Read Southern Kisi Māsāā Bɛ̍ndūāā Tāsi̍a̍a̍ 7 Bible Online

Māsāā Bɛ̍ndūāā Tāsi̍a̍a̍ 7 - Southern Kisi bible

Māsāā Bɛ̍ndūāā Tāsi̍a̍a̍ 7

¹O̍ ko̍ŋ kɔ̍ɔ̍lī, mi̍ Sɔ̍lɔ̍mɔ̄ŋ o̍ tāŋgūl vɛ̄lɛ̄ fo̍ndā ndɔ̍ lēmāsāa̍. Sɔ̍lɔ̍mɔ̄ŋ o̍ chi̍i̍ wɔ̄sīla̍ŋ tɔ̍ a̍ lā yāa̍ o̍ fo̍ndāa̍ ho̍ō tāŋgūllo̍ ni᷄ŋ.

²Ndu̍yɛ̍ chīɛ̄īlā Sɔ̍lɔ̍mɔ̄ŋ o̍ ta̍ŋgu̍l o̍ fo̍ndā lēmāsāa̍ ho̍ō la̍ŋ, ō pīlɔ̍ɔ̍ ndu̍ o̍o̍ nɔ̍ dīōla̍ŋ ni̍, āā Būndɔ̍ɔ̍ Le̍ba̍nɔ̄ŋ. Bāndi̍i̍ chīɛ̄īyo̍ ho̍ō ī wa̍ le̍ nɛ̄īyo̍ kɛ̄mɛ̄ a̍ be̍le̍-ŋu̍ɛ̍ɛ̍nu̍ (150), bu̍o̍o̍ nɛ̄īyo̍ be̍le̍-ŋɔ̍mmɛ̍ū a̍ lē ŋūɛ̍ɛ̍nu̍, chīīye̍ hēlɔ̄ɔ̍ le̍ nɛ̄īyo̍ be̍le̍-hi̍ɔ̍ɔ̍lu̍ a̍ le̍ ŋūɛ̍ɛ̍nu̍. Chīɛ̄īyo̍ ho̍ō ndu̍ o̍o̍ nɔ̍ sūŋgbu̍ma̍ yɔ̄m si̍dāā wa̍ŋ pūla᷄ŋ mā hīɔ̍ɔ̍lu̍. Lēpūlā o̍ lēpūlā le̍e̍ nɔ̍ sūŋgbu̍a̍ŋ tɔ̍ a̍ mā ŋūɛ̍ɛ̍nu̍. Yɔ̄mīī si̍dāā nda̍ pɛ̄ŋgɛ̍la̍ o̍ chīɛ̄īyo̍ ho̍ō lēni᷄ŋ māā mākpo᷄ŋ le̍ ndu̍ sīdīo̍o̍ ve̍, o̍ sūŋgbu̍a̍ŋ māŋ chōo̍ i̍ wa̍ īchāli̍ ni̍. Ndu̍yɛ̍ yɔ̄mīī nda̍ pɛ̄ŋgɛ̍la̍ he̍ī ve̍, ī wa̍ be̍le̍-hi̍ɔ̍ɔ̍lu̍ a̍ ī ŋūɛ̍ɛ̍nu̍. Ndu̍yɛ̍ chīɛ̄īyo̍ ho̍ō lēni᷄ŋ kpo̍u̍, a̍ pɛ̄ŋgɔ̍ŋ yɔ̄m si̍dāā wo̍ŋ o̍ wa̍ ō sīdīāā ni̍. Mɛ̄ɛ̍ nda̍ pɛ̄ŋgɛ̍la̍ yɔ̄mīī kēŋ māā mākpo᷄ŋ, ma̍ hɛ̄ɛ̄ndūū ni̍ko̍ pɛ̍ŋgɔ̍ŋ mu̍ŋ o̍ yɔ̄mīī kēŋ chōo̍.

⁴Chīɛ̄īyo̍ ho̍ō ndu̍ o̍o̍ nɔ̍ wu̍ndɛ̄i̍la̍ŋ pūla᷄ŋ mā yāa̍ o̍ kpēŋgo᷄ŋ, ma᷅ŋ mā wa̍ ba̍ā, mi̍ ma᷅ŋ mā wa̍ ba̍ā, mi̍ lā mūlu̍la᷅ŋ hɔ᷅lla̍ vēlāa̍ vēllē.

⁵Ndu̍yɛ̍ chīɛ̄īyo̍ ho̍ō lāchī ndu̍ o̍o̍ nɔ̍ dīōla̍ŋ o̍ kpēŋgu᷄ŋ ndɔ᷄ŋ vēllāa̍ vēllē, kpēŋgēi̍ he̍ī dīōla̍ŋ lā yāa̍, kpēŋgēi̍ he̍ī di̍ōla̍ŋ lā yāa̍.

⁶Tāŋgūltā Sɔ̍lɔ̍mɔ̄ŋ o̍ ta̍ŋgu̍l o̍ fo̍ndā lēmāsāa̍ ho̍ō la̍ŋ, ō pīlɔ̍ɔ̍ ndu̍ o̍o̍ nɔ̍ vɛ̄lɛ̄ dīōla̍ŋ ni̍ āā, chīɛ̄ī mā sūŋgbo̍o̍. Chīɛ̄īyo̍ ho̍ō ō wa̍ bānde̍i̍ le̍ nɛ̄īyo̍ be̍le̍-ŋɔ̍mmɛ̍ū a̍ lē ŋūɛ̍ɛ̍nu̍, bu̍o̍o̍ nɛ̄īyo̍ be̍le̍-hi̍ɔ̍ɔ̍lu̍ a̍ lē ŋūɛ̍ɛ̍nu̍. Tōŋgō vi̍lɛ̄īyo̍ wa̍ o̍ chīɛ̄īyo̍ ho̍ō sōndōo̍ kpa̍la̍ŋ, chɔ̄nɔ᷄ŋndo̍ ba̍ā mbo̍ fūūlūū ba̍ā di̍, a̍ sūŋgbu̍a̍ŋ mā sīmīāā. Tōŋgōo̍ ho̍ō, yīndɔ̍ ndɔ̄ɔ̍, o̍ sūŋgbu̍a̍ŋ ma᷅ŋ chōo̍ ndu̍ o̍o̍ cha̍l ni̍.

⁷Sɔ̍lɔ̍mɔ̄ŋ ndu̍ o̍o̍ nɔ̍ nāa̍ ndu̍ o̍o̍ cha᷅l le̍ sɔ̄ɔ̍ŋ dīmīo̍o̍ wa̍ o̍ fo̍ndā ndɔ̍ lēmāsāa̍ ho̍ō. Nāa̍ ndu̍ o̍o̍ cha᷅l ha̍ā le̍ sɔ̄ɔ̍ŋ dīmīo̍o̍ wa̍, nda̍ a̍a̍ ve̍e̍lū nda̍ āā, chīɛ̄ī kpe̍ŋgbe̍i̍ lēmāsāa̍, ndu̍ ko̍ni̍ nda̍ a̍a̍ ve̍e̍lū vɛ̍lɛ̄ ni̍ āā, Tōŋgo̍ kɔ̍ɔ̍sɔ̍ɔ̍. Fo̍ndāa̍ ho̍ō, chɔ̍ŋ lɛ᷅ŋ he̍l o̍ kāa̍ di̍, mi̍ Sɔ̍lɔ̍mɔ̄ŋ o̍ kūmbū ndu̍ kpo̍u̍ a̍ yɔ̄m si̍dāā wo̍.

