Read Southern Kisi Māsāā Bɛ̍ndūāā Tāsi̍a̍a̍ 5 Bible Online

Māsāā Bɛ̍ndūāā Tāsi̍a̍a̍ 5 - Southern Kisi bible

Māsāā Bɛ̍ndūāā Tāsi̍a̍a̍ 5

¹Māsā pi᷅lɛ̍ wa̍ o̍ lɛ̄ŋndē Ta̍a̍yāle̍ŋ ni᷄ŋ dīōla̍ŋ āā Hi̍lūām, nāāŋa᷅ŋndo̍ pīla̍ nda̍ a̍a̍ na̍a̍ŋa᷅ŋ nda̍ Dēēve̍ fi̍nyāa̍ Sɔ̍lɔ̍mɔ̄ŋ ni̍. Mɛ̄ɛ̍ māsāa̍ ho̍ō tūēī māā Sɔ̍lɔ̍mɔ̄ŋ mi̍i̍ŋgu̍ māsāa̍ o̍ fōōfo̍ Dēēve̍ fi̍nyā ndɔ̄ wo̍ ni̍, mbo̍ vīām bu̍ɛ̍i̍yāā ndūa̍a̍ le̍ mā kɔ̍ yi᷅l Sɔ̍lɔ̍mɔ̄ŋ.

²O̍ ko̍ŋ, mi̍ Sɔ̍lɔ̍mɔ̄ŋ yɔ᷅ŋ Māsā Bɛ̍ndōo̍ Hi̍lūām dīōmnde̍ŋ, mbo̍ dīmūl ndu̍ āā,

³“A̍ bōōndi̍i̍ Dēēve̍ fi̍nyā nī o̍ wa̍ māsāa̍ lɛ̄ŋnde̍ŋ chōo̍ ve̍, nūm pi̍la̍ si̍nā māā ndu̍ o̍o̍ nɔ̍ yēēmɛ̍i̍ ta̍u̍ le̍ chīɛ̄īyo̍ tāŋgūllo̍ le̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ ndɔ̍ ndu̍ o̍o̍ pi̍ɛ̍īyo̍. Kɛ̍ ō sɔ̄la̍ fo̍ndā kōŋ te̍, kāni̍ fo̍ndōle̍ ō wa̍ sɔ̍ŋgɔ̄ɔ̍ a̍ ya̍a̍mɔ̍ɔ̍wa̍a̍ wa̍ ndu̍ ā bālāā wa̍. Ndu̍yɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ ke᷅ ndu̍ kpāāyāa̍ mbo̍ yām ya̍a̍mɔ̍ɔ̍wa̍a̍ ndūāā ka̍ŋ kpo̍u̍.

⁴Kɛ̍ su̍ŋ su̍ŋ ni᷅ŋ, I̍ nɔ̍ lɛ̍ ya̍a̍mɔ̍ɔ̍nɔ̍ o̍ ya̍a̍mɔ̍ɔ̍nɔ̍ si̍mu̍l la̍ le̍. Mɛ̄lɛ̄ka̍ Ya̍a̍wɛ̄ɛ̄, ō ya̍ I̍ pi̍ɛ̍īyo̍ ō tōsa̍ mi̍ lɛ̄ŋnde̍ŋ lē pɛ̄ŋgī a̍ sɔ̍ŋgɔ̄ɔ̍. Wānā o̍ wānā o̍ cho̍ŋnu̍ŋ ni᷅ŋ a̍ kɔ̄l nyūlū, mbo̍ wānu᷄ŋ o̍ bā ndɔ̄ɔ̍ chōo̍.

