Read Southern Kisi Māsāā Bɛ̍ndūāā Tāsi̍a̍a̍ 16 Bible Online

Māsāā Bɛ̍ndūāā Tāsi̍a̍a̍ 16 - Southern Kisi bible

Māsāā Bɛ̍ndūāā Tāsi̍a̍a̍ 16

¹Ndu̍yɛ̍ po̍ pi᷅lɛ̍ wa̍ mā vēēlū ndu̍ āā Chɛ̍hū, po̍ Ha̍na̍nī wo̍ wāna̍ su̍a̍ā le̍ Mɛ̄lɛ̄ka̍ wo̍ o̍ wa̍ ni̍. Ō wa̍ a̍ te̍le̍ŋ pi᷅lɛ̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ ke᷅ pōo̍ ho̍ō yōōŋgōo̍ le̍ Māsā Bɛ̍ndōo̍ Ba̍a̍sīā. Yōōŋgū ko̍ŋ wa̍ ho̍ō ni̍. Mi̍ Mɛ̄lɛ̄ka̍ dīmūl Ba̍a̍sīā āā,

²“Ba̍a̍sīā, ya̍ hɛ̍li̍ nu̍m ni̍ mi̍ kɛ̍sī nu̍m māsāa̍ I̍sɔ̄lūɛ̄ī. A̍ ve̍ bɛ̍ɛ̍ wa᷅na̍ ŋ̄wāŋ nda̍ a̍a̍ si̍nā a̍ nūm o̍kɔ̄ɔ̄ le̍, mi̍ lo᷅ o̍ ko̍ŋ mi̍ si̍i̍ŋgūū nu̍m māsāa̍ wānāā nīa̍a̍ chōo̍. Kɛ̍ ma̍ bīī ma̍ tūāl ka̍ālā wɔ̄ɔ̍ŋnda̍ Chɛ̄lōbo̍wām nda̍ŋ kɔ̄ɔ̄lī, ma̍ tōsā mi̍ wāŋnda̍ I̍sɔ̄lūɛ̄ī a̍ to̍sā yɔ̄ŋ wɔ̄ɔ̍ŋndo̍ a̍ ya̍ Mɛ̍lɛ̄ka̍. Le̍ he̍ī mi̍ du̍a̍u̍nu᷄ŋ tu̍mbe̍ a̍ wāŋnda̍ I̍sɔ̄lūɛ̄ī, fo̍ndōle̍ le̍ yɔ̄ŋndā ndāla̍ wɔ̍ɔ̍ŋnda̍ŋ.

³Le̍ nyɛ̄ ŋ̄ tōsa̍ ko̍ŋ ndo̍, I̍ cho̍ yu̍ŋgu̍ nu̍mndo̍ nyɛ̄ pālāa̍ tūsī chōo̍ mī ba̍su̍ nda̍ tɛ̍ɛ̍ mɛ̄ɛ̍ ya̍ I̍ to̍sa̍ a̍ Chɛ̄lōbo̍wām po̍ Ne̍ba̍tī wo̍ yɛ̍.

⁴Wānāa̍ fu̍la̍ o̍ yu̍ŋgu̍ nu̍mndo̍ chōo̍ wa̍, a̍ wa᷅ ni̍ŋ wu̍o̍o̍ chi̍e̍e̍ kɔ᷅llo̍ ni᷄ŋ nda̍, tūŋnda̍ wa᷅ ni̍ŋ di̍a̍llūŋ ndāŋ vi̍lɛ̍i̍yo̍ŋ dīo̍o̍ ni̍. A̍ cho̍ wā wu̍o̍o̍ yōndōla̍ŋ ni᷄ŋ nda̍ ki̍nɛ̍i̍, mī yi̍bɛ̍i̍ya̍ dē dīāllūŋ nda᷄ŋ.”

