Read Southern Kisi Māsāā Bɛ̍ndūāā Tāsi̍a̍a̍ 21 Bible Online

Māsāā Bɛ̍ndūāā Tāsi̍a̍a̍ 21 - Southern Kisi bible

Māsāā Bɛ̍ndūāā Tāsi̍a̍a̍ 21

¹Po̍ pi᷅lɛ̍ wa̍ Chɛ̍si̍lūɛ̄ɛ̄ chi̍e̍e̍ dīōla̍ŋ āā Ne̍ba̍tī, ndu̍ o̍o̍ nɔ̍ kpe̍le̍ īyɔ̄mndo̍ o̍ chīɛ̄ī lēmāsa̍ Māsā Bɛ̍ndōo̍ E̍ha̍bī wo̍ īkɛ̄i̍.

²Pāa̍le̍ pi᷅lɛ̍, mi̍ Māsā Bɛ̍ndōo̍ E̍ha̍bī di̍mūl ndu̍ āā, “Ne̍ba̍tī, mɛ̄ɛ̍ kpe̍le̍ nu̍m īyɔ̄mndo̍ ho̍ō ō chō o̍ chīɛ̄ī ni̍ lēmāsāa̍ īkɛ̄i̍ yɛ̍, I̍ ye̍e̍ma̍ mā ke̍ ya̍ ndu̍ mī si̍i̍ŋgu̍u̍ ndu̍ kpe̍le̍ lālāmndo̍, mī ya̍ I̍ ke̍ nu̍m kpe̍le̍ che᷅le̍ŋ o̍ hi̍o̍ū bɛ̍ɛ̍ ho̍ō nāŋɔ̄ɔ̄ wo̍. Tē ko̍ŋ te̍, a̍ ki̍lu̍l la̍ ba̍ā ndɔ̄ɔ̍ i̍ pe̍ndū.”

³Kɛ̍ mi̍ Ne̍ba̍tī di̍mūl ndu̍ āā, “Sāko̍ fāllo̍, Mɛ̄lɛ̄ka̍ Ya̍a̍wɛ̄ɛ̄ o̍ tu̍ɛ̍ī bɛ̍ɛ̍ ke̍ŋ te̍. Kpe̍lo̍o̍ ho̍ō nyɛ̄m kɛ̍ŋ yu̍ŋgo̍ŋ o̍ cho̍ ni̍. Fi̍nyāā nīāā ma̍māa̍ vi᷅ wa̍, nda̍ mɛ̍i̍ kpe̍lo̍o̍ ho̍ō ni̍.”

⁴Mi̍ Māsā Bɛ̍ndōo̍ E̍ha̍bī du̍a̍u̍nu᷄ŋ tu̍mbe̍ le̍ nyɛ̄ Ne̍ba̍tī o̍ di̍mu̍l ndu̍ ho̍ō wo̍, mbo̍ mīīŋgū chīɛ̄ī ni̍ŋ a̍ kɔ̄l tāmbɛ̍i̍ bɛ̍ndōo̍. Mbo̍ kɔ̍ hi̍nī o̍ ndu̍ lo̍ kpēlē mbo̍ mūlī hɔ̄lla̍ o̍ kpēlōo̍ kɔ̄ɔ̄lī. Nyɛ̄ dīa̍a̍ bɛ̍ɛ̍ ō nɔ̄la̍ mbō dē ndu̍ le̍, a̍ kɔ̄l tāmbɛ̍i̍ bɛ̍ndōo̍.

⁵Mi̍ Chɛ̍si̍bɛ̄ɛ̄ la̍a̍ ndɔ̄ kɔ̍ nyu̍nā ndu̍ āā, “Ō yɛ̄ɛ̍nɛ̍ tɛ̍ɛ̍mbu̍u̍ yɛ̄ nu̍m kɔ̄llo̍ ho̍ō fāllo̍, nyɛ̄ dīa̍a̍ bɛ̍ɛ̍ a̍ chɛ᷅l mā dē ndu̍ le̍?”

