Read Southern Kisi Māsāā Bɛ̍ndūāā Di̍i̍ŋ Ndūa̍a̍ 16 Bible Online

Māsāā Bɛ̍ndūāā Di̍i̍ŋ Ndūa̍a̍ 16 - Southern Kisi bible

Māsāā Bɛ̍ndūāā Di̍i̍ŋ Ndūa̍a̍ 16

¹Wɔ̄sī Pɛ̍kā, po̍ Lūɛ̄ma̍līāā wo̍ ō chīŋa̍ wɔ̄sīla̍ŋ lā ŋɔ᷄mmɛ̍ū o̍ lēmāsā I̍sɔ̄lūɛ̄ī yo̍, wɔ̄sī kōŋ E̍ha̍a̍sī po̍ Cho̍tām ndo̍ ō sīmnu᷄ŋ māsā bɛ̍ndōo̍ Chu̍dā ni̍.

²E̍ha̍a̍sī wa̍ wɔ̄sīla̍ŋ bi̍dīi̍ŋ mbo̍ sīmnu᷄ŋ ma̍sāa̍ Chu̍dā. Ndu̍yɛ̍ mbo̍ tōsā māsāle̍ŋ Chūlu̍sɛ̄lɛ̄m le̍ wɔ̄sīla̍ŋ tɔ̍ a̍ lā ŋɔ᷄mpu᷅m, chi̍e̍e̍ le̍bo᷅llo̍ le̍ lɛ̄ŋndē Chu̍dāle̍ŋ. Kɛ̍ ndu̍ ndu̍ to̍sa̍ nyɛ̍ bɛ̍nda̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ ndɔ̄ɔ̍ o̍ hɔ̄llo̍, māā Dēēve̍ fi̍nyā ndɔ̄ ma̍mā le̍.

³Sɔ̄ɔ̍ŋ wɔ̍ɔ̍ŋ māsāā bɛ̍ndūa̍a̍ ke̍e̍ku̍ I̍sɔ̄lūɛ̄ī ya̍ ā wa̍ tōsāa̍ wo̍ŋ, ndu̍ bɛ̍ɛ̍ mu̍ŋ ko̍ni̍ o̍ to᷅l kɔ̄ɔ̄lī ni̍. Wānāa̍ wa̍ o̍ lɛ̄ŋndē lēŋ ni᷄ŋ mi̍ Mɛ̄lɛ̄ka̍ Ya̍a̍wɛ̄ɛ̄ o̍ tu̍a̍ū nda̍ I̍sɔ̄lūɛ̍i̍ya̍ lāchī wa̍, mbo̍ tūāl ka̍ālā wānāā kāŋ ā wa᷄ chōo̍ mi̍ Mɛ̄lɛ̄ka̍ tūl la̍ŋ yɛ̄le̍ŋ tūl bɛ̄ndōo̍ la̍ŋ kɔ̄ɔ̄lī. Po̍ ndɔ̍ o̍ ve̍lū kɛ̍sɛ̍ kɛ̍sɛ̍ wo̍, mbo̍ bīī kɔ̄llo̍ mbo̍ sōlī ndu̍ sa̍lā lūāmāa̍ o̍ mɛ̄lɛ̄ka̍ā ndāa̍ nda̍ a̍a̍ so̍o̍lūū wa̍ lo̍.

⁴Ndu̍yɛ̍ bā o̍ bā sōōlu̍u̍la̍ŋ lā wa̍, o̍ pēmbo᷄ŋ chōo̍ ni̍, a̍ o̍ yɔ̄mnde̍ bɛ̄ŋgu̍, ō wa̍ kēīyo̍ sa̍lāla̍ŋ sōlīo̍o̍ lo̍ŋ, mbo̍ lūām nyɛ᷅m chūŋ kɛ̄ndɔ᷄ŋ ndo̍ŋ o̍ mɛ̄lɛ̄ka̍a̍ ndāa̍ lo̍.

