Read Southern Kisi Māsāā Bɛ̍ndūāā Di̍i̍ŋ Ndūa̍a̍ 17 Bible Online

Māsāā Bɛ̍ndūāā Di̍i̍ŋ Ndūa̍a̍ 17 - Southern Kisi bible

Māsāā Bɛ̍ndūāā Di̍i̍ŋ Ndūa̍a̍ 17

¹Wɔ̄sī E̍ha̍a̍sī ma̍sāa̍ Chu̍dā, o̍ chi̍ŋa̍ wɔ̄sīla̍ŋ tɔ̍ a̍ lā tīɔ̍ɔ̍ŋ o̍ lēmāsā Chu̍dā wo̍, wɔ̄sī kōŋ Hōōsi̍a̍ā, po̍ Ɛ̍lāā wo̍ sīmnu᷄ŋ ma̍sāa̍ I̍sɔ̄lūɛ̄ī ni̍. Ndu̍yɛ̍ mbo̍ tōsā māsāle̍ŋ Sāme̍e̍līāā chi̍e̍e̍, le̍ lɛ̄ŋndē I̍sɔ̄lūɛ̍i̍le̍ŋ le̍ wɔ̄sīla̍ŋ lā ŋɔ̄ma̍hīɔ̍ɔ̍lu̍.

²Kɛ̍ Hōōsi̍a̍ā bɛ̍ɛ̍ mbo̍ tōsā yɔ̄ŋ wɔ̄ɔ̍ŋndo̍ Mɛ̍lɛ̄ka̍ Ya̍a̍wɛ̄ɛ̄ o̍ hɔ̄l. Kɛ̍ ndu̍ o̍o̍ si̍i̍ma᷅ŋ a̍ yɔ̄ŋ wɔ̄ɔ̍ŋ māsāa̍ ke̍e̍ku̍ ndu̍ lāchī I̍sɔ̄lūɛ̄ī ya̍ ā tōsa̍ wo̍ le̍.

³Ō wa̍ a̍ te̍le̍ŋ pi᷅lɛ̍, mi̍ Sīālīma̍nɛ̍ɛ̍sā māsāa̍ le̍ lɛ̄ŋndē Āsi̍i̍līāā le̍ŋ ō hu᷄ŋ chi᷅ŋa̍la᷅ŋ Ma̍sāa̍ Hōōsi̍a̍ā a̍ sɔ̍ŋgɔ̄ɔ̍. Ndu̍yɛ̍ mbo̍ yām Hōōsi̍a̍ā mbo̍ tōsā mi̍ lɛ̄ŋndē I̍sɔ̄lūɛ̍i̍le̍ŋ lē wa̍ ndu̍ ni᷅ŋ o̍ bā bɛ̄ŋgu̍, wɔ̄sī o̍ wɔ̄sī mā māl ndu̍ ni᷅ŋ pāāwāa̍ o̍ bā.

⁴Kɛ̍ mɛ̄ɛ̍ te̍le̍ŋ ti̍ŋ hīo̍u̍, mi̍ Hōōsi̍a̍ā o̍ vi̍ām ki̍i̍la̍a̍ nāa̍ Māsā Bɛ̍ndōo̍ So̍ō chu̍a̍, māsāa̍ le̍ I̍chi̍pī, le̍ mbō māla̍ ndu̍ mbō fūla̍ māsāa̍ Āsi̍i̍līāā o̍ bā bɛ̄ŋgu̍. O̍ ko̍ŋ kɔ̍ɔ̍lī, pāāwā ndu̍ o̍o̍ ma᷅l ma̍sāa̍ Āsi̍i̍līāā o̍ bā wo̍, mbo̍ kīālū, ō ve̍ lɛ̍ ndu̍ mālɔ̄ɔ̄ le̍. Mɛ̄ɛ̍ māsāa̍ Āsi̍i̍līāā o̍ si̍na̍ sūɛ̍i̍ he̍ī, mbo̍ bīī māsāa̍ Hōōsi̍a̍ā mbo̍ dūāū ndu̍ o̍ chīɛ̄ī mānyūmndo̍ ni᷄ŋ.

