Read Southern Kisi Māsāā Bɛ̍ndūāā Tāsi̍a̍a̍ 4 Bible Online

Māsāā Bɛ̍ndūāā Tāsi̍a̍a̍ 4 - Southern Kisi bible

Māsāā Bɛ̍ndūāā Tāsi̍a̍a̍ 4

¹Mi̍ Māsā Bɛ̍ndōo̍ Sɔ̍lɔ̍mɔ̄ŋ wa᷅ ni̍ko̍ ma̍sāa̍ lɛ̄ŋndē I̍sɔ̄lūɛ̍i̍le̍ŋ kpo̍u̍ chōo̍.

²Wāŋ bɛ̄ndūāā o̍ chu̍a̍ ma̍ wā ndu̍ wa̍llo̍ o̍ bā bɛ̄ŋgu̍ wa̍ cho̍ ha̍ā ni̍, Āsālu̍i̍yā, po̍ Sa̍dɔ̍kī wo̍, ndu̍ wa̍ wānā so̍līāā lāsa̍lāa̍ ni̍.

³Ɛ̄līho̍lu̍ɛ̍fī nda̍ A̍hi̍chā, pūa̍a̍ Si̍sīāā wa̍, nda̍ wa̍ wānāā pōōnyīa̍a̍ o̍ tōŋgo̍ kɔ̍ɔ̍sɔ̍ɔ̍ ni᷄ŋ ni̍. Chɛ̄hōsi̍a̍fa̍tī, po̍ A̍hi̍lūū wo̍, ndu̍ ndu̍ o̍o̍ kɛ̍sī ya̍u̍la̍ sɔ̄ɔ̍ŋ lēlɛ̄ŋndo̍ŋ ŋ̄ wa̍ lēni᷄ŋ nda̍ŋ kpo̍u̍ ni̍.

⁴Bɛ̄na̍yā, po̍ Chɛ̄hōwa̍dā wo̍, ndu̍ wa̍ pūa̍a̍ chɔ̄ūwa̍ I̍sɔ̄lūɛ̄ī kpo̍u̍ bo᷅lle̍ŋ ni̍. Wānāā sōlīāā lāsa̍lāa̍ ā pīli̍a̍a̍ wa̍ Sa̍dɔ̍kī nda̍ Ābīa̍a̍tā ni̍.

⁵Māsāa̍ wa̍ Sɔ̍lɔ̍mɔ̄ŋ o̍ bā bɛ̄ŋgu̍ ki̍nɛ̍i̍ ya̍, bōllē ndāle̍ŋ le̍ wa̍ Āsālu̍i̍yā po̍ Ne̍tāŋ ndo̍ ni̍. Sa̍bɔ̍dī, po̍ Ne̍ta̍ŋ ndo̍, wa̍ wānā si̍lāa̍ Māsāa̍ Sɔ̍lɔ̍mɔ̄ŋ ndo̍ ni̍.

⁶Wāna̍ wa̍ chīɛ̄ī lēmāsa̍ Māsāa̍ Sɔ̍lɔ̍mɔ̄ŋ ndo̍ bōlle̍ŋ kpo̍u̍ wo̍ wa̍ A̍hi̍sīāā ni̍. A̍do̍ni̍lūām, po̍ Ābi̍dā wo̍ ndu̍ wa̍ wa̍lta̍ yɔ̍ŋāāla̍ŋ kpo̍u̍ bo᷅lle̍ŋ ni̍.

⁷Mi̍ Māsā Bɛ̍ndōo̍ Sɔ̍lɔ̍mɔ̄ŋ hɛ̍lī māsāa̍ ŋ̄būŋgāa̍ ŋ̄wāŋ tɔ̍ a̍ wānāā ŋīɔ̍ɔ̍ŋ, mbo̍ kɛ̄sī nda̍ lɛ̄ŋndē I̍sɔ̄lūɛ̍i̍le̍ŋ kpo̍u̍ bo᷅lle̍ŋ. Māsāā tɔ̍ a̍ ā ŋīɔ̍ɔ̍ŋnda̍ ha̍ā, nyɛ̄ dīāā Māsā Bɛ̍ndōo̍ Sɔ̍lɔ̍mɔ̄ŋ nda̍ wānāa̍ wa̍ o̍ ndu̍ lo̍ chi̍ɛ̍ī ni̍ŋ nda̍, nda̍ a̍a̍ di̍ā le̍pa̍a̍ o̍ lēpāa̍ wo̍, māsāa̍ ha̍ā nda̍ a̍a̍ so̍lī nyɛ̍ dīāā kōŋ o̍ būŋgāŋ nda̍ wa̍ chōo̍ wo̍ŋ ni᷄ŋ ni̍. Māsā o̍ māsā ndu̍ o̍o̍ nɔ̍ mī ndu̍ o̍o̍ yɔ̍ŋgu̍ nyɛ̄ dīa̍a̍ le̍ pāŋge̍i̍ īpīlɛ̍ ō wɔ̄sīo̍o̍ ni᷄ŋ.

