Read Southern Kisi Māsāā Bɛ̍ndūāā Di̍i̍ŋ Ndūa̍a̍ 10 Bible Online

Māsāā Bɛ̍ndūāā Di̍i̍ŋ Ndūa̍a̍ 10 - Southern Kisi bible

Māsāā Bɛ̍ndūāā Di̍i̍ŋ Ndūa̍a̍ 10

¹Ndu̍yɛ̍ pūa̍a̍ fu̍la̍ o̍ yu̍ŋgu̍ Māsā Bɛ̍ndōo̍ E̍ha̍bī wo̍ chōo̍ wa̍, māsāa̍ Sāme̍e̍līāā, ā wa̍ ŋ̄wāŋ be̍le̍-ŋɔ̍mmɛ̍ū. Mi̍ Chɛ̍hū lo᷅ o̍ ko̍ŋ, mbo̍ pōōnyīāā yāu̍la̍ŋ mbo̍ yɔ̄ŋ nāa̍ wāŋnda̍ Sāme̍e̍līāā chu̍a̍, wānāa̍ wa̍ chi̍o̍o̍ chīla̍ŋ nda̍, a̍ lāŋgba̍ā kālāā chi̍e̍e̍ya̍, a̍ wānāa̍ wa̍ yu̍ŋgu̍ E̍ha̍bī wo̍ māndāa̍ wa̍. Mbo̍ dīmūl nda̍ o̍ yāu̍la̍ŋ nda᷅ŋ ni᷄ŋ āā,

²“Pūa̍a̍ fu̍la̍ o̍ yu̍ŋgu̍ E̍ha̍bī wo̍ chōo̍ wa̍ ā chō nya̍ o̍ bɛ̄ŋgu̍ cho̍o̍ lo̍ŋ. Ndu̍yɛ̍ lā nɔ̄ su̍a̍ā chɔ̄ūwa̍ a̍ nyɛ̄lā chɔ̄ūlā su̍a̍a̍ ā nāŋ nda̍ŋ, o̍ ko̍ŋ kɔ̍ɔ̍lī, a̍ wōlɔ̄ɔ̄lā chɔ̄ūla̍ŋ ta̍u̍ ta̍u̍. Ō fūla̍ o̍ ko̍ŋ kɔ̍ɔ̍lī, chi̍e̍e̍ nyāa̍, chi̍e̍e̍ cho̍ ō tōōsīāā ō kālā ka̍lā yɔ̄ŋi̍ ya̍a̍mɔ̍ɔ̍wa̍ ā bīi̍ ndu̍ wo̍, o̍ cho̍ ni̍. Le̍la̍ŋ tē lā sɔ̄la̍ dɔ̍ɔ̍ yāu̍la̍ŋ nda᷅ŋ pɛ̍,

³I̍ ye̍e̍ma̍ mī lā hɛ̄li̍ wānā pi᷅lɛ̍ o̍ yu̍ŋgu̍ E̍ha̍bī wo̍ tɛ̄ɛ̄ŋ, wāna̍ nya̍ chā nu̍a̍ā māā ō bɛ̄nda̍ le̍ mbō wa̍ māsāa̍ wo̍, mī lā sīīŋgu̍u̍ ndu̍ māsā bɛ̍ndōo̍ o̍ fōōfo̍ fi̍nyā ndɔ̄ɔ̍. Ndu̍yɛ̍ mī lā bɛ̄ɛ̄ndi̍a̍ŋ le̍ sɔ̍ŋgɔ̄ɔ̍ le̍ yūŋgu̍ Māsānɔ̍ nyāa̍, mī lā chīɔ̍u̍ yōōmūlā ndāla̍ŋ.”

⁴Mɛ̄ɛ̍ wāŋnda̍ Sāme̍e̍līāā a̍ sɔ̍la̍ yāu̍la̍ŋ nda᷅ŋ, mi̍ sīōōŋnde̍ bīī nda̍. Ma̍ dīmī āā, “Māsāā bɛ̍ndūa̍a̍ ā ŋīɔ̍ɔ̍ŋ kpu̍lu̍ku̍u̍, ā nɔ̄la̍ mā sīmu̍l Chɛ̍hū le̍, na̍a̍ ŋ̍ ku̍ā ndu̍ sīmūl ni̍?”

