Read Southern Kisi Māsāā Bɛ̍ndūāā Di̍i̍ŋ Ndūa̍a̍ 15 Bible Online

Māsāā Bɛ̍ndūāā Di̍i̍ŋ Ndūa̍a̍ 15 - Southern Kisi bible

Māsāā Bɛ̍ndūāā Di̍i̍ŋ Ndūa̍a̍ 15

¹Wɔ̄sī Chɛ̄lōbo̍wām o̍ wa̍ I̍sɔ̄lūɛ̄ī yo̍ ō chīŋa̍ wɔ̄sīla̍ŋ bi̍dīi̍ŋ a̍ lā ŋɔ᷄mmɛ̍ū o̍ lēmāsā I̍sɔ̄lūɛ̄ī yo̍, wɔ̄sī kōŋ Yūsa̍yā po̍ Āmāsi̍yā wo̍ ō sīmnu᷄ŋ ma̍sāa̍ le̍ Chu̍dā ni̍.

²Yūsa̍yā wa̍ wɔ̄sīla̍ŋ tɔ̍ a̍ lā ŋɔ᷄mpu᷅m, mbo̍ sīmnu᷄ŋ māsāa̍ Chu̍dā. Ndu̍yɛ̍ mbo̍ tōsā māsāle̍ŋ Chūlu̍sɛ̄lɛ̄m le̍ wɔ̄sīla̍ŋ be̍le̍-ŋu̍ɛ̍ɛ̍nu̍ a̍ lā tīɔ̍ɔ̍ŋ, chi̍e̍e̍ le̍bo᷅llo̍ le̍ lɛ̄ŋndē Chu̍dāle̍ŋ. Yūsa̍yā ko̍ŋ, kāla̍ ndɔ̍ wa̍ Chɛ̄kōli̍yā ni̍, wānā wa̍ā Chūlu̍sɛ̄lɛ̄m chi̍e̍e̍.

³Ndu̍yɛ̍, Yūsa̍yā wa̍ sa̍kpō Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l, mɛ̄ɛ̍ Āmāsi̍yā fi̍nyā ndɔ̄ o̍ wa̍ sa̍kpō, mbo̍ tōsā nyɛ᷄ hi̍nī Mɛ̍lɛ̄ka̍ kɔ̄llo̍ yɛ̍.

⁴Kɛ̍ ndu̍yɛ̍, fo̍ndāŋndā wāŋnda̍ nda̍ a̍a̍ so̍o̍lūū mɛ̄lɛ̄ka̍ā ndāā yɛ̍ yi̍a̍a̍ la̍ŋ ki̍nɛ̍i̍, ō tɛ̄ɛ̄mbu̍u̍ la̍ŋ te̍, wāŋnda̍ wa̍ wɔ̄ hīōūwɔ̄ɔ̍ lāchī a̍ sa̍lāla̍ŋ sōlīo̍o̍ o̍ fo̍ndāŋnda̍ŋ nda᷅ŋ, mā lūām nyɛ᷅m chūŋ kɛ̄ndɔ᷄ŋ lo̍ŋ o̍ mɛ̄lɛ̄ka̍ā ndāā ka̍ŋ ndo̍.

⁵Le̍ he̍ī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ tu̍sī Yūsi̍a̍ā nyɛ̄ pālāa̍ chōo̍, mi̍ Mɛ̄lɛ̄ka̍ tōsā mi̍ nāā wɔ̄ɔ̍ŋ pūm ō dēl ndu̍ lēkɔ̄ɔ̍. Nāā kōŋ lo̍ ndu̍ ni᷅ŋ lēkɔ̄ɔ̍ ha̍a̍a̍ a̍ mɛ̄ɛ̄lu̍la̍ yōōmū ndɔ̄ɔ̍. Ndu̍yɛ̍ ō vī ni᷅ŋ le̍nde̍, ō wa̍ ni᷅ŋ chīɛ̄īyo̍ o̍ ndɔ̍ yɛ̍. Cho̍tām po̍ ndɔ̍ wa̍ ni᷅ŋ chīɛ̄ī lēmāsāa̍ bōlle̍ŋ ni̍, ndu̍yɛ̍ ndu̍ ko̍ni̍ wa̍ vɛ̄lɛ̄ sɔ̄ɔ̍ŋ lēlɛ̄ŋndo̍ŋ bōlle̍ŋ dīmīo̍o̍ ni̍.

