Read Southern Kisi Māsāā Bɛ̍ndūāā Tāsi̍a̍a̍ 19 Bible Online

Māsāā Bɛ̍ndūāā Tāsi̍a̍a̍ 19 - Southern Kisi bible

Māsāā Bɛ̍ndūāā Tāsi̍a̍a̍ 19

¹Mɛ̄ɛ̍ Māsā Bɛ̍ndōo̍ E̍ha̍bī o̍ mi̍i̍ŋgu̍ chi̍e̍e̍, nyɛ̄ o̍ nyɛ̄ Īla̍a̍chā to̍sa̍, mbo̍ kɔ̍ do̍u̍nu᷄ŋ Chɛ̍si̍bɛ̄ɛ̄ la̍a̍ ndɔ̍ ko̍na̍ kpo̍u̍. O̍ ko̍ŋ kɔ̍ɔ̍lī, mbo̍ chɔ̄m ndu̍ a̍ mɛ̄ɛ̍ Īla̍a̍chā o̍ di̍u̍ wānāā nda̍ a̍a̍ su̍a̍ā le̍ Bāāl wa̍ kpo̍u̍ yɛ̍.

²Mɛ̄ɛ̍ Chɛ̍si̍bɛ̄ɛ̄ o̍ tu̍e̍ī sūɛ̍i̍ he̍ī, mbo̍ sōlī ki̍i̍la̍nɔ̍ɔ̍ mbo̍ vīām ndu̍ nāa̍ Īla̍a̍chā chu̍a̍ a̍ yōōŋgōo̍ le̍ mbō kɔ̍ dīmūl Īla̍a̍chā āā, “Nūm Īla̍a̍chā ma̍ dīū wānāa̍ su̍a̍ā ha̍ā le̍ Ba̍a̍l wa̍ kɛ̍i̍, nūm bɛ̍ɛ̍ ā nɔ̄ mā sɔ̍la̍ pīɔ̍mndo̍. Sīɔ̄dīi̍ te̍le̍ŋ wa̍ā nu̍a̍ā tē I̍ di̍i̍ nu̍m te̍ Īla̍a̍chā, mɛ̄lɛ̄ka̍a̍ nīa̍a̍ ā dīi̍ ya̍.”

³Mɛ̄ɛ̍ Īla̍a̍chā o̍ tu̍e̍ī yōōŋgōo̍ ho̍ō, mi̍ sīōōŋnde̍ bīī ndu̍, mbo̍ chūā bu̍ɛ̍ī ndɔ̄ɔ̍ ma̍ nyāānu᷄ŋ Bīɛ̄ɛ̄si̍ɛ̍bā chi̍e̍e̍, o̍ būŋgɛ̄ī Chu̍dāve̍ ni᷄ŋ yɔ̄ŋi̍ Chɛ̍si̍bɛ̄ɛ̄ o̍ di̍i̍ ndu̍. Mɛ̄ɛ̍ o̍ fu̍u̍lu̍u̍ Bɛ̄ɛ̄si̍ɛ̍bā chi̍e̍e̍, mbo̍ mɛ̍ī bu̍ɛ̍ī ndɔ̄ɔ̍ lo̍ŋ,

⁴mbo̍ kūānu᷄ŋ o̍ po̍llo̍ ni᷄ŋ pɔ̍ɔ̍li̍, nāa̍ wāna̍ a̍a̍ ku̍ɛ̄ le̍ pāa̍le̍ŋ kpɛ᷅ŋ. Mbo̍ kɔ̍ cha᷅l o̍ yɔ̄m bɛ̄ndōo̍ bɛ̄ŋgu̍ lo̍ŋ. Pīɔ̍mndo̍ ndu̍ o̍o̍ hi̍o̍ū ni᷅ŋ yēēmā. Mbo̍ dīmūl Mɛ̄lɛ̄ka̍ āā, “O̍o̍ Mɛ̄lɛ̄ka̍ Ya̍a̍wɛ̄ɛ̄, I̍ to̍sa̍ ni᷅ŋ ō bɔ̄ɔ̍, ō bɛ̄ndā ni᷅ŋ mā chu̍a̍ yōōmū nūu̍. I̍ cho̍ o̍ sɔ᷅vɛ̍ mī hi̍o̍ū fi̍nyāā nīa̍a̍ ma̍māa̍ vi᷅ wa̍ le̍.”

