Read Southern Kisi Māsāā Bɛ̍ndūāā Di̍i̍ŋ Ndūa̍a̍ 1 Bible Online

Māsāā Bɛ̍ndūāā Di̍i̍ŋ Ndūa̍a̍ 1 - Southern Kisi bible

Māsāā Bɛ̍ndūāā Di̍i̍ŋ Ndūa̍a̍ 1

¹A̍ te̍le̍ŋ ko̍ŋ, I̍sɔ̄lūɛ̍i̍ya̍ o̍ bā bɛ̄ŋgu̍ lɛ̄ŋndē Mo̍wa̍bīle̍ŋ le̍ wa̍ ni̍. Kɛ̍ mɛ̄ɛ̍ Māsā Bɛ̍ndōo̍ E̍ha̍bī, māsāa̍ I̍sɔ̄lūɛ̄ī o̍ sɔ̍la̍ pīɔ̍mndo̍, mi̍ wāŋnda̍ ha̍ā sīmūl I̍sɔ̄lūɛ̍i̍ya̍ ma̍ fūlā nda̍ o̍ bā bɛ̄ŋgu̍.

²Pāa̍le̍ pi᷅lɛ̍ le̍ wa̍, Māsā Bɛ̍ndōo̍ Āhāsa̍yā, o̍ wa̍ māsāa̍ Sāme̍e̍līāā chi̍e̍e̍ le̍ lɛ̄ŋndē I̍sɔ̄lūɛ̍i̍le̍ŋ ndo̍, ō lo̍ o̍ chīɛ̄ī ndɔ̍ lēmāsāa̍ chōo̍ cho̍o̍, mbo̍ hīālu᷄ŋ mbo̍ de̍l, ndu̍yɛ̍ mbo̍ yɔ̄ŋūlu᷄ŋ yɔ̍ŋūlɔ᷄ŋndo̍ pīla̍. Tē ō yɔ̄ŋu̍lu̍ŋ yɔ̍ŋūlɔ᷄ŋndo̍ ho̍ō pɛ̍, ō vēm ki̍i̍la̍a̍ le̍ mā kɔ̍ nyu̍nāl ndu̍ Bāālsi̍bɔ̄ɔ̄ mɛ̄lɛ̄ka̍ wāŋnda̍ Ɛ̍ki̍lɔ̄ŋ a̍ pi̍ɛ̍īyo̍ le̍ mbō chɔ᷄m nda̍ tē ō chō chīndā ɔ̄ɔ̄ tē ō cho̍ chi̍ndā le̍. Mi̍ ki̍i̍la̍a̍ mālnu᷄ŋ ma̍ bīī kɔ̄la̍ŋ.

³Kɛ̍ mi̍ ki̍i̍la̍nɔ̍ Mɛ̄lɛ̄ka̍ Ya̍a̍wɛ̄ɛ̄ wo̍ ō dīmūl wāna̍ su̍a̍ā le̍ Mɛ̄lɛ̄ka̍ wo̍ Īla̍a̍chā, wānā wa̍ā Ti̍bi̍sī chi̍e̍e̍ āā, “Kɔ̍ mā kɔ̍ nyu̍nā ki̍i̍la̍a̍ Māsā Bɛ̍ndōo̍ Āhāsa̍yā o̍ ve᷅m ka̍ŋ nda̍ āā, ‘Bāā mɛ̄lɛ̄ka̍ o̍ mɛ̄lɛ̄ka̍ cho̍ I̍sɔ̄lūɛ̄ī ō nya̍ nyūnā di̍ōm tē, mɛ̄ɛ̍ Bāāl Sɛ̍bɔ̄ɔ̄, mɛ̄lɛ̄ka̍ wāŋnda̍ Ɛ̍ki̍lɔ̄ŋ a̍ pi̍ɛ̍īyo̍ mī lā nyūna̍ dīo̍m?