⁵Ndu̍yɛ̍ ō cho̍ ko̍ le̍ tōlɔ̄ɔ̄ Ba̍a̍sīā o̍ to᷅l ka̍ālā wɔ̄ɔ̍ŋnda̍ Chɛ̄lōbo̍wām nda̍ŋ kɔ̄ɔ̄lī wo̍ le̍ Mɛ̄lɛ̄ka̍ dɔ̄ɔ̄nu᷄ŋ tu̍mbe̍ a̍ ndu̍ le̍, kɛ̍ mbo̍ sɔ̄ɔ̄ŋgūū vɛ̍lɛ̄, wānāa̍ fu̍la̍ o̍ yu̍ŋgu̍ Chɛ̄lōbo̍wām ndo̍ chōo̍ wa̍ ki̍nɛ̍i̍, mbo̍ dīū nda̍ mbo̍ bāsū nda̍ tɛ̍ɛ̍. Nyɛ̄ ko̍ŋ to̍sa̍ ni̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ du̍a̍u̍nu᷄ŋ tu̍mbe̍ a̍ ndu̍, mbo̍ lō o̍ ko̍ŋ, mbo̍ kē wāna̍ su̍a̍ā le̍ ndu̍ Mɛ̍lɛ̄ka̍ wo̍ Chɛ̍hū, po̍ Ha̍na̍nī wo̍ yōōŋgōo̍ le̍ Ba̍a̍sīā nda̍ yu̍ŋgu̍ ndɔ̄ɔ̍ kpo̍u̍. Sɔ̄ɔ̍ŋ tɔ᷅ŋ chēle̍ŋ yɔ̍nu̍ŋ o̍ māsāle̍ Ba̍sīāāle̍ŋ bɛ̄ŋgu̍ wo̍ŋ ki̍nɛ̍i̍, ndu̍yɛ̍ a̍ nyɛ̄ o̍ nyɛ̄ o̍ tōsa̍ o̍ māsāle̍ ndɔ̄le̍ŋ ni᷄ŋ, lātūlu̍ a̍ lɛ̄ŋīī o̍ ye᷅m nde̍ kpo̍u̍, ŋ̄ chō ŋ̄ pōōnyīāā o̍ yāu̍ sɔ̄ɔ̍ŋ pa̍a̍ndu̍ cho̍ a̍ māsāa̍ I̍sɔ̄lūɛ̄ī o̍kɔ̄ɔ̄ wo̍ ni᷄ŋ. O̍ ko̍ŋ kɔ̍ɔ̍lī, mi̍ Ba̍a̍sīā wu᷅, mā chɔ̄ ndu̍ Tɛ̍ɛ̍sāā chi̍e̍e̍. Mi̍ Ɛ̍lāā po̍ ndɔ̄ mi̍i̍ŋgū māsāa̍ o̍ fōōfo̍ ndɔ̄ɔ̍.

⁶

⁷

⁸Wɔ̄sī Māsā Bɛ̍ndōo̍ A̍sā o̍ chīŋa̍ wɔ̄sīla̍ŋ bi̍di̍i̍ŋ a̍ lā ŋɔ᷄mpu᷅m o̍ lēmāsā Chu̍dā wo̍, wɔ̄sī ko̍ŋ Ɛ̍lāā, po̍ Ba̍a̍sīā wo̍ ō sīmnu᷄ŋ ma̍sā bɛ̍ndōo̍ I̍sɔ̄lūɛ̄ī ni̍. Ndu̍yɛ̍ mi̍ I̍lā to̍sā māsāle̍ŋ Tɛ̍ɛ̍sāā chi̍e̍e̍, le̍ lɛ̄ŋndē I̍sɔ̄lūɛ̍i̍le̍ŋ le̍ wɔ̄sīla̍ŋ lā tīɔ̍ɔ̍ŋ.

