Read Southern Kisi Māsāā Bɛ̍ndūāā Tāsi̍a̍a̍ 15 Bible Online

Māsāā Bɛ̍ndūāā Tāsi̍a̍a̍ 15 - Southern Kisi bible

Māsāā Bɛ̍ndūāā Tāsi̍a̍a̍ 15

¹Ko̍ŋ kɔ̍ɔ̍lī, wɔ̄sī Māsā Bɛ̍ndōo̍ Chɛ̄lōbo̍wām o̍ chi̍ŋa̍ wɔ̄sīla̍ŋ tɔ̍ a̍ lā ŋɔ̄ma̍a̍ o̍ lēmāsā I̍sɔ̄lūɛ̄ī yo̍, wɔ̄sī kōŋ Ābi̍chā si̍mnu᷄ŋ māsā bɛ̍ndōo̍ Chu̍dā ni̍.

²Ndu̍yɛ̍, mbo̍ tōsā māsāle̍ŋ Chūlu̍sɛ̄lɛ̄m chi̍e̍e̍ le̍ wɔ̄sīla̍ŋ lā yāa̍. Ābi̍chā ko̍ŋ yɛ̄, kāla̍ ndɔ̍ wa̍ Ma̍a̍kāā, chūa̍ A̍bi̍sa̍lɔ̄m ndo̍.

³Kɛ̍ mi̍ Ābi̍chā bɛ̍ɛ̍ o̍ to̍sā nyɛ᷄ bɛ̍nda̍ Mɛ̍lɛ̄ka̍ Ya̍a̍wɛ̄ɛ̍ o̍ hɔ̄l te̍ wo̍. Ka̍ālā wɔ̄ɔ̍ŋndā fi̍nyā ndɔ̄ wa̍ chōo̍ la̍ŋ ki̍nɛ̍i̍, la̍ŋ ko̍ni̍ ndu̍ bɛ̍ɛ̍ ndu̍ to᷅l kɔ̄ɔ̄lī ni̍. Ō ve̍ sa̍kpō a̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ cho̍ Mɛ̄lɛ̄ka̍ ndɔ̄ɔ̍ wo̍ ō dīmi̍ wo̍ tōsāa̍ ni᷄ŋ māā Dēēve̍ fi̍nyā ndɔ̄ ma̍mā le̍.

⁴Kɛ̍ le̍ sa̍bu̍ Dēēve̍ fi̍nyā ndɔ̄ ma̍mā wo̍, mi̍ Mɛ̄lɛ̄ka̍ Ya̍a̍wɛ̄ɛ̄, o̍ cho̍ Mɛ̄lɛ̄ka̍ ndɔ̄ɔ̍ wo̍ ō kē ndu̍ pōo̍, o̍ hu̍ŋ mi̍i̍ŋgū māsāa̍ o̍ fōōfo̍ ndɔ̄ɔ̍ mbo̍ māndā wānāā ndūa̍a̍ Chūlu̍sɛ̄lɛ̄m ndo̍.

⁵Fo̍ndōle̍, Dēēve̍ wa̍ wānā kɛ̍ndɛ̄ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l. Nyɛ̄ o̍ nyɛ̄ Mɛ̄lɛ̄ka̍ dīmu̍l ndu̍ le̍ tōsāa̍ ō pīlɛ̍ bɛ̍ɛ̍ ve̍ mbō kɛ̄ɛ̍ ndu̍ tōsā le̍. Sūɛ̍i̍ wɔ̍ɔ̍ŋ o̍ to̍sa̍ ndi̍ pīlɛ̍ kpe̍ mi̍ ī tɛ̄ɛ̄mbūū Mɛ̄lɛ̄ka̍ kɔ̄l le̍ wa̍ nyɛ̄ o̍ to̍sa̍ a̍ Yūla̍ya̍ Hi̍ta̍i̍tīi̍nɔ̍ wo̍ ni̍.

