Read Southern Kisi Māsāā Bɛ̍ndūāā Di̍i̍ŋ Ndūa̍a̍ 11 Bible Online

Māsāā Bɛ̍ndūāā Di̍i̍ŋ Ndūa̍a̍ 11 - Southern Kisi bible

Māsāā Bɛ̍ndūāā Di̍i̍ŋ Ndūa̍a̍ 11

¹Mɛ̄ɛ̍ Ātāla̍yā, kālāa̍ Māsāa̍ Āhāsa̍yā o̍ tu̍e̍ī māā ā dīī Āhāsa̍yā po̍ ndɔ̍, wānā o̍ wāna̍ fu̍la̍ o̍ yu̍ŋgu̍ lēmāsāa̍ chōo̍ Chu̍dā, mbo̍ dīmī ma̍ dīū nda̍ kpo̍u̍.

²Ndu̍yɛ̍ Māsāa̍ Chɛ̄ho̍lūām, o̍ vi᷅ wo̍ ndu̍ o̍o̍ nɔ̍ chūa̍a̍ dīōla̍ŋ āā Chɛ̄ho̍si̍ɛ̍bā. Bōōndi̍i̍ Ātāla̍yā o̍ wa̍ pūa̍a̍ Āhāsa̍yā wa̍ dīūwo̍ ve̍, mi̍ Chɛ̄ho̍si̍ɛ̍bā ko̍ŋ ō sōlī Cho̍wa̍sī, po̍ Māsā Bɛ̍ndōo̍ Āhāsa̍yā wo̍ sɔ̍ɔ̍sɔ̍ɔ̍. Mbo̍ chūā ndu̍ lātūlu̍ a̍ chūa̍ wa̍ ndu̍ māndāa̍ wo̍, mbo̍ kūā a̍ nda̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍, mbo̍ kɔ̍ vi̍ōŋ pōo̍mbɔ̄ɔ̍ ho̍ō o̍ lu̍mūi̍ mālɔ̄ɔ̍ ni᷄ŋ ndo̍ŋ. O̍ ko̍ŋ, mbo̍ chīīndīāā pōo̍mbɔ̄ɔ̍ ho̍ō, Ātāla̍yā o̍ di̍i̍ ndu̍ le̍.

³Le̍ wɔ̄sīla̍ŋ lā ŋɔ᷄mpu᷅m, pōo̍mbɔ̄ɔ̍ ho̍ō wa̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍, o̍ vīōŋnɔ᷄ŋndo̍ ni᷄ŋ. Ndu̍yɛ̍ Ātāla̍yā wa̍ ni᷅ŋ Māsā Bɛ̍ndōo̍ le̍ lɛ̄ŋnde̍ Chu̍dāle̍ŋ kpo̍u̍, a̍ te̍le̍ŋ ko̍ŋ ni̍.

⁴Mɛ̄ɛ̍ wɔ̄sīla̍ŋ lā hīōū lā ŋɔ᷄mpu᷅m o̍ ŋɔ᷄mmɛ̍ū wo̍, mi̍ Chɛ̄hōwa̍dā, wāna̍ so̍lī sa̍lāa̍ o̍ Mɛ̄lɛ̄ka̍ lo̍ wo̍ ō yōōŋgū pūa̍a̍ chɔ̄ūwāa̍ ma̍ndā ma̍sāa̍ wa̍, a̍ pūa̍a̍ ma̍ndā chi̍ɛ̍ī lēmāsāa̍ wa̍ bōllīī ndɛ̄i̍ ki̍nɛ̍i̍, ma̍ kōmāl ndu̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍. O̍ ko̍ŋ, mbo̍ chɔ̄m nda̍ nyɛ̄ o̍ kɛ̍ɛ̍si̍a̍a̍ le̍ tōsāa̍ wo̍. Ndu̍yɛ̍ nda̍ nda̍ā ma̍ yīī ō kālā ka̍lā, mbo̍ kē nda̍ sēndi̍o̍o̍ ma̍ mēna᷄ŋ. O̍ ko̍ŋ, mbo̍ kūā mbo̍ kɔ̍ so̍lī Cho̍wa̍sī, po̍ Māsā Bɛ̍ndōo̍ Āhāsa̍yā wo̍, nāa̍ o̍ wa̍ o̍ vīōŋnɔ᷄ŋndo̍ ni᷄ŋ nda̍, mbo̍ hūŋ a̍ ndu̍ nda̍ lāchī. Mbo̍ dīmūl nda̍ āā, “Pōo̍ ho̍ō ndu̍ nɔ̍ mbō sīmnu᷄ŋ ma̍sāa̍ ni̍.

