Read Southern Kisi Māsāā Bɛ̍ndūāā Tāsi̍a̍a̍ 17 Bible Online

Māsāā Bɛ̍ndūāā Tāsi̍a̍a̍ 17 - Southern Kisi bible

Māsāā Bɛ̍ndūāā Tāsi̍a̍a̍ 17

¹Po̍ pi᷅lɛ̍ wa̍ Ti̍si̍bī chi̍e̍e̍ o̍ lɛ̄ŋndē Ki̍li̍a̍a̍dīle̍ŋ ni᷄ŋ dīōla̍ŋ āā Īla̍a̍chā, wāna̍ su̍a̍ā lē Mɛ̄lɛ̄ka̍ wo̍ o̍ wa̍ ni̍. Ō wa̍ a̍ te̍le̍ŋ pi᷅lɛ̍, mi̍ Mɛ̄lɛ̄ka̍ kē ndu̍ yōōŋgōo̍ le̍ Māsā Bɛ̍ndōo̍ E̍ha̍bī. Mbo̍ mālnu᷄ŋ mbo̍ kūā nāa̍ Māsā Bɛ̍ndōo̍ E̍ha̍bī chūa̍. Mbo̍ kɔ̍ dīmūl ndu̍ āā, “Mɛ̄lɛ̄ka̍ Ya̍a̍wɛ̄ɛ̄, I̍sɔ̄lūɛ̍i̍ya̍ Mɛ̄lɛ̄ka̍ ndāa̍, Mɛ̄lɛ̄ka̍ cho̍ yōōmū le̍ fɛ̍ɛ̍ŋ a̍ fɛ̍ɛ̍ŋ ndo̍, o̍ cho̍ ni̍. Mɛ̄lɛ̄ka̍ ko̍ŋ ndu̍ ya̍ I̍ sa̍a̍ŋgīāl ni̍. Ō dīmi̍ māā chɔ̍ŋ a̍ hāū mbō kūɛ̄ a̍ wɔ̄sīla̍ŋ lā tīɔ̍ɔ̍ŋ ɔ̄ɔ̄ lā yāa̍, ō cho̍ wɔ̍ pi̍ɔ̍ɔ̍ sīa̍a̍ le̍, kɛ̍ mɔ᷄mndo̍ bɛ̍ɛ̍ ō chu̍chū lɛ᷅ŋ te̍ ha̍a̍a̍, mɛ̄ɛ̍ mbō lo̍o̍ ko̍ŋ mī dīmi̍ māā pīɔ̍ɔ̍ sīa̍ ma̍lāŋ o̍ si̍ā.”

²O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Īla̍a̍chā āā,

³“Ma̍l fo̍ndāŋndo̍ ho̍ō mā kūɛ̄ bā pāa̍le̍ŋ lē chāŋndo̍, mā kɔ̍ vi̍o̍ŋnu᷄ŋ o̍ pēē pɔ̍mbɔ̄ɔ̍ Kɛ̍lu̍i̍tī i̍kɛ̍i̍, le̍ kɔ̄la̍ŋ Chɔ̍ɔ̍dāŋ o̍ pēēlo̍, yɔ̄ŋi̍ nda̍ dīi̍ nu̍m.

⁴Pēē pɔ̍mbɔ̄ kōŋ ndu̍ ŋ̄ chō wā kōlɔ̄ɔ̍ ni̍, ndu̍yɛ̍ I̍ di̍mu̍l bāsa̍bāsa̍kūēndi̍a̍a̍ le̍ mā wa̍ nu̍m nyɛ̄ dīa̍a̍ kīo̍o̍ nāa̍ ŋ̄ chō wā ka̍ŋ o̍ vi̍a̍ŋna᷄ŋ nda̍.”

⁵O̍ ko̍ŋ, mi̍ Īla̍a̍chā to̍sā mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l ndu̍ yɛ̍, mbo̍ kɔ̍ vi̍o̍ŋnu᷄ŋ o̍ pēē pɔ̍mbɔ̄ɔ̍ Kɛ̍lu̍i̍tī, le̍ kɔ̄la̍ŋ Chɔ̍ɔ̍dāŋ o̍ pēēlo̍.