⁵Ndu̍yɛ̍ wāŋnda̍ I̍dɔ̄m, chi̍e̍e̍ ndāa̍ wa̍ Ɛ̍la̍tī ni̍, kɛ̍ mi̍ wāŋnda̍ Chu̍dā nda̍ a̍a̍ po̍o̍ndā nda̍ chi̍o̍o̍ ho̍ō o̍ bā, mbo̍ wā ni᷅ŋ le̍ nda̍. E̍ha̍a̍sī sīmnɔ᷄ŋndo̍ māsā bɛ̍ndōo̍, o̍ ko̍ŋ wāŋnda̍ I̍dɔ̄m a̍ mi̍ŋgi̍ chi̍e̍e̍ ndāa̍ bīyɔ̄ɔ̄ wāŋnda̍ Chu̍dā o̍ bā ni̍, ma̍ tūāū nda̍ ma̍ sōlī nda̍ lo̍ŋ kpo̍u̍. O̍ ko̍ŋ, mi̍ wāŋnda̍ I̍dɔ̄m a̍ mi̍i̍ŋgū o̍ nda̍lo̍ chi̍e̍e̍. Ndu̍yɛ̍ a̍ te̍le̍ŋndo̍ ho̍ō bɛ̍ɛ̍ ā chō lo̍ŋ. O̍ te̍le̍ŋ pi᷅lɛ̍ ko̍ŋ bɛ̄ŋgu̍, Māsā Bɛ̍ndōo̍ Lu̍ɛ̍sīŋ o̍ wa̍ Si̍i̍līāā wo̍ ni̍, a̍ Māsā Bɛ̍ndōo̍ Pɛ̍kā o̍ wa̍ I̍sɔ̄lūɛ̄ī yo̍, ma̍ chūā pūa̍a̍ ndāa̍ chɔ̄ūwa̍ ma̍ kɔ̍ ba̍lū Chūlu̍sɛ̄lɛ̄m ma̍ chīŋa̍la᷅ŋ Ma̍sāa̍ E̍ha̍a̍sī a̍ sɔ̍ŋgɔ̄ɔ̍. Kɛ̍ ā nɔ̄la̍ mā yēm Māsāa̍ E̍ha̍a̍sī le̍.

⁶

⁷O̍ ko̍ŋ, nyɛ̄ o̍ nyɛ̄ sɔ̄lāa̍ wa̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ ni᷄ŋ a̍ o̍ chīɛ̄ī lēmāsāa̍ ni᷄ŋ, ko̍o̍līi̍yo̍ŋ ni̍, ka̍ni̍ŋ hu̍mbu᷄ŋ wa̍ lo̍ŋ ndo̍ŋ ni̍, mi̍ Māsā Bɛ̍ndōo̍ E̍ha̍a̍sī chu̍ā mu̍ŋ kpo̍u̍ mbo̍ kē pūa̍a̍ ndūa̍a̍ chɔ̄ūwa̍ le̍ mā yōo̍ Māsā Bɛ̍ndōo̍ Tīkīlātī Pi̍lɛ̍sā, o̍ wa̍ Āsi̍i̍līāā wo̍. Mbo̍ dīmūl Māsā Bɛ̍ndōo̍ Tīkīlātī Pi̍lɛ̍sā āā, “Yāndi̍i̍ fāllo̍, hu̍ŋ mā hu̍ŋ pi̍ŋī yōōmū nūu̍. Māsā Bɛ̍ndōo̍ Si̍i̍līāā ni̍, māsā bɛ̍ndōo̍ I̍sɔ̄lūɛ̄ī ni̍, ā bīī ma̍ yīīna᷅ŋ ma̍ wā ya̍ hūnɔ̄ɔ̍ dēlɔ̄ɔ̍ chōo̍ a̍ sɔ̍ŋgɔ̄ɔ̍. Nūm pi̍la̍ si̍nā māā bu̍ɛ̍ī nu̍m yɔ̍ŋgu̍ŋ o̍ nūmndo̍ wo̍ ya̍ I̍ cho̍ ni̍. Le̍la̍ŋ yāndi̍i̍ hu̍ŋ mā hu̍ŋ so̍lī ya̍ nda̍ o̍ ba̍ fɔ̍.”