⁵Ndu̍yɛ̍ nyɛ̄ nya̍ nɔ̄ le̍ tōsāa̍ wo̍ cho̍ ho̍ō ni̍. Nya̍ nɔ̍ le̍ wa̍llo̍ o̍ pāa̍le̍ pɛ̍ŋgīāāle̍ŋ chōo̍ wa̍ ki̍nɛ̍i̍, tē lā hīŋ pɛ̍, lā pīɔ̄ūvi̍āŋ ku̍ndāla̍ŋ sālā yāa̍, ku̍ndāa̍ ho̍ō wa̍ pɛ̍ chi̍ɛ̍ī lēmāsāa̍ māndāa̍,

⁶ku̍ndāa̍ ho̍ō si᷄m o̍ dīō sāāsāa̍ Sɔ̍ɔ̄, ku̍ndāa̍ pīlɔ̍ɔ̍ si᷄m o̍ dīō sāāsāa̍ a̍ mākɔ̄ɔ̄ nāa̍ wānāā mɛ̄ŋgɛ̄lāa̍ ā pīli̍a̍a̍ nda̍ a̍a̍ si᷅m nda̍.

⁷O̍ ko̍ŋ kɔ̍ɔ̍lī, ku̍ndālā tīɔ̍ɔ̍ŋnda̍ nda̍ a̍a̍ nɔ̍ le̍ pɛ̄ŋgīo̍o̍ pāa̍le̍ le̍ŋ nda̍ŋ, mī nda̍ hu᷄ŋ wa᷅ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ na̍nu᷄ŋ le̍ māsāa̍ māndāa̍.

⁸Nda̍ cho̍ wā māsā bɛ̍ndōo̍ ā bālāā a̍ mɔ̄ɔ̄ŋ nda᷄ŋ o̍ lābā le̍ ndu̍ māndāa̍ ni̍, bā o̍ bā māsā bɛ̍ndōo̍ ō kūɛ̄ pɛ̍, ā kūɛ̄ ndu̍ kɔ̄ɔ̄lī. Wānā o̍ wāna̍ ki̍ndi̍ le̍ nda̍ sɔ̄ɔ̄ŋgūūwo̍ īkɛ̄i̍ a̍ ka̍ka̍ pɛ̍ ā di̍i̍ ndu̍.”

⁹O̍ ko̍ŋ, mi̍ bōlīī pūa̍a̍ chɔ̄ūwāā Chɛ̄hōwa̍dā o̍ yo̍o̍ŋgu̍ ha̍ā wa̍ ā tōsā mɛ̄ɛ̍ o̍ di̍mu̍l nda̍ yɛ̍. Mi̍ wānā o̍ wānā hu᷅ŋ a̍ pūa̍a̍ chɔ̄ūwāā o̍ wa̍ bōlle̍ŋ nda̍, ā nda̍ a̍a̍ nɔ̍ le̍ wa̍llo̍ o̍ pāa̍le̍ pɛ̍ŋgīāāle̍ŋ chōo̍ wa̍ ni̍, a̍ ā nda̍ a̍a̍ nɔ̍ le̍ pɛ̄ŋgīo̍o̍ o̍ pāa̍le̍ le̍ŋ chōo̍ wa̍, nda̍ kpo̍u̍ ma̍ hūŋ.

¹⁰Ndu̍yɛ̍ ba̍lta̍ Dēēve̍ ndu̍ o̍o̍ sɔ̍ŋgā a̍ la̍ŋ nda̍ŋ ni̍, nyɛ̄lā kālā ka̍lāla̍ cho̍ māā bōo̍la̍ bɛ̍ndū le̍ pūa̍a̍ chɔ̄ūwa̍ māndāa̍ la̍ŋ, lā pɔ̄mbɔ̄ ni̍, lā bɛ̄ndū ni̍, mi̍ la̍ wā lā kɛ̄sīāā o̍ chīɛ̍i̍ Mɛ̍lɛ̄ka̍ Ya̍a̍wɛ̄ɛ̄ wo̍ ni᷄ŋ nda̍ŋ ni̍, mi̍ Chɛ̄hōwa̍dā, wānā so̍līāā lāsa̍lāa̍, ō chūā la̍ŋ mbo̍ kē wānāa̍ wa̍ pūa̍a̍ chɔ̄ūwa̍ bōlle̍ wa̍.