⁸Sɔ̍lɔ̍mɔ̄ŋ chīɛ̄ī ndɔ̍ mālɔ̄ o̍ ta̍ŋgu̍l le̍ ndu̍ pi̍la̍ wo̍, o̍ tōŋgo̍ kɔ̍ɔ̍sɔ̍ɔ̍ ho̍ō kɔ̄ɔ̄lī o̍ wa̍ ni̍. Ndu̍yɛ̍ tōŋgo̍ kɔ̍ɔ̍sɔ̍ɔ̍ ho̍ō ni̍, chīɛ̄ī ndɔ̍ mālɔ̄ɔ̍ ho̍ō ni̍, tāŋgūl pīlɔ̍ɔ̍ kpe̍ nda̍ a̍a̍ ta̍ŋgu̍l la̍ŋ ni̍. Mi̍ Sɔ̍lɔ̍mɔ̄ŋ o̍ ta̍ŋgūl vɛ̄lɛ̄ chīɛ̄ī pīlɛ̍ wāā le̍nde̍ kpe̍ le̍ la̍a̍ ndɔ̄, ndu̍ yɔ̍nu̍ŋ ni̍ māā māsāa̍ I̍chi̍pī chūā ndɔ̄ɔ̍.

⁹Tāŋgūlta̍ŋ nda᷅ŋ ni̍, kpāki̍ wa̍ ō tāŋgūlāā o̍ la̍ū bɛ̄ndōo̍ bālɔ̄ɔ̍ chɛ̍chɛ̍ wo̍ ni̍, a̍ pōūtā kɛ̄ndɛ̄ kɛ̍ndɛ̄la̍ŋ pīla̍ nda̍ tāŋgu̍l la̍ŋ kpo̍u̍ ni̍. Chɔ̍ŋ a̍ chīīyo̍ŋ lɛ̄ŋ mbo̍ he̍l nāa̍ la̍ mɛ̍ɛ̍lu̍ wa̍ di̍. Ndu̍yɛ̍ pōūta̍ŋ nda᷅ŋ nāa̍ nda̍ kāla̍ la̍ŋ nda̍, lo̍ŋ nda̍ bɛ̄ɛ̄ndi̍a̍a̍ la̍ŋ kpo̍u̍ ni̍. Mɛ̄ɛ̍ nda̍ kāla̍ la̍ŋ, ma̍ kīlī kīlī la̍ŋ mɛ̄ɛ̍ la̍ nɔ̍ le̍ wāa̍ yɛ̍, ma̍ sīāl la̍ŋ nyɛ̄ kɛ̄ndɛ̄ kpɛ̍ kpɛ̍ o̍ kpēŋgo̍ŋ vēllāa̍ vēllē a̍ su̍ɛ̍īla̍ŋ.

¹⁰Tāŋgūlta̍ŋ nda᷅ŋ chīyūŋ ndɔ᷄ŋ a̍ pōūtā bɛ̄ndūla̍ŋ pīla̍ nda̍ kīla̍ mu̍ŋ ni̍. Pōūta̍ŋ lā pūm lā wa̍ bānde̍i̍ le̍ nɛ̄īyo̍ tɔ̍ a̍ lē ŋūɛ̍ɛ̍nu̍, lā pūm bānde̍i̍ le̍ nɛ̄īyo̍ tɔ̍ a̍ lē dīi̍ŋ. Ndu̍yɛ̍ pōūta̍ŋ nda᷅ŋ pōūtā ba̍ā kālāla̍ŋ pīla̍ la̍ wa̍ ni̍.

¹¹Tāŋgūlta̍ŋ nda᷅ŋ, kāndɔ᷄ŋndo̍ a̍ chīīyo̍ŋ mu᷅ŋ, mbo̍ he̍l di̍, a̍ pōūtā kɛ̄ndɛ̄ kɛ̍ndɛ̄la̍ŋ kpo̍so̍ŋ nda̍ tāŋgu̍l la̍ŋ ni̍, o̍ ko̍ŋ kɔ̍ɔ̍lī, a̍ yɔ̄mīī si̍dāāve̍. Ndu̍yɛ̍ pōūta̍ŋ nda᷅ŋ, ō kɛ᷅ o̍ kɛ᷅, mɛ̄ɛ̍ ndu̍ o̍o̍ nɔ̍ le̍ wāa̍ yɛ̍, le̍nde̍ nda̍ bɛ̄ɛ̄ndi̍a̍a̍ ndu̍ kpo̍u̍ ni̍.

¹²La̍ū bɛ̄ndu̍ wa̍ o̍ fo̍ndā lēmāsāa̍ ho̍ō wo̍, kpāki̍ wa̍ la̍ū kōŋ ō bālāā wo̍ ndu̍ bɛ̍ɛ̍, a̍ pōūtā sīālāāla̍ŋ o̍ wa̍ ō tāŋgūlāā ni̍. Tē ā hāndu̍ pɛ̍ po̍ūta̍ŋ pūla᷄ŋ mā yāa̍, ā hāndu̍ yɔ̄mīī si̍dāāve̍ pūlāle̍ŋ lē pīlɛ̍. La̍ūwo̍ ho̍ō ni̍, la̍u̍ wa̍ ō kpāki̍ chīɛ̍i̍ Mɛ̄lɛ̄ka̍a̍ lēni᷄ŋ ndo̍ ni̍, kpākīla̍ ndāla̍ŋ tāŋgūl pīlɔ̍ɔ̍ kpe̍ nda̍ tāŋgu̍l la̍ŋ ni̍. O̍ ko̍ŋ kɔ̍ɔ̍lī, tōŋgo̍ wānā a̍a̍ ke̍ī ni̍ŋ mā lūɛ̄ī o̍ chīɛ̍i̍ Mɛ̄lɛ̄ka̍a̍ ni᷄ŋ ndo̍ bɛ̍ɛ̍, le̍nde̍ ko̍ni̍ nda̍ hēēlu̍ ndu̍ a̍ tāŋgu̍l ni̍.