⁸

⁹Māsā Bɛ̍ndōo̍ Tīkīlātī Pi̍lɛ̍sā bɛ̍ɛ̍ mɛ̄ɛ̍ yōōŋgōo̍ ho̍ō kōma̍l ndu̍, ō kɛ̄si̍ŋ o̍ bā le̍. Mbo̍ chūā pūa̍a̍ ndūa̍a̍ chɔ̄ūwa̍ ma̍ kɔ̍ chīŋa̍la᷅ŋ Dāma̍si̍kɔ̍ɔ̄, chi̍e̍e̍ le̍bo̍llo̍ le̍ lɛ̄ŋndē Si̍i̍lūīāle̍ŋ. Ndu̍yɛ̍ ma̍ yām wāŋnda̍ Si̍i̍līāā ma̍ bīī Dāma̍si̍kɔ̍ɔ̄, o̍ ko̍ŋ kɔ̍ɔ̍lī, ma̍ dīī Māsā Bɛ̍ndōo̍ Lu̍ɛ̍sīŋ māsāa̍ Si̍i̍līāā. Ndu̍yɛ̍ wānā o̍ wāna̍ wa̍ lo̍ŋ ma̍ bīī nda̍, ma̍ kūā a̍ nda̍ o̍ chɛ̄le̍ŋ ni᷄ŋ o̍ lɛ̄ŋndē Ki̍ɛ̍ɛ̄le̍ŋ ni᷄ŋ.

¹⁰Mi̍ Māsā Bɛ̍ndōo̍ E̍ha̍a̍sī ma̍lnu᷄ŋ mbo̍ kūā Māsā Bɛ̍ndōo̍ Tīkīlātī Pi̍lɛ̍sā yīlɔ̄ɔ̍ Dāma̍si̍kɔ̍ɔ̄. Mɛ̄ɛ̍ o̍ che᷅ mɛ̄ɛ̍ nda̍ tāŋgu̍l ma̍āŋndo̍ Dāma̍si̍kɔ̍ɔ̄ yɛ̍, mi̍ nyɔ̄ɔ̍ hɛ̄na᷄ŋ ndu̍. Mbo̍ chūā yāu̍ ma̍āŋndo̍ ho̍ō ō wa̍ ō tūūlāā lēchōo̍ wo̍, mbo̍ yɔ̄ŋ Yūla̍yā, wānā so̍līāā lāsa̍lāa̍, le̍ mbō tāŋgu̍l ma̍āŋ wāā le̍nde̍.

¹¹Ndu̍yɛ̍ mi̍ Yūla̍yā to̍sā mɛ̄ɛ̍ o̍ di̍mu̍l ndu̍ yɛ̍, mbo̍ tāŋgūl ma̍āŋndo̍ ho̍ō mɛ̄ɛ̍ mɛ̄ɛ̍ o̍ wa̍ ō tūūlāā o̍ yāu̍ E̍ha̍a̍sī o̍ yɔ̍ŋ ndo̍ chōo̍, mɛ̄ɛ̍ ma̍āŋndo̍ Dāma̍si̍kɔ̍ɔ̄ o̍ wa̍ yɛ̍. Te̍le̍ŋ pa̍ mi̍ Māsā Bɛ̍ndōo̍ E̍ha̍a̍sī ma᷅l ni᷅ŋ Dāma̍si̍kɔ̍ɔ̄ mbo̍ mīīŋgū, Yūla̍yā ndu̍ o̍o̍ chi̍i̍ ni᷅ŋ ma̍āŋndo̍ ho̍ō tāŋgūl.

¹²Ndu̍yɛ̍ mɛ̄ɛ̍ Ma̍sāa̍ E̍ha̍a̍sī mi̍i̍ŋgu̍ mbo̍ kɔ̍ mɛ̍ɛ̍nda᷄ŋ ma̍āŋndo̍ ho̍ō, mbo̍ hīnī kɔ̄l a̍ mɛ̄ɛ̍ o̍ ta̍ŋgu̍lu̍ŋ yɛ̍. O̍ ko̍ŋ kɔ̍ɔ̍lī, mbo̍ so̍lī sa̍lāla̍ŋ lēchōo̍.