⁸Māsāā ka̍ŋ nda̍ wa̍ ha̍ā ni̍, Bɛ̍ni̍hɔ̄ɔ̄, ndu̍ wa̍ māsāa̍ o̍ lɛ̄ŋndē ī pēmbūle̍ŋ E̍fi̍lūēm ni̍,

⁹Bɛ̄ndi̍kā, ndu̍ wa̍ māsāa̍ Ma̍ka̍sī, a̍ Si̍a̍a̍lbīm, a̍ Bɛ̄tī Si̍ɛ̍mɛ̍sī, a̍ Ɛ̍lɔ̄ŋ Bɛ̄tī Ha̍nāŋ,

¹⁰a̍ Bɛ̄nɛ̄hɛ̍si̍dī nī. Ndu̍ wa̍ vɛ̄lɛ̄ māsāa̍ A̍lu̍bɔ̄ɔ̄, a̍ So̍kɔ̄ɔ̄, a̍ būŋgɛ̄ī Hɛ̍fāve̍ kpo̍u̍ ni̍.

¹¹Bɛ̄nābi̍na̍da̍bī, ndu̍ wa̍ māsāa̍ ō pīlɔ̍ɔ̍ ni̍. La̍a̍ ndɔ̍ dīōla̍ŋ āā Ta̍fa̍tī, chūa̍ Māsā Bɛ̍ndōo̍ Sɔ̍lɔ̍mɔ̄ŋ ndo̍. Būŋgɛ̄ī Dɔ̍ɔ̄ve̍ ki̍nɛ̍i̍, Bɛ̄nābi̍na̍da̍bī ko̍ŋ ndu̍ wa̍ māsāa̍ lo̍ŋ ni̍.

¹²O̍ ko̍ŋ kɔ̍ɔ̍lī, Ba̍nā, po̍ A̍hi̍lūū wo̍ ndu̍ wa̍ māsāa̍ pīlɔ̍ɔ̍ ni̍. Ndu̍ chi̍e̍e̍ŋ o̍ wa̍ māsāa̍ chōo̍ wo̍ŋ ŋ̍ wa̍ Ta̍a̍na̍kī a̍ Mɛ̍ki̍dɔ̄ɔ̄ ni̍. Būŋgɛ̄ī Bɛ̄tī Si̍āŋnde̍ ki̍nɛ̍i̍, chɔ̍ŋ Sa̍lu̍ɛ̍tāŋ chi̍e̍e̍, o̍ cho̍ kūmbū Chɛ̍si̍lūɛ̄ɛ̄ wo̍ bā tōūwo̍ wo̍, mbo̍ kūā a̍ E̍bɛ̄ɛ̄l Mɛ̍ho̍lāā, mbo̍ kɔ̍ fu̍la̍ a̍ Cho̍ki̍mīām chi̍e̍e̍, ndu̍ wa̍ māsāa̍ lo̍ŋ ni̍.