⁶Sɔ̄ɔ̍ŋ tɔ᷅ŋ chēle̍ŋ yɔ̍nu̍ŋ o̍ māsāle̍ Yūsa̍yā le̍ŋ bɛ̄ŋgu̍ wo̍ŋ ki̍nɛ̍i̍, ndu̍yɛ̍ a̍ nyɛ̄ o̍ nyɛ̄ o̍ to̍sa̍ o̍ māsāle̍ ndɔ̄le̍ŋ ni᷄ŋ, ŋ̄ chō ŋ̄ pōōnyīāā o̍ yāu̍ sɔ̄ɔ̍ŋ pa̍a̍ndu̍ cho̍ a̍ māsāā bɛ̍ndūa̍a̍ Chu̍dā o̍kɔ̄ɔ̄ wo̍ ni᷄ŋ.

⁷Mi̍ ī yɔ̄nu᷄ŋ, mi̍ Yūsa̍yā wu᷅, ma̍ chɔ̄ ndu̍ o̍ Māsāa̍ Dēēve̍ lo̍ chi̍e̍e̍ o̍ fo̍ndā nda̍ chɔ̍ fi̍nyāā ndūāā ma̍māa̍ wo̍. O̍ ko̍ŋ, mi̍ Cho̍tām po̍ ndɔ̄ mīīŋgū māsā bɛ̍ndōo̍ o̍ fōōfo̍ ndɔ̄ɔ̍.

⁸Wɔ̄sī Yūsa̍yā o̍ wa̍ Chu̍dā wo̍, ō chīŋa̍ wɔ̄sīla̍ŋ be̍le̍-ya̍a̍ a̍ lā ŋɔ̄ma̍a̍ o̍ lēmāsā Chu̍dā wo̍, wɔ̄sī kōŋ Sɛ̄kāla̍yā, po̍ Chɛ̄lōbo̍wām ndo̍ ō sīmnu᷄ŋ māsā bɛ̍ndōo̍ I̍sɔ̄lūɛ̄ī ni̍. Ndu̍yɛ̍ mbo̍ tōsā māsāle̍ŋ Sāme̍e̍līāā chi̍e̍e̍, le̍ lɛ̄ŋndē I̍sɔ̄lūɛ̍i̍le̍ŋ le̍ pāŋgo̍ŋ ŋ̄ ŋɔ᷄mpu᷅m.

⁹Kɛ̍ ndu̍ bɛ̍ɛ̍, mbo̍ tūāl nɛ̄i̍ fi̍nyāā ndūa̍a̍ ā kūɛ̄ chōo̍ wo̍ kɔ̄ɔ̄lī, mbo̍ tōsā nyɛ̍ bɛ̍nda̍ Mɛ̍lɛ̄ka̍ Ya̍a̍wɛ̄ɛ̄ o̍ hɔ̄l te̍ wo̍. Sɔ̄ɔ̍ŋ wɔ̄ɔ̍ŋ Chɛ̄lōbo̍wām, po̍ Ne̍ba̍tī wo̍ ō wa̍ tōsāa̍, mbo̍ tōsā mi̍ I̍sɔ̄lūɛ̍i̍ya̍ ā tōsā yɔ̄ŋ wɔ̄ɔ̍ŋndo̍ Mɛ̄lɛ̄ka̍ o̍ hɔ̄l lo̍ŋ, ndu̍ bɛ̍ɛ̍ ō fēŋa̍ŋ sɔ̍ɔ̍ŋ mu̍ŋ kɔ̄ɔ̄lī le̍.

¹⁰Kɛ̍ mi̍ po̍ pi᷅lɛ̍ dīōla̍ŋ āā Si̍a̍lūm, po̍ Cha̍bɛ̍sī wo̍ ō yīī ndu̍ de̍fo̍o̍ mbo̍ dīī ndu̍ Kātīlu̍i̍mɔ̄m chi̍e̍e̍ wa᷅ŋnda̍ o̍ hɔ̄l kpe̍nde̍ke̍le̍. O̍ ko̍ŋ kɔ̍ɔ̍lī, mi̍ Si̍a̍lūm ko̍ŋ ō mi̍i̍ŋgū māsā bɛ̍ndōo̍ o̍ fōōfo̍ ndɔ̄ɔ̍.

¹¹Sɔ̄ɔ̍ŋ tɔ᷅ŋ chēle̍ŋ yɔ̍nu̍ŋ o̍ māsāle̍ Sɛ̄kāla̍yā le̍ŋ bɛ̄ŋgu̍ wo̍ŋ ki̍nɛ̍i̍, a̍ nyɛ̄ o̍ nyɛ̄ o̍ to̍sa̍ o̍ māsāle̍ ndɔ̄le̍ŋ ni᷄ŋ, ŋ̄ chō ŋ̄ pōōnyīāā o̍ yāu̍ sɔ̄ɔ̍ŋ pa̍a̍ndu̍ cho̍ a̍ māsāā bɛ̍ndūa̍a̍ I̍sɔ̄lūɛ̄ī o̍kɔ̄ɔ̄ wo̍ ni᷄ŋ.

