Read Southern Kisi Māsāā Bɛ̍ndūāā Tāsi̍a̍a̍ 14 Bible Online

Māsāā Bɛ̍ndūāā Tāsi̍a̍a̍ 14 - Southern Kisi bible

Māsāā Bɛ̍ndūāā Tāsi̍a̍a̍ 14

¹Mi̍ ī yɔ̄nu̍ŋ mi̍ Ābi̍chā po̍ Māsāa̍ Chɛ̄lōbo̍wām ndo̍ ō dēl a̍ nāa̍.

²O̍ ko̍ŋ, mi̍ Chɛ̄lōbo̍wām o̍ di̍mūl la̍a̍ ndɔ̍ āā, “To̍o̍si̍a̍ŋ mā kūɛ̄ Si̍lɔ̄ɔ̄ chi̍e̍e̍ nāa̍ wāna̍ su̍a̍ā le̍ Mɛ̄lɛ̄ka̍ wo̍ A̍hi̍chā chu̍ā, o̍ di̍mi̍ māā ya̍ I̍ cho̍ sīmnɔ᷄ŋ ma̍sāa̍ I̍sɔ̄lūɛ̄ī yo̍, mā kɔ̍ nyu̍nā ndu̍ a̍ sūɛ̍i̍ nāā pōo̍mbɔ̄ɔ̍ ho̍ō o̍kɔ̄ɔ̄. Ō chō lākɔ̄ nu̍m kɔ̄l kīndī tē pōo̍mbɔ̄ɔ̍ ho̍ō ō chīndā ni̍ŋ ɔ̄ɔ̄, tē ō chi̍ndā ni̍ŋ tē. Tē a̍ wa̍ kɔ̄la̍ŋ pɛ̍, a̍ chu̍a̍ bēe̍ndīi̍yo̍ kpūŋgba᷄ŋ tɔ̍, a̍ ke̍kīi̍yo̍ ō ti᷄ŋ, a̍ līa̍a̍ŋ kpɛ̍ɛ̍nɛ̍i̍ cha̍, a̍ yo̍o̍ ndu̍ o̍ bā. Kɛ̍ ndu̍yɛ̍ tē a̍ wa̍ kɔ̄la̍ŋ pɛ̍, to̍sā mī wāŋnda̍ sīna̍ māā la̍a̍ nūu̍ le̍ ŋ̄ cho̍ le̍, tē a̍ wa̍ kɔ̄la̍ŋ pɛ̍, a̍ to̍o̍si̍a̍ŋ to̍o̍sīa̍ŋ wāŋnda̍ bi̍ī nu̍m bīlā le̍ wo̍.”

⁴O̍ ko̍ŋ, mi̍ la̍nɔ̍ɔ̍ Chɛ̄lōbo̍wām tōōsīa̍ŋ mbo̍ kūā. Ndu̍yɛ̍ A̍hi̍chā o̍ wa̍ ni᷅ŋ ō yūvɛ̍i̍ ku̍ndɛ̍ɛ̄ bɛ̄ndū, ndu̍ o̍o̍ chi᷅ lɛ̍ le̍.

⁵Kɛ̍ chūa̍a̍ ho̍ō ō lo̍ la̍nda̍ŋ mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl A̍hi̍chā āā, “La̍nɔ̍ɔ̍ Chɛ̄lōbo̍wām o̍ cho̍ hūnɔ̄ɔ̍ nāa̍ nūm chu̍a̍ le̍ mbō hu᷄ŋ nyu̍nā nu̍m a̍ nāā po̍ ndɔ̄ɔ̍ o̍kɔ̄ɔ̄.” Ndu̍yɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ chɔ᷅m A̍hi̍chā nyɛ̄ o̍ nɔ̍ mbō dīmu̍l chūa̍a̍ ho̍ō wo̍. Mɛ̄ɛ̍ la̍nɔ̍ɔ̍ Chɛ̄lōbo̍wām o̍ fu̍u̍lu̍u̍, mbo̍ tōsā māā wānā che᷅le̍ŋ pɔ̍ o̍ cho̍ ni̍.

