Read Southern Kisi Māsāā Bɛ̍ndūāā Tāsi̍a̍a̍ 13 Bible Online

Māsāā Bɛ̍ndūāā Tāsi̍a̍a̍ 13 - Southern Kisi bible

Māsāā Bɛ̍ndūāā Tāsi̍a̍a̍ 13

¹Ō wa̍ a̍ te̍le̍ŋ pi᷅lɛ̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ ke᷅ wāna̍ Mɛ̄lɛ̄ka̍ pīlɛ̍ wāā Chu̍dā yōōŋgōo̍ le̍ Bɛ̍tɛ̄ɛ̄l. Mi̍ wāna̍ Mɛ̄lɛ̄ka̍a̍ ho̍ō ō mālnu᷄ŋ mbo̍ kūā Bɛ̍tɛ̄ɛ̄l. Ndu̍yɛ̍ ō kōma̍l ki̍nɛ̍i̍ Chɛ̄lōbo̍wām ndu̍ o̍o̍ ku̍ɛ̄ sa̍lāa̍ sōlīo̍o̍, ō wa̍ īsīsi̍ o̍ ma̍āŋndo̍ īkɛ̄i̍.

²Ndu̍yɛ̍ Mɛ̄lɛ̄ka̍ Ya̍a̍wɛ̄ɛ̄ ndu̍ o̍o̍ ve᷅m wāna̍ Mɛ̄lɛ̄ka̍ ho̍ō le̍ mbō kɔ̍ so̍ō a̍ ma̍āŋndo̍ Bɛ̍tɛ̄ɛ̄l o̍kɔ̄ɔ̄, ma̍āŋ Chɛ̄lōbo̍wām o̍ to̍o̍si̍a̍a̍ wo̍. Mi̍ wāna̍ Mɛ̄lɛ̄ka̍a̍ ho̍ō dīmī āā, “O̍o̍ ma̍āŋndo̍ Bɛ̍tɛ̄ɛ̄l, ma̍āŋndo̍ Bɛ̍tɛ̄ɛ̄l, nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ a̍ nūm o̍kɔ̄ɔ̄ wo̍ cho̍ ho̍ō ni̍. Ō dīmi̍ āā, ‘Pōo̍ chō hūnɔ̄ɔ̄ vīōlɔ᷄ŋ o̍ yu̍ŋgu̍ Dēēve̍ wo̍ chōo̍, mā ke᷄ ndu̍ dīōla̍ŋ āā Chōōsa̍yā. Wānāā sōlīāā lāsa̍lāa̍ cho̍ ha̍ā o̍ sōōlu̍u̍la̍ yɛ̍ yɛ̍la̍ŋ mā hūŋ sa̍lāla̍ŋ sōlīo̍o̍ o̍ nūm chōo̍ wa̍ ki̍nɛ̍i̍, po᷄ ko̍ŋ chō nda̍ hūnɔ̄ɔ̄ dīū mbō so̍lī nda̍ sa̍lāa̍ o̍ nu̍m chōo̍. Ō chō hūnɔ̄ɔ̄ pāālā wāŋndā chīe̍e̍ya̍ lōmɔ̄ɔ̄ o̍ nūm cho̍o̍.’ ”

³O̍ ko̍ŋ kɔ̍ɔ̍lī, mi̍ wāna̍ Mɛ̄lɛ̄ka̍a̍ ho̍ō ō chɔ̄m wāŋnda̍ tāāmāsi̍o̍o̍ o̍ fōōfō ko̍ŋ chōo̍ le̍ mā sīna̍ māā nyɛ̄ o̍ di̍mi̍ wo̍ ō chō hūnɔ̄ɔ̄ yɔ̄nɔ᷄ŋ. Mbo̍ dīmūl nda̍ āā, “Le̍ mī lā sīna̍ māā Mɛ̄lɛ̄ka̍ Ya̍a̍wɛ̄ɛ̄ o̍ cho̍ nyɛ̄ o̍ di̍mi̍ ho̍ō wo̍ tōsā, lā chō chɔ̄ mī ma̍āŋndo̍ ho̍ō ō tɛ̄nda̍ tɛ̄ɛ̄ŋ kpa̍la̍, ndu̍yɛ̍ pūlta̍ cho̍ lēcho̍ō la̍ŋ kpo̍u̍ mī lā sɛ̄ŋi̍ŋ lɛ᷅ŋ.”