⁵O̍ ko̍ŋ kɔ̍ɔ̍lī, mi̍ māsāa̍ le̍ lɛ̄ŋndē Āsi̍i̍līāā le̍ŋ o̍ chu̍ā pūa̍a̍ ndūa̍a̍ chɔ̄ūwa̍ ma̍ kɔ̍ de᷅l lɛ̄ŋndē I̍sɔ̄lūɛ̍i̍le̍ŋ chōo̍ a̍ sɔ̍ŋgɔ̄ɔ̍. Ndu̍yɛ̍, ma̍ kɔ̍ ba̍lū Sāme̍e̍līāā, chi̍e̍e̍ le̍bo̍llo̍ le̍ I̍sɔ̄lūɛ̄ī ma̍ dūāū ndu̍ o̍ pi̍ŋndo̍ ni᷄ŋ. Le̍ wɔ̄sīla̍ŋ lā yāa̍ chi̍o̍o̍ ho̍ō ō wa̍ ō dūāūwāā o̍ pi̍ŋndo̍ ni᷄ŋ kpɔ̍kɔ̍su̍ mā chīŋa̍la᷅ŋ ndu̍.

⁶O̍ ko̍ŋ kɔ̍ɔ̍lī, ma̍ bīī Sāme̍e̍līāā. Ndu̍yɛ̍ wānā o̍ wāna̍ wa̍ lo̍ŋ, ma̍ bīī nda̍ kpo̍u̍, ma̍ kūā a̍ nda̍ o̍ lɛ̄ŋndē Āsi̍i̍līāāle̍ŋ ni᷄ŋ o̍ chɛ̄le̍ŋ ni᷄ŋ, ma̍ kɔ̍ kɛ̍sī nda̍ o̍ fo̍ndāŋndā yɛ̍ yɛ̍ la̍ŋ. Mɛ̄ɛ̍ nda̍ kɛ̄si̍ ā ti᷄ŋ Ha̍lā chi̍e̍e̍, ma̍ kɛ̄sī ha̍ā o̍ chi̍e̍e̍ŋ ho̍lnu̍ŋ pi̍o̍o̍ Ha̍bɔ̄ɔ̄ wo̍ŋ, o̍ būŋgɛ̄ī Ko̍sāŋnde̍ ni᷄ŋ, ma̍ kɔ̍ kɛ̍sī ā ti᷄ŋ o̍ chi̍e̍e̍ŋ wa̍ o̍ būŋgɛ̄ī Mi̍dīāāve̍ ni᷄ŋ ndo̍ŋ. Wɔ̄sī Hōōsi̍a̍ā o̍ chi̍ŋa̍ wɔ̄sīla̍ŋ lā ŋɔ̍ma̍hīɔ̍ɔ̍lu̍ o̍ lēmāsā I̍sɔ̄lūɛ̄ī yo̍, wɔ̄sī kōŋ ya̍a̍mɔ̍ɔ̍wa̍ bīī Sāme̍e̍līāā ni̍.

⁷Mɛ̄ɛ̍ nu̍a̍ā ya̍a̍mɔ̍ɔ̍wa̍ ā bīī Sāme̍e̍līāā ni̍, fo̍ndōle̍, le̍ yɔ̄ŋ wɔ̄ɔ̍ŋ wāŋnda̍ I̍sɔ̄lūɛ̄ī a̍ to̍sa̍ a̍ Mɛ̄lɛ̄ka̍ Ya̍a̍wɛ̄ɛ̄ o̍ cho̍ Mɛ̄lɛ̄ka̍ ndāa̍ wo̍. Mɛ̄lɛ̄ka̍ sōlī nda̍ I̍chi̍pī o̍ chɛ̄le̍ŋ ni᷄ŋ ma̍sāa̍ I̍chi̍pī o̍ bā ni̍, mbo̍ mīīŋgū a̍ nda̍ o̍ lɛ̄ŋndē fi̍nyāā ndāā ma̍māa̍ ni᷄ŋ, kɛ̍ ma̍ bīī ma̍ hu᷄ŋ kɛ̍ɛ̄ ndu̍, ma̍ mūli̍ŋ nyɛ᷅m chēle̍ŋndo̍ŋ sōōlūūwo̍ māā mɛ̄lɛ̄ka̍ā nda̍.