⁵Bōōndi̍i̍ Dēēve̍ fi̍nyā nī o̍ wa̍ yōōmū ve̍, mi̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nūu̍ o̍ di̍mūl ndu̍ āā, ‘Dēēve̍, ō cho̍ nūm te̍ cho̍ ya̍ chīɛ̄ī tēŋgūl te̍, po̍ nu̍m ya̍ I̍ cho̍ hūnɔ̄ɔ̍ sīīŋgūū māsāa̍ o̍ fōōfō nu̍mndo̍ wo̍, ndu̍ cho̍ ya̍ hūnɔ̄ɔ̄ chīɛ̄īyo̍ tēŋgūl ni̍.’ Le̍la̍ŋ mɛ̄ɛ̄ ya̍ Sɔ̍lɔ̍mɔ̄ŋ I̍ si̍mnu᷄ŋ ni᷅ŋ māsā yɛ̍, I̍ kɛ̍ɛ̍si̍a̍a̍ le̍ mī te̍ŋgu̍l Mɛ̄lɛ̄ka̍ Ya̍a̍wɛ̄ɛ̍ nūu̍ chīɛ̄īyo̍ le̍ ndu̍ sōōlūūwo̍ lēni᷄ŋ.

⁶Le̍la̍ŋ, I̍ ye̍e̍ma̍ mā di̍mu̍l la̍ pūa̍a̍ nu̍mnda̍ mā kīlu̍l la̍ yɔ̄mīī si̍dāāve̍ Le̍ba̍nɔ̄ŋ. Nyɛ̄ o̍ nyɛ̄ nda̍ vēēlu̍ ya̍ chōo̍ pɛ̍, I̍ nɔ̍lā mī pa̍a̍wa̍ nda̍. Ya̍ pi̍la̍ bɛ̍ɛ̍ I̍ cho̍ pūa̍a̍ nīa̍a̍ yɔ̄ŋ ā ti᷄ŋ mā kɔ̍ wa᷅ wa̍llo̍ nda̍ nda̍ā lātūlu̍. Kɛ̍ nūm pi̍la̍ si̍nā māā wānā o̍ wānā chi̍e̍ē yɔ̍mīī kēŋ kīōlɔ̄ɔ̍ māā pūa̍a̍ nūmnda̍ Sa̍i̍dɔ̄ŋ lo̍ŋ te̍.”

⁷Mɛ̄ɛ̍ Māsā Bɛ̍ndōo̍ Hi̍lūām o̍ tu̍e̍ī yōōŋgōo̍ ho̍ō, mbo̍ nāŋ kɔ̄l ta̍u̍ ta̍u̍. Mbo̍ dīmī āā, “Sāŋgālāa̍ chō o̍ Mɛ̄lɛ̄ka̍ Ya̍a̍wɛ̄ɛ̄ lo̍. Mɛ̄lɛ̄ka̍ ke̍ Dēēve̍ chūā kɔ̄l kālu̍ bɛ̍ndu̍ mbo̍ mīīŋgū māsāa̍ lɛ̄ŋndē bɛ̄ndūle̍ŋ nde᷅ŋ chōo̍ o̍ fōōfo̍ ndɔ̄ɔ̍.”

⁸Mi̍ Māsāa̍ Hi̍lūām lo᷅ o̍ ko̍ŋ mbo̍ mīŋgūl Sɔ̍lɔ̍mɔ̄ŋ dīōmnde̍ŋ, mbo̍ dīmūl ndu̍ āā, “I̍ tu̍e̍ī yōōŋgū ŋ̄ yɔ᷄ŋ ndo̍. Tē ō wa̍ le̍ yɔ̄mīī tāŋgūlɛ̄i̍ pɛ̍, bu̍u̍la᷄ŋ te̍. Yɔ̄mīī si̍dāā ŋ̄ yēēma̍ ve̍ a̍ yɔ̄mīī pa᷅ŋnde̍ kpo̍u̍, I̍ cho̍ nu̍m ke̍.

