ o̍ sōndō, wānā wa̍ā Si̍lɔ̄ɔ̄ chi̍e̍e̍ a̍ Chɛ̄lōbo̍wām, po̍ Ne̍ba̍tī wo̍ o̍kɔ̄ɔ̄ wo̍, ndu̍ o̍o̍ ye̍e̍ma̍ mī ndu̍ o̍o̍ chi̍ŋa̍ lāsōndō.

¹⁶Mɛ̄ɛ̍ wāŋnda̍ ha̍ā ā chē māā Lūɛ̄hōbo̍wām o̍ kɛ̍ɛ̍ nda̍ dīōm, ma̍ dīmī chōo̍ cho̍o̍ āā, “Na̍a̍ ŋ̄ cho̍ lɛ̍ yu̍ŋgu̍ Dēēve̍ wo̍ o̍ bā bɛ̄ŋgu̍ le̍, fo̍ndōle̍, ŋ̄ nɔ̍ tɔ̍nɔ̄ o̍ tɔ̄nɔ̄ o̍ Dēēve̍ po̍ Chɛ̄ɛ̍se̍ wo̍ ni᷄ŋ te̍. Le̍la̍ŋ wāŋnda̍ I̍sɔ̄lūɛ̄ī, lā chɔ̍ŋ ŋ̄ mīīŋgu᷅ŋ o̍ lāna̍a̍ lo̍. Lūɛ̄hōbo̍wām ko̍ma̍ lo᷅ wānāā ndūa̍a̍ chōo̍.” O̍ ko̍ŋ, I̍sɔ̄lūɛ̍i̍ya̍a̍ wa̍ ba̍ lūāŋndo̍ wa̍ ki̍nɛ̍i̍, ma̍ kɛ̄ɛ̄ Lūɛ̄hōbo̍wām o̍ lēmāsā ma̍ cha᷄ŋ ma̍ mīīŋgu᷄ŋ o̍ cha᷄lta̍ ndāla̍ŋ.

¹⁷Ndu̍yɛ̍, wānāā Lūɛ̄hōbo̍wām ndu̍ o̍o̍ lo̍ ni᷅ŋ chōo̍ ma̍sā wa̍, mɛ̄ɛ̍ wānāa̍ wa̍ o̍ chi̍e̍e̍ŋ wa̍ o̍ būŋgɛ̄ī Chu̍dāve̍ ni᷄ŋ nda̍.

¹⁸O̍ ko̍ŋ kɔ̍ɔ̍lī, mi̍ Māsā Bɛ̍ndōo̍ Lūɛ̄hōbo̍wām o̍ vi̍ām po̍ pi᷅lɛ̍ dīōla̍ŋ āā A̍do̍ni̍lūām, wāna̍ wa̍ wa̍lta̍ lēle̍e̍bi̍lɛ̄i̍la̍ŋ kpo̍u̍ bo᷅lle̍ŋ ndo̍, le̍ mbō kɔ̍ so̍ō nāa̍ I̍sɔ̄lūɛ̍i̍ya̍ chūā. Kɛ̍ mi̍ I̍sɔ̄lūɛ̍i̍ya̍ kɔ̍ bi̍ī ndu̍ ma̍ vīī vīī ndu̍ a̍ pōūta̍ŋ ma̍ dīī ndu̍. O̍ ko̍ŋ, mi̍ Māsā Bɛ̍ndōo̍ Lūɛ̄hōbo̍wām o̍ he᷅l o̍ nyɛ̄ ndɔ̄ nya̍a̍na᷄ŋ su̍a̍a̍ ā nāŋ ndo̍ chōo̍, mbo̍ nyāānu᷄ŋ mbo̍ mīīŋgū Chūlu̍sɛ̄lɛ̄m.

¹⁹Chɔ̍ŋ ni᷅ŋ a̍ te̍le̍ŋ ko̍ŋ mbo̍ bīī a̍ pāa̍le̍ hāūle̍ŋ nde̍ŋ, I̍sɔ̄lūɛ̍i̍ya̍a̍ cho̍ bā lūāŋndo̍ wa̍ ki̍nɛ̍i̍, ā chɛ᷄l mī yu̍ŋgu̍ Dēēve̍ wo̍ o̍ wa̍ nda̍ chōo̍ ma̍sā le̍.

