Read Southern Kisi Māsāā Bɛ̍ndūāā Tāsi̍a̍a̍ 20 Bible Online

Māsāā Bɛ̍ndūāā Tāsi̍a̍a̍ 20 - Southern Kisi bible

Māsāā Bɛ̍ndūāā Tāsi̍a̍a̍ 20

¹O̍ ko̍ŋ kɔ̍ɔ̍lī, mi̍ Māsā Bɛ̍ndōo̍ Bɛ̄nīha̍da̍dī, wāna̍ wa̍ māsā bɛ̄ndōo̍ le̍ lɛ̄ŋndē Si̍i̍lūīāle̍ŋ ndo̍ ō chūūŋgīāā pūa̍a̍ ndūa̍a̍ chɔ̄ūwa̍ kpo̍u̍ na̍a̍ pi᷅lɛ̍, le̍ kɔ̄la̍ŋ sɔ̍ŋgɔ̄ɔ̍ a̍ I̍sɔ̄lūɛ̍i̍ya̍. Ndu̍yɛ̍ ō fūla̍ o̍ pūa̍a̍ ndūa̍a̍ chɔ̄ūwa̍ kɔ̄ɔ̄lī, mbo̍ sɔ̄lā vɛ̄lɛ̄ wānāā mālāā chēle̍ŋ ta̍u̍ ta̍u̍. Māsāa̍ bɛ̄ndūāā o̍ sɔ̍la̍ le̍ ndu̍ sɔ̍ŋgɔ̄ɔ̍ ho̍ō kɔ̄la̍ŋ mālāa̍ wa̍, ā wa̍ ŋ̄wāŋ be̍le̍-ya̍a̍ a̍ wānāā ŋīɔ̍ɔ̍ŋ. Ndu̍yɛ̍ nda̍ kpo̍u̍ ma̍ hūŋ a̍ su̍a̍ā ndāa̍ chɔ̄ūwa̍ lātūlu̍, a̍ nyɛ̄m nyāāna᷄ŋ su̍a̍a̍ ā nāŋ ndo̍ŋ ta̍u̍ ta̍u̍. Mi̍ Māsāa̍ Bɛ̄nīha̍da̍dī pi̍la̍ si᷅m nda̍ lāchī ma̍ kɔ̍ ba̍lū Sāme̍e̍līāā, le̍ wa᷅ŋnda̍ I̍sɔ̄lūɛ̄ī chīŋa̍la᷅ŋndo̍ a̍ sɔ̍ŋgɔ̄ɔ̍.

²O̍ ko̍ŋ kɔ̍ɔ̍lī, mi̍ Māsāa̍ Bɛ̄nīha̍da̍dī o̍ so̍lī ki̍i̍la̍a̍ ndūa̍a̍ mbo̍ vīām nda̍ Sāme̍e̍līāā chi̍e̍e̍, nāa̍ Māsāa̍ E̍ha̍bī chu̍a̍, o̍ wa̍ māsāa̍ I̍sɔ̄lūɛ̄ī yo̍. Mbo̍ dīmūl nda̍ āā, “Lā kɔ̍ di̍mūl Māsāa̍ E̍ha̍bī māā,

³ō nɔ̍ ŋ̍ko̍o̍līi̍, ō nɔ̍ ka̍ni̍ŋ hu̍mbū, a̍ lāāndāā ndūa̍a̍ a̍ na̍nu᷄ŋ nāŋɔ̄ɔ̄ bɛ̄ndōo̍ wa̍, a̍ chūāūwāā ndūa̍a̍, ya̍ nɔ̍ ni᷅ŋ kpo̍u̍ ni̍.” O̍ ko̍ŋ, mi̍ ki̍i̍la̍a̍ o̍ ve᷅m nda̍ ā kūā a̍ yōōŋgōo̍ ho̍ō nāa̍ Māsā Bɛ̍ndōo̍ E̍ha̍bī chūa̍.

⁴Mi̍ Māsāa̍ E̍ha̍bī o̍ di̍mūl nda̍ āā, “Lā kɔ̍ di̍mūl Māsānɔ̍ nūu̍ Māsāa̍ Bɛ̄nīha̍da̍dī māā nyɛ̄ o̍ di̍mi̍ wo̍ hīīlūū bɛ̍ɛ̍ I̍ hi̍i̍lūū le̍. Ya̍ pi̍la̍ ni̍, nyɛ̄m nu᷄ŋ ni̍, ndu̍ nɔ̍ ni᷅ŋ kpo̍u̍ ni̍.” Mi̍ ki̍i̍la̍a̍ Māsāa̍ Bɛ̄nīha̍da̍dī o̍ ve᷅m nda̍ ā mīīŋgū ma̍ kɔ̍ do̍u̍nu᷄ŋ Bɛ̍nīha̍da̍di̍ ko̍na̍.

⁵Kɛ̍ mɛ̄ɛ̍ te̍le̍ŋ ti̍ŋ hi̍o̍u̍, mi̍ Māsāa̍ Bɛ̄nīha̍da̍dī o̍ so̍lī vɛ̄lɛ̄ ki̍i̍la̍a̍, mbo̍ vīām nda̍ nāa̍ Māsāa̍ E̍ha̍bī chu̍a̍. Mbo̍ dīmūl Māsāa̍ E̍ha̍bī āā, “Ya̍ i̍i̍ di̍mi̍ māā nūm o̍o̍ nɔ̍ ŋ̍ko̍o̍līi̍, nɔ̍ ka̍ni̍ŋ hu̍mbū, nɔ̍ ŋ̍la̍a̍ndū, nɔ̍ ŋ̍chu̍a̍ū, māā ya̍ nɔ̍ ni᷅ŋ kpo̍u̍ ni̍.