⁶Mi̍ Māsā Bɛ̍ndōo̍ E̍ha̍bī di̍mūl ndu̍ āā, “Nyɛ̄ Ne̍ba̍tī to̍sa̍l la̍ wo̍ ndu̍ tɛ̍ɛ̍mbu̍u̍ ya̍ kɔ̄llo̍ ni̍. Ya̍ i̍i̍ ye̍e̍ma̍ mī ya̍ i̍i̍ pe̍ndū kpe̍le̍ ndɔ̍ īyɔ᷄m cho̍ o̍ chīɛ̄ī ni̍ lēmāsāa̍ ho̍ō īkɛ̄i̍ yo̍, ɔ̄ɔ̄ tē ko̍ŋ te̍ ya̍ i̍i̍ ke̍ ndu̍ kpe̍le̍ īyɔ̄m chēle̍ŋ o̍ hi̍o̍ū bɛ̍ɛ̍ ko̍ŋ na̍ŋɔ̄ɔ̄ wo̍. Kɛ̍ nyūnāa̍ ndu̍ le̍ kpe̍lo̍o̍ ho̍ō mbo̍ tūŋ ya̍ ndu̍.”

⁷Mi̍ Chɛ̍si̍bɛ̄ɛ̄ la̍a̍ ndɔ̄ di̍mūl ndu̍ āā, “Māsāa̍ E̍ha̍bī, mā ta̍mbu̍ kɔ̄l le̍ kpe̍le̍ īyɔ̄mndo̍, lɛ̄ŋnde̍ŋ nde᷅ŋ kpo̍u̍ ō nɛ̄ɛ̍nɛ̍ o̍ bā bɛ̄ŋgu̍ le̍ cho̍ yɛ̄? Ō cho̍ nu᷅m te̍? Tē le̍ ke̍ŋ ni̍ ta̍mbū kɔ̄l tē, chɔ̍ŋ mā dē nyɛ̄ dīa̍a̍. I̍ cho̍ tōsā mā sɔ̍la̍ kpe̍le̍ īyɔ̄m kōŋ.”

⁸O̍ ko̍ŋ kɔ̍ɔ̍lī, mi̍ Chɛ̍si̍bɛ̄ɛ̄ o̍ po̍o̍nyīāā yāu̍la̍ŋ a̍ dīōla̍ Māsā Bɛ̍ndōo̍ E̍ha̍bī pɔ̍nɔ̍ ndɔ̄ la̍ŋ, mbo̍ hāndū ta̍mbūe̍i̍ ndɔ̍ lēmāsāa̍ lēbɛ̄ŋgu̍, mbo̍ yɔ̄ŋ wāŋ bɛ̄ndūa̍a̍ Chɛ̍si̍lūɛ̄ɛ̄ chi̍e̍e̍ nāa̍ Ne̍ba̍tī o̍ wa̍ īchāli̍ wa̍ a̍ wānāā lēbōlla̍ lo̍ŋ kpo̍u̍.

⁹Mbo̍ dīmūl nda̍ o̍ yāu̍la̍ŋ ni᷄ŋ āā, “Lā kɛ̄ɛ̄si̍a̍a̍ pa̍a̍le̍ bi̍yāā lēsu᷅mnde̍ŋ mī lā vēēlu̍ wāŋnda̍ kpo̍u̍ na̍a̍ pi᷅lɛ̍. Tē wāŋnda̍ chūūŋgi̍āŋ pɛ̍ kpo̍u̍, lā ke᷄ Ne̍ba̍tī fo̍ndāŋ lēbɛ̄ɛ̄ bɛ̄ndōo̍ ō cha᷄l wāŋnda̍ lāchī.

¹⁰O̍ ko̍ŋ kɔ̍ɔ̍lī mī lā hīōū wānāā sɔ̄ɔ̄lɛ̄ma̍a̍ kɔ̄ɔ̄lī ā ŋīɔ̍ɔ̍ŋ, mī lā kɛ̄si̍ nda̍ ndu̍ īkɛ̄i̍, le̍ mā ho᷄l ndu̍ sūɛ̍i̍ mā dīmi̍ māā ā tūēī mbo̍ dīmī dīōmndā wɔ̄ɔ̍ŋnda̍ŋ a̍ Mɛ̄lɛ̄ka̍ ndu̍yɛ̍ a̍ Māsā Bɛ̍ndōo̍. O̍ ko̍ŋ, mī lā bīī ndu̍, mī lā fāŋa̍ ndu̍ chi̍e̍e̍ mī lā kɔ̍ vi̍ī ndu̍ lo̍ŋ a̍ pōūta̍ŋ mbō vī.”

