Read Southern Kisi Māsāā Bɛ̍ndūāā Tāsi̍a̍a̍ 9 Bible Online

Māsāā Bɛ̍ndūāā Tāsi̍a̍a̍ 9 - Southern Kisi bible

Māsāā Bɛ̍ndūāā Tāsi̍a̍a̍ 9

¹Mi̍ Sɔ̍lɔ̍mɔ̄ŋ chi̍ī chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ tāŋgūl, a̍ chīɛ̄ī ndɔ̍ lēmāsāa̍. O̍ ko̍ŋ kɔ̍ɔ̍lī nyɛ̄ o̍ nyɛ̄ ndu̍ o̍o̍ ye̍e̍ma̍ le̍ tāŋgūllo̍ mbo̍ chīī tāŋgūl.

²Mɛ̄ɛ̍ te̍le̍ŋ ti̍ŋ hīo̍u̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ chɔ̍mnu᷄ŋ ndu̍ vɛ̄lɛ̄ o̍ lɔ̄mā sɔ̄lāā mɛ̄ɛ̍ o̍ chɔ̍mnu̍ŋ ndu̍ Ki̍bīɔ̄ŋ yɛ̍.

³Mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl ndu̍ āā, “Sɔ̍lɔ̍mɔ̄ŋ, I̍ tu̍e̍ī pīɛ̄īlē nūmnde̍ŋ. Nyɛ̄ o̍ nyɛ̄ ŋ̄ nyūna̍ ya̍ dīōm le̍ ndu̍ I̍ tu̍e̍ī. Chīɛ̄ī ŋ̄ tēŋgu̍l la̍ wo̍ I̍ si̍i̍ŋgu̍u̍ ndu̍ chīɛ̄ī nī di̍a̍ndāā. Lo̍ŋ wāŋnda̍ wā ni̍ŋ ya̍ sōōlūūwo̍ le̍ fɛ̍ɛ̍ŋ a̍ fɛ̍ɛ̍ŋ ni̍. Ndu̍yɛ̍ I̍ wa᷅ ni̍ŋ ndu̍ hɔ̄lte̍ŋ ndu̍yɛ̍ mī ma̍nda̍ ndu̍ le̍ te̍le̍ŋ o̍ te̍le̍ŋ.

⁴Tē a̍ to̍sa̍ nyɛ̄ ya̍ I̍ di̍mu̍l nu̍m le̍ tōsāa̍ wo̍ a̍ kɔ̄l nūmndo̍ kpo̍u̍ pɛ̍, mā wa̍ ya̍ o̍ hɔ̄l sa̍kpō māā Dēēve̍ fi̍nyā nūm, o̍ ko̍ŋ kɔ̍ɔ̍lī, nyɛ̄ o̍ nyɛ̄ sāwāla̍ nīla̍ŋ lā di̍mi̍ mā to̍sa̍ ndu̍,

⁵būŋgɛ̄ī ya̍ I̍ chu̍e̍l Dēēve̍ fi̍nyā nu̍m nde̍ pēēlōo̍ ya̍ I̍ pe̍e̍lū būŋgɛ̄ī kēŋ ni̍, mī to̍sa̍ nyɛ̄ ya̍ I̍ chu̍e̍l ndu̍ būŋgɛ̄i̍ yo̍. Mi̍ chu̍ēl Dēēve̍ fi̍nyā nūm būŋgɛ̄i̍ māā tē wānāa̍ fu̍la̍ o̍ pūlālē ndɔ̄le̍ŋ chōo̍ wa̍ ā tōsa̍ nyɛ̄ ya̍ I̍ di̍mu̍l nda̍ wo̍ pɛ̍, māā le̍ fɛ̍ɛ̍ŋ a̍ fɛ̍ɛ̍ŋ, o̍ yu̍ŋgu̍ ndɔ̄ɔ̍ chōo̍ māsāle̍ŋ I̍sɔ̄lūɛ̄ī le̍ wa᷅ ni̍ŋ ni̍.