⁵Mɛ̄ɛ̍ o̍ chi̍i̍ sūɛ̍i̍ mbo̍ hīnī pɛ̄ŋgīo̍o̍, mi̍ lūa̍a̍ŋ mā hīālū ndu̍. O̍ lē pīlɛ̍ ni᷄ŋ kpe̍, mi̍ ki̍i̍la̍nɔ̍ Mɛ̄lɛ̄ka̍a̍ hu᷄ŋ hi̍i̍lūū ndu̍ mbo̍ dīmūl ndu̍ āā, “Ti̍o̍ndu̍ mā dē nyɛ̄ dīa̍a̍.”

⁶Mɛ̄ɛ̍ Īla̍a̍chā te̍ndū mbo̍ mɛ̄ɛ̄ndīa̍ŋ, mbo̍ chā bēe̍dīi̍ nda̍ lūām o̍ pōūta̍ŋ chōo̍ wo̍ kpūŋgbɛ̄i̍ ī pīlɛ̍, a̍ mɛ̄ŋnda̍ŋ o̍ kpɛ̍ɛ̍nɛ̍i̍ ni᷄ŋ ndu̍ o̍ bōlle̍ŋ chōo̍. O̍ ko̍ŋ, mbo̍ chūā bēe̍dīi̍yo̍ ho̍ō mbo̍ dīā, mbo̍ chūā mɛ̄ŋnda̍ŋ mbo̍ kōl. O̍ ko̍ŋ kɔ̍ɔ̍lī, mbo̍ mīīŋgū vɛ̄lɛ̄ mbo̍ hīnī mbo̍ hīāū o̍ lūa̍a̍ŋ.

⁷Mɛ̄ɛ̍ o̍ hi̍ni̍, mi̍ ki̍i̍la̍nɔ̍ Mɛ̄lɛ̄ka̍ Ya̍a̍wɛ̄ɛ̄ wo̍ ō hūŋ vɛ̄lɛ̄ o̍ dīi̍ŋ ndɔ̄ɔ̍, mbo̍ hu᷄ŋ hi̍i̍lūū ndu̍, mbo̍ dīmūl ndu̍ āā, “Chɔ̍ŋ mā dē nyɛ̄ dīa̍a̍ kāni̍, ti᷅ŋ ŋ̄ nɔ̄ le̍ kɔ̄la̍ŋ ndo̍ ō bāndu̍ ō bɔ̄ɔ̍.”

⁸Mi̍ Īla̍a̍chā cha̍ŋ vɛ̍lɛ̄ mbo̍ dīā nyɛ̄ dīa̍a̍ mbo̍ chūā mɛ̄ŋnda̍ŋ mbo̍ kōl. Ndu̍yɛ̍ mi̍ nyɛ̄ dīāā o̍ de᷅ ko̍ŋ ndo̍ o̍ kē ndu̍ yōōmūa̍ŋ, mbo̍ nɔ̄lā mbo̍ cha̍ŋ nāa̍ o̍ wa̍ ka̍ŋ nda̍ mbo̍ kūā le̍ pālɛ̍i̍ be̍le̍-hi̍ɔ̍ɔ̍lu̍, a̍ nyūmnda̍ŋ be̍le̍-hi̍ɔ̍ɔ̍lu̍, mbo̍ fūūlūū o̍ Pēmbīī Sa̍a̍nāīve̍ chōo̍, pēmbīi̍ wa̍ ī yɔ̄ŋga᷄ŋ o̍ Mɛ̄lɛ̄ka̍ lo̍ ve̍.