¹¹Ndu̍yɛ̍ mi̍ wāŋ bɛ̄ndūa̍a̍ Chɛ̍si̍lūɛ̄ɛ̄, a̍ wānāā lēbōlla̍ ā chɛ̄la᷅ŋ ma̍ tōsā mɛ̄ɛ̍ Chɛ̍si̍bɛ̄ɛ̄ o̍ di̍mu̍l nda̍ yɛ̍.

¹²Ma̍ kɛ̄ɛ̄sīāā pāa̍le̍ŋ le̍ mā bīī su᷅mndo̍, ma̍ vēēlū wāŋnda̍ kpo̍u̍ na̍a̍ pi᷅lɛ̍. Ma̍ lō o̍ ko̍ŋ ma̍ kē Na̍bɔ̍tī fo̍ndāŋ lēbɛ̄ɛ̄ bɛ̄ndōo̍, wāŋnda̍ kpo̍u̍ la̍chi̍.

¹³Ma̍ hīāū wānāā sɔ̄ɔ̄lɛ̄ma̍a̍ kɔ̄ɔ̄lī ā ŋīɔ̍ɔ̍ŋ le̍ mā ho᷄l ndu̍ sūɛ̍i̍, ma̍ kɛ̄sī nda̍ ndu̍ īkɛ̄i̍. Mi̍ wānāā ŋīɔ̍ɔ̍ŋāā nda̍ hīōū ka̍ŋ kɔ̍ɔ̍lī wa̍ ā cha᷄ŋ ma̍ dīmūl wāŋnda̍ kpo̍u̍ māā ā tūēī mi̍ Ne̍ba̍tī o̍ di̍mī dīōmndā wɔ̄ɔ̍ŋnda̍ŋ a̍ Mɛ̄lɛ̄ka̍ ndu̍yɛ̍ a̍ māsā bɛ̍ndōo̍. O̍ ko̍ŋ, ma̍ bīī Ne̍ba̍tī ma̍ fāŋa᷄ŋ a̍ ndu̍ chi̍e̍e̍ ma̍ kɔ̍ vi̍ī ndu̍ a̍ pōūta̍ŋ ma̍ dīī ndu̍.

¹⁴Ma̍ lō o̍ ko̍ŋ ma̍ yɔ̄ŋ Chɛ̍si̍bɛ̄ɛ̄ dīōmnde̍ŋ māā ā dīī Ne̍ba̍tī.

¹⁵Mɛ̍ɛ̍ Chɛ̍si̍bɛ̄ɛ̄ o̍ tu̍e̍ī dɔ̍ɔ̍ māā Ne̍ba̍tī o̍ vi᷅, mbo̍ dīmūl Māsāa̍ E̍ha̍bī pɔ̍nɔ̍ ndɔ̄ āā, “I̍ tu̍e̍ī māā Ne̍ba̍tī o̍ sɔ̍la̍ pīɔ̍mndo̍. Kɔ̍ ni̍ko̍ mā kɔ̍ chu̍ā kpe̍le̍ o̍ di̍mi̍ māā ō kɛ̍ nu̍m te̍ wo̍.”

¹⁶Ndu̍yɛ̍ Māsāa̍ E̍ha̍bī tūēīyɔ̄ɔ̍ ndɔ̍ɔ̍ le̍nde̍, ō kɛ̄si̍ŋ o̍ bā le̍, mbo̍ cha᷄ŋ mbo̍ kūā sa̍kpō le̍ mbo̍ kɔ̍ chu̍ā kpe̍le̍ Ne̍ba̍tī wo̍, mbō sīīŋgu̍u̍ ndu̍ kpe̍le̍ ndɔ̄.