²⁰Mɛ̄ɛ̍ wāŋnda̍ I̍sɔ̄lūɛ̄ī kpo̍u̍ a̍ tu̍e̍ī māā Chɛ̄lōbo̍wām chɛ̍ŋ I̍chi̍pī mbo̍ hūŋ, nda̍ kpo̍u̍ ma̍ chūūŋgi̍āŋ na̍a̍ pi᷅lɛ̍, ma̍ yōōŋgū Chɛ̄lōbo̍wām ma̍ hu᷄ŋ si̍i̍ŋgūū ndu̍ māsāa̍ nda̍ chōo̍. I̍sɔ̄lūɛ̍i̍ya̍ ki̍nɛ̍i̍, wānāa̍ lo̍ le̍ yu̍ŋgu̍ Dēēve̍ wo̍ fūlāa̍ o̍ bā bɛ̄ŋgu̍ wa̍ mɛ̄ɛ̍ wāŋnda̍ Chu̍dā.

²¹Mɛ̄ɛ̍ Māsā Bɛ̍ndōo̍ Lūɛ̄hōbo̍wām o̍ fu̍u̍lu̍u̍ Chūlu̍sɛ̄lɛ̄m, mbo̍ chūūŋgīāā so̍vɛ̄i̍ya̍a̍ cha̍ā sɔ̍ŋgɔ̄ɔ̍ chāā bɛ̄ndōo̍ wa̍, fūlāa̍ o̍ yu̍ŋgu̍ Chu̍dā wo̍ chōo̍, a̍ yu̍ŋgu̍ Bɛ̍ŋnja̍mīŋ ndo̍, wāa̍la̍ŋ kɛ̄mɛ̄ a̍ be̍le̍-ŋɔ̍ma̍a̍ (180,000). Ndu̍ o̍o̍ ye̍e̍ma̍ le̍ kɔ̄la̍ŋ sɔ̍ŋgɔ̄ɔ̍ a̍ yu̍ŋgu̍la̍ŋ I̍sɔ̄lūɛ̄ī, la̍ wa̍ bā lūāŋndo̍ la̍ŋ, le̍ mī nda̍ a̍a̍ mi̍i̍ŋgu̍ ndu̍ o̍ bā bɛ̄ŋgu̍.

²²Kɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ ke᷅ Sīɛ̄ma̍yā, wāna̍ su̍a̍ā le̍ Mɛ̄lɛ̄ka̍ yōōŋgōo̍.

²³Mbo̍ dīmūl ndu̍ a̍a̍, “Di̍mu̍l Lūɛ̄hōbo̍wām, po̍ Sɔ̍lɔ̍mɔ̄ŋ ndo̍, o̍ cho̍ Māsā Bɛ̍ndōo̍ Chu̍dā wo̍, a̍ I̍sɔ̄lūɛ̄ī tūa̍a̍ a̍ cho̍ o̍ būŋgɛ̄ī Chu̍dā ve̍, a̍ o̍ būŋgɛ̄ī Bɛ̍ŋnja̍mīŋ ni᷄ŋ nda̍ māā,

²⁴Mɛ̄lɛ̄ka̍ Ya̍a̍wɛ̄ɛ̄ di̍mi̍ āā, ‘La̍ ku̍ā mī lā sɔ̍ŋgā a̍ wānāya᷅ŋ nyāa̍ŋ te̍. Kāni̍ fo̍ndōle̍, ya̍ Mɛ̍lɛ̄ka̍ Ya̍a̍wɛ̄ɛ̄ pi̍la̍ kpe̍e̍kpe̍i̍ to̍sa̍ ni̍ mi̍ he̍ī yɔ̄nu᷄ŋ. Le̍la̍ŋ, wānā o̍ wānā lā mīīŋgu̍ o̍ lā nya̍lo̍.’ ” Ndu̍yɛ̍ ma̍ chɛ̄l nyɛ̄ Mɛ̄lɛ̄ka̍ Ya̍a̍wɛ̄ɛ̄ di̍mu̍l nda̍ wo̍, wānā o̍ wānā ku̍e̍ lɛ̍ mbō sɔ̄ŋga̍ a̍ Chɛ̄lōbo̍wām te̍.

