Read Southern Kisi Māsāā Bɛ̍ndūāā Di̍i̍ŋ Ndūa̍a̍ 12 Bible Online

Māsāā Bɛ̍ndūāā Di̍i̍ŋ Ndūa̍a̍ 12 - Southern Kisi bible

Māsāā Bɛ̍ndūāā Di̍i̍ŋ Ndūa̍a̍ 12

¹Wɔ̄sī Māsā Bɛ̍ndōo̍ Chɛ̍hū, māsāa̍ le̍ I̍sɔ̄lūɛ̄ī o̍ chīŋa̍ wɔ̄sīla̍ŋ lā ŋɔ̍mmɛ̍ū o̍ lēmāsā Chu̍dā wo̍, wɔ̄sī kōŋ Cho̍wa̍sī si̍mnu᷄ŋ ma̍sāa̍ Chu̍dā ni̍. Ndu̍yɛ̍ mi̍ Cho̍wa̍sī to̍sā māsāle̍ŋ Chūlu̍sɛ̄lɛ̄m le̍ wɔ̄sīla̍ŋ be̍le̍-hi̍ɔ̍ɔ̍lu̍, chi̍e̍e̍ le̍bo᷅llo̍ le̍ lɛ̄ŋndē Chu̍dāle̍ŋ. Cho̍wa̍sī ko̍ŋ kāla̍ ndɔ̍ wa̍ Si̍bīāā ni̍, wānā wa̍ā Bīɛ̄ɛ̄si̍ɛ̍bā chi̍e̍e̍.

²Ndu̍yɛ̍ mi̍ Cho̍wa̍sī o̍ to̍sā nyɛ̍ hi̍nī Mɛ̄lɛ̄ka̍ Ya̍a̍wɛ̄ɛ̄ kɔ̄llo̍, chɔ̍ŋ ha̍a̍a̍ a̍ pālɛ̍i̍ Chɛ̄hōwa̍dā wānā so̍līāā lāsa̍lāa̍ ō wa̍ īchāli̍ ve̍. Kāni̍ fu̍u̍le̍, le̍ mɛ̄ɛ̍ o̍ to᷅l sīlālā Chɛ̄hōwa̍dā, wānā so̍līāā lāsa̍lāa̍ ō sīla̍ ndu̍ la̍ŋ kɔ̄ɔ̄lī yɛ̍.

³Kɛ̍ a̍ sɔ̄ɔ̍ŋ kɛ̍ndɛ̄ŋ o̍ to̍sa̍ mu̍ŋ ndo̍ŋ kpo̍u̍, fo̍ndāŋndā wāŋnda̍ nda̍ a̍a̍ so̍o̍lūū mɛ̄lɛ̄ka̍ā ndāa̍ yɛ̍ yi̍a̍a̍ la̍ŋ ki̍nɛ̍i̍, ō tɛ̄ɛ̄mbu̍u̍ la̍ŋ te̍, wāŋnda̍ wa̍ wɔ̄ hīōūwɔ̄ɔ̍ lāchī a̍ sa̍lāla̍ŋ sōlīo̍o̍ o̍ fo̍ndāŋndā lāŋ mā lūām nyɛ᷅m chūŋ kɛ̄ndɔ᷄ŋ ndo̍ŋ.

⁴Pāa̍le̍ pi᷅lɛ̍, mi̍ Cho̍wa̍sī ve̍e̍lū wānāa̍ so̍lī sa̍lāla̍ŋ o̍ Mɛ̄lɛ̄ka̍ lo̍ wa̍ nāa̍ pi᷅lɛ̍, mbo̍ dīmūl nda̍ āā, “Nyɛ̄ sɔ̄lāā o̍ nyɛ̄ sɔ̄lāā wāŋnda̍ chō hūnɔ̄ɔ̍ o̍ chīɛ̍i̍ Mɛ̄lɛ̄ka̍a̍ ni᷄ŋ, pāāwā lēlɛ̄ŋ wānā o̍ wānā nɔ̍ le̍ yɔ̄ŋgōo̍ wo̍ ni̍, a̍ nyɛ̄ sɔ̄lāā wāŋnda̍ ā pāāwā le̍ būŋga᷄ŋ chūa̍a̍ Mɛ̄lɛ̄ka̍ o̍ hɔ̄l[4] ō kālā ka̍la̍ wo̍, a̍ nyɛ̄ sɔ̄lāā wāŋnda̍ pīla̍ a̍ kɛ̍ɛ̍sīāā a̍ kɔ̄ltā ndāla̍ŋ mā yɔ̄ŋgū wo̍, lā nɔ̄ mī lā wa̍ ni᷅ŋ ndu̍ māndāa̍.