⁹Ndu̍yɛ̍ Māsāa̍ Ɛ̍lāā pūa̍a̍ ndūa̍a̍ chɔ̄ūwa̍ ō pīlɛ̍ wa̍ Si̍mi̍lī ni̍. Nyɛ̄m nyāāna᷄ŋ su̍a̍a̍ ā nāŋ ndo̍ŋ tɛ̄ndāa̍ tɛ̄ɛ̄ŋ ki̍nɛ̍i̍, Si̍mi̍lī ko̍ŋ wa̍ mu̍ŋ bōlle̍ŋ ni̍. Kɛ̍ mi̍ Si̍mi̍lī ko̍ŋ ō kɛ̄ɛ̄sīāā le̍ Māsā Bɛ̍ndōo̍ E̍la̍ dīyɔ̄ɔ̍. Ō wa̍ pāa̍le̍ pi᷅lɛ̍, mi̍ Māsā Bɛ̍ndōo̍ I̍lā o̍ kɔ̍ cha᷅l kōlɔ̄ɔ̍ o̍ po᷄ pi᷅lɛ̍ lo̍ chi̍ɛ̍ī ni̍ŋ, dīōla̍ŋ āā A̍a̍sā, wāna̍ wa̍ chīɛ̄ī lēmāsāa̍ Tɛ̍ɛ̍sāā kpo̍u̍ bo᷅lle̍ŋ ndo̍.

¹⁰Mɛ̄ɛ̍ o̍ kɔ̍ cha᷅l kōlɔ̄ɔ̍, mi̍ Si̍mi̍lī lu̍ɛ̍ī sɔ̍ɔ̍ sɔ̍ɔ̍ mbo̍ kɔ̍ de᷅l ndu̍ chōo̍ mbo̍ dīī ndu̍. O̍ ko̍ŋ kɔ̍ɔ̍lī, mbo̍ mīīŋgū māsāa̍ o̍ fōōfo̍ ndɔ̄ɔ̍. Wɔ̄sī Māsā Bɛ̍ndōo̍ A̍sā, māsāa̍ le̍ Chu̍dā ō chīŋa̍ wɔ̄sīla̍ŋ bi̍di̍i̍ŋ a̍ lā ŋɔ᷄mmɛ̍ū o̍ māsāle̍ŋ chōo̍ wo̍, wɔ̄sī kōŋ sūɛ̍i̍ he̍ī ī yɔ̄nu̍ŋ ni̍.

¹¹Ndu̍yɛ̍ dīmīo̍o̍ nu̍a̍ā mi̍ Si̍mi̍lī he᷅l o̍ kpe̍ŋgbo̍o̍ chōo̍ māā māsā bɛ̍ndū, wānā o̍ wāna̍ fu̍la̍ o̍ yu̍ŋgu̍ Ba̍a̍sīā wo̍ chōo̍ mbo̍ dīū nda̍ pa̍ku̍, wānā pɔ̍nɔ̍ɔ̍ ō pīlɛ̍ bɛ̍ɛ̍ ō mɛ̄i̍ le̍. O̍ ko̍ŋ kɔ̍ɔ̍lī, wānā pɔ̍nɔ̍ o̍ wānā pɔ̍nɔ̍ wa̍ vɛ̄lɛ̄ nāāŋa᷅ŋ Ba̍a̍sīā wo̍, nda̍ bɛ̍ɛ̍ mbo̍ dīū nda̍ kpo̍u̍.

¹²O̍ ko̍ŋ, nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ dɔ̍ū wāna̍ su̍a̍a̍ le̍ ndu̍ wo̍ Chɛ̍hū o̍ sōndō mbo̍ sūāā a̍ chīɛ̍i̍ Ba̍a̍sīā wo̍ o̍kɔ̄ɔ̄ wo̍, mbo̍ chīŋā lāsōndō. Wānā pɔ̍nɔ̍ o̍ wānā pɔ̍nɔ̍ fu̍la̍ o̍ yu̍ŋgu̍ Ba̍a̍sīā wo̍ chōo̍, mi̍ Si̍mi̍lī di̍ū nda̍ pa̍ku̍.

¹³Ba̍a̍sīā ni̍, Ɛ̍lāā po̍ ndɔ̄ ni̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ du̍a̍u̍nu᷄ŋ tu̍mbe̍ a̍ nda̍ mbo̍ tūsī nda̍ nyɛ̄ pālāa̍ chōo̍, fo̍ndōle̍, le̍ mɛ̄ɛ̍ nda̍ kɛ̄ɛ̄ ndu̍ dīōm ma̍ mūli᷄ŋ mɛ̍lɛ̄ka̍ā chēle̍ŋnda̍ sōōlūūwo̍, ndu̍yɛ̍ ma̍ tōsā mi̍ wāŋnda̍ I̍sɔ̄lūɛ̄ī a̍ a̍ to̍sā yɔ̄ŋ wɔ̄ɔ̍ŋndo̍ a̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍ yɛ̍.

¹⁴Sɔ̄ɔ̍ŋ tɔ᷅ŋ chēle̍ŋ yɔ̍nu̍ŋ o̍ māsāle̍ Ɛ̍lāā le̍ŋ bɛ̄ŋgu̍ wo̍ŋ ki̍nɛ̍i̍, ndu̍yɛ̍ a̍ nyɛ̄ o̍ nyɛ̄ o̍ to̍sa̍ o̍ māsāle̍ ndɔ̄le̍ŋ ni᷄ŋ, ŋ̄ chō ŋ̄ pōōnyīāā o̍ yāu̍ sɔ̄ɔ̍ŋ pa̍a̍ndu̍ cho̍ a̍ māsāa̍ bɛ̍ndūa̍a̍ I̍sɔ̄lūɛ̄ī o̍kɔ̄ɔ̄ wo̍ ni᷄ŋ.

¹⁵Wɔ̄sī Māsā Bɛ̍ndōo̍ A̍sā o̍ wa̍ Chu̍dā wo̍ ō chīŋa̍ wɔ̄sīla̍ŋ bi̍di̍i̍ŋ a̍ lā ŋɔ᷄mmɛ̍ū o̍ lēmāsā wo̍, wɔ̄sī ko̍ŋ Si̍mi̍lī si̍mnu᷄ŋ ma̍sā bɛ̍ndōo̍ I̍sɔ̄lūɛ̄ī ni̍. Ndu̍yɛ̍ mi̍ Si̍mi̍lī to̍sā māsāle̍ŋ Tɛ̍ɛ̍sāā chi̍e̍e̍, le̍ lɛ̄ŋndē I̍sɔ̄lūɛ̍i̍le̍ŋ le̍ pālɛ̍i̍ ī ŋɔ᷄mmɛ̍ū. Bo̍o̍ndi̍i̍ Si̍mi̍lī o̍ di̍ī Māsā Bɛ̍ndōo̍ I̍lā ve̍, pūa̍a̍ chɔ̄ūwa̍ I̍sɔ̄lūɛ̄ī ki̍nɛ̍i̍ ā wa̍ o̍ chɔ̄ūwo̍ nda̍ Fīli̍i̍tīāŋnda̍, o̍ dɔ̍ɔ̍ŋgɔ̍ɔ̍ Ki̍bɛ̍tɔ̄ŋ i̍kɛ̍i̍.

¹⁶O̍ ko̍ŋ, ma̍ tūɛ̄ī māā Si̍mi̍lī o̍ yi̍i̍ Māsā Bɛ̍ndōo̍ I̍lā de̍fo̍o̍ mbo̍ dīī ndu̍. Ndu̍yɛ̍ wāna̍ wa̍ nda̍ bo̍lle̍ŋ kpo̍u̍ wo̍, dīōlā ndɔ̄la̍ŋ āā O̍mi̍lī. Mɛ̄ɛ̍ pūa̍a̍ chɔ̄ūwa̍ I̍sɔ̄lūɛ̄ī a̍ tu̍e̍ī sūɛ̍i̍ he̍ī, nda̍ kpo̍u̍ ma̍ chɛ̄la᷅ŋ ma̍ sīīŋgūū O̍mi̍lī māsāa̍ pāa̍le̍ le̍ŋ ndo̍ŋ, le̍ I̍sɔ̄lūɛ̄ī kpo̍u̍.

¹⁷O̍ ko̍ŋ, mi̍ O̍mi̍lī si᷅m nda̍ lāchī ma̍ mīīŋgū Tɛ̍ɛ̍sāā chi̍e̍e̍ ma̍ kɔ̍ ba̍lū ndu̍ kpɔ̍kɔ̍su̍ ma̍ bīī chi̍o̍o̍.