¹²O̍ ko̍ŋ, mi̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ chu̍e̍l Chɛ̍hū būŋgɛ̄i̍ yo̍, ō pīā lāsōndō. Mi̍ Mɛ̄lɛ̄ka̍ Ya̍a̍wɛ̄ɛ̄ o̍ chu̍ēl ndu̍ būŋgɛ̄i̍, mbo̍ dīmūl ndu̍ māā māsāā bɛ̍ndūa̍a̍ ke̍e̍kū ni̍ŋ I̍sɔ̄lūɛ̄ī ya̍, ā hīɔ̍ɔ̍lu̍ fu̍lā ni̍ŋ o̍ pūlālē ndɔ̄le̍ŋ chōo̍ ni̍. Ndu̍yɛ̍ mi̍ ī yɔ̄nu̍ŋ le̍nde̍ mɛ̄ɛ̍ Mɛ̄lɛ̄ka̍ dīmi̍ yɛ̍.

¹³Wɔ̄sī Yūsa̍yā o̍ wa̍ māsāa̍ Chu̍dā wo̍, ō chīŋa̍ wɔ̄sīla̍ŋ be̍le̍-ya̍a̍ a̍ lā ŋɔ̄ma̍hīɔ̍ɔ̍lu̍ o̍ lēmāsā wo̍, wɔ̄sī kōŋ Si̍a̍lūm, po̍ Cha̍bɛ̍sī wo̍ ō sīmnu᷄ŋ ma̍sāa̍ I̍sɔ̄lūɛ̄ī ni̍. Kɛ̍ pāŋge̍i̍ ī pīlɛ̍ ko̍ni̍ o̍ to̍sa̍ o̍ lēmāsā ni̍.

¹⁴Po̍ pi᷅lɛ̍ wa̍ mā vēēlū ndu̍ āā Mɛ̍na̍hɛ̄m, fi̍nyā ndɔ̍ dīōla̍ŋ āā Ka̍a̍dī, wānā wa̍ā Tɛ̍ɛ̍sāā chi̍e̍e̍, mbo̍ yīī māsāa̍ Si̍a̍lūm de̍fo̍o̍. Mbo̍ mālnu᷄ŋ Tɛ̍ɛ̍sāā chi̍e̍e̍ mbo̍ kūā Sāme̍e̍līāā mbo̍ kɔ̍ di̍ī ndu̍. O̍ ko̍ŋ kɔ̍ɔ̍lī, mi̍ Mɛ̍na̍hɛ̄m mi̍i̍ŋgū māsā bɛ̍ndōo̍ o̍ fōōfo̍ ndɔ̄ɔ̍.

¹⁵Sɔ̄ɔ̍ŋ tɔ᷅ŋ chēle̍ŋ yɔ̍nu̍ŋ o̍ māsāle̍ Si̍a̍lūm nde̍ŋ bɛ̄ŋgu̍ wo̍ŋ ki̍nɛ̍i̍, a̍ nyɛ̄ o̍ nyɛ̄ o̍ to̍sa̍ o̍ māsāle̍ ndɔ̄le̍ŋ ni᷄ŋ, lātūlu̍ a̍ mɛ̄ɛ̍ o̍ lo̍o̍ku̍ Māsā Bɛ̍ndōo̍ Sɛ̄kāla̍yā de̍fo̍o̍ yīī mbo̍ dīī ndu̍ yɛ̍, mu̍ŋ kpo̍u̍, ŋ̄ chō ŋ̄ pōōnyīāā o̍ yāu̍ sɔ̄ɔ̍ŋ pa̍a̍ndu̍ cho̍ a̍ māsāa̍ bɛ̍ndūa̍a̍ I̍sɔ̄lūɛ̄ī o̍kɔ̄ɔ̄ wo̍ ni᷄ŋ.