¹³Bɛ̍ŋgi̍bā ndu̍, chi̍e̍e̍ŋ o̍ wa̍ māsāa̍ chōo̍ wo̍ŋ ō pīlɔ̍ɔ̍ wa̍ Lu̍a̍mɔ̍tī ni̍. O̍ būŋgɛ̄ī Ki̍li̍a̍a̍dīve̍ ni᷄ŋ chi̍o̍o̍ ho̍ō ō chō ni̍. O̍ ko̍ŋ kɔ̍ɔ̍lī, po̍ pi᷅lɛ̍ wa̍ dīōla̍ŋ āā Cha̍ā, fūlāa̍ o̍ yu̍ŋgu̍ Mānāa̍sē wo̍ chōo̍, sɔ̄ndɔ̄kɔ̍ltā ndu̍ o̍o̍ nɔ̍ o̍ būŋgɛ̄ī Ki̍li̍a̍a̍dīve̍ ni᷄ŋ nda̍ŋ ki̍nɛ̍i̍, Bɛ̍ŋgi̍bā o̍ bā bɛ̄ŋgu̍ la̍ wa̍ ni̍. Ndu̍ ko̍ni̍ wa̍ vɛ̄lɛ̄ māsāa̍ le̍ būŋgɛ̄ī A̍ko̍bīve̍ kpo̍u̍ o̍ lɛ̄ŋndē Ba̍a̍sīāŋnde̍ŋ ni᷄ŋ ni̍. Chi̍e̍e̍ŋ bɛ̍ndūŋ o̍ wa̍ chōo̍ o̍ būŋgɛ̄ī kēŋ ni᷄ŋ ndo̍ŋ ŋ̄ wa̍ kpo̍u̍ kpo̍u̍ chi̍o̍o̍ŋ be̍le̍-ŋɔ̍mpu᷅m. Ndu̍yɛ̍ chi̍e̍e̍ŋ mu̍ŋ kpo̍u̍ ŋ̄ wa̍ ŋ̄ bālāā a̍ sāāsāla̍ bɛ̍ndūla̍ŋ kpɔ̍kɔ̍su̍ a̍ dīōlā ŋ̄chīli̍ŋnda̍ bɛ̍ndūlā nda̍ tōōsi̍a̍a̍ a̍ chīli̍ŋu̍ŋ būlɔ̍ŋsīi̍yo̍ŋ ndo̍ŋ o̍ sōndōla̍ŋ.

¹⁴Āhi̍na̍da̍bī, po̍ A̍i̍dū wo̍ ndu̍ wa̍ māsāa̍ le̍ būŋgɛ̄ī Ma̍ha̍nēmnde̍ ki̍nɛ̍i̍ ni̍.

¹⁵Āhi̍ma̍a̍sī, ndu̍ wa̍ māsāa̍ le̍ būŋgɛ̄ī Nāfi̍ta̍līīve̍ ki̍nɛ̍i̍ ni̍. Bāsīma̍tī, chūa̍ Sɔ̍lɔ̍mɔ̄ŋ ndo̍, ndu̍ wa̍ la̍nɔ̍ɔ̍ Āhi̍ma̍a̍sī ni̍.

¹⁶Ba̍nā po̍ Hu̍sāī wo̍, ndu̍ wa̍ māsāa̍ le̍ būŋgɛ̄ī A̍sīɛ̄ɛ̄ve̍, a̍ chi̍e̍e̍ nda̍ vēēlū āā Bi̍a̍lɔ̍ti̍ wo̍ ni̍.

¹⁷Māsā tɔ̍ ndɔ̄ɔ̍ wa̍ Chɛ̄hōsi̍a̍fa̍tī po̍ Pa̍lūā wo̍ ni̍. Būŋgɛ̄ī I̍sa̍a̍kāve̍ ki̍nɛ̍i̍ ndu̍ wa̍ māsāa̍ lo̍ŋ ni̍.

¹⁸Māsāa̍ pīlɔ̍ɔ̍ dīōla̍ŋ āā Si̍mɛ̄ī, po̍ Ɛ̍lā wo̍. Ndu̍ wa̍ māsāa̍ le̍ būŋgɛ̄ī Bɛ̍ŋnja̍mīŋnde̍ ki̍nɛ̍i̍ ni̍.