⁵O̍ ko̍ŋ, wānāa̍ wa̍ chīɛ̄ī lēmāsāa̍ bōlle̍ŋ nda̍ ni̍, māsa̍ chi̍o̍o̍ ni̍, lāŋgba̍ā kālāā chi̍e̍e̍ya̍ ni̍, a̍ wānāa̍ wa̍ yu̍ŋgu̍ E̍ha̍bī wo̍ māndāa̍ wa̍, ma̍ chāl dīōm pīlɛ̍ ma̍ pōōnyīāl Chɛ̍hū yāu̍wo̍. Ma̍ dīmūl ndu̍ āā, “Bu̍ɛ̍i̍yāā nūmnda̍ na̍a̍ ŋ̄ chō ni̍, fāllo̍. Ndu̍yɛ̍ nyɛ̄ o̍ nyɛ̄ ŋ̄ dīmu̍l na̍a̍ le̍ tōsāa̍ pɛ̍, ŋ̄ cho̍ ā bɛ̄ɛ̄ndīa̍ŋ le̍ mī ŋ̄ tōsa̍ ndu̍. Kɛ̍ na̍a̍ ŋ̄ cho̍ wānā o̍ wānā chu̍a̍ o̍ lēmāsā le̍. Le̍la̍ŋ, nyɛ̄ o̍ nyɛ̄ ŋ̄ yīya̍ŋ pɛ̍ māā ō bɛ̄nda̍ fāllo̍ to̍sa̍.”

⁶O̍ ko̍ŋ kɔ̍ɔ̍lī, mi̍ Chɛ̍hū mi̍ŋgūl nda̍ yāu̍wo̍ mbo̍ dīmūl nda̍ āā, “Tē lā chō pɛ̍ ku̍mbū nūu̍, mi̍ lā wā ā bɛ̄ɛ̄ndīa̍ŋ le̍ nyɛ̄ ya̍ I̍ di̍mūl nya̍ wo̍ tōsāa̍, mɛ̄ɛ̍ wānāa̍ fu̍la̍ o̍ yu̍ŋgu̍ E̍ha̍bī wo̍ chōo̍ ma̍ wā nya̍ o̍ bɛ̄ŋgu̍ cho̍o̍ lo̍ŋ nda̍ ki̍nɛ̍i̍, sīɔ̄dīi̍ a̍ te̍le̍ŋ wa̍ā nu̍a̍ā, I̍ ye̍e̍ma̍ mī che᷅ bōllīī ndɛ̄i̍ Chɛ̍si̍lūɛ̄ɛ̄ na̍nu᷄ŋ.” Ndu̍yɛ̍ wānāa̍ fu̍la̍ o̍ yu̍ŋgu̍ E̍ha̍bī wo̍ chōo̍ ma̍ wā Sāme̍e̍līāā wa̍, ā wa̍ ŋ̄wāŋ be̍le̍-ŋɔ̍mmɛ̍ū. Ndu̍yɛ̍ ŋ̄wāŋ be̍le̍-ŋɔ̍mmɛ̍ūwa̍ ha̍ā ki̍nɛ̍i̍, wāŋ bɛ̄ndūa̍a̍ wa̍ Sāme̍e̍līāā bōlle̍ŋ nda̍ o̍ bɛ̄ŋgu̍ cho̍o̍ nda̍ wa̍ ni̍, nda̍ wa̍ nda̍ māndāa̍ ni̍.

⁷Mɛ̄ɛ̍ wāŋnda̍ Sāme̍e̍līāā a̍ sɔ̍la̍ yāu̍ Chɛ̍hū mi̍ŋgu̍l nda̍ ho̍ō wo̍, ma̍ bīī pūa̍a̍ be̍le̍-ŋɔ̍mmɛ̍ūwa̍ ha̍ā, ma̍ kīlī nda̍ bōlle̍ ma̍ dūāū o̍ kāmbɛ̍i̍la̍ŋ ni᷄ŋ, ma̍ yɔ̄ŋ ndi̍ Chɛ̍si̍lūɛ̄ɛ̄.

