Read Southern Kisi Māsāā Bɛ̍ndūāā Di̍i̍ŋ Ndūa̍a̍ 14 Bible Online

Māsāā Bɛ̍ndūāā Di̍i̍ŋ Ndūa̍a̍ 14 - Southern Kisi bible

Māsāā Bɛ̍ndūāā Di̍i̍ŋ Ndūa̍a̍ 14

¹Wɔ̄sī Chɛ̄hōwa̍sī[6] po̍ Chɛ̄hōwa̍ha̍sī wo̍ ō chīŋa̍ wɔ̄sīla̍ŋ lā tīɔ̍ɔ̍ŋ o̍ lēmāsā I̍sɔ̄lūɛ̄ī yo̍, wɔ̄sī kōŋ Āmāsi̍yā po̍ Cho̍wa̍sī wo̍ ō sīmnu᷄ŋ ma̍sāa̍ Chu̍dā ni̍.

²Āmāsi̍yā wa̍ wɔ̄sīla̍ŋ bi̍dīi̍ŋ a̍ lā ŋūɛ̍ɛ̍nu̍ mbo̍ sīmnu᷄ŋ Ma̍sā Bɛ̍ndōo̍ le̍ Chu̍dā. Ndu̍yɛ̍ mbo̍ tōsā māsāle̍ŋ Chūlu̍sɛ̄lɛ̄m le̍ wɔ̄sīla̍ŋ bi̍di̍i̍ŋ a̍ lā ŋɔ̄ma̍hīɔ̍ɔ̍lu̍, chi̍e̍e̍ le̍bo᷅llo̍ le̍ lɛ̄ŋndē Chu̍dāle̍ŋ. Āmāsi̍yā yɛ̍, kāla̍ ndɔ̍ wa̍ Chɛ̄hōwa̍dīŋ, wānā wa̍ā Chūlu̍sɛ̄lɛ̄m chi̍e̍e̍ ni̍.

³Ndu̍yɛ̍ Āmāsi̍yā wa̍ wānā kɛ̍ndɛ̄ Mɛ̄lɛ̄ka̍ o̍ hɔ̄l, mi̍ chē bɛ̍ɛ̍ ō ve̍ o̍ kɛ̍ndɛ̄ Mɛ̄lɛ̄ka̍ o̍ hɔ̄l, mī ndu̍ o̍o̍ si̍i̍ma᷅ŋ māā Dēēve̍ fi̍nyā ndɔ̄ ma̍mā le̍ ni̍. Nyɛ̄ o̍ nyɛ̄ Cho̍wa̍sī fi̍nyā ndɔ̄ to̍sa̍, ndu̍ bɛ̍ɛ̍ lēchōo̍ ko̍ni̍ o̍ ku̍ɛ̄ ni̍.

⁴Kɛ̍ ndu̍yɛ̍ fo̍ndāŋndā wāŋnda̍ nda̍ a̍a̍ so̍o̍lūū mɛ̍lɛ̄ka̍a̍ ndāā yɛ̍ yi̍a̍a̍ la̍ŋ ki̍nɛ̍i̍, ō chɛ᷄l mbō tɛ̄ɛ̄mbu̍u̍ la̍ŋ te̍, wāŋnda̍ wa̍ wɔ̄ hīōūwɔ̄ɔ̄ lāchī a̍ sa̍lāla̍ŋ sōlīo̍o̍ o̍ fo̍ndāŋnda̍ lāŋ mā lūām nyɛ᷅m chūŋ kɛ̄ndɔ᷄ŋ lo̍ŋ o̍ mɛ̄lɛ̄ka̍ā ndāā ka̍ŋ ndo̍.

