Read Southern Kisi Māsāā Bɛ̍ndūāā Di̍i̍ŋ Ndūa̍a̍ 13 Bible Online

Māsāā Bɛ̍ndūāā Di̍i̍ŋ Ndūa̍a̍ 13 - Southern Kisi bible

Māsāā Bɛ̍ndūāā Di̍i̍ŋ Ndūa̍a̍ 13

¹Wɔ̄sī Cho̍wa̍sī po̍ Āhāsa̍yā wo̍ ō chīŋa̍ wɔ̄sīla̍ŋ bi̍di̍i̍ŋ a̍ lā yāa̍ o̍ lēmāsā Chu̍dā wo̍, wɔ̄sī kōŋ Chɛ̄hōwa̍ha̍sī po̍ Chɛ̍hū wo̍ ō sīmnu᷄ŋ māsā bɛ̍ndōo̍ le̍ I̍sɔ̄lūɛ̄ī ni̍. Ndu̍yɛ̍ mi̍ Chɛ̄hōwa̍ha̍sī to̍sā māsāle̍ŋ Sāme̍e̍līāā chi̍e̍e̍ le̍ lɛ̄ŋndē I̍sɔ̄lūɛ̍i̍le̍ŋ le̍ wɔ̄sīla̍ŋ tɔ̍ a̍ lā ŋɔ᷄mmɛ̍ū.

²Kɛ̍ ndu̍ bɛ̍ɛ̍, mbo̍ tōsā yɔ̄ŋ wɔ̄ɔ̍ŋndo̍ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l. Sɔ̄ɔ̍ŋ wɔ̄ɔ̍ŋ Chɛ̄lōbo̍wām, po̍ Ne̍ba̍tī wo̍ ō wa̍ chōo̍ mbo̍ tōsā mi̍ wāŋnda̍ I̍sɔ̄lūɛ̄ī a̍ si̍mnu᷄ŋ wa̍nāā yɔ̄ŋ wɔ̄ɔ̍ŋ Mɛ̄lɛ̄ka̍ o̍ hɔ̄l lo̍ŋ, mu̍ŋ ko̍ni̍ ndu̍ bɛ̍ɛ̍ ndu̍ to᷅l kɔ̄ɔ̄lī ni̍. Ndu̍yɛ̍ ha̍a̍a̍ a̍ yōōmū ndɔ̄ɔ̍ mɛ̄ɛ̄lu̍la̍ŋ, ō chɛ᷄l mbō mūli᷄ŋ mbō ma᷄l yɔ̄ŋ wɔ̄ɔ̍ŋndo̍ tōsāa̍ le̍.

³O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ du̍a̍u̍nu᷄ŋ tu̍mbe̍ a̍ wāŋnda̍ I̍sɔ̄lūɛ̄ī mbo̍ māl nda̍ Si̍i̍lūīāŋnda̍ o̍ bā. Le̍ te̍le̍ŋ vi̍lɛ̄ī, Māsā Bɛ̍ndōo̍ Ha̍sāāl māsāa̍ le̍ Si̍i̍līāā ni̍, Bɛ̄nīha̍da̍dī po̍ ndɔ̄ ni̍, ā wa̍ hūnɔ̄ɔ̍ I̍sɔ̄lūɛ̍i̍ya̍ chīŋa̍la᷅ŋdo̍ mā yām nda̍.

⁴O̍ ko̍ŋ, mi̍ Chɛ̄hōwa̍ha̍sī pi̍ɛ̍ī Mɛ̄lɛ̄ka̍ Ya̍a̍wɛ̄ɛ̄, mbo̍ nyūnā ndu̍ dīōm le̍ mbō māla̍ nda̍. Ndu̍yɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ cha᷅ dɛ̍nɛ̍ pa̍lāā Māsā Bɛ̍ndōo̍ Ha̍sāāl o̍ wa̍ I̍sɔ̄lūɛ̍i̍ya̍ tūsīo̍o̍ chōo̍ wo̍, mbo̍ tūɛ̄ī pīɛ̄īle̍ Chɛ̄hōwa̍ha̍sī le̍ŋ.