⁴Mɛ̄ɛ̍ Māsāa̍ Chɛ̄lōbo̍wām o̍ tu̍e̍ī nyɛ̄ wāna̍ Mɛ̄lɛ̄ka̍a̍ ho̍ō ō sōō a̍ ma̍āŋndo̍ Bɛ̍tɛ̄ɛ̄l o̍kɔ̄ɔ̄ wo̍, mbo̍ yūlū bāa̍ mbo̍ dīmūl pūa̍a̍ ndūa̍a̍ chɔ̄ūwa̍ āā, “Lā bīi̍ po̍o̍ ho̍ō.” Mɛ̄ɛ̍ o̍ si̍ɛ̍ndi̍ bāa̍, o̍ le̍ pīlɛ̍ ni᷄ŋ kpe̍ mi̍ bāa̍ kēŋgēlā ndu̍ kpo᷅ke̍ ō nɔ̄la̍ lɛ̍ mbō tūū ndu̍ le̍.

⁵Ndu̍yɛ̍ o̍ ko̍ŋ kɔ̍ɔ̍lī, o̍ lēpīlɛ̍ ni᷄ŋ kpe̍, mi̍ ma̍āŋndo̍ tɛ̄ndā, pūlta̍ wa̍ lēchōo̍ la̍ŋ kpo̍u̍ mī lā sɛ̄ŋi᷄ŋ lɛ᷅ŋ. Mi̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ dɔ̍ū wānā su̍a̍ā le̍ ndu̍ wo̍ o̍ sōndō mbo̍ dīmī wo̍ ō chīŋā lāsōndō.

⁶O̍ ko̍ŋ, mi̍ Māsāa̍ Chɛ̄lōbo̍wām di̍mūl wāna̍ Mɛ̄lɛ̄ka̍a̍ ho̍ō āā, “Yāndi̍i̍, pi̍ɛ̍i̍lu̍l la̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nūmndo̍ mbō sīŋgi̍ ya̍.” O̍ ko̍ŋ kɔ̍ɔ̍lī, mi̍ wāna̍ Mɛ̄lɛ̄ka̍a̍ ō pīɛ̄ī Mɛ̄lɛ̄ka̍ Ya̍a̍wɛ̄ɛ̄, mi̍ Mɛ̄lɛ̄ka̍ sīŋgī ndu̍, mi̍ bā ndɔ̄ɔ̍ mīīŋgū māā pāāndū.

⁷Mi̍ Māsāa̍ Chɛ̄lōbo̍wām o̍ lo᷅ o̍ ko̍ŋ mbo̍ dīmūl wāna̍ Mɛ̄lɛ̄ka̍a̍ ho̍ō āā, “ŋ̄ kɔ̍ chi̍ɛ̍ī ni̍ŋ mā kɔ̍ di̍ō nyɛ̄ dīa̍a̍. I̍ cho̍ lākɔ̄ nu̍m nyɛ̄ pɔ̄mbɔ̄ kē le̍ nyɛ̄ ŋ̄ tōsa̍l la̍ ho̍ō wo̍.”

⁸Kɛ̍ mi̍ wāna̍ Mɛ̄lɛ̄ka̍a̍ dīmūl ndu̍ āā, “Ā yɔ᷄ŋ bɛ̍ɛ̍ mā ke̍ ya̍ sūl nūmndo̍ tɛ̄ndāa̍ tɛ̄ɛ̄ŋ ki̍nɛ̍i̍, I̍ ku̍ē o̍ nūmndo̍ chi̍ɛ̍ī ni̍ŋ te̍. Nyɛ̄ dīāā wāā na̍nu᷄ŋ bɛ̍ɛ̍ I̍ di᷅ le̍, kɛ̄lɛ̄ŋgāā mī ko̍l mɛ̄ŋndē wāā na̍nu᷄ŋ.