⁹I̍ cho̍ wānāā nīa̍a̍ wa̍lla̍ dīmūl mā kīlu̍l nu̍m yɔ̄mīī tāŋgūlɛ̄i̍ Le̍ba̍nɔ̄ŋ mā tūsi̍ ndi̍ o̍ Pēe̍ Mɛ̄ŋmā Īhɛ᷄llo̍ kɔ̄ŋgɔ̍. Tē ā tūsi̍ ndi̍ lo̍ŋ pɛ̍, ā yīu̍ ndi̍ a̍ ku̍ndāla̍ŋ ā kūɛ̄ a̍ ndi̍ o̍ mɛ̄ŋnda̍ŋ chōo̍, ā kɔ̍ tu̍sī ndi̍ nāa̍ ŋ̄ yēēmā mā tūsi̍ ndi̍ wa̍. Tē ā tūsi̍ pɛ̍, ā tīīmbu̍u̍, pūa̍a̍ nu̍m ā wa̍lla̍ hu᷄ŋ chu̍ā a̍ kūɛ̄ a̍ ndi̍. Kɛ̍ nūm bɛ̍ɛ̍ nyɛ̄ ya̍ I̍ ye̍e̍ma̍ mā to̍sa̍l la̍ wo̍ cho̍ ho̍ō ni̍, I̍ ye̍e̍ma̍ mī nūm wa̍ ya̍ nyɛ̄ dīa̍a̍ kīo̍o̍ le̍ wānāā nīa̍a̍ o̍ ya̍lo̍ chi̍ɛ̍ī ni᷄ŋ.”

¹⁰O̍ ko̍ŋ, mi̍ Māsāa̍ Hi̍lūām o̍ ke᷅ Māsāa̍ Sɔ̍lɔ̍mɔ̄ŋ yɔ̄mīī tāŋgūlāā ndu̍ o̍o̍ ye̍e̍ma̍ ve̍, yɔ̄mīī si̍dāāve̍ a̍ yɔ̄mīī pa᷅ŋnde̍.

¹¹O̍ ko̍ŋ kɔ̍ɔ̍lī, mi̍ Sɔ̍lɔ̍mɔ̄ŋ ndu̍ wa᷅ ndu̍ nyɛ̄ dīa̍a̍ kīo̍o̍. Īwɔ̄sī o̍ īwɔ̄sī Sɔ̍lɔ̍mɔ̄ŋ ndu̍ o̍o̍ ke᷅ ndu̍ wi̍tīi̍yo̍ŋ bu̍sɛ̄la̍ŋ wāa̍la̍ŋ kɛ̄mɛ̄ (100,000) a̍ chūɛ̄īmā ɔ̄li̍fīi̍ya̍ŋ ka̍lɔ̄ŋnda̍ŋ wāa̍la̍ŋ kɛ̍mɛ̄ a̍ tɔ̍ (110,000).

¹²Ndu̍yɛ̍ būŋgɛ̄ī Mɛ̄lɛ̄ka̍ Ya̍a̍wɛ̄ɛ̄ o̍ chu̍e̍l Sɔ̍lɔ̍mɔ̄ŋ nde̍, mi̍ Mɛ̄lɛ̄ka̍ pēēlū būŋgɛ̄ī kēŋ, mbo̍ kē Sɔ̍lɔ̍mɔ̄ŋ kɔ̄l kālo̍o̍ ta̍u̍ ta̍u̍. Sɔ̍lɔ̍mɔ̄ŋ ni̍, Māsāa̍ Hi̍lūām ni̍, ma̍ tōsā chɛ̄la᷅ŋ kɔ̄l nyūlōo̍ nda̍ pi̍la̍ tɛ̄ɛ̄ŋ.

¹³Mi̍ Sɔ̍lɔ̍mɔ̄ŋ yɔ̍ŋgū dīōmnde̍ŋ lē kālā ka̍lā māā ā sōli̍ pūa̍a̍ wa̍a̍la̍ŋ be̍le̍-ya̍a̍ I̍sɔ̄lūɛ̍i̍ya̍ tɛ̄ɛ̄ŋ le̍ wa̍li̍ yɔ̄mīī kēŋ.