⁶Mɛ̄ɛ̍ Ābi̍chā o̍ si̍mnu᷄ŋ māsāa̍ Chu̍dā, sɔ̍ŋgɔ̍ wa̍ Lūɛ̄hōbo̍wām fi̍nyāa̍ Ābi̍chā tɛ̄ɛ̄ŋ nda̍ Chɛ̄lōbo̍wām ndo̍, mi̍ sɔ̍ŋgɔ̄ kōŋ hīāū lāchī a̍ wāa̍ Ābi̍chā tɛ̄ɛ̄ŋ nda̍ Chɛ̄lōbo̍wām ha̍a̍a̍ a̍ mɛ̄ɛ̄lu̍ la̍ yōōmu̍ Ābi̍chā wo̍.

⁷Sɔ̄ɔ̍ŋ tɔ᷅ŋ chēle̍ŋ yɔ̍nu̍ŋ o̍ māsāle̍ Ābi̍chāle̍ŋ ni᷄ŋ ki̍nɛ̍i̍, ndu̍yɛ̍ a̍ nyɛ̄ o̍ nyɛ̄ o̍ to̍sa̍ o̍ māsāle̍ ndɔ̄le̍ŋ ni᷄ŋ, ŋ̄ chō ō pōōnyīāā o̍ yāu̍ sɔ̄ɔ̍ŋ pa̍a̍ndu̍ cho̍ a̍ māsāā bɛ̍ndūa̍a̍ Chu̍dā o̍kɔ̄ɔ̄ wo̍ ni᷄ŋ.

⁸O̍ ko̍ŋ kɔ̍ɔ̍lī, mi̍ Ābi̍chā wu᷅. Ma̍ chɔ̄ ndu̍ Chūlu̍sɛ̄lɛ̄m o̍ Māsāa̍ Dēēve̍ lo̍ chi̍e̍e̍. Ndu̍yɛ̍ mɛ̄ɛ̍ Āchi̍chā o̍ vi᷅, mi̍ A̍sā po̍ ndɔ̄ mi̍i̍ŋgū māsā bɛ̍ndōo̍ o̍ fōōfo̍ ndɔ̄ɔ̍.

⁹Wɔ̄sī Māsā Bɛ̍ndōo̍ Chɛ̄lōbo̍wām o̍ chi̍ŋa̍ wɔ̄sīla̍ŋ bi̍di̍i̍ŋ o̍ lēmāsā I̍sɔ̄lūɛ̄ī yo̍, wɔ̄sī kōŋ A̍sā si̍mnu᷄ŋ māsā bɛ̍ndōo̍ Chu̍dā ni̍.

¹⁰Ndu̍yɛ̍ mi̍ A̍sā to̍sā māsāle̍ŋ Chūlu̍sɛ̄lɛ̄m, le̍ wɔ̄sīla̍ŋ be̍le̍ hi̍ɔ̍ɔ̍lu̍ a̍ ō pīlɛ̍ chi̍e̍e̍ le̍bo᷅llo̍ le̍ Chu̍dā. A̍sā ko̍ŋ yɛ̄ māma̍ ndɔ̍ wa̍ Ma̍a̍kāā, chūa̍ A̍bi̍sa̍lɔ̄m ndo̍ ni̍.

¹¹Kɛ̍ mi̍ Māsāa̍ A̍sā ndu̍ tu̍āl ka̍a̍ Dēēve̍ fi̍nyā ndɔ̄ ma̍mā wo̍ kɔ̄ɔ̄lī, mbo̍ tōsā nyɛ᷄ hi̍nī Mɛ̍lɛ̄ka̍ Ya̍a̍wɛ̄ɛ̍ kɔ̄l lo̍.