⁴Di̍mu̍l nda̍ mā kɔ̍ di̍mūl Māsā Bɛ̍ndōo̍ Āhāsa̍yā māā nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ho̍ō ni̍, ō dīmi̍ māā, nāa̍ o̍ cho̍ ka̍ŋ i̍hi̍ni̍ o̍ kpēlē a̍ na̍a̍ wa̍ ō cho̍ chɔ̍nɔ᷄ŋ te̍. Ō chō lō īhīni̍ lo̍ŋ mbō sɔ̄la̍ pīɔ̍mndo̍.’ ” Mi̍ Īla̍a̍chā ku̍ā mbo̍ kɔ̍ di̍mūl ki̍i̍la̍a̍ Āhāsa̍yā ve᷅m nda̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍.

⁵Ki̍i̍la̍a̍ ha̍ā bɛ̍ɛ̍ mɛ̄ɛ̍ nda̍ tūēī dīōmndo̍ ho̍ō, ā hīu̍ lɛ̍ lāchī a̍ kɔ̄la̍ŋ te̍ ma̍ mūli᷄ŋ ma̍ mīīŋgū māsāa̍ o̍ ībūŋ. Mɛ̄ɛ̍ nda̍ mīīŋgu̍, mi̍ Māsā Bɛ̍ndōo̍ Āhāsa̍yā nyu̍nā nda̍ āā, “Lā vɛ᷅ mīīŋgōo̍ ho̍ō na̍nu᷄ŋ?”

⁶Ma̍ dīmūl ndu̍ āā, “Ŋ̄ wa̍ kɔ̄la̍ŋ mi̍ ŋ̄ bɔ̄ŋa᷅ŋ a̍ po̍ pi᷅lɛ̍, o̍ nɛ̄ī, mbo̍ dīmūl na̍a̍ māā na̍a̍ ŋ̄ hu᷄ŋ mī ŋ̄ hu᷄ŋ di̍mūl nu̍m, māā nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ho̍ō ni̍. Māā Mɛ̄lɛ̄ka̍ dīmi̍ āā, ‘Āhāsa̍yā, bāā I̍sɔ̄lūɛ̍i̍ya̍ nɔ̍ mɛ̍lɛ̄ka̍ o̍ mɛ̄lɛ̄ka̍ mā nyu̍na̍ ndu̍ dīōm te̍, mɛ̄ɛ̍ Bāāl Si̍bɔ̄ɔ̄ mɛ̄lɛ̄ka̍ wāŋnda̍ Ɛ̍ki̍lɔ̄ŋ a̍ pi̍ɛ̍ī yo̍ mā kɔ̍ nyu̍nā dīo̍m? Le̍ nyɛ̄ ŋ̄ tōsa̍ ko̍ŋ ndo̍, a̍ cho̍ chɔ̍nɔ᷄ŋ a̍ nāā ŋ̄ hīni̍ ho̍ō wo̍ le̍, ā chō pīɔ̍mndo̍ sɔ̄lā.’ ”

⁷Mi̍ Māsā Bɛ̍ndōo̍ Āhāsa̍yā nyu̍nā nda̍ āā, “Po̍ di̍mu̍l nya̍ yōōŋgū kālāa̍ wo̍ vɛ̄ɛ̍nɛ̍ o̍ cho̍ yɛ̍?”

⁸Ma̍ dīmūl ndu̍ āā, “Nyɛ̄la̍ cho̍ ndu̍ lēkɔ̄ɔ̍ la̍ŋ, a̍ yāu̍ vīsīo̍o̍ la̍ cho̍ lā tōōsīāā ni̍. Ndu̍yɛ̍ yāu̍le̍ yāu̍ vīsīo̍o̍ lē chō ndu̍ lē kānda᷄ŋ o̍ chāŋ ni̍.” Mi̍ Māsā Bɛ̍ndōo̍ Āhāsa̍yā di̍mūl nda̍ āā, “Ō cho̍ wa̍nā che᷅le̍ŋ te̍, Īla̍a̍chā wānā wa̍ā Ti̍bi̍sī chi̍e̍e̍ ni̍.”