⁵Ndu̍yɛ̍ dīmīo̍o̍ nu̍a̍ā mi̍ Āmāsi̍yā si̍mnu᷄ŋ māsā bɛ̍ndōo̍, mi̍ māsāle̍ ndɔ̄le̍ŋ lē sɔ̄lā kpāāyāa̍, wānāā nda̍ a̍a̍ yi̍ī fi̍nyā ndɔ̍ de̍fo̍o̍ ma̍ dīī ndu̍ wa̍, ndu̍yɛ̍ ma̍ wā ni᷅ŋ ndu̍ Āmāsi̍yā wa̍llo̍ o̍ bā bɛ̄ŋgu̍ wa̍, mbo̍ dīū nda̍.

⁶Kɛ̍, Māsāa̍ Āmāsi̍yā o̍ di̍u̍ chu̍a̍u̍wāā ndāa̍ le̍. Kāni̍ fo̍ndōle̍, le̍nde̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ o̍ sāwāla̍ o̍ ke̍ Mūu̍sē la̍ŋ ni᷄ŋ ni̍, āā, “Fi̍nyāa̍ ā nɔ̍ mā sɔ̄la̍ pīɔ̍mndo̍ le̍ sūɛ̍i̍ wɔ̍ɔ̍ŋ chūāūwāā ndāa̍ ā tōsa̍ ve̍ le̍. Kɛ̄lɛ̄ŋgāāle̍ mi̍ chūāūwa̍ ā sɔ̄la̍ pīɔ̍mndo̍ le̍ sūɛ̍i̍ wɔ̍ɔ̍ŋ fi̍nyāā ndāa̍ ā tōsa̍ ve̍. Wāna̍ to̍sā su̍ɛ̍i̍ wɔ̍ɔ̍ŋnde̍ wo̍, ndu̍ nɔ̍ ni̍ mbō sɔ̍lā pīɔ̍mndo̍ le̍ sūɛ̍i̍ wɔ̍ɔ̍ŋīī o̍ to̍sa̍ ve̍.”

⁷Te̍le̍ŋ pi᷅lɛ̍, mi̍ Māsā Bɛ̍ndōo̍ Āmāsi̍yā chu̍ā so̍vɛ̄i̍ya̍a̍ ndūa̍a̍ ma̍ kɔ̍ de᷅l wāŋnda̍ I̍dɔ̄m chōo̍ a̍ sɔ̍ŋgɔ̄ɔ̍, ndu̍yɛ̍ ma̍ yām wāŋnda̍ I̍dɔ̄m ma̍ dīū nda̍ ta̍u̍ ta̍u̍. Ma̍ dīī wāŋnda̍ I̍dɔ̄m wāa̍la̍ŋ tɔ̍ o̍ fo̍ndāŋ nda̍ vēēlū āā Dɛ̍ŋgbɛ̍ Īhɛ᷄llo̍ wo̍ ni᷄ŋ. O̍ ko̍ŋ kɔ̍ɔ̍lī, ma̍ bīī Sɛ̍lā, chi̍e̍e̍ wāŋnda̍ I̍dɔ̄m. Kɛ̍ mi̍ Māsā Bɛ̍ndōo̍ Āmāsi̍yā o̍ ke̍ ni᷅ŋ chi̍o̍o̍ ho̍ō dīōla̍ŋ āā Cho̍ki̍tɛ̄ɛ̄. Ndu̍yɛ̍ a̍ te̍le̍ŋndo̍ ho̍ō bɛ̍ɛ̍, dīōlā lāŋ wāŋnda̍ chō wɔ̄ chi̍e̍e̍ ko̍ŋ vēēlōo̍ ni̍.

⁸Bōōndi̍i̍ Māsā Bɛ̍ndōo̍ Āmāsi̍yā o̍ wa̍ yōōmū ve̍, mbo̍ vi̍ām ki̍i̍la̍a̍ nāa̍ Māsā Bɛ̍ndōo̍ Chɛ̄hōwa̍sī chu̍a̍ po̍ Chɛ̄hōwa̍ha̍sī wo̍, o̍ wa̍ māsāa̍ I̍sɔ̄lūɛ̄ī yo̍, mbo̍ dīmūl ndu̍ āā, “Hu̍ŋ mī ŋ̄ hu᷄ŋ to̍fa᷅ŋ a̍ sɔ̍ŋgɔ̄ɔ̍.” Ndu̍yɛ̍ Chɛ̄hōwa̍ha̍sī yɛ̍, fi̍nyā ndɔ̍ wa̍ Chɛ̍hū ni̍.