⁸Mɛ̄ɛ̍ nda̍ dīmu̍l Chɛ̍hū māā pūa̍a̍ fu̍la̍ o̍ yu̍ŋgu̍ E̍ha̍bī wo̍ chōo̍ ma̍ wā Sāme̍e̍līāā wa̍ ā hīŋ a̍ bōllīī ndɛ̄i̍, mi̍ Chɛ̍hū di̍mūl nda̍ le̍ mā kūɛ̄ a̍ ndi̍ o̍ dīō kpāki̍ chi̍o̍o̍ sōndōo̍, mā kɔ̍ di̍ī ndi̍ ku̍ndāla̍ŋ lā tīɔ̍ɔ̍ŋ ndo̍ŋ, mī ī lo̍ lo̍ŋ ha̍a̍a̍ mī pāa̍le̍ŋ lē sɛ̄.

⁹Mɛ̄ɛ̍ pāa̍le̍ŋ lē sɛ̄ dīi̍mā ndɔ̄ɔ̍, mi̍ Chɛ̍hū ku̍ā o̍ dīō kpāki̍ chi̍o̍o̍, mbo̍ kɔ̍ si᷅m nāa̍ wāŋnda̍ kpo̍u̍ a̍ cha᷅ ndu̍ wa̍. Mbo̍ dīmūl wāŋnda̍ āā, “Pīɔ̍m Cho̍lūām ndo̍, ō cho̍ nya̍ le̍ tɔ̍ɔ̍ya̍ŋ ndɔ̄ɔ̍ ō chō chōo̍ le̍, ya̍ chōo̍ o̍ cho̍ ni̍. Ya̍ yi̍i̍ māsānɔ̍ nūu̍ de̍fo̍o̍ ni̍, mi̍ lo᷅ o̍ ko̍ŋ mi̍ di̍ī ndu̍. Kɛ̍ ā nda̍ dīu̍ ha̍ā mi̍ bōlīī ndɛ̄i̍ ī wā na̍nu᷄ŋ nda̍ yɛ̍, ō nɛ̄ɛ̍nɛ̍ di̍u̍ yɛ̄ nda̍?

¹⁰He̍ī chɔ᷅m nya̍ ni̍, māā nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ a̍ chīɛ̍i̍ E̍ha̍bī wo̍ o̍kɔ̄ɔ̄, ō pīlɛ̍ bɛ̍ɛ̍ ō de᷅l lɛ᷅ŋ te̍, mɛ̄ɛ̍ mbō chīŋa̍ lāsōndō. Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ dɔ̍ū lɔ̍ɔ̍ ko̍ŋ wāna̍ su̍a̍ā le̍ ndu̍ wo̍ Īla̍a̍chā wānā wa̍ā Ti̍bi̍sī chi̍e̍e̍ o̍ sōndō mbo̍ dīmī ndu̍ a̍ chīɛ̍i̍ E̍ha̍bī wo̍ o̍kɔ̄ɔ̄ wo̍, ndu̍ pɛ᷅ ho̍ō lāsōndō ni̍.”

¹¹O̍ ko̍ŋ kɔ̍ɔ̍lī, wānā o̍ wāna̍ fu̍la̍ o̍ yu̍ŋgu̍ E̍ha̍bī wo̍ chōo̍ mbo̍ wā Chɛ̍si̍lūɛ̄ɛ̄ chi̍e̍e̍, mi̍ Chɛ̍hū mu̍li᷄ŋ mbo̍ dīū nda̍ kpo̍u̍. O̍ ko̍ŋ kɔ̍ɔ̍lī, wānāā bɛ̄ndūa̍a̍ wa̍ E̍ha̍bī o̍ bā bɛ̄ŋgu̍ wa̍ ni̍, chāāŋāā ndūa̍a̍ nda̍ a̍a̍ chi̍ī ba̍lta̍ŋ nda̍ ni̍, wānāā ndūāā so̍līāā lāsa̍lāa̍ ni̍, nda̍ bɛ̍ɛ̍ mi̍ Chɛ̍hū dīū nda̍ kpo̍u̍, ō pīlɛ̍ bɛ̍ɛ̍ ō mɛ̄i̍ le̍.