⁸Wānāa̍ wa̍ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ mi̍ Mɛ̄lɛ̄ka̍ tūāū nda̍ I̍sɔ̄lūɛ̍i̍ya̍ lāchī wa̍, pɛ̄ɛ̄kūlā wɔ̄ɔ̍ŋndā nda̍ wa̍ chōo̍ la̍ŋ ni̍, pɛ̄ɛ̄kūlā wɔ̄ɔ̍ŋndā māsāa̍ ke̍e̍ku̍ I̍sɔ̄lūɛ̄ī ya̍ ā hīŋ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ nda̍ŋ ni̍, ma̍ bīī ma̍ tūāl pɛ̄ɛ̄kūlā lāŋ kɔ̄ɔ̄lī.

⁹Nyɛ̍ bɛ̍nda̍ le̍ tōsā Mɛ̄lɛ̄ka̍ Ya̍a̍wɛ̄ɛ̄, o̍ cho̍ Mɛ̄lɛ̄ka̍ ndāa̍ wo̍ o̍ hɔ̄l te̍ wo̍, ma̍ bīī ma̍ wā ndu̍ tōsāa̍ o̍ nɛ̄īla̍ sɔ̍ɔ̍ sɔ̍ɔ̍ la̍ŋ ni᷄ŋ, mā vīāŋnūŋ Mɛ̍lɛ̄ka̍. Chi̍e̍e̍ o̍ chi̍e̍e̍ wa̍ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ, chi̍e̍e̍ pɔ̍mbɔ̄ ni̍, chi̍e̍e̍ bɛ̍ndū ni̍, ma̍ tāŋgūl fo̍ndāŋndā lāsōōlu̍u̍la̍ŋ lo̍ŋ kpo̍u̍.

¹⁰Ndu̍yɛ̍ o̍ ko̍ŋ kɔ̍ɔ̍lī, o̍ pēmbo᷄ŋ chōo̍ ni̍, o̍ yɔ̄mīī pūīyɛ̄ī yūkɔ̄ŋnde̍ bɛ̄ŋgu̍ ni̍, ma̍ tōōsīāā nyɔ̄ɔ̍ŋ lo̍ŋ le̍ mɛ̄lɛ̄ka̍ nda̍ nɔ̍ dīōla̍ŋ āā A̍si̍ɛ̍lūā wo̍ sōōlūūwo̍ lo̍ŋ, ndu̍yɛ̍ ma̍ sīmī nyɛ̄la̍ŋ māā sūŋgbu̍ma̍ vi̍lɛ̄ī a̍ pōūta̍ŋ mā sōōlūū mu̍ŋ māā mɛ̄lɛ̄ka̍ā ndā.

¹¹O̍ ko̍ŋ, nda̍ bɛ̍ɛ̍ ma̍ mūli᷄ŋ nyɛ᷅m chēle̍ŋndo̍ŋ sōōlūūwo̍ māā mɛ̄lɛ̄ka̍ā nda̍, ndu̍yɛ̍, mā lūām nyɛ᷅m chūŋ kɛ̄ndɔ᷄ŋ o̍ nyɛ̄m mu᷅ŋ ndo̍. Wānāa̍ wa̍ nda̍ lāchī mi̍ Mɛ̄lɛ̄ka̍ Ya̍a̍wɛ̄ɛ̄ o̍ tu̍a̍ū nda̍ wa̍, pɛ̄ɛ̄kūlā wɔ̄ɔ̍ŋndā nda̍ wa̍ chōo̍ la̍ŋ, nda̍ bɛ̍ɛ̍ ma̍ tūāl pɛ̄ɛ̄kūlā lāŋ kɔ̄ɔ̄lī. O̍ ko̍ŋ, mi̍ sɔ̄ɔ̍ŋ wɔ̍ɔ̍ŋ wāŋnda̍ ha̍ā ā wa̍ mu᷅ŋ tōsāa̍ wo̍ŋ ŋ̄ tɛ̄ɛ̄mbūū Mɛ̄lɛ̄ka̍ Ya̍a̍wɛ̄ɛ̍ kɔ̄l, mbo̍ dūāūnu᷄ŋ tu̍mbe̍ a̍ nda̍.