⁹Mi̍ Chɛ̄hōwa̍sī, māsāa̍ le̍ I̍sɔ̍lūɛ̄ī, lo᷅ o̍ ko̍ŋ mbo̍ di̍mūl Āmāsi̍yā, tālo̍o̍ āā, “Yɔ̄ɔ̍ŋ Le̍ba̍nɔ̄ŋ chɛ̍ŋ ni̍, mi̍ ŋ̄ vīām ki̍i̍la̍a̍ nāa̍ yɔ̄m si̍dāā wo̍ Le̍ba̍nɔ̄ŋ chūā. Mi̍ ŋ̄ dīmūl yɔ̄m si̍dāā wo̍ āā, ‘I̍ ye̍e̍ma̍ mā ke̍ yā chūā nūmndo̍, mā cha᷄l nda̍ po̍ nūu̍ o̍ nɔ̄ɔ̍ ni᷄ŋ.’ Mi̍ ī yɔ̄nu᷄ŋ, vīsīo̍o̍ lo̍ hīōūwɔ̄ɔ̍, mbo̍ kēī o̍ yɔ̄ɔ̍ŋ mu᷅ŋ chōo̍, mbo̍ mīŋgī mu̍ŋ lɛ̄ŋ mɛ̍mɛ̍.

¹⁰Le̍la̍ŋ Māsā Bɛ̍ndōo̍ Āmāsi̍yā, le̍ mɛ̄ɛ̍ ŋ̄ yēm wāŋnda̍ I̍dɔ̄m yɛ̍, nyɛ̄ ko̍ŋ cho̍ nu̍m hɔ̄lla̍ hēēlōo̍ chōo̍ ni̍. Tē a̍ ye̍e̍ma̍ chɔ̄mnɔ᷄ŋndo̍ pɛ̍, o̍ nūmndo̍ chi̍e̍e̍ lo̍ŋ ŋ̄ chɔ̍mnu̍ŋ ni̍. Kɛ̍ tē ā yɛ̄ɛ̄ a̍ ya̍ pɛ̍ nūm ni̍, wāŋnda̍ Chu̍dā ni̍, lā chō dɛ̍nɛ̍ pa̍lāa̍ sɔ̍lā.”

¹¹Kɛ̍ Māsā Bɛ̍ndōo̍ Āmāsi̍yā māsāa̍ Chu̍dā o̍ ye̍ŋ ndu̍ lānī le̍. O̍ ko̍ŋ, mi̍ Māsā Bɛ̍ndōo̍ Chɛ̄hōwa̍sī chu̍ā pūa̍a̍ ndūa̍a̍ chɔ̄ūwa̍ ma̍ kūā Bɛ̄tī Si̍a̍mɛ̍sī chi̍e̍e̍ o̍ lɛ̄ŋndē Chu̍dāle̍ŋ ni᷄ŋ, ma̍ kɔ̍ chi᷅ŋa̍la᷅ŋ Āmāsi̍yā nda̍ pūa̍a̍ ndūa̍a̍ chɔ̄ūwa̍ a̍ sɔ̍ŋgɔ̄ɔ̍.

¹²Ndu̍yɛ̍ mi̍ I̍sɔ̄lūɛ̍i̍ya̍ ā yām Āmāsi̍yā, nda̍ wāŋnda̍ Chu̍dā. O̍ ko̍ŋ, mi̍ wāŋnda̍ Chu̍dā a̍ nya̍a̍nu᷄ŋ, mi̍ wānā o̍ wānā o̍ mi̍i̍ŋgū o̍ ndu̍lo̍ chi̍e̍e̍.