¹²O̍ ko̍ŋ kɔ̍ɔ̍lī, mi̍ Chɛ̍hū ma̍lnu᷄ŋ mbo̍ bīī kɔ̄la̍ŋ Sāme̍e̍līāā. Mɛ̄ɛ̍ o̍ fu̍u̍lu̍u̍ Bɛ̄tī Ɛ̍kɛ̍dī, o̍ dɔ̍ɔ̍ŋgɔ̍ wānāā māndāā lāsāa̍,

¹³mbo̍ kōmāl wānāya̍ŋ Māsāa̍ Āhāsa̍yā wo̍ŋ ŋ̄ pūm ndo̍ŋ. Mbo̍ nyūnā nda̍ āā, “O̍ yu̍ŋgu̍ kūɛ̍ɛ̍nɛ̍ cho̍o̍ nya̍ fūla̍ yɛ̍?” Mi̍ wāŋnda̍ dīmūl ndu̍ āā, “Māsā Bɛ̍ndōo̍ Āhāsa̍yā o̍ wa̍ Chu̍dā wo̍ na̍a̍ nda̍ā wānāyɛ̍i̍ na̍a̍ ŋ̄ chō ni̍. Ŋ̄ chō kɔ̄la̍ŋ Chɛ̍si̍lūɛ̄ɛ̄. Māsā Bɛ̍ndōo̍ Chɛ̍si̍bɛ̄ɛ̄ chūāā ndūa̍a̍ a̍ wānāā tūa̍a̍ cho̍ o̍ chīɛ̄ī lēmāsāa̍ ni᷄ŋ nda̍, nda̍ na̍a̍ ŋ̄ chō kɔ̄la̍ŋ yīlɔ̄ɔ̍ ni̍, le̍ nyɛ̍ pa̍la̍ nda̍ wo̍.”

¹⁴Mi̍ Chɛ̍hū di̍mūl pūa̍a̍ wa̍ ndu̍ kɔ̄ɔ̄lī wa̍ āā, “Lā bīu̍ nda̍ kpo̍u̍.” Mi̍ pūa̍a̍ bīū nda̍ kpo̍u̍, ma̍ kūā a̍ nda̍ o̍ so̍o̍ŋ wa̍ Bɛ̄tī Ɛ̍kɛ̍dī lo̍ŋ ndo̍, ma̍ kɔ̍ di̍ū nda̍ lo̍ŋ kpo̍u̍. Ā wa̍ ŋ̄wāŋ be̍le̍-hi̍ɔ̍ɔ̍lu̍ a̍ wānāā ŋīɔ̍ɔ̍ŋ, ō pīlɛ̍ bɛ̍ɛ̍ ā mɛ̄i̍ le̍.

¹⁵O̍ ko̍ŋ kɔ̍ɔ̍lī, mi̍ Chɛ̍hū hi̍a̍ū lāchī a̍ kɔ̄la̍ŋ. O̍ ko̍ŋ, ma̍ bɔ̄ŋa᷅ŋ nda̍ po̍ pi᷅lɛ̍ dīōla̍ŋ āā Chōna̍da̍bī po̍ Lu̍e̍cha̍bī wo̍, ō wa̍ ndu̍ hūnɔ̄ɔ̍ yīlɔ̄ɔ̍. Chɛ̍hū wa̍ kɔ̄la̍ŋ o̍ nyɛ̄ nyāāna᷄ŋ su̍a̍a̍ ā nāŋ ndo̍ ni᷄ŋ. Mi̍ Chɛ̍hū yi᷅l ndu̍, mbo̍ nyūnā ndu̍ āā, “Ā chō le̍ ya̍ mɛ̄ɛ̍ ya̍ I̍ cho̍ le̍ nūm yɛ̍?” Mi̍ Chōna̍da̍bī di̍mūl ndu̍ āā, “Mɛ̄ɛ̍ ŋ̄ chō le̍ ya̍ yɛ̍ ko̍ni̍ ya̍ I̍ cho̍ le̍ nūm ni̍.” Mi̍ Chɛ̍hū di̍mūl ndu̍ āā, “Mɛ̄ɛ̍ yɔ̍ŋgu̍ bāa̍.” Mi̍ Chōna̍da̍bī si̍ɛ̍ndī bāa̍, mi̍ Chɛ̍hū sa̍ā ndu̍ bāa̍ mbo̍ hēēlū ndu̍ o̍ nyɛ̄ nyāāna᷄ŋ o̍ wa̍ kɔ̄la̍ŋndo̍ ni᷄ŋ.

¹⁶Mi̍ Chɛ̍hū di̍mūl ndu̍ āā, “ŋ̄ kɔ̍ mā kɔ̍ chɔ᷅ mɛ̄ɛ̍ ya̍ I̍ yɔ̍ŋgu̍ŋ o̍ Mɛ̄lɛ̄ka̍ Ya̍a̍wɛ̄ɛ̄ lo̍ yɛ̍.” O̍ ko̍ŋ, ma̍ kūā nda̍ ndu̍ Sāme̍e̍līāā chi̍e̍e̍.