⁶Kɛ̍ mɛ̄ɛ̍ A̍hi̍chā o̍ tu̍e̍ī ndɔ̍ɔ̍ pēlo̍ŋ o̍ dīō mbo̍ sīnā māā la̍nɔ̍ɔ̍ Māsāa̍ Chɛ̄lōbo̍wām hi᷅ŋ ni̍. Mbo̍ dīmūl ndu̍ āā, “Lu̍ɛ̍i̍, la̍nɔ̍ɔ̍ Chɛ̄lōbo̍wām. I̍ si̍nā māā nu̍m cho̍ hūnɔ̄ɔ̍ ho̍ō ni̍. Vɛ᷅ ma̍ wā ya̍ kāŋgālāa̍ tōsāllo̍, mā tōsā māā wānā che᷅le̍ŋ pɔ̍ ŋ̄ chō ni̍? I̍ nɔ̍ yōōŋgū wɔ̄ɔ̍ŋndo̍ o̍ so̍ndō le̍ nya̍.

⁷Kɔ̍ mā kɔ̍ di̍mūl pɔ̍nɔ̍ nu̍m māā nyɛ̄ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍ ō dīmi̍ wo̍ cho̍ ho̍ō ni̍. Ō dīmi̍ āā, ‘Chɛ̄lōbo̍wām, ya̍ hɛ̍li̍ nu̍m I̍sɔ̄lūɛ̍i̍ya̍ tɛ̄ɛ̄ŋ ni̍ mi̍ si̍i̍ŋgūū nu̍m māsāa̍ bɛ̍ndōo̍ wānāā nīa̍a̍ chōo̍.

⁸O̍ Dēēve̍ lo̍ chi̍ɛ̍ī ni᷅ŋ māsāle̍ŋ nde᷅ŋ lē wa̍ ni̍, mi̍ lo᷅ o̍ ko̍ŋ mi̍ so̍lī le̍ŋ o̍ ndu̍ lo̍ chi̍ɛ̍ī ni̍ŋ mi̍ ke᷅ nu̍m. Kɛ̍ a̍ to̍sa̍ nyɛ᷅ hi̍nī ya̍ kɔ̄llo̍, māā bu̍ɛ̍ī nūu̍ Dēēve̍ le̍. Dēēve̍ wāna̍ ndu̍ o̍o̍ tu̍e̍ī ya̍ dīōmndo̍ o̍ wa̍ ni̍. Nyɛ̄ o̍ nyɛ̄ ya̍ I̍ di̍mu̍l ndu̍ le̍ tōsāa̍, mbo̍ dūāū kɔ̄l ndɔ̄ɔ̍ kpo̍u̍ o̍ ndu̍ tōsāa̍ ni᷄ŋ. Le̍ te̍le̍ŋ o̍ te̍le̍ŋ nyɛ᷄ hi̍nī ya̍ kɔ̄llo̍ wo̍, ndu̍ ndu̍ o̍o̍ to̍sā ni̍.

⁹Kɛ̍ nūm nūm yɔ̄ŋ wɔ̄ɔ̍ŋ ŋ̄ tōsa̍ wo̍ māsāa̍ ke̍e̍ku̍ nu̍m lāchī I̍sɔ̄lūɛ̄ī ki̍nɛ̍i̍ ya̍, ō pīlɛ̍ bɛ̍ɛ̍ to̍sa̍ wɔ̍ yɔ̍ŋ wɔ̄ɔ̍ŋ su̍u̍ wa̍ā le̍nde̍ māā nūm te̍. Ya̍ Mɛ̄lɛ̄ka̍ hɛ̍li̍ nu̍m ni̍, mi̍ si̍i̍ŋgūū nu̍m māsāa̍ lɛ̄ŋnde̍ŋ nde᷅ŋ, kɛ̍ ma̍ lō o̍ ko̍ŋ ma̍ kɛ̄ɛ̄ ya̍, ma̍ tōōsīāā nyɛ̄m chēle̍ŋ a̍ yɔ̄mnde̍, ndu̍yɛ̍ a̍ ko̍o̍līi̍ŋ te̍e̍ŋgīa̍ŋ mā sōōlūū mu̍ŋ māā mɛ̄lɛ̄ka̍ā nūm. Nyɛ̄ kōŋ kpe̍e̍kpe̍i̍ to̍sa̍ ni᷅ŋ ni̍ mi̍ du̍a̍u̍nu᷄ŋ tu̍mbe̍ a̍ nūm.

