Read Southern Kisi Māsāā Bɛ̍ndūāā Tāsi̍a̍a̍ 18 Bible Online

Māsāā Bɛ̍ndūāā Tāsi̍a̍a̍ 18 - Southern Kisi bible

Māsāā Bɛ̍ndūāā Tāsi̍a̍a̍ 18

¹O̍ ko̍ŋ kɔ̍ɔ̍lī, mbo̍ kūā a̍ te̍le̍ŋ vi̍lɛ̄ī pīɔ̄ɔ̄ se̍ī I̍sɔ̄lūɛ̄ī le̍. Mi̍ yīmā kpo̍o̍fi̍a̍a̍mā bɛ̄ndūa̍ŋ mā dēl Sāme̍e̍līāā mi̍ mā tīū kpo̍u̍. Mɛ̄ɛ̍ wɔ̄sīla̍ŋ lā hīōū lā tīɔ̍ɔ̍ŋ pīɔ̄ɔ̄ se̍ī le̍, o̍ yāa̍ ndɔ̄ɔ̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Īla̍a̍chā pāa̍le̍ pi᷅lɛ̍ āā, “Kɔ̍ mā kɔ̍ su̍ūki̍āŋ a̍ Māsā Bɛ̍ndōo̍ E̍ha̍bī. Kɔ̍ di̍mūl ndu̍ māā I̍ cho̍ tōsā mī pīɔ̍ɔ̍ sīa̍.”

³Po̍ pi᷅lɛ̍ wa̍ mā vēēlū ndu̍ āā Ōbāda̍yā, ndu̍ wa̍ chīɛ̄ī lēmāsa̍ Māsāa̍ E̍ha̍bī wo̍ kpo̍u̍ bo᷅lle̍ŋ ni̍. Ōbāda̍yā ko̍ŋ yɛ̄, wāna̍ ndu̍ o̍o̍ yɔ̍ŋgu̍ŋ o̍ Mɛ̄lɛ̄ka̍ Ya̍a̍wɛ̄ɛ̍ sōōlūūwo̍ ni᷄ŋ a̍ kɔ̄l ndɔ̄ɔ̍ kpo̍u̍ wo̍ o̍ wa̍ ni̍. Bōōndi̍i̍ Chɛ̍si̍bɛ̄ɛ̄ la̍nɔ̍ɔ̍ Māsāa̍ E̍ha̍bī o̍ wa̍ bɛ̍ɛ̍ wa̍nāa̍ su̍a̍ā le̍ Mɛ̄lɛ̄ka̍ Ya̍a̍wɛ̄ɛ̄ wa̍ dīūwo̍ ve̍, Ōbāda̍yā ko̍ŋ chu̍a̍ ā ti᷄ŋ ni̍, mbo̍ kɔ̍ vi̍ōŋ nda̍. Mbo̍ chūā wāŋnda̍ kɛ̄mɛ̄ nda̍ tɛ̄ɛ̄ŋ mbo̍ kɔ̍ vi̍ōŋ nda̍ o̍ būūlūla̍ŋ ni᷄ŋ la̍ŋ ti̍ɔ̍ɔ̍ŋ, būūlōo̍ ho̍ō ŋ̄wāŋ be̍le̍-ŋu̍ɛ̍ɛ̍nu̍, būūlōo̍ ho̍ō ŋ̄wāŋ be̍le̍-ŋu̍ɛ̍ɛ̍nu̍. Ndu̍yɛ̍ ndu̍ ko̍ni̍ wa̍ vɛ̄lɛ̄ nda̍ nyɛ̄ dīa̍a̍ kīo̍o̍ ni̍, a̍ mɛ̄ŋnda̍ŋ. Pāa̍le̍ pi᷅lɛ̍, mi̍ Māsāa̍ E̍ha̍bī vēēlū Ōbāda̍yā,

⁴

⁵mbo̍ dīmūl ndu̍ āā, “Mɛ̄ɛ̍ mī ŋ̄ nūūvi̍a̍a̍ bīl pūīyāa̍ le̍ su̍a̍a̍ ha̍ā ndu̍yɛ̍ a̍ chɔ̄lūāā yɛ̄yi̍i̍ mu̍ūli̍āŋnda̍ ha̍ā. Tē ō cho̍ ko̍ŋ te̍, mɛ̄ɛ̍ dīūwo̍ na̍a̍ ŋ̄ dīū ni̍ŋ nda̍ le̍ bīl pūīyāā lēpɛ̄ŋndo̍ ni̍. Ŋ̄ bālu̍ wɔ̍ ba᷅ o̍ bā pēēla̍ pɔ̍mbɔ̄la̍ŋ lā wa̍, mī ŋ̄ bālu̍ vɛ̄lɛ̄ mɛ̄ɛ̄ndīa̍ŋndo̍ o̍ pēmbo᷄ŋ tɛ̄ɛ̄ŋ kpo̍u̍, kɛ̄lɛ̄ŋgāā mī ŋ̄ sāālu̍ŋ bi᷅llo̍, ko̍ŋ tōsa̍ ni̍ ŋ̄ di̍ū lɛ̍ nda̍ le̍.”