⁶Kɛ̍ ndu̍yɛ̍ I̍ kɛ̍ɛ̍si̍a̍a̍ ni᷅ŋ le̍ lāŋgba̍ā nīāā ka᷅lla̍ vīōmɔ̄ɔ̍ lo̍ŋ si̍ɔ̍dīi̍ te̍le̍ŋ wa̍ā nu̍a̍ā, mā kɔ̍ ya̍a̍sīāā chīɛ̄ī nu̍m lēmāsāa̍, a̍ chīɛ̄īlā pūa̍a̍ nu̍m āā chɔ̄ūwa̍ kpo̍u̍. Nyɛ̄ o̍ nyɛ̄ nda̍ chē pɛ̍ lo̍ŋ mbō wa̍ nyɛ̄ ba̍ā kālā, ā chūa̍ mu̍ŋ kpo̍u̍ ā hīŋ a̍ mu̍ŋ.”

⁷Mɛ̄ɛ̍ Māsāa̍ E̍ha̍bī o̍ tu̍e̍ī yōōŋgōo̍ ho̍ō, mbo̍ vēēlū wāŋ bɛ̄ndūāā lēlɛ̄ŋ nda̍ kpo̍u̍ na̍a̍ pi᷅lɛ̍. Mbo̍ dīmūl nda̍ āā, “Lāŋu̍nɔ̄ɔ̍ ho̍ō ō yēēma̍ le̍ na̍a̍ kpūndɔ̍ɔ̍ mālɔ̄ɔ̍ chōo̍. Ō vi᷄m ya̍ ki̍i̍la̍a̍ o̍ tāse̍la̍ ndɔ̄ɔ̍ mbo̍ dīmūl la̍ māā ya̍ I̍ nɔ̍ ŋ̍la̍a̍ndu̍, I̍ nɔ̍ ŋ̍chu̍a̍ū, I̍ nɔ̍ ka̍ni̍ŋ hu̍mbū, I̍ nɔ̍ ŋ̍ko̍o̍līi̍, māā kpo̍u̍ ndu̍ nɔ̍ ni᷅ŋ ni̍, māā ya̍ I̍ nɔ̍ mī yɔ̍ŋgu̍ ndu̍. Ndu̍yɛ̍ I̍ kɛ̍ɛ̍ le̍, mi̍ chɛ᷅l. Nu̍a̍ā o̍ vi̍m ya̍ vɛ̄lɛ̄ ki̍i̍la̍a̍ che᷅le̍ŋ ni̍, le̍la̍ŋ ō kɔ̍ wɔ̍ o̍ nya̍ lo̍.”

⁸Wāŋ bɛ̄ndūa̍a̍ kpo̍u̍, a̍ wānā o̍ wāna̍ wa̍ lo̍ŋ, ma̍ dīmūl ndu̍ āā, “Fāllo̍ chɛ᷅l ke̍ŋ te̍. Ya᷅ŋ bɛ̍ɛ̍ la̍ni̍ o̍ nyɛ̄ o̍ di̍mi̍ ko̍ŋ ndo̍ le̍.”

⁹Mi̍ Māsāa̍ E̍ha̍bī di̍mūl ki̍i̍la̍a̍ hi᷅ŋ a̍ yōōŋgōo̍ wa̍ āā, “Lā kɔ̍ di̍mūl Māsānɔ̍ nūu̍, māā nyɛ̄ o̍ ke̍le̍ŋa̍ dīmī wo̍ ko̍ŋ ndu̍ mi̍ chɛ᷅l, kɛ̍ ī o̍ mɛ̍ɛ̍lu̍ ni᷅ŋ he̍ī dīmī ve̍ ndi̍, I̍ chɛ᷅l lɛ̍ ke̍ŋ te̍.” O̍ ko̍ŋ kɔ̍ɔ̍lī, mi̍ ki̍i̍la̍a̍ mīīŋgū ma̍ kɔ̍ do̍u̍nu᷄ŋ Ma̍sāa̍ Bɛ̄nīha̍da̍dī ko̍na̍.

¹⁰Mi̍ Māsā Bɛ̍ndōo̍ Bɛ̄nīha̍da̍dī lo᷅ o̍ ko̍ŋ mbo̍ yɔ̄ŋ E̍ha̍bī dīōmnde̍ŋ, mbo̍ dīmūl ndu̍ āā, “Māsāa̍ E̍ha̍bī, mɛ̄ɛ̍ mī to̍sa̍ mī Sāme̍e̍līāā ta̍mbu̍, mbō lo̍ pɔ̄m. I̍ cho̍ hūnɔ̄ɔ̄ a̍ pūa̍a̍ nīa̍a̍ mā hu̍ŋ tɛ̍ɛ̍mbūū ndu̍ mā mi̍ŋgi̍ ndu̍ dɛ̍ŋgbɛ̍. Tē I̍ to̍sa̍ ko̍ŋ te̍, mɛ̄lɛ̄ka̍a̍ nīa̍a̍ ya̍ I̍ pi̍ɛ̍ī ya̍ ā tūsi̍ ya̍ nyɛ̄ pālāā bɛ̄ndōo̍ chōo̍.”

¹¹Mi̍ Māsāa̍ E̍ha̍bī o̍ mi̍ŋgūl ndu̍ dīōmndo̍ āā, “Wānā o̍ wāna̍ cho̍ wānā sɔ̍ŋgāā, ō sɔ̄ŋgā fɛ̍ɛ̍ŋ a̍ ya̍a̍mɔ̍ɔ̍nɔ̍ ndɔ̄ɔ̍ mbo̍ yēm ndu̍ ma̍lāŋ o̍ kɔ̍ŋgāŋ. Kɛ̍ tē ō sɔ̄ŋga̍ wɔ̍ mbō yēm ndu̍ le̍, ō kɔ̍ŋgāŋ ndɔ̍ le̍.”

¹²Māsāa̍ Bɛ̄nīha̍da̍dī nda̍ chāāŋāā ndūāā māsāa̍, ā wa̍ īchāli̍ ko̍lɔ̄ɔ̍ o̍ tɛ̍ndīi̍la̍ nda̍la̍ŋ ni᷄ŋ. Mɛ̄ɛ̍ o̍ tu̍e̍ī nyɛ̄ Māsāa̍ E̍ha̍bī o̍ di̍mi̍ ho̍ō wo̍, mbo̍ dīmūl pūa̍a̍ ndūa̍a̍ chɔ̄ūwa̍ āā, “Lā bɛ̄ɛ̄ndīa̍ŋ mī wāna̍ o̍ wānā chu̍a̍ fo̍ndā ndɔ̍ sɔ̍ŋgɔ̄ɔ̍.” O̍ ko̍ŋ, ma̍ bɛ̄ɛ̄ndīa̍ŋ mi̍ wānā o̍ wānā chu̍ā fo̍ndā ndɔ̍ sɔ̍ŋgɔ̄ɔ̍, le̍ chi̍o̍o̍ chīŋa̍la᷅ŋndo̍.