¹⁰Le̍ nyɛ̄ ŋ̄ tōsa̍ ko̍ŋ ndo̍, I̍ cho̍ hūnɔ̄ɔ̄ yu̍ŋgu̍ nu̍mndo̍ nyɛ̄ pālāā bɛ̄ndōo̍ tūsī chōo̍. Wānā pɔ̍nɔ̍ o̍ wānā pɔ̍nɔ̍ cho̍ o̍ nūmndo̍ chi̍ɛ̍ī ni̍ŋ, ō wa̍ chɛ᷅ ō wa᷅ chɛ̄ le̍, I̍ cho̍ hūnɔ̄ɔ̄ chīī a̍ nda̍ mī ba̍su̍ nda̍ mɛ̄ɛ̍ yīŋnde̍ŋ lē bāsū nu̍a̍ā bīl vēsɛ̍i̍yo̍ yɛ̍.

¹¹A̍ sɔ̍lā ni̍ŋ pi̍ɔ̍mnda̍ŋ o̍ chi̍e̍e̍ kɔ᷅llo̍ ni᷄ŋ nda̍, tūŋnda̍ cho̍ dīāllūŋ nda᷄ŋ dīo̍ ni̍. O̍ ko̍ŋ kɔ̍ɔ̍lī, a̍ cho̍ pīɔ̍mnda̍ŋ sɔ̄lā yōndōla̍ŋ ni᷄ŋ nda̍, mī yi̍bɛ̍i̍ya̍ dē dīāllūŋ nda᷄ŋ. Ya̍ Mɛ̍lɛ̄ka̍ Ya̍a̍wɛ̄ɛ̍ so̍ō ni̍.’ ”

¹²Mɛ̄ɛ̍ A̍hi̍chā o̍ chi̍i̍ ndu̍ yōōŋgōo̍ ho̍ō dīmūl kpo̍u̍, mbo̍ dīmūl ndu̍ āā, “Chɔ̍ŋ ni̍ko̍ mā mi̍i̍ŋgu̍. Sūɛ̍i̍ ŋ̄ hīŋ yɛ̄ le̍ ndi̍ ve̍, po̍ nu̍m kōŋ cho̍ chi̍ndā le̍. Mālɔ̄ɔ̄ ŋ̄ chō na̍nu᷄ŋ ndo̍, dīmīo̍o̍ nu̍āā mā he̍l chi̍e̍e̍ mbō mālnu̍ŋ kɔ᷅l.

¹³Wānā o̍ wāna̍ cho̍ I̍sɔ̄lūɛ̄ī, ā chō cha᷄ŋ le̍ pōo̍mbɔ̄ɔ̍ ho̍ō. O̍ ko̍ŋ kɔ̍ɔ̍lī, mā chu̍a̍ ndu̍ mā kɔ̍ chɔ᷅ ndu̍. Ndu̍yɛ̍ o̍ yu̍ŋgu̍ Chɛ̄lōbo̍wām ndo̍ chōo̍ ki̍nɛ̍i̍, pōo̍mbɔ̄ kōŋ ndu̍ pīlɛ̍ kpe̍ cho̍ chɔ̄ sɔ̄vi̍ɔ̍ɔ̍ sɔ̄lā ni̍. Kāni̍ fo̍ndōle̍, ndu̍ pīlɛ̍ kpe̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍ni̍ kɔ̄l o̍ chīɛ̍i̍ Chɛ̄lōbo̍wām ndo̍ ni᷄ŋ ni̍.