⁵Wānā o̍ wānā tē te̍le̍ŋ nu̍m wa̍llo̍ fūūlu̍u̍ pɛ̍, wānāā ŋ̄ chō wā wa̍llo̍ le̍ nda̍ wa̍, nyɛ̄ o̍ nyɛ̄ sɔ̄lāā nda̍ hīŋ pɛ̍, ā nɔ̄ mā kɛ̍si̍ ndu̍. Nyɛ̄ sɔ̄lāā ko᷄ŋ cho̍ wā le̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ mīŋgīo̍o̍ bɛ̄ɛ̄ndīa̍a̍ ni̍. Bā o̍ bā nya̍ chē pɛ̍ mī chīɛ̍i̍ Mɛ̄lɛ̄ka̍a̍ tāmbu̍, lā chūa̍ nyɛ̄ sɔ̄lāā kōŋ lā bɛ̄ɛ̄ndi̍a̍a̍ fo̍ndā kōŋ.”

⁶Chɔ̍ŋ a̍ te̍le̍ŋ Māsāa̍ Cho̍wa̍sī o̍ di̍mu̍l nda̍ sūɛ̍i̍ ke̍ŋ ndo̍, mbo̍ bīya᷅ŋ a̍ wɔ̄sī Cho̍wa̍sī o̍ chi̍ŋa̍ wɔ̄sīla̍ŋ bi̍di̍i̍ŋ a̍ lā yāa̍ o̍ māsāle̍ŋ chōo̍ wo̍, wāŋnda̍ ha̍ā nda̍ a̍a̍ mi̍ŋgi̍ wɔ̍ fo̍ndā o̍ fo̍ndā ta̍mbu̍ o̍ chīɛ̍i̍ Mɛ̄lɛ̄ka̍a̍ bɛ̄ɛ̄ndīāā le̍.

⁷O̍ ko̍ŋ mi̍ Cho̍wa̍sī vēēlū Chɛ̄hōwa̍dā, wāna̍ so̍lī sa̍lāa̍ o̍ Mɛ̄lɛ̄ka̍ lo̍ wo̍, a̍ wānāā sōlīāā lāsa̍lāa̍ ā pīli̍a̍a̍. Mbo̍ nyūnā nda̍ āā, “Vɛ᷅ I̍ chi̍ wɔ̍ mī lā kāndu̍ chīɛ̍i̍ Mɛ̄lɛ̄ka̍a̍ bɛ̄ɛ̄ndīa̍a̍ o̍ fo̍ndāŋndā o̍ ta̍mbu̍ la̍ŋ te̍? Mɛ̄ɛ̍ nya̍ cho̍ dɔ̍ɔ̍ ndu̍ bɛ̄ɛ̄ndīāā le̍ yɛ̍, mɛ̄ɛ̍ chɔ̍ŋ a̍ hāū, nyɛ̄ sɔ̄lāā o̍ nyɛ̄ sɔ̄lāā wāŋnda̍ chō hūnɔ̄ɔ̍, lā fa̍ŋā lɛ̄ nyɛ̄ o̍ nyɛ̄ lēcho̍ō le̍ nya̍ pi̍la̍ le̍. Nyɛ̄ o̍ nyɛ̍ hi᷅ŋ ni᷅ŋ pɛ̍, lā chūa̍ ndu̍ kpo̍u̍ lā yɔ̄ŋgu̍ ndu̍ le̍ chīɛ̍i̍ Mɛ̄lɛ̄ka̍a̍ bɛ̄ɛ̄ndīa̍a̍.”

⁸O̍ ko̍ŋ, mi̍ wānāa̍ so̍lī sa̍lāla̍ŋ o̍ Mɛ̄lɛ̄ka̍ lo̍ wa̍ ā chɛ̄la᷅ŋ a̍ nyɛ̄ Cho̍wa̍sī di̍mu̍l nda̍ wo̍. Ndu̍yɛ̍ dīmūl o̍ di̍mu̍l nda̍ bɛ̍ɛ̍ māā ā wa᷅ lɛ̄ wa̍li̍ ka̍lāa̍ bōlle̍ŋ le̍ chīɛ̄īyo̍ mīŋgīo̍o̍ bɛ̄ɛ̄ndīāā le̍ wo̍ bɛ̍ɛ̍ ma̍ chɛ̄l.