¹⁶Wɔ̄sī Yūsa̍yā māsāa̍ Chu̍dā, o̍ chi̍ŋa̍ wɔ̄sīla̍ŋ be̍le̍-ya̍a̍, a̍ lā ŋɔ̄ma̍hīɔ̍ɔ̍lu̍ o̍ lēmāsā Chu̍dā wo̍, wɔ̄sī ko̍ŋ Mɛ̍na̍hɛ̄m, po̍ Ka̍a̍dī wo̍ ō sīmnu᷄ŋ ma̍sāa̍ I̍sɔ̄lūɛ̄ī ni̍. Ndu̍yɛ̍ mi̍ Mɛ̍na̍hɛ̄m to̍sā māsāle̍ŋ Sāme̍e̍līāā chi̍e̍e̍, le̍ lɛ̄ŋndē I̍sɔ̄lūɛ̍i̍le̍ŋ le̍ wɔ̄sīla̍ŋ tɔ̍. Kɛ̍ wāŋnda̍ Ta̍pūāā chi̍e̍e̍ o̍ lɛ̄ŋndē I̍sɔ̄lūɛ̄ī ni̍ŋ nda̍ chɛ᷄l mā yɔ̄ŋgu̍ŋ Māsā Bɛ̍ndōo̍ Mɛ̍na̍hɛ̄m o̍ bā bɛ̄ŋgu̍ le̍. O̍ ko̍ŋ, mi̍ Māsā Bɛ̍ndōo̍ Mɛ̍na̍hɛ̄m o̍ ma̍lnu᷄ŋ Tɛ̍ɛ̍sāā chi̍e̍e̍, mbo̍ kɔ̍ de᷅l Ta̍pūāā chōo̍, a̍ chi̍e̍e̍ŋ pɔ̍mbɔ᷄ŋ ba̍lu̍ ndu̍ wo̍ŋ, mbo̍ tɛ̄ɛ̄mbūū mu̍ŋ kpo̍u̍. Wānā o̍ wāna̍ wa̍ o̍ chi̍e̍e̍ŋ ndɔ̄ŋ mu̍ŋ mbo̍ dīū nda̍ kpo̍u̍. O̍ ko̍ŋ kɔ̍ɔ̍lī, wānāā lāyo᷄lla̍a̍ wa̍ lo̍ŋ nda̍, mbo̍ būūlūū nda̍ dēmbēla̍ŋ.

¹⁷

¹⁸Kɛ̍ ndu̍ bɛ̍ɛ̍ mbo̍ tōsā yɔ̄ŋ wɔ̄ɔ̍ŋndo̍ Mɛ̍lɛ̄ka̍ Ya̍a̍wɛ̄ɛ̄ o̍ hɔ̄l. Sɔ̄ɔ̍ŋ wɔ̄ɔ̍ŋ Chɛ̄lōbo̍wām, po̍ Ne̍ba̍tī wo̍ ō wa̍ tōsāa̍, mbo̍ tōsā mi̍ wāŋnda̍ I̍sɔ̄lūɛ̄ī a̍ to̍sā yɔ̄ŋ wɔ̄ɔ̍ŋndo̍ Mɛ̄lɛ̄ka̍ o̍ hɔ̄l lo̍ŋ, ndu̍ bɛ̍ɛ̍ ō fēŋa̍ŋ mu̍ŋ kɔ̄ɔ̄lī le̍.

¹⁹A̍ te̍le̍ŋ pi᷅lɛ̍, mi̍ Māsā Bɛ̍ndōo̍ Tīkīlātī Pi̍lɛ̍sā o̍ wa̍ Āsi̍i̍līāā wo̍ ō chūā pūa̍a̍ ndūa̍a̍ chɔ̄ūwa̍ ma̍ kūā le̍ lɛ̄ŋndē I̍sɔ̄lūɛ̍i̍le̍ŋ dēlɔ̄ɔ̍ chōo̍ a̍ sɔ̍ŋgɔ̄ɔ̍. O̍ ko̍ŋ, wānā o̍ wānā su̍lāa̍ wa̍ I̍sɔ̄lūɛ̄ī, mi̍ Māsāa̍ Mɛ̍na̍hɛ̄m o̍ tu̍āl nda̍ kɔ̄ɔ̄lī a̍ wāŋta̍ndā, mi̍ wānā o̍ wānā yɔ̍ŋgū nyɛ̄ sɔ̄lāa̍ ka̍ni̍ŋ hu̍mbo̍ŋ be̍le̍-ŋu̍ɛ̍ɛ̍nu̍. Ka̍ni̍ŋ hu̍mbūŋ o̍ bi̍u̍ wāŋnda̍ o̍ lābā wo̍ŋ, mu̍ŋ wa᷅ lūsu̍llo̍ le̍ pa᷅ŋnda̍ŋ wāa̍la̍ŋ be̍le̍-ŋɔ̍mmɛ̍ū a̍ lā hīɔ̍ɔ̍lu̍ (74,000). Mbo̍ chūā nyɛ̄ sɔ̄lāa̍ ho̍ō kpo̍u̍, mbo̍ kē Māsā Bɛ̍ndōo̍ Tīkīlātī Pi̍lɛ̍sā le̍ mī Māsā Bɛ̍ndōo̍ Tīkīlātī Pɛ̍lɛ̍sā o̍ ma̍la̍ ndu̍ mbō chɔ̄ɔ̄lu̍ kpāāyāa̍ sɔ̄lā lɛ̄ŋndē I̍sɔ̄lūɛ̍i̍le̍ŋ chōo̍. O̍ ko̍ŋ, mi̍ Māsā Bɛ̍ndōo̍ Tīkīlātī Pi̍lɛ̍sā o̍ chɛ᷅l mbo̍ chu̍ā pūa̍a̍ ndūa̍a̍ chɔ̄ūwa̍ ma̍ mīīŋgu᷄ŋ, ā de᷄l lɛ̍ lɛ̄ŋndē I̍sɔ̄lūɛ̍i̍le̍ŋ chōo̍ le̍.