⁶O̍ ko̍ŋ, ma̍ pīɔ̄ū fo̍ndāŋnda̍ŋ le̍ kɔ̄la̍ŋ bīllo̍ nūūvīa̍a̍, mi̍ ho̍ō kūā kpēŋgēi̍ pīlɛ̍i̍, mi̍ ho̍ō kūā kpēŋgēi̍ i̍ pīlɛ̍i̍.

⁷Mi̍ ī yɔ̄nu᷄ŋ, Ōbāda̍yā lo̍ bālɔ̄ɔ̍ ma̍ bɔ̄ŋa᷅ŋ nda̍ Īla̍a̍chā. Ndu̍yɛ̍ dīmīo̍o̍ nu̍a̍ā mi̍ Ōbāda̍yā cha᷅ ndu̍, mbo̍ sīnā māā Īla̍a̍chā cho̍ ko̍ŋ ni̍. Mbo̍ kɔ̍ ba᷅ŋ ndu̍ wūla̍ŋ o̍ lābɛ̄ŋgu̍ ni̍ŋ mbo̍ nyūnā ndu̍ āā, “Nu̍m cho̍ ho̍ō ni̍ fāllo̍?”

⁸Mi̍ Īla̍a̍chā di̍mī āā, “Ya̍ ni̍. Kɔ̍ mā kɔ̍ di̍mūl māsānɔ̄ nu̍mndo̍ māā ya̍ Īla̍a̍chā I̍ cho̍ na̍nu᷄ŋ.”

⁹Mi̍ Ōbāda̍yā di̍mūl ndu̍ āā, “Fāllo̍, a̍ ye̍e̍ma̍ mā pi̍si̍ yōōmū nūu̍, mī Māsāa̍ E̍ha̍bī o̍ di̍ī ya̍? Ō yɛ̄ɛ̍nɛ̍ ya̍ I̍ yɔ̍ŋ yɛ̄ fāllo̍ ma̍ yēēmā le̍ he̍ī tōsāa̍ a̍ ya̍?

¹⁰I̍ di̍mūl lɔ̍ nu̍m fāllo̍, le̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nūmndo̍ ya̍ I̍ cho̍ sūɛ̍i̍ ni̍. Lēlɛ̄ŋ o̍ lēlɛ̄ŋ lē lo̍ lɛ̍ mī Māsāa̍ E̍ha̍bī o̍ kɛ̍ɛ̍ wāŋnda̍ vīōmɔ̄ɔ̄ le̍ nu̍m nūūvīa̍a̍ le̍. Ndu̍yɛ̍ lēlɛ̄ŋ o̍ lēlɛ̄ŋ o̍ ve᷅m wāŋnda̍ pɛ̍ le̍ nu̍m nūūvīa̍a̍, mī lɛ̄ŋndē lēŋ lē dīmi̍ māā a̍ cho̍ lo̍ŋ te̍, le̍ mbō lāāla̍ŋ mɛ̄ɛ̍ mī wāna̍ cho̍ lɛ̄ŋndē lēŋ bōlle̍ŋ ndo̍ ō mēna̍la̍ŋ ndu̍ po̍.

¹¹Wānā wa̍ā le̍nde̍ ŋ̄ dīmūl la̍ ni̍ māā ya̍ I̍ kɔ̍ di̍mūl ndu̍ māā ā chō na̍nu᷄ŋ?

¹²I̍ si̍nā le̍ ko̍ fāŋa᷄ŋndo̍ ko̍ni̍ ya̍ I̍ cho̍ ni̍, mī nyi̍na̍ Mɛ̄lɛ̄ka̍ Ya̍a̍wɛ̄ɛ̄ wo̍ ō hu᷄ŋ chu̍ā nu̍m mbō kūɛ̄nu᷄ŋ a̍ nūm nāa̍ ya̍ I̍ si̍nā bɛ̍ɛ̍ le̍ wa̍. Tē māsāa̍ hi᷅ŋ pɛ̍ mbō kōma̍l nu̍m te̍, ō kɛ̄ɛ̍ ya̍ dīyɔ̄ɔ̍? Bu̍ɛ̍ī nūmndo̍ ya̍ I̍ cho̍ ni̍, fāllo̍. Nūm pīla̍ si̍nā māā kāni̍ ya̍ i̍ chɛ̍ŋ, Mɛ̄lɛ̄ka̍ Ya̍a̍wɛ̄ɛ̄ ya̍ I̍ so̍o̍lūū ni̍.