¹⁸Mɛ̄ɛ̍ Māsā Bɛ̍ndōo̍ Si̍mi̍lī o̍ che᷅ māā pūa̍a̍ chɔ̄ūwa̍ I̍sɔ̄lūɛ̄ī a̍ bi̍ī chi̍o̍o̍, mbo̍ nyāānu᷄ŋ o̍ chīɛ̄ī lēmāsāa̍ ni᷄ŋ mbo̍ kɔ̍ ma᷅l ndu̍ o̍ yīŋ, mi̍ chīɛ̄ī lēmāsāa̍ ō ŋūā, ndu̍yɛ̍ ndu̍ pi̍la̍ bɛ̍ɛ̍ mbo̍ wū o̍ yīŋndē lēŋ ni᷄ŋ.

¹⁹Mɛ̄ɛ̍ nu̍a̍ā Si̍mi̍lī o̍ lo̍o̍ku̍ pīɔ̍mndo̍ sɔ̄lā ni̍, fo̍ndōle̍, le̍ mɛ̄ɛ̍ o̍ to᷅l ka̍ālā wɔ̄ɔ̍ŋnda̍ Chɛ̄lōbo̍wām nda̍ŋ kɔ̄ɔ̄lī mbo̍ tōsā nyɛ᷄ bɛ̍nda̍ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l te̍ wo̍ yɛ̍. Ka̍ālā wɔ̄ɔ̍ŋndā Chɛ̄lōbo̍wām o̍ wa̍ chōo̍ mbo̍ tōsā mi̍ I̍sɔ̄lūɛ̍i̍ya̍ ā tōsā yɔ̄ŋ wɔ̄ɔ̍ŋndo̍ a̍ Mɛ̄lɛ̄ka̍ la̍ŋ, ka̍ālā lāŋ ko̍ni̍ Si̍mi̍lī bɛ̍ɛ̍ ndu̍ to᷅l kɔ̄ɔ̄lī ni̍, ndu̍ bɛ̍ɛ̍ mbo̍ tōsā mi̍ I̍sɔ̄lūɛ̍i̍ya̍ ā tōsā yɔ̄ŋ wɔ̄ɔ̍ŋndo̍ a̍ Mɛ̄lɛ̄ka̍.

²⁰Sɔ̄ɔ̍ŋ tɔ᷅ŋ chēle̍ŋ yɔ̍nu̍ŋ o̍ māsāle̍ Si̍mi̍lūīle̍ŋ bɛ̄ŋgu̍ wo̍ ki̍nɛ̍i̍, lātūlu̍ a̍ mɛ̄ɛ̍ o̍ lo̍o̍ku̍ Māsā Bɛ̍ndōo̍ I̍lā sīmūl mbo̍ dīī ndu̍ yɛ̍, mu̍ŋ kpo̍u̍ ŋ̄ chō ŋ̄ pōōnyīāā o̍ yāu̍ sɔ̄ɔ̍ŋ pa̍a̍ndu̍ cho̍ a̍ māsāā bɛ̍ndūa̍a̍ I̍sɔ̄lūɛ̄ī o̍kɔ̄ɔ̄ wo̍ ni᷄ŋ.

²¹O̍ ko̍ŋ kɔ̍ɔ̍lī, mi̍ I̍sɔ̄lūɛ̍i̍ya̍ ā pīɔ̄ūvi̍āŋ tɛ̍ɛ̄ŋ ku̍ndāla̍ŋ lā tīɔ̍ɔ̍ŋ, ku̍ndāa̍ pīlɔ̍ɔ̍ nda̍ wa̍ Ti̍bi̍nī, po̍ Ki̍na̍tī wo̍ kɔ̄ɔ̄lī le̍ mā sīīŋgu̍u̍ ndu̍ māsā mi̍ ku̍ndāa̍ pīlɔ̍ɔ̍ nda̍ wa̍ O̍mi̍li̍ kɔ̄ɔ̄lī.

²²Kɛ̍ ku̍nda̍ wa̍ O̍mi̍li̍ kɔ̍ɔ̍lī wo̍, nda̍ nda̍ āā hi̍o̍ū kpāāyā a̍ ku̍nda̍ Ti̍bi̍nī wo̍. O̍ ko̍ŋ, ma̍ yām ku̍nda̍ Ti̍bi̍nī wo̍, ndu̍yɛ̍ mi̍ Ti̍bi̍nī sɔ̍lā pīɔ̍mndo̍. Mi̍ O̍mi̍li̍ si̍mnu᷄ŋ ma̍sā bɛ̍ndōo̍ kpe̍e̍kpe̍i̍ le̍ I̍sɔ̄lūɛ̄ī.