¹³Ndu̍yɛ̍ mi̍ Chɛ̄hōwa̍sī, Māsā Bɛ̍ndōo̍ le̍ I̍sɔ̄lūɛ̄ī, o̍ bi̍ī Āmāsi̍yā, Bɛ̄tī Si̍a̍mɛ̍sī chi̍e̍e̍ mbo̍ kūā a̍ ndu̍ Chūlu̍sɛ̄lɛ̄m chi̍e̍e̍. Ndu̍yɛ̍ Āmāsi̍yā ko̍ŋ yɛ̄, fi̍nyā ndɔ̍ wa̍ Cho̍wa̍sī, po̍ Āhāsa̍yā wo̍ ni̍. O̍ ko̍ŋ kɔ̍ɔ̍lī, Chɛ̄hōwa̍sī nda̍ pūa̍a̍ ndūa̍a̍ ā kɔ̍ de᷅l vɛ̄lɛ̄ Chūlu̍sɛ̄lɛ̄m chōo̍, ma̍ pīāl sāāsa̍ ba̍lu̍ chi̍o̍o̍ wo̍, chɔ̍ŋ o̍ dīō sāāsāa̍ E̍fi̍lūēm, mbo̍ kūā o̍ dīō sāāsā Sɔ̍ŋgi̍o̍o̍. Fo̍ndāŋ nda̍ pɛ̄l ko̍ŋ ndo̍ ō wa̍ bānde̍i̍ nɛ̄īyo̍ kɛ̄mɔ̄ɔ̍ lē ŋɔ᷄mpu᷅m (600).

¹⁴O̍ ko̍ŋ kɔ̍ɔ̍lī, ko̍o̍līi̍ŋ wa̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ ni᷄ŋ ndo̍ŋ ni̍, ka̍ni̍ŋ hu̍mbūŋ wa̍ lo̍ŋ ndo̍ŋ ni̍, nyɛ̄m lāāndu᷄ŋ wa̍ lo̍ŋ ndo̍ŋ ni̍, ma̍ kūēndī mu̍ŋ kpo̍u̍, lātūlu̍ a̍ nyɛ̄ o̍ nyɛ̄ ba̍ā kāla̍ wa̍ o̍ chīɛ̄ī lēmāsāa̍ ni᷄ŋ, ma̍ kūānu᷄ŋ a̍ mu̍ŋ. O̍ ko̍ŋ kɔ̍ɔ̍lī, ma̍ bīī wāŋnda̍ ā ti᷄ŋ ma̍ kūānu᷄ŋ a̍ nda̍ o̍ chɛ̄le̍ŋ ni᷄ŋ Sāme̍e̍līāā.

¹⁵Sɔ̄ɔ̍ŋ tɔ᷅ŋ chēle̍ŋ yɔ̍nu̍ŋ o̍ māsāa̍ Chɛ̄hōwa̍sī le̍ŋ bɛ̄ŋgu̍ wo̍ŋ ki̍nɛ̍i̍, ndu̍yɛ̍ a̍ nyɛ̄ o̍ nyɛ̄ o̍ to̍sa̍ o̍ māsāle̍ ndɔ̄le̍ŋ ni᷄ŋ, lātūlu̍ a̍ sɔ̄ɔ̍ŋ tɔ̍ɔ̍ŋ bɛ̍ndūŋ o̍ to̍sa̍ wo̍ŋ a̍ sɔ̄ŋgā o̍ sɔ̍ŋga̍ a̍ Māsā Bɛ̍ndōo̍ Āmāsi̍yā māsāa̍ le̍ Chu̍dā wo̍, mu̍ŋ kpo̍u̍ ŋ̄ chō ŋ̄ pōōnyīāā o̍ yāu̍ sɔ̄ɔ̍ŋ pa̍a̍ndu̍ cho̍ a̍ māsāā bɛ̍ndūa̍a̍ I̍sɔ̄lūɛ̄ī o̍kɔ̄ɔ̄ wo̍ ni᷄ŋ.