⁹O̍ ko̍ŋ kɔ̍ɔ̍lī, mi̍ Chɛ̄hōwa̍dā o̍ nu̍u̍wā kɔ̍fōo̍ mbo̍ būlī tɛ̄ɛ̄ŋgōo̍ o̍ kūmbū kɔ̍fū kōŋ. Mbo̍ chūā ndu̍, mbo̍ kɔ̍ kɛ̍sī ndu̍ o̍ ma̍āŋ wa̍ o̍ bɛ̍ɛ̄ chīɛ̍i̍ Mɛ̄lɛ̄ka̍a̍ wo̍ īkɛ̄i̍, tē wānā a̍a̍ wa̍ lūɛ̄īyɔ̄ɔ̍ o̍ chīɛ̍i̍ Mɛ̄lɛ̄ka̍a̍ ni᷄ŋ pɛ̍ o̍ bā kɛ̄ndɔ̄ɔ̍ chōo̍. Nyɛ̄ sɔ̄lāā o̍ nyɛ̄ sɔ̄lāā wāŋnda̍ nda̍ a̍a̍ hi᷅ŋ ni̍ŋ pɛ̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍, wānāā sōlīāā lāsa̍lāa̍ nda̍ kɛ̄si̍ o̍ dīō le̍ dīo̍o̍ māndāa̍ wa̍, ā chūa̍ nyɛ̄ sɔ̄lāā kōŋ kpo̍u̍ ā dɔ̄ū ndu̍ o̍ kɔ̍fū kōŋ ni᷄ŋ.

¹⁰Tē ā chē pɛ̍ māā nyɛ̄ sɔ̄lāa̍ chō ni᷅ŋ lēni᷄ŋ ta̍u̍, wānā po̍o̍nyīa̍a̍ cho̍ le̍ Māsāa̍ wo̍, a̍ wāna̍ cho̍ wānāā sōlīāā lāsa̍lāa̍ bōlle̍ŋ ndo̍, ā hīŋ ā hu᷄ŋ ku̍mbī kɔ̍fū kōŋ ā cha᷄l ā chɔ᷄m nyɛ̄ sɔ̄lāā kōŋ mɛ̄ɛ̍ o̍ cho̍ bōllē pīlɛ̍ yɛ̍, ā dōvi̍ ndu̍ o̍ bɔ̄lɔ̄la̍ŋ ni᷄ŋ ā yīi̍.

¹¹O̍ ko̍ŋ kɔ̍ɔ̍lī, tē ā chīi̍ pɛ̍ kpo̍u̍, ā kɔ̍ la̍ndū nyɛ̄ sɔ̄lāā kōŋ le̍ mā sīna̍ lūsu̍l ndɔ̄ɔ̍. Tē ā lāndu̍ pɛ̍ mā sīna̍ mɛ̄ɛ̍ o̍ cho̍ lūsu̍llo̍ yɛ̍, ā chūa̍ ndu̍ ā yɔ̄ŋgu̍ wānāa̍ wa̍ wa̍li̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ bōlle̍ŋ nda̍. Wānāā wa̍lla̍ ki̍nɛ̍i̍, ka̍a̍pi̍ndɛ̄i̍ya̍ ni̍, me̍si̍nɛ̄i̍ya̍ ni̍, wānāa̍ to̍sā wa̍llo̍ a̍ pōūta̍ŋ nda̍ ni̍, ā wānāā tāŋgūlāa̍ ā chēle̍ŋ nda̍, nyɛ̄ sɔ̄lāā kōŋ nda̍ a̍a̍ chu̍ā ni̍ mā pāāwa̍ nda̍. Nyɛ̄ sɔ̄lāā kōŋ ko̍ni̍ nda̍ a̍a̍ chu̍ā vɛ̍lɛ̄ ni̍ mā pēndū yɔ̄mīī tāŋgūlɛ̄i̍ a̍ pōūta̍ŋ le̍ wa̍llo̍. O̍ ko̍ŋ kɔ̍ɔ̍lī, bɔ̄nɔ̄ o̍ bɔ̄nɔ̄ che᷅le̍ŋ ndu̍ o̍o̍ wa̍ pɛ̍ le̍ chīɛ̄ī kōŋ mīŋgīo̍o̍ bɛ̄ɛ̄ndīa̍a̍, nyɛ̄ sɔ̄lāā kōŋ nda̍ a̍a̍ lu̍e̍ī le̍ni̍ŋ ni̍.