¹¹O̍ ko̍ŋ kɔ̍ɔ̍lī, mbo̍ sīmī pūa̍a̍ o̍ fo̍ndāŋnda̍ŋ kpɛ̍ kpɛ̍ a̍ wōlɔ̄ɔ̄lā chɔ̄ūla̍ŋ o̍ lābā. Mi̍ ha̍ā kɔ̍ ba̍lū chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ kpɔ̍kɔ̍su̍, nāa̍ Cho̍wa̍sī o̍ wa̍ wa̍, mɛ̄ɛ̍ ha̍ā si᷄m o̍ chīɛ̄īyo̍ bā tōūwo̍, mi̍ ha̍ā sīm bā lūāŋndo̍, mi̍ ha̍ā bālū ma̍āŋndo̍ kpɔ̍kɔ̍su̍.

¹²O̍ ko̍ŋ, mi̍ Chɛ̄hōwa̍dā ku̍ā mbo̍ kɔ̍ hu᷅ŋ a̍ Cho̍wa̍sī, po̍ Āhāsa̍yā wo̍. Mbo̍ chūā mɔ̍si̍l lēmāsāa̍ mbo̍ wōū ndu̍. O̍ ko̍ŋ kɔ̍ɔ̍lī, mbo̍ kē ndu̍ yāu̍ lāsāwa̍ Mɛ̄lɛ̄ka̍a̍. Ma̍ tālā ndu̍ chūɛ̄īya̍ŋ o̍ lēbōl, ma̍ sīīŋgūū ndu̍ Māsā Bɛ̍ndōo̍. Ma̍ dīmī chōo̍ cho̍o̍ āā, “Vi̍o̍u̍ na̍a̍ chōo̍ kɛ̍ndi̍a̍a̍ Māsā Bɛ̍ndōo̍ Cho̍wa̍sī.”

¹³Mɛ̄ɛ̍ Ātāla̍yā, Wānā La̍nɔ̍ Ma̍sāa̍ ō tūēī wānāa̍ wa̍ mɛ̄ŋgɛ̄lāa̍ wa̍, a̍ wānāā tūa̍a̍ dēŋīo̍o̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍, mbo̍ cha᷄ŋ mbo̍ kūā lo̍ŋ.

¹⁴Mɛ̄ɛ̍ o̍ fu̍u̍lu̍u̍, mbo̍ chā Cho̍wa̍sī īsīsi̍ o̍ sūŋgbu̍le̍ wa̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ dīō le̍ŋ īkɛ̄i̍, nāa̍ māsāā bɛ̍ndūa̍a̍ ā sīm nda̍, mɛ̄ɛ̍ o̍ wa̍ o̍ na̍a̍mu̍ ndāa̍ ni᷄ŋ yɛ̍. Pūa̍a̍ wa̍ Cho̍wa̍sī māndāa̍ wa̍, a̍ wānāā lābu̍lu̍a̍a̍, ā wa̍ Cho̍wa̍sī ā bālāā kpɔ̍kɔ̍su̍. Wāŋnda̍ wa̍ nya̍a̍lo̍o̍ kpe̍e̍kpe̍i̍ mā hūāŋ pu᷅tɛ̍nɛ̍i̍la̍ŋ. O̍ ko̍ŋ, mi̍ Māsāa̍ Ātāla̍yā sɛ̍ɛ̍sa᷄ŋ do᷅māa̍ lēkɔ̄ɔ̍, le̍ kɔ̄l ndɔ̄ ta̍mbɛ̍i̍yo̍ chɔ̄mndo̍ mbo̍ dīmī chōo̍ cho̍o̍ āā, “Ā yīi̍ ya̍ de̍fo̍o̍ fɔ̍!, Ā yīi̍ ya̍ de̍fo̍o̍!”

¹⁵Chɛ̄hōwa̍dā, wānā so̍līāā lāsa̍lāa̍ ndu̍ o̍o̍ ye̍e̍ma̍ mī nda̍ a̍a̍ di̍ī Ātāla̍yā o̍ la̍ū ba̍lu̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ ni᷄ŋ te̍. O̍ ko̍ŋ, mbo̍ dīmūl wānāa̍ wa̍ pūa̍a̍ chɔ̄ūwa̍ bōlle̍ wa̍ āā, “Lā bīi̍ ndu̍ mī lā sōli̍ ndu̍ pūa̍a̍ chɔ̄ūwa̍ tɛ̄ɛ̄ŋ mī lā kɔ̍ di̍ī ndu̍. Ndu̍yɛ̍ wānā o̍ wāna̍ ki̍ndi̍ le̍ ndu̍ chīīndīa̍a̍ pɛ̍, ndu̍ bɛ̍ɛ̍ lā dīi̍ ndu̍.”

¹⁶O̍ ko̍ŋ, mi̍ pūa̍a̍ bīī Ātāla̍yā ma̍ sāsū ndu̍ ma̍ kūā a̍ ndu̍ o̍ chīɛ̄ī lēmāsāa̍, ma̍ kɔ̍ di̍ī ndu̍ o̍ Dīō Su̍a̍a̍ o̍ fo̍ndā lēmāsāa̍.