¹⁹Māsāa̍ pīlɔ̍ɔ̍ dīōla̍ŋ āā Ɛ̄sīɔ̄ŋkɛ̍bɛ̄, fi̍nyā ndɔ̍ dīōla̍ŋ āā Yu̍lūī. Ndu̍ ndu̍ būŋgɛ̄ī o̍ wa̍ māsāa̍ chōo̍ ve̍, ndi̍ wa̍ būŋgɛ̄ī Ki̍li̍a̍a̍dīve̍ ki̍nɛ̍i̍ ni̍. Si̍hɔ̄ŋ, o̍ wa̍ māsa̍ A̍mɔ̍lu̍a̍i̍tīi̍ya̍ wo̍, a̍ Ɔ̍kū o̍ wa̍ Ba̍a̍sīāŋ ndo̍, būŋgɛ̄ī nda̍ wa̍ pāāndū māsāa̍ chōo̍ ve̍ ndi̍ wa̍ he̍ī ni̍. O̍ ko̍ŋ kɔ̍ɔ̍lī, mi̍ Māsā Bɛ̍ndōo̍ Sɔ̍lɔ̍mɔ̄ŋ o̍ chu̍ā vɛ̄lɛ̄ wāŋndo̍ mbo̍ kɛ̄sī ndu̍ būŋgɛ̄ī Chu̍dā ve̍ kpo̍u̍ bo᷅lle̍ŋ.

²⁰O̍ māsāle̍ Māsāa̍ Sɔ̍lɔ̍mɔ̄ŋnde̍ŋ bɛ̄ŋgu̍, wāŋndā chīe̍e̍ya̍ wa̍ Chu̍dā a̍ I̍sɔ̄lūɛ̄ī ha̍a̍a̍ nda̍ a̍a̍ chu̍ū chɔ᷅m te̍. Mɛ̄ɛ̍ si̍o̍ōŋnde̍ ī wā nu̍a̍ā o̍ Pēe̍ Mɛ̄ŋmā Īhɛ᷄llo̍ kɔ̄ŋgɔ̍ yɛ̍, le̍nde̍ nda̍ wa̍ ni̍. Ndu̍yɛ̍ wānā o̍ wānā wa̍ŋnu̍ŋ a̍ kɔ̄l nyūlū, ma̍ wā di̍o̍la̍ nda̍ a̍ kōlɔ̄ɔ̄lā ndā.

²¹Lɛ̄ŋnde̍ ho̍lnu̍ŋ pe̍ē bɛ̍ndōo̍ Yūfi̍lu̍a̍tīī le̍ŋ ki̍nɛ̍i̍, mbo̍ kūā a̍ lɛ̄ŋndē Fīli̍i̍tīāŋnde̍ŋ, mbo̍ kɔ̍ pi̍la̍ŋ o̍ pɛ̄ŋgu̍la̍ŋ a̍ lɛ̄ŋndē I̍chi̍pīle̍ŋ, lo̍ŋ kpo̍u̍, Sɔ̍lɔ̍mɔ̄ŋ o̍ bā bɛ̄ŋgu̍ o̍ wa̍ ni̍, a̍ māsɛ̄i̍ ndɛ̍i̍ lātūlu̍. Ndu̍yɛ̍, lɛ̄ŋīī nda̍ sālu̍ bɛ̍ɛ̍ pɛ̍ŋgu̍la̍ŋ nde̍, Māsāa̍ Sɔ̍lɔ̍mɔ̄ŋ o̍ bā ndi̍ i̍i̍ ma᷅l pa̍a̍wāla̍ŋ ni̍. Nda̍ kpo̍u̍ Sɔ̍lɔ̍mɔ̄ŋ o̍ bā bɛ̄ŋgu̍ nda̍ wa̍ ni̍. Ā lo̍ ndu̍ o̍ bā bɛ̄ŋgu̍ ha̍a̍a̍ a̍ mɛ̄ɛ̄lu̍la̍ yōōmū ndɔ̄ɔ̍.