¹³Bōōndi̍i̍ Chɛ̍si̍bɛ̄ɛ̄ o̍ wa̍ bɛ̍ɛ̍ wa̍nāa̍ su̍a̍ā le̍ Mɛ̄lɛ̄ka̍ Ya̍a̍wɛ̄ɛ̄ wa̍ dīūwo̍ ve̍, a̍ tu̍i̍i̍ māā ya̍ le̍ ki̍ndi̍ ki̍ndi̍, mi̍ chi̍i̍ndīāā yōōmūlā ā ti᷄ŋ, mi̍ chu̍ā wāŋnda̍ kɛ̄mɛ̄ nda̍ tɛ̄ɛ̄ŋ mi̍ kɔ̍ vi̍ōŋ nda̍ o̍ būūlūla̍ŋ ni᷄ŋ la̍ŋ ti̍ɔ̍ɔ̍ŋ, būūlōo̍ ho̍ō ŋ̄wāŋ be̍le̍-ŋu̍ɛ̍ɛ̍nu̍ būūlōo̍ ho̍ō ŋ̄wāŋ be̍le̍-ŋu̍ɛ̍ɛ̍nu̍ le̍? Ndu̍yɛ̍ nyɛ̄ dīāā ni̍, māmɛ̄ŋ ni̍, ya̍ ko̍ni̍ ya̍ i̍i̍ ke᷅ nda̍ ni̍.

¹⁴Tē I̍ kɔ̍ di̍mūl Māsāa̍ E̍ha̍bī a̍ nūm o̍kɔ̄ɔ̄ pɛ̍ mbō hīŋ mbō kōma̍l nu̍m te̍, ō kɛ̄ɛ̍ ya̍ dīyɔ̄ɔ̍? Dīyɔ̄ɔ̍ o̍ di̍ī ya̍ ni̍.”

¹⁵Mi̍ Īla̍a̍chā lo᷅ o̍ ko̍ŋ mbo̍ dīmūl ndu̍ āā, “Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ kpu̍lu̍ŋgūma̍ bɛ̄ndōo̍ bu̍ɛ̍ī ndɔ̄ɔ̍ ya̍ I̍ cho̍ ni̍. I̍ me̍na̍ŋ o̍ Mɛ̄lɛ̄ka̍ kōŋ po̍, mɛ̄ɛ̍ mī fu̍la̍ pāa̍le̍ hāūle᷅ŋ E̍ha̍bī o̍ hɔ̄l mī ŋ̄ chāna᷅ŋ hɔ᷅lla̍ a̍ hɔ̄lla̍.”

¹⁶O̍ ko̍ŋ, mi̍ Ōbāda̍yā o̍ kɔ̍ di̍mūl Māsā Bɛ̍ndōo̍ E̍ha̍bī a̍ ndi̍ o̍ kɔ̄ɔ̄. Mi̍ Māsāa̍ E̍ha̍bī o̍ ma̍lnu᷄ŋ mbo̍ kūā nāa̍ Īla̍a̍chā o̍ wa̍ wa̍ le̍ mā chīīki̍āŋ nda̍ Īla̍a̍chā.

¹⁷Mɛ̄ɛ̍ o̍ ko̍ma̍l Īla̍a̍chā, mbo̍ dīmī āā, “Wāna̍ lākpūndɛ̍ bɛ̄ndōo̍ ho̍ō I̍sɔ̄lūɛ̄ī, ye̍ē na̍nu᷄ŋ ŋ̄ chō ō vīāŋna᷄ŋ ni̍?”

¹⁸Mi̍ Īla̍a̍chā di̍mūl ndu̍ āā, “Ō cho̍ ya̍ le̍ hi᷅ŋ a̍ kpūndɔ̍ɔ̍ I̍sɔ̄lūɛ̄ī le̍. Nu̍m ni̍ wānāā tūa̍a̍ fu̍la̍ o̍ yu̍ŋgu̍ fi̍nyā nūmndo̍ chōo̍ wa̍ ni̍, nya̍ hi᷅ŋ ā kpūndɔ̍ɔ̍ lɛ̄ŋnde̍ŋ nde᷅ŋ ni̍. Fo̍ndōle̍, le̍ mɛ̄ɛ̍ nya̍ kɛ̄ɛ̍ Mɛ̄lɛ̄ka̍ Ya̍a̍wɛ̄ɛ̍ dīōm, mi̍ lā mūli᷄ŋ mɛ̍lɛ̄ka̍a̍ nda̍ vēēlū āā Bāāl wa̍ sōōlūūwo̍ yɛ̍.

¹⁹Le̍la̍ŋ yo̍o̍ŋgu̍ I̍sɔ̄lūɛ̍i̍ya̍ kpo̍u̍ mī ŋ̄ bɔ̄ɔ̄ŋi̍āŋ o̍ Pēmbīī Ka̍mɛ̄lve̍ chōo̍. O̍ ko̍ŋ kɔ̍ɔ̍lī, wānāā kɛ̄mɛ̄ le̍ hi̍ɔ̍ɔ̍lu̍ a̍ ŋ̄wāŋ be̍le̍-ŋu̍ɛ̍ɛ̍nu̍a̍a̍ su̍a̍ā le̍ mɛ̄lɛ̄ka̍ nda̍ vēēlū āā Bāāl wo̍ wa̍ ni̍, ā wānāā kɛ̄mɛ̄ le̍ hi̍ɔ̍ɔ̍lu̍a̍a̍ su̍a̍ā le̍ mɛ̄lɛ̄ka̍ lāāndōo̍ A̍si̍ɛ̍lūā, mī Chɛ̍si̍bɛ̄ɛ̄ la̍a̍ nu̍m ō ma̍lā nda̍ wa̍, nda̍ kpo̍u̍ dīmu̍l nda̍ mī ŋ̄ bɔ̄ɔ̄ŋi̍āŋ ndo̍ŋ.”