¹⁶Mi̍ ī yɔ̄nu᷄ŋ mi̍ Māsā Bɛ̍ndōo̍ Chɛ̄hōwa̍sī wu᷅, ndu̍yɛ̍ ma̍ chɔ̄ ndu̍ Sāme̍e̍līāā chi̍e̍e̍ o̍ sɛ̄i̍ nda̍ lēmāsāa̍ ni᷄ŋ. O̍ ko̍ŋ, mi̍ Chɛ̄lōbo̍wām po̍ ndɔ̄ mi̍i̍ŋgū māsāa̍ o̍ fōōfo̍ ndɔ̄ɔ̍.

¹⁷Mɛ̄ɛ̍ Chɛ̄hōwa̍sī, māsāa̍ le̍ I̍sɔ̄lūɛ̄ī, po̍ Chɛ̄hōwa̍ha̍sī wo̍ ō vī, mi̍ Āmāsi̍yā, o̍ wa̍ māsāa̍ Chu̍dā wo̍, ō hīāū lāchī a̍ wāa̍ o̍ māsāa̍ le̍ Chu̍dā, le̍ wɔ̄sīla̍ŋ tɔ̍ a̍ lā ŋūɛ̍ɛ̍nu̍.

¹⁸Mi̍ ī yɔ̄nu᷄ŋ mi̍ wāŋnda̍ Chūlu̍sɛ̄lɛ̄m a̍ yi̍ī Māsāa̍ Āmāsi̍yā de̍fo̍o̍ le̍ ndu̍ dīyɔ̄ɔ̍. Mɛ̄ɛ̍ o̍ si̍na̍ māā ā yēēma̍ le̍ ndu̍ dīyɔ̄ɔ̍, mbo̍ nyāānu᷄ŋ La̍ki̍sī chi̍e̍e̍. Kɛ̍ mi̍ wāŋnda̍ ā ti᷄ŋ ā tūāl ndu̍ kɔ̄ɔ̄lī lo̍ŋ, ma̍ kɔ̍ di̍ī ndu̍ lo̍ŋ. Ma̍ chūā ndu̍ ō vīlɛ̍i̍yo̍ ma̍ kūā a̍ ndu̍ o̍ so̍o̍ cho̍o̍ Chūlu̍sɛ̄lɛ̄m. Ma̍ kɔ̍ chɔ᷅ ndu̍ o̍ Māsāa̍ Dēēve̍ lo̍ chi̍e̍e̍, o̍ sɛ̄i̍ nda̍ yu̍ŋgu̍ lēmāsāa̍ ni᷄ŋ. Sɔ̄ɔ̍ŋ tɔ᷅ŋ chēle̍ŋ yɔ̍nu̍ŋ o̍ māsāle̍ Āmāsi̍yā le̍ŋ bɛ̄ŋgu̍ wo̍ŋ ki̍nɛ̍i̍, a̍ nyɛ̄ o̍ nyɛ̄ o̍ to̍sa̍ o̍ māsāle̍ ndɔ̄le̍ŋ ni᷄ŋ, ŋ̄ chō ŋ̄ pōōnyīāā o̍ yāu̍ sɔ̄ɔ̍ŋ pa̍a̍ndu̍ cho̍ a̍ māsāā bɛ̍ndūa̍a̍ Chu̍dā o̍kɔ̄ɔ̄ wo̍ ni᷄ŋ.

¹⁹

²⁰

²¹Mi̍ wāŋnda̍ Chu̍dā kpo̍u̍ a̍ chɛ̍la᷅ŋ ma̍ sīīŋ̄gūū Yūsa̍yā Māsā o̍ fōōfo̍ Āmāsi̍yā fi̍nyā ndɔ̄ wo̍. Yūsa̍yā wa̍ wɔ̄sīla̍ŋ tɔ̍ a̍ lā ŋɔ᷄mpu᷅m mbo̍ sīmnu᷄ŋ ma̍sā bɛ̍ndōo̍ le̍ lɛ̄ŋndē Chu̍dāle̍ŋ.