⁶Kɛ̍ mi̍ chē bɛ̍ɛ̍ mi̍ chu̍ēl ndu̍ būŋgɛ̄ī kēŋ, nūm ni̍, wānāa̍ fu̍la̍ o̍ pūlālē nūmnde̍ŋ chōo̍ wa̍ ni̍, tē lā sōli̍ ya̍ dīōm pɛ̍, nyɛ̄ sāwāla̍ nīla̍ŋ lā dīmi̍ wo̍ mī lā kɛ̄ɛ̍ ndu̍ tōsāa̍, mī lā mūli̍ŋ nyɛ᷅m chēle̍ŋndo̍ sōōlūūwo̍ māā mɛ̄lɛ̄ka̍a̍ nya̍,

⁷lɛ̄ŋndē ya̍ I̍ ke̍ le᷅ŋ nya̍ wānāā nīa̍a̍ I̍sɔ̄lūɛ̄ī le̍ŋ, sōlīo̍o̍ ya̍ I̍ so̍lī nya̍ lēni᷄ŋ ni̍. Ndu̍yɛ̍ o̍ ko̍ŋ kɔ̍ɔ̍lī, chīɛ̄ī ŋ̄ tēŋgu̍l la̍ ho̍ō mi̍ si̍i̍ŋgūū ndu̍ chīɛ̄ī nī di̍a̍ndāā le̍ ya̍ sōōlūūwo̍ lēni᷄ŋ ndo̍ bɛ̍ɛ̍, mālɔ̄ɔ̍ ya̍ I̍ ma᷅l ndu̍ ya̍a̍mɔ̍ɔ̍wa̍ o̍ bā ni̍, mī to̍sa̍ mā tɛ̄ɛ̄mbu̍u̍ ndu̍ kpo̍u̍ mbō sīmnu᷄ŋ fo̍ndō fōndo̍o̍. Wāŋnda̍ kpo̍u̍ mā ma᷄m nya̍ wāŋnda̍ I̍sɔ̄lūɛ̄ī, ndu̍yɛ̍ mā pɛ̄ɛ̄sa̍ nya̍. Wānā o̍ wāna̍ wa᷅ ni̍ŋ hi̍o̍u̍wɔ̄ɔ̍ na̍nu᷄ŋ, kɔ̄ndɔ̄fi̍llo̍ chō nda̍ bīyɔ̄ɔ̄ mā hāndu̍ŋ ba᷅la̍ŋ o̍ lāsōndō mā wa̍ nyūnāa̍, āā, ‘Vɛ᷅ mi̍ Mɛ̄lɛ̄ka̍ Ya̍a̍wɛ̄ɛ̄ o̍ to̍sā he̍ī a̍ lɛ̄ŋnde̍ŋ nde᷅ŋ? Vɛ᷅ mbo̍ tōsā he̍ī a̍ chīɛ̄īyo̍ ho̍ō?’

⁸

⁹O̍ ko̍ŋ, mī wāŋnda̍ dīmu̍l nda̍ āā, ‘Ō cho̍ fu̍u̍le̍ Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍ he̍ī a̍ nda̍ le̍, le̍ mɛ̄ɛ̍ nda̍ kɛ̄ɛ̍ ndu̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ ndāa̍ ma̍ mūli᷄ŋ nyɛ̍m chēle̍ŋndo̍ŋ sōōlūūwo̍ māā mɛ̄lɛ̄ka̍ nda̍ yɛ̍. Ndu̍ so̍li̍ fi̍nyāā ndāā ma̍māa̍ o̍ chɛ̄le̍ŋ ni᷄ŋ I̍chi̍pī ni̍, mbo̍ hūŋ a̍ nda̍ o̍ lɛ̄ŋnde̍ŋ nde᷅ŋ ni᷄ŋ. Kɛ̍ ma̍ hu᷄ŋ kɛ̄ɛ̄ ndu̍ ma̍ mūli᷄ŋ nyɛ᷅m chēle̍ŋndo̍ŋ sōōlūūwo̍ māā mɛ̄lɛ̄ka̍a̍ ndā, nyɛ̄ kōŋ o̍ tu̍si̍ nda̍ nyɛ̄ pālāā bɛ̄ndōo̍ ho̍ō chōo̍ ni̍.’ ”

¹⁰Sɔ̍lɔ̍mɔ̄ŋ chi̍i̍ wɔ̄sīla̍ŋ bi̍dīi̍ŋ le̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍, a̍ chīɛ̄ī ndɔ̍ lēmāsāa̍ tāŋgūllo̍.