⁶Pēē pɔ̍mbɔ̄ ko̍ŋ wa̍ pēe̍ ndɔ̄ ko̍lāa̍ ni̍. Ndu̍yɛ̍, lēpāa̍ o̍ lēpāa̍, bēe̍dīi̍yo̍ a̍ vīsīo̍ŋ bāsa̍bāsa̍kūēndi̍a̍a̍ nda̍ a̍a̍ chu̍ū ndu̍ ni̍, ā chūu̍ ndu̍ pɛ̍ i̍di̍i̍ ā chūu̍ ndu̍ īchɔ̄l.

⁷Kɛ̍ mɛ̄ɛ̍ te̍le̍ŋ ti̍ŋ hīo̍u̍, mi̍ pēē pɔ̍mbɔ̄ɔ̍ ho̍ō ō vēlā, fo̍ndōle̍, pīɔ̄ɔ̄ bɛ̍ɛ̍ ve̍ si̍ā bā o̍ bā o̍ lɛ̄ŋndē lēŋ ni᷄ŋ te̍.

⁸O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Īla̍a̍chā āā,

⁹“Chɔ̍ŋ mā kūɛ̄ Sa̍lu̍ɛ̍fa̍tī, chi̍e̍e̍ cho̍ Sa̍i̍dɔ̄ŋ chi̍e̍e̍ i̍kɛ̍i̍ yo̍ mā kɔ̍ cha᷅l lo̍ŋ. Chūā pīlɛ̍ chō o̍ chi̍e̍e̍ ko̍ŋ ni᷄ŋ pɔ̍nɔ̍ ndɔ̄ cho̍ lɛ̍ āchāl te̍, I̍ di̍mu̍l ndu̍ le̍ mbō wa̍ nu̍m nyɛ̄ dīa̍a̍ kīo̍o̍.”

¹⁰O̍ ko̍ŋ, mi̍ Īla̍a̍chā cha̍ŋ mbo̍ kūā Sālu̍ɛ̍fa̍tī chi̍e̍e̍. Mɛ̄ɛ̍ o̍ fu̍u̍lu̍u̍ o̍ dīō kpāki̍ chi̍o̍o̍, mbo̍ chā chūa̍a̍ yɔ̄mnde̍ tīŋgɔ̄ɔ̍. Chūa̍a̍ ho̍ō pɔ̍nɔ̍ ndɔ̄ ndu̍ o̍o̍ vi᷅ ni᷅ŋ. Mi̍ Īla̍a̍chā di̍mūl ndu̍ āā, “Chūa̍a̍ yāndi̍i̍, kɔ̍ chu̍ū ya̍ mɛ̄ŋnda̍ŋ mī ko̍l.”

¹¹Mɛ̄ɛ̍ chūa̍a̍ wa̍ kɔ̄la̍ŋ le̍ ndu̍ mɛ̄ŋnda̍ŋ chūū wo̍, mi̍ Īla̍a̍chā di̍mūl ndu̍ āā, “Tē ā nɔ̄ bēe̍dīi̍ pɔ̍mbɔ̄ pɛ̍ a̍ chu̍u̍ ya̍ o̍ bā fɔ̍.”

¹²Mi̍ chūa̍a̍ dīmūl ndu̍ āā, “Le̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nu̍m ŋ̄ chō pīɛ̄īyo̍ wo̍, I̍ nɔ̍ be̍e̍dīi̍ o̍ bēe̍dīi̍ chi̍ɛ̍ī ni̍ŋ te̍. Nyɛ̄ dīāā na̍a̍ ŋ̄ nɔ̄ ni᷅ŋ na̍a̍ po̍ nūu̍ sɔ̍ sɔ̍ wo̍, kōlo̍ nda̍ tōōsīāā bēe̍dīi̍yo̍ wo̍ nyɛ̄ pɔ̄mbɔ̄ nu̍a̍ā o̍ kpɛ̍ɛ̍nɛ̍i̍ ni᷄ŋ, a̍ chūɛ̄īle̍ŋ nyɛ̄ pɔ̄mbɔ̄ o̍ nyɛ̄ ī lāāndēi̍ ni᷄ŋ. Yɔ̄mīī ya̍ I̍ hi᷅ŋ he̍ī tīŋgɔ̄ɔ̍ ve̍, le̍ kɔ̄la̍ŋ nyɛ̄ dīāā pɔ̄mbɔ̄ kōŋ bɛ̄ɛ̄ndīa̍a̍ mī ŋ̄ dē na̍a̍ po̍ nūu̍. Nyɛ̄ dīāā nāā mɛ̍ɛ̍lāa̍ kpɔ̍ŋ cho̍ ni᷅ŋ ko̍ŋ ni̍. Tē ŋ̄ dē ni᷅ŋ ko̍ŋ pɛ̍, ŋ̄ nɔ̍ lɛ̍ nyɛ̄ o̍ nyɛ̄ chēle̍ŋ na̍a̍ ŋ̄ dīā le̍, yīa̍a̍ŋ ko̍ni̍ ma̍ cho̍ ni᷅ŋ na̍a̍ dīyɔ̄ɔ̍ ni̍.”