⁵Mi̍ Mɛ̄lɛ̄ka̍ Ya̍a̍wɛ̄ɛ̄ o̍ ke᷅ I̍sɔ̄lūɛ̍i̍ya̍ wāŋndo̍ o̍ si̍m nda̍ lāchī, mbo̍ bāŋā nda̍ Si̍i̍lūīāŋnda̍ o̍ bā, mbo̍ tōsā mi̍ I̍sɔ̄lūɛ̍i̍ya̍ sɔ̄lā kɔ̄l nyūlōo̍ o̍ lɛ̄ŋndē ndāle̍ŋ ni᷄ŋ māā pāāndū wo̍.

⁶Kɛ̍ a̍ ko̍ŋ kpo̍u̍, wāŋnda̍ I̍sɔ̄lūɛ̄ī a̍ wa̍ wɔ̄ hīōūwɔ̄ɔ̍ lāchī kɛ᷅ a̍ yɔ̄ŋ wɔ̄ɔ̍ŋndo̍ tōsāa̍. Sɔ̄ɔ̍ŋ wɔ̍ɔ̍ŋ Chɛ̄lōbo̍wām o̍ wa̍ chōo̍, mbo̍ tōsā mi̍ nda̍ wāŋnda̍ I̍sɔ̄lūɛ̄ī a̍ si̍mnu᷄ŋ wa̍nāā yɔ̄ŋ wɔ̄ɔ̍ŋ Mɛ̄lɛ̄ka̍ o̍ hɔ̄l lo̍ŋ, ā wa̍ wɔ̄ hīōūwɔ̄ɔ̍ lāchī a̍ sɔ̄ɔ̍ŋ wɔ̍ɔ̍ŋ mu᷅ŋ tōsāa̍. O̍ ko̍ŋ kɔ̍ɔ̍lī, A̍si̍ɛ̍lūā mɛ̄lɛ̄ka̍ ndāa̍ bɛ̍ɛ̍, ā chɛ᷄l mā tɛ̄ɛ̄mbu̍u̍ ndu̍ le̍, ō wa̍ wɔ̄ īsīsi̍ Sāme̍e̍līāā lo̍ŋ mā sōōlūū ndu̍.

⁷Mi̍ Si̍i̍lūīāŋnda̍ ā hīāū lāchī a̍ I̍sɔ̄lūɛ̍i̍ya̍ chīŋa̍la᷅ŋndo̍, ma̍ yām I̍sɔ̄lūɛ̍i̍ya̍ ndu̍yɛ̍ ma̍ dīū nda̍ dīūwo̍ pīla̍. Mɛ̄ɛ̍ nda̍ dīu̍ I̍sɔ̄lūɛ̍i̍ya̍ te̍i̍, ma̍ fu̍lī nda̍ mɛ̄ɛ̍ chu̍ndo̍o̍ ō chō nu̍a̍ā lɛ̄ŋ yɛ̍. Ndu̍yɛ̍ I̍sɔ̄lūɛ̄ī kpo̍u̍, so̍vɛ̄i̍ya̍a̍ nda̍ a̍a̍ lo̍ ni᷅ŋ yōōmū, mi̍ Māsāa̍ Chɛ̄hōwa̍ha̍sī ndu̍ o̍o̍ nɔ᷅ ni᷅ŋ nda̍ o̍ māsāle̍ ndɔ̄le̍ŋ ni᷄ŋ nda̍, nda̍ wa̍ ha̍ā ni̍, ndu̍ o̍o̍ nɔ̍ so̍vɛ̄i̍ya̍a̍ sɔ̍ŋgā o̍ su̍a̍a̍ chōo̍ wa̍ ŋ̄wāŋ be̍le̍-ŋu̍ɛ̍ɛ̍nu̍, a̍ nyɛ̄lā su̍a̍a̍ ā nāŋ nda̍ŋ tɔ̍, o̍ ko̍ŋ kɔ̍ɔ̍lī, a̍ pūa̍a̍ chɔ̄ūwāa̍ sɔ̍ŋgā lɛ᷅ŋ nda̍ wāa̍la̍ŋ tɔ̍ (10,000).