¹³Po̍ pi᷅lɛ̍ wa̍ Ta̍a̍yā chi̍e̍e̍ dīōla̍ŋ āā Hu̍lūām, pōo̍ ho̍ō wānā cha̍ā nyɔ̄ɔ̍ pīla̍ o̍ wa̍ ni̍, ndu̍yɛ̍ tāāsi̍o̍o̍ pi̍la̍ ndu̍ o̍o̍ nɔ̍ ni̍. Pōo̍ ho̍ō a̍ chīli̍ŋu̍ŋ būlɔ̍ŋsīi̍yo̍ŋ ndu̍ o̍o̍ to̍sā wa̍llo̍ ni̍.[4] Ndu̍yɛ̍ pōo̍ ho̍ō fi̍nyā ndɔ̄ bɛ̍ɛ̍ wānā cha̍ā nyɔ̄ɔ̍ pīla̍ o̍ wa̍ ni̍, ndu̍ bɛ̍ɛ̍ a̍ chīli̍ŋu̍ŋ būlɔ᷄ŋsīi̍ yo̍ŋ ko̍ni̍ ndu̍ o̍o̍ to̍sā wa̍llo̍ ni̍. Ta̍a̍yā chi̍e̍e̍ pōo̍ ho̍ō fi̍nyā ndɔ̄ o̍ wa̍ ni̍, kɛ̍ fi̍nyā ndɔ̄ ve̍ lɛ̍ īchāli̍ le̍. Ka̍la̍ ndɔ̄ yɛ̍, ndu̍ o̍ yu̍ŋgu̍ Nāfi̍ta̍lī wo̍ chōo̍ ndu̍ o̍o̍ fu̍la̍ ni̍. Mi̍ Māsā Bɛ̍ndōo̍ Sɔ̍lɔ̍mɔ̄ŋ o̍ yo̍o̍ŋgū pōo̍ ho̍ō le̍ mbō hu᷄ŋ bɛ̄ɛ̄ndīāl ndu̍ chīɛ̍i̍ Mɛ̄lɛ̄ka̍a̍, ndu̍yɛ̍ mī ndu̍ o̍o̍ to̍o̍si̍a̍l ndu̍ nyɛ̄m lāāndo᷄ŋ o̍ chīɛ̍i̍ Mɛ̄lɛ̄ka̍a̍. O̍ ko̍ŋ, mi̍ pōo̍ ho̍ō ō hūŋ. Ndu̍yɛ̍ wa̍li̍ o̍ wa̍li̍ Sɔ̍lɔ̍mɔ̄ŋ ndu̍ o̍o̍ ye̍e̍ma̍ le̍ mbō tōsa̍, mbo̍ hu᷄ŋ to̍sā ndu̍ kpo̍u̍.

¹⁴

¹⁵Mi̍ Hu̍lūām o̍ to̍o̍sīāā sūŋgbu̍a̍ŋ ma̍ mi̍ɔ̍ɔ̍ŋ a̍ chīli̍ŋu̍ŋ būlɔ̍ŋsīi̍yo̍ŋ. Sūŋgbu̍a̍ŋ ma᷅ŋ lē pīlɛ̍ lē wa̍ hēlɔ̄ɔ̍ le̍ nɛ̄īyo̍ bi̍di̍i̍ŋ a̍ lē ŋɔ᷄mmɛ̍ū, chēlu̍llo̍ nɛ̄īyo̍ tɔ̍ a̍ lē ŋɔ̄ma̍a̍.

¹⁶O̍ ko̍ŋ kɔ̍ɔ̍lī, mbo̍ tēēŋgīāā chīli̍ŋi̍i̍ būlɔ̍ŋsīi̍ye̍ mbo̍ tōōsīāā nyɛ̄la̍ŋ lā tīīla᷄ŋ māā lāmɔ̍si̍l mbo̍ hāndū la̍ŋ o̍ sūŋgbu̍a̍ŋ ma᷅ŋ bōlle̍. Nyɛ̄la̍ŋ ndāŋ, ō pīlɛ̍ ō wa̍ hēlɔ̄ɔ̍ le̍ nɛ̄īyo̍ lē ŋɔ᷄mmɛ̍ū a̍ tɛ̄ndāa̍ tɛ̄ɛ̄ŋ.

¹⁷Nyɛ̄la̍ wa̍ la᷅ŋ o̍ sūŋgbu̍a̍ŋ māŋ bōlle̍ lā tīīla᷄ŋ nda̍ŋ, ō kɛ᷅ o̍ kɛ᷅ ndu̍ o̍o̍ nɔ̍ nyɔ̄ɔ̍ ō kāyā kāyāā māā ŋ̄yɔ̄lɔ̄.

¹⁸Ndu̍yɛ̍ o̍ ko̍ŋ kɔ̍ɔ̍lī, nyɛ̄la̍ wa̍ la᷅ŋ lā kāyā kāyāā o̍ nyɛ̄lā tīīlīa̍ŋnda̍ŋ nda᷅ŋ māā ŋ̄yɔ̄lɔ̄ la̍ŋ, pɔ̄mɛ̄ki̍la̍ne̍tīi̍ya̍ŋ mā wa̍ mā tūūlīāā o̍ nyɛ̄la̍ŋ nda᷅ŋ bālɔ̄ɔ̍ chɛ̍chɛ̍. Nyɛ̄la̍ wa̍ la᷅ŋ o̍ sūŋgbu̍a̍ŋ bōlle̍ māā lāmɔ̍si̍l ta̍ŋ, ō kɛ̍ o̍ kɛ̄ ndu̍ o̍o̍ nɔ̍ pɔ̄mɛ̄ki̍la̍ne̍tīi̍ya̍ŋ mā tūūlīāā pūla᷄ŋ mā mīɔ̍ɔ̍ŋ.

¹⁹Tōŋgo̍ wānā a̍a̍ ke̍ī le̍ni̍ŋ mā lūɛ̄ī o̍ chīɛ̍i̍ Mɛ̄lɛ̄ka̍a̍ ni᷄ŋ ndo̍, lo̍ŋ sūŋgbu̍ma̍ mi̍ɔ̍ɔ̍ŋ nda̍ŋ ma᷅ŋ mā wa̍ ni̍. Nyɛ̄lā tīīlīa̍ŋnda̍ wa̍ lā kɛ̄sīāā o̍ sūŋgbu̍ma̍ ma᷅ŋ bōlle̍ la̍ŋ, mɛ̄ɛ̍ nda̍ tōōsi̍a̍a̍ la̍ŋ yɛ̍, tē wānā a̍a̍ che᷅ la̍ŋ pɛ̍, to̍fa̍ wɔ̍ ko̍ mɛ̄ɛ̍ pɔ̄mbīa̍ŋ mā chūūlū nu̍a̍ā mī mā pɛ̄ɛ̄ŋga̍ yɛ̍. Nyɛ̄lā wa̍ la̍ŋ māā pɔ̄mbīma̍ pɛ̍ɛ̍ŋgāā wa̍ŋ, ō kɛ᷅ o̍ kɛ᷅ wa̍ hēlɔ̄ɔ̍ le̍ nɛ̄īyo̍ lē ŋɔ᷄mpu᷅m.