⁹Mɛ̄lɛ̄ka̍ Ya̍a̍wɛ̄ɛ̄ di̍mu̍l la̍ māā tē I̍ hi᷅ŋ na̍nu᷄ŋ pɛ̍, māā ya̍ I̍ di̍ā nyɛ̄ dīāā wāā na̍nu᷄ŋ te̍, kɛ̄lɛ̄ŋgāā mī ko̍l mɛ̄ŋndē wāā na̍nu᷄ŋ, ndu̍yɛ̍ o̍ ko̍ŋ kɔ̍ɔ̍lī, nɛ̄i̍ yā I̍ hi᷅ŋ ndo̍ bɛ̍ɛ̍ māā ya̍ I̍ mi̍i̍ŋgū lɛ̄ a̍ ndu̍ le̍.”

¹⁰O̍ ko̍ŋ, mi̍ wāna̍ Mɛ̄lɛ̄ka̍a̍ ho̍ō ō mīīŋgū a̍ nɛ̄ī che̍le̍ŋ, ō mīīŋgu̍ lɛ̍ a̍ nɛ̄i̍ Bɛ̍tɛ̄ɛ̄l o̍ hi᷅ŋ ndo̍ le̍.

¹¹Fi̍nyā pīlɛ̍ wa̍ Bɛ̍tɛ̄ɛ̄l, ndu̍ bɛ̍ɛ̍ wāna̍ su̍a̍ā le̍ Mɛ̄lɛ̄ka̍ wo̍ o̍ wa̍ ni̍ kɛ̍ ō wa̍ ni᷅ŋ ō yūwɛ̍i̍. Nyɛ̄ o̍ nyɛ̄ wāna̍ Mɛ̄lɛ̄ka̍a̍ Chu̍dā o̍ kɔ̍ to̍sā Bɛ̍tɛ̄ɛ̄l, fi̍nyā yūwɛ̍i̍ su̍a̍ā ho̍ō le̍ Mɛ̄lɛ̄ka̍ wo̍, mi̍ pūa̍a̍ ndūa̍a̍ ā hu᷄ŋ do̍u̍nu᷄ŋ ndu̍ ko̍na̍ kpo̍u̍. O̍ ko̍ŋ kɔ̍ɔ̍lī, ma̍ chɔ̄m ndu̍ nyɛ̄ o̍ nyɛ̄ wāna̍ Mɛ̄lɛ̄ka̍a̍ ho̍ō ō dīmu̍l Māsāa̍ Chɛ̄lōbo̍wām.

¹²Mi̍ fi̍nyā ndā nyu̍nā nda̍ āā, “Nɛ̄i̍ kūɛ̍ɛ̍nɛ̍ wāna̍ Mɛ̄lɛ̄ka̍ kālāa̍ ō kūɛ̄ yɛ̄?” Mi̍ pūa̍a̍ ndūa̍a̍ chɔ̄m ndu̍ nɛ̄i̍ wāna̍ Mɛ̄lɛ̄ka̍a̍ ho̍ō ō kūɛ̄ wo̍.

¹³Mbo̍ dīmūl nda̍ āā, “Lā bɛ̄ɛ̄ndi̍a̍l la̍ sōfɛ̍lɔ̍ɔ̍ chɔ̍ chɔ̍ I̍ tu̍āl ndu̍ kɔ̄ɔ̄lī.” O̍ ko̍ŋ, ma̍ bɛ̄ɛ̄ndīāl ndu̍ sōfɛ̍lɔ̍ɔ̍ mbo̍ hēl lēchōo̍,

¹⁴mbo̍ tīsā wāna̍ Mɛ̄lɛ̄ka̍a̍ ho̍ō kɔ̄ɔ̄lī. Ō kōma̍l wāna̍ Mɛ̄lɛ̄ka̍a̍ ho̍ō īchāli̍ o̍ yɔ̄m Ɔ̍kū wo̍ bɛ̄ŋgu̍. Mbo̍ nyūnā ndu̍ āā, “Nu̍m cho̍ wāna̍ Mɛ̄lɛ̄ka̍ fu̍la̍ Chu̍dā wo̍ ni̍?” Mi̍ wāna̍ Mɛ̄lɛ̄ka̍a̍ chɛ̄l, āā, “E̍ī, ya̍ ni̍.”