⁸Sɔ̄ɔ̍ŋ tɔ᷅ŋ chēle̍ŋ yɔ̍nu̍ŋ o̍ māsāle̍ Chɛ̄hōwa̍ha̍sī le̍ŋ bɛ̄ŋgu̍ wo̍ŋ ki̍nɛ̍i̍, a̍ nyɛ̄ o̍ nyɛ̄ o̍ to̍sa̍ o̍ māsāle̍ ndɔ̄le̍ŋ ni᷄ŋ, lātūlu̍ a̍ sɔ̄ɔ̍ŋ tɔ̍ɔ̍ŋ bɛ̍ndūŋ o̍ to̍sa̍ wo̍ŋ, ŋ̄ chō ŋ̄ pōōnyīāā o̍ yāu̍ sɔ̄ɔ̍ŋ pa̍a̍ndu̍ cho̍ a̍ māsāā bɛ̍ndūa̍a̍ I̍sɔ̄lūɛ̄ī o̍kɔ̄ɔ̄ wo̍ ni᷄ŋ.

⁹Mi̍ ī yɔ̄nu᷄ŋ, mi̍ Māsā Bɛ̍ndōo̍ Chɛ̄hōwa̍ha̍sī o̍ wu᷅, ndu̍yɛ̍ ma̍ chɔ̄ ndu̍ Sāme̍e̍līāā chi̍e̍e̍. O̍ ko̍ŋ, mi̍ Chɛ̄hōwa̍sī po̍ ndɔ̄ mi̍i̍ŋgū ma̍sāa̍ o̍ fōōfo̍ ndɔ̄ɔ̍.

¹⁰Wɔ̄sī Māsā Bɛ̍ndōo̍ Cho̍wa̍sī o̍ chi̍ŋa̍ wɔ̄sīla̍ŋ be̍le̍-ya̍a̍ a̍ lā ŋɔ᷄mmɛ̍ū o̍ lēmāsā Chu̍dā wo̍, wɔ̄sī kōŋ Chɛ̄hōwa̍sī po̍ Chɛ̄hōwa̍ha̍sī wo̍ ō sīmnu᷄ŋ ma̍sāa̍ I̍sɔ̄lūɛ̄ī ni̍. Ndu̍yɛ̍ mbo̍ tōsā māsāle̍ŋ Sāme̍e̍līāā chi̍e̍e̍ le̍ lɛ̄ŋndē Chu̍dāle̍ŋ le̍ wɔ̄sīla̍ŋ tɔ̍ a̍ lā ŋɔ᷄mpu᷅m.

¹¹Kɛ̍ ndu̍ bɛ̍ɛ̍ mbo̍ tōsā yɔ̄ŋ wɔ̄ɔ̍ŋndo̍ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l. Sɔ̄ɔ̍ŋ wɔ̍ɔ̍ŋ Chɛ̄lōbo̍wām, po̍ Ne̍ba̍tī wo̍ ō wa̍ tōsāa̍, mbo̍ tōsā mi̍ wāŋnda̍ I̍sɔ̄lūɛ̄ī a̍ si̍mnu᷄ŋ wa̍nāā yɔ̄ŋ wɔ̄ɔ̍ŋ Mɛ̄lɛ̄ka̍ o̍ hɔ̄l lo̍ŋ, mu̍ŋ ko̍, ndu̍ bɛ̍ɛ̍ ndu̍ to᷅l kɔ̄ɔ̄lī ni̍.

¹²Sɔ̄ɔ̍ŋ tɔ᷅ŋ chēle̍ŋ yɔ̍nu̍ŋ o̍ māsāle̍ Chɛ̄hōwa̍sī le̍ŋ bɛ̄ŋgu̍ wo̍ŋ ki̍nɛ̍i̍, a̍ nyɛ̄ o̍ nyɛ̄ o̍ to̍sa̍ o̍ māsāle̍ ndɔ̄le̍ŋ ni᷄ŋ, lātūlu̍ a̍ sɔ̍ŋgā o̍ sɔ̍ŋgā a̍ Māsā Bɛ̍ndōo̍ Āmāsi̍yā, o̍ wa̍ Chu̍dā wo̍ wo̍, mu̍ŋ kpo̍u̍ ŋ̄ cho̍ ŋ̄ pōōnyīāā o̍ yāu̍ sɔ̄ɔ̍ŋ pa̍a̍ndu̍ cho̍ a̍ māsā Bɛ̍ndūa̍a̍ I̍sɔ̄lūɛ̄ī o̍kɔ̄ɔ̄ wo̍ ni᷄ŋ.