⁹O̍ ko̍ŋ, mi̍ Māsā Bɛ̍ndōo̍ Āhāsa̍yā vi̍ām wānāa̍ wa̍ pūa̍a̍ ndūa̍a̍ chɔ̄ūwa̍ bōlle̍ŋ nda̍ ō pīlɛ̍, a̍ pūāā chɔ̄ūwa̍ ŋ̍wa᷅ŋ be̍le̍-ŋu̍ɛ̍ɛ̍nu̍a̍a̍ wa̍ wānā ko̍ŋ o̍ bā bɛ̄ŋgu̍ wa̍ le̍ ma̍ kɔ̍ bi̍ī Īla̍a̍chā. Mɛ̄ɛ̍ nda̍ fūūlu̍u̍ nāa̍ Īla̍a̍chā chu̍a̍, nāa̍ o̍ wa̍ o̍ pēmbēi̍ chōo̍ wa̍, mi̍ bōlle̍ pūa̍a̍ chɔ̄ūwa̍ ha̍ā ō dīmūl Īla̍a̍chā āā, “Nūm wāna̍ Mɛ̄lɛ̄ka̍ā ho̍ō, māsā bɛ̍ndōo̍ vēm na̍a̍ nu̍m kɔ̄ɔ̄lī, le̍la̍ŋ to̍l na̍nu᷄ŋ chɔ̍ chɔ̍ mā hīōū le̍ kɔ̄la̍ŋ”

¹⁰Mi̍ Īla̍a̍chā di̍mūl ndu̍ āā, “Tē wāna̍ Mɛ̄lɛ̄ka̍a̍ ya̍ I̍ cho̍ lēkɛ̍ndɛ̍ī ni̍, mɛ̄ɛ̍ Mɛ̄lɛ̄ka̍ yɔ᷄ŋ yi᷅ŋnde̍ŋ mī lē fūlā chōo̍ cho̍o̍ o̍ lē pīlɛ̍ ni᷄ŋ kpe̍ nūm ni̍, pūa̍a̍ nu̍mnda̍ ni̍ mī lē hu᷄ŋ di̍ū nya̍.” Mɛ̄ɛ̍ o̍ di̍mi̍ le̍nde̍, o̍ lē pīlɛ̍ ni᷄ŋ kpe̍, mi̍ yīŋnde̍ŋ lē fūlā chōo̍ cho̍o̍. Lāŋu̍nɔ̄ kōŋ ni̍, pūa̍a̍ chɔ̄ūwāā ŋ̄wāŋ be̍le̍-ŋu̍ɛ̍ɛ̍nu̍a̍a̍ o̍ wa̍ bōlle̍ŋ nda̍ ni̍, mi̍ lē hu᷄ŋ di̍ū nda̍ kpo̍u̍.

¹¹O̍ ko̍ŋ kɔ̍ɔ̍lī, mi̍ Māsā Bɛ̍ndōo̍ Āhāsa̍yā so̍lī vɛ̄lɛ̄ bōllē pūa̍a̍ chɔ̄ūwāā chēle̍ŋ ku̍ndā dīi̍ŋ ndɔ̄ɔ̍ a̍ pūa̍a̍ chɔ̄ūwāā ŋ̄wāŋ be̍le̍-ŋu̍ɛ̍ɛ̍nu̍a̍a̍ wānā ko̍ŋ o̍ wa̍ bōlle̍ŋ nda̍, mbo̍ vīām ndu̍ le̍ mbō kɔ̍ bi̍ī Īla̍a̍chā. O̍ ko̍ŋ, ndu̍ bɛ̍ɛ̍ mbo̍ chūā pūa̍a̍ ndūa̍a̍ chɔ̄ūwa̍ ma̍ kūā, mbo̍ kɔ̍ di̍mūl Īla̍a̍chā āā, “Nūm wāna̍ Mɛ̄lɛ̄ka̍a̍ ho̍ō, māsā bɛ̍ndōo̍ vēm na̍a̍ nu̍m kɔ̄ɔ̄lī, le̍la̍ŋ to̍l na̍nu᷄ŋ chɔ̍ chɔ̍ mā hīōū le̍ kɔ̄la̍ŋ.”