¹⁵Mi̍ fi̍nyā yūwɛ̍i̍ ndu̍ o̍o̍ su̍a̍ā ho̍ō le̍ Mɛ̄lɛ̄ka̍ wo̍ ō dīmūl ndu̍ āā, “Ŋ̄ mīīŋgu̍ chi̍e̍e̍ mā kɔ̍ di̍ō nyɛ̄ dīa̍a̍.”

¹⁶Mi̍ wāna̍ Mɛ̄lɛ̄ka̍a̍ Chu̍dā di̍mūl ndu̍ āā, “Sāko̍, I̍ cho̍ mi̍i̍ŋgū le̍, kɛ̄lɛ̄ŋgāā mī de᷅ nyɛ̄ dīāā wāā na̍nu᷄ŋ, ɔ̄ɔ̄ mī ko̍l bɛ̍ɛ̍ mɛ̄ŋmā wāā na̍nu᷄ŋ.

¹⁷Mɛ̄lɛ̄ka̍ Ya̍a̍wɛ̄ɛ̄ o̍ si̍la̍ ya̍ māā ya̍ I̍ di̍ā nyɛ̄ dīāā wāā na̍nu᷄ŋ te̍, māā mɛ̄ŋndē wāā na̍nu᷄ŋ bɛ̍ɛ̍ ya̍ I̍ ko᷅l te̍, ndu̍yɛ̍ māā ya̍ I̍ mi̍i̍ŋgū vɛ̄lɛ̄ a̍ nɛ̄i̍ ya̍ I̍ hi᷅ŋ ndo̍ le̍.”

¹⁸Mi̍ fi̍nyā yūwɛ̍i̍ ndu̍ o̍o̍ su̍a̍ā ko̍ŋ le̍ Mɛ̄lɛ̄ka̍ wo̍ ō dīmūl ndu̍ āā, “Ya̍ bɛ̍ɛ̍ wāna̍ su̍a̍ā le̍ Mɛ̄lɛ̄ka̍ wo̍ ya̍ I̍ cho̍ ni̍, mɛ̄ɛ̍ nūm bɛ̍ɛ̍ chō nu̍a̍ā yɛ̍. Mɛ̄lɛ̄ka̍ Ya̍a̍wɛ̄ɛ̄ o̍ ve᷅m ki̍i̍la̍nɔ̍ ndɔ̄ɔ̍ mbo̍ dīmūl la̍ māā ya̍ I̍ hu̍ŋ nu̍m kɔ̄ɔ̄lī mī ŋ̄ mīīŋgu̍ chi̍e̍e̍ mī kɔ̍ ke᷅ nu̍m nyɛ̄ dīa̍a̍ mā dē.” Wāna̍ Mɛ̄lɛ̄ka̍a̍ ho̍ō ō sīna̍ nu̍a̍ā māā chōōla̍ŋ te̍ fi̍nyāa̍ ho̍ō ō chō ndu̍ dīmūllo̍ le̍.

¹⁹O̍ ko̍ŋ, mbo̍ chɛ̄l ma̍ mīīŋgū chi̍e̍e̍ nda̍ fi̍nyāa̍ ho̍ō, mi̍ fi̍nyāa̍ ho̍ō ō kɔ̍ ke᷅ ndu̍ nyɛ̄ dīa̍a̍ mbo̍ dīā.

²⁰Ā lo᷄ īchāli̍ nyɛ᷅ dīa̍a̍ ho̍ō dīo̍o̍ o̍ ti̍bīi̍yo̍ chōo̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā nāa̍ fi̍nyā yūvɛ̄i̍ ndu̍ o̍o̍ su̍a̍ā ho̍ō le̍ Mɛ̄lɛ̄ka̍ wo̍ chu̍a̍.