⁹Mɛ̄ɛ̍ o̍ fu̍u̍lu̍u̍ o̍ Pēmbīī Sa̍a̍nāīve̍ chōo̍, mbo̍ kɔ̍ lu̍ɛ̍ī o̍ būūlōo̍ ni᷄ŋ mbo̍ lɔ̄l lo̍ŋ. Ō wa̍ o̍ lūa̍ŋ o̍ lēpīlɛ̍ ni᷄ŋ kpe̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā nāa̍ ndu̍ chu̍a̍ o̍ lɔ̄mā sɔ̄lāā o̍ būūlū ko̍ŋ ni᷄ŋ. Mi̍ Mɛ̄lɛ̄ka̍ nyūnā ndu̍ āā, “Īla̍a̍chā, ō yɛ̄ɛ̍nɛ̍ ŋ̄ hīŋ yɛ̄ tōsā na̍nu᷄ŋ?”

¹⁰Mbo̍ dīmūl Mɛ̄lɛ̄ka̍ āā, “O̍o̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, ā sīnā māā bu̍ɛ̍ī nūmndo̍ ya̍ I̍ cho̍ ni̍. Le̍ te̍le̍ŋ o̍ te̍le̍ŋ I̍ cho̍ nyɛ̄ ŋ̄ dīmūl la̍ wo̍ tōsāa̍. Wānāā nūmnda̍ I̍sɔ̄lūɛ̄ī a̍ bi̍ī ma̍ tɛ̄ɛ̄mbūū ma̍āŋndā nūmnda̍ so̍līāā lāsa̍lā la̍ŋ, ndu̍yɛ̍ ma̍ dīū wānāa̍ su̍a̍ā lē nūmnda̍ kpo̍u̍, mɛ̄ɛ̍ ya̍ pīlɛ̍ kpe̍ mi̍ lo᷅ yōōmū. Ndu̍yɛ̍ ya̍ bɛ̍ɛ̍ ā chō yā nūūvīa̍a̍ le̍ ya̍ dīyɔ̄ɔ̍.”

¹¹Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl ndu̍ āā, “Fu̍la̍ o̍ bɛ̍ɛ̄ mā kɔ̍ si᷅m pēmbēi̍ chōo̍ ya̍ o̍ hɔ̄l.” Mi̍ Īla̍a̍chā fu̍lā o̍ bɛ̍ɛ̄. O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ ke̍ī ndu̍ īkɛ̄i̍ mbo̍ hīāū. O̍ lē pīlɛ̍ ni᷄ŋ kpe̍, mi̍ hūēīyīī bɛ̄ndūe̍i̍ sūŋgū hɔ̄ŋndo̍, mi̍ pēmbo᷄ŋ tɛ̄ɛ̄ndīāā, pōūtā bɛ̄ndūla̍ŋ kpo̍u̍ mi̍ lā pēsī. Kɛ̍ Mɛ̄lɛ̄ka̍ Ya̍a̍wɛ̄ɛ̄ o̍ ve̍ o̍ hūēīyīī kēŋ ni᷄ŋ te̍. Mɛ̄ɛ̍ hūēīyīī kēŋ ī pɛ̄ŋgi̍, mi̍ lɛ̄ŋnde̍ŋ lē kāndū vɛ̄lɛ̄ nyīīyāa̍ kpi̍lū kpīlū bɛ̄ndū. Kɛ̍ Mɛ̄lɛ̄ka̍ Ya̍a̍wɛ̄ɛ̄ o̍ ve̍ vɛ̍lɛ̄ o̍ lɛ̄ŋndē nyīīyāālē lēŋ ni᷄ŋ te̍.

¹²Mɛ̄ɛ̍ lɛ̄ŋndē lēŋ lē pɛ̄ŋgi̍ nyīīyāa̍, mi̍ Īla̍a̍chā o̍ cha̍nu᷄ŋ vɛ̍lɛ̄ yīŋndē bɛ̄ndūle̍ŋ ndu̍ o̍ hɔ̄l, kɛ̍ Mɛ̄lɛ̄ka̍ Ya̍a̍wɛ̄ɛ̄ o̍ ve̍ vɛ̍lɛ̄ o̍ yīŋndē lēŋ ni᷄ŋ te̍. Mɛ̄ɛ̍ yīŋndē lēŋ le̍ fāŋa̍ŋ, mbo̍ tūɛ̄īnu᷄ŋ dīōmndo̍ sūɛ̍i̍ ndu̍ o̍ lānī tōōlō pɔ̍ pɔ̍.