²⁰O̍ ko̍ŋ, mi̍ Māsā Bɛ̍ndōo̍ E̍ha̍bī sɛ̍ŋī yōōŋgūla̍ŋ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ kpo̍u̍. I̍sɔ̄lūɛ̍i̍ya̍ kpo̍u̍, lātūlu̍ a̍ wānāā ndā a̍a̍ su̍a̍ā le̍ mɛ̄lɛ̄ka̍a̍ ndāa̍ wa̍, ma̍ chūūŋgi̍āŋ o̍ Pēmbīī Ka̍mɛ̄lve̍ chōo̍.

²¹Mi̍ Īla̍a̍chā ku̍ā nāa̍ nda̍ wa̍ ā dīīna᷄ŋ ku̍ndāa̍ wa̍, mbo̍ kɔ̍ dīmūl nda̍ āā, “Lā wa᷅ ā tɛ̄nda᷅ŋ tɛ̍ɛ̄ŋ, lā sōōlūū Bāāl, lā sōōlūū Mɛ̍lɛ̄ka̍ le̍. Tē Mɛ̄lɛ̄ka̍ Ya̍a̍wɛ̄ɛ̄ cho̍ Mɛ̄lɛ̄ka̍ kpe̍e̍kpe̍i̍yo̍ ni̍, mɛ̄ɛ̍ lā sōōlu̍u̍ Mɛ̄lɛ̄ka̍ Ya̍a̍wɛ̄ɛ̄, tē Bāāl cho̍ Mɛ̄lɛ̄ka̍ kpe̍e̍kpe̍i̍yo̍ ni̍, mɛ̄ɛ̍ lā sōōlu̍u̍ Ba̍a̍l.” Kɛ̍ wāŋnda̍ I̍sɔ̄lūɛ̄ī a̍ sūu̍ nyɛ᷅ o̍ nyɛ̄ le̍.

²²O̍ ko̍ŋ kɔ̍ɔ̍lī mi̍ Īla̍a̍chā di̍mūl nda̍, āā, “Ya̍ pīlɛ̍ kpe̍ cho̍ ni᷅ŋ wāna̍ su̍a̍ā le̍ Mɛ̄lɛ̄ka̍ Ya̍a̍wɛ̄ɛ̄ wo̍ o̍ lɛ̄ŋnde᷅ŋ nde᷅ŋ ni᷄ŋ ni̍. Wānāa̍ su̍a̍ā le̍ mɛ̄lɛ̄ka̍ Bāāl wa̍ nda̍ chō kɛ̄mɔ̄ɔ̍ le̍ hīɔ̍ɔ̍lu̍ a̍ ŋ̄wāŋ be̍le̍-ŋu̍ɛ̍ɛ̍nu̍.

²³Kɛ̍ ā chūu̍ na̍a̍ nāūwāā tōōyīa̍a̍ ā ŋīɔ̍ɔ̍ŋ, nda̍ ō pīlɛ̍ ya̍ ō pīlɛ̍, mī ŋ̄ sōli̍ sa̍lāla̍ŋ o̍ Mɛ̄lɛ̄ka̍a̍ na̍a̍ lo̍. Nda̍ dīī pɛ̍ na̍ūwo̍ o̍ nda̍a̍ ā kīli̍ ki̍li̍ ndu̍ ā kɛ̄si̍ vīsīŋ mu᷅ŋ o̍ yɔ̄mnde̍ chōo̍, kɛ̍ ā ki̍i̍sūū le̍yi̍ŋ te̍. Ya̍ I̍ di̍ī vɛ̄lɛ̄ o̍ nūu̍ I̍ ki̍li̍ ki̍li̍ ndu̍, I̍ kɛ̄si̍ vīsīŋ mu᷅ŋ o̍ yɔ̄nmde̍ chōo̍, ya̍ bɛ̍ɛ̍ I̍ ki̍i̍sūū le̍yi̍ŋ te̍.

²⁴O̍ ko̍ŋ mī ŋ̄ pīɛ̍i̍ Mɛ̄lɛ̄ka̍ā nāa̍, te̍ nda̍ pīɛ̍i̍ mɛ̄lɛ̄ka̍ ndāa̍ Bāāl pɛ̍, ya̍ I̍ pi̍ɛ̍i̍ Mɛ̄lɛ̄ka̍ Ya̍a̍wɛ̄ɛ̄. Mɛ̄lɛ̄ka̍ cho̍ pīɛ̄īle̍ŋ mūlī, mbō yɔ᷄ŋ yīŋnde̍ŋ mī lē hu᷄ŋ lo᷅m sa̍lā ndɔ̄ɔ̍ wo̍, mɛ̄ɛ̍ ndu̍ cho̍ Mɛ̄lɛ̄ka̍ kpe̍e̍kpe̍i̍yo̍ ni̍.” Mɛ̄ɛ̍ Īla̍a̍chā di̍mi̍ le̍nde̍, nda̍ kpo̍u̍ ma̍ chɛ̄l kpu̍ū.