¹²Nyɛ̄ o̍ nyɛ̄ fi̍nyāā ndūāā ma̍māa̍ nda̍ a̍a̍ to̍o̍si̍a̍a̍ mā sōōlūū mu̍ŋ māā mɛ̄lɛ̄ka̍ā nda̍, mbo̍ tɛ̄ɛ̄mbūū mu̍ŋ kpo̍u̍. O̍ ko̍ŋ kɔ̍ɔ̍lī, wānāā tīāmāa̍ wa̍ o̍ sōōlu̍u̍la̍ la̍ŋ nda̍ ki̍nɛ̍i̍, wānā la̍nɔ̍ ni̍, wānā pɔ̍nɔ̍ ni̍, mbo̍ tūāū nda̍ mbo̍ sōlī nda̍ o̍ lɛ̄ŋndē lēŋ ni᷄ŋ kpo̍u̍.

¹³A̍sā māma̍ ndɔ̄ ndu̍ yɔ̍nūŋ māā Ma̍a̍kāā ni̍, ndu̍ o̍o̍ nɔ̍ pīɔ̄m nda̍ a̍a̍ to̍sā sɔ̍ɔ̍ŋ wɔ̄ɔ̍ŋ wɔ̄ɔ̍ŋ ndo̍ŋ o̍ ndu̍ lo̍ wo̍ mā vēēlū ndu̍ āā A̍si̍ɛ̍lūā. Mi̍ Māsāa̍ A̍sīɛ̄ɛ̄ chu̍ā pīɔ̄m kōŋ mbo̍ kɔ̍ lo᷅m ndu̍ o̍ kpōlōŋ kpo̍lōŋndo̍ ni᷄ŋ Ki̍di̍lɔ̄ŋ. O̍ ko̍ŋ kɔ̍ɔ̍lī, mbo̍ fāŋā māma̍ ndɔ̄ ko̍ŋ o̍ māsāle̍ o̍ wa̍ māā kālāa̍ māsā bɛ̍ndu̍ le̍ŋ.

¹⁴Mi̍ chē bɛ̍ɛ̍ fo̍ndāŋndā wāŋndā nda̍ a̍a̍ so̍o̍lūū mɛ̍lɛ̄ka̍ā ndāa̍ ka̍ŋ nda̍, A̍sā o̍ chi̍i̍ la̍ŋ tɛ̄ɛ̄mbūū kpo̍u̍ le̍ ni̍, kɛ̍ ndu̍yɛ̍ A̍sā o̍ fe̍ŋa̍ŋ o̍ tīīnda᷄ŋ ndɔ̍ o̍ dɔ̍ū o̍ Mɛ̄lɛ̄ka̍ Ya̍a̍wɛ̄ɛ̄ ni̍ŋ ndo̍ chōo̍ le̍. Ō lo̍ o̍ tīīnda᷄ŋ ndɔ̄ ko̍ŋ chōo̍ ha̍a̍a̍ a̍ yōōmū ndɔ̄ɔ̍ mɛ̄ɛ̄lu̍la̍ŋ.

¹⁵Nyɛ̄ o̍ nyɛ̍ fi̍nyā ndɔ̄ ndu̍ o̍o̍ yɔ̍ŋgu̍ le̍ wa̍li̍ Mɛ̄lɛ̄ka̍a̍, lātūlu̍ a̍ ŋ̄ ndu̍ pi̍la̍ o̍ yɔ̍ŋgu̍ wo̍ŋ, nyɛ̄m lāāndo᷄ŋ ni̍, ka̍ni̍ŋ hu̍mbo̍ŋ ni̍, o̍ ko̍ŋ kɔ̍ɔ̍lī a̍ ka̍ni̍ŋ si̍a̍ŋa᷄ŋ, mbo̍ chūā mu̍ŋ kpo̍u̍ mbo̍ kūā a̍ mu̍ŋ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ ni᷄ŋ.

¹⁶Ndu̍yɛ̍ Māsāa̍ A̍sā ni̍, Māsā Bɛ̍ndōo̍ Ba̍a̍sīā, ho̍ō I̍sɔ̄lūɛ̄ī ni̍, sɔ̍ŋgɔ̄ɔ̍ wa̍ nda̍ tɛ̄ɛ̄ŋ le̍ te̍le̍ŋ o̍ te̍le̍ŋ.