¹³A̍ te̍le̍ŋ ko̍ŋ ki̍nɛ̍i̍, mi̍ wāna̍ su̍a̍ā le̍ Mɛ̄lɛ̄ka̍ wo̍ ō hūŋ nāa̍ Māsā Bɛ̍ndōo̍ E̍ha̍bī chu̍ā. Mbo̍ dīmūl Māsāa̍ E̍ha̍bī āā, “Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ho̍ō ni̍, ō dīmi̍ āā, ‘Mi̍ chē bɛ̍ɛ̍ mi̍ pūa̍a̍ chɔ̄ūwa̍ a̍ hu̍ŋ si̍mūl nya̍ wa̍ ā wā ku̍ndā bɛ̄ndōo̍, kɛ̍ lā yɔ᷅ŋ īsīōōŋ te̍. I̍ cho̍ nya̍ kpāāyāa̍ kē mī lā yēm nda̍ pāa̍le̍ hāūle̍ŋ nde᷅ŋ. O̍ ko̍ŋ, mī lā sīna̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.’ ”

¹⁴Mi̍ Māsāa̍ E̍ha̍bī o̍ nyu̍nā wāna̍ su̍a̍ā le̍ Mɛ̄lɛ̄ka̍ wo̍ āā, “Kɛ̍ ku̍ndā so̍vɛ̄i̍ya̍a̍ kūɛ̍ɛ̍nɛ̍ kpe̍e̍kpe̍i̍ nɔ̍ yɛ̄ mbō sīmu̍l ya̍a̍mɔ̍ɔ̍wa̍ ha̍ā mbō yēm nda̍?” Mi̍ wāna̍ su̍a̍ā le̍ Mɛ̄lɛ̄ka̍ wo̍ ō mu̍lūl ndu̍ āā, “Mɛ̄lɛ̄ka̍ Ya̍a̍wɛ̄ɛ̄ di̍mi̍ māā pūa̍a̍ chu̍a̍a̍ pīāāndūāā chɔ̄ūwāa̍ cho̍ māsāa̍ ŋ̄būŋgāa̍ o̍ bā bɛ̄ŋgu̍ ki̍nɛ̍i̍ ya̍, nda̍ nɔ̍ ni̍ mā sɔ̄ŋga̍ sɔ̍ŋgɔ̄ɔ̍ ho̍ō.” Mi̍ Māsā Bɛ̍ndōo̍ E̍ha̍bī nyūnā ndu̍ vɛ̄lɛ̄ āā, “Kɛ̍ nɛ̄ɛ̍nɛ̍ nɔ̍ yɛ̄ mbō si᷄m nda̍ lāchī mbō kūɛ̄ a̍ nda̍ le̍ sɔ̍ŋgɔ̄ɔ̍?” Mi̍ wāna̍ su̍a̍ā le̍ Mɛ̄lɛ̄ka̍ wo̍ ō dīmūl ndu̍ āā, “Nu̍m pi̍la̍ kpe̍e̍kpe̍i̍ nɔ̍ ni̍ mā si̍m nda̍ lāchī.”

¹⁵O̍ ko̍ŋ, mi̍ Māsā Bɛ̍ndōo̍ E̍ha̍bī yo̍o̍ŋgū so̍vɛ̄i̍ya̍a̍ chu̍a̍ā pīāāndūa̍a̍ wa̍ māsāa̍ ŋ̄būŋgāa̍ o̍ bā bɛ̄ŋgu̍ wa̍ kpo̍u̍, ma̍ chūūŋgi̍āŋ na̍a̍ pi᷅lɛ̍. Ā wa̍ kpo̍u̍ kpo̍u̍ kɛ̄mɔ̄ɔ̍ lē dīi̍ŋ a̍ ŋ̄wāŋ be̍le̍-ya̍a̍ a̍ wānāā ŋīɔ̍ɔ̍ŋ (232). O̍ ko̍ŋ kɔ̍ɔ̍lī, mbo̍ chūūŋgīāā vɛ̄lɛ̄ pūa̍a̍ chɔ̄ūwa̍ I̍sɔ̄lūɛ̄ī kpo̍u̍ na̍a̍ pi᷅lɛ̍, nda̍ wa̍ kpo̍u̍ kpo̍u̍ wāa̍la̍ŋ lā ŋɔ᷄mmɛ̍ū (7,000).

¹⁶Pāa̍le̍ŋ si᷄mnda̍ŋ o̍ bōlle̍ŋ chōo̍ ki̍nɛ̍i̍, mi̍ Māsā Bɛ̍ndōo̍ E̍ha̍bī o̍ chu̍ā so̍vɛ̄i̍ya̍a̍ ndūa̍a̍ ma̍ fūlā le̍ sɔ̍ŋgɔ̄ɔ̍ a̍ so̍vɛ̄i̍ya̍ Si̍i̍līāā. So̍vɛ̄i̍ya̍a̍ chūāā pīāāndūāā kɛ̄mɛ̄ le̍ di̍i̍ŋ a̍ ŋ̄wāŋ be̍le̍-ya̍a̍ a̍ ā ŋīɔ̍ɔ̍ŋ nda̍, ā wa̍ so̍vɛ̄i̍ya̍a̍ I̍sɔ̄lūɛ̍i̍ īsīsi̍ la̍chi̍. A̍ bōōndi̍i̍ ke̍ŋ, Māsā Bɛ̍ndōo̍ Bɛ̄nīha̍da̍dī ni̍, chāāŋāā ndūāā ma̍sāā ŋ̄wāŋ be̍le̍-ya̍a̍ a̍ ā ŋīɔ̍ɔ̍ŋāa̍ ku̍ɛ̄ ndu̍ sɔ̍ŋgɔ̄ɔ̍ mālāa̍ wa̍ ni̍, ā wānu̍ŋ īchāli̍ ko̍lɔ̄ɔ̄lā ndā o̍ tɛ̍ndīi̍la̍ ndāla̍ŋ ni᷄ŋ, mūɛ̄īya̍ŋ mā wa̍ ni᷅ŋ nda̍ o̍ lāhɔ̄l. Mi̍ pūa̍a̍ Māsā Bɛ̍ndōo̍ Bɛ̄nīha̍da̍dī o̍ ve᷅m mɛ̄ɛ̄ndīa̍ŋndo̍ le̍ ya̍a̍mɔ̍ɔ̍wa̍ wa̍ ā hu᷄ŋ di̍mūl ndu̍ āā, “Fāllo̍, pūa̍a̍ chɔ̄ūwa̍ chō chɔ̄nɔ᷄ŋndo̍ Sāme̍e̍līāā chi̍e̍e̍ ma̍ wā hūnɔ̄ɔ̍ ku̍ndā bɛ̄ndōo̍.”