²⁵Mi̍ Īla̍a̍chā di̍mūl wānāa̍ su̍a̍ā ka̍ŋ le̍ Bāāl wa̍ āā, “Mɛ̄ɛ̍ nya̍ chō ku̍ndā yɛ̍, mɛ̄ɛ̍ nya̍ lā kāndu̍ wɔ̍. Lā dīi̍ nāū tōōyōo̍ o̍ nya̍a̍ mī lā bɛ̄ɛ̄ndi̍a̍a̍ ndu̍ mɛ̄ɛ̍ ya̍ I̍ di̍mi̍ yɛ̍, kɛ̍ lā ki̍i̍sūū lēyīŋ te̍. O̍ ko̍ŋ, mī lā pīɛ̍i̍ mɛ̄lɛ̄ka̍ nyāa̍ Ba̍a̍l mī ŋ̄ chē, tē ō nɔ̄lā pɛ̍ mbō yɔ᷄ŋ yīŋnde̍ŋ, mī lē hu᷄ŋ lo᷅m sa̍lā kōŋ.”

²⁶O̍ ko̍ŋ ma̍ dīī nāūwo̍ o̍ ndāa̍, ma̍ bɛ̄ɛ̄ndīāā ndu̍ mɛ̄ɛ̍ Īla̍a̍chā di̍mi̍ yɛ̍. Ma̍ kāndū pīɛ̄īle̍ŋ nāa̍ Bāāl chu̍ā le̍ mbō yɔ᷄ŋ yīŋnde̍ŋ, mā bālū ma̍āŋ vīsīo̍ŋ ŋ̄ wa̍ ko̍ŋ chōo̍ wo̍ a̍ yōla̍ŋ, mā dēŋī cho̍o̍ cho̍o̍ āā, “Ōo̍ Mɛ̄lɛ̄ka̍ nāa̍ Ba̍a̍l mu̍li̍ na̍a̍ dīōm mā yɔ̍ŋ yīŋnde̍ŋ Mɛ̄lɛ̄ka̍ nāa̍ Ba̍a̍l mu̍li̍ na̍a̍ dīōm mā yɔ̍ŋ yīŋnde̍ŋ!” Chɔ̍ŋ i̍di̍i̍yo̍ ma̍ lō pīɛ̄īle̍ŋ ha̍a̍a̍ mi̍ pāa̍le̍ŋ lē sīm o̍ bōlle̍ŋ chōo̍, kɛ̍ mɛ̄lɛ̄ka̍ ndāa̍ Ba̍a̍l mu̍lī nda̍ dīōm te̍.

²⁷Mɛ̄ɛ̍ pāa̍le̍ŋ lē si᷄m o̍ bōlle̍ŋ chōo̍ ki̍nɛ̍i̍, mi̍ Īla̍a̍chā ka̍ndū nda̍ māmɔ̄ɔ̍. Mbo̍ dīmūl nda̍ āā, “Lā chɔ̄ɔ̄lu̍ wɔ̍ de̍ŋī chōo̍ cho̍o̍ mbō hīōū ho̍ō. Lā sīnā māā mɛ̄lɛ̄ka̍ nɔ̍ sɔ̄ɔ̍ŋ che̍le̍ŋ ta̍u̍ le̍ tōsāa̍. Kɛ̄lɛ̄ŋgāā nāa̍ che᷅le̍ŋ pɔ̍ kɔ̄llo̍ wā ndu̍ ni̍ŋ ni̍. Ɔ̄ɔ̄ tē ko̍ŋ te̍ sōlɔ̄ɔ̍ o̍ ku̍ā ni̍ŋ ni̍. Ɔ̄ɔ̄ īnɛ̍ po̍lo̍ŋ o̍ ku̍ā ni̍ŋ ni̍. Tē ō cho̍ ko̍ŋ te̍, mɛ̄ɛ̍ o̍ lūa̍a̍ŋ o̍ wa᷅ ni̍ŋ ni̍, mɛ̄ɛ̍ mī lā dēŋi̍ chōo̍ cho̍o̍ mī lā tīndi̍ ndu̍.”

²⁸O̍ ko̍ŋ, mi̍ wānāa̍ su̍a̍ā ha̍ā le̍ Ba̍a̍l wa̍ ā chɔ̄ɔ̄lū dēŋī chōo̍ cho̍o̍, o̍ ko̍ŋ kɔ̍ɔ̍lī ma̍ bōōlūū nda̍ pi̍la̍ a̍ mɔ̄ɔ̍ŋ ndu̍yɛ̍ a̍ ba̍lta̍ŋ, mɛ̄ɛ̍ nda̍ tōsā pa̍a̍ndū yɛ̍, mi̍ kōo̍wa̍ŋ mā wā nda̍ tāālīa̍a̍ lēkɔ̄ɔ̍.