¹³Mɛ̄ɛ̍ Īla̍a̍chā tu̍e̍ī dīōm ko̍ŋ, mbo̍ hāndu᷄ŋ dōmāa̍ o̍ hɔ̄l mbo̍ fūlā mbo̍ kɔ̍ si᷅m o̍ būūlōo̍ sōndōo̍. Mi̍ dīōmndo̍ nyūnā ndu̍ āā, “Īla̍a̍chā ō yɛ̄ɛ̍nɛ̍ ŋ̄ hīŋ yɛ̄ tōsā na̍nu᷄ŋ?”

¹⁴Mi̍ Īla̍a̍chā di̍mī āā, “O̍o̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, ā sīnā māā bu̍ɛ̍ī nūmndo̍ ya̍ I̍ cho̍ ni̍, le̍ te̍le̍ŋ o̍ te̍le̍ŋ I̍ cho̍ nyɛ̄ ŋ̄ dīmūl la̍ wo̍ tōsāa̍. Wānāā nūmnda̍ I̍sɔ̄lūɛ̄ī a̍ bi̍ī ma̍ tɛ̄ɛ̄mbūū ma̍āŋndā nūmnda̍ so̍līāā lāsa̍lā la̍ŋ kpo̍u̍, ndu̍yɛ̍ ma̍ dīū wānāā nūm a̍ su̍a̍ā le̍ nūmnda̍ kpo̍u̍, mɛ̄ɛ̍ ya̍ pīlɛ̍ kpe̍ mi̍ lo᷅ yōōmū. Ndu̍yɛ̍ ya̍ bɛ̍ɛ̍ ma̍ wā ya̍ nūūvīa̍a̍ le̍ ya̍ dīyɔ̄ɔ̍.”

¹⁵Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl ndu̍ āā, “Chɔ̍ŋ mā mi̍i̍ŋgu̍ o̍ po̍llo̍ ni᷄ŋ Dāma̍si̍kɔ̍ɔ̄ i̍kɛ̍i̍. Po̍ pi᷅lɛ̍ chō Dāma̍si̍kɔ̍ɔ̄ chi̍e̍e̍ mā vēēlū ndu̍ āā, Ha̍sa̍yɛ̄l, ndu̍ cho̍ wā māsāa̍ le̍ lɛ̄ŋndē Si̍i̍lūīāle̍ŋ ni̍. Tē ā kūɛ̄ pɛ̍ a̍ he̍l chi̍e̍e̍ a̍ kɔ̍ su̍ū ndu̍ chūɛ̄īya̍ŋ.

¹⁶Ō ko̍ŋ kɔ̍ɔ̍lī, mā su̍u̍ vɛ̄lɛ̄ Chɛ̍hū, po̍ Ni̍mi̍sī wo̍ chūɛ̄īya̍ŋ le̍ mī ndu̍ hu̍ŋ wa᷅ māsāa̍ le̍ I̍sɔ̄lūɛ̄ī. Īla̍a̍sīā, po̍ Si̍a̍fa̍tī wo̍, wānā wa̍ā E̍bɛ̄ɛ̄l Mɛ̍ho̍lāā chi̍e̍e̍, ndu̍ cho̍ mīīŋgū wāna̍ su̍a̍ā le̍ ya̍ wo̍ o̍ fōōfō nu̍mndo̍ ni̍, ndu̍ bɛ̍ɛ̍ mā su̍u̍ ndu̍ chūɛ̄īya̍ŋ.

¹⁷Wānāa̍ cho̍ Ba̍a̍l sōōlūūwo̍ wa̍ ki̍nɛ̍i̍, wānāā yāa̍wa̍ ha̍ā cho̍ nda̍ hūnɔ̄ɔ̄ dīū ni̍. Wānāa̍ hi̍a̍lūŋ ni̍ŋ Ha̍sa̍yɛ̄l mā nyāānu̍ŋ nda̍, Chɛ̍hū cho̍ nda̍ hūnɔ̄ɔ̄ dīū ni̍. Wānāa̍ cho̍ Chɛ̍hū hīɔ̄lɔ᷄ŋ mā nyāānu̍ŋ nda̍, Īla̍a̍sīā cho̍ nda̍ dīū ni̍.