¹⁷Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl wāna̍ su̍a̍ā le̍ Mɛ̄lɛ̄ka̍ wo̍ Īla̍a̍chā wānā wa̍ā Ti̍bi̍sī chi̍e̍e̍ āā,

¹⁸“Māsāa̍ E̍ha̍bī, o̍ cho̍ Sāme̍e̍līāā wo̍ ō chō su̍ŋ su̍ŋ o̍ kpe̍le̍ Ne̍ba̍tī wo̍ ni᷄ŋ, ō kūɛ̄ le̍ mbō chu̍a̍ kpe̍le̍ ko̍ŋ mbō sīīŋgu̍u̍ ndu̍ kpe̍le̍ ndɔ̄. Chɔ̍ŋ mā kūɛ̄ nāa̍ ndu̍ chu̍a̍,

¹⁹mā kɔ̍ di̍mūl ndu̍ māā Mɛ̄lɛ̄ka̍ Ya̍a̍wɛ̄ɛ̄ di̍mi̍ āā, ‘Māsāa̍ E̍ha̍bī, ō cho̍ lɛ̍ le̍ Ne̍ba̍tī dīyɔ̄ɔ̍ le̍, kɛ̍ a̍ ye̍e̍ma̍ vɛ̄lɛ̄ mā chu̍a̍ kpe̍le̍ ndɔ̍ īyɔ̄mndo̍?’ ” Di̍mu̍l ndu̍ māā ya̍ Mɛ̄lɛ̄ka̍ dīmi̍ āā, “Nāa̍ Ne̍ba̍tī o̍ sɔ̍la̍ ha̍ā pīɔ̍mndo̍ mi̍ tūŋnda̍ dēēmbūū kōo̍ma̍ ndūa̍ŋ nda̍, nūm bɛ̍ɛ̍ lo̍ŋ tūŋnda̍ chō kōo̍ma̍ nu̍mnda̍ŋ dēēmbūū ni̍.” O̍ ko̍ŋ kɔ̍ɔ̍lī, mi̍ Īla̍a̍chā o̍ ma̍lnu᷄ŋ mbo̍ kūā.

²⁰Mɛ̄ɛ̍ Māsā Bɛ̍ndōo̍ E̍ha̍bī che᷅ Īla̍a̍chā hūnɔ̄ɔ̍, mbo̍ nyūnā ndu̍ āā, “Ya̍a̍mɔ̍ɔ̍nɔ̍ nūu̍ ho̍ō, ye̍ē ā tōl la̍ vɛ̄lɛ̄ kɔ̄ɔ̄lī na̍nu᷄ŋ?” Mi̍ Īla̍a̍chā di̍mūl ndu̍ āā, “E̍ī, I̍ to᷅l nu̍m kɔ̄ɔ̄lī. Ndu̍yɛ̍ ō cho̍ fu̍u̍le̍ ya̍ I̍ tɔ̍l nu̍m kɔ̄ɔ̄lī le̍, le̍ mɛ̄ɛ̍ ŋ̄ kɛ̄ɛ̍ Mɛ̄lɛ̄ka̍ Ya̍a̍wɛ̄ɛ̍ dīōm, ma̍ dīmī māā nyɛ̍ bɛ̍nda̍ ndu̍ o̍ hɔ̄l te̍ wo̍, māā ndu̍ ko̍ni̍ ŋ̄ tōsa̍ le̍ te̍le̍ŋ o̍ te̍le̍ŋ ni̍ yɛ̍.