¹³Mbo̍ sōlī sa̍lā lūāmāa̍, a̍ sa̍lā nyɛ̄ dīāā ku̍llo̍, a̍ sa̍lā māmūɛ̄īyo̍ o̍ ma̍āŋndo̍ ho̍ō chōo̍. Mbo̍ tālā mūɛ̄īmā māŋ o̍ ma̍āŋndo̍ chōo̍. Chɔ̄lū o̍ di̍ī le̍ sa̍lā kɔ̄l nyūlōo̍ sōlīo̍o̍ wo̍, mbo̍ chūā kōo̍ma̍ chɔ̄lū kōŋ mbo̍ fāsāŋīāā ma̍ŋ o̍ ma̍āŋndo̍ chōo̍.

¹⁴Ma̍āŋ chīli̍ŋi̍i̍ būlɔ̍ŋsi̍i̍ nda̍ tōōsi̍a̍a̍ le̍ sa̍lāla̍ŋ sōlīo̍o̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍ wo̍, ō wa̍ o̍ chīɛ̍i̍ Mɛ̄lɛ̄ka̍a̍ hɔ̄lndɔ̄. Ma̍āŋ sɛ̄nɛ̄ī nda̍ tāŋgu̍l lo̍ chō ba̍ā, chīɛ̍i̍ Mɛ̄lɛ̄ka̍ chō ba̍ā, mi̍ ndu̍ wa᷅ tɛ̄ɛ̄ŋ. Kɛ̍ mi̍ Māsā Bɛ̍ndōo̍ E̍ha̍a̍sī fa̍ŋā ma̍āŋ Mɛ̄lɛ̄ka̍ Ya̍a̍wɛ̄ɛ̄ ko̍ŋ ndo̍ŋ, mbo̍ yāā ndu̍ o̍ ma̍āŋ sɛ̄nɛ̄ī nda̍ tāŋgu̍l lo̍ bā lūāŋndo̍.

¹⁵Mi̍ Māsā Bɛ̍ndōo̍ E̍ha̍a̍sī di̍mūl Yūla̍yā, wāna̍ so̍lī sa̍lāa̍ o̍ Mɛ̄lɛ̄ka̍ lo̍ wo̍ āā, “Sa̍lā o̍ sa̍la̍ nɔ̍ le̍ sōli᷄ŋndo̍, sa̍lā lūāmāa̍ nɔ̄ le̍ sōli᷄ŋndo̍ īdīi̍yo̍ ni̍, sa̍lā īchɔ̄l nda̍ hūŋ a̍ a̍ nyɛ̄ dīāā ku̍llo̍ wo̍ ni̍, sa̍lālā lūāmāālā māsāa̍ a̍ wānāā tūa̍a̍ ā nɔ̄ le̍ sōlīo̍o̍ la̍ŋ ni̍, a̍ sa̍lālā nyɛ̄ dīāā ku̍l nda̍ nɔ̄ le̍ sōlīo̍o̍ la̍ŋ, a̍ sa̍lā māmūɛ̄ī wāŋnda̍ nɔ̄ le̍ sōlīo̍o̍ wo̍, a̍ sa̍lālā ŋ̄ nɔ̄ le̍ kōo̍ma̍ chɔ̄lūa̍a̍ fāsāŋāa̍ o̍ ma̍āŋndo̍ chōo̍ la̍ŋ, la̍ŋ kpo̍u̍, o̍ ma̍āŋ sɛ̄nɛ̄īyo̍ ho̍ō chōo̍ ŋ̄ wa̍ ni᷅ŋ la̍ŋ sōlīo̍o̍ ni̍. Kɛ̍ ma̍āŋ chīli̍ŋi̍i̍ būlɔ᷄ŋsīi̍ye̍ ho̍ō ndu̍ le̍ ya̍ o̍ cho̍ ni̍, ndu̍ cho̍ wā le̍ Mɛ̄lɛ̄ka̍ nyūnāa̍ dīōm ni̍.”

¹⁶Ndu̍yɛ̍ nyɛ̄ o̍ nyɛ̄ E̍ha̍a̍sī di̍mu̍l Yūla̍yā le̍ tōsāa̍, mi̍ Yūla̍yā to̍sā ndu̍ kpo̍u̍.