¹⁴Ndu̍yɛ̍ ō fūla̍ o̍ ko̍ŋ kɔ̍ɔ̍lī, Mɛ̄lɛ̄ka̍ Ya̍a̍wɛ̄ɛ̄ di̍mi̍ māā ō chō hūnɔ̄ɔ̄ māsā che᷅le̍ŋ chūā I̍sɔ̍lūɛ̄ī, o̍ cho̍ hūnɔ̄ɔ̄ yu̍ŋgu̍ Chɛ̄lōbo̍wām ndo̍ tɛ̄ɛ̄mbūū mbō bāsu̍ nda̍ tɛ̍ɛ̍ wo̍. Ndu̍yɛ̍ ō bēndu̍ lɛ̍ ni̍ŋ bɛ̍ɛ̍ ti᷅ŋ te̍, mī he̍ī yɔ̄nu̍ŋ.

¹⁵Mɛ̄lɛ̄ka̍ Ya̍a̍wɛ̄ɛ̄ di̍mi̍ māā ō chō hūnɔ̄ɔ̄ I̍sɔ̄lūɛ̍i̍ya̍ nyɛ̄ pālāa̍ tūsī chōo̍, mī I̍sɔ̄lūɛ̄ī o̍ hi̍i̍lu̍ŋ kpo̍u̍ mɛ̄ɛ̍ mɛ̄ŋnda̍ŋ mā hīīlūū nu̍a̍ā bīl pūīyāa̍ o̍ pēēlo̍ yɛ̍. Lɛ̄ŋndē kɛ̄ndɛ̄lē o̍ ke̍ le᷅ŋ fi̍nyāā ndāā ma̍māa̍ māā nyɛ̄ nda̍ le̍ŋ, ō chō nda̍ hūnɔ̄ɔ̄ sōlī lēni᷄ŋ mbo̍ tōsa̍ mā sɛ̄ŋi̍ŋ a̍ nda̍ o̍ lɛ̄ŋnde̍ cho̍ o̍ Pēē Bɛ̍ndōo̍ Yūfi̍lu̍a̍tīī le̍e̍lōo̍ le̍ŋ ni᷄ŋ kpo̍u̍. Wāŋnda̍ I̍sɔ̄lūɛ̄ī a̍ to̍sa̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ du̍a̍u̍nu᷄ŋ tu̍mbe̍ a̍ nda̍ ta̍u̍ ta̍u̍. Kāni̍ fo̍ndōle̍, le̍ mɛ̄ɛ̍ nda̍ kɛ̄ɛ̍ ndu̍ ma̍ mūli᷄ŋ mɛ̄lɛ̄ka̍a̍ lāāndūāā nda̍ tōōsi̍a̍a̍ a̍ bālā ndāla̍ŋ mā vēēlū nda̍ āā A̍si̍ɛ̍lūā wa̍ sōōlūūwo̍ yɛ̍.

¹⁶Le̍ yɔ̄ŋ wɔ̄ɔ̍ŋ Chɛ̄lōbo̍wām o̍ to̍sa̍, ndu̍yɛ̍ mbo̍ tōsā mi̍ I̍sɔ̄lūɛ̍i̍ya̍ ā sīmnu᷄ŋ wa̍nāā yɔ̄ŋ wɔ̄ɔ̍ŋ Mɛ̄lɛ̄ka̍ o̍ hɔ̄l lo̍, nyɛ̄ kōŋ Mɛ̄lɛ̄ka̍ chō nda̍ bāa̍ fāŋā chōo̍ ni̍, mī ya̍a̍mɔ̍ɔ̍wa̍a̍ ndāa̍ ā tīu̍ nda̍ bā.”

¹⁷O̍ ko̍ŋ kɔ̍ɔ̍lī, mi̍ la̍nɔ̍ɔ̍ Māsāa̍ Chɛ̄lōbo̍wām o̍ ma̍lnu᷄ŋ mbo̍ mīīŋgū Tɛ̍ɛ̍sāā chi̍e̍e̍. Ndu̍yɛ̍ dīmīo̍o̍ nu̍a̍ā mbo̍ lūēī pēlēi̍ o̍ ndu̍ lo̍ chīɛ̄ī ni̍ŋ, mi̍ pōo̍mbɔ̄ɔ̍ mālnu᷄ŋ kɔ̄l.