²¹Ndu̍yɛ̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ho̍ō ni̍, ō dīmi̍ āā, ‘Māsāa̍ E̍ha̍bī, I̍ dɔ̍u̍nu᷄ŋ tu̍mbe̍ a̍ nu̍m. Kāni̍ fo̍ndōle̍ le̍ mɛ̄ɛ̍ ŋ̄ tōsa̍ mi̍ wāŋnda̍ I̍sɔ̄lūɛ̄ī a̍ si̍mnu᷄ŋ wa̍nāā yɔ̄ŋ wɔ̄ɔ̍ŋ ya̍ Mɛ̄lɛ̄ka̍ o̍ hɔ̄l lɛ̍. Le̍la̍ŋ I̍ cho̍ nu̍m hūnɔ̄ɔ̄ nyɛ̄ pālāā bɛ̄ndōo̍ tūsī chōo̍. I̍ cho̍ hūnɔ̄ɔ̄ chīī a̍ nūm, ndu̍yɛ̍ wānā pɔ̍nɔ̍ o̍ wānā pɔ̍nɔ̍ cho̍ o̍ nūmndo̍ chi̍ɛ̍ī ni̍ŋ, ō wa̍ chɛ᷅, ō wa᷅ chɛ̄ le̍, mī ba̍su̍ nda̍ tɛ̍ɛ̍. Ī yɔ̄nūŋ ni̍ŋ ko̍ a̍ yu̍ŋgu̍ nu̍mndo̍ mɛ̄ɛ̍ i̍ yɔ̍nu̍ŋ a̍ yu̍ŋgu̍la̍ māsāā bɛ̍ndūāā ŋīɔ̍ɔ̍ŋnda̍ ha̍ā yɛ̍, nda̍ yɔ̍nūŋ ni̍ māā Māsāa̍ Chɛ̄lōbo̍wām, po̍ Ne̍ba̍tī wo̍ nda̍ Māsāa̍ Ba̍a̍sīā po̍ A̍hi̍chā wo̍.’ ”

²²

²³Mi̍ Īla̍a̍chā hi̍a̍ū lāchī a̍ sūɛ̍i̍, mbo̍ dīmūl Māsāa̍ E̍ha̍bī āā, “Chɛ̍si̍bɛ̄ɛ̄ la̍a̍ nu̍m ndu̍, nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ a̍ ndu̍ o̍kɔ̄ɔ̄ wo̍ cho̍ ho̍ō ni̍. Mɛ̄lɛ̄ka̍ dīmi̍ māā ndu̍ ndu̍ tē ō hu᷄ŋ wu᷅ pɛ̍, tūŋnda̍ cho̍ dīāllūŋ ndɔ̄ŋ vi̍lɛ̍i̍yo̍ dīo̍ Chɛ̍si̍lūɛ̄ɛ̄ chi̍e̍e̍ o̍ kpāki̍ chi̍o̍o̍ īkɛ̄i̍ ni̍.

²⁴Ndu̍yɛ̍ wānāa̍ wu᷅ ni̍ŋ o̍ yu̍ŋgu̍ nu̍mndo̍ chōo̍ wa̍ nyɛ̍ yɔ̍nūŋ ni̍ŋ a̍ dīāllūŋ ndāŋ vi̍lɛ̍i̍yo̍ŋ ndo̍ cho̍ ho̍ō ni̍, a̍ wu᷅ ni̍ŋ chi̍e̍e̍ wa̍ ki̍nɛ̍i̍, tūŋnda̍ cho̍ dīāllūŋ ndāŋ vi̍lɛ̍i̍yo̍ŋ dīo̍ ni̍, o̍ ko̍ŋ kɔ̍ɔ̍lī, a̍ cho̍ wu᷄ yo̍ndōla̍ŋ ni᷄ŋ nda̍ ki̍nɛ̍i̍ mī yi̍bɛ̍i̍ya̍ dē dīāllūŋ ndāŋ vi̍lɛ̍i̍yo̍ŋ.”

²⁵E̍ha̍bī wo̍ ho̍ō, I̍sɔ̄lūɛ̄ī ki̍nɛ̍i̍, wānā o̍ wānā ve̍ lo̍ŋ mbō yɔ̄ŋgu̍ŋ kpo̍u̍ o̍ nyɛ᷄ bɛ̍nda̍ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l te̍ wo̍ tōsāa̍ ni᷄ŋ māā ndu̍ le̍. Ndu̍yɛ̍ nyɛ̄ o̍ nyɛ̄ o̍ wa̍ tōsāa̍, Chɛ̍si̍bɛ̄ɛ̄ la̍a̍ ndɔ̍ wa̍ tōsāa̍ ni̍ mbō tōsā ndu̍.