¹²Sīlā Mɛ̄lɛ̄ka̍ Ya̍a̍wɛ̄ɛ̄ o̍ si̍la̍ nda̍ māā ā so̍o̍lūū mɛ̄lɛ̄ka̍ā chēle̍ŋ o̍ ndu̍ kɔ̍ɔ̍lī le̍ wo̍, ā ye᷄ŋ si̍lā kōŋ lānī le̍. Ma̍ bīī ma̍ mūli᷄ŋ nyɛ᷅m chēle̍ŋndo̍ŋ sōōlūūwo̍ māā mɛ̄lɛ̄ka̍ā nda̍.

¹³Mi̍ Mɛ̄lɛ̄ka̍ Ya̍a̍wɛ̄ɛ̄ o̍ vi̍ām wānāa̍ su̍a̍ā le̍ Mɛ̄lɛ̄ka̍ wa̍, a̍ wānāā dīmīāā sɔ̄ɔ̍ŋ wa̍ā lāchīa̍a̍, a̍ wānāa̍ su̍a̍ā le̍ ndu̍ wa̍, le̍ mā sīla̍ wāŋnda̍ I̍sɔ̄lūɛ̄ī a̍ wāŋnda̍ Chu̍dā. Mbo̍ dīmūl wāŋnda̍ I̍sɔ̄lūɛ̄ī a̍ wāŋnda̍ Chu̍dā sa̍na̍a̍ a̍ wānāā ndūa̍a̍ āā, “Lā ma᷄l yɔ᷅ŋndā wɔ̄ɔ̍ŋnda̍ŋ tōsāa̍, mī lā chu̍a̍ sāwāla̍ nīla̍ŋ. Nyɛ̄ o̍ nyɛ̄ sāwāla̍ ya̍ I̍ ke̍ fi̍nyāā nyāā ma̍māa̍ la̍ŋ lā dīmi̍ le̍ tōsāa̍, a̍ nyɛ̄ o̍ nyɛ̄ ya̍ I̍ dɔ̍ū bu̍ɛ̍i̍yāā nīa̍a̍ o̍ lāsōndō, nda̍ yɔ̍nūŋ māā wānāa̍ su̍a̍ā le̍ Mɛ̄lɛ̄ka̍ wa̍ ni̍, ma̍ dīmūl nya̍ ndu̍ le̍ tōsāa̍, lā to᷄l ndu̍ kɔ̄ɔ̄lī, mī lā tōsa̍ ndu̍.”

¹⁴Kɛ̍ wāŋnda̍ ha̍ā ā ye᷄ŋ nyɛ᷅ Mɛ̄lɛ̄ka̍ dīmu̍l nda̍ wo̍ lānī le̍. Bōllē kālālē fi̍nyāā ndāā ma̍māa̍ ā tōsa̍ ma̍ kɛ̄ɛ̄ le̍ tīīnda᷄ŋ ndāa̍ dɔ̄wɔ̄ɔ̍ o̍ Mɛ̄lɛ̄ka̍ Ya̍a̍wɛ̄ɛ̄ Mɛ̄lɛ̄ka̍ ndāa̍ ni̍ŋ nde̍ŋ, nda̍ bɛ̍ɛ̍ ma̍ tōsā bōllē kālālē le̍ŋ.

¹⁵Sīlā Mɛ̄lɛ̄ka̍ Ya̍a̍wɛ̄ɛ̄ o̍ si̍la̍ nda̍ wo̍, ā chɛ᷄l mā ya᷄ŋ ndu̍ lānī mā tōsa̍ nyɛ̄ sāwāla̍ ndɔ̄la̍ŋ lā dīmi̍ le̍ tōsāa̍ wo̍ le̍. Kpe̍ma̍ Mɛ̄lɛ̄ka̍ yīi̍ sīndɛ̄ a̍ fi̍nyāā ndāā ma̍māa̍ wo̍, ma̍ tɛ̄ɛ̄mbūū kpe̍ma̍ ko̍ŋ. Ma̍ bīī ma̍ mūli᷄ŋ nyɛ᷅m chēle̍ŋndo̍ŋ sōōlūūwo̍ māā mɛ̄lɛ̄ka̍ā ndā. Le̍ he̍ī, nda̍ bɛ̍ɛ̍ ma̍ sīmnu᷄ŋ wa̍nāā fo̍ndō Mɛ̄lɛ̄ka̍ o̍ hɔ̄l mɛ̄ɛ̍ nyɛ̄m ŋ̄ chō yɛ̍. Mɛ̄lɛ̄ka̍ Ya̍a̍wɛ̄ɛ̄ ndu̍ o̍o̍ si̍la̍ nda̍ māā lɛ̄ŋīi̍ ba̍lu̍ nda̍ ve̍, ā chu̍ā pɛ̄ɛ̄kūlā wɔ̄ɔ̍ŋndā nda̍ chō chōo̍ la̍ŋ te̍, kɛ̍ ma̍ bīī ma̍ sōlī Mɛ̄lɛ̄ka̍ Ya̍a̍wɛ̄ɛ̍ dīōm, ma̍ tūāl pɛ̄ɛ̄kūlā wɔ̄ɔ̍ŋndā lāŋ kɔ̄ɔ̄lī.