²⁰

²¹Sɔ̄ɔ̍ŋ tɔ᷅ŋ chēle̍ŋ yɔ̄nu᷄ŋ o̍ māsāle̍ Māsā Bɛ̍ndōo̍ Mɛ̍na̍hɛ̄m nde̍ŋ bɛ̄ŋgu̍ wo̍ŋ ki̍nɛ̍i̍, a̍ nyɛ̄ o̍ nyɛ̄ chēle̍ŋ o̍ to̍sa̍ o̍ māsāle̍ ndɔ̄le̍ŋ ni᷄ŋ, mu̍ŋ kpo̍u̍ ŋ̄ chō ŋ̄ pōōnyīāā o̍ yāu̍ sɔ̄ɔ̍ŋ pa̍a̍ndu̍ cho̍ a̍ māsāā bɛ̍ndūa̍a̍ I̍sɔ̄lūɛ̄ī o̍kɔ̄ɔ̄ wo̍ ni᷄ŋ.

²²O̍ ko̍ŋ kɔ̍ɔ̍lī, mi̍ Mɛ̍na̍hɛ̄m wu᷅. O̍ ko̍ŋ, mi̍ Pɛ̄kāha̍yā po̍ ndɔ̄ mi̍i̍ŋgū māsā bɛ̍ndōo̍ o̍ fōōfo̍ ndɔ̄ɔ̍.

²³Wɔ̄sī Yūsa̍yā[7] ma̍sāa̍ Chu̍dā, o̍ chi̍ŋa̍ wɔ̄sīla̍ŋ be̍le̍-ŋu̍ɛ̍ɛ̍nu̍ o̍ lēmāsā Chu̍dā wo̍, wɔ̄sī ko̍ŋ Pɛ̄kāha̍yā po̍ Mɛ̍na̍hɛ̄m ndo̍ ō sīmnu᷄ŋ māsā bɛ̍ndōo̍ I̍sɔ̄lūɛ̄ī ni̍. Ndu̍yɛ̍ mbo̍ tōsā māsāle̍ŋ Sāme̍e̍līāā chi̍e̍e̍, le̍ lɛ̄ŋndē I̍sɔ̄lūɛ̍i̍le̍ŋ le̍ wɔ̄sīla̍ŋ lā tīɔ̍ɔ̍ŋ.

²⁴Kɛ̍ Māsā Bɛ̍ndōo̍ Pɛ̄kāha̍yā bɛ̍ɛ̍ mbo̍ tōsā yɔ̄ŋ wɔ̄ɔ̍ŋndo̍ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l. Sɔ̄ɔ̍ŋ wɔ̄ɔ̍ŋ Chɛ̄lōbo̍wām po̍ Ne̍ba̍tī wo̍ ō wa̍ tōsāa̍ mbo̍ tōsā mi̍ I̍sɔ̄lūɛ̍i̍ya̍ ā tōsā yɔ̄ŋ wɔ̄ɔ̍ŋndo̍ Mɛ̄lɛ̄ka̍ o̍ hɔ̄l lo̍ŋ, ndu̍ bɛ̍ɛ̍ ō fēŋa̍ŋ sɔ̍ɔ̍ŋ mu̍ŋ kɔ̄ɔ̄lī le̍.