²²Mɛ̄ɛ̍ Māsāa̍ Āmāsi̍yā o̍ vi᷅, mi̍ Yūsa̍yā po̍ ndɔ̄ o̍ ko̍ma̍ mi̍ŋgī Ɛ̍la̍tī chi̍e̍e̍ bi̍yɔ̄ɔ̄ ya̍a̍mɔ̍ɔ̍wa̍ o̍ bā, ndu̍yɛ̍ mbo̍ mīŋgī ndu̍ tāŋgūl, mbo̍ mīŋgī ndu̍ Chu̍dā chōo̍.

²³Wɔ̄sī Āmāsi̍yā, po̍ Cho̍wa̍sī wo̍ ō chīŋa̍ wɔ̄sīla̍ŋ tɔ̍ a̍ lā ŋūɛ̍ɛ̍nu̍ o̍ lēmāsā chu̍dā wo̍, wɔ̄sī kōŋ Chɛ̄lōbo̍wām po̍ Chɛ̄hōwa̍sī wo̍ ō sīmnu᷄ŋ ma̍sā bɛ̍ndōo̍ I̍sɔ̄lūɛ̄ī ni̍. Ndu̍yɛ̍ mbo̍ tōsā māsāle̍ŋ Sāme̍e̍līāā chi̍e̍e̍, le̍ lɛ̄ŋndē I̍sɔ̄lūɛ̍i̍le̍, le̍ wɔ̄sīla̍ŋ be̍le̍-hi̍ɔ̍ɔ̍lu̍ a̍ ō pīlɛ̍.

²⁴Kɛ̍ ndu̍ bɛ̍ɛ̍ mbo̍ tōsā yɔ̄ŋ wɔ̄ɔ̍ŋndo̍ Mɛ̍lɛ̄ka̍ o̍ hɔ̄l. Sɔ̄ɔ̍ŋ wɔ̍ɔ̍ŋ Māsā Bɛ̍ndōo̍ Chɛ̄lōbo̍wām, po̍ Ne̍ba̍tī wo̍ ō wa̍ tōsāa̍ mbo̍ tōsā mi̍ I̍sɔ̄lūɛ̍i̍ya̍ sīmnu᷄ŋ wa̍nāā yɔ̄ŋ wɔ̄ɔ̍ŋ Mɛ̄lɛ̄ka̍ o̍ hɔ̄l lo̍ŋ, ndu̍ bɛ̍ɛ̍ mu̍ŋ ko̍ni̍ o̍ to᷅l kɔ̄ɔ̄lī ni̍.

²⁵Fo̍ndā o̍ fo̍ndā ya̍a̍mɔ̍ɔ̍wa̍ nda̍ a̍a̍ po̍o̍nda̍ I̍sɔ̄lūɛ̍i̍ya̍ o̍ bā pāāndū, chɔ̍ŋ Lēbō Ha̍ma̍tī bā lūāŋndo̍, mbo̍ kūā o̍ pēe̍ nɔ̍ nya̍ā yōōmāā lēni᷄ŋ te̍ wo̍ bā tōūwo̍, mi̍ Chɛ̄lōbo̍wām mi̍ŋgī ndu̍ bīyɔ̄ɔ̄ kpo̍u̍. O̍ ko̍ŋ mi̍ nyɛ̄ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍ ō dɔ̄ū sīndɛ̄ wāna̍ su̍a̍ā le̍ ndu̍ wo̍ Cho̍nā o̍ sōndō mbo̍ dīmī a̍ I̍sɔ̄lūɛ̄ī o̍kɔ̄ɔ̄ wo̍ ō chīŋā lāsōndō. Ndu̍yɛ̍ Cho̍nā ko̍ŋ fi̍nyā ndɔ̍ wa̍ A̍mi̍tāī ni̍, wānā wa̍ā Kātī Hɛ̍fā chi̍e̍e̍.