²¹Mi̍ wāna̍ ndu̍ o̍o̍ su̍a̍ā ho̍ō lē Mɛ̄lɛ̄ka̍ wo̍ dīmūl wāna̍ Mɛ̄lɛ̄ka̍a̍ Chu̍dā āā, “Mɛ̄lɛ̄ka̍ Ya̍a̍wɛ̄ɛ̄ di̍mi̍ māā nūm so̍li̍ ndu̍ dīōm. Ō dīmi̍ māā nyɛ̄ o̍ di̍mu̍l nu̍m le̍ tōsāa̍ wo̍, ō cho̍ ndu̍ le̍ ŋ̄ tōsa̍ ho̍ō le̍.

²²Ō dīmu̍l nu̍m māā nūm di̍ā nyɛ̄ dīāā wāā na̍nu᷄ŋ te̍, kɛ̄lɛ̄ŋgāā mā ko̍l bɛ̍ɛ̍ mɛ̄ŋndē wāā na̍nu᷄ŋ. Kɛ̍ ma̍ mīīŋgū ma̍ hu᷄ŋ di̍ō nyɛ̄ dīāā wāā na̍nu᷄ŋ ndu̍yɛ̍ ma̍ kōl mɛ̄ŋmā wāā na̍nu᷄ŋ. Le̍la̍ŋ ō dīmi̍ māā nūm chō pīɔ̍mndo̍ sɔ̄lā. Ndu̍yɛ̍ tē ā vī pɛ̍, ā chɔ᷅ ni̍ŋ di̍a̍llūŋ nūm vi̍lɛ̍i̍yo̍ŋ o̍ sɛ̄i̍ nya̍ yu̍ŋgo̍o̍ ni᷄ŋ te̍.”

²³Mɛ̄ɛ̍ nda̍ chīi̍ dīo̍la̍ŋ, mi̍ fi̍nyā ndu̍ o̍o̍ su̍a̍ā ko̍ŋ le̍ Mɛ̄lɛ̄ka̍ wo̍ ō bɛ̄ɛ̄ndīāl ndu̍ sōfɛ̍lɔ̍ɔ̍ le̍ mbō kūɛ̄.

²⁴Mi̍ wāna̍ Mɛ̄lɛ̄ka̍a̍ Chu̍dā o̍ he᷅l o̍ sōfɛ̍lɔ̍ɔ̍ chōo̍ mbo̍ bīī kɔ̄la̍ŋ. O̍ ko̍ŋ, mi̍ kpɔ̍kūŋndo̍ kēī ndu̍ dēlɔ̄ɔ̄ chōo̍ o̍ nɛ̄ī mbo̍ dīī ndu̍, kɛ̍ ō di̍ di̍a̍llūŋ ndɔ᷄ŋ te̍. Kpɔ̍kūŋ kōŋ ni̍, sōfɛ̍lɛ̍ o̍ wa̍ kɔ̄la̍ŋ chōo̍ wo̍ ni̍, ma̍ sīm dīāllūŋ ndɔ̄ŋ vi̍lɛ̍i̍ mu̍ŋ īkɛ̄i̍ o̍ nɛ̄ī lo̍ŋ.

²⁵Wāŋnda̍ wā hīōūwɔ̄ɔ̍ o̍ nɛ̄ī ko̍ŋ. Ma̍ kōmāl wāna̍ Mɛ̄lɛ̄ka̍a̍ ho̍ō īhīni̍ o̍ vi̍lɛ̍i̍yo̍ o̍ nɛ̄ī lo̍ŋ, kpɔ̍kūŋndo̍ wa̍ ndu̍ īsīsi̍ i̍kɛ̍i̍, lātūlū a̍ sōfɛ̍lɛ̍ o̍ wa̍ kɔ̄la̍ŋ chōo̍ wo̍. Ma̍ kūā Bɛ̍tɛ̄ɛ̄l chi̍e̍e̍ ma̍ kɔ̍ di̍mūl wāŋnda̍.