²⁵Po̍ pi᷅lɛ̍ wa̍ mā vēēlū ndu̍ āā Pɛ̍kā, fi̍nyā ndɔ̍ dīōla̍ŋ āā Lūɛ̄ma̍līāā. Pɛ̍kā ko̍ŋ ō wa̍ wānā bɛ̍ndōo̍ ō pīlɛ̍ le̍ pūa̍a̍ chɔ̄ūwāa̍ Pɛ̄kāha̍yā wa̍. Kɛ̍ mi̍ pōo̍ ho̍ō yīī Māsā Bɛ̍ndōo̍ Pɛ̄kāha̍ya̍ de̍fo̍o̍ le̍ ndu̍ dīyɔ̄ɔ̍. Mbo̍ chūā pūa̍a̍ o̍ būŋgɛ̄ī Ki̍li̍a̍a̍dīve̍ ni᷄ŋ ŋ̄wāŋ be̍le̍-ŋu̍ɛ̍ɛ̍nu̍ ma̍ kūā Sāme̍e̍līāā chi̍e̍e̍, ma̍ kēēku̍ o̍ fo̍ndāŋ kālā ka̍lā wānā a̍a̍ hi̍a̍ū mā lūɛ̄ī o̍ chīɛ̄ī lēmāsāa̍ ni᷄ŋ ndo̍ a̍ sɔ̍ŋgɔ̄ɔ̍, ma̍ kɔ̍ de᷅l Māsāa̍ Pɛ̄kāha̍ya̍ chōo̍ ma̍ dīī ndu̍. O̍ ko̍ŋ, mi̍ Pɛ̍kā ko̍ŋ ō mīīŋgū māsā bɛ̍ndōo̍ o̍ fōōfo̍ Māsāa̍ Pɛ̄kāha̍yā wo̍.

²⁶Sɔ̄ɔ̍ŋ tɔ᷅ŋ chēle̍ŋ yɔ̍nu̍ŋ o̍ māsāle̍ Pɛ̄kāha̍yā le̍ŋ bɛ̄ŋgu̍ wo̍ŋ ki̍nɛ̍i̍, a̍ nyɛ̄ o̍ nyɛ̄ o̍ to̍sa̍ o̍ māsāle̍ ndɔ̄le̍ŋ ni᷄ŋ mu̍ŋ kpo̍u̍ ŋ̄ chō ŋ̄ pōōnyīāā o̍ yāu̍ sɔ̄ɔ̍ŋ pa̍a̍ndu̍ cho̍ a̍ māsāā bɛ̍ndūa̍a̍ I̍sɔ̄lūɛ̄ī o̍kɔ̄ɔ̄ wo̍ ni᷄ŋ.

²⁷Wɔ̄sī Yūsa̍yā ma̍sāa̍ Chu̍dā, o̍ chi̍ŋa̍ wɔ̄sīla̍ŋ be̍le̍-ŋu̍ɛ̍ɛ̍nu̍ a̍ lā tīɔ̍ɔ̍ŋ o̍ lēmāsā Chu̍dā wo̍, wɔ̄sī kōŋ Pɛ̍kā, po̍ Lūɛ̄ma̍līāā wo̍ ō sīmnu᷄ŋ māsā bɛ̍ndōo̍ I̍sɔ̄lūɛ̄ī ni̍. Ndu̍yɛ̍ mbo̍ tōsā māsāle̍ŋ Sāme̍e̍līāā chi̍e̍e̍, le̍ lɛ̄ŋndē I̍sɔ̄lūɛ̍i̍le̍ŋ le̍ wɔ̄sīla̍ŋ bi̍di̍i̍ŋ.

²⁸Kɛ̍ ndu̍ bɛ̍ɛ̍ mbo̍ tōsā yɔ̄ŋ wɔ̄ɔ̍ŋndo̍ Mɛ̍lɛ̄ka̍ Ya̍a̍wɛ̄ɛ̄ o̍ hɔ̄l. Sɔ̄ɔ̍ŋ wɔ̄ɔ̍ŋ Chɛ̄lōbo̍wām po̍ Ne̍ba̍tī wo̍ ō wa̍ chōo̍ mbo̍ tōsā mi̍ wāŋnda̍ I̍sɔ̄lūɛ̄ī a̍ to̍sā yɔ̄ŋ wɔ̄ɔ̍ŋndo̍ Mɛ̄lɛ̄ka̍ o̍ hɔ̄l lo̍ŋ, ndu̍ bɛ̍ɛ̍ ō fe̍ŋa̍ŋ sɔ̍ɔ̍ŋ mu̍ŋ kɔ̄ɔ̄lī le̍.