¹⁷

¹⁸Mi̍ Māsā Bɛ̍ndōo̍ Bɛ̄nīha̍da̍dī di̍mūl pūa̍a̍ ndūa̍a̍ chɔ̄ūwa̍ āā, “Lā kɔ̍ mī lā kɔ̍ bi̍ū nda̍ kpo̍u̍. Ā wa̍ hu̍nɔ̄ɔ̄ le̍ sɔ̍ŋgɔ̄, ā wa̍ hu̍nɔ̄ɔ̄ le̍ kɔ̄l yūlū tōōsīāā, lā bīu̍ nda̍ kpo̍u̍ mī lā hīŋ a̍ nda̍, kɛ̍ lā di̍ī ō pīlɛ̍ bɛ̍ɛ̍ le̍.”

¹⁹Mi̍ so̍vɛ̄i̍ya̍a̍ chūāā pīāāndūa̍a̍ I̍sɔ̄lūɛ̄ī ā sīm so̍vɛ̄i̍ya̍ ā pīli̍a̍a̍ I̍sɔ̄lūɛ̍i̍ lāchī, ma̍ kɔ̍ sa̍ā so̍vɛ̄i̍ya̍ Si̍i̍lūīāŋnda̍ a̍ sɔ̍ŋgɔ̄ɔ̍.

²⁰Ndu̍yɛ̍ mi̍ I̍sɔ̄lūɛ̍i̍ya̍ yām wāŋnda̍ Si̍i̍līāā mā dīū nda̍ ta̍u̍ ta̍u̍. I̍sɔ̄lūɛ̍i̍nɔ̍ o̍ I̍sɔ̄lūɛ̍i̍nɔ̍ mbo̍ dīī wāna̍ nda̍ wa̍ sɔ̍ŋgɔ̄ɔ̍ nda̍ ndu̍ wo̍. Mɛ̄ɛ̍ pūa̍a̍ chɔ̄ūwa̍ ā pīli̍a̍a̍ ā chē nyɛ̍ yɔ̍nūŋ ndo̍ ma̍ nyāānu᷄ŋ. Kɛ̍ mi̍ Māsā Bɛ̍ndōo̍ E̍ha̍bī chūā pūa̍a̍ ndūa̍a̍ chɔ̄ūwa̍ ma̍ tīsā nda̍ kɔ̄ɔ̄lī, ndu̍yɛ̍ ma̍ dīū nda̍ dīūwo̍ pīla̍. O̍ ko̍ŋ kɔ̍ɔ̍lī, ma̍ dīū vɛ̄lɛ̄ su̍a̍ā ndāa̍ chɔ̄ūwa̍ ndu̍yɛ̍ ma̍ tɛ̄ɛ̄mbūū nyɛ̄lā ndāla̍ nya̍a̍na᷄ŋ nda̍ su̍a̍a̍ ā nāŋ nda̍ŋ ta̍u̍ ta̍u̍. Kɛ̍ mi̍ Māsā Bɛ̍ndōo̍ Bɛ̄nīha̍da̍dī nda̍ pūa̍a̍ ndūa̍a̍ chɔ̄ūwa̍ ā ti᷄ŋ ā hīālu᷄ŋ ma̍ nyāānu᷄ŋ.

²¹

²²O̍ ko̍ŋ kɔ̍ɔ̍lī, mi̍ wāna̍ su̍a̍ā le̍ Mɛ̄lɛ̄ka̍ wo̍ ō kɔ̍ di̍mūl Māsā Bɛ̍ndōo̍ E̍ha̍bī āā, “Mi̍i̍ŋgū mā kɔ̍ bɛ̍ɛ̍ndīa̍ŋ pɔ̍ɔ̍ bɛ̄ɛ̄ndīa̍ŋ sɔ̍ŋgɔ̄ɔ̍ nyɛ̄ kɛ̄ndɛ̄ kɛ̍ndɛ̄, ndu̍yɛ̍ mā cha̍l pɔ̍ɔ̍ mā tu̍u̍ mɛ̄ɛ̍ ŋ̄ nɔ̄ mā bīī yɛ̍. Kāni̍ fo̍ndōle̍, nyīlāsīāŋ le̍ wɔ̄ɔ̄le̍ŋ hūnɔ̄ɔ̍ chīŋāa̍ a̍ sīālte̍ŋ ki̍nɛ̍i̍, Si̍i̍lūīāŋnda̍ ha̍ā ā chō vɛ̄lɛ̄ nya̍ hūnɔ̄ɔ̄ dēlɔ̄ɔ̄ chōo̍ a̍ sɔ̍ŋgɔ̄ɔ̍.”