¹⁶Sāwāla̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ ndāa̍ ō ke̍ nda̍ la̍ŋ, ma̍ tɛ̄ɛ̄mbūū la̍ŋ. Ma̍ bīī ma̍ tēēŋgīāā chīli̍ŋi̍i̍ pu̍m, ma̍ tūūlā nāūwa̍ ā ŋīɔ̍ɔ̍ŋ a̍ chīli̍ŋi̍i̍ te̍e̍ŋgīɛ̄ī kēŋ, mā sōōlūū nda̍ māā mɛ̄lɛ̄ka̍ā ndā. O̍ ko̍ŋ kɔ̍ɔ̍lī, ma̍ mūli᷄ŋ mɛ̍lɛ̄ka̍ A̍si̍ɛ̍lūā a̍ mɛ̄lɛ̄ka̍ Bāāl sōōlūūwo̍. Lōo̍ŋ cho̍ o̍ ha̍la̍a̍ ni᷄ŋ cho̍o̍ cho̍o̍ wo̍ŋ bɛ̍ɛ̍, ma̍ wā mu̍ŋ sōōlūūwo̍ māā mɛ̄lɛ̄ka̍ā nda̍.

¹⁷O̍ ko̍ŋ kɔ̍ɔ̍lī, pūa̍a̍ ndāa̍ nda̍ ve̍lū kɛ̍sɛ̍ kɛ̍sɛ̍ wa̍, a̍ chūāūwāā ndāā la̍a̍ndūa̍a̍, ma̍ bīī nda̍ ma̍ sōlī nda̍ sa̍lālā lūāmāāla̍ŋ o̍ mɛ̄lɛ̄ka̍ā ndāā ka̍ŋ ndo̍. Ndu̍yɛ̍ o̍ ko̍ŋ kɔ̍ɔ̍lī, ma̍ mūli᷄ŋ kɔ᷅la̍ŋ o̍ māndi̍a̍a̍ lo̍, a̍ o̍ wānāā vīāmāā lāyāwāa̍ lo̍ le̍ nda̍ yāwāla̍ŋ vīmndo̍, mā chɔ᷄m nda̍ sɔ̄ɔ̍ŋ wa᷅ hu̍nɔ̄ɔ̄ yɔ̄nɔ᷄ŋndo̍ wo̍ŋ. Le̍ te̍le̍ŋ o̍ te̍le̍ŋ, nyɛ̍ bɛ̍nda̍ Mɛ̍lɛ̄ka̍ Ya̍a̍wɛ̄ɛ̄ o̍ hɔ̄l te̍ wo̍, ndu̍ ko̍ni̍ nda̍ wa̍ tōsāa̍ ni̍. Le̍ he̍ī, mi̍ Mɛ̄lɛ̄ka̍ ō dūāūnu᷄ŋ tu̍mbe̍ a̍ nda̍.

¹⁸Mi̍ Mɛ̄lɛ̄ka̍ Ya̍a̍wɛ̄ɛ̄ o̍ du̍a̍u̍nu᷄ŋ tu̍mbe̍ a̍ wāŋnda̍ I̍sɔ̄lūɛ̄ī, mbo̍ tɛ̄ɛ̄mbūū nda̍. Kɛ̍ wāŋnda̍ Chu̍dā nda̍ ō tɛ̄ɛ̄mbu̍u̍ nda̍ le̍, ma̍ lō o̍ lɛ̄ŋndē ndāle̍ŋ ni᷄ŋ.