¹²Mi̍ Īla̍a̍chā di̍mūl ndu̍ āā, “Tē wāna̍ Mɛ̄lɛ̄ka̍a̍ ya̍ I̍ cho̍ lēkɛ̍ndɛ̍ī ni̍, mɛ̄ɛ̍ Mɛ̄lɛ̄ka̍ yɔ᷄ŋ yi᷅ŋnde̍ŋ fūlāa̍ chōo̍ cho̍o̍ o̍ lē pīlɛ̍ ni᷄ŋ kpe̍ nūm ni̍, pūa̍a̍ nu̍mnda̍ ni̍, mī lē hu᷄ŋ di̍ū nya̍ kpo̍u̍.” O̍ ko̍ŋ, o̍ lē pīlɛ̍ ni̍ŋ mi̍ yīŋnde̍ŋ le̍ cha᷄ŋ cho̍o̍ cho̍o̍ o̍ Mɛ̄lɛ̄ka̍ lo̍ mi̍ lē hu᷄ŋ di̍ū nda̍ kpo̍u̍.

¹³O̍ ko̍ŋ kɔ̍ɔ̍lī, mi̍ Māsā Bɛ̍ndōo̍ Āhāsa̍yā o̍ so̍lī vɛ̄lɛ̄ bōllē so̍vɛ̄i̍ya̍a̍ che᷅le̍ŋ a̍ pūa̍a̍ ŋ̍wa᷅ŋ be̍le̍-ŋu̍ɛ̍ɛ̍nu̍a̍a̍ wānā ko̍ŋ ō wa̍ bōlle̍ŋ nda̍, mbo̍ vīām nda̍. Kɛ̍ nda̍ nda̍ mɛ̄ɛ̍ nda̍ fūūlu̍u̍ nāa̍ Īla̍a̍chā o̍ wa̍ wa̍, mi̍ bōllē pūa̍a̍ chɔ̄ūwāā ŋ̄wāŋ be̍le̍-ŋu̍ɛ̍ɛ̍nu̍a̍a̍ ha̍ā ō kɔ̄ ba᷅ŋ Īla̍a̍chā wūla̍ŋ o̍ lābɛ̄ŋgu̍ ni̍ŋ, mbo̍ nyɔ̄ɔ̄lū ndu̍ āā, “Yāndi̍i̍ nūm wāna̍ Mɛ̄lɛ̄ka̍ ho̍ō, yi̍ya̍ŋ na̍a̍ chōo̍ mā chi̍i̍ndi̍a̍a̍ yōōmūlā nāāla̍ŋ. Ya̍ ni̍ pūa̍a̍ nīāā ŋ̍wa᷅ŋ be̍le̍-ŋu̍ɛ̍ɛ̍nu̍a̍a̍ ha̍ā ni̍, bu̍ɛ̍i̍yāā nūmnda̍ na̍a̍ ŋ̄ chō ni̍.

¹⁴Na̍a̍ ŋ̍ cho̍ pūa̍a̍ chɔ̄ūwa̍ bōlle̍ wa̍, ā ŋīɔ̍ɔ̍ŋ hi᷅ŋ ndɔ̄ a̍ pūa̍a̍ ndāa̍ lātūlu̍ le̍ nu̍m hūnɔ̄ɔ̍ bīyɔ̄ɔ̍ ni̍, mi̍ yīŋnde̍ŋ lē fūlā chōo̍ cho̍o̍ mi̍ lē hu᷄ŋ di̍ū nda̍ nda̍ nda̍ pūa̍a̍ ndāa̍ kpo̍u̍. Kɛ̍ na̍a̍ na̍a̍, yāndi̍i̍ tūīīnu̍ŋ na̍a̍ īnyīɛ̍ɛ̍, to̍sā mī ī yɔ̄nu̍ŋ a̍ na̍a̍ le̍nde̍ le̍. Le̍la̍ŋ to̍l ŋ̄ kɔ̄ŋnu᷅ŋ.”