¹⁸I̍sɔ̄lūɛ̍i̍ya̍ kpo̍u̍ ma̍ chāŋ le̍ pōo̍mbɔ̄ɔ̍ ho̍ō. O̍ ko̍ŋ kɔ̍ɔ̍lī ma̍ chūā ndu̍ ma̍ kɔ̍ chɔ᷅ ndu̍. Nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ dɔ̍ū wāna̍ su̍a̍ā le̍ ndu̍ wo̍ A̍hi̍chā o̍ sōndō mbo̍ dīmī, ō pīlɛ̍ bɛ̍ɛ̍ ō de᷄l lɛ᷅ŋ te̍.

¹⁹Sɔ̄ɔ̍ŋ tɔ᷅ŋ chēle̍ŋ yɔ̍nu̍ŋ o̍ māsāle̍ Chɛ̄lōbo̍wāmnde̍ŋ bɛ̄ŋgu̍ wo̍ŋ ki̍nɛ̍i̍, lɛ̄ŋīī o̍ sɔ̍ŋga̍ ve̍ ni̍, mɛ̄ɛ̍ o̍ wa̍ wāŋnda̍ bīyɔ̄ɔ̍ yɛ̍ ni̍, mu̍ŋ kpo̍u̍, ŋ̄ chō ŋ̄ pōōnyīāā o̍ yāu̍ sɔ̄ɔ̍ŋ pa̍a̍ndu̍ cho̍ a̍ māsāā bɛ̍ndūa̍a̍ I̍sɔ̄lūɛ̄ī o̍kɔ̄ɔ̄ wo̍ ni᷄ŋ.

²⁰Māsāa̍ Chɛ̄lōbo̍wām o̍ to̍sa̍ māsāle̍ŋ I̍sɔ̄lūɛ̄ī le̍ wɔ̄sīla̍ŋ bi̍di̍i̍ŋ a̍ lā tīɔ̍ɔ̍ŋ mbo̍ wū. Ndu̍yɛ̍ mɛ̄ɛ̍ o̍ vi᷅, mi̍ Na̍da̍bī po̍ ndɔ̄ mi̍i̍ŋgū māsāa̍ o̍ fōōfo̍ ndɔ̄ɔ̍.

²¹Lūɛ̄hōbo̍wām, o̍ wa̍ māsā bɛ̍ndōo̍ Chu̍dā wo̍ fi̍nyā ndɔ̍ wa̍ Sɔ̍lɔ̍mɔ̄ŋ ni̍. Ō wa̍ wɔ̄sīla̍ŋ be̍le̍-hi̍ɔ̍ɔ̍lu̍ a̍ ō pīlɛ̍ mbo̍ sīmnu᷄ŋ māsāa̍ Chu̍dā. Ndu̍yɛ̍ mbo̍ tōsā māsāle̍ŋ Chu̍dā le̍ wɔ̄sīla̍ŋ tɔ̍ a̍ lā ŋɔ᷄mmɛ̍ū. Chūlu̍sɛ̄lɛ̄m wa̍ chi̍e̍e̍ ndɔ̍ lēmāsāa̍ ni̍, chi̍e̍e̍ Mɛ̄lɛ̄ka̍ Ya̍a̍wɛ̄ɛ̄ pi̍la̍ hɛ̍li̍ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ kpo̍u̍, le̍ ndu̍ wāa̍ sōōlūūwo̍ lo̍ŋ ndo̍. Lūɛ̄hōbo̍wām ko̍ŋ kāla̍ ndɔ̍ wa̍ Na̍a̍mā ni̍ wānā wa̍ā o̍ lɛ̄ŋndē A̍mɔ᷅nde̍ŋ ni᷄ŋ.