²⁶Mɛ̄ɛ̍ fi̍nyā yūvɛ̍i̍ ndu̍ o̍o̍ su̍a̍ā ho̍ō le̍ Mɛ̄lɛ̄ka̍ wo̍, tūēī a̍ ndi̍ o̍kɔ̄ɔ̍, mbo̍ dīmī āā, “Ō kɛ̄ɛ̍ wa᷅ wa᷅na̍ Mɛ̄lɛ̄ka̍a̍ Chu̍dā le̍ cho̍ ko̍ŋ i̍hi̍ni̍ o̍ vi̍lɛ̍i̍yo̍ le̍. Ndu̍ so̍li̍ Mɛ̄lɛ̄ka̍ Ya̍a̍wɛ̄ɛ̍ dīōm ni̍, mi̍ Mɛ̄lɛ̄ka̍ dīmī māā ō nɔ̄ mbō sɔ̄la̍ pīɔ̍mndo̍. I̍ che᷅ māā ō wā ni̍ŋ ndu̍ Mɛ̄lɛ̄ka̍ Ya̍a̍wɛ̄ɛ̄ o̍ ve᷅m nu̍a̍ā kpɔ̍kūŋndo̍ ni̍ mbo̍ kɔ̍ sɛ̍ɛ̍sīāā ndu̍.”

²⁷Mi̍ fi̍nyāa̍ ho̍ō dīmūl pūa̍a̍ ndūa̍a̍ āā, “Lā bɛ̄ɛ̄ndi̍a̍l lɔ̍ ya̍ sōfɛ̍lɔ̍ɔ̍ chɔ̍ chɔ̍ I̍ ku̍ā lo̍ŋ.” Ma̍ bɛ̄ɛ̄ndīāl ndu̍ sōfɛ̍lɔ̍ɔ̍,

²⁸mbo̍ hēl lēchōo̍ mbo̍ kūā. Ō ko̍ma̍l wāna̍ Mɛ̄lɛ̄ka̍a̍ ho̍ō īhīni̍ o̍ vi̍lɛ̍i̍yo̍ o̍ nɛ̄ī, sōfɛ̍lɛ̍ ndɔ̄ɔ̍ ni̍, kpɔ̍ku᷄ŋ di̍ī ndu̍ ko̍ŋ ndo̍ ni̍, ā wa̍ ndu̍ īsīsi̍ i̍kɛ̍i̍. Ndu̍yɛ̍ mɛ̄ɛ̍ kpɔ̍kūŋ kōŋ ō dīī ndu̍, ō tōsa̍ nyɛ᷅ o̍ nyɛ̄ a̍ dīāllūŋ ndɔ᷄ŋ te̍, kɛ̄lɛ̄ŋgāā mbō pīla̍ŋ bɛ̍ɛ̍ sōfɛ̍lɛ̍ ndɔ̄ɔ̍.

²⁹O̍ ko̍ŋ, mi̍ fi̍nyā yūvɛ̄i̍ ndu̍ o̍o̍ su̍a̍ā le̍ Mɛ̄lɛ̄ka̍ wo̍ ō chūā dīāllūŋ ndɔ̄ŋ vi̍lɛ̍i̍ mu̍ŋ mbo̍ hāndū o̍ sōfɛ̍lɛ̍ ndɔ̄ɔ̍ chōo̍ mbo̍ mīīŋgū a̍ mu̍ŋ chi̍e̍e̍, le̍ mbō kɔ̍ to̍sā bīīsi̍ ndɔ̄ɔ̍, ndu̍yɛ̍ mbō chɔ᷅ ndu̍.

³⁰Fāllo̍ ho̍ō ndu̍ o̍o̍ nɔ̍ sɛ̄i̍ nda̍ yu̍ŋgo̍o̍. Mi̍ fāllo̍ ho̍ō ō chɔ̄ wāna̍ Mɛ̄lɛ̄ka̍a̍ ho̍ō o̍ sɛ̄i̍ nda̍ yu̍ŋgu̍ ko̍ŋ ni᷄ŋ Bɛ̍tɛ̄ɛ̄l lo̍ŋ. Ndu̍ ni̍, pūa̍a̍ ndūa̍a̍ ni̍, ma̍ chāŋ cha᷄ŋndo̍ pīla̍ o̍ sɛ̄īyo̍ chōo̍, mbo̍ dīmī āā, “O̍o̍ chāa̍ŋ nūu̍, chāa̍ŋ nūu̍ vī fɔ̍.”