¹⁸Kɛ̍ I̍ cho̍ wāŋnda̍ mɛ̄ī yo̍o̍mū I̍sɔ̄lūɛ̄ī wāa̍la̍ŋ lā ŋɔ᷄mmɛ̍ū (7,000). Wāŋnda̍ ha̍ā, nda̍ hi̍o̍ū lāchī a̍ tīīnda᷄ŋ ndāa̍ dɔ̄wɔ̄ɔ̍ o̍ ya̍ ni̍ŋ ni̍, a̍ chɛ̍l mā tūndu᷄ŋ mā sōōlūū Bāāl le̍ wa̍.”

¹⁹Mɛ̄ɛ̍ Mɛ̄lɛ̄ka̍ chīi̍ sūɛ̍i̍ nāa̍ Īla̍a̍chā chūa̍, mi̍ Īla̍a̍chā ma᷅l lo̍ŋ mbo̍ kūānu᷄ŋ. O̍ ko̍ŋ kɔ̍ɔ̍lī, mbo̍ kōmāl Īla̍a̍sīā wāa̍ o̍ chīɛ̄ī ndūɛ̍i̍ ni᷄ŋ a̍ nāūwāā tōōyīa̍a̍. Nāūwa̍ wa̍ ndu̍ wāa̍ lāchī ku̍ndāla̍ŋ tɔ̍ a̍ ō pīlɛ̍, mi̍ ndu̍ pi̍la̍ wa̍ wāa̍ a̍ ku̍ndāa̍ ō pīlɛ̍ kɔ̄ɔ̄lī. Mɛ̄ɛ̍ Īla̍a̍chā ko̍ma̍l ndu̍, mbo̍ kēī ndu̍ dōma̍ ndɔ̄ le̍cho̍o̍ wa̍ ndu̍ o̍ bā wo̍ wūū chōo̍ mbo̍ hīāūnu᷄ŋ.

²⁰O̍ ko̍ŋ, mi̍ Īla̍a̍sīā ma᷅l nāūwāā o̍ wa̍ wāa̍ wa̍, mbo̍ nyāānu᷄ŋ Īla̍a̍chā kɔ̄ɔ̄lī. Mbo̍ kɔ̍ di̍mūl ndu̍ āā, “Fāllo̍, yāndi̍i̍ I̍ ku̍ā wɔ̍ mī kɔ̍ cho̍ŋgu᷄ŋ kɛ̍kɛ̍ nūu̍ nda̍ nde̍ nūu̍ mī hi᷅ŋ mī ŋ̄ kūɛ̄.” Mi̍ Īla̍a̍chā di̍mūl ndu̍ āā, “Bālā tīɔ̍ɔ̍ŋ, kɔ̍ mā kɔ̍ cho̍ŋgu᷄ŋ nda̍, mā hīŋ. I̍ nɔ̍ mī ku̍u̍na̍ nu̍m te̍.”

²¹O̍ ko̍ŋ, mi̍ Īla̍a̍sīā ku̍ā mbo̍ kɔ̍ di̍ū nāūwāā tōōyīa̍a̍ ndu̍ pi̍la̍ wa̍ ka̍ŋ wa̍a̍ a̍ nda̍ wa̍, mbo̍ tɛ̄ɛ̄ndīāā yɔ̄mīī wa̍ kēŋ nda̍ o̍ ŋ̄kɛ̄su̍ ve̍, mbo̍ yāū vīsīŋ mu᷅ŋ lēchōo̍ mbo̍ kē wāŋnda̍ ma̍ dīā. O̍ ko̍ŋ kɔ̍ɔ̍lī, mbo̍ mīīŋgū mbo̍ kɔ̍ to᷅l Īla̍a̍chā kɔ̄ɔ̄lī, mbo̍ sīmnu᷄ŋ wāna̍ ndɔ̄ ma̍lāā.