²³O̍ ko̍ŋ kɔ̍ɔ̍lī, mi̍ pūa̍a̍ chɔ̄ūwa̍ Si̍i̍līāā a̍ di̍mūl Māsā Bɛ̍ndōo̍ Bɛ̄nīha̍da̍dī āā, “Fāllo̍, I̍sɔ̄lūɛ̍i̍ya̍ ha̍ā ā yi᷄m na̍a̍ fu̍u̍le̍, wānāā kāŋ mɛ̄lɛ̄ka̍a̍ ndāa̍ o̍ pēmbo᷄ŋ nda̍ chō ni̍. Le̍ mɛ̄ɛ̍ na̍a̍ ŋ̄ chīŋa̍la᷅ŋ nda̍ o̍ pēmbēi̍ chōo̍ yɛ̍, nyɛ̄ kōŋ nda̍ yēm na̍a̍ ni̍. Le̍la̍ŋ ŋ̄ kɔ̍ chi᷅ŋa̍la᷅ŋ ni᷅ŋ nda̍ o̍ dɛ̍ŋgbɔ̍ɔ̍ ni᷄ŋ. Tē ŋ̄ chīŋa̍la᷅ŋ nda̍ lo̍ŋ pɛ̍ ŋ̄ chō nda̍ yōmɔ̄ɔ̄.

²⁴Kɛ̍ nyɛ̄ ŋ̄ nɔ̄ mā to̍sa̍ wo̍ cho̍ ho̍ō ni̍, māsāā ŋ̍wa᷅ŋ be̍le̍-ya̍a̍ a̍ wānāā ŋīɔ̍ɔ̍ŋāa̍ cho̍ ha̍ā pūa̍a̍ ndāa̍ chɔ̄ūwa̍ bōlle̍ wa̍ ki̍nɛ̍i̍, fa̍ŋa̍ nda̍ o̍ fo̍ndāŋndā lāŋ mā mi̍ŋgi̍ wānāa̍ cho̍ pūa̍a̍ nu̍m ā chɔ̄ūwa̍ bōlle̍ wa̍ o̍ fōōfōla̍ ndā la̍ŋ.

²⁵O̍ ko̍ŋ kɔ̍ɔ̍lī, mā chu̍u̍ŋgi̍a̍a̍ pūa̍a̍ chɔ̄ūwa̍ ku̍nda̍ bɛ̄ndōo̍, a̍ su̍a̍a̍, a̍ nyɛ̄lā nyāāna᷄ŋ nda̍ su̍a̍a̍ ā na̍nu᷄ŋ nda̍ŋ ta̍u̍ ta̍u̍, mɛ̄ɛ̍ ŋ̄ tōsa̍ o̍ tāse̍la̍ ndɔ̄ɔ̍ yɛ̍. O̍ dɛ̍ŋgbɔ̍ɔ̍ ni᷄ŋ na̍a̍ ŋ̄ chō ni᷅ŋ I̍sɔ̄lūɛ̍i̍ya̍ ha̍ā lākɔ̄ chīŋa̍la᷅ŋ ni̍. Ndu̍yɛ̍ o̍ la᷅ŋ ni᷅ŋ ndu̍ fɔ̍ yōmɔ̄ɔ̍ na̍a̍ ŋ̄ chō nda̍ ni̍.” Mi̍ Māsā Bɛ̍ndōo̍ Bɛ̄nīha̍da̍dī o̍ chɛ᷅la᷅ŋ a̍ nyɛ̄ nda̍ dīmu̍l ndu̍ wo̍, mbo̍ tōsā mɛ̄ɛ̍ nda̍ dīmi̍ yɛ̍.

²⁶Wɔ̄sī kōŋ chūwɔ̄ɔ̍ mā sāā wɔ̄sī chēle̍ŋ, wɔ̄ɔ̄le̍ŋ hūnɔ̄ɔ̍ le̍ bɔ̄ŋāa̍ a̍ sīālte̍ŋ ki̍nɛ̍i̍, mi̍ Māsā Bɛ̍ndōo̍ Bɛ̄nīha̍da̍dī chu̍u̍ŋgīāā pūa̍a̍ ndūa̍a̍ kpo̍u̍ na̍a̍ pi᷅lɛ̍, mbo̍ sīm nda̍ lāchī, ma̍ kūā A̍fɛ̍kī chi̍e̍e̍ le̍ kɔ̄la̍ŋ I̍sɔ̄lūɛ̍i̍ya̍ chīŋa̍la᷅ŋndo̍ a̍ sɔ̍ŋgɔ̄ɔ̍.

²⁷O̍ ko̍ŋ kɔ̍ɔ̍lī, I̍sɔ̄lūɛ̍i̍ya̍ bɛ̍ɛ̍ ma̍ chūūŋgīāā pūa̍a̍ ndāa̍ chɔ̄ūwa̍ nāa̍ pi᷅lɛ̍, ma̍ bɛ̄ɛ̄ndīa̍ŋ ma̍ kūā. Ma̍ kɔ̍ ki̍o̍lu̍ dɔ̍ɔ̍ŋgɔ̍ɔ̍ kūmbū Si̍i̍lūīāŋnda̍ ā wa̍ wo̍ ma̍ chāl lo̍ŋ, Si̍i̍lūīāŋnda̍ wa̍ bāa̍ pīlɔ̍ɔ̍, nda̍ wa̍ bāa̍ pīlɔ̍ɔ̍. Kɛ̍ Si̍i̍lūīāŋnda̍ nda̍ a̍a̍ hi̍o̍ū wā ku̍nda̍ a̍ I̍sɔ̄lūɛ̍i̍ya̍, ā wa̍ ā kūāna᷄ŋ kɛ᷅kɛ᷅. Kɛ̍ I̍sɔ̄lūɛ̍i̍ya̍ nda̍ ve̍ ku̍ndā bɔ̍ɔ̍ le̍, mɛ̄ɛ̍ chūīŋnda̍ ā dīīnūŋ nu̍a̍ā ku̍ndālā pɔ̄mbɔ̄la̍ŋ lā tīɔ̍ɔ̍ŋ yɛ̍, le̍nde̍ nda̍ wa̍ ni̍.