¹³Mi̍ Īla̍a̍chā di̍mūl ndu̍ āā, “Bu̍u̍la᷄ŋ te̍. Ō pɔ̄mbɔ̄ nya̍ nɔ̄ ko̍ŋ ndo̍, kɔ̍ to̍o̍sīāā ko̍ŋ mī lā dē. Kɛ̍ kɔ̍ to̍sāl lɔ̄ ya̍ fɛ̍lɛ̍ŋ be̍e̍dīi̍ pɔ̍mbɔ̄ mā chu̍u̍ ya̍. Nyɛ̄ pɔ̄mbɔ̄ cho̍ lō wo̍ lā kɔ̍ bɛ̍ɛ̍ndīāā ko̍ŋ nya̍ po̍ nu̍mndo̍ lē dē.

¹⁴Mɛ̄lɛ̄ka̍ Ya̍a̍wɛ̄ɛ̄, ō I̍sɔ̄lūɛ̍i̍ya̍ ā pīɛ̄īyo̍ dīmi̍ māā ha̍a̍a̍ mi̍ ndu̍ Mɛ̍lɛ̄ka̍ hu᷄ŋ yɔ᷅ŋ pīɔ̍ɔ̍ o̍ lɛ̄ŋnde̍ŋ ni᷄ŋ, kōlo̍ nda̍ tōōsīāā bēe̍dīi̍yo̍ wo̍ ō chu̍ū o̍ kpɛ̍ɛ̍nɛ̍i̍ ke̍ŋ ni᷄ŋ te̍, chūɛ̄īya̍ŋ mā chu̍ū o̍ nyɛ̄ īlāāndīī kēŋ ni᷄ŋ te̍.”

¹⁵O̍ ko̍ŋ, mi̍ chūa̍a̍ kūā mbo̍ kɔ̍ to̍sā mɛ̄ɛ̍ Īla̍a̍chā o̍ di̍mu̍l ndu̍ yɛ̍. Ndu̍yɛ̍ mi̍ ī yɔ̄nu᷄ŋ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ so̍ō sa̍na̍a̍ a̍ Īla̍a̍chā yɛ̍. Mbo̍ kūā a̍ te̍le̍ŋ vi̍lɛ̄ī nyɛ̄ dīa̍a̍ chu̍ū chu̍a̍a̍ ho̍ō o̍ bā le̍, ndu̍ ni̍, po̍ ndɔ̄ɔ̍ ni̍, Īla̍a̍chā ni̍, lēpāa̍ o̍ lēpāa̍ ā wa̍ nyɛ̄ dīa̍a̍ sɔ̄lāa̍ tūu̍le̍ŋ. Kōlo̍ nda̍ tōōsīāā bēe̍dīi̍yo̍ wo̍ ndu̍ o̍o̍ chu̍ū o̍ kpɛ̍ɛ̍nɛ̍i̍ he̍ī ni᷄ŋ te̍, chūɛ̄īya̍ŋ bɛ̍ɛ̍ ma̍ a̍a̍ chu̍ū o̍ nyɛ̄ īlāāndīī kēŋ ni᷄ŋ te̍, ha̍a̍a̍ mbo̍ lō o̍ ko̍ŋ mi̍ Mɛ̄lɛ̄ka̍ yɔ᷅ŋ pīɔ̍ɔ̍.

¹⁶

¹⁷Mi̍ ī yɔ̄nu᷄ŋ a̍ te̍le̍ŋ pi᷅lɛ̍ nāa̍ Īla̍a̍chā o̍ wa̍ o̍ yīya̍ wa̍, mi̍ chu̍a̍ nɔ̍ chīɛ̄ī ko̍ŋ ndo̍ po᷄ ndɔ̄ɔ̍ ō dēl a̍ na̍a̍. Ndu̍yɛ̍ mi̍ nāa̍ ho̍ō ō hīāū lāchī a̍ kālo̍o̍, mbo̍ lō o̍ ko̍ŋ mi̍ pōo̍mbɔ̄ɔ̍ ho̍ō ō wū.