²⁰Nyɛ̄la̍ŋ nda᷅ŋ, ō kɛ᷅ o̍ kɛ᷅ ndu̍ o̍o̍ nɔ̍ nyɔ̄ɔ̍ lēbɛ̄ŋgu̍ māā ŋ̄yɔ̄lɔ̄ ō bālāā lēbɛ̄ŋgu̍ chɛ̍chɛ̍. Ndu̍yɛ̍ o̍ ko̍ŋ kɔ̍ɔ̍lī, nyɛ̄la̍ŋ nda᷅ŋ ō kɛ᷅ o̍ kɛ᷅ ndu̍ o̍o̍ nɔ̍ vɛ̄lɛ̄ pɔ̄mɛ̄ki̍la̍ne̍tīi̍ya̍ŋ mā tūūlāā lo̍ŋ kɛ̄mɔ̄ɔ̍ lē dīi̍ŋ, mā bālāā pūla᷄ŋ mā mīɔ̍ɔ̍ŋ chɛ̍chɛ̍.

²¹Tōŋgo̍ wānā a̍a̍ ke̍ī le̍ni̍ŋ mā lūɛ̄ī o̍ chīɛ̍i̍ Mɛ̄lɛ̄ka̍a̍ ni᷄ŋ ndo̍, o̍ tōŋgō ko̍ŋ ni᷄ŋ Hu̍lūām o̍ si̍mi̍ sūŋgbu̍a̍ŋ ma᷅ŋ ni̍, mɛ̄ɛ̍ o̍ si̍mi̍ le᷅ŋ bā tōūwo̍, mbo̍ sīmī le᷅ŋ bā lūāŋndo̍. Sūŋgbu̍le̍ wa̍ bā tōūwo̍ le̍ŋ ma̍ kē le̍ŋ dīōla̍ŋ āā Cha̍chīŋ,[5] ma̍ kē le᷅ŋ bā lūāŋndo̍ dīōla̍ŋ āā Bo̍wāā.[6]

²²Sūŋgbu̍a̍ŋ ma᷅ŋ, lēsūŋgbu̍ o̍ lēsūŋgbu̍ le̍e̍ nɔ̍ nyɔ̄ɔ̍ ō tīīla᷄ŋ o̍ bōlle̍ŋ. Nyɛ̄la̍ wa̍ la᷅ŋ o̍ sūŋgbu̍a̍ŋ bōlle̍ la̍ŋ, nyɛ̄la̍ŋ nda᷅ŋ wānā a̍a̍ chɛ̍ la̍ŋ pɛ̍, to̍fa̍ wɔ̍ ko̍ mɛ̄ɛ̍ pɔ̄mbīa̍ŋ mā chūūlū nu̍a̍ā sɛ̄nɛ̄ī mī mā pɛ̄ɛ̄ŋga̍ yɛ̍. O̍ ko̍ŋ, mi̍ wa̍li̍ māsūŋgbo̍o̍ ndu̍ chu̍ū.

²³O̍ ko̍ŋ kɔ̍ɔ̍lī, mi̍ Hu̍lūām to̍o̍sīāā vɛ̄lɛ̄ hɛ̄ŋgɛ̍i̍ bɛ̍ndū māmɛ̄ŋndo̍ a̍ būlɔ̍ŋsīi̍ye̍. Hɛ̄ŋgɔ̍ɔ̍ ho̍ō ō wa̍ yīŋgīlāa̍ lēni᷄ŋ le̍ nɛ̄īyo̍ lē ŋɔ᷄mmɛ̍ū a̍ tɛ̄ndāa̍ tɛ̄ɛ̄ŋ, tōŋgɔ̄ɔ̍ nɛ̄īyo̍ tɔ̍ a̍ lē ŋūɛ̍ɛ̍nu̍, sōndōo̍ bālɔ̄ɔ̍ chɛ̍chɛ̍ nɛ̄īyo̍ be̍le̍-hi̍ɔ̍ɔ̍lu̍ a̍ lē ŋūɛ̍ɛ̍nu̍.

²⁴Hɛ̄ŋgɔ̍ɔ̍ ho̍ō o̍ chɔ̄chɔ᷄ŋ lēbɛ̄ŋgu̍, nyɛ̄la̍ŋ lā wa̍ lā tūūlīāā lo̍ŋ māā nāūwāā tōōyē, pūla᷄ŋ mā mīɔ̍ɔ̍ŋ chɛ̍chɛ̍, la᷅ŋ lā wa̍ lēchōo̍, la᷅ŋ lā wa̍ lēbɛ̄ŋgu̍. Nyɛ̄la̍ wa̍ la᷅ŋ lā tūūlīāā o̍ hɛ̄ŋgɔ̍ɔ̍ ho̍ō la̍ŋ, lā wa̍ lā tōōsīāā a̍ hɛ̄ŋgɔ̍ɔ̍ lātūlu̍.

²⁵Nyɛ̄lā nda̍ kɛ̄si̍ hɛ̄ŋgɔ̍ɔ̍ ho̍ō chōo̍ la̍ŋ, lā wa̍ tɔ̍ a̍ lā tīɔ̍ɔ̍ŋ, lā tōōsīāā māā nāūwāā tōōyē. Mɛ̄ɛ̍ nda̍ mūli̍ lā yāa̍ la̍ŋ hɔ̄lla̍ kūmbū lūāŋndo̍, ma̍ mūlī lā yāa̍ la̍ŋ hɔ̄lla̍ kūmbū pāa̍le̍ŋ lē dēllo̍, ma̍ mūlī vɛ̄lɛ̄ lā yāa̍la̍ŋ hɔ̄lla̍ kūmbū tōūwo̍, ma̍ mūlī lā yāa̍la̍ŋ lā pīlɛ̍la̍ŋ hɔ̄lla̍ kūmbū pāa̍le̍ŋ lē chāŋndo̍.

²⁶Ndu̍yɛ̍ hɛ̄ŋgɔ̍ɔ̍ ho̍ō, chēlu̍l ndɔ̄ɔ̍ ō wa̍ ŋ̄chi̍sīi̍la̍ŋ lā yāa̍. Hɛ̄ŋgɔ̍ɔ̍ ho̍ō, chɔ̄chɔ᷄ŋ ndɔ᷄ŋ mɛ̄ɛ̍ tāālāa̍ wā nu̍a̍ā ō yāmāā o̍ chɔ̄chɔ᷄ŋ yɛ̍, le̍nde̍ ko̍ni̍ o̍ wa̍ ō yāmāā o̍ chɔ̄chɔ᷄ŋ ni̍. Mɛ̄ɛ̍ pɔ̄mbīa̍ŋ mā chūūlū nu̍a̍ā, mā vīōū pɛ̍ kpɛ̍ɛ̍ mā kāndu̍ sīmbūlɔ᷄ŋndo̍ o̍ bōlle̍ yɛ̍, le̍nde̍ hɛ̄ŋgɔ̍ɔ̍ ho̍ō ō wa̍ o̍ chɔ̄chɔ᷄ŋ ni̍. Hɛ̄ŋgɔ̍ɔ̍ ho̍ō, ndu̍ o̍o̍ chu̍ā mɛ̄ŋnda̍ŋ ka̍lɔ̄ŋnda̍ŋ wāa̍la̍ŋ tɔ̍ a̍ lā ŋūɛ̍ɛ̍nu̍ (15,000).