¹⁷Te̍le̍ŋ pi᷅lɛ̍ wa̍ mi̍ Māsāa̍ Ba̍a̍sīā o̍ kɔ̍ de᷅l lɛ̄ŋndē Chu̍dāle̍ŋ chōo̍ a̍ sɔ̍ŋgɔ̄ɔ̍, mbo̍ bīī chi̍e̍e̍ ndā bɛ̍ndōo̍ Lu̍a̍mā. Mɛ̄ɛ̍ o̍ bi̍ī chi̍o̍o̍ ho̍ō, mbo̍ māndā ndu̍ ō kālā ka̍lā le̍ mbō tōsa̍ wānā ndu̍ o̍o̍ lu̍e̍ī lɛ̍ Chu̍dā le̍, wānā ndu̍ o̍o̍ fu̍lā vɛ̍lɛ̄ le̍.

¹⁸Ndu̍yɛ̍ a̍ te̍le̍ŋ ko̍ŋ, Māsā Bɛ̍ndōo̍ Bɛ̄nīha̍da̍dī, po̍ Ta̍bi̍lu̍i̍mɔ̄ŋ ndo̍ ndu̍ wa̍ māsā bɛ̍ndōo̍ Dāma̍si̍kɔ̍ɔ̄ chi̍e̍e̍ o̍ lɛ̄ŋndē Si̍i̍lūīāle̍ŋ ni᷄ŋ ni̍. Ndu̍yɛ̍ Ta̍bi̍lu̍i̍mɔ̄ŋ ko̍ŋ fi̍nyā ndɔ̍ wa̍ Hɛ̍sīɔ̄ŋ ni̍. Mɛ̄ɛ̍ Ma̍sā Bɛ̍ndōo̍ A̍sā o̍ che᷅ māā Māsāa̍ Ba̍a̍sīā o̍ kɔ̍ de᷅l ndu̍ chōo̍ a̍ sɔ̍ŋgɔ̄ɔ̍, mbo̍ chūā nyɛ̄ sɔ̄lāa̍ o̍ chīɛ̄ī Mɛ̄lɛ̄ka̍a̍ ni᷄ŋ, a̍ o̍ chīɛ̄ī ndɔ̍ lēmāsāa̍ ni᷄ŋ, ka̍ni̍ŋ hu̍mbo̍ŋ, a̍ ko̍o̍līi̍yo̍ŋ, mbo̍ kē pūa̍a̍ ndūa̍a̍ chɔ̄ūwa̍ le̍ mā yōo̍ Māsā Bɛ̍ndōo̍ Bɛ̄nīha̍da̍dī Dāma̍si̍kɔ̍ɔ̄ chi̍e̍e̍. Ndu̍yɛ̍ a̍ te̍le̍ŋ ko̍ŋ, Bɛ̄nīha̍da̍dī ko̍ŋ, ndu̍ wa̍ Māsāa̍ Si̍i̍līāā ni̍, mbo̍ wā īchāli̍ Dāma̍si̍kɔ̍ɔ̄, o̍ wa̍ chi̍e̍e̍ le̍bo᷅llo̍ le̍ lɛ̄ŋndē Si̍i̍lūīāle̍ŋ ndo̍. Mi̍ Māsāa̍ A̍sā o̍ di̍mūl Māsā Bɛ̍ndōo̍ Bɛ̄nīha̍da̍dī āā,