²⁸Mi̍ wāna̍ su̍a̍ā le̍ Mɛ̄lɛ̄ka̍ wo̍ ō kūā nāa̍ Māsā Bɛ̍ndōo̍ E̍ha̍bī chu̍a̍, mbo̍ kɔ̍ di̍mūl ndu̍ āā, “Māsā Bɛ̍ndōo̍ E̍ha̍bī, Mɛ̄lɛ̄ka̍ Ya̍a̍wɛ̄ɛ̄ di̍mi̍ māā sīōōŋīī bi̍ī nya̍ le̍ wāŋnda̍ Si̍i̍līāā le̍. Mi̍ chē bɛ̍ɛ̍ ma̍ wā ku̍ndā bɛ̄ndōo̍, kɛ̍ le̍ mɛ̄ɛ̍ nda̍ dīmi̍ māā Mɛ̄lɛ̄ka̍ nyāa̍ Mɛ̄lɛ̄ka̍ cho̍ o̍ pēmbo᷄ŋ ndo̍ o̍ cho̍ ni̍, kɛ̍ ō cho̍ Mɛ̄lɛ̄ka̍ wāā o̍ dɛ̍ŋgbɛ̍ ni̍ŋ te̍ yɛ̍, Mɛ̄lɛ̄ka̍ dīmi̍ māā ō chō nya̍ kpāāyāa̍ ke̍ mī lā yēm nda̍. O̍ ko̍ŋ nya̍ I̍sɔ̄lūɛ̍i̍ya̍ pīlā bɛ̍ɛ̍ mī lā sīna̍ māā ya̍ Mɛ̄lɛ̄ka̍ Ya̍a̍wɛ̄ɛ̄, māā ya̍ cho̍ Mɛ̄lɛ̄ka̍ kpe̍e̍kpe̍i̍yo̍ ni̍.”

²⁹O̍ ko̍ŋ kɔ̍ɔ̍lī, mi̍ pālɛ̍i̍ hīāū ī ŋɔ᷄mpu᷅m sɔ̍ŋgɔ̄ɔ̍ ke̍ndūŋ te̍, ā chō mɛ̄ŋgɛ̍li̍āŋndo̍ vēllāa̍ vēllē le̍nde̍, ha̍ā chō o̍ dɔ̍ɔ̍ŋgɔ̍ ndāa̍, ha̍ā chō o̍ dɔ̍ɔ̍ŋgɔ̍ ndāa̍. Mɛ̄ɛ̍ pālɛ̍i̍ hīōū ī ŋɔ᷄mpu᷅m o̍ ŋɔ᷄mmɛ̍ū wo̍, mi̍ sɔ̍ŋgɔ̄ɔ̍ kāndu᷄ŋ nda̍ tɛ̄ɛ̄ŋ. Ndu̍yɛ̍ mi̍ I̍sɔ̄lūɛ̍i̍ya̍ yām Si̍i̍lūīāŋnda̍, ma̍ dīū Si̍i̍lūīāŋnda̍ dīūwo̍ pīla̍. Chɔ̍ŋ i̍di̍i̍yo̍ le̍ chīŋāa̍ a̍ pāa̍le̍ŋ dēlɔ̄ɔ̍, mi̍ I̍sɔ̄lūɛ̍i̍ya̍ ā dīī Si̍i̍lūīāŋnda̍ wāa̍la̍ŋ kɛ̄mɛ̄ (100,000)

³⁰O̍ ko̍ŋ kɔ̍ɔ̍lī, mi̍ Si̍i̍lūīāŋnda̍ ā tūa̍a̍ nyāānu᷄ŋ A̍fɛ̍kī chi̍e̍e̍. Kɛ̍ a̍ nya̍a̍nu̍ŋ ka̍ŋ nda̍ mi̍ kpāki̍ chi̍o̍o̍ kɔ̍ ko̍mbā ā ti᷄ŋ chōo̍ mbo̍ dīū nda̍ dīūwo̍ pīla̍. A̍ vi᷅ lo̍ŋ nda̍ ā wa̍ wāa̍la̍ŋ bi̍di̍i̍ŋ a̍ lā ŋɔ᷄mmɛ̍ū (27,000). Māsā Bɛ̍ndōo̍ Bɛ̄nīha̍da̍dī bɛ̍ɛ̍ mbo̍ hīālu᷄ŋ mbo̍ nyāānu᷄ŋ A̍fɛ̍kī chi̍e̍e̍ mbo̍ kɔ̍ vi̍o̍ŋnu᷄ŋ o̍ chīɛ̄ī pīlɛ̍ ni᷄ŋ o̍ lu̍mūi̍ mākɔ̄ɔ̍ pɔ̍.

³¹Mɛ̄ɛ̍ te̍le̍ŋ ti̍ŋ hīo̍u̍, mi̍ bu̍ɛ̍i̍yāā Māsāa̍ Bɛ̄nīha̍da̍dī wa̍ lō o̍ ko̍ŋ ma̍ dīmūl Māsā Bɛ̍ndōo̍ Bɛ̄nīha̍da̍dī āā, “Māsānɔ̄ɔ̍, ŋ̄ tūēī māā Māsāa̍ I̍sɔ̄lūɛ̄ī nyīɛ̍ɛ̍ye̍ pīla̍ nda̍ nɔ̄ ni̍. Le̍la̍ŋ ŋ̄ yīīnūŋ ndɔ̍ nyɛ̄lā lābɛ̍kīla̍ŋ, mī ŋ̄ bāāyi̍a̍ŋ yūe̍i̍ o̍ lābo̍lō mī ŋ̄ kūɛ̄ nāa̍ Māsā Bɛ̍ndōo̍ E̍ha̍bī chu̍a̍ mī ŋ̄ kɔ̍ so̍ō le̍ nu̍m. Kɛ̄lɛ̄ŋgāā mbō tūīīnu̍ŋ nu̍m īnyīɛ̍ɛ̍ mbō chīīndi̍a̍a̍ yōōmū nūmndo̍.”