²⁷O̍ ko̍ŋ kɔ̍ɔ̍lī, mi̍ Hu̍lūām o̍ to̍o̍sīāā vɛ̄lɛ̄ nyɛ̄la̍ŋ tɔ̍ a̍ chīli̍ŋi̍i̍ būlɔ̍ŋsīi̍ye̍, le̍ hɛ̄ŋgɛ̍i̍la̍ nda̍ dūāū mɛ᷅ŋnda̍ŋ lēni᷄ŋ nda̍ŋ kɛ̄sīo̍o̍ lēni᷄ŋ. Nyɛ̄lā tɔ̍ la̍ŋ nda᷅ŋ, ō kɛ᷅ o̍ kɛ᷅ ō wa̍ bānde̍i̍ le̍ nɛ̄īyo̍ lē ŋɔ᷄mpu᷅m, kūmbi᷄ŋndo̍ nɛ̄īyo̍ lē ŋɔ᷄mpu᷅m, hēlɔ̄ɔ̍ nɛ̄īyo̍ lē hīɔ̍ɔ̍lu̍ a̍ tɛ̄ndāa̍ tɛ̄ɛ̄ŋ.

²⁸Nyɛ̄la̍ŋ nda᷅ŋ o̍ kɛ᷅ o̍ kɛ᷅ ndu̍ o̍o̍ nɔ̍ kpēŋgo᷄ŋ ŋ̄ hīɔ̍ɔ̍lu̍. Chīli̍ŋu̍ŋ wa̍ o̍ nyɛ̄la̍ŋ nda᷅ŋ kpēŋgo᷄ŋ ndo̍ŋ, mu̍ŋ nɔ̍ chīli̍ŋu̍ŋ bɛ̄ndo̍ŋ ŋ̄ hōlāā o̍ kpēŋgo᷄ŋ vēlāa̍ vēllē.

²⁹Chīli̍ŋu̍ŋ wa̍ mu᷅ŋ o̍ kpēŋgo᷄ŋ ndo̍ŋ, mi̍ Hu̍lūām o̍ tu̍u̍līāā kpɔ̍kūŋnda̍, lo̍ŋ, o̍ ko̍ŋ kɔ̍ɔ̍lī, a̍ nāūwāā fɔ̍ŋndu̍a̍a̍, ndu̍yɛ̍ a̍ nyāā pūm a̍ kūmba᷅ŋda̍ŋ. O̍ ko̍ŋ kɔ̍ɔ̍lī, chīli̍ŋu̍ŋ wa̍ mu᷅ŋ o̍ kpēŋgo᷄ŋ ndo̍ŋ, chīli̍ŋu̍ŋ bɛ̍ndu᷄ŋ sa̍a̍ mu̍ŋ ndo̍ŋ, he̍ī mālūāŋ ni̍, he̍ī mātōū ni̍, pe̍e̍ŋge̍la̍ kɛ̍ndɛ̄ kɛ̍ndɛ̄la̍ŋ lā wa̍ lā tūūlīāā lo̍ŋ. Mɛ̄ɛ̍ nda̍ tūūli̍a̍a̍ la᷅ŋ lēbɛ̄ŋgu̍ ma̍ tūūlīāā la᷅ŋ lēchōo̍, mi̍ kpɔ̍kūŋāā kāŋ a̍ nāūwāā fɔ̍ŋndu̍a̍a̍ kāŋ ndu̍yɛ̍ a̍ nyāā nda̍ tūūli̍a̍a̍ ka̍ŋ nda̍ ā wā tɛ̄ɛ̄ŋ.

³⁰Nyɛ̄la̍ŋ nda᷅ŋ ō kɛ᷅ o̍ kɛ᷅ ndu̍ o̍o̍ nɔ̍ pēlo᷄ŋ ŋ̄ hīɔ̍ɔ̍lu̍ ŋ̄ tōōsīāā a̍ būlɔ̍ŋsīi̍ye̍. Kɔ̄ɔ̄lī pēlo᷄ŋ ŋ̄ mūu̍ŋ lāchī pēlo᷄ŋ ŋ̄ mūu̍ŋ a̍ chīli̍ŋndo̍ŋ tɛ̄ɛ̄ŋ vēllāa̍ vēllē le̍ pēlūŋ mu᷅ŋ nyūmbɔ̄ɔ̍, mu̍ŋ bɛ̍ɛ̍ ŋ̄ tōōsīāā a̍ būlɔ̍ŋsīi̍ye̍. O̍ ko̍ŋ kɔ̍ɔ̍lī, nyɛ̄lā tɔ̍la̍ŋ nda᷅ŋ, ō kɛ᷅ o̍ kɛ᷅ ndu̍ o̍o̍ nɔ̍ nyɛ̄la̍ŋ lā sīmīāā o̍ sɔ̍ŋgi̍la̍ hi̍ɔ̍ɔ̍lu̍ la̍ŋ vēllāa̍ vēllē, le̍ hɛ̄ŋgɛ̍i̍la̍ māmɛ̄ŋnda̍ŋ kɛ̄sīo̍o̍ lēchōo̍. Nyɛ̄la̍ wa̍ la᷅ŋ o̍ nyɛ̄lā lāŋ sɔ̍ŋgi̍la̍ŋ nda̍ŋ, la̍ŋ bɛ̍ɛ̍ pe̍e̍ŋge̍la̍ kɛ̍ndɛ̄ kɛ̍ndɛ̄la̍ŋ lā wa̍ lā tūūlīāā o̍ la̍ŋ kpo̍u̍.

³¹O̍ ko̍ŋ kɔ̍ɔ̍lī, nyɛ̄lā tɔ̍la̍ŋ nda᷅ŋ ō kɛ᷅ o̍ kɛ᷅ ndu̍ o̍o̍ nɔ̍ nyɔ̄ɔ̍ lēchōo̍ ō tīīla᷄ŋ le̍ hɛ̄ŋgɛ̍i̍la̍ māmɛ̄ŋnda̍ŋ ndāŋ kɛ̄sīo̍o̍ lēni᷄ŋ. Nyɛ̄lā tīīlīa̍ŋnda̍ wa̍ la᷅ŋ o̍ nyɛ̄la̍ŋ ndāŋ chōo̍ la̍ŋ, ō kɛ᷅ o̍ kɛ᷅ o̍ wa̍ hēlɔ̄ɔ̍ le̍ nɛ̄īyo̍ lē pīlɛ̍ a̍ tɛ̄ndāa̍ tɛ̄ɛ̄ŋ, kūmbi᷄ŋndo̍ i̍ŋchi̍sīi̍la̍ŋ bi̍di̍i̍ŋ a̍ lā ŋɔ᷄mmɛ̍ū. Nyɛ̄lā tīīla᷄ŋnda̍ la̍ŋ bɛ̍ɛ̍, ō kɛ᷅ o̍ kɛ᷅ ndu̍ o̍o̍ nɔ̍ nyɛ̄m kɛ̄ndɛ̄ kɛ̍ndɔ᷄ŋ ŋ̄ tūūlāā o̍ kɔ̄ɔ̍ kpo̍u̍. Nyɛ̄lā tɔ̍la̍ŋ nda᷅ŋ, ō kɛ᷅ o̍ kɛ᷅ o̍o̍ nɔ̍ kpēŋgo᷄ŋ ŋ̄ hīɔ̍ɔ̍lu̍, ndu̍yɛ̍ kpēŋgūŋ hi̍ɔ̍ɔ̍lu̍ŋ mu̍ŋ kpo̍u̍, nyɛ̄ pīlɛ̍ kpe̍ ŋ̍ wa̍ ni̍, kɛ̍ nyɛ̄la̍ŋ nda᷅ŋ lā ve̍ la̍ ti̍i̍la᷄ŋ te̍.