²³Wɔ̄sī O̍mi̍li̍ o̍ si̍mnu᷄ŋ ma̍sāa̍ I̍sɔ̄lūɛ̄ī yo̍, Wɔ̄sī Māsā Bɛ̍ndōo̍ A̍sā o̍ chi̍ŋa̍ wɔ̄sīla̍ŋ be̍le̍-ya̍a̍ a̍ ō pīlɛ̍ o̍ lēmāsā Chu̍dā wo̍, wɔ̄sī kōŋ O̍mi̍lī o̍ si̍mnu᷄ŋ ma̍sāa̍ I̍sɔ̄lūɛ̄ī ni̍. Ndu̍yɛ̍ mi̍ O̍mi̍li̍ to̍sā māsāle̍ŋ I̍sɔ̄lūɛ̄ī le̍ wɔ̄sīla̍ŋ tɔ̍ a̍ lā tīɔ̍ɔ̍ŋ. Ō tōsa̍ māsāle̍ŋ Tɛ̍ɛ̍sāā chi̍e̍e̍ le̍ I̍sɔ̄lūɛ̄ī le̍ wɔ̄sīla̍ŋ lā ŋɔ᷄mpu᷅m.

²⁴O̍ ko̍ŋ kɔ̍ɔ̍lī mbo̍ pīāndū lɛ̄ŋndē īpēmbūle̍ŋ Sāme̍e̍līāā po̍ pi᷅lɛ̍ o̍ bā dīōla̍ŋ āā Si̍ɛ̍mā. Ō pēndū lɛ̄ŋnde̍ le̍ŋ a̍ ka̍ni̍ŋ hu̍mbo̍ŋ wāa̍la̍ŋ lā ŋɔ᷄mpu᷅m. Mɛ̄ɛ̍ o̍ pe̍ndū le̍ŋ, mbo̍ tāŋgūl chi̍e̍e̍ ndɔ̍ lēmāsāa̍ lo̍ŋ mbo̍ kē chi̍o̍o̍ ho̍ō dīōla̍ŋ āā Sāme̍e̍līāā, po̍ o̍ pe̍ndū lɛ̄ŋndē lēŋ o̍ bā wo̍ vēla᷅ŋ dīōlā ndɔ̄la̍ŋ, ndu̍ yɔ̍nūŋ māā Si̍ɛ̍mā ni̍.

²⁵Kɛ̍ mi̍ O̍mi̍lī to̍sā nyɛ̍ bɛ̍nda̍ Mɛ̍lɛ̄ka̍ Ya̍a̍wɛ̄ɛ̄ o̍ hɔ̄l te̍ wo̍, mbo̍ tōsā yɔ̄ŋ wɔ̄ɔ̍ŋndo̍ mbo̍ hīāū bɛ̍ɛ̍ wa̍nāa̍ ke̍e̍ku̍ ndu̍ lāchī o̍ lēmāsā wa̍.

²⁶Ndu̍ bɛ̍ɛ̍ ka̍ālā wɔ̄ɔ̍ŋnda̍ māsāa̍ Chɛ̄lōbo̍wām po᷄ Nɛ̍ba̍tī wo̍ wa̍ chōo̍ la̍ŋ, mbo̍ tūāl ka̍ālā lāŋ kɔ̄ɔ̄lī, mbo̍ tōsā mi̍ I̍sɔ̄lūɛ̍i̍ya̍ ā tōsā yɔ̄ŋ wɔ̄ɔ̍ŋndo̍ a̍ Mɛ̄lɛ̄ka̍ Ya̍a̍wɛ̄ɛ̄. O̍ ko̍ŋ mi̍ Mɛ̄lɛ̄ka̍ Ya̍a̍wɛ̄ɛ̄ dūāūnu᷄ŋ tu̍mbe̍ a̍ wānāā ndūa̍a̍ I̍sɔ̄lūɛ̄ī, fo̍ndōle̍ le̍ mɛ̄ɛ̍ nda̍ kɛ̄ɛ̍ ndu̍ dīōm ma̍ sōōlūū mɛ̍lɛ̄ka̍ā chēle̍ŋnda̍ yɛ̍.