¹⁹“Chɛ̄la᷅ŋ kɔ̄l nyūlu̍ wa̍ fi̍nyāā nāa̍ tɛ̄ɛ̄ŋ nda̍ ŋi̍ɔ̍ɔ̍ŋ ndo̍, I̍ ye̍e̍ma̍ mī chɛ̄la᷅ŋ kōŋ ō mīīŋgu̍ na̍a̍ tɛ̄ɛ̄ŋ na̍a̍ nūm. Ka̍ni̍ŋ hu̍mbo᷄ŋ mu᷅ŋ ni̍, ko̍o̍līi̍yo̍ŋ mu᷅ŋ ni̍, nūm ya̍ I̍ yɔ̍ŋ ni̍ māā kē. Māsāa̍ Ba̍a̍sīā o̍ hi᷅ŋ mbo̍ hu᷄ŋ de᷅l la̍ chōo̍ o̍ lɛ̄ŋndē nīle̍ŋ ni᷄ŋ a̍ sɔ̍ŋgɔ̍ɔ̍. Le̍la̍ŋ I̍ ye̍e̍ma̍ mā tɛ̍ɛ̍mbu̍u̍ chɛ̄la᷅ŋ kɔ̄l nyūlu̍ cho̍ nya̍ tɛ̄ɛ̄ŋ nya̍ ndu̍ wo̍. Ko̍ŋ to̍sā ni̍ mbō sōli̍ pūa̍a̍ ndūa̍a̍ chɔ̄ūwa̍ o̍ lɛ̄ŋndē nīle̍ŋ ni᷄ŋ.”

²⁰O̍ ko̍ŋ, mi̍ Māsāa̍ Bɛ̄nīha̍da̍dī o̍ chɛ᷅l nyɛ̄ Māsā Bɛ̍ndōo̍ A̍sā o̍ di̍mu̍l ndu̍ wo̍. Mbo̍ yɔ̄ŋ pūa̍a̍ wa̍ pūa̍a̍ ndūa̍a̍ chɔ̄ūwa̍ bōlle̍ŋ nda̍, lātūlu̍ a̍ pūa̍a̍ ndūa̍a̍ chɔ̄ūwa̍, ma̍ kɔ̍ de᷅l I̍sɔ̄lūɛ̍i̍ya̍ chōo̍ a̍ sɔ̍ŋgɔ̄ɔ̍. Ndu̍yɛ̍ ma̍ yām I̍sɔ̄lūɛ̍i̍ya̍ ma̍ bīī chi̍e̍e̍ŋ nda᷄ŋ ŋ̄ ti᷄ŋ a̍ fo̍ndāŋndā ndāla̍ŋ. Chi̍e̍e̍ŋ nda̍ bīī yo̍ŋ cho̍ mu᷅ŋ ni̍, A̍i̍chɔ̄ŋ, a̍ Da᷅ŋ, a̍ Ābɛ̄ɛ̄l Bɛ̄tī Ma̍a̍kāā, a̍ chi̍o̍o̍ŋ o̍ būŋgɛ̄ī Nāfi̍ta̍līīye̍ ni᷄ŋ ki̍nɛ̍i̍, nāa̍ nda̍ a̍a̍ kɛ̍sī nyɔ̍ɔ̍ŋ nda̍.

²¹Mɛ̄ɛ̍ Māsāa̍ Ba̍a̍sīā o̍ tu̍e̍ī a̍ sūɛ̍i̍ he̍ī o̍kɔ̄ɔ̍, māndā o̍ wa̍ Lu̍a̍mā o̍ ka̍lā ka̍lā wo̍, mbo̍ māl ō hīu̍ lɛ̍ lāchī le̍, mbo̍ chūā pūa̍a̍ ndūa̍a̍ chɔ̄ūwa̍ ma̍ mīīŋgū Tɛ̍ɛ̍sāā.