²⁹Bōōndi̍i̍ Pɛ̍kā wa̍ māsā bɛ̍ndōo̍ I̍sɔ̄lūɛ̍i̍ ye̍, bōōndi̍i̍ ke̍ŋ Māsā Bɛ̍ndōo̍ Tīkīlātī Pi̍lɛ̍sā, o̍ wa̍ Āsi̍i̍līāā wo̍ ō hīŋ vɛ̄lɛ̄ ni̍, mbo̍ hu᷄ŋ de᷅l I̍sɔ̄lūɛ̍i̍ chōo̍ a̍ sɔ̍ŋgɔ̄ɔ̍, mbo̍ pōōndīāā chi̍e̍e̍ŋ nda̍ŋ ŋ̄ ti᷄ŋ, a̍ fo̍ndāŋndā ndāla̍ŋ. Chi̍e̍e̍ŋ ndāŋ mu̍ŋ ŋ̍ wa̍ mu᷅ŋ ni̍. A̍i̍chɔ̄ŋ, a̍ E̍bɛ̄ɛ̄l Bɛ̄tī Ma̍a̍kāā, a̍ Cha̍no̍wāā a̍ Kɛ̍dɛ̍sī, a̍ Ha̍sɔ̄ɔ̄. O̍ ko̍ŋ kɔ̍ɔ̍lī, būŋgɛ̄ī Ki̍li̍a̍a̍dīve̍ ki̍nɛ̍i̍, a̍ būŋgɛ̄ī Kāli̍līve̍, a̍ būŋgɛ̄ī Nāfi̍ta̍lī ve̍, mu̍ŋ kpo̍u̍ mbo̍ bīī. Ndu̍yɛ̍ wānā o̍ wāna̍ wa̍ o̍ chi̍e̍e̍ŋ mu̍ŋ, a̍ o̍ fo̍ndāŋndā lāŋ, mbo̍ bīī nda̍ kpo̍u̍, mbo̍ kūā a̍ nda̍ o̍ chɛ̄le̍ŋ ni᷄ŋ Āsi̍i̍līāā.

³⁰O̍ ko̍ŋ kɔ̍ɔ̍lī, mi̍ Ho̍sīāā, po̍ Ɛ̍lāā wo̍ ō yīī Māsā Bɛ̍ndōo̍ Pɛ̍kā de̍fo̍o̍ mbo̍ dīī ndu̍. O̍ ko̍ŋ, mi̍ Ho̍sīāā mi̍i̍ŋgū māsā bɛ̍ndōo̍ I̍sɔ̄lūɛ̄ī. Wɔ̄sī Cho̍tām po̍ Yūsa̍yā wo̍ ō chīŋa̍ wɔ̄sīla̍ŋ bi̍di̍i̍ŋ o̍ lēmāsā Chu̍dā wo̍, o̍ wɔ̄sī kōŋ ni᷄ŋ kpe̍e̍kpe̍i̍ sūɛ̍i̍ he̍ī ī yɔ̄nu̍ŋ ni̍.

³¹Sɔ̄ɔ̍ŋ tɔ᷅ŋ chēle̍ŋ yɔ̍nu̍ŋ o̍ Māsāle̍ Pɛ̍kā le̍ŋ bɛ̄ŋgu̍ wo̍ŋ ki̍nɛ̍i̍, a̍ nyɛ̄ o̍ nyɛ̄ o̍ to̍sa̍ o̍ māsāle̍ ndɔ̄le̍ŋ ni᷄ŋ, mu̍ŋ kpo̍u̍, ŋ̄ chō ŋ̄ pōōnyīāā o̍ yāu̍ sɔ̄ɔ̍ŋ pa̍a̍ndu̍ cho̍ a̍ māsāā bɛ̍ndūa̍a̍ I̍sɔ̄lūɛ̄ī o̍kɔ̄ɔ̄ wo̍ ni᷄ŋ.

³²Wɔ̄sī Pɛ̍kā ma̍sāa̍ I̍sɔ̄lūɛ̍i̍, o̍ chi̍ŋa̍ wɔ̄sīla̍ŋ lā tīɔ̍ɔ̍ŋ o̍ lēmāsā I̍sɔ̄lūɛ̄ī yo̍, wɔ̄sī kōŋ Cho̍tām po̍ Yūsa̍yā wo̍ ō sīmnu᷄ŋ ma̍sāa̍ Chu̍dā ni̍.