²⁹Ā lo̍ pīɛ̄īle̍ŋ a̍ yōla̍ŋ le̍nde̍ ha̍a̍a̍ mi̍ pāa̍le̍ŋ lē dēl, mi̍ te̍le̍ŋ nda̍ sōlī sa̍lālā īchɔ̄lta̍ŋ ndo̍ ō fūūlūū, kpɛ̍kɛ̍lɛ̍ bɛ̍ɛ̍ ā tūi̍i̍ le̍, kɛ̄lɛ̄ŋgāā ni᷅ŋ te̍ mī mɛ̄lɛ̄ka̍ ndāa̍ mūli̍ nda̍ dīōm.

³⁰Mi̍ Īla̍a̍chā lo᷅ o̍ ko̍ŋ mbo̍ dīmūl I̍sɔ̄lūɛ̍i̍ya̍a̍ wa̍ lo̍ŋ ndā kpo̍u̍ āā, “Lā sɔ̄ɔ̄ŋgu̍u̍ ya̍ īkɛ̄i̍ na̍nu᷄ŋ mɛ̄ɛ̍ nya̍ chō kpo̍u̍.” Nda̍ kpo̍u̍ ma̍ kɔ̍ di̍i̍nu᷄ŋ ku̍ndāa̍ Īla̍a̍chā īkɛ̄i̍. Mi̍ Īla̍a̍chā lo᷅ o̍ ko̍ŋ mbo̍ chūā pōūta̍ŋ tɔ̍ a̍ lā tīɔ̍ɔ̍ŋ mɛ̄ɛ̍ yu̍ŋgu̍la̍ I̍sɔ̄lūɛ̍i̍ya̍ lā wa̍ yɛ̍, mbo̍ mīŋgī ma̍āŋ pāāndu̍ Mɛ̄lɛ̄ka̍ Ya̍a̍wɛ̄ɛ̍ wa̍ lo̍ŋ ndo̍ bɛ̄ɛ̄ndīāā le̍ Mɛ̄lɛ̄ka̍ sōōlūūwo̍. Pōūtā tɔ̍ a̍ lā tīɔ̍ɔ̍ŋnda̍ŋ nda᷅ŋ, pōū o̍ pōū ndu̍ o̍o̍ si̍m le̍ yu̍ŋgu̍la̍ŋ I̍sɔ̄lūɛ̄ī ō pīlɛ̍. Che̍kɔ̍pū, ō Mɛ̄lɛ̄ka̍ Ya̍a̍wɛ̄ɛ̄ ndu̍ o̍o̍ ke̍ dīōla̍ŋ āā I̍sɔ̄lūɛ̄ī yo̍, pūa̍a̍ tɔ̍ a̍ ā ŋīɔ̍ɔ̍ŋāā o̍ ve̍lū wa̍, yu̍ŋgu̍la̍ fu̍la̍ o̍ nda̍ ni᷄ŋ nda̍ŋ la̍ wa̍ la᷅ŋ ni̍. Mɛ̄ɛ̍ Īla̍a̍chā o̍ chi̍i̍ ma̍āŋndo̍ ho̍ō mīŋgī tāŋgu̍l, mbo̍ bālū so̍o̍ŋndo̍ tōūwɔ̄ɔ̍ chɛ̍ chɛ̍, nāa̍ wāna̍ a̍a̍ dɔ̍ū mɛ̄ŋmā ka̍lɔ̄ŋndā hīɔ̍ɔ̍lu̍.

³¹

³²

³³O̍ ko̍ŋ kɔ̍ɔ̍lī, mbo̍ chūā yɔ̄mnde̍ mbo̍ kɛ̄sī o̍ ma̍āŋndo̍ ho̍ō chōo̍. Mbo̍ dīī nāū tōōyōo̍ o̍ ndɔ̍ɔ̍ mbo̍ kīlī kīlī ndu̍ mbo̍ kɛ̄sī vīsīŋ mu᷅ŋ o̍ yɔ̄mīī kēŋ chōo̍.

³⁴Mbo̍ dīmūl nda̍ āā, “Lā kɔ̄ndu̍ mɛ᷅ŋnda̍ŋ kpɛ̍ɛ̍nɛ̍i̍ lē hīɔ̍ɔ̍lu̍ mī lā hu᷄ŋ hu̍lū o̍ vīsīo̍ŋ mu᷅ŋ chōo̍.” Mi̍ wāŋnda̍ kūāndū mɛ̄ŋnda̍ŋ ma̍ hu᷄ŋ dɔ̍ū. Mbo̍ dīmūl nda̍ āā, “Lā kɔ̄ndu̍ vɛ̍lɛ̄ mī lā hu᷄ŋ dɔ̍ū.” Ma̍ kūāndū vɛ̄lɛ̄ ma̍ hu᷄ŋ dɔ̍ū. Mbo̍ dīmūl nda̍ vɛ̄lɛ̄ yāa̍ ndɔ̄ɔ̍ āā, “Lā kɔ̄ndu̍ vɛ̍lɛ̄ mī lā hu᷄ŋ dɔ̍ū.” Ma̍ kūāndū ma̍ dūāū.