²²O̍ ko̍ŋ kɔ̍ɔ̍lī, mi̍ Māsā Bɛ̍ndōo̍ A̍sā yɔ̍ŋgū yōndāa̍ o̍ lɛ̄ŋndē Chu̍dāle̍ŋ ni᷄ŋ kpo̍u̍, le̍ mī wānā o̍ wānā ku̍ɛ̄ le̍ wa̍llo̍ Lu̍a̍mā chi̍e̍e̍. Yɔ̄mīī Māsāa̍ Ba̍a̍sīā o̍ wa̍ wa̍llo̍ a̍ ndi̍ a̍ pōūta̍ŋ le̍ Lu̍a̍mā māndāa̍ ō kālā ka̍lā ve̍, ma̍ kɔ̍ pi̍ī yɔ̄mīī kēŋ, a̍ pōūtā la̍ŋ ma̍ yāā Ɛ̄sīɔ̄ŋkɛ̍bɛ̄ chi̍e̍e̍ o̍ būŋgɛ̄ī Bɛ̍ŋnja̍mīŋnde̍ ni᷄ŋ a̍ Mi̍si̍pā chi̍e̍e̍. Pōūtā lāŋ a̍ yɔ̄mīī kēŋ nda̍ kɔ̍ bɛ̍ɛ̍ndīāā Ɛ̄sīɔ̄ŋkɛ̍bɛ̄ a̍ Mi̍si̍pā ŋ̄ kālā ka̍lā ni̍.

²³Sɔ̄ɔ̍ŋ tɔ᷅ŋ chēle̍ŋ yɔ̄nu̍ŋ o̍ māsāle̍ A̍sā le̍ŋ bɛ̄ŋgu̍ wo̍ŋ ki̍nɛ̍i̍, ndu̍yɛ̍ a̍ nyɛ̄ o̍ nyɛ̄ o̍ to̍sa̍ o̍ māsāle̍ ndɔ̄le̍ŋ ni᷄ŋ, lɛ̄ŋīī o̍ yēm nde̍ ni̍, chi̍e̍e̍ŋ o̍ ma̍nda̍ ō kālā ka̍lā māā ya̍a̍mɔ̍ɔ̍wa̍ lu̍e̍ī le̍ wo̍ŋ ni̍, mu̍ŋ kpo̍u̍ ŋ̄ chō ŋ̄ pōōnyīāā o̍ yāu̍ sɔ̍ɔ̍ŋ pa̍a̍ndu̍ cho̍ a̍ māsāa̍ Chu̍dā o̍kɔ̄ɔ̄ wo̍ ni᷄ŋ. Kɛ̍ o̍ mɛ̄ɛ̄lu̍la̍ŋ mi̍ Māsā Bɛ̍ndōo̍ A̍sā o̍ sɔ̍lā nāā ŋ̄pēlōo̍ o̍ yu̍wɛ̍i̍ ndūɛ̍i̍ ni᷄ŋ.

²⁴O̍ ko̍ŋ kɔ̍ɔ̍lī, mi̍ Māsā Bɛ̍ndōo̍ A̍sā, o̍ wu᷅, ma̍ chɔ̄ ndu̍ Chūlu̍sɛ̄lɛ̄m o̍ sɛ̄i̍ nda̍ nda̍ yu̍ŋgu̍ lēmāsāa̍ ni᷄ŋ o̍ Māsāa̍ Dēēve̍ lo̍ chi̍e̍e̍, nāa̍ nda̍ chɔ̍ fi̍nyāā ndūāā ma̍māa̍ wa̍. O̍ ko̍ŋ kɔ̍ɔ̍lī, mi̍ Chɛ̄hōsi̍a̍fa̍tī po̍ ndɔ̄ o̍ mi̍i̍ŋgū māsāa̍ o̍ fōōfo̍ ndɔ̄ɔ̍.

²⁵Wɔ̄sī A̍sā o̍ chi̍ŋa̍ wɔ̄sīla̍ŋ lā tīɔ̍ɔ̍ŋ o̍ lēmāsā Chu̍dā wo̍, wɔ̄sī kōŋ Na̍da̍bī, po̍ Chɛ̄lōbo̍wām ndo̍ ō sīmnu᷄ŋ māsā bɛ̍ndōo̍ I̍sɔ̄lūɛ̄ī ni̍. Ndu̍yɛ̍ mi̍ Na̍da̍bī to̍sā māsāle̍ŋ I̍sɔ̄lūɛ̄ī le̍ wɔ̄sīla̍ŋ lā tīɔ̍ɔ̍ŋ.