¹⁷Ndu̍yɛ̍ wānāa̍ fu̍la̍ o̍ pūlāle̍ E̍ha̍bīle̍ŋ chōo̍ wa̍ ā ti᷄ŋ a̍ wa̍ wɔ̄ Sāme̍e̍līāā. Mɛ̄ɛ̍ Chɛ̍hū fu̍u̍lu̍u̍ Sāme̍e̍līāā mbo̍ di̍ū nda̍ kpo̍u̍. O̍ ko̍ŋ, mi̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l Īla̍a̍chā mi̍ Īla̍a̍chā o̍ di̍mī ndu̍ wo̍ ō chīŋā lāsōndō.

¹⁸O̍ ko̍ŋ kɔ̍ɔ̍lī, mi̍ Chɛ̍hū ve̍e̍lū wāŋnda̍ Sāme̍e̍līāā kpo̍u̍ na̍a̍ pi᷅lɛ̍, mbo̍ dīmūl nda̍ āā, “Māsā Bɛ̍ndōo̍ E̍ha̍bī o̍ ve̍ Bāāl sōōlūū a̍ kɔ̄l ndɔ̄ɔ̍ kpo̍u̍ le̍. Kɛ̍ ya̍ I̍ bɛ̍ɛ̍ndi̍a̍ŋ mī sa̍a̍ŋgi̍a̍l ndu̍ mbō hīōū māā ndu̍.

¹⁹Le̍la̍ŋ wa̍nāa̍ su̍a̍ā le̍ Bāāl wa̍ ni̍, wa̍nāa̍ so̍lī sa̍lāla̍ŋ o̍ ndu̍ lo̍ wa̍ ni̍, o̍ ko̍ŋ kɔ̍ɔ̍lī a̍ wānā o̍ wāna̍ so̍o̍lūū ndu̍, lā yōōŋgu̍ nda̍ kpo̍u̍, I̍ ye̍e̍ma̍ mī so̍li̍ sa̍lā bɛ̄ndōo̍ o̍ Bāāl lo̍. I̍ ye̍e̍ma̍ nda̍ kpo̍u̍ mā bɔ̄ɔ̄ŋi̍āŋ, wānā o̍ wāna̍ lo̍ kɔ̄ɔ̄lī o̍ sa̍lāa̍ ho̍ō sōlīo̍o̍ pɛ̍, pīɔ̍mndo̍ o̍ sɔ̍lā ni̍.” Wāŋnda̍ ha̍ā, ā sīna̍ nu̍a̍ā māā yāŋɔ̄ɔ̄le̍ŋ te̍ Chɛ̍hū o̍ ye̍ŋ nda̍ le̍ mbō dīu̍ nda̍ kpo̍u̍ nda̍ so̍o̍lūū ka̍ŋ Ba̍a̍l wa̍ le̍.

²⁰Mi̍ Chɛ̍hū lo᷅ o̍ ko̍ŋ mbo̍ dīmūl nda̍ āā, “Lā kɛ̄ɛ̄si̍a̍a̍ pa̍a̍le̍ na̍a̍ ŋ̄ bɔ̄ɔ̄ŋi̍āŋ na̍nu᷄ŋ kpo̍u̍ mī ŋ̄ hu᷄ŋ bi̍ī bɔ̄ŋa᷅ŋ bɛ̄ndōo̍ le̍ Bāāl sōōlūū wo̍ le̍ŋ.” O̍ ko̍ŋ, ma̍ kɛ̄ɛ̄sīāā pāa̍le̍ŋ mā dīmūl wānā o̍ wānā.

²¹Mi̍ Chɛ̍hū yɔ᷅ŋ dīōmnde̍ŋ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ kpo̍u̍, le̍ mī wānāa̍ so̍o̍lūū Bāāl wa̍ ā chūūŋgi̍āŋ kpo̍u̍. O̍ ko̍ŋ, nda̍ kpo̍u̍ ma̍ chūūŋgi̍āŋ, wāŋndo̍ ō pīlɛ̍ bɛ̍ɛ̍ ō lo̍ kɔ̍ɔ̍lī le̍. Ma̍ kūā o̍ chīɛ̄ī nda̍ sōōlūū Ba̍a̍l wo̍ ni᷄ŋ ma̍ kɔ̍ pi̍ɔ̄ cha̍, chɔ̍ŋ ba̍a̍ pīlɔ̍ɔ̍ mbo̍ kūā bāa̍ pīlɔ̍ɔ̍, kpo̍u̍ wāŋndā chīe̍e̍ya̍ wa̍ ā pīāā cha̍ cha̍.