¹⁵Mi̍ ki̍i̍la̍nɔ̍ Mɛ̄lɛ̄ka̍ Ya̍a̍wɛ̄ɛ̄ wo̍ ō dīmūl Īla̍a̍chā āā, “Yɔ᷅ŋ īsīōōŋ te̍ Īla̍a̍chā, to̍l lā kɔ̍ nya̍ nda̍ā.” O̍ ko̍ŋ, mi̍ Īla̍a̍chā tu̍āl ma̍ kūā nda̍ nda̍ā nāa̍ Māsā Bɛ̍ndōo̍ Āhāsa̍yā chu̍a̍.

¹⁶Mɛ̄ɛ̍ nda̍ fūūlu̍u̍, mi̍ Īla̍a̍chā lo᷅ o̍ ko̍ŋ mbo̍ dīmūl Māsā Bɛ̍ndōo̍ Āhāsa̍yā āā, “Māsāa̍ Āhāsa̍yā, ya̍ŋ ni᷅la̍ŋ mā tūēī nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍. Mɛ̄lɛ̄ka̍ dīmi̍ āā, ‘Le̍ yɛ̄ɛ̍nɛ̍ mā so̍li̍ ki̍i̍la̍a̍ mā vēm nda̍ le̍ mā kɔ̍ nyu̍nāl nu̍m Bāāl Sɛ̍bɔ̄ɔ̄, mɛ̄lɛ̄ka̍ wāŋnda̍ Ɛ̍ki̍lɔ̄ŋ dīōm? Bāā I̍sɔ̄lūɛ̍i̍ya̍ nɔ̍ mɛ̄lɛ̄ka̍ o̍ mɛ̄lɛ̄ka̍ mā nyu̍na̍ ndu̍ dīōm te̍? Le̍ nyɛ̄ ŋ̄ tōsa̍ ko̍ŋ ndo̍, nāa̍ ŋ̄ chō ho̍ō wo̍ a̍ cho̍ chɔ̍nɔ᷄ŋ a̍ ndu̍ le̍, ā chō lō īhīni̍ na̍nu᷄ŋ mā sɔ̍la̍ pīɔ̍mndo̍.’ ”

¹⁷Ndu̍yɛ̍ mi̍ ī yɔ̄nu᷄ŋ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ dīmūl Īla̍a̍chā yɛ̍. Mi̍ Āhāsa̍yā sɔ̍lā pīɔ̍mndo̍. Kɛ̍ Māsā Bɛ̍ndōo̍ Āhāsa̍yā ndu̍ o̍o̍ vi̍lu̍ chu̍ā wa᷅na̍ pɔ̍nɔ̍ le̍. Le̍ he̍ī, mɛ̄ɛ̍ o̍ vi᷅, mi̍ Cho̍lūām wa᷅na̍ ndɔ̄ mi̍i̍ŋgū māsā bɛ̍ndōo̍ o̍ fōōfo̍ ndɔ̄ɔ̍. Mɛ̄ɛ̍ Chɛ̄ho̍lūām, po̍ Chɛ̄hōsi̍a̍fa̍tī wo̍ ō sīmnu᷄ŋ māsā bɛ̍ndōo̍ Chu̍dā, ō tōsa̍ wɔ̄sīo̍o̍ ō pīlɛ̍, tīɔ̍ɔ̍ŋ ndɔ̄ɔ̍, Cho̍lūām si̍mnu᷄ŋ ma̍sāa̍ I̍sɔ̄lūɛ̄ī ni̍.

¹⁸Sɔ̄ɔ̍ŋ tɔ᷅ŋ chēle̍ŋ yɔ̍nu̍ŋ o̍ māsāle̍ Āhāsa̍yā le̍ŋ bɛ̍ŋgu̍ wo̍ŋ ki̍nɛ̍i̍, a̍ nyɛ̄ o̍ nyɛ̄ o̍ to̍sa̍ o̍ māsāle̍ ndɔ̄le̍ŋ ni᷄ŋ mu̍ŋ kpo̍u̍ ŋ̄ chō ŋ̄ pōōnyīāā o̍ yāu̍ sɔ̄ɔ̍ŋ pa̍a̍ndu̍ cho̍ a̍ māsāā bɛ̍ndūa̍a̍ I̍sɔ̄lūɛ̄ī o̍kɔ̄ɔ̄ wo̍ ni᷄ŋ.