²⁷Sɔ̄ɔ̍ŋ tɔ᷅ŋ chēle̍ŋ yɔ̍nu̍ŋ o̍ māsāle̍ O̍mi̍līle̍ŋ bɛ̄ŋgu̍ wo̍ŋ ki̍nɛ̍i̍, lātūlu̍ a̍ nyɛ̄ o̍ nyɛ̄ o̍ to̍sa̍ o̍ māsāle̍ ndɔ̄le̍ŋ ni᷄ŋ, a̍ lɛ̄ŋīī o̍ ye᷅m nde̍, mu̍ŋ kpo̍u̍ ŋ̄ chō ŋ̄ pōōnyīāā o̍ yāu̍ sɔ̄ɔ̍ŋ pa̍a̍ndu̍ cho̍ a̍ māsāa̍ bɛ̍ndūa̍a̍ I̍sɔ̄lūɛ̄ī o̍kɔ̄ɔ̄ wo̍ ni᷄ŋ.

²⁸O̍ ko̍ŋ kɔ̍ɔ̍lī, mi̍ O̍mi̍li̍ o̍ wu᷅, ma̍ chɔ̄ ndu̍ Sāme̍e̍līāā chi̍e̍e̍. Mi̍ E̍ha̍bī po̍ ndɔ̄ mi̍i̍ŋgū māsā bɛ̍ndōo̍ o̍ fōōfo̍ ndɔ̄ɔ̍.

²⁹Wɔ̄sī Māsā Bɛ̍ndōo̍ A̍sā o̍ chi̍ŋa̍ wɔ̄sīla̍ be̍le̍-ya̍a̍ a̍ lā ŋɔ̄ma̍a̍ o̍ lēmāsā Chu̍dā wo̍, wɔ̄sī kōŋ E̍ha̍bī po̍ O̍mi̍lī wo̍ ō si̍mnu᷄ŋ ma̍sā bɛ̍ndōo̍ I̍sɔ̄lūɛ̄ī ni̍. Ndu̍yɛ̍ mi̍ E̍ha̍bī to̍sā māsāle̍ŋ Sāme̍e̍līāā chi̍e̍e̍, le̍ lɛ̄ŋndē I̍sɔ̄lūɛ̍i̍le̍ŋ le̍ wɔ̄sīla̍ŋ bi̍di̍i̍ŋ a̍ lā tīɔ̍ɔ̍ŋ.

³⁰Kɛ̍ ndu̍ bɛ̍ɛ̍ mbo̍ tōsā nyɛ̍ bɛ̍nda̍ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l te̍ wo̍, mbo̍ tōsā yɔ̄ŋ wɔ̄ɔ̍ŋndo̍ mbo̍ hīāū māsā o̍ māsā ke̍e̍ku̍ I̍sɔ̄lūɛ̄ī ndu̍ lāchī.

³¹Ndu̍ ndu̍ ō cho̍ wɔ̍ to̍lɔ̄ɔ̄ o̍ to᷅l Chɛ̄lōbo̍wām po̍ Nɛ̍ba̍tī wo̍ kɔ̄ɔ̄lī a̍ ka̍ālā wɔ̄ɔ̍ŋnda̍ŋ ndō le̍, kɛ̍ mbo̍ tōsā bɛ̍ɛ̍ sɔ̍ɔ̍ŋ wɔ̍ɔ̍ŋ chēle̍ŋ ŋ̍ hi̍o̍ū bɛ̍ɛ̍ ŋ̄ Chɛ̄lōbo̍wām o̍ to̍sa̍ wo̍ŋ. Mbo̍ chūā chūā pīlɛ̍ o̍ nɔ̄ɔ̍ ni᷄ŋ dīōla̍ŋ āā Chɛ̍si̍bɛ̄ɛ̄, Māsāa̍ Ɛ̄ti̍bāāl, māsāa̍ le̍ Sa̍i̍dɔ̄ŋ chūā ndɔ̄ɔ̍. O̍ ko̍ŋ, mi̍ Māsā Bɛ̍ndōo̍ E̍ha̍bī, o̍ kāndū mɛ̄lɛ̄ka̍ nda̍ vēēlū āā Bāāl wo̍ sōōlūūwo̍.