²²Kɛ̍ mi̍ wāŋnda̍ Chu̍dā a̍ to̍sā yɔ̄ŋ wɔ̄ɔ̍ŋndo̍ Mɛ̍lɛ̄ka̍ Ya̍a̍wɛ̄ɛ̄ o̍ hɔ̄l. Nda̍ bɛ̍ɛ̍ ma̍ lō o̍ ko̍ŋ ma̍ kɛ̄ɛ̄ Mɛ̄lɛ̄ka̍ Ya̍a̍wɛ̄ɛ̍ dīōm ma̍ mūli᷄ŋ mɛ̍lɛ̄ka̍ā chēle̍ŋnda̍ sōōlūūwo̍. Ndu̍yɛ̍ ma̍ tāŋgūl sōōlu̍u̍la̍ŋ o̍ fo̍ndāŋndā yɛ̍ yɛ̍la̍ŋ le̍ wāa̍ nyɛ̄m mu᷅ŋ sōōlūūwo̍. O̍ ko̍ŋ kɔ̍ɔ̍lī, ma̍ sīmī nyɛ̄la̍ŋ māā māsūŋgbu̍, a̍ nyɛ̄la̍ŋ le̍ mɛ̄lɛ̄ka̍ nda̍ vēēlū āā A̍si̍ɛ̍lūā wo̍ sōōlūūwo̍ lo̍ŋ, o̍ pēmbo᷄ŋ chōo̍, a̍ o̍ yɔ̄mnde̍ bɛ̄ŋgu̍ kpo̍u̍, mā sōōlūū mɛ̍lɛ̄ka̍ā ndāa̍ o̍ nyɛ̄lā nda̍ sīmi̍ la̍ŋ nda̍ŋ. Sūɛ̍i̍ wɔ̍ɔ̍ŋ wɔ̍ɔ̍ŋ bɛ̄ndū nda̍ tōsa̍ ni᷅ŋ kpo̍u̍ ve̍, ma̍ bīī bā o̍ bā sōōlu̍u̍la̍ ndāla̍ŋ nda᷅ŋ lā wa̍, ma̍ kɛ̄sī wāŋ pīāāndūāā tīāmāa̍ a̍ wāŋ lāāndūāā tīāmāa̍ lo̍ŋ kpo̍u̍ le̍ mā wa̍ hīni̍la̍ŋ ā wānāā nda̍ a̍a̍ hu᷅ŋ lo̍ŋ nda̍. Wānāā Mɛ̄lɛ̄ka̍ Ya̍a̍wɛ̄ɛ̄ o̍ to̍ū I̍sɔ̄lūɛ̍i̍ya̍ lāchī mbo̍ sōlī nda̍ o̍ lɛ̄ŋndē Ke̍nāŋnde̍ŋ ni᷄ŋ kpo̍u̍ wa̍, ka̍ālā wɔ̄ɔ̍ŋndā nda̍ wa̍ chōo̍ la̍ŋ, ō pīlɛ̍ bɛ̍ɛ̍ wāŋnda̍ Chu̍da(...)

²³

²⁴

²⁵Mɛ̄ɛ̍ Lūɛ̄hōbo̍wām o̍ si̍mnu᷄ŋ ma̍sāa̍ Chūlu̍sɛ̄lɛ̄m ō tōsa̍ māsāle̍ŋ le̍ wɔ̄sīla̍ŋ lā hīɔ̍ɔ̍lu̍, o̍ ŋūɛ̍ɛ̍nu̍ ndɔ̄ɔ̍, mi̍ Māsā Bɛ̍ndōo̍ Si̍sa̍kī, o̍ wa̍ I̍chi̍pī wo̍ ō kɔ̍ de᷅l ndu̍ chōo̍ a̍ sɔ̍ŋgɔ̄ɔ̍.

²⁶Nyɛ̄ o̍ nyɛ̄ ba̍ā kāla̍ wa̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ ni᷄ŋ a̍ o̍ chīɛ̄ī lēmāsāa̍ ni᷄ŋ, mi̍ Māsāa̍ Si̍sa̍kī o̍ pu̍ŋgā mu̍ŋ kpo̍u̍ mbo̍ kūānu᷄ŋ a̍ mu̍ŋ. Nyɛ̄lā kālā ka̍lālā Sɔ̍lɔ̍mɔ̄ŋ o̍ to̍o̍si̍a̍a̍ a̍ ko̍o̍līi̍yo̍ŋ māā bōo̍la̍ bɛ̍ndū mī pūa̍a̍ chɔ̄ūwa̍ ā sɔ̄ŋgā a̍ la̍ŋ le̍ nda̍ māndāa̍ o̍ chɔ̄ūwo̍ la̍ŋ, la̍ŋ kpo̍u̍ mbo̍ chɔ̄ɔ̄vīāā mbo̍ kūānu᷄ŋ a̍ la̍ŋ.