¹¹Ndu̍yɛ̍ yɔ̄mīī o̍ yɔ̄mīī tāŋgūlāā Sɔ̍lɔ̍mɔ̄ŋ ta̍ŋgu̍l a̍ ndi̍, yɔ̄mīī si̍dāāve̍ ni̍, yɔ̄mīī sa̍i̍pu̍lūɛ̄ɛ̄ve̍ ni̍, Māsā Bɛ̍ndōo̍ Hi̍lūām māsāa̍ le̍ Ta̍a̍yā ndu̍ ma̍la̍ ndu̍ a̍ ndi̍ ni̍. O̍ ko̍ŋ kɔ̍ɔ̍lī, mbo̍ mālā ndu̍ vɛ̄lɛ̄ a̍ ko̍o̍līi̍yo̍ŋ ta̍u̍ ta̍u̍. Mɛ̄ɛ̍ Sɔ̍lɔ̍mɔ̄ŋ chi̍i̍ tāŋgūllo̍, mbo̍ hɛ̄lī chi̍o̍o̍ŋ tɔ̍ o̍ būŋgɛ̄ī Kāli̍līve̍ ni᷄ŋ mbo̍ kē Māsā Bɛ̍ndōo̍ Hi̍lūām, māā nyɛ̄ ndɔ̄ le̍ mālā o̍ ma̍la̍ ndu̍ a̍ tāŋgūllo̍ wo̍.

¹²Kɛ̍ mɛ̄ɛ̍ Māsāa̍ Hi̍lūām o̍ kɔ̍ mɛ̍ɛ̍nda᷄ŋ chi̍o̍o̍ mu᷅ŋ, mbo̍ chā māā ŋ̄ bɛ̄nda̍ ndu̍ o̍ kɔ̄l te̍.

¹³Mbo̍ nyūnā Sɔ̍lɔ̍mɔ̄ŋ āā, “Vɛ̄ɛ̄, chāa̍ŋ nūu̍ chi̍o̍o̍ŋ mu᷅ŋ ŋ̄ ke̍ ya̍ ni̍?” Nyɛ̄ ko̍ŋ to̍sa̍ ni̍ ma̍ kē fo̍ndāŋ kōŋ dīōla̍ŋ āā Ka̍bɔ̄l, ko̍ŋ cho̍ ni̍, nyɛ̍ bɛ̍nda̍ le̍ wo̍. Ndu̍yɛ̍ a̍ pāa̍le̍ hāūle᷅ŋ bɛ̍ɛ̍, ā chō wɔ̄ fo̍ndāŋ kōŋ vēēlōo̍ le̍nde̍.

¹⁴Ndu̍yɛ̍ ko̍o̍līi̍ŋ Māsā Bɛ̍ndōo̍ Hi̍lūām o̍ yɔ̍ŋ Sɔ̍lɔ̍mɔ̄ŋ le̍ ndu̍ tāŋgūltā lāŋ mālāā wo̍ŋ, mu̍ŋ o̍o̍ wa᷅ lu̍su̍llo̍ le̍ pa᷅ŋnda̍ŋ wāa̍la̍ŋ lā ŋɔ̄ma̍hīɔ̍ɔ̍lu̍ (9,000).

¹⁵Ko̍na̍a̍ cho̍ ho̍ō a̍ wa̍lta̍ che᷅le̍ŋndā Sɔ̍lɔ̍mɔ̄ŋ o̍ to̍sa̍ la̍ŋ o̍kɔ̄ɔ̄ ni̍. Mɛ̄ɛ̍ Sɔ̍lɔ̍mɔ̄ŋ o̍ chi̍i̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ tāŋgūl a̍ chīɛ̄ī ndɔ̍ lēmāsāa̍, mbo̍ dīmūl vɛ̄lɛ̄ le̍e̍bi̍lɛ̄i̍ya̍ ma̍ pēēlū fo̍nda̍ wa̍ o̍ chi̍o̍o̍ kūmbūe̍i̍ pīlɛ̍i̍ bā pāa̍le̍ŋ lē chāŋndo̍ wo̍ kpo̍u̍. O̍ ko̍ŋ kɔ̍ɔ̍lī, mbo̍ dīmūl nda̍ ma̍ tāŋgūl vɛ̄lɛ̄ kpāki̍ ba̍lu̍ chi̍o̍o̍ wo̍. O̍ ko̍ŋ kɔ̍ɔ̍lī, chi̍e̍e̍ŋ ya̍a̍mɔ̍ɔ̍wa̍ nda̍ a̍a̍ bi̍ī sīndɛ̄ ma̍ tɛ̄ɛ̄mbūū mu̍ŋ kpo̍u̍ wo̍ŋ, mu̍ŋ yɔ̍nūŋ ni̍ māā Ha̍sɔ̄ɔ̄, a̍ Mɛ̍ki̍dɔ̄ɔ̄, a̍ Kɛ̍sɛ̄ɛ̄, mbo̍ tōsā mi̍ le̍e̍bi̍lɛ̄i̍ya̍ ā mīŋgī mu̍ŋ tāŋgūl kpo̍u̍.