¹⁷Mi̍ Chɛ̄hōwa̍dā, wānā so̍līāā lāsa̍lāa̍ ō tōsā, ndu̍ ni̍, Māsā Bɛ̍ndōo̍ Cho̍wa̍sī ni̍, a̍ wāŋnda̍ ā pīli̍a̍a̍ kpo̍u̍, ma̍ yīī kpe̍ma̍a̍ a̍ Mɛ̄lɛ̄ka̍ māā ā chō wā wānāa̍ Mɛ̄lɛ̄ka̍ Ya̍a̍wɛ̄ɛ̄ wa̍. Ndu̍yɛ̍ mbo̍ tōsā vɛ̄lɛ̄ mi̍ wāŋnda̍ Chu̍dā a̍ yi̍ī kpe̍ma̍a̍ a̍ māsa̍ ndā bɛ̍ndōo̍ Cho̍wa̍sī.

¹⁸O̍ ko̍ŋ kɔ̍ɔ̍lī, nda̍ kpo̍u̍ ma̍ cha᷄ŋ ma̍ kūā o̍ chīɛ̄ī nda̍ a̍a̍ so̍o̍lūū Bāāl wo̍ ni᷄ŋ, ma̍ pēsī pēsī ndu̍ ma̍ tɛ̄ɛ̄mbūū ndu̍ kpo̍u̍. Ma̍āŋndā nda̍ a̍a̍ so̍lī sa̍lāla̍ŋ lēchōo̍ o̍ Ba̍a̍l lo̍ la̍ŋ ni̍, nyɛ̄m nda̍ a̍a̍ so̍o̍lūū mu̍ŋ māā mɛ̄lɛ̄ka̍ā ndā wo̍ŋ ni̍, mu̍ŋ kpo̍u̍ ma̍ pēsī pēsī. O̍ ko̍ŋ kɔ̍ɔ̍lī, fi̍nyā ndu̍ o̍o̍ so̍lī sa̍lāla̍ŋ o̍ Ba̍a̍l lo̍ mā vēēlū ndu̍ āā Ma̍tāŋ ndo̍, ma̍ bīī ndu̍ ma̍ kɔ̍ di̍ī ndu̍ o̍ ma̍āŋndā lāŋ hɔ̄lndɔ̄. Mi̍ Chɛ̄hōwa̍dā wānā so̍līāā lāsa̍lāa̍ ō chūā pūa̍a̍ chɔ̄ūwa̍ ā ti᷄ŋ mbo̍ kɛ̄sī nda̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍, le̍ mā wa̍ ndu̍ māndāa̍.

¹⁹O̍ ko̍ŋ kɔ̍ɔ̍lī, ndu̍ ni̍, wānāa̍ wa̍ pūa̍a̍ chɔ̄ūwa̍ bōlle̍ wa̍ ni̍, pūa̍a̍ ma̍ndā ma̍sāa̍ wa̍ ni̍, pūa̍a̍ ma̍ndā chi̍ɛ̍ī lēmāsāa̍ wa̍ ni̍, a̍ wāŋnda̍ ā pīli̍a̍a̍ kpo̍u̍ ma̍ chūā Māsā Bɛ̍ndōo̍ Cho̍wa̍sī o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ lo̍ŋ, ma̍ kēī a̍ ndu̍ o̍ dīō wānāā mɛ̄ŋgɛ̄lāa̍ ā chāl lo̍, ma̍ kūā a̍ ndu̍ o̍ chīɛ̄ī lēmāsāa̍ ni᷄ŋ, ma̍ kɔ̍ kɛ̍sī ndu̍ o̍ kpe̍ŋgbe̍i̍ ndɔ̍ lēmāsāa̍ ni᷄ŋ.

²⁰Wāŋnda̍ kpo̍u̍ ma̍ dūāūnu᷄ŋ nya̍a̍le̍. Ndu̍yɛ̍ mi̍ kɔ̄l nyūlōo̍ mīīŋgū Chūlu̍sɛ̄lɛ̄m. Mɛ̄ɛ̍ nu̍a̍ā nda̍ lo̍o̍ku̍ Ātāla̍yā dīyɔ̄ɔ̄ a̍ mūɛ̄ī fāŋnde̍ o̍ chīɛ̄ī lēmāsāa̍ ni̍.

²¹Cho̍wa̍sī wa̍ wɔ̄sīla̍ŋ lā ŋɔ᷄mmɛ̍ū mbo̍ sīmnu᷄ŋ māsā bɛ̍ndōo̍ Chu̍dā.