³²O̍ ko̍ŋ, ma̍ sɔ̄ɔ̄ŋgūū ma̍ yīīnu᷄ŋ nyɛ᷅lā lābɛ̍kīla̍ŋ o̍ lāchāŋ, ma̍ bāāyīa̍ŋ yūe̍i̍ o̍ lābo̍lō ma̍ kūā nāa̍ Māsā Bɛ̍ndōo̍ E̍ha̍bī chūa̍. Ma̍ kɔ̍ di̍mūl ndu̍ āā, “Fāllo̍, bu̍ɛ̍ī nūmndo̍ māsā bɛ̍ndōo̍ ve᷅m na̍a̍ ni̍. Ō dīmi̍ māā na̍a̍ ŋ̄ hu᷄ŋ nyɔ̍ɔ̍lū nu̍m māā yāndi̍i̍ nūm di̍ī ndu̍ le̍.” Mi̍ Māsā Bɛ̍ndōo̍ E̍ha̍bī o̍ nyūnā nda̍ āā, “Lē kɛ̍ndɛ̍ī Māsāa̍ Bɛ̄nīha̍da̍dī o̍ cho̍ yōōmu̍? Māsāa̍ Bɛ̄nīha̍da̍dī na̍a̍ ndu̍ sɔ̍ŋgɔ̍ pɔ̄mbɔ̄ɔ̍ a̍ bɛ̄ndōo̍ wa̍ kɛ̍sɛ̍ kɛ̍sɛ̍ na̍a̍ ŋ̄ chō ni̍.”

³³Pūa̍a̍ Māsāa̍ Bɛ̄nīha̍da̍dī wa̍ sōndōo̍ tu̍ŋ nda̍ wa̍ ni᷅ŋ Māsāa̍ E̍ha̍bī nūa̍a̍ ni̍. Mɛ̄ɛ̍ Māsāa̍ E̍ha̍bī o̍ di̍mi̍ dɔ̍ɔ̍ āā, “Na̍a̍ Māsāa̍ Bɛ̄nīha̍da̍dī pɔ̄mbɔ̄ɔ̍ a̍ bɛ̄ndōo̍ wa̍ na̍a̍ ŋ̄ chō ni̍.” Lē pīlɛ̍ kpe̍ ma̍ dīmī āā, “Le̍nde̍ kpe̍e̍kpe̍i̍ I̍ cho̍ ni̍ fāllo̍, nya̍ Māsā Bɛ̍ndōo̍ Bɛ̄nīha̍da̍dī sɔ̍ŋgɔ̍ pɔ̄mbɔ̄ɔ̍ a̍ bɛ̄ndōo̍ wa̍ nya̍ chō ni̍.” Mi̍ Māsāa̍ E̍ha̍bī o̍ di̍mūl nda̍ āā, “Lā kɔ̍ mī lā kɔ̍ ve̍e̍lū ndu̍ mbō hīŋ.” O̍ ko̍ŋ, ma̍ kūā ma̍ kɔ̍ ve̍e̍lū Māsāa̍ Bɛ̄nīha̍da̍dī mbo̍ hūŋ. Mɛ̄ɛ̍ Māsāa̍ Bɛ̄nīha̍da̍dī o̍ hi᷅ŋ, mi̍ Māsā Bɛ̍ndōo̍ E̍ha̍bī he̍e̍lū ndu̍ o̍ nyɛ̄ ndɔ̄ nya̍a̍na᷄ŋ su̍a̍a̍ ā nāŋ ndo̍ ni᷄ŋ, le̍ mā kūɛ̄ nda̍ ndu̍.

³⁴Mi̍ Māsāa̍ Bɛ̄nīha̍da̍dī lo᷅ o̍ ko̍ŋ mbo̍ dīmūl Māsāa̍ E̍ha̍bī āā, “Chi̍e̍e̍ o̍ chi̍e̍e̍ fi̍nyā nūu̍ ndu̍ o̍o̍ pu̍u̍ sīndɛ̄ fi̍nyā nu̍m o̍ bā, I̍ cho̍ nu̍m mu̍ŋ mīŋgī o̍ bā kpo̍u̍. Ndu̍yɛ̍ nūm bɛ̍ɛ̍ ā chāā fo̍ndāŋndā pīsīāāla̍ŋ kūmbī Dāma̍si̍kɔ̍ɔ̄ chi̍e̍e̍, mɛ̄ɛ̍ fi̍nyā nūu̍ ndu̍ o̍o̍ ku̍mbi̍ sīndɛ̄ fo̍ndāŋndā pīsīāāla̍ŋ Sāme̍e̍līāā yɛ̍.” Mi̍ Māsāa̍ E̍ha̍bī di̍mūl ndu̍ āā, “Tē a̍ chɛ̍l pɛ̍ mā chu̍e̍l la̍ ībūŋgā māā ā tōsā ni̍ŋ nyɛ᷅ ŋ̄ dīmi̍ ho̍ō wo̍, I̍ ma̍l nu̍m ā kūɛ̄nu᷄ŋ.” O̍ ko̍ŋ, ma̍ tōsā chɛ̄la᷅ŋndo̍ nda̍ ŋi̍ɔ̍ɔ̍ŋ mi̍ Māsā Bɛ̍ndōo̍ E̍ha̍bī ma᷅l ndu̍ mbo̍ kūānu᷄ŋ.

³⁵O̍ wa̍ a̍ pāa̍le̍ pi᷅lɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl wāna̍ su̍a̍ā le̍ Mɛ̄lɛ̄ka̍ wo̍ ō pūm māā ō kɔ̍ di̍mūl cha̍a̍ŋ ndɔ̄ wāna̍ su̍a̍ā le̍ Mɛ̄lɛ̄ka̍ wo̍ mbō lɔ̄ɔ̄ ndu̍. Kɛ̍ mɛ̄ɛ̍ wāna̍ su̍a̍ā ko̍ŋ le̍ Mɛ̄lɛ̄ka̍ wo̍ ō kɔ̍ di̍mūl chāa̍ŋ ndɔ̄ māā ō lɔ̄ɔ̍ ndu̍, mi̍ chāa̍ŋ ndɔ̄ ko̍ŋ kɛ̄ɛ̄.

³⁶Mi̍ wāna̍ su̍a̍ā ho̍ō le̍ Mɛ̄lɛ̄ka̍ wo̍ ō dīmūl chāa̍ŋ ndɔ̄ ko̍ŋ āā, “Lē kɛ̄ɛ̄ ŋ̄ kɛ̄ɛ̍ ho̍ō nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l nu̍mndo̍ tōsāa̍ wo̍, mālɔ̄ɔ̄ ŋ̄ chō na̍nu᷄ŋ ndo̍ kpɔ̍kūŋndo̍ chō nu̍m kēī dīyɔ̄ɔ̄.” Ndu̍yɛ̍ dīmīo̍o̍ nu̍a̍ā mi̍ chāa̍ŋ ndɔ̄ ko̍ŋ ō māl mbo̍ bīī mīīŋgōo̍, mi̍ kpɔ̍kūŋndo̍ kēī ndu̍ dēlɔ̄ɔ̄ chōo̍ mbo̍ dīī ndu̍.