¹³Mi̍ ī yɔ̄nu᷄ŋ mi̍ Māsā Bɛ̍ndōo̍ Chɛ̄hōwa̍sī o̍ wu᷅, ndu̍yɛ̍ ma̍ chɔ̄ ndu̍ Sāme̍e̍līāā chi̍e̍e̍, o̍ sɛ̄i̍ nda̍ lēmāsāa̍ ni᷄ŋ. O̍ ko̍ŋ, mi̍ po̍ ndɔ̄ɔ̍ Chɛ̄lōbo̍wām di̍i̍ŋ ndɔ̄ɔ̍ mi̍i̍ŋgū māsā bɛ̍ndōo̍ o̍ fōōfo̍ ndɔ̄ɔ̍.

¹⁴Mi̍ ī yɔ̄nu᷄ŋ mi̍ wāna̍ su̍a̍ā le̍ Mɛ̄lɛ̄ka̍ wo̍ Īla̍a̍sīā o̍ na̍ā nāa̍ pīla̍. Ndu̍yɛ̍ ō na̍ā kōŋ ni᷄ŋ o̍ vi᷅ ni̍. Ndu̍yɛ̍ a̍ te̍le̍ŋ ko̍ŋ, Māsā Bɛ̍ndōo̍ Chɛ̄hōwa̍sī, māsāa̍ le̍ I̍sɔ̄lūɛ̄ī ō wa̍ wɔ̄ yōōmū. Mɛ̄ɛ̍ o̍ tu̍e̍ī māā Īla̍a̍sīā cho̍ a̍ nāa̍, mbo̍ kūā Īla̍a̍sīā yīlɔ̄ɔ̍, mbo̍ lūɛ̄ī nāa̍ o̍ wa̍ īhīni̍ wa̍. Mbo̍ kɔ̍ si᷅m ndu̍ īkɛ̄i̍, mbo̍ kāndū cha᷄ŋndo̍. Mbo̍ dīmī āā, “O̍o̍ fi̍nyā nūu̍, fi̍nyā nūu̍. Vɛ̄ɛ̍nɛ̍ kpe̍e̍kpe̍i̍ ku̍u̍ba̍a̍ chɔ̄ūwa̍ I̍sɔ̄lūɛ̄ī a̍ cho̍ yɛ̄ yɔ̄ŋ ni̍ŋ a̍ he̍ī?”

¹⁵Mi̍ Īla̍a̍sīā di̍mūl ndu̍ āā, “Kɔ̍ chu̍ā wɔ̄ chīɔ̄ūwo̍ a̍ chīŋu̍a̍ŋ mā ti᷄ŋ mā hīŋ a̍ ma̍ŋ.” Mi̍ Chɛ̄hōwa̍sī kɔ̍ chu̍ā chīɔ̄ūwo̍, a̍ chīŋu̍a̍ŋ mā ti᷄ŋ mbo̍ hūŋ a̍ la̍ŋ.

¹⁶Mi̍ Īla̍a̍sīā o̍ di̍mūl ndu̍ āā, “Ku̍mbi̍ wu̍ndɛ̄i̍ cho̍ bā pāa̍le̍ŋ le̍ chāŋndo̍ wo̍.” Mi̍ Māsā Bɛ̍ndōo̍ Chɛ̄hōwa̍sī ku̍mbī. Mi̍ Īla̍a̍sīā o̍ di̍mūl ndu̍ āā, “Dɔ̍u̍ chi̍ŋɔ̍le̍ŋ o̍ chīɔ̄ūwo̍ ni᷄ŋ mā kīndū.” Mi̍ Māsāa̍ Chɛ̄hōwa̍sī o̍ du̍a̍ū chīŋɔ̍le̍ŋ o̍ chīɔ̄ūwo̍ ni᷄ŋ mbo̍ kīndū tu̍a̍ŋ. Mi̍ Īla̍a̍sīā o̍ ha̍ndū bāla̍ŋ o̍ bāla̍ Māsāa̍ Chɛ̄hōwa̍sī la̍ŋ chōo̍. Mbo̍ dīmūl Māsāa̍ Chɛ̄hōwa̍sī āā, “Wu̍u̍ chi̍ŋɔ̍le̍ŋ o̍ hūēīye̍ ni᷄ŋ.” Mi̍ Māsāa̍ Chɛ̄hōwa̍sī o̍ wu̍ū chīŋɔ̍le̍ŋ. Mi̍ Īla̍a̍sīā o̍ dīmūl ndu̍ āā, “Chīŋɔ̍le̍ Mɛ̄lɛ̄ka̍ Ya̍a̍wɛ̄ɛ̄ o̍ wu̍u̍ le̍ ya̍a̍mɔ̍ɔ̍wa̍a̍ ndūa̍a̍ Si̍i̍līāā a̍ ha̍ā A̍fɛ̍kī yɔ̄mɔ̄ɔ̄ le̍ŋ, le̍ŋ le̍ cho̍ le̍ŋ ni̍.”