³²Nyɛ̄la̍ŋ nda᷅ŋ, ō kɛ᷅ o̍ kɛ᷅ ndu̍ o̍o̍ nɔ̍ pēlo᷄ŋ ŋ̄ hīɔ̍ɔ̍lu̍, lāchī ŋ̄ mūu̍ŋ kɔ̄ɔ̄lī ŋ̄ mūu̍ŋ. Ndu̍yɛ̍ pēlo᷄ŋ mu᷅ŋ ī kɛ᷅ o̍ kɛ᷅ ī wa̍ hēlɔ̄ɔ̍ le̍ i̍ŋchi̍sīi̍la̍ŋ bi̍di̍i̍ŋ a̍ lā ŋɔ᷄mmɛ̍ū. Chīli̍ŋu̍ŋ sa̍a̍ pēlūŋ nyɛ̄lā tɔ̍la̍ŋ nda᷅ŋ vēllāa̍ vēllē le̍ mu̍ŋ nyūmbɔ̄ɔ̍ wo̍ŋ, a̍ nyɛ̄la̍ŋ nda᷅ŋ lātūlu̍ ŋ̍ wa̍ ŋ̄ tōōsīāā ni̍.

³³Nyɛ̄la̍ŋ nda᷅ŋ pēlūŋ ndɔ᷄ŋ, wānā a̍a̍ che᷅ pɛ̍ āā pēlūŋ nyɛ̄lā su̍a̍ā chɔ̄ūwa̍ ā nāŋ ndo̍ŋ ni̍. Ndu̍yɛ̍ nyɛ̄la̍ŋ ndāŋ pēlūŋ ndɔ̍ŋ a̍ būlɔ᷄ŋsīi̍ye̍ ŋ̍ wa̍ ŋ̄ tōōsīāā kpo̍u̍ ni̍. Chīli̍ŋu̍ŋ sa̍a̍ pēlūŋ mu᷅ŋ ndo̍ŋ ni̍, a̍ nyɛ̍ wa᷅ o̍ pēlēi̍ kɔ̄ɔ̍ wo̍, a̍ chīli̍ŋu̍ŋ pɔ̍mbɔ᷄ŋ wa᷅ o̍ pēlēi̍ lēni᷄ŋ ndo̍ŋ, a̍ nyɛ̍ wa᷅ o̍ pēlēi̍ tɛ̄ɛ̄ŋ ndo̍, la̍ŋ kpo̍u̍ a̍ būlɔ̍ŋsīi̍ye̍ la̍ wa̍ lā tōōsīāā ni̍.

³⁴Nyɛ̄lā tɔ̍la̍ŋ nda᷅ŋ, ō kɛ᷅ o̍ kɛ᷅ ndu̍ o̍o̍ nɔ̍ nyɛ̄la̍ŋ lā sīmīāā o̍ sɔ̍ŋgi̍la̍ hi̍ɔ̍ɔ̍lu̍ la̍ŋ vēllāa̍ vēllē. Nyɛ̄lā sīmīāāla̍ wa̍ la᷅ŋ o̍ nyɛ̄la̍ŋ nda᷅ŋ sɔ̍ŋgi̍la̍ŋ nda̍ŋ, a̍ nyɛ̄la̍ŋ ndāŋ lātūlu̍ la̍ wa̍ lā tōōsīāā ni̍.

³⁵O̍ ko̍ŋ kɔ̍ɔ̍lī, nyɛ̄la̍ŋ nda᷅ŋ ō kɛ᷅ o̍ kɛ᷅ nyɔ̄ɔ̍ wa̍ ō dūāūwāā lēchōo̍ o̍ kpēŋgo᷄ŋ mɛ̄ɛ̄lu̍la̍ŋ chɛ̍chɛ̍ māā lābi᷅ŋ. Nyɛ̄la̍ wa̍ la᷅ŋ lā dūāūwāā o̍ kpēŋgo᷄ŋ mɛ̄ɛ̄lu̍la̍ŋ nda̍ŋ, ō kɛ᷅ o̍ kɛ᷅ ō wa̍ bu̍o̍o̍ le̍ i̍ŋchi̍sīi̍la̍ŋ lā ŋɔ̍ma̍hīɔ̍ɔ̍lu̍. Ndu̍yɛ̍ nyɛ̄lā tɔ̍la̍ŋ ndāŋ, chīli̍ŋu̍ŋ wa̍ o̍ kpēŋgo᷄ŋ ndo̍ŋ ni̍, nyɛ̄la̍ wa̍ la̍ŋ la̍ dūāūwāā māā lābi᷅ŋ nda̍ŋ ni̍, a̍ nyɛ̄la̍ŋ nda᷅ŋ lātūlu̍ la̍ wa̍ lā mɔ̄ɔ̄sāā ni̍.

³⁶Nyɛ̄la̍ wa̍ la᷅ŋ o̍ nyɛ̄la̍ŋ nda᷅ŋ sɔ̍ŋgi̍la̍ŋ le̍ hɛ̄ŋgɛ̍i̍la̍ māmɛ̄ŋnda̍ŋ kɛ̄sīo̍o̍ lēchōo̍ la̍ŋ ni̍, a̍ chīli̍ŋu̍ŋ wa̍ o̍ nyɛ̄la̍ŋ nda᷅ŋ kpēŋgo᷄ŋ vēllāa̍ vēllē wo̍ŋ, nyɛ̄m yɛ̍ yɔ̍ŋ ŋ̄ wa̍ ŋ̄ tūūlīāā lo̍ŋ kpo̍u̍, nyāā lākūmba᷅ŋnda̍, a̍ kpɔ̍kūŋnda̍, a̍ wāūwa̍ŋ, o̍ ko̍ŋ kɔ̍ɔ̍lī, a̍ pe̍e̍ŋge̍la̍ kɛ̍ndɛ̄la̍ŋ. Bā o̍ bā fo̍ndāa̍ wa̍ o̍ chīli̍ŋu̍ŋ mu̍ŋ a̍ o̍ nyɛ̄lā lāŋ, ma̍ tīū nyɛ̄la̍ŋ nda᷅ŋ tūūlīa̍a̍ lo̍ŋ kpo̍u̍.

³⁷O̍ ko̍ŋ kɔ̍ɔ̍lī, mi̍ nyɛ̄la̍ŋ nda᷅ŋ lā chūū tōōsīāā. Ndu̍yɛ̍ nyɛ̄la̍ŋ nda᷅ŋ mɛ̄ɛ̍ la̍ wa̍ fa̍ū, nyɛ̄ pīlɛ̍ kpe̍ la̍ wa̍ ni̍, tūūwo̍ ni̍, tōōsīa̍a̍ ni̍ nyɛ̄ pīlɛ̍ kpe̍.