²⁶Sūɛ̍i̍ wɔ̍ɔ̍ŋīī bɛ̄ndūīī o̍ to̍sa̍ ni᷅ŋ kpo̍u̍ ve̍, wānāā Mɛ̄lɛ̄ka̍ Ya̍a̍wɛ̄ɛ̄ o̍ to̍ū sīndɛ̄ I̍sɔ̄lūɛ̍i̍ya̍ lāchī wa̍, nda̍ yɔ̍nūŋ māā A̍mɔ̍lu̍a̍i̍tīi̍ya̍ ni̍, nyɛ̄m wānāā kāŋ ā wa̍ sōōlūūwo̍ māā mɛ̄lɛ̄ka̍ā ndā wo̍ŋ, ndu̍ bɛ̍ɛ̍ mbo̍ tūāl ka̍ā ndāa̍ kɔ̄ɔ̄lī, mbo̍ mūli᷄ŋ nyɛ᷅m chēle̍ŋ mu᷅ŋ sōōlūūwo̍ māā mɛ̄lɛ̄ka̍ā ndɔ̄.

²⁷Mɛ̄ɛ̍ Māsāa̍ E̍ha̍bī chi̍i̍ yōōŋgōo̍ ho̍ō tūēīyɔ̄ɔ̄ kpo̍u̍, mbo̍ sɛ̄ɛ̄sīa̍ŋ nyɛ᷅la̍ŋ lēkɔ̄ɔ̍, mbo̍ chūā nyɛ̄lā lābɛ̍kīla̍ŋ mbo̍ wōōnu᷄ŋ, a̍ la̍ŋ ndu̍ o̍o̍ lɔ᷅l ni̍, a̍ la̍ŋ ndu̍ o̍o̍ ni̍i̍lū ni̍. Mɛ̄ɛ̍ wāŋndo̍ wāna̍ ndɔ̄ɔ̍ ō wū nu̍a̍ā mbō wa̍ bɔ̄lɔ̄ɔ̍ a̍ mɔ̍nɛ̍i̍ bɛ̍ndūe̍i̍ yɛ̍, le̍nde̍ ndu̍ o̍o̍ ba̍lū ni̍. Ndu̍yɛ̍ o̍ ko̍ŋ kɔ̍ɔ̍lī mbo̍ bīī su᷅mndo̍, ndu̍ o̍o̍ di᷅ nyɛ̍ dīāā le̍.

²⁸Mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ che᷅ nyɛ̄ Māsāa̍ E̍ha̍bī o̍ to̍sa̍ wo̍, mbo̍ dīmūl Īla̍a̍chā āā,

²⁹“Īla̍a̍chā, ā chē mɛ̄ɛ̍ Māsāa̍ E̍ha̍bī o̍ tu̍si̍ŋ to̍o̍lō o̍ ya̍ lo̍ yɛ̍? Le̍ tūsi᷄ŋ o̍ tu̍si̍ŋ to̍o̍lō o̍ ya̍ lo̍ wo̍, dɛ̍nɛ̍ pālāā ya̍ i̍i̍ kɛ̍ɛ̍si̍a̍a̍ le̍ chīɛ̄ī ndɔ̄ɔ̍ tūsīo̍o̍ chōo̍ wo̍, I̍ tu̍sī ni̍ŋ ndu̍ nda̍ ni᷄ŋ chōo̍ a̍ te̍le̍ŋ o̍ cho̍ ho̍ō yōōmū wo̍ le̍. Bōōndi̍i̍ po̍ ndɔ̄ɔ̍ ō chō hūnɔ̄ɔ̄ wā māsāa̍ ve̍, bōōndi̍i̍ ke̍ŋ ya̍ I̍ cho̍ chīɛ̍i̍ Ma̍sāa̍ E̍ha̍bī wo̍ nyɛ̄ pālāā ya̍ I̍ kɛ̍ɛ̍si̍a̍a̍ le̍ ndu̍ tūsīo̍o̍ chōo̍ wo̍ tūsī chōo̍ ni̍.”