²⁶Kɛ̍ ndu̍ bɛ̍ɛ̍ ka̍ā fi̍nyā ndɔ̄ wa̍ chōo̍ wo̍, mbo̍ tūāl ka̍ā kōŋ kɔ̄ɔ̄lī, mbo̍ tōsā nyɛ᷄ bɛ̍nda̍ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l te̍ wo̍. Ndu̍yɛ̍ mbo̍ tōsā mi̍ I̍sɔ̄lūɛ̍i̍ya̍ sīmnu᷄ŋ wa̍nāā yɔ̄ŋ wɔ̄ɔ̍ŋ Mɛ̄lɛ̄ka̍ o̍ hɔ̄l.

²⁷Po̍ pi᷅lɛ̍ wa̍ dīōla̍ŋ āā Ba̍a̍sīā, po̍ A̍hi̍chā wo̍, fūlāa̍ o̍ yu̍ŋgu̍ I̍sa̍a̍kā wo̍ chōo̍. Mi̍ pōo̍ ho̍ō kɛ̄ɛ̄sīāā le̍ Na̍da̍bī dīyɔ̄ɔ̍. Te̍le̍ŋ pi᷅lɛ̍ wa̍, mi̍ Māsāa̍ Na̍da̍bī o̍ chu̍ā pūa̍a̍ ndūa̍a̍ chɔ̄ūwa̍, ma̍ kɔ̍ chi᷅ŋa̍la᷅ŋ chi̍e̍e̍ pi᷅lɛ̍ o̍ lɛ̄ŋndē Fīli̍i̍tīāŋnde̍ŋ ni᷄ŋ dīōla̍ŋ āā Ki̍bɛ̍tɔ̄ŋ. O̍ sɔ̍ŋgɔ̄ kōŋ ni᷄ŋ, mi̍ Ba̍a̍sīā ko̍ŋ o̍ mūlu̍la᷅ŋ Ma̍sāa̍ Na̍da̍bī mbo̍ dīī ndu̍.

²⁸O̍ ko̍ŋ, mi̍ Ba̍a̍sīā o̍ mi̍i̍ŋgū ma̍sāa̍ le̍ I̍sɔ̄lūɛ̄ī, o̍ fōōfo̍ Na̍da̍bī wo̍. Wɔ̄sī Māsāa̍ A̍sā, o̍ wa̍ Chu̍dā wo̍ ō chīŋa̍ wɔ̄sīla̍ŋ lā yāa̍ o̍ māsāle̍ŋ chōo̍ wo̍, wɔ̄sī kōŋ sūɛ̍i̍ he̍ī ī yɔ̄nu̍ŋ ni̍.

²⁹Ndu̍yɛ̍ dīmīo̍o̍ nu̍a̍ā mi̍ Ba̍a̍sīā o̍ si̍mnu᷄ŋ ma̍sāa̍ le̍ I̍sɔ̄lūɛ̄ī, wānā o̍ wāna̍ fu̍la̍ o̍ yu̍ŋgu̍ Chɛ̄lōbo̍wām ndo̍ chōo̍ mbo̍ dīū nda̍ kpo̍u̍, ō pīlɛ̍ bɛ̍ɛ̍ ō mɛ̄i̍ yo̍o̍mū le̍. O̍ ko̍ŋ nyɛ̄ wāna̍ su̍a̍ā le̍ Mɛ̄lɛ̄ka̍ Ya̍a̍wɛ̄ɛ̄ wo̍ A̍hi̍chā, wānā wa̍ā Si̍lɔ̄ɔ̄ chi̍e̍e̍ di̍mi̍ a̍ chīɛ̍i̍ Chɛ̄lōbo̍wām ndo̍ o̍kɔ̄ɔ̄ wo̍, mi̍ nyɛ̄ kōŋ chīŋā lāsōndō.