¹⁶Ndu̍yɛ̍ māsā bɛ̍ndu̍ wa̍ o̍ lɛ̄ŋndē I̍chi̍pīle̍ŋ ni᷄ŋ ndo̍, ndu̍ ndu̍ o̍o̍ kɔ̍ de᷅l sīndɛ̄ Kɛ̍sɛ̄ɛ̄ chōo̍ ni̍ mbo̍ bīī ndu̍. Wānā o̍ wāna̍ wa̍ lo̍ŋ mbo̍ dīū nda̍ kpo̍u̍, o̍ ko̍ŋ kɔ̍ɔ̍lī, mbo̍ māl chi̍e̍e̍ ka̍lāa̍ o̍ yīŋ mbo̍ ŋūā. Mɛ̄ɛ̍ māsā bɛ̍ndōo̍ I̍chi̍pī chūā ndɔ̄ɔ̍ ō cha᷄l o̍ nɔ̄ɔ̍ ni᷄ŋ nda̍ Sɔ̍lɔ̍mɔ̄ŋ, mbo̍ kē chūā ndɔ̄ ko̍ŋ chi̍e̍e̍ ko̍ŋ māā nyɛ̄ ndɔ̄ le̍ chāli̍i̍ o̍ cha̍l o̍ nɔ̄ɔ̍ ni᷄ŋ nde̍.

¹⁷Mi̍ Sɔ̍lɔ̍mɔ̄ŋ di̍mūl le̍e̍bi̍lɛ̄i̍ya̍ ma̍ mīŋgī chi̍o̍o̍ ho̍ō tāŋgūl. O̍ ko̍ŋ kɔ̍ɔ̍lī, mbo̍ dīmūl vɛ̄lɛ̄ nda̍ ma̍ mīŋgī chi̍o̍o̍ŋ ŋ̄ pīlɔ̍ŋ kpo̍u̍ ta̍ŋgūl, mu̍ŋ yɔ̍nūŋ ni̍ māā Bɛ̄tī Ho̍lɔ̄ŋ ho̍ō mātōū,

¹⁸a̍ Ba̍la̍tī, a̍ Ta̍māā o̍ wa̍ o̍ po̍llo̍ ni᷄ŋ o̍ lɛ̄ŋndē Chu̍dāle̍ŋ ni᷄ŋ ndo̍.

¹⁹O̍ ko̍ŋ kɔ̍ɔ̍lī, mi̍ Sɔ̍lɔ̍mɔ̄ŋ di̍mūl vɛ̄lɛ̄ le̍e̍bi̍lɛ̄i̍ya̍ ma̍ tāŋgūl chi̍o̍o̍ŋ ŋ̄ ti᷄ŋ le̍ nyɛ̄ dīa̍a̍ kɛ̄sīo̍o̍ lo̍ŋ, ma̍ tāŋgūl vɛ̄lɛ̄ ŋ̄ ti᷄ŋ le̍ pūa̍a̍ ndūa̍a̍ chɔ̄ūwāa̍ sɔ̍ŋgā o̍ su̍a̍a̍ chōo̍ wa̍, vɛ̄lɛ̄ a̍ nyɛ̄lā su̍a̍a̍ ā nāŋ nda̍ŋ kɛ̄sīo̍o̍ lo̍ŋ. Nyɛ̄ o̍ nyɛ̄ Sɔ̍lɔ̍mɔ̄ŋ ndu̍ o̍o̍ kɛ̍ɛ̍si̍a̍a̍ le̍ tāŋgūllo̍ Chūlu̍sɛ̄lɛ̄m a̍ Le̍ba̍nɔ̄ŋ, a̍ o̍ fo̍ndāŋndā chēle̍ŋnda̍ wa̍ ndu̍ o̍ bɛ̄ŋgu̍ la̍ŋ, mbo̍ dīmūl le̍e̍bi̍lɛ̄i̍ya̍ ma̍ tāŋgūl la̍ŋ kpo̍u̍.