³⁵Mi̍ mɛ̄ŋnda̍ŋ mā pīā so̍o̍ŋ o̍ ba̍lu̍ ko̍ŋ to̍u̍wɔ̄ɔ̍ wo̍ cha᷅, mi̍ mā chāl o̍ ma̍āŋndo̍ bɛ̄ŋgu̍ kpɛ̍chɛ̄kɛ̄lɛ̄ bɛ̄ndū.

³⁶Mɛ̄ɛ̍ te̍le̍ŋ nda̍ sōlī sa̍lāla̍ īchɔ̄lta̍ŋ ndo̍ ō fūūlu̍u̍, mi̍ Īla̍a̍chā sɔ̍ɔ̍ŋgūū o̍ ma̍āŋndo̍ īkɛ̄i̍, mbo̍ kāndū Mɛ̄lɛ̄ka̍ pīɛ̄īyo̍, mbo̍ dīmī āā, “O̍o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ E̍bīlāha᷅m, a̍ Āa̍se̍, a̍ Che̍kɔ̍pū, a̍ pi̍ɛ̍ī yo̍, chɔ̍m wa᷅ŋnda̍ ha̍ā pāa̍le̍ hāūle᷅ŋ māā nu̍m cho̍ Mɛ̄lɛ̄ka̍ I̍sɔ̄lūɛ̍i̍ya̍ ni̍, ndu̍yɛ̍ mā chɔ̍m nda̍ māā bu̍ɛ̍ī nūmndo̍ ya̍ I̍ cho̍ ni̍, māā nyɛ̄ o̍ nyɛ̄ ya̍ I̍ to̍sa̍ māā nu̍m ve᷅m ya̍ ni̍.

³⁷Mu̍li̍ ya̍ dīōm Mɛ̄lɛ̄ka̍ Ya̍a̍wɛ̄ɛ̄, mī wāŋnda̍ ha̍ā ā sīna̍ māā nūm Mɛ̄lɛ̄ka̍ Ya̍a̍wɛ̄ɛ̄, nu̍m cho̍ Mɛ̄lɛ̄ka̍ kpe̍e̍kpe̍i̍yo̍ ni̍, o̍ ko̍ŋ, mī kɔ̄ltā ndāla̍ŋ lā mūli̍ŋ mā mīīŋgu̍ nu̍m sōōlūūwo̍.”

³⁸Īla̍a̍chā o̍ chi̍i̍ bɛ̍ɛ̍ pi̍ɛ̍īlē lēŋ te̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ yɔ᷅ŋ yīŋnde̍ŋ o̍ lēpīlɛ̍ ni᷄ŋ kpe̍, mi̍ lē hu᷄ŋ lo᷅m sa̍lā kōŋ a̍ yɔ̄mīī kēŋ, a̍ pōūtā lāŋ kpo̍u̍. Mɛ̄ŋmā nda̍ dɔ̄ū ma̍ŋ nda̍ŋ mi̍ yīŋnde̍ŋ lē hu᷄ŋ ve̍e̍sīāā ma̍ŋ kpa̍dī, lɛ̄ŋndē ma̍āŋndo̍ ō wa̍ bɛ̍ɛ̍ īsīsi̍ cho̍o̍ le̍ŋ kpo̍u̍ mi̍ lē ŋūā.

³⁹Mɛ̄ɛ̍ wāŋnda̍ chē nyɛ̍ yɔ̍nu̍ŋ ndo̍, nda̍ kpo̍u̍ ma̍ bāŋ wūla̍ŋ ma̍ fūūlūū hɔ̄lla̍ lɛ̄ŋ, ma̍ dīmī āā, “Tōnya̍ kpe̍e̍kpe̍i̍, Mɛ̄lɛ̄ka̍ Ya̍a̍wɛ̄ɛ̄ ndu̍ cho̍ Mɛ̄lɛ̄ka̍ kpe̍e̍kpe̍i̍yo̍ ni̍. Mɛ̄lɛ̄ka̍ o̍ mɛ̄lɛ̄ka̍ chēle̍ŋ cho̍ o̍ Mɛ̄lɛ̄ka̍ Ya̍a̍wɛ̄ɛ̄ kɔ̍ɔ̍lī le̍.”

⁴⁰O̍ ko̍ŋ kɔ̍ɔ̍lī, mi̍ Īla̍a̍chā di̍mūl wāŋnda̍ āā, “Wānāa̍ su̍a̍ā ha̍ā le̍ Bāāl wa̍ ki̍nɛ̍i̍, lā bīu̍ nda̍, ō pīlɛ̍ bɛ̍ɛ̍ lā ma᷅l mbō kūɛ̄ le̍.” O̍ ko̍ŋ, wānāa̍ su̍a̍ā ka̍ŋ le̍ Ba̍a̍l wa̍ ki̍nɛ̍i̍ ma̍ bīū nda̍ kpo̍u̍, ma̍ tūāl a̍ nda̍ Ki̍sīɔ̄ŋ o̍ pēēlo̍, mi̍ Īla̍a̍chā kɔ̍ di̍ū nda̍ kpo̍u̍.