²²Lēpāa̍ o̍ lēpāa̍, nyɛ̄ Māsā Bɛ̍ndōo̍ Sɔ̍lɔ̍mɔ̄ŋ nda̍ wānāā ndūa̍a̍ o̍ ndu̍ lo̍ chi̍ɛ̍ī ni̍ŋ nda̍ a̍a̍ di̍ā wo̍ ndu̍ wa̍ ho̍ō ni̍. Nda̍ a̍a̍ di̍ā na̍u̍vāā chēlu̍lɛ̍i̍ya̍a̍ kɛ̍ndɛ̄ kɛ̍ndīāā nda̍ māndā chi̍e̍e̍ wa̍ tɔ̍, a̍ nāūwāā nda̍ māndā yo̍ndōo̍ ni᷄ŋ nda̍ bi̍di̍i̍ŋ, a̍ sāa̍ kɛ̄mɛ̄, a̍ kōlo̍ nda̍ tōōsīāā bēe̍dīi̍yo̍ wo̍ bu̍sɛ̄la̍ŋ kɛ̄mɛ̄ a̍ be̍le̍-ŋu̍ɛ̍ɛ̍nu̍, a̍ kōlō yɔ̍ŋāā pūm bu̍sɛ̄la̍ŋ kɛ̄mɔ̄ɔ̍ le̍ yāa̍, a̍ kīa̍la̍a̍ yɛ̍ yi̍a̍a̍, ā lāāndūa̍a̍ a̍ ā pīāāndūa̍a̍, a̍ kīa̍la̍a̍ yɛ̍ yi̍a̍a̍ che᷅le̍ŋ, o̍ ko̍ŋ kɔ̍ɔ̍lī, a̍ sūūwa̍, a̍ yōūwāā yɛ̍ yi̍a̍a̍ che᷅le̍ŋ.

²³

²⁴Ndu̍yɛ̍ lɛ̄ŋnde̍ ho̍lnu̍ŋ pe̍ē bɛ̍ndōo̍ Yūfi̍lu̍a̍tīī bā pāa̍le̍ŋ lē dēllo̍ le̍ŋ ki̍nɛ̍i̍, chɔ̍ŋ Ti̍fi̍sāā chi̍e̍e̍, o̍ Pīo̍o̍ Yūfi̍lu̍a̍tīī i̍kɛ̍i̍, mbo̍ tūūsū a̍ Ka̍a̍sā, Māsāa̍ Sɔ̍lɔ̍mɔ̄ŋ o̍ bā bɛ̄ŋgu̍ le̍ wa̍ ni̍. Māsāa̍ wa̍ o̍ lɛ̄ŋndē lēŋ ni᷄ŋ nda̍ ki̍nɛ̍i̍, Sɔ̍lɔ̍mɔ̄ŋ o̍ bā bɛ̄ŋgu̍ nda̍ wa̍ ni̍. Ndu̍yɛ̍ mi̍ Māsā Bɛ̍ndōo̍ Sɔ̍lɔ̍mɔ̄ŋ to̍sā mi̍ kɔ̄l nyūlōo̍ wā I̍sɔ̄lūɛ̍i̍ya̍ tɛ̄ɛ̄ŋ nda̍ lɛ̄ŋīi̍ ba̍lu̍ nda̍ ve̍.

²⁵Chɔ̍ŋ a̍ bōōndi̍i̍ o̍ si̍mnu᷄ŋ ma̍sāa̍ ve̍, ha̍a̍a̍ a̍ mɛ̄ɛ̄lu̍la̍ yōōmū ndɔ̄ɔ̍, kɔ̄l nyūlōo̍ wa̍ Chu̍dā a̍ I̍sɔ̄lūɛ̄ī. Chɔ᷄ŋ a̍ Da᷅ŋ chi̍e̍e̍ bā lūāŋndo̍ mbo̍ kūā a̍ Bāāsi̍ɛ̍bā, bā tōūwo̍. Wānā o̍ wānā wa̍ Chu̍dā a̍ I̍sɔ̄lūɛ̄ī, le̍ te̍le̍ŋ o̍ te̍le̍ŋ ā wānu̍ŋ o̍ kɔ̄l nyūlū bɛ̄ndōo̍ ni᷄ŋ, o̍ bā ndāa̍ chōo̍ nyɛ̄ o̍ nyɛ̄ ndu̍ o̍o̍ yɔ̍nūŋ nda̍ le̍. Wānā o̍ wānā wa̍ŋnu̍ŋ o̍ kpe̍le̍ ndɔ̍ īyɔ̄mndo̍ ni᷄ŋ a̍ kɔ̄llo̍ ō nyūlū vi̍li̍.

²⁶Māsā Bɛ̍ndōo̍ Sɔ̍lɔ̍mɔ̄ŋ su̍a̍ā ndūa̍a̍ nda̍ a̍a̍ na᷅ŋ nyɛ̍lā nyāāna᷄ŋda̍ŋ nda̍, fo̍ndāŋndā nda̍ a̍a̍ lɔ᷅l le̍ni᷄ŋ nda̍ŋ, lā wa̍ wāa̍la̍ŋ be̍le̍-hi̍ɔ̍ɔ̍lu̍ (40,000), a̍ su̍a̍ā pūa̍a̍ chɔ̄ūwa̍ nda̍ a̍a̍ sɔ̍ŋgā cho̍o̍ wa̍ wāa̍la̍ŋ tɔ̍ a̍ lā tīɔ̍ɔ̍ŋ (12,000).