²²Mi̍ Chɛ̍hū di̍mūl wāna̍ ma̍ndā do᷅māla̍ nda̍ wōōnūŋ le̍ Ba̍a̍l sōōlūūwo̍ la̍ŋ ndo̍ āā, “Kɔ̍ hu᷅ŋ a̍ dōmāla̍ŋ mā pi̍ɔ̍u̍ wāŋnda̍ mā wōūnu̍ŋ.” Mi̍ wāna̍ ma̍ndā do᷅māla̍ la̍ŋ ndo̍ ō kɔ̍ hu᷅ŋ a̍ la̍ŋ mbo̍ pīɔ̄ū wāŋnda̍.

²³O̍ ko̍ŋ kɔ̍ɔ̍lī, Chɛ̍hū ni̍, Chōna̍da̍bī po̍ Lu̍e̍cha̍bī wo̍ ni̍, ma̍ lūɛ̄ī chīɛ̄ī ni̍ŋ nāa̍ wāŋnda̍ ā wa̍ wa̍. Mi̍ Chɛ̍hū di̍mūl nda̍ āā, “Wānā o̍ wāna̍ so̍o̍lūū Mɛ̄lɛ̄ka̍ Ya̍a̍wɛ̄ɛ̄ I̍ ye̍e̍ma̍ nda̍ na̍nu᷄ŋ te̍. Wānāā na̍a̍ ŋ̄ yēēma̍ na̍nu᷄ŋ su̍e̍e̍ wa̍ nda̍ cho̍ wānāa̍ so̍o̍lūū Bāāl wa̍ ni̍. Le̍la̍ŋ lā mɛ̄ɛ̄ndi̍a̍ŋ nya̍ pi̍la̍ tɛ̄ɛ̄ŋ.”

²⁴O̍ ko̍ŋ kɔ̍ɔ̍lī, Chɛ̍hū ni̍, Chōna̍da̍bī ni̍, ma̍ kūā nāa̍ nda̍ sōlī sa̍lāa̍ wa̍, le̍ mā kɔ̍ so̍lī sa̍lāla̍ŋ a̍ sa̍lālā lūāmāāla̍ŋ. Chɛ̍hū ndu̍ o̍o̍ kɛ̍si̍ ni᷅ŋ pūa̍a̍ o̍ bɛ̍ɛ̄ ŋ̄wāŋ be̍le̍-ŋɔ̍ma̍a̍, mbo̍ dīmūl nda̍ āā, “Wānā o̍ wāna̍ cho̍ na̍nu᷄ŋ lā dīu̍ nda̍ kpo̍u̍, ō pīlɛ̍ bɛ̍ɛ̍ lā mɛ̍ī le̍. Wānā o̍ wāna̍ ma̍l ō pīlɛ̍ pɛ̍ mbō hɛ̄lu᷄ŋ, nūm ya̍ I̍ di̍ī sɔ̍ŋgɔ̍ ndɔ̄ɔ̍ ni̍.”

²⁵Dīmīo̍o̍ nu̍a̍ā mi̍ Chɛ̍hū chi̍ī sa̍lāa̍ ho̍ō sōlī, mbo̍ fūlā mbo̍ kɔ̍ di̍mūl wānāa̍ wa̍ ndu̍ māndāa̍ wa̍, a̍ pūa̍a̍ ā pīli̍a̍a̍ āā, “Lā lūɛ̍i̍ mī lā kɔ̍ di̍ū wāŋnda̍ ha̍ā kpo̍u̍, ō pīlɛ̍ bɛ̍ɛ̍ lā ma᷅l ndu̍ mbō kūɛ̄ le̍.” O̍ ko̍ŋ, mi̍ pūa̍a̍ lūɛ̄ī a̍ mɔ̄ɔ̄ŋ nda̍ŋ fāŋndo̍ŋ, ma̍ kɔ̍ di̍ū nda̍ kpo̍u̍, ō pīlɛ̍ bɛ̍ɛ̍ ā mɛ̄i̍ le̍. O̍ ko̍ŋ kɔ̍ɔ̍lī, ma̍ sōōlūū wānāā vīlɛ̍i̍ya̍a̍ ka̍ŋ o̍ bɛ̍ɛ̄. Ma̍ mūli᷄ŋ ma̍ lūɛ̄ī o̍ lu̍mūi̍ nda̍ kɛ̄sī Ba̍ā wo̍ ni᷄ŋ kpe̍e̍kpe̍i̍ o̍ chīɛ̄ī kōŋ ni᷄ŋ.