¹³Nyɛ̄ o̍ nyɛ̄ wa̍ ni᷅ŋ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ ni᷄ŋ, tāālāla̍ nda̍ tōōsi̍a̍a̍ a̍ ka̍ni̍ŋ hu̍mbo᷄ŋ nda̍ŋ ni̍, hɛ̄ŋgɛ̍i̍la̍ wa̍ lo̍ŋ nda̍ŋ ni̍, pūtɛ̍nɛ̍i̍la̍ŋ ni̍, wōlɔ̄ɔ̄lā la̍mbūi̍la̍ŋ ni̍, a̍ nyɛ̄m lāāndūŋ chēle̍ŋ wa̍ ŋ̄ tōōsīāā a̍ ko̍o̍līi̍yo̍ŋ ɔ̄ɔ̄ a̍ ka̍ni̍ŋ hu̍mbo̍ŋ ndo̍ŋ, mu̍ŋ ki̍nɛ̍i̍, nyɛ̄ sɔ̄lāa̍ wa̍ le̍ mu̍ŋ pīōndɔ̄ɔ̍ ɔ̄ɔ̄ le̍ mu̍ŋ bɛ̄ɛ̄ndīa̍a̍ wo̍ ndu̍ wa̍ yɛ̍, nyɛ̄ sɔ̄lāā tāŋgūlāa̍ ho̍ō ndu̍ ve̍ le̍ mu̍ŋ te̍.

¹⁴Nyɛ̄ sɔ̄lāa̍ ho̍ō ki̍nɛ̍i̍ ma̍ chūā ndu̍, ma̍ kē wānāa̍ wa̍ chīɛ̍i̍ Mɛ̄lɛ̄ka̍a̍ bɛ̄ɛ̄ndīa̍a̍ wa̍ le̍ mā bɛ̄ɛ̄ndi̍a̍a̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ a̍ ndu̍.

¹⁵Ndu̍yɛ̍ wānāā nda̍ a̍a̍ kɛ̍si̍ wa̍li̍ ka̍lāa̍ bōlle̍ŋ mā kē nda̍ nyɛ̄ sɔ̄lāa̍ ho̍ō wa̍, ā wa̍ sa̍kpō o̍ nyɛ̄ sɔ̄lāā ho̍ō ni᷄ŋ. Le̍ he̍ī, nda̍ a̍a̍ nyu̍nā nda̍ bɛ̍ɛ̍ le̍ mā do̍u̍nu᷄ŋ ko̍na̍ le̍, fo̍ndōle̍ ā wa̍ nyɛ̄ o̍ nyɛ̄ tōsāa̍ sa̍kpō.

¹⁶Wānāā nda̍ a̍a̍ tɛ̍ɛ̍mbūū sa̍wāla̍ŋ nda̍, a̍ wānāā nda̍ a̍a̍ to̍sā yɔ᷅ŋ wɔ̄ɔ̍ŋndo̍ wa̍, nyɛ̄ sɔ̄lāā o̍ nyɛ̄ sɔ̄lāā wānāā kāŋ nda̍ a̍a̍ hu᷅ŋ o̍ wānāā sōlīāā lāsa̍lāa̍ lo̍ le̍ sa̍lāla̍ŋ sōlīo̍o̍ le̍ nda̍, ndu̍ ki̍nɛ̍i̍ wānāā sōlīāā lāsa̍lāa̍ nda̍ a̍a̍ yɔ̍ŋgū ko̍ŋ le̍ chīɛ̍i̍ Mɛ̄lɛ̄ka̍a̍ bɛ̄ɛ̄ndīa̍a̍ le̍, nda̍ wānāā sōlīāā lāsa̍lāa̍ nda̍ a̍a̍ nɔ᷅ ko̍ŋ ni̍.

¹⁷A̍ bōōndi̍i̍ ke̍ŋ, mi̍ Māsā Bɛ̍ndōo̍ Ha̍sāāl, o̍ wa̍ Si̍i̍līāā wo̍ ō chūā pūa̍a̍ ndūa̍a̍ chɔ̄ūwa̍ ma̍ kūā Ka̍a̍tī chi̍e̍e̍, ma̍ kɔ̍ de᷅l Ka̍a̍tī chōo̍ a̍ sɔ̍ŋgɔ̄ɔ̍ ma̍ bīī chi̍o̍o̍ ho̍ō. Ō wa̍ vɛ̄lɛ̄ a̍ te̍le̍ŋ pi᷅lɛ̍, mi̍ Māsā Bɛ̍ndōo̍ Ha̍sāāl chu̍ā vɛ̄lɛ̄ pūa̍a̍ ndūa̍a̍ chɔ̄ūwa̍ ma̍ hūŋ le̍ Chūlu̍sɛ̄lɛ̄m dēlɔ̄ɔ̍ chōo̍.