²⁷Māsāa̍ Sɔ̍lɔ̍mɔ̄ŋ ni̍, a̍ wānā o̍ wāna̍ ndu̍ o̍o̍ di̍ā nyɛ̍ dīa̍a̍ o̍ ndu̍ lo̍ chi̍ɛ̍ī ni̍ŋ, nyɛ̄ dīāā nda̍ a̍a̍ di̍ā le̍pa̍a̍ o̍ le̍pāa̍ wo̍ māsāā tɔ̍ a̍ ā ŋīɔ̍ɔ̍ŋāā Sɔ̍lɔ̍mɔ̄ŋ kɛ̍si̍ lɛ̄ŋnde̍ŋ bōlle̍ŋ nda̍, nda̍ nda̍ a̍a̍ yɔ̍ŋgū nyɛ̍ dīa̍a̍ ho̍ō ni̍. Māsā o̍ māsā ndu̍ o̍o̍ yɔ̍ŋgū nyɛ̍ dīa̍a̍ ho̍ō le̍ pāŋge̍i̍ ī pīlɛ̍ o̍ wɔ̄sīo̍o̍ ni᷄ŋ, ndu̍yɛ̍ ndu̍ o̍o̍ be̍ŋgā le̍.

²⁸Su̍a̍ā chɔ̄ūwāa̍ Māsā Bɛ̍ndōo̍ Sɔ̍lɔ̍mɔ̄ŋ nda̍ ni̍, su̍a̍ā ndūāā yɔ̍ŋāa̍ ni̍, ba̍a̍līi̍ŋ su̍a̍ā kāŋ nda̍ a̍a̍ di̍ā wo̍ŋ, a̍ bīl nda̍ a̍a̍ hi̍nī cho̍o̍ wo̍, māsāa̍ ha̍ā ko̍ni̍ nda̍ a̍a̍ yɔ̍ŋgū ba̍a̍līi̍ŋ mu̍ŋ a̍ bīl kōŋ ni̍. Māsā o̍ māsā tē te̍le̍ŋ ndɔ̍ o̍ nɔ̍ le̍ nyɔ̄ɔ̍ŋ mu᷅ŋ yɔ̄ŋgōo̍ wo̍ ō fūūlu̍u̍ pɛ̍, nāa̍ nda̍a̍ ye̍e̍mā mu̍ŋ nda̍ lo̍ŋ ndu̍ o̍o̍ ku̍ā a̍ mu̍ŋ ni̍.

²⁹Mi̍ Mɛ̄lɛ̄ka̍ kē Sɔ̍lɔ̍mɔ̄ŋ kɔ̄l kālo̍o̍ a̍ sīnā pɛ̄ŋgo̍o̍ ta̍u̍ ta̍u̍. Kɔ̄l kālu̍ Māsāa̍ Sɔ̍lɔ̍mɔ̄ŋ ndu̍ o̍o̍ nɔ̍ wo̍ wānā o̍ wānā ndu̍ o̍o̍ nɔ̍ kɔ̍l kālu̍ wa̍ā le̍nde̍ le̍, ō wa̍ ō bɔ̄ɔ̍ bɔ̍ɔ̍. Tē ndu̍ o̍o̍ wa̍ nyɛ̄ tūwāā pɛ̍, kɔ̄l kālu̍ ndɔ̄ɔ̍ ndu̍ o̍o̍ wa᷅ mɛ̄ɛ̍ si̍o̍ōŋnde̍ ī wā nu̍a̍ā o̍ Pēe̍ Mɛ̄ŋmā Īhɛ᷄llo̍ kɔ̄ŋgɔ̍ yɛ̍.