³⁸O̍ ko̍ŋ kɔ̍ɔ̍lī, mi̍ Hu̍lūām o̍ to̍o̍sīāā vɛ̄lɛ̄ hɛ̄ŋgɛ̍i̍la̍ nda̍ dūāū mɛ᷅ŋnda̍ŋ lēni᷄ŋ nda̍ŋ tɔ̍, le̍ kɛ̄sīo̍o̍ o̍ nyɛ̄lā o̍ to̍o̍si̍a̍a̍ la̍ŋ le̍ hɛ̄ŋgɛ̍i̍la̍ māmɛ̄ŋnda̍ŋ lāŋ kɛ̄sīo̍o̍ lēchōo̍ la̍ŋ chōo̍. Hɛ̄ŋgɛ̍i̍la̍ māmɛ̄ŋnda̍ŋ nda᷅ŋ, ō kɛ᷅ o̍ kɛ᷅ ō wa̍ kūmbi᷄ŋndo̍ le̍ nɛ̄īyo̍ lē ŋɔ᷄mpu᷅m. Ndu̍yɛ̍ hɛ̄ŋgɛ̍i̍la̍ŋ nda᷅ŋ bɛ̍ɛ̍, a̍ chīli̍ŋi̍i̍ būlɔ̍ŋsīi̍ye̍ la̍ wa̍ lā tōōsīāā ni̍. Hɛ̄ŋgɛ̍i̍la̍ŋ nda᷅ŋ, ō kɛ᷅ o̍ kɛ̍ mɛ̄ŋnda̍ŋ ka̍lɔ̄ŋnda̍ŋ kɛ̄mɔ̄ɔ̍ lē dīi̍ŋ a̍ bi̍di̍i̍ŋ ma̍a̍ lu̍ɛ̍ī le̍ni̍ŋ ni̍.

³⁹Mɛ̄ɛ̍ Hu̍lūām o̍ chi̍i̍ hɛ̄ŋgɛ̍i̍la̍ māmɛ̄ŋnda̍ŋ nda᷅ŋ tōōsīāā, mbo̍ kɛ̄sī la̍ŋ o̍ nyɛ̄lā o̍ to̍o̍si̍a̍a̍ le̍ la̍ŋ kɛ̄sīo̍o̍ lēchōo̍ la̍ŋ chōo̍, mbo̍ chūā la̍ŋ mbo̍ kɛ̄sī la̍ŋ o̍ chīɛ̍i̍ Mɛ̄lɛ̄ka̍a̍ vēllāa̍ vēllē. Mɛ̄ɛ̍ o̍ kɛ̍si̍ lā ŋūɛ̍ɛ̍nu̍ o̍ chīɛ̍i̍ Mɛ̄lɛ̄ka̍a̍ bā tōūwo̍, mbo̍ kɛ̄sī lā ŋūɛ̍ɛ̍nu̍ la̍ŋ lā pīlɛ̍ la̍ŋ bā lūāŋndo̍. Hɛ̄ŋgɛ̍i̍ bɛ̍ndū ndā vēēlū āā Pēe̍ Mɛ̄ŋmā Īhɛ᷄llo̍ wo̍, ndu̍ o̍ wa̍ ō kɛ̄sīāā tɛ̄ɛ̄ŋ o̍ chīɛ̍i̍ Mɛ̄lɛ̄ka̍a̍ īkɛ̄i̍.

⁴⁰O̍ ko̍ŋ kɔ̍ɔ̍lī, mi̍ Hu̍lūām o̍ to̍o̍sīāā vɛ̄lɛ̄ kpɛ̍ɛ̍nɔ̍ŋ ya̍u̍wa̍ŋ, a̍ si̍ɔ̍būi̍la̍ŋ, a̍ hɛ̄ŋgɛ̍i̍la̍ŋ le̍ wa̍llo̍ o̍ chīɛ̍i̍ Mɛ̄lɛ̄ka̍a̍. Nyɛ̄ o̍ nyɛ̄ Sɔ̍lɔ̍mɔ̄ŋ ndu̍ o̍o̍ ye̍e̍ma̍ mī Hu̍lūām ndu̍ o̍o̍ to̍sa̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍, mi̍ Hu̍lūām o̍ chi̍ī mu̍ŋ tōōsīāā kpo̍u̍. Nyɛ̄m Hu̍lūām o̍ to̍o̍si̍a̍a̍ wo̍ŋ mu̍ŋ wa̍ mu᷅ŋ ni̍,

⁴¹sūŋgbu̍ma̍ mi̍ɔ̍ɔ̍ŋ nda̍ŋ, a̍ nyɛ̄lā tīīlīa̍ŋnda̍ wa̍ la̍ kɛ̄sīāā o̍ sūŋgbu̍ma̍ ma̍ŋ bōlle̍ la̍ŋ, a̍ nyɛ̄la̍ tīɔ̍ɔ̍ŋ nda̍ wa̍ lā tūūlīāā o̍ nyɛ̄lā lāŋ a̍ chīli̍ŋi̍i̍ te̍e̍ŋgīɛ̍i̍ lā kāyā kāyāā māā ŋ̄yɔ̄lɔ̄ la̍ŋ,

⁴²a̍ pɔ̄mɛ̄ki̍la̍ne̍tīi̍ma̍ nda̍ tūūla̍ lēbɛ̄ŋgu̍ chɛ̍chɛ̍ kɛ̄mɛ̄ le̍ hi̍ɔ̍ɔ̍lu̍i̍ (400), pūla᷄ŋ mā mīɔ̍ɔ̍ŋ mi̍ɔ̍ɔ̍ŋ nda̍ŋ, a̍ nyɛ̄lā tɔ̍la̍ nda̍ tōōsi̍a̍a̍ le̍ hɛ̄ŋgɛ̍i̍la̍ māmɛ̄ŋnda̍ŋ kɛ̄sīo̍o̍ le̍chōo̍ la̍ŋ

⁴³a̍ hɛ̄ŋgɛ̍i̍la̍ māmɛ̄ŋndā tɔ̄la̍ŋ, a̍ nyɛ̄lā nda̍ tōōsi̍a̍a̍ le̍ hɛ̄ŋgɛ̍i̍la̍ māmɛ̄ŋndā lāŋ kɛ̄sīo̍o̍ lēchōo̍ la̍ŋ,

⁴⁴a̍ hɛ̄ŋgɛ̍i̍ bɛ̍ndū māmɛ̄ŋndo̍, a̍ nyɛ̄lā tɔ̍ a̍ lā tīɔ̍ɔ̍ŋ nda̍ wa̍ lā tōōsīāā māā nāūwāā tōōyē mi̍ hɛ̄ŋgɛ̍i̍ bɛ̍ndū kōŋ ō wā īchāli̍ le̍cho̍ō la̍ŋ,

⁴⁵a̍ kpɛ̍ɛ̍nɔ̍ŋ, a̍ si̍ɔ̍būi̍la̍ŋ, o̍ ko̍ŋ kɔ̍ɔ̍lī a̍ hɛ̄ŋgɛ̍i̍la̍ŋ.