²⁵Chi̍e̍e̍ pi᷅lɛ̍ wa̍ o̍ lɛ̄ŋndē īpēmbūle̍ŋ E̍fi̍lūēm dīōla̍ŋ āā Si̍ɛ̍kɛ̄m. Mi̍ Māsā Bɛ̍ndōo̍ Chɛ̄lōbo̍wām o̍ lo᷅ o̍ ko̍ŋ mbo̍ kɔ̍ si̍i̍ŋgūū ndu̍ chi̍e̍e̍ ndɔ̍ lēmāsā, ndu̍yɛ̍ mbo̍ māndā ndu̍ ō kālā ka̍la̍ māā bā o̍ bā chɔ̄ū ndu̍ o̍o̍ ke̍ī mbō lūɛ̄ī lo̍ŋ te̍. Mɛ̄ɛ̍ te̍le̍ŋ ti̍ŋ hīo̍u̍, mbo̍ mālnu᷄ŋ mbo̍ kūā vɛ̄lɛ̄ Pɛ̍nūɛ̄l chi̍e̍e̍. Ndu̍ bɛ̍ɛ̍ mbo̍ kɔ̍ to̍sā ndu̍ le̍nde̍, mɛ̄ɛ̍ o̍ to̍sa̍ a̍ chi̍e̍e̍ tāso̍o̍ yɛ̍.

²⁶Pāa̍le̍ pi᷅lɛ̍, mi̍ Māsā Bɛ̍ndōo̍ Chɛ̄lōbo̍wām o̍ cha᷅l mbo̍ kāndū yīya᷄ŋndo̍ o̍ kɔ̄l ni᷄ŋ. Mbo̍ dīmī āā, “Mɛ̄ɛ̍ ya̍ I̍ cho̍ chɔ̄ɔ̍ yɛ̍, tē wānāā nīa̍a̍ ha̍ā ā lo̍ kɔ̄la̍ŋ sa̍lāla̍ŋ sōlīo̍o̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ Chūlu̍sɛ̄lɛ̄m pɛ̍, nda̍ kpo̍u̍ ā chō ya̍ fāŋa᷄ŋ kɔ̍ɔ̍lī mā hīōūnu᷄ŋ Māsāa̍ Lūɛ̄hōbo̍wām kɔ̄ɔ̄lī, o̍ cho̍ Chu̍dā wo̍, o̍ ko̍ŋ mā dīī ya̍.”

²⁷

²⁸Mɛ̄ɛ̍ Māsāa̍ Chɛ̄lōbo̍wām o̍ chi̍i̍ yīya᷄ŋ a̍ sūɛ̍i̍ he̍ī o̍kɔ̄ɔ̍, mbo̍ tēēŋgīāā ko̍o̍līi̍yo̍ŋ mbo̍ tūūlā nāūwa̍ ā ŋīɔ̍ɔ̍ŋ a̍ mu̍ŋ. Mbo̍ lō o̍ ko̍ŋ mbo̍ dīmūl wāŋnda̍ I̍sɔ̄lūɛ̄ī āā, “Ō cho̍ lɛ̍ hāū le̍ nya̍ bīī kɔ̄la̍ŋ Chūlu̍sɛ̄lɛ̄m le̍ Mɛ̄lɛ̄ka̍ sōōlūūwo̍ le̍. Le̍la̍ŋ lā pɛ̄ŋgi̍ wɔ̍ ni᷅ŋ kɔ̄la̍ŋ ndo̍ŋ. Wāŋnda̍ I̍sɔ̄lūɛ̄ī, mɛ̄lɛ̄ka̍ā nyāa̍ so̍li̍ nya̍ o̍ chɛ̄le̍ŋ ni᷄ŋ I̍chi̍pī wa̍ nda̍ cho̍ ha̍ā ni̍, chɔ̍ŋ ni᷅ŋ a̍ hāū lā wa̍ ni᷅ŋ nda̍ sōōlūūwo̍.”

²⁹Mbo̍ chūā nāūwāā o̍ tu̍u̍la̍ ka̍ŋ a̍ ko̍o̍līi̍yo̍ŋ nda̍ ō pīlɛ̍ mbo̍ kɛ̄sī Bɛ̍tɛ̄ɛ̄l chi̍e̍e̍, mbo̍ chūā ō pīlɔ̍ɔ̍ mbo̍ yāā Da᷅ŋ chi̍e̍e̍.