³¹Mɛ̄ɛ̍ nda̍ chīi̍ ndu̍ chɔ̄ kpo̍u̍, mi̍ fi̍nyā ho̍ō dīmūl pūa̍a̍ ndūa̍a̍ āā, “Tē I̍ hu̍ŋ wu᷅ fɛ̍ɛ̍ŋ pɛ̍, sɛ̄i̍ na̍a̍ ŋ̄ chɔ̍ ho̍ō wāna̍ Mɛ̄lɛ̄ka̍a̍ ho̍ō wo̍, lēni᷄ŋ nya̍ chɔ᷅ ya̍ ni̍, mī lā yāmbu̍ dīāllūŋ nu᷄ŋ o̍ dīāllūŋ ndɔ᷄ŋ īkɛ̄i̍.

³²Nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ dɔ̍ū wāna̍ Mɛ̄lɛ̄ka̍a̍ ho̍ō o̍ sōndō, mbo̍ dīmī ndu̍, ō pīlɛ̍ bɛ̍ɛ̍ ō lo̍ ni̍ŋ le̍ yɔ̄nɔ᷄ŋndo̍ le̍. Nyɛ̄ o̍ di̍mi̍ a̍ ma̍āŋndo̍ Bɛ̍tɛ̄ɛ̄l o̍kɔ̄ɔ̄ wo̍ ni̍, nyɛ̄ o̍ so̍ō a̍ sōōlu̍u̍la̍ŋ o̍ chi̍o̍o̍ŋ Sāme̍e̍līāā na̍nu᷄ŋ o̍kɔ̄ɔ̄ wo̍ ni̍, mu̍ŋ kpo̍u̍ ō pīlɛ̍ bɛ̍ɛ̍ cho̍ lo᷅ le̍ yɔ̄nɔ᷄ŋndo̍ le̍.”

³³Kɛ̍ a̍ ko̍ŋ kpo̍u̍, Chɛ̄lōbo̍wām o̍ chɛ̍l mbō sōli̍ bāla̍ŋ o̍ yɔ̄ŋ wɔ̄ɔ̍ŋndo̍ ni᷄ŋ te̍, ō wa̍ wɔ̄ hīōūwɔ̄ɔ̍ lāchī a̍ sɔ̄ɔ̍ŋ wɔ̄ɔ̍ŋndo̍ŋ tōsāa̍ kɛ᷅. Wānāa̍ nda̍ a̍a̍ bɛ̍nda̍ bɛ̍ɛ̍ le̍ mā wa̍ wānāā sōlīāā lāsa̍lā le̍ wa̍, nda̍ o̍ wa̍ chūa̍a̍ nī mbō sīīŋgūū nda̍ wānāā sōlīāā lāsa̍lā, le̍ mā wa̍ o̍ sōōlu̍u̍la̍ ndāla̍ yɛ̍ yɛ̍la̍ŋ. Wāna̍ ye̍e̍mā ko̍ le̍ sīmnɔ᷄ŋndo̍ wānā so̍līāā lāsa̍lā ō chūā ko̍ŋ.

³⁴Yɔ̄ŋ wɔ̄ɔ̍ŋ Chɛ̄lōbo̍wām wa̍ ho̍ō tōsāa̍ wo̍, ndu̍ tōsā ni̍ mi̍ dɛ̍nɛ̍ pa̍lāā bɛ̄ndōo̍ ō hu᷄ŋ to᷅l o̍ yu̍ŋgu̍ ndɔ̄ɔ̍ chōo̍ o̍ mɛ̄ɛ̄lu̍la̍ŋ. Nda̍ kpo̍u̍, ma̍ hu̍ŋ chu̍ū kpo̍u̍, ō pīlɛ̍ bɛ̍ɛ̍ ō lo̍ o̍ chi̍e̍ēŋndo̍ chōo̍ le̍.