²⁰Bōōndi̍i̍ I̍sɔ̄lūɛ̍i̍ya̍ chu̍a̍ lɛ̄ŋndē Ke̍nāŋnde̍ŋ nde̍, kāa̍la̍ŋ nda᷅ŋ ki̍nɛ̍i̍, la̍ŋ la̍ yɔ̍nūŋ ni̍ māā, A̍mɔ̍lu̍a̍i̍tīi̍ya̍, a̍ Hi̍ta̍i̍tīi̍ya̍, a̍ Pɛ̍lu̍i̍sa̍i̍tīi̍ya̍, a̍ Hi̍ta̍i̍tīi̍ya̍, a̍ Chɛ̄bu̍sa̍i̍tīi̍ya̍, wāŋnda̍ I̍sɔ̄lūɛ̄ī a̍ dīu̍ nda̍ le̍. Wānāa̍ fu̍la̍ o̍ kāa̍la̍ŋ ndāŋ chōo̍ wa̍ ki̍nɛ̍i̍ nda̍ Sɔ̍lɔ̍mɔ̄ŋ o̍ si̍i̍ŋgu̍u̍ chīa̍a̍ wa̍lla̍ ni̍. Ndu̍yɛ̍ a̍ pāa̍le̍ hāūle᷅ŋ bɛ̍ɛ̍, wānāā ka̍ŋ nda̍ cho̍ chīa̍a̍ wa̍lla̍ I̍sɔ̄lūɛ̄ī ni̍.

²¹

²²I̍sɔ̄lūɛ̍i̍ya̍ ki̍nɛ̍i̍, ō pīlɛ̍ bɛ̍ɛ̍ Sɔ̍lɔ̍mɔ̄ŋ o̍ si̍i̍ŋgu̍u̍ chɛ᷅ le̍. Nda̍ o̍ si̍i̍ŋgu̍u̍ ā ti᷄ŋ so̍vɛ̄i̍ya̍a̍ ndūa̍a̍ ni̍, mbo̍ sīīŋgūū ā ti᷄ŋ māsāa̍, mbo̍ hāndū ā ti᷄ŋ nyɛ̍lā nyāāna᷄ŋnda̍ su̍a̍a̍ ā nāŋ nda̍ŋ bōlle̍, mbo̍ kɛ̄sī ā ti᷄ŋ pūa̍a̍ sɔ̍ŋgā o̍ su̍a̍a̍ chɔ̄ūwa̍ chōo̍ wa̍ bōlle̍.

²³O̍ ko̍ŋ kɔ̍ɔ̍lī, mi̍ Sɔ̍lɔ̍mɔ̄ŋ hɛ̍lī wāŋnda̍ kɛ̄mɔ̄ɔ̍ le̍ ŋūɛ̍ɛ̍nu̍ a̍ ŋ̄wāŋ be̍le̍-ŋu̍ɛ̍ɛ̍nu̍ (550) mbo̍ kɛ̄sī nda̍ wa̍lta̍ ndɔ̄la̍ŋ kpo̍u̍ bo᷅lle̍ŋ. Nda̍ wa̍ wānāā ndūa̍a̍ wa̍lla̍ kpo̍u̍ bo᷅lle̍ŋ ni̍.

²⁴Ndu̍yɛ̍ māsā bɛ̍ndōo̍ I̍chi̍pī, chūā ndɔ̄ɔ̍ wa̍ Sɔ̍lɔ̍mɔ̄ŋ o̍ bā ni̍. Fo̍nda̍ nɔ̍ dīōla̍ŋ āā chi̍e̍e̍ Māsāa̍ Dēēve̍ wo̍ wo̍, lo̍ŋ chūa̍a̍ ho̍ō ō wa̍ īchāli̍ ni̍. Kɛ̍ mi̍ Sɔ̍lɔ̍mɔ̄ŋ o̍ te̍ŋgūl ndu̍ chīɛ̄ī ndɔ̍ mālɔ̄ɔ̍, mbo̍ fāŋa᷄ŋ nāa̍ o̍ wa̍ wa̍ mbo̍ hīāū lo̍ŋ. Bōōndi̍i̍ Sɔ̍lɔ̍mɔ̄ŋ pe̍e̍lu̍ fo̍nda̍ wa̍ o̍ chi̍o̍o̍ kūmbūe̍i̍ pīlɛ̍i̍ bā pāa̍le̍ŋ lē chāŋndo̍ ve̍, chūa̍a̍ ho̍ō ndu̍ o̍o̍ hi̍o̍ū ni᷅ŋ o̍ chīɛ̄ī ndɔ̍ nda̍ tēŋgu̍l ndu̍ wo̍ ni᷄ŋ.