³⁰O̍ ko̍ŋ, wāŋnda̍ I̍sɔ̄lūɛ̄ī nda̍ a̍a̍ ku̍ē lɛ̍ Mɛ̄lɛ̄ka̍ sōōlūūwo̍ Chūlu̍sɛ̄lɛ̄m te̍, nāūwa̍ ha̍ā nda̍ a̍a̍ ku̍ā ni᷅ŋ sōōlūūwo̍ Bɛ̍tɛ̄ɛ̄l a̍ Da᷅ŋ ni̍. Ndu̍yɛ̍ mi̍ sūɛ̍i̍ he̍ī tɛ̄ɛ̄mbūū Mɛ̄lɛ̄ka̍ kɔ̄l ta̍u̍ ta̍u̍, fo̍ndōle̍ le̍ mɛ̄ɛ̍ wāŋnda̍ ha̍ā kɛ̄ɛ̍ ndu̍ dīōm mī nda̍ a̍a̍ ku̍ā ni᷅ŋ pɔ̍ɔ̍li̍ Da᷅ŋ chi̍e̍e̍ le̍ nāūwo̍ sōōlūūwo̍ yɛ̍.

³¹O̍ ko̍ŋ kɔ̍ɔ̍lī, mi̍ Chɛ̄lōbo̍wām o̍ ta̍ŋgūl vɛ̄lɛ̄ fo̍ndāŋndā lāsōōlu̍u̍la̍ che᷅le̍ŋ o̍ pēmbo᷄ŋ chōo̍. Mbo̍ lō o̍ ko̍ŋ mbo̍ hɛ̄lī wāŋnda̍, ā nda̍ a̍a̍ fu̍la̍ bɛ̍ɛ̍ o̍ yu̍ŋgu̍ wānāā sōlīāā lāsa̍lā chōo̍ le̍ wa̍, mbo̍ sīīŋgūū nda̍ wānāā sōlīāā lāsa̍lā le̍ sa̍lāla̍ŋ sōlīo̍o̍ o̍ mɛ̄lɛ̄ka̍ā chēle̍ŋnda̍ lo̍.

³²O̍ ko̍ŋ kɔ̍ɔ̍lī, mi̍ Māsā Bɛ̍ndōo̍ Chɛ̄lōbo̍wām o̍ hɛ̍lī te̍le̍ŋ ndo̍ o̍ ndāa̍, ō nda̍ kpo̍u̍ nda̍ a̍a̍ chu̍ūŋgi̍āŋ mā bīī bɔ̄ŋa᷅ŋ bɛ̄ndū dīāā nyɛ̄ dīa̍a̍ wo̍, mɛ̄ɛ̍ nda̍ bīī nu̍a̍ā ho̍ō Chūlu̍sɛ̄lɛ̄m chi̍e̍e̍ o̍ lɛ̄ŋndē Chu̍dāle̍ŋ ni᷄ŋ yɛ̍. Mbo̍ dīmī māā pāŋgi̍i̍ ŋɔ̄ma̍a̍ ve̍ o̍ wɔ̄sīo̍o̍ ni᷄ŋ o̍ yāu̍ nda̍ ŋ̄pāŋgo̍o̍ chōo̍ mālɔ̄ tɔ̍ a̍ lē ŋūɛ̍ɛ̍nu̍, nda̍ nɔ̄ ni̍ mā bīī bɔ̄ŋa᷅ŋndo̍ ho̍ō. Īwɔ̄sī o̍ īwɔ̄sī Chɛ̄lōbo̍wām ndu̍ o̍o̍ ku̍ā sa̍lāla̍ŋ sōlīo̍o̍ o̍ nāūwāā o̍ to̍o̍si̍a̍a̍ ka̍ŋ a̍ ko̍o̍līi̍yo̍ŋ nda̍ lo̍. Mbo̍ hɛ̄lī wānāā sōlīāā lāsa̍lāa̍ Bɛ̍tɛ̄ɛ̄l chi̍e̍e̍ mbo̍ yɔ̄ŋ nda̍ o̍ fo̍ndāŋndā lāsōōlu̍u̍la̍ o̍ to̍o̍si̍a̍a̍ la̍ŋ kpɛ̍ kpɛ̍ le̍ sa̍lāla̍ŋ sōlīo̍o̍ o̍ nāūvāā kāŋ ndo̍.

³³Tē pāa̍le̍ ndɔ̄le̍ o̍ hɛ̍li̍ le̍ŋ le̍ bɔ̄ŋa᷅ŋ bɛ̄ndū dīāā nyɛ̄ dīa̍a̍ tōsāa̍ le̍ŋ lē fūūlu̍u̍ pɛ̍, ō kūɛ̄ Bɛ̍tɛ̄ɛ̄l ō kɔ̍ so̍lī sa̍lāla̍ŋ o̍ ma̍āŋndo̍ chōo̍ o̍ nāūwāā ka̍ŋ ndo̍.