²⁶Ma̍ kɔ̍ chu̍ā Ba̍a̍l ō nda̍ tōōsīāā māā lēsūŋgbu̍ mā sōōlūū ndu̍ wo̍, ma̍ māl ndu̍ o̍ yīŋ,

²⁷ndu̍yɛ̍ ma̍ pēsī pēsī ndu̍ kpo̍u̍. O̍ ko̍ŋ kɔ̍ɔ̍lī, chīɛ̄ī nda̍ a̍a̍ so̍o̍lūū ko̍ŋ Ba̍a̍l lēni᷄ŋ ndo̍ ma̍ pēsī pēsī ndu̍, ma̍ sīīŋgūū ndu̍ nāa̍ su̍a̍lāā. Ndu̍yɛ̍, a̍ te̍le̍ŋndo̍ ho̍ō bɛ̍ɛ̍ chīɛ̄ī kōŋ ō chō wɔ̄ o̍ bā kōŋ chōo̍.

²⁸Mɛ̄ɛ̍ nu̍a̍ā Chɛ̍hū lo̍o̍ku̍ tōsā ni̍ mi̍ wāŋnda̍ I̍sɔ̄lūɛ̄ī a̍ pɛ̍ŋgī Bāāl sōōlūū wo̍.

²⁹Mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl Chɛ̍hū āā, “Nyɛ̄ o̍ nyɛ̄ ŋ̄ tōsa̍ a̍ yu̍ŋgu̍ E̍ha̍bī wo̍, kɔ̄l nūu̍ kpe̍e̍kpe̍i̍ ŋ̄ tōsa̍ ni̍. Ndu̍yɛ̍ le̍ dīōm ni̍ ŋ̄ tūēī ko̍ŋ, ma̍ tōsā nyɛ̄ ya̍ I̍ di̍mu̍l nu̍m ndo̍ wo̍, I̍ chu̍e̍l nu̍m būŋgɛ̄i̍ māā māsāā bɛ̍ndūa̍a̍ ke̍e̍kū ni̍ŋ I̍sɔ̄lūɛ̄ī ya̍, ā hīɔ̍ɔ̍lu̍ a̍ fu̍lā ni̍ŋ o̍ pūlāle̍ nu̍mnde̍ŋ chōo̍ ni̍.” Kɛ̍ Chɛ̍hū bɛ̍ɛ̍ mbo̍ tōsā nyɛ̍ bɛ̍nda̍ Mɛ̍lɛ̄ka̍ o̍ hɔ̄l te̍ wo̍. Mɛ̄lɛ̄ka̍ Ya̍a̍wɛ̄ɛ̄, o̍ cho̍ Mɛ̄lɛ̄ka̍ I̍sɔ̄lūɛ̍i̍ya̍ wo̍ nyɛ̄ sāwāla̍ ndɔ̄la̍ŋ lā dīmi̍ le̍ tōsāa̍ wo̍, Chɛ̍hū do̍u̍ kɔ᷅l ndɔ̄ɔ̍ kpo̍u̍ o̍ ndu̍ tōsāa̍ ni᷄ŋ te̍. Nāūwāā Chɛ̄lōbo̍wām o̍ tu̍u̍la̍ a̍ ko̍o̍līi̍yo̍ŋ māā mɛ̄lɛ̄ka̍ā ndɔ̄, ma̍ wa̍ Da᷅ŋ a̍ Bɛ̍tɛ̄ɛ̄l wa̍, ndu̍ bɛ̍ɛ̍ mbo̍ mūli᷄ŋ na̍u̍vāā kāŋ sōōlūūwo̍. Le̍ he̍ī, ndu̍ bɛ̍ɛ̍ mbo̍ tōsā mi̍ I̍sɔ̄lūɛ̍i̍ya̍ ā sīmnu᷄ŋ wa̍nāā yɔ̄ŋ wɔ̄ɔ̍ŋ Mɛ̄lɛ̄ka̍ o̍ hɔ̄l, mɛ̄ɛ̍ Chɛ̄lōbo̍wām o̍ to̍sa̍ yɛ̍.