²⁵Lɔ̍ɔ̍pa̍ mi̍ Sɔ̍lɔ̍mɔ̄ŋ o̍ ta̍ŋgūl chīɛ̍i̍ Mɛ̄lɛ̄ka̍a̍, o̍ tāŋgūl fɛ̍lɛ̍ŋ ma̍āŋndo̍ le̍ wāa̍ sa̍lāla̍ŋ sōlīo̍o̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍. Īwɔ̄sī o̍ īwɔ̄sī, lēyāa̍ Sɔ̍lɔ̍mɔ̄ŋ ndu̍ o̍o̍ so̍lī sa̍lāla̍ŋ o̍ ma̍āŋndo̍ ho̍ō chōo̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍ ni̍, sa̍lālā lūāmāāla̍ŋ, a̍ sa̍lālā kɔ̄ltā nyūlūla̍ŋ, o̍ ko̍ŋ kɔ̍ɔ̍lī, mbō lūām vɛ̍lɛ̄ nyɛ̄m chūŋ kɛ̄ndɔ̍ŋ o̍ ndu̍ lo̍. Le̍nde̍ o̍ lo̍ tōsāa̍ ni̍, ha̍a̍a̍ mbo̍ lō o̍ ko̍ŋ mbo̍ chīī chīɛ̄ī Mɛ̄lɛ̄ka̍a̍ tāŋgūl.

²⁶O̍ ko̍ŋ kɔ̍ɔ̍lī, mi̍ Sɔ̍lɔ̍mɔ̄ŋ o̍ ta̍ŋgūl vɛ̄lɛ̄ dɛ̄ndɛ̄la̍ bɛ̍ndūla̍ ku̍ā o̍ mɛ̄ŋnda̍ŋ chōo̍ la̍ŋ ta̍u̍ ta̍u̍ Ɛ̄sāyɔ̄ŋkɛ̍bɛ̄ Ɛ̄sīɔ̄ŋkɛ̍bɛ̄ chi̍e̍e̍, o̍ Pēe̍ Mɛ̄ŋmā Īhɛ᷄llo̍ kɔ̄ŋgɔ̍. Ɛ̍la̍tī chi̍e̍e̍ i̍kɛ̍i̍, o̍ lɛ̄ŋndē I̍dɔ̄mnde̍ŋ ni᷄ŋ chi̍o̍o̍ ho̍ō ō chō ni̍.

²⁷Mi̍ māsāa̍ Hi̍lūām o̍ hɛ̍lī pūa̍a̍ ndūa̍a̍ si̍nā a̍ mɛ̄ŋnda̍ŋ o̍kɔ̄ɔ̄ ta̍u̍ ta̍u̍ wa̍, mbo̍ yɔ̄ŋ nda̍ le̍ mā kɔ̍ wa᷅ wa̍llo̍ a̍ dɛ̄ndɛ̄la̍ŋ nda᷅ŋ, nda̍ pūa̍a̍ Sɔ̍lɔ̍mɔ̄ŋ nda̍ lātūlu̍.

²⁸Mi̍ wānāa̍ ku̍ā a̍ dɛ̄ndɛ̄la̍ŋ nda᷅ŋ nda̍ ā kūā o̍ lɛ̄ŋndē O̍fɛ̍ɛ̄le̍ŋ ni᷄ŋ ma̍ kɔ̍ hu᷅ŋ a̍ ko̍o̍līi̍yo̍ŋ ta̍u̍ ta̍u̍. Ko̍o̍līi̍ŋ nda̍ chūu̍ Sɔ̍lɔ̍mɔ̄ŋ ndo̍ŋ, ŋ̄ wā lu̍su̍llo̍ le̍ pa᷅ŋnda̍ŋ wāa̍la̍ŋ be̍le̍-ya̍a̍ a̍ lā tīɔ̍ɔ̍ŋ (32,000).