³⁰Le̍ yɔ̍ŋ wɔ̄ɔ̍ŋ Chɛ̄lōbo̍wām to̍sa̍ a̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍, ndu̍yɛ̍ mbo̍ tōsā mi̍ I̍sɔ̄lūɛ̍i̍ya̍ ā tōsā yɔ̄ŋ wɔ̄ɔ̍ŋndo̍ a̍ Mɛ̄lɛ̄ka̍ wo̍, nyɛ̄ kōŋ Mɛ̄lɛ̄ka̍ dɔ̄ɔ̄nu᷄ŋ tu̍mbe̍ a̍ ndu̍ ni̍ mbo̍ tūsī ndu̍ dɛ̍nɛ̍ pa̍lāa̍ chōo̍.

³¹Sɔ̄ɔ̍ŋ tɔ᷅ŋ chēle̍ŋ yɔ̍nu̍ŋ o̍ māsāle̍ Na̍da̍bīle̍ŋ bɛ̄ŋgu̍ wo̍ŋ ki̍nɛ̍i̍, ndu̍yɛ̍ a̍ nyɛ̄ o̍ to̍sa̍ o̍ māsāle̍ ndɔ̄le̍ŋ ni᷄ŋ ki̍nɛ̍i̍ yo̍ŋ, ŋ̄ chō ŋ̄ pōōnyīāā o̍ yāu̍ sɔ̄ɔ̍ŋ pa̍a̍ndu̍ cho̍ a̍ māsāā bɛ̍ndūa̍a̍ I̍sɔ̄lūɛ̄ī o̍kɔ̄ɔ̄ wo̍ ni᷄ŋ.

³²Ndu̍yɛ̍ Māsāa̍ A̍sā ni̍, Māsāa̍ Ba̍a̍sīā ni̍, bōōndi̍i̍ nda̍ wa̍ māsāa̍ vēllāa̍ vēllē ve̍, le̍ te̍le̍ŋ o̍ te̍le̍ŋ sɔ̍ŋgɔ̄ɔ̍ wa̍ nda̍ tɛ̄ɛ̄ŋ nda̍ ŋi̍ɔ̍ɔ̍ŋ.

³³Wɔ̄sī A̍sā chi̍ŋa̍ wɔ̄sīla̍ŋ lā yāa̍ o̍ lēmāsā Chu̍dā wo̍, wɔ̄sī kōŋ Ba̍a̍sīā, po̍ A̍hi̍chā wo̍ ō sīmnu᷄ŋ māsā bɛ̍ndōo̍ I̍sɔ̄lūɛ̄ī ni̍. Ndu̍yɛ̍ mi̍ Ba̍a̍sīā o̍ to̍sā māsāle̍ŋ Tɛ̍ɛ̍sāā chi̍e̍e̍, le̍ lɛ̄ŋndē Chu̍dāle̍ŋ kpo̍u̍ le̍ wɔ̄sīla̍ŋ bi̍di̍i̍ŋ a̍ lā hīɔ̍ɔ̍lu̍ o̍ wa̍ chi̍e̍e̍ ndɔ̍ lēmāsāa̍ wo̍.

³⁴Kɛ̍ ndu̍ bɛ̍ɛ̍ mbo̍ tūāl ka̍ālā Chɛ̄lōbo̍wām fi̍nyā ndɔ̄ ma̍mā o̍ wa̍ chōo̍ la̍ŋ kɔ̄ɔ̄lī, mbo̍ tōsā nyɛ᷄ bɛ̍nda̍ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l te̍ wo̍. O̍ ko̍ŋ mbo̍ tōsā mi̍ wāŋnda̍ I̍sɔ̄lūɛ̄ī a̍ to̍sā yɔ̄ŋ wɔ̄ɔ̍ŋndo̍ Mɛ̄lɛ̄ka̍ o̍ hɔ̄l.