¹⁴O̍ ko̍ŋ kɔ̍ɔ̍lī, mbo̍ chūā po̍ pi᷅lɛ̍ dīōla̍ŋ āā A̍do̍ni̍lūām, mbo̍ hāndū ndu̍ pūa̍a̍ nda̍ hɛ̄li̍ wa̍ kpo̍u̍ bo᷅lle̍ŋ. Mi̍ Sɔ̍lɔ̍mɔ̄ŋ pi̍ɔ̍ū pūa̍a̍ wa̍a̍la̍ be̍le̍-ya̍a̍wa̍ ha̍ā tɛ̄ɛ̄ŋ ku̍ndāla̍ŋ lā yāa̍, ku̍ndā o̍ ku̍ndā wāa̍la̍ŋ tɔ̍ (10,000). Īpāŋgu̍ o̍ īpāŋgu̍, ku̍ndālā yāa̍la̍ŋ nda᷅ŋ ō pīlɛ̍ ndu̍ o̍o̍ ku̍ā Le̍ba̍nɔ̄ŋ le̍ wa̍li̍ yɔ̄mīī kēŋ ni̍. Ku̍nda̍ ku̍ā ko̍ nda̍ kɔ̍ chi̍ī pāŋge̍i̍ ī pīlɛ̍ pɛ̍ ā mīīŋgu̍, ā hu᷄ŋ pɛ̍ŋgī le̍ pāŋgo̍ŋ ŋ̄ mūu̍ŋ.

¹⁵O̍ ko̍ŋ kɔ̍ɔ̍lī, mi̍ Sɔ̍lɔ̍mɔ̄ŋ hɛ̍lī wānāā wa̍li̍a̍a̍ chēle̍ŋ wāa̍la̍ŋ be̍le̍-ŋɔ̍ma̍a̍ (80,000) mbo̍ yɔ̄ŋ nda̍ o̍ lɛ̄ŋndē īpēmbūle̍ŋ, le̍ wa̍llo̍ a̍ pōūtā tāŋgūlāā la̍ŋ. Mbo̍ hɛ̄lī vɛ̄lɛ̄ pūa̍a̍ wāa̍la̍ŋ be̍le̍-ŋɔ̍mmɛ̍ū (70,000) mi̍ nda̍ wā le̍ pōūtā nda̍ wa̍ la̍ŋ bɛ̍ɛ̍ndīa̍a̍ la̍ŋ vīlīo̍o̍.

¹⁶O̍ ko̍ŋ kɔ̍ɔ̍lī mbo̍ hɛ̄lī vɛ̄lɛ̄ pūa̍a̍ wāa̍la̍ŋ lā yāa̍ a̍ kɛ̄mɔ̄ɔ̍ lē yāa̍ (3,300) mbo̍ kɛ̄sī nda̍ wānāā wa̍li̍a̍a̍ ka̍ŋ kpo̍u̍ bo᷅lle̍ŋ, le̍ mā wa̍ nda̍ bālɔ̄ɔ̍ chōo̍.

¹⁷Mi̍ Sɔ̍lɔ̍mɔ̄ŋ di̍mūl wānāa̍ wa̍ ka̍ŋ po̍ūta̍ŋ kālāa̍ wa̍ le̍ mā kāla̍ pōūtā bɛ̄ndūla̍ŋ mā bɛ̄ɛ̄ndi̍a̍a̍ la̍ŋ nyɛ̄ kɛ̄ndɛ̄ kɛ̍ndɛ̄ le̍ chīyīī chīɛ̍i̍ Mɛ̄lɛ̄ka̍a̍ kīlāa̍. Ndu̍yɛ̍ mi̍ wāŋnda̍ ha̍ā bɛ̄ɛ̄ndīāā la̍ŋ mɛ̄ɛ̍ o̍ di̍mu̍l nda̍ yɛ̍.

¹⁸Māsāa̍ Hi̍lūām ni̍, wāŋnda̍ Ɛ̄sīɔ̄ŋkɛ̍bɛ̄ chi̍e̍e̍ ni̍, ma̍ kē Sɔ̍lɔ̍mɔ̄ŋ wānāā wa̍lla̍. O̍ ko̍ŋ, pūa̍a̍ tāŋgūlāa̍ Sɔ̍lɔ̍mɔ̄ŋ nda̍ ni̍, a̍ wānāā wa̍li̍a̍a̍ nda̍ ke̍ ndu̍ ka̍ŋ nda̍, ma̍ bɛ̄ɛ̄ndīāā pōūta̍ŋ a̍ yɔ̄mīī tāŋgūlɛ̄ī nyɛ̄ kɛ̄ndɛ̄ kɛ̍ndɛ̄ le̍ chīɛ̍i̍ Mɛ̄lɛ̄ka̍a̍ tāŋgūllo̍.