³⁰

³¹

³²A̍ te̍le̍ŋ ko̍ŋ mi̍ Mɛ̄lɛ̄ka̍ Ya̍a̍wɛ̄ɛ̄ o̍ ka̍ndū lɛ̄ŋndē I̍sɔ̄lūɛ̍i̍le̍ŋ fāŋāa̍ lēcho̍ō. Lɛ̄ŋndē I̍sɔ̄lūɛ̍i̍le̍ wa̍ bā pāa̍le̍ŋ lē chāŋ ndo̍, le̍ kɔ̄la̍ŋ Chɔ̍ɔ̍dāŋ o̍ pēēlo̍ le̍ŋ ki̍nɛ̍i̍, būŋgɛ̄ī Ki̍li̍a̍a̍dīve̍ ni̍, a̍ būŋgɛ̄ī Ba̍a̍sīāŋnde̍, mi̍ Mɛ̄lɛ̄ka̍ tōsā mi̍ Māsāa̍ Ha̍sāāl o̍ wa̍ Si̍i̍līāā wo̍ ō yām nde̍ŋ mbo̍ pōōndā le̍ŋ I̍sɔ̄lūɛ̍i̍ya̍ o̍ bā. Chɔ̍ŋ Chɔ̍ɔ̍dāŋ o̍ pēēlo̍, mbo̍ tūūsū bā tōūwo̍, mbo̍ kūā a̍ A̍lo̍yā, chi̍e̍e̍ wa̍ le̍ kɔ̄la̍ŋ A̍nɔ̄ŋ o̍ pēēlo̍ wo̍, lɛ̄ŋndē le̍ŋ kpo̍u̍ Māsā Bɛ̍ndōo̍ Ha̍sāāl ndu̍ o̍o̍ nɔ̍ ni᷅ŋ ni̍. Ndu̍yɛ̍ yu̍ŋgu̍ Ka̍a̍dī wo̍ ni̍, yu̍ŋgu̍ Lūbɛ᷅ŋ ndo̍ ni̍, a̍ yu̍ŋgu̍ Mānāa̍sē wa̍ bā pāa̍le̍ŋ lē chāŋ ndo̍ wo̍, fo̍ndā ndāa̍ wa̍ ho̍ō ni̍.

³³

³⁴Sɔ̄ɔ̍ŋ tɔ᷅ŋ chēle̍ŋ yɔ̍nu̍ŋ o̍ māsāle̍ Māsā Bɛ̍ndōo̍ Chɛ̍hū le̍ŋ bɛ̄ŋgu̍ wo̍ŋ ki̍nɛ̍i̍, a̍ nyɛ̄ o̍ nyɛ̄ o̍ to̍sa̍, lātūlu̍ a̍ sɔ̄ɔ̍ŋ tɔ̍ɔ̍ŋ o̍ to̍sa̍ wo̍ŋ kpo̍u̍, ŋ̄ chō ŋ̄ pōōnyīāā o̍ yāu̍ sɔ̄ɔ̍ŋ pa̍a̍ndu̍ cho̍ a̍ māsāā bɛ̍ndūa̍a̍ I̍sɔ̄lūɛ̄ī o̍kɔ̄ɔ̄ wo̍ ni᷄ŋ.

³⁵O̍ ko̍ŋ kɔ̍ɔ̍lī, mi̍ Chɛ̍hū wu᷅, ndu̍yɛ̍ ma̍ chɔ̄ ndu̍ Sāme̍e̍līāā chi̍e̍e̍. O̍ ko̍ŋ, mi̍ Chɛ̄hōwa̍ha̍sī po̍ ndɔ̄ mi̍i̍ŋgū māsā bɛ̍ndōo̍ I̍sɔ̄lūɛ̄ī o̍ fōōfo̍ ndɔ̄ɔ̍.

³⁶Chɛ̍hū to̍sa̍ māsāle̍ŋ Sāme̍e̍līāā chi̍e̍e̍, o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ le̍ wɔ̄sīla̍ŋ bi̍dīi̍ŋ a̍ lā ŋɔ̄ma̍a̍.