¹⁸Mɛ̄ɛ̍ pōo̍mbɔ̄ɔ̍ vī, mi̍ chūa̍a̍ dīmūl Īla̍a̍chā āā, “Wāna̍ Mɛ̄lɛ̄ka̍a̍ ho̍ō se̍ī, ō yɛ̄ɛ̍nɛ̍ ya̍ I̍ yɔ̍ŋ yɛ̄ nu̍m ma̍ tōsāl la̍ he̍ī? Bāā le̍ Mɛ̄lɛ̄ka̍ lōōnɔ᷄ŋndo̍ a̍ yɔ̄ŋndā nīla̍ wɔ̍ɔ̍ŋnda̍ŋ o̍kɔ̄ɔ̄, mī Mɛ̄lɛ̄ka̍ dīīlu̍l la̍ po̍ nūu̍ ŋ̄ hīŋ hūnɔ̄ɔ̍ ho̍ō ni̍?”

¹⁹Mi̍ Īla̍a̍chā di̍mūl ndu̍ āā, “Yɔ̍ŋgu̍ wɔ̍ ya̍ pōo̍mbɔ̄ kālāa̍.” Mi̍ Īla̍a̍chā bi̍ī ndu̍ wānā vi̍lɛ̍i̍ ko̍ŋ o̍ bā, mbo̍ hēl a̍ ndu̍ nāa̍ ndu̍ o̍o̍ lɔ᷅l o̍ chīɛ̄ī chōo̍ cho̍o̍ wo̍ ni᷄ŋ nda̍, mbo̍ kɔ̍ ya̍mbū ndu̍ o̍ kpēlē o̍ lu̍mūi̍ ndu̍ Īla̍a̍chā ndu̍ o̍o̍ lɔ᷅l lo̍ ni᷄ŋ.

²⁰Mbo̍ pīɛ̄ī Mɛ̄lɛ̄ka̍ ndu̍ chōo̍ mbo̍ dīmī āā, “O̍o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nūu̍, vɛ᷅ ma̍ tōsā sūɛ̍i̍ kpūndɛ̍ī wāā nu̍a̍ā a̍ chūa̍a̍ ho̍ō ō pɔ̍nɔ̍ ndɔ̄ o̍ vi᷅ ni᷅ŋ ho̍ō wo̍? Nūm pi̍la̍ si̍nā māā chō ya̍ I̍ cho̍ ho̍ō na̍nu᷄ŋ ndo̍ māā o̍ chūa̍a̍ ho̍ō lo̍ chi̍ɛ̍ī ni̍ŋ ya̍ I̍ cho̍ ni̍. Mɛ̄lɛ̄ka̍, vɛ᷅ ma̍ tōsā mi̍ po̍ ndɔ̄ɔ̍ ō wū wūo̍o̍ ho̍ō?”

²¹Mi̍ Īla̍a̍chā lo᷅ o̍ ko̍ŋ, mbo̍ sīɛ̄ndi᷄ŋ po̍o̍mbɔ̄ɔ̍ ho̍ō chōo̍ le̍ ya̍a̍. Mbo̍ dīmūl Mɛ̄lɛ̄ka̍ āā, “O̍o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nūu̍, yāndi̍i̍ mi̍ŋgi̍ po̍o̍mbɔ̄ɔ̍ ho̍ō yōōmōo̍ o̍ mīli̍ŋ.”

²²Ndu̍yɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ mu̍lī pīɛ̄īle̍ Īla̍a̍chā le̍ŋ, mbo̍ mīŋgī pōo̍mbɔ̄ɔ̍ ho̍ō yōōmū.

²³Mi̍ Īla̍a̍chā chu̍ā pōo̍mbɔ̄ɔ̍, mbo̍ tūāl a̍ ndu̍, mbo̍ kɔ̍ ke᷅ kāla̍ ndɔ̄. Mbo̍ dīmūl ndu̍ āā, “Ā chē po᷄ nu̍mndo̍, ō mīīŋgu̍ yōōmū.”

²⁴Mi̍ chūa̍a̍ dīmūl ndu̍ āā, “I̍ si̍na̍ ni᷅ŋ kpe̍e̍kpe̍i̍ māā wāna̍ Mɛ̄lɛ̄ka̍a̍ ŋ̄ chō lē kɛ̍ndɛ̄i̍ ni̍, ndu̍yɛ̍ māā Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā sa̍na̍a̍ o̍ nūm ni̍ŋ.”