³⁰Wānāā kɔ̄l kālu̍a̍a̍ bɛ̍ndūa̍a̍ wa̍ bā pāa̍le̍ŋ lē chāŋndo̍ wa̍ ni̍, a̍ wa̍ I̍chi̍pī wa̍ ni̍, nda̍ kpo̍u̍ Māsāa̍ Sɔ̍lɔ̍mɔ̄ŋ ndu̍ o̍o̍ nɔ̍ kɔ̄l kālo̍o̍ ndu̍ o̍o̍ hi̍o̍ū nda̍.

³¹O̍ chi̍e̍ēŋndo̍ ni᷄ŋ ki̍nɛ̍i̍ wānā o̍ wānā ndu̍ o̍o̍ si̍i̍ma᷅ŋ kɔ̍l kālo̍o̍ a̍ Māsāa̍ Sɔ̍lɔ̍mɔ̄ŋ te̍. Sɔ̍lɔ̍mɔ̄ŋ ndu̍ o̍o̍ nɔ̍ kɔ̄l kālo̍o̍ ndu̍ o̍o̍ hi̍o̍ū E̍tāŋ Ɛ̄sīlūāha̍i̍tīi̍nɔ̍, ō ndu̍ o̍o̍ ke̍la̍ tɔ̍ɔ̍ le̍ kɔ̄l kālo̍o̍ wo̍. Māsā Bɛ̍ndōo̍ Sɔ̍lɔ̍mɔ̄ŋ ndu̍ o̍o̍ nɔ̍ kɔ̄l kālo̍o̍ ndu̍ o̍o̍ hi̍o̍ū bɛ̍ɛ̍ pu̍a̍a̍ Ma̍hɔ̄ɔ̄ wa̍, Hɛ̍māŋ a̍ Ka̍a̍kōl, a̍ Da̍a̍dā. Mi̍ tɔ̍ɔ̍ Sɔ̍lɔ̍mɔ̄ŋ ndo̍ ō tīū lɛ̄ŋīi̍ ba̍lu̍ nda̍ ve̍ kpo̍u̍ a̍ kɔ̄l kālu̍ ndɔ̄ɔ̍ o̍kɔ̄ɔ̍.

³²Sɔ̍lɔ̍mɔ̄ŋ tōōsīāā tāle̍la̍ŋ kpo̍u̍ kpo̍u̍ wāa̍la̍ŋ lā yāa̍ (3,000), o̍ ko̍ŋ kɔ̍ɔ̍lī mbo̍ tōōsīāā chōndo̍ŋ wāa̍ ō pīlɛ̍ a̍ ŋ̄ ŋūɛ̍ɛ̍nu̍ (1,005).

³³Ndu̍yɛ̍ ndu̍ o̍o̍ si̍nā a̍ sɔ̄ɔ̍ŋ bɔ̍ɔ̍ bɔ̍ɔ̍ o̍kɔ̄ɔ̄. Mbo̍ sūāā a̍ vīsīa̍a̍ yōndōo̍ ni᷄ŋ o̍kɔ̄ɔ̄, mbo̍ sūāā a̍ yōūwa̍, mbo̍ sūāā a̍ vīsīa̍a̍ nɔ̍ kɛ̄kɛ̍u̍la̍ŋ nda̍, o̍ ko̍ŋ kɔ̍ɔ̍lī, mbo̍ su̍a̍ā a̍ sūūwa̍ o̍ pēēlo̍. Mbo̍ sūāā a̍ yɔ̄mnde̍ yōndōo̍ ni᷄ŋ o̍kɔ̄ɔ̄, chɔ̍ŋ a̍ yɔ̄mīī si̍dāāve̍ Le̍ba̍nɔ̄ŋ mbo̍ kūā a̍ yɔ̄mīī ha̍sɔ̍pī pɔ̄mbūɛ̍i̍ wu᷅l nu̍a̍ā o̍ chīyīī chīɛ̄īyo̍ ve̍.

³⁴Mi̍ tɔ̍ɔ̍ ndɔ̄ɔ̍ tīū o̍ lɛ̄ŋnde̍ ni᷄ŋ kpo̍u̍. Māsāā bɛ̍ndūa̍a̍ o̍ lɛ̄ŋnde̍ ni᷄ŋ, wānāā ndāa̍ vīōmɔ̄ɔ̍ mā hūŋ le̍ Sɔ̍lɔ̍mɔ̄ŋ nīla̍ŋ yāŋɔ̄ɔ̍.