⁴⁶Nyɛ̄ o̍ nyɛ̄ māsāa̍ Sɔ̍lɔ̍mɔ̄ŋ ndu̍ o̍o̍ kɛ̍ɛ̍si̍a̍a̍ le̍ mī Hu̍lūām ndu̍ o̍o̍ to̍o̍si̍a̍l ndu̍ le̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍, mi̍ Hu̍lūām o̍ to̍o̍sīāā mu̍ŋ kpo̍u̍. Ndu̍yɛ̍ nyɔ̄ɔ̍ŋ mu᷅ŋ kpo̍u̍ a̍ chīli̍ŋi̍i̍ būlɔ᷄ŋsīi̍ kɛ̍ndɛ̄ kɛ̄ndɛ̄ī tēēŋgīɛ̍i̍ ŋ̍ wa̍ ŋ̄ tōōsīāā ni̍.

⁴⁷O̍ dɛ̍ŋgbɔ̍ɔ̍ Chɔ̍ɔ̍dāŋ, nāa̍ pūūlu̍ chu̍a̍u̍wāā ŋ̄kpɛ̍ɛ̍nɔ̍ɔ̍ wa̍ Su̍kɔ̍tī chi̍e̍e̍ a̍ Sa̍lu̍ɛ̍tāŋ chi̍e̍e̍ tɛ̍ɛ̄ŋ nda̍, lo̍ŋ Māsā Bɛ̍ndōo̍ Sɔ̍lɔ̍mɔ̄ŋ o̍ bɛ̄ɛ̄ndi̍a̍a̍ nyɔ̄ɔ̍ŋ mu᷅ŋ kpo̍u̍ ni̍.

⁴⁸Būlɔ᷄ŋsīi̍ŋ Sɔ̍lɔ̍mɔ̄ŋ o̍ bɛ̍ɛ̍ndi̍a̍a̍ nyɔ̄ɔ̍ŋ mu᷅ŋ ndo̍ŋ, ŋ̄ wa̍ ha̍a̍a̍ ā nɔ̄la̍ mā sīna̍ mɛ̄ɛ̍ kpɛ̍ ŋ̍ wa̍ yɛ̍ le̍, fo̍ndōle̍ nda̍ a̍a̍ nɔ̍lā mī nda̍ a̍a̍ chi̍i̍ mu̍ŋ hāndɔ̄ɔ̄ o̍ sēke̍lēi̍ chōo̍ le̍ lūsu̍l ndɔ̄ si̍nā le̍.

⁴⁹O̍ ko̍ŋ kɔ̍ɔ̍lī, nyɛ̄ o̍ nyɛ̄ Sɔ̍lɔ̍mɔ̄ŋ ndu̍ o̍o̍ kɛ̍ɛ̍si̍a̍a̍ le̍ tōsāa̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ ni᷄ŋ, mbo̍ tōōsīāā mu̍ŋ kpo̍u̍ a̍ ko̍o̍līi̍yo̍ŋ. Nyɛ̄m o̍ to̍o̍si̍a̍a̍ wo̍ŋ mu̍ŋ wa̍ mu᷅ŋ ni̍. Ma̍āŋndo̍ le̍ sa̍lāa̍ sōlīo̍o̍ lēchōo̍, a̍ ti̍bīi̍ nda̍ kɛ̄sī be̍e̍dīi̍ chɔ᷅m māā Mɛ̄lɛ̄ka̍ chō a̍ nda̍ lātūlu̍ wo̍,

⁵⁰a̍ nyɛ̄lā kɛ̄sīāālā la̍mbūi̍la̍ tɔ̍ la̍ wa̍ o̍ fo̍ndā dīāndāa̍ hi̍o̍ū fo̍ndāŋnda̍ŋ kpo̍u̍ wo̍ dīō, kūmbū tōūwo̍ lā ŋūɛ̍ɛ̍nu̍, kūmbū lūāŋndo̍ lā ŋūɛ̍ɛ̍nu̍ la̍ŋ, a̍ nyɛ̄lā nda̍ tōōsi̍a̍a̍ māā lāpe̍e̍ŋge̍ o̍ chīɛ̄īyo̍ lēni᷄ŋ nda̍ŋ, a̍ la̍mbūi̍la̍ŋ, a̍ kpānya̍la̍ŋ, a̍ tāālāla̍ŋ, a̍ wōlɔ̄ɔ̄lā lā la̍mbūi̍la̍ŋ, a̍ hɛ̄ŋgɛ̍i̍la̍ŋ, a̍ hɛ̄ŋgɛ̍i̍la̍ŋ le̍ nyɛ̄m chūŋ kɛ̄ndɔ̍ŋ, a̍ lā nda̍ chūā yi᷅ŋnde̍ŋ lēni᷄ŋ nda̍ŋ, o̍ ko̍ŋ kɔ̍ɔ̍lī, a̍ ko̍ŋnjīi̍yo̍ŋ o̍ dīōla̍ wa̍ o̍ fo̍ndā dīāndāa̍ hi̍o̍ū fo̍ndāŋnda̍ŋ kpo̍u̍ wo̍ wo̍ŋ, a̍ dīōlā wānā a̍a̍ ke̍ī le̍ lūɛ̄īyɔ̄ɔ̍ o̍ chīɛ̍i̍ Mɛ̄lɛ̄ka̍a̍ ho̍ō ni᷄ŋ nda̍ŋ. Ndu̍yɛ̍ nyɔ̄ɔ̍ŋ mu᷅ŋ kpo̍u̍ a̍ ko̍o̍līi̍yo̍ŋ ŋ̄ wa̍ ŋ̄ bɛ̄ɛ̄ndīāā tu᷅ ni̍.

⁵¹Mɛ̄ɛ̍ Sɔ̍lɔ̍mɔ̄ŋ o̍ chi̍i̍ chīɛ̍i̍ Mɛ̄lɛ̄ka̍a̍ ho̍ō tāŋgūl, nyɛ̄ o̍ nyɛ̄ Dēēve̍ fi̍nyā ndɔ̄ ndu̍ o̍o̍ yɔ̍ŋgu̍ le̍ kpe̍ku̍ Mɛ̄lɛ̄ka̍ Ya̍a̍wɛ̄ɛ̄ wo̍, ka̍ni̍ŋ hu̍mbū ni̍, ŋ̄ko̍o̍līi̍ ni̍, a̍ nyɛ̄m chēle̍ŋndo̍ŋ, mbo̍ chūā mu̍ŋ kpo̍u̍, mbo̍ kūā a̍ mu̍ŋ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ ni᷄ŋ, mbo̍ kɔ̍ kɛ̍sī mu̍ŋ o̍ fo̍ndāŋndā nda̍ kɛ̄sī nyɔ̍ɔ̍ŋ o̍ chīɛ̍i̍ Mɛ̄lɛ̄ka̍a̍ la̍ŋ.