³⁷O̍ ko̍ŋ kɔ̍ɔ̍lī, mi̍ wāna̍ su̍a̍ā ho̍ō le̍ Mɛ̄lɛ̄ka̍ wo̍ ō kōmāl wānā che᷅le̍ŋ, mbo̍ dīmūl ndu̍ āā, “Yāndi̍i̍ chāa̍ŋ nūu̍ lɔ̍ɔ̍ ya̍.” Mi̍ chāa̍ŋ ndɔ̄ ko̍ŋ ō lūāā ndu̍, lɔ̄ɔ̍ pīla̍, ndu̍yɛ̍ mbo̍ yɔ̄ŋūl ndu̍.

³⁸Mi̍ wāna̍ su̍a̍ā ho̍ō le̍ Mɛ̄lɛ̄ka̍ wo̍ ō chūā kōlā i̍pɛ̍ŋgɔ̍ɔ̍ mbo̍ yīīnu᷄ŋ o̍ hɔ̄l, yɔ̄ŋi̍ nda̍ sīnā māā ndu̍ ni̍. Mbo̍ mālnu᷄ŋ mbo̍ kɔ̍ cha᷅l o̍ nɛ̄ī, nāa̍ Māsā Bɛ̍ndōo̍ E̍ha̍bī o̍ hi̍a̍ū wa̍ kpe̍e̍kpe̍i̍.

³⁹Mɛ̄ɛ̍ o̍ che᷅ Māsāa̍ E̍ha̍bī hīōūwɔ̄ɔ̍, mbo̍ vēēlū Māsāa̍ E̍ha̍bī mbo̍ dīmūl ndu̍ āā, “Fāllo̍, bōōndi̍i̍ na̍a̍ ŋ̄ wa̍ sɔ̍ŋgɔ̄ɔ̍ ve̍, mi̍ so̍vɛ̄i̍nɔ̍ɔ̍ ō pi᷅lɛ̍ bīī wāŋndo̍ o̍ chɔ̄ūwo̍ mbo̍ chūū ya̍ māā ya̍ I̍ wa̍ ndu̍ lēhɔ̄l. Mbo̍ dīmūl la̍ māā tē wānā ko̍ŋ kūɛ̄nu᷄ŋ ya̍ o̍ bā pɛ̍, māā ō dīī ya̍ sɔ̍ŋgɔ̍ ko̍ŋ, ɔ̄ɔ̄ tē ko̍ŋ te̍, āā yā I̍ pa̍a̍wa̍ ka̍ni̍ŋ hu̍mbo̍ŋ wāa̍la̍ŋ lā yāa̍ (3,000).

⁴⁰Kɛ̍ I̍ lo̍ hīŋnɔ᷄ŋnda̍ŋ, mi̍ wānā ko̍ŋ hīālu᷄ŋ mbo̍ nyāānu᷄ŋ.” Mi̍ Māsā Bɛ̍ndōo̍ E̍ha̍bī di̍mūl ndu̍ āā, “Nūm pi̍la̍ nu̍u̍va̍ dɛ̍nɛ̍ pa̍lāa̍ ho̍ō ni̍, ō cho̍ wa̍nā le̍ nu̍u̍vi̍a̍l nu̍m ndu̍ le̍. Le̍la̍ŋ mɛ̄ɛ̍ nda̍ dīmu̍l nu̍m yɛ̍, le̍nde̍ i̍ nɔ̍ le̍ wāa̍ ni̍.”

⁴¹Māsā Bɛ̍ndōo̍ E̍ha̍bī dīmīo̍o̍ dɔ̍ɔ̍ dīōmndo̍ ho̍ō, mi̍ wāna̍ su̍a̍ā ho̍ō le̍ Mɛ̄lɛ̄ka̍ wo̍ ō fāŋa᷄ŋ kōlā i̍pɛ̍ŋgɔ̍ɔ̍ o̍ hɔ̄l. O̍ ko̍ŋ, mi̍ Māsāa̍ E̍ha̍bī o̍ si̍nā māā wānāa̍ su̍a̍ā le̍ Mɛ̄lɛ̄ka̍ wa̍ ō pīlɛ̍ cho̍ ko̍ŋ ni̍.

⁴²Mi̍ wāna̍ su̍a̍ā le̍ Mɛ̄lɛ̄ka̍ wo̍ ō dīmūl ndu̍ āā, “Ya̍ŋ nīla̍ŋ mā tūēī nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍. Ō dīmi̍ āā, ‘Māsā Bɛ̍ndōo̍ E̍ha̍bī, I̍ di̍mu̍l nu̍m māā di̍i̍ Bɛ̄nīha̍da̍dī, a̍ di̍i̍ ndu̍ le̍, ma̍ māl ndu̍ mbo̍ kūānu᷄ŋ. Le̍ sōlī ŋ̄ sōli̍ ya̍ ko̍ŋ di̍ōm ndo̍, nu̍m nɔ̍ ni̍ mā sɔ̍la̍ pīɔ̍mndo̍ le̍ sɔ̍ŋgɔ̍ ndɔ̄ɔ̍, ndu̍yɛ̍ o̍ ko̍ŋ kɔ̍ɔ̍lī, mī wānāā nūmnda̍ vī, sɔ̍ŋgɔ̍ wānāā ndūa̍a̍ ŋ̄ mɛ̄i̍ yōōmū wa̍.’ ”

⁴³Mɛ̄ɛ̍ Māsā Bɛ̍ndōo̍ E̍ha̍bī o̍ tu̍e̍ī yōōŋgōo̍ ho̍ō, mbo̍ tāmbū kɔ̄l, mbo̍ cha᷄ŋ mbo̍ mīīŋgū Sāme̍e̍līāā chi̍e̍e̍ a̍ kɔ̄l tāmbɛ̍i̍ bɛ̄ndōo̍.