¹⁷

¹⁸O̍ ko̍ŋ kɔ̍ɔ̍lī, mi̍ Īla̍a̍sīā di̍mūl ndu̍ āā, “Chu̍a̍ chi̍ŋu̍a̍ŋ ma̍ pīli̍a̍ŋ.” Mi̍ Chɛ̄hōwa̍sī chu̍ā. Mi̍ Īla̍a̍sīā o̍ di̍mūl ndu̍ āā, “Lɔ̍ɔ̍ lɛ᷅ŋnde̍ŋ a̍ ma̍ŋ.” Mi̍ Chɛ̄hōwa̍sī lu̍a̍ā lɛ̄ŋnde̍ŋ lē yāa̍, mbo̍ pɛ̄ŋgī.

¹⁹Mi̍ wānā Mɛ̄lɛ̄ka̍a̍ Īla̍a̍sīā du̍a̍u̍nu᷄ŋ tu̍mbe̍ a̍ ndu̍, mbo̍ dīmūl ndu̍ āā, “Nūm o̍o̍ nɔ̍ mī nūm o̍o̍ lɔ̍ɔ̄ lɛ̄ŋnde̍ŋ lē ŋūɛ̍ɛ̍nu̍, ɔ̄ɔ̄ lē ŋɔ᷄mpu᷅m bɛ̍ɛ̍. O̍ ko̍ŋ, a̍ wa̍ hūnɔ̄ɔ̄ Si̍i̍lūīāŋnda̍ yōmɔ̄ɔ̄, mī nūm o̍o̍ ba̍su̍ nda̍ tɛ̍ɛ̍. Kɛ̍ nūm pi̍la̍ tɛ̍ɛ̍mbu̍u̍, ā chō nda̍ hūnɔ̄ɔ̄ yōmɔ̄ɔ̄, kɛ̍ bɛ̄mbɔ̄ɔ̍ le̍ yāa̍ kpe̍ ŋ̄ yām ni̍ŋ nda̍ ni̍.”

²⁰O̍ ko̍ŋ kɔ̍ɔ̍lī, mi̍ Īla̍a̍sīā wu᷅, ma̍ chɔ̄ ndu̍. Ndu̍yɛ̍ īwɔ̄sī o̍ īwɔ̄sī a̍ sīālte̍ŋ wāŋnda̍ Mo̍wa̍bī nda̍ a̍a̍ nɔ̍ hūnɔ̄ɔ̍ I̍sɔ̄lūɛ̍i̍ya̍ dēlɔ̄ɔ̍ chōo̍ mā pūŋgā nyɛ᷅m nda᷄ŋ.

²¹Bōōndi̍i̍ pi᷅lɛ̍, mi̍ po̍ pi᷅lɛ̍ wū, mi̍ I̍sɔ̄lūɛ̍i̍ya̍ ā wā ndu̍ chɔ̄ɔ̍. Ā lo̍ pōo̍ ho̍ō chɔ̄ɔ̍ ma̍ chā wāŋnda̍ Mo̍wa̍bī ā nda̍ a̍a̍ hu᷅ŋ nda̍ dēlɔ̄ɔ̍ chōo̍ wa̍. O̍ ko̍ŋ ma̍ chūā wānā vi̍lɛ̍i̍ ko̍ŋ, ma̍ kɔ̍ wu̍ū ndu̍ o̍ sɛ̄i̍ būūlu̍[5] nda̍ chɔ̍ Īla̍a̍sīā wo̍ ni᷄ŋ ma̍ nyāānu᷄ŋ. Mɛ̄ɛ̍ nda̍ wūu̍ wānā vīlɛ̍i̍ ko̍ŋ lo̍ŋ, dīmīo̍o̍ nu̍a̍ā mi̍ wānā vi̍lɛ̍i̍yo̍ ho̍ō ō kɔ̍ ku̍ndu᷄ŋ pa̍āla̍ Īla̍a̍sīā la̍ŋ, mi̍ pōo̍ ho̍ō mīīŋgū yōōmū mbo̍ cha̍ŋ mbo̍ sīm.