¹⁹Kɛ̍ wāŋnda̍ Chu̍dā bɛ̍ɛ̍ ma̍ tɛ̄ɛ̄mbūū sāwāla̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ ndāa̍ ō ke̍ nda̍ la̍ŋ. Pɛ̄ɛ̄kūlā wɔ̄ɔ̍ŋndā wāŋnda̍ I̍sɔ̄lūɛ̄ī a̍ wa̍ chōo̍ la̍ŋ, nda̍ bɛ̍ɛ̍ ma̍ tūāl pɛ̄ɛ̄kūlā lāŋ kɔ̄ɔ̄lī.

²⁰Mi̍ Mɛ̄lɛ̄ka̍ Ya̍a̍wɛ̄ɛ̄ o̍ du̍a̍u̍nu᷄ŋ tu̍mbe̍ a̍ yu̍ŋgu̍la̍ŋ I̍sɔ̄lūɛ̍i̍ kpo̍u̍, mbo̍ tūsī nda̍ nyɛ̄ pālāa̍ chōo̍. Mi̍ Mɛ̄lɛ̄ka̍ fāŋā nda̍ bāa̍ chōo̍, mbo̍ māl nda̍ ya̍a̍mɔ̍ɔ̍wa̍a̍ tɛ̍ɛ̍mbāa̍ o̍ bā, ma̍ hu᷄ŋ tɛ̍ɛ̍mbūū nda̍ ma̍ bāsū nda̍ tɛ̍ɛ̍.

²¹Bōōndi̍i̍ Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍ mi̍ pīɔ̄ūwa᷅ŋndo̍ yɔ̄nu᷄ŋ wa᷅ŋnda̍ I̍sɔ̄lūɛ̄ī tɛ̍ɛ̄ŋ, nda̍ wāŋnda̍ Chu̍dā ve̍, mi̍ wāŋnda̍ I̍sɔ̄lūɛ̄ī a̍ lo᷅ o̍ ko̍ŋ ma̍ sīīŋgūū Chɛ̄lōbo̍wām po̍ Ne̍ba̍tī wo̍ māsā bɛ̍ndōo̍ le̍ I̍sɔ̄lūɛ̄ī. Kɛ̍ mi̍ Chɛ̄lōbo̍wām ndo̍ ho̍ō fa̍ŋā wāŋnda̍ I̍sɔ̄lūɛ̄ī o̍ nɛ̄i̍ Mɛ̄lɛ̄ka̍ Ya̍a̍wɛ̄ɛ̄ wo̍ chōo̍, mbo̍ tōsā mi̍ wāŋnda̍ I̍sɔ̄lūɛ̄ī a̍ mu̍li᷄ŋ sɔ̍ɔ̍ŋ yɔ̄ŋ wɔ̍ɔ̍ŋ su̍ma̍ŋgɛ̍ɛ̍ma̍ŋ bɛ̍ndo᷄ŋ tōsāa̍.

²²Yɔ̄ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ Chɛ̄lōbo̍wām o̍ wa̍ tōsāa̍, mi̍ wāŋnda̍ ha̍ā ā tūāl Chɛ̄lōbo̍wām kɔ̄ɔ̄lī, nda̍ bɛ̍ɛ̍ ma̍ wā hīōūwɔ̄ɔ̍ lāchī a̍ ndu̍ tōsāa̍.