¹⁷O̍ ko̍ŋ kɔ̍ɔ̍lī, nyɛ̄lā vīlīāā lāwōlɔ̄ɔ̄ lā īchīli̍ŋ nda̍ wa̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍, mā kɛ̄sī hɛ̍ŋgɛ̍i̍la̍ māmɛ̄ŋnda̍ wa̍ lo̍ŋ nda̍ŋ lēcho̍ō la̍ŋ, mi̍ Māsā Bɛ̍ndōo̍ E̍ha̍a̍sī kɔ̍ pu̍u̍sīāā nyɛ̄lā lāŋ, ndu̍yɛ̍ mbo̍ fāŋā hɛ̄ŋgɛ̍i̍la̍ māmɛ̄ŋnda̍ wa̍ lā kɛ̄sīāā le̍chōo̍ la̍ŋ. O̍ ko̍ŋ kɔ̍ɔ̍lī, hɛ̄ŋgɛ̍i̍ bɛ̍ndū nda̍ a̍a̍ ve̍e̍lū āā Pēe̍ Mɛ̄ŋmā Īhɛ᷄llo̍, mbo̍ wā ō kɛ̄sīāā, o̍ nāūwāā tɔ̍ a̍ ā ŋīɔ̍ɔ̍ŋāā nda̍ tūūla̍ a̍ chīli̍ŋi̍i̍ būlɔ᷄ŋsīi̍ wa̍ chōo̍ wo̍, mbo̍ fāŋā hɛ̄ŋgɛ̍i̍ bɛ̍ndū ko̍ŋ, mbo̍ kɛ̄sī ndu̍ o̍ nyɛ̄ nda̍ chɔ̄ū a̍ pōūta̍ŋ le̍ nyɔ̄ɔ̍ kɛ̄sīo̍o̍ lēchōo̍ wo̍ chōo̍.

¹⁸Fo̍ndā nda̍ a̍a̍ to̍o̍si̍a̍a̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍, ma̍ hēēlū ndu̍ te̍mā le̍ kpe̍ŋgbe̍i̍ lēmāsāa̍ kɛ̄sīo̍o̍ o̍ pāa̍le̍ pɛ̍ŋgīāāle̍ŋ chōo̍ wo̍, mbo̍ pūūsīāā fo̍ndā kōŋ. O̍ ko̍ŋ kɔ̍ɔ̍lī, dīō Māsā Bɛ̍ndōo̍ ndu̍ o̍o̍ ke̍ī le̍ lūɛ̄īyɔ̄ɔ̍ o̍ fo̍ndā chīɛ̍i̍ Mɛ̄lɛ̄ka̍a̍ wo̍ bɛ̍ɛ̍, mbo̍ fāŋā dīō kōŋ. Ko̍ŋ kpo̍u̍ ō wa̍ kīndīo̍o̍ le̍ mī ndu̍ o̍o̍ to̍sa̍, mī māsā bɛ̍ndōo̍ Āsi̍i̍līāā o̍ hi̍ni̍ kɔ̄l a̍ ndu̍.

¹⁹Sɔ̄ɔ̍ŋ tɔ᷅ŋ yɔ̍nu̍ŋ o̍ māsāle̍ E̍ha̍a̍sīle̍ŋ bɛ̄ŋgu̍ wo̍ŋ ki̍nɛ̍i̍, a̍ nyɛ̄ o̍ nyɛ̄ chēle̍ŋ o̍ to̍sa̍ o̍ māsāle̍ ndɔ̄le̍ŋ ni᷄ŋ, mu̍ŋ kpo̍u̍ ŋ̄ chō ŋ̄ pōōnyīāā o̍ yāu̍ sɔ̄ɔ̍ŋ pa̍a̍ndu̍ cho̍ a̍ māsāā bɛ̍ndūa̍a̍ Chu̍dā o̍kɔ̄ɔ̄ wo̍ ni᷄ŋ.

²⁰O̍ ko̍ŋ kɔ̍ɔ̍lī, mi̍ Māsā Bɛ̍ndōo̍ E̍ha̍a̍sī wu᷅, ma̍ chɔ̄ ndu̍ o̍ Māsāa̍ Dēēve̍ lo̍ chi̍e̍e̍ o̍ fo̍ndā nda̍ chɔ̍ fi̍nyāā ndūāā ma̍māa̍ wo̍. O̍ ko̍ŋ, mi̍ Hɛ̄sɛ̄ki̍yā po̍ ndɔ̄ mi̍i̍ŋgū māsāa̍ o̍ fōōfo̍ ndɔ̄ɔ̍.