³²Mbo̍ lō o̍ ko̍ŋ, mbo̍ tāŋgūl chīɛ̄ī lāsōōlu̍u̍wo̍ Sāme̍e̍līāā lo̍ŋ le̍ Bāāl, ndu̍yɛ̍ mbo̍ tōōsīāā ma̍āŋndo̍ lēni᷄ŋ, le̍ sa̍lāla̍ŋ sōlīo̍o̍ o̍ Ba̍a̍l lo̍.

³³Ō fūla̍ o̍ Ba̍a̍l kɔ̍ɔ̍lī, mbo̍ tōōsīāā vɛ̄lɛ̄ sōōlu̍u̍la̍ che᷅le̍ŋ le̍ mɛ̄lɛ̄ka̍ nda̍ vēēlū āā A̍si̍ɛ̍lūā wo̍ sōōlūūwo̍. Māsāa̍ ke̍e̍ku̍ E̍ha̍bī lāchī I̍sɔ̄lūɛ̄ī ya̍ ki̍nɛ̍i̍, yɔ̍ŋ wɔ̄ɔ̍ŋ Māsā Bɛ̍ndōo̍ E̍ha̍bī to̍sa̍ wo̍, māsā o̍ māsā to̍sa̍ yɔ᷅ŋ wɔ̄ɔ̍ŋ wāā le̍nde̍ I̍sɔ̄lūɛ̄ī, mī Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍ ō dɔ̄ɔ̄nu᷄ŋ tu̍mbe̍ a̍ ndu̍ māā yɔ̄ŋ wɔ̄ɔ̍ŋ Māsā Bɛ̍ndōo̍ E̍ha̍bī to̍sa̍ wo̍ le̍.

³⁴Bōōndi̍i̍ Māsā Bɛ̍ndōo̍ E̍ha̍bī o̍ wa̍ māsāa̍ I̍sɔ̄lūɛ̄ī ye̍, bōōndi̍i̍ ke̍ŋ nda̍ mīŋgi̍ Chɛ̄lu̍i̍kō tāŋgūl ni̍. Po̍ mi̍ŋgi̍ chi̍o̍o̍ ho̍ō tāŋgūl lo̍ dīōlā ndɔ̄la̍ŋ āā Hi̍ɛ̍ɛ̄, wānā wa̍ā Bɛ̍tɛ̄ɛ̄l chi̍e̍e̍. Pōo̍ ho̍ō po̍ ndɔ̍ tāso̍o̍ dīōla̍ŋ āā A̍bi̍lūām, ō mɛ̄ɛ̄lāa̍ dīōla̍ŋ āā Sɛ̍ku̍bī. Bōōndi̍i̍ pōo̍ ho̍ō ō wa̍ chi̍o̍o̍ ho̍ō tāŋgūllo̍ ve̍, dīmīo̍o̍ nu̍a̍ā mbo̍ kāndū chīyūŋ lāchīɛ̄īyo̍ŋ kīlāa̍, mi̍ po̍ ndɔ̍ tāse̍ ko̍ŋ ō wū. Mɛ̄ɛ̍ o̍ chi̍i̍ ndu̍ tāŋgūl kpo̍u̍, dīmīo̍o̍ nu̍a̍ā ō chīi̍ vɛ̄lɛ̄ dīōlā sāāsa̍ chi̍o̍o̍ lɛ̄ɛ̄ndūū, mi̍ po̍ ndɔ̄ mɛ̍ɛ̍lāā kōŋ ō wū. O̍ ko̍ŋ, mi̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ dɔ̍ū sīndɛ̄ bu̍ɛ̍ī ndɔ̄ɔ̍ Chɔ̄ɔ̍sūāā po̍ Nu᷅ŋ ndo̍ o̍ so̍ndō mbo̍ dīmī a̍ Chɛ̄lu̍i̍kō o̍kɔ̄ɔ̄ wo̍, o̍ chīŋā lāsōndō.