²⁶Mi̍ Mɛ̄lɛ̄ka̍ Ya̍a̍wɛ̄ɛ̄ o̍ cha᷅ dɛ̍nɛ̍ pa̍lāā bɛ̄ndū nda̍ wa̍ wāŋnda̍ I̍sɔ̄lūɛ̍i̍ tūsīo̍o̍ chōo̍ wo̍. Wānā o̍ wāna̍ wa̍ o̍ lɛ̄ŋndē I̍sɔ̄lūɛ̍i̍le̍ŋ ni̍ŋ, chīa̍a̍ ni̍, wānāa̍ ve̍ la̍chɛ᷅ le̍ wa̍ ni̍, nda̍ kpo̍u̍ ā wa̍ sāŋgāa̍. O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ chā māā wāŋnda̍ ha̍ā ā nɔ̍ wa̍nā o̍ wānā mbō māla̍ nda̍ le̍.

²⁷Ndu̍yɛ̍ ō ve̍ tu̍u̍ Mɛ̄lɛ̄ka̍ Ya̍a̍wɛ̄ɛ̄ le̍ wa̍ mī ndu̍ o̍o̍ tɛ̍ɛ̍mbu̍u̍ I̍sɔ̄lūɛ̍i̍ya̍ mbō bāsu̍ nda̍ tɛ̍ɛ̍ o̍ chi̍e̍ēŋndo̍ chōo̍ le̍. Le̍ he̍ī, mi̍ ndu̍ Mɛ̍lɛ̄ka̍ kē Māsā Bɛ̍ndōo̍ Chɛ̄lōbo̍wām po̍ Cho̍wa̍sī wo̍ kpāāyāa̍, le̍ mbo̍ bāŋā I̍sɔ̄lūɛ̍i̍ya̍ ya̍a̍mɔ̍ɔ̍wa̍a̍ ndāa̍ o̍ bā.

²⁸Sɔ̄ɔ̍ŋ tɔ᷅ŋ chēle̍ŋ yɔ̍nu̍ŋ o̍ māsāle̍ Chɛ̄lōbo̍wām, po̍ Chɛ̄hōwa̍ha̍sī wo̍ bɛ̄ŋgu̍ wo̍ŋ ki̍nɛ̍i̍, a̍ nyɛ̄ o̍ nyɛ̄ o̍ tōsa̍ o̍ māsāle̍ ndɔ̄le̍ŋ ni᷄ŋ, lātūlu̍ a̍ sɔ̄ɔ̍ŋ tɔ̍ɔ̍ŋ bɛ̍ndūŋ o̍ to̍sa̍ wo̍ŋ, sɔ̍ŋgɔ̄lā o̍ sɔ̍ŋga̍ la̍ŋ ni̍, a̍ mɛ̄ɛ̍ o̍ lo̍o̍ku̍ Dāma̍si̍kɔ̍ɔ̄, a̍ Hāma̍tī mīŋgī bīyɔ̄ɔ̄ mbo̍ mīŋgī mu̍ŋ I̍sɔ̍lūɛ̄ī chōo̍ yɛ̍ ni̍, mu̍ŋ kpo̍u̍, ŋ̄ chō ŋ̄ pōōnyīāā o̍ yāu̍ sɔ̄ɔ̍ŋ pa̍a̍ndu̍ cho̍ a̍ māsāa̍ I̍sɔ̄lūɛ̄ī o̍kɔ̄ɔ̄ wo̍ ni᷄ŋ.

²⁹Mi̍ ī yɔ̄nu᷄ŋ mi̍ Chɛ̄lōbo̍wām o̍ wu᷅, ndu̍yɛ̍ ma̍ chɔ̄ ndu̍ o̍ sɛ̄i̍ nda̍ lēmāsāa̍ ni᷄ŋ. O̍ ko̍ŋ, mi̍ Sɛ̄kāla̍yā po̍ ndɔ̄ mi̍i̍ŋgū māsāa̍ o̍ fōōfo̍ ndɔ̄ɔ̍.