¹⁸Mɛ̄ɛ̍ Māsā Bɛ̍ndōo̍ Cho̍wa̍sī o̍ tu̍e̍ī a̍ ndi̍ o̍kɔ̄ɔ̍, fi̍nyāā ndūāā ma̍māa̍ ke̍e̍ku̍ māsāle̍ŋ Chu̍dā wa̍, Chɛ̄hōsi̍a̍fa̍tī a̍ Chɛ̄ho̍lūām, a̍ Āhāsa̍yā, nyɛ̄ o̍ nyɛ̄ nda̍ mɛ̄i̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ ni᷄ŋ le̍ kpe̍ku̍ Mɛ̄lɛ̄ka̍a̍, o̍ ko̍ŋ kɔ̍ɔ̍lī, a̍ nyɛ̄ o̍ nyɛ̄ ndu̍ pi̍la̍ ndu̍ o̍o̍ yɔ̍ŋgu̍ le̍ kpe̍ku̍ Mɛ̄lɛ̄ka̍a̍, mbo̍ chūā mu̍ŋ kpo̍u̍, lātūlu̍ a̍ ŋ̄ko̍o̍līi̍ o̍ ŋ̄ko̍o̍līi̍ wa̍ o̍ chīɛ̍i̍ Mɛ̄lɛ̄ka̍a̍ ni᷄ŋ nāa̍ nda̍ kɛ̄sī nyɛ̍ sɔ̄lāa̍ wa̍, a̍ o̍ chīɛ̄ī lēmāsāa̍ ni᷄ŋ, mbo̍ yɔ̄ŋ Māsā Bɛ̍ndōo̍ Ha̍sāāl le̍ ndu̍ nyɔ̄ɔ̄lōo̍. O̍ ko̍ŋ, mi̍ Māsā Bɛ̍ndōo̍ Ha̍sāāl chu̍ā pūa̍a̍ ndūa̍a̍ chɔ̄ūwa̍ ma̍ mīīŋgū, ō de̍l lɛ̍ Chūlu̍sɛ̄lɛ̄m chōo̍ le̍.

¹⁹Mi̍ ī yɔ̄nu᷄ŋ mi̍ pūa̍a̍ chɔ̄ūwāa̍ Māsā Bɛ̍ndōo̍ Cho̍wa̍sī wa̍ ā ŋīɔ̍ɔ̍ŋ, Chōsa̍kāā, po̍ Sīmi̍a̍a̍tī wo̍, a̍ Chɛ̄hōsa̍ba̍dī, po̍ Si̍ɔ̍mā wo̍, ā yīī Māsāa̍ Cho̍wa̍sī de̍fo̍o̍ ma̍ dīī ndu̍. Chīɛ̄ī pīlɛ̍ wa̍ nāa̍ nda̍ pēēlu̍ fo̍ndāa̍ Chūlu̍sɛ̄lɛ̄m bā pāa̍le̍ŋ lē chāŋndo̍ le̍ kɔ̄la̍ŋ o̍ fo̍ndāŋ pīlɛ̍ dīōla̍ŋ āā Si̍i̍lā wa̍, o̍ chīɛ̄ī kōŋ ni᷄ŋ nda̍ dīī ndu̍ ni̍. Ndu̍yɛ̍ ma̍ chɔ̄ ndu̍ nāa̍ nda̍ chɔ᷄ fi̍nyāā ndūa̍a̍ wa̍, o̍ sɛ̄i̍ nda̍ yu̍ŋgu̍ lēmāsāa̍ ni᷄ŋ, o̍ Māsāa̍ Dēēve̍ lo̍ chi̍e̍e̍. O̍ ko̍ŋ kɔ̍ɔ̍lī, mi̍ Āmāsi̍yā po̍ ndɔ̄ mi̍i̍ŋgū māsā bɛ̍ndōo̍ o̍ fōōfo̍ ndɔ̄ɔ̍. Sɔ̄ɔ̍ŋ tɔ᷅ŋ chēle̍ŋ yɔ̍nu̍ŋ o̍ māsāle̍ Cho̍wa̍sī le̍ŋ bɛ̄ŋgu̍ wo̍ŋ ki̍nɛ̍i̍, a̍ nyɛ̄ o̍ nyɛ̄ o̍ to̍sa̍ o̍ māsāle̍ ndɔ̄le̍ŋ ni᷄ŋ ŋ̄ chō ō pōōnyīāā o̍ yāu̍ sɔ̄ɔ̍ŋ pa̍a̍ndu̍ cho̍ a̍ māsāā bɛ̍ndūa̍a̍ Chu̍dā o̍kɔ̄ɔ̄ wo̍ ni᷄ŋ.