²²Chɔ̍ŋ a̍ te̍le̍ŋ Māsā Bɛ̍ndōo̍ Chɛ̄hōwa̍ha̍sī o̍ si̍mnu᷄ŋ māsāa̍ I̍sɔ̄lūɛ̄ī yo̍, ha̍a̍a̍ a̍ mɛ̄ɛ̄lu̍la̍ yōōmū ndɔ̄ɔ̍ Māsā Bɛ̍ndōo̍ Ha̍sāāl, o̍ wa̍ Si̍i̍līāā wo̍ ō wa̍ I̍sɔ̄lūɛ̍i̍ya̍ nyɛ̄ pālāa̍ tūsīo̍o̍ cho̍o̍.

²³Kɛ̍ ndu̍yɛ̍, Mɛ̄lɛ̄ka̍ Ya̍a̍wɛ̄ɛ̄ o̍ me̍l I̍sɔ̄lūɛ̍i̍ya̍ wa̍ŋ wa̍ŋ, mbō chɛ᷄l mī ya̍a̍mɔ̍ɔ̍wa̍a̍ ndāa̍ tɛ̄ɛ̄mbu̍u̍ nda̍ mbō chīi̍ a̍ nda̍ o̍ lē pīlɛ̍ ni᷄ŋ te̍. Ō wa̍ hīōūwɔ̄ɔ̍ lāchī a̍ nda̍ nyīɛ̍ɛ̍ye̍ tūīīnɔ᷄ŋndo̍, fo̍ndōle̍, le̍ kpe̍ma̍ o̍ yi̍i̍ nda̍ fi̍nyāā ndāā ma̍māa̍, E̍bīlāha᷅m, a̍ Āa̍se̍, a̍ Che̍kɔ̍pū wo̍. Ndu̍yɛ̍, a̍ te̍le̍ŋndo̍ ho̍ō bɛ̍ɛ̍, ō chō o̍ kpe̍ma̍ ndɔ̄ ko̍ŋ chōo̍, ō pu̍ɛ̍ɛ̍nūŋ a̍ I̍sɔ̄lūɛ̍i̍ya̍ le̍.

²⁴Mi̍ ī yɔ̄nu̍ŋ mi̍ Māsā Bɛ̍ndōo̍ Ha̍sāāl o̍ wa̍ Si̍i̍līāā wo̍ ō wū, mi̍ Bɛ̄nīha̍da̍dī po̍ ndɔ̄ mi̍i̍ŋgū māsāa̍ o̍ fōōfo̍ ndɔ̄ɔ̍.

²⁵Mɛ̄ɛ̍ Bɛ̄nīha̍da̍dī mi̍i̍ŋgu̍ māsā bɛ̍ndōo̍ Si̍i̍līāā, chi̍e̍e̍ŋ Māsā Bɛ̍ndōo̍ Ha̍sāāl fi̍nyā ndɔ̄ ndu̍ o̍o̍ po̍o̍nda̍ Chɛ̄hōwa̍ha̍sī o̍ bā o̍ sɔ̍ŋgɔ̄ɔ̍ ni᷄ŋ I̍sɔ̄lūɛ̄ī yo̍ŋ ki̍nɛ̍i̍, mi̍ Chɛ̄hōwa̍sī po̍ Māsā Bɛ̍ndōo̍ Chɛ̄hōwa̍ha̍sī wo̍, o̍ mi̍i̍ŋgu̍ māsāa̍ I̍sɔ̄lūɛ̄ī wo̍ ō mīŋgī mu̍ŋ bīyɔ̄ɔ̄ kpo̍u̍, o̍ sɔ̍ŋgɔ̄ɔ̍ ni᷄ŋ. Bɛ̄mbɔ̄ɔ̍ le̍ yāa̍ Chɛ̄hōwa̍sī ye᷅m Bɛ̄nīha̍da̍dī o̍ sɔ̍ŋgɔ̄ɔ̍ ni᷄ŋ ni̍, mbo̍ pōōndīāā chi̍e̍e̍ŋ mu̍ŋ kpo̍u̍.