²⁷Kɛ̍ mi̍ Māsā Bɛ̍ndōo̍ Lūɛ̄hōbo̍wām o̍ mi̍ŋgī lā chēle̍ŋ tōōsīāā a̍ chīli̍ŋi̍i̍ būlɔ̍ŋsīi̍ye̍. O̍ ko̍ŋ kɔ̍ɔ̍lī, mbo̍ chūā la̍ŋ mbo̍ kē wānāā nda̍ a̍a̍ ma̍ndā di̍ō kpākīo̍o̍ le̍ lūɛ̄īyɔ̄ɔ̍ o̍ chīɛ̄ī lēmāsāa̍ ni᷄ŋ nda̍, le̍ mā wa̍ la̍ŋ māndāa̍.

²⁸Tē Māsāa̍ Lūɛ̄hōbo̍wām ndu̍ o̍o̍ wa̍ kɔ̄la̍ŋ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ ni᷄ŋ pɛ̍, pūa̍a̍ ha̍ā ā chu̍a̍ nyɛ̄lā lāŋ ā kūɛ̄ a̍ la̍ŋ le̍ ndu̍ māndāa̍. Tē ō chīi̍ nyɛ̄ o̍ ku̍ā to̍sāa̍ wo̍ tōsā pɛ̍ mbō fūla̍, pūa̍a̍ ha̍ā chu̍a̍ la̍ŋ ā mīīŋgu̍ a̍ la̍ŋ nāa̍ nda̍ kɛ̄sī la̍ŋ nda̍.

²⁹Sɔ̄ɔ̍ŋ tɔ᷅ŋ chēle̍ŋ yɔ̍nu̍ŋ o̍ māsāle̍ Lūɛ̄hōbo̍wām nde̍ŋ bɛ̄ŋgu̍ wo̍ŋ ki̍nɛ̍i̍, ndu̍yɛ̍ a̍ nyɛ̄ o̍ nyɛ̄ o̍ to̍sa̍ o̍ māsāle̍ ndɔ̄le̍ŋ bɛ̄ŋgu̍, ŋ̄ chō ō pōōnyīāā o̍ yāu̍ sɔ̍ɔ̍ŋ pa̍a̍ndu̍ cho̍ a̍ māsāā bɛ̍ndūa̍a̍ Chu̍dā o̍kɔ̄ɔ̄ wo̍ ni᷄ŋ.

³⁰Ndu̍yɛ̍ Māsāa̍ Chɛ̄lōbo̍wām ni̍, Lūɛ̄hōbo̍wām ni̍, sɔ̍ŋgɔ̄ɔ̍ wa̍ nda̍ tɛ̄ɛ̄ŋ le̍ te̍le̍ŋ o̍ te̍le̍ŋ.

³¹O̍ ko̍ŋ kɔ̍ɔ̍lī, mi̍ Lūɛ̄hōbo̍wām o̍ wu᷅. Ma̍ chɔ̄ ndu̍ o̍ sɛ̄i̍ nda̍ yu̍ŋgo̍o̍ ni᷄ŋ Chūlu̍sɛ̄lɛ̄m, o̍ Māsā Bɛ̍ndōo̍ Dēēve̍ lo̍ chi̍e̍e̍ nāa̍ nda̍ chɔ̍ fi̍nyāā ndūāā ma̍māa̍ wa̍. Ndu̍yɛ̍ Lūɛ̄hōbo̍wām ko̍ŋ kāla̍ ndɔ̍ wa̍ Na̍a̍mā ni̍, wānā wa̍ā o̍ lɛ̄ŋndē A̍mɔ᷅nde̍ŋ ni᷄ŋ. Mɛ̄ɛ̍ Lūɛ̄hōbo̍wām o̍ vi᷅, mi̍ Ābi̍chā po̍ ndɔ̍ mi̍i̍ŋgū māsāa̍ o̍ fōōfo̍ ndɔ̍ɔ̍.