³³Cho̍tām wa̍ wɔ̄sīla̍ŋ bi̍dīi̍ŋ a̍ lā ŋūɛ̍ɛ̍nu̍, mbo̍ sīmnu᷄ŋ ma̍sāa̍ Chu̍dā. Ndu̍yɛ̍ mbo̍ tōsā māsāle̍ŋ Chūlu̍sɛ̄lɛ̄m le̍ wɔ̄sīla̍ŋ tɔ̍ a̍ lā ŋɔ᷄mpu᷅m, chi̍e̍e̍ le̍bo᷅llo̍ le̍ lɛ̄ŋndē Chu̍dāle̍ŋ. Cho̍tām ko̍ŋ yɛ̄, kāla̍ ndɔ̍ wa̍ Chɛ̄lu̍sīā, chu̍ā Sa̍dɔ̍kī wo̍ ni̍.

³⁴Ndu̍yɛ̍, mbo̍ tōsā nyɛ̍ wa̍ ō kɛ̄ndɛ̄ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l lo̍, mɛ̄ɛ̍ Yūsa̍yā fi̍nyā ndɔ̄, o̍ wa̍ wānā kɛ̍ndɛ̄ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l lɛ̍. Nɛ̄i̍ Yūsa̍yā fi̍nyā ndɔ̄ ku̍ɛ̄ chōo̍ wo̍, nɛ̄ī ko̍ŋ ko̍ni̍ ndu̍ bɛ̍ɛ̍ o̍ to᷅l kɔ̄ɔ̄lī ni̍.

³⁵Kɛ̍ ndu̍yɛ̍, fo̍ndāŋndā wāŋnda̍ nda̍ a̍a̍ so̍o̍lūū mɛ̍lɛ̄ka̍ā ndāā yɛ̍ yi̍a̍a̍ la̍ŋ ki̍nɛ̍i̍, ndu̍ bɛ̍ɛ̍ ō tɛ̄ɛ̄mbu̍u̍ la̍ŋ te̍. Wāŋnda̍ wa̍ wɔ̄ hīōūwɔ̄ɔ̍ lāchī a̍ sa̍lāla̍ŋ sōlīo̍o̍ o̍ fo̍ndāŋndā lāŋ, mā lūām nyɛ᷅m chūŋ kɛ̄ndɔ᷄ŋ lo̍ŋ o̍ mɛ̄lɛ̄ka̍ā ndāā ka̍ŋ ndo̍. Di̍o̍ wa̍ o̍ kpāki̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍, mā vēēlū ndu̍ āā Dīō Mālūāŋ ndo̍ wo̍, Cho̍tām mi̍ŋgi̍ ndu̍ ni᷅ŋ tāŋgūl ni̍.

³⁶O̍ ko̍ŋ kɔ̍ɔ̍lī, sɔ̄ɔ̍ŋ tɔ᷅ŋ chēle̍ŋ yɔ̍nu̍ŋ o̍ māsāle̍ Cho̍tām nde̍ŋ bɛ̄ŋgu̍ wo̍ŋ ki̍nɛ̍i̍, a̍ nyɛ̄ o̍ nyɛ̄ chēle̍ŋ o̍ to̍sa̍ o̍ māsāle̍ ndɔ̄le̍ŋ ni᷄ŋ, mu̍ŋ kpo̍u̍ ŋ̄ chō ŋ̄ pōōnyīāā o̍ yāu̍ sɔ̄ɔ̍ŋ pa̍a̍ndu̍ cho̍ a̍ māsāā bɛ̍ndūa̍a̍ Chu̍dā o̍kɔ̄ɔ̄ wo̍ ni᷄ŋ.

³⁷Bōōndi̍i̍ Cho̍tām o̍ wa̍ māsā ve̍, bōōndi̍i̍ ke̍ŋ ki̍nɛ̍i̍ Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍ ni̍ mi̍ Māsā Bɛ̍ndōo̍ Lu̍ɛ̍sīŋ o̍ wa̍ Si̍i̍līāā wo̍, a̍ Māsā Bɛ̍ndōo̍ Pɛ̍kā o̍ wa̍ I̍sɔ̄lūɛ̄ī yo̍, ā kāndū kɔ̄la̍ŋ le̍ wāŋnda̍ Chu̍dā dēlɔ̄ɔ̍ chōo̍ a̍ sɔ̍ŋgɔ̄ɔ̍.

³⁸O̍ ko̍ŋ kɔ̍ɔ̍lī, mi̍ Cho̍tām wu᷅, ma̍ chɔ̄ ndu̍ o̍ Dēēve̍ lo̍ chi̍e̍e̍ fo̍ndā nda̍ chɔ̍ fi̍nyāā ndūāā ma̍māa̍ wo̍. O̍ ko̍ŋ kɔ̍ɔ̍lī, mi̍ E̍ha̍a̍sī po̍ ndɔ̄ o̍ mi̍i̍ŋgū māsāa̍ o̍ fōōfo̍ ndɔ̄ɔ̍.