⁴¹Mi̍ Īla̍a̍chā di̍mūl Māsā Bɛ̍ndōo̍ E̍ha̍bī āā, “Kɔ̍ ni̍ko̍ mā kɔ̍ di̍ō nyɛ̄ dīa̍a̍ fāllo̍. I̍ tu̍e̍ī pīɔ̍ɔ̍ yīmndo̍.”

⁴²O̍ ko̍ŋ, mi̍ Māsā Bɛ̍ndōo̍ E̍ha̍bī ku̍ā nyɛ̄ dīa̍a̍ dīo̍o̍. Mi̍ Īla̍a̍chā he̍l o̍ Pēmbīī Ka̍mɛ̄lve̍ chōo̍, mbo̍ kɔ̍ cha᷅l mbo̍ tūndu᷄ŋ bo᷅lle̍ŋ o̍ lābɛ̄ŋgu̍ ni̍ŋ mbo̍ wā Mɛ̄lɛ̄ka̍ pīɛ̄īyo̍.

⁴³Mbo̍ dīmūl bu̍ɛ̍ī ndɔ̄ɔ̍ āā, “He̍e̍lu̍ ba᷅ lūāŋndo̍ mā to̍fa̍ kūmbū Pēe̍ Mɛ̄ŋmā Īhɛ᷄llo̍ mā chē tē pīɔ̍ɔ̍ chō ni᷅ŋ hēlɔ̄ɔ̍.” Mi̍ bu̍ɛ̍īyo̍ ho̍ō kūā mbo̍ kɔ̍ to̍fā mbo̍ mīīŋgū, mbo̍ hu᷄ŋ di̍mūl ndu̍ āā, “I̍ kɔ̍ to̍fā kɛ̍ I̍ chi̍ nyɛ᷅ o̍ nyɛ̄ le̍.” Mi̍ Īla̍a̍chā di̍mūl ndu̍ māā ō kɔ̍ vɛ̍lɛ̄. Mbo̍ kūā vɛ̄lɛ̄ mbō kɔ̍ to̍fā kɛ̍ ō chi᷄ nyɛ᷅ o̍ nyɛ̄ le̍. Ō ku̍ɛ̄ lē ŋɔ᷄mpu᷅m,

⁴⁴o̍ ŋɔ᷄mmɛ̍ū wo̍ mbo̍ hu᷄ŋ di̍mūl Īla̍a̍chā āā, “I̍ che᷅ yu̍mbu̍ yu̍mbo̍o̍ ō pɔ̄mbɔ̄ nu̍a̍ā, māā bā wāna̍ chi̍e̍e̍ mbo̍ wā fūlāa̍ o̍ Pēe̍ Mɛ̄ŋmā Īhɛ᷄llo̍ ni᷄ŋ.” Mi̍ Īla̍a̍chā di̍mūl ndu̍ āā, “Kɔ̍ di̍mūl Māsāa̍ E̍ha̍bī mbō bɛ̄ɛ̄ndi̍a̍a̍ nyɛ̄ ndɔ̄ nya̍a̍na᷄ŋ su̍a̍a̍ ā nāŋ ndo̍ mbō kūɛ̄ chi̍e̍e̍, yɔ̄ŋi̍ pīɔ̍ɔ̍ bīi̍ ndu̍.”

⁴⁵Ō bēndu̍ bɛ̍ɛ̍ ti᷅ŋ te̍ mi̍ pīɔ̄ɔ̄ bɛ̄ndōo̍ hēl mbo̍ pīīmīāā kpi̍lo̍, o̍ ko̍ŋ kɔ̍ɔ̍lī, mi̍ hūēīyīī bɛ̄ndūe̍i̍ sūŋgū hɔ̄ŋndo̍, mi̍ pīɔ̍ɔ̍ kāndū sīa̍a̍. Mi̍ Īla̍a̍chā yi̍i̍nu᷄ŋ do᷅ma̍ ndɔ̄ɔ̍ o̍ chāŋ pe᷅ŋ mbo̍ kāndū kīlta̍ŋ. Ndu̍yɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ ke᷅ ndu̍ kpāāyāa̍ mbo̍ cha᷄ŋ lo̍ŋ a̍ kīlta̍ŋ mbo̍ fūūlūū Chɛ̍si̍lūɛ̄ɛ̄ chi̍e̍e̍, ndu̍ cho̍ lāchī Māsāa̍ E̍ha̍bī cho̍ ndu̍ kɔ̄ɔ̄lī o̍ nyɛ̄ su̍a̍a̍ ndɔ̍ ā nāŋndo̍ chōo̍.