²³Ā lo̍ he̍ī tōsāa̍ ha̍a̍a̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ du̍a̍u̍nu᷄ŋ tu̍mbe̍ a̍ nda̍, mbo̍ tōsā mi̍ ya̍a̍mɔ̍ɔ̍wa̍a̍ ndāa̍ hu᷄ŋ ba̍su̍ ndā tɛ̍ɛ̍, ma̍ kūā a̍ nda̍ o̍ chɛ̄le̍ŋ ni᷄ŋ, mɛ̄ɛ̍ ndu̍ o̍o̍ di̍mi̍ yɛ̍. Ndu̍yɛ̍, nyɛ̄ Mɛ̄lɛ̄ka̍ dɔ̄ū sīndɛ̄ bu̍ɛ̍i̍yāā ndūa̍a̍ su̍a̍ā le̍ ndu̍ wa̍ o̍ lāsōndō ma̍ dīmī wo̍ ndu̍ wa̍ ko̍ŋ ni̍. I̍sɔ̄lūɛ̍i̍ya̍ kpo̍u̍, ma̍ bīū nda̍ ma̍ kūā a̍ nda̍ o̍ chɛ̄le̍ŋ ni᷄ŋ o̍ lɛ̄ŋndē Āsi̍i̍līāāle̍ŋ ni᷄ŋ. Ndu̍yɛ̍ a̍ te̍le̍ŋndo̍ ho̍ō bɛ̍ɛ̍,[8] I̍sɔ̄lūɛ̍i̍ya̍ ā ti᷄ŋ ā chō wɔ̄ o̍ chɛ̄lē lēŋ ni᷄ŋ.

²⁴O̍ ko̍ŋ kɔ̍ɔ̍lī, mi̍ māsā bɛ̍ndōo̍ o̍ lɛ̄ŋndē le̍ŋ ni᷄ŋ Āsi̍i̍līāā o̍ chu̍ā wāŋnda̍ o̍ chi̍e̍e̍ŋ māĀsi̍i̍līāā wo̍ŋ ŋ̄ ti᷄ŋ, mu̍ŋ yɔ̍nūŋ ni̍ māā Ba̍bi̍lɔ̄ŋ, a̍ Ku̍tī, a̍ I̍vāā, a̍ Ha̍ma̍tī, a̍ Sɛ̄fa̍a̍vēm, mbo̍ kɔ̍ kɛ̍sī nda̍ o̍ chi̍o̍o̍ŋ Sāme̍e̍līāā, chi̍e̍e̍ŋ wāŋnda̍ I̍sɔ̄lūɛ̄ī a̍ wa̍ wo̍ŋ le̍ mā cha᷄l lo̍ŋ. Mi̍ wāŋnda̍ ha̍ā ā chūā ni̍ko̍ Sāme̍e̍līāā a̍ chi̍o̍o̍ŋ ŋ̄ pīlɔ̍ŋ I̍sɔ̄lūɛ̄ī māā chi̍e̍e̍ŋ nda̍, ma̍ wā īchāli̍ lo̍ŋ.

²⁵Kɛ̍ mɛ̄ɛ̍ nda̍ kūɛ̄ a̍ wāŋnda̍ ha̍ā o̍ tāse̍la̍ ndɔ̄ɔ̍, wāŋnda̍ ha̍ā nda̍ a̍a̍ so̍o̍lūū Mɛ̍lɛ̄ka̍ Ya̍a̍wɛ̄ɛ̄ le̍. Le̍ he̍ī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ yɔ᷅ŋ kpɔ̍kūŋnda̍, ma̍ hu᷄ŋ de᷅l nda̍ chōo̍ ma̍ dīū wāŋnda̍ ā ti᷄ŋ nda̍ tɛ̄ɛ̄ŋ.

²⁶Mi̍ wāŋnda̍ kɔ̍ di̍mūl māsāa̍ Āsi̍i̍līāā āā, “Wānāā ŋ̄ yɛ̄ɛ̄ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ le̍ mā kɔ̍ cha᷅l lo̍ŋ nda̍, ā si̍nā sa̍wāla̍ cho̍ a̍ mɛ̄lɛ̄ka̍ cho̍ o̍ lɛ̄ŋndē lēŋ ni᷄ŋ ndo̍ o̍kɔ̄ɔ̄ la̍ŋ te̍. O̍ ko̍ŋ, mi̍ Mɛ̄lɛ̄ka̍ kōŋ yɔ̄ŋ kpɔ̍kūŋnda̍ ma̍ hu᷄ŋ di̍ū wāŋnda̍ ā ti᷄ŋ nda̍ tɛ̄ɛ̄ŋ.”

²⁷Mɛ̄ɛ̍ māsāa̍ Āsi̍i̍līāā o̍ tu̍e̍ī sūɛ̍i̍ he̍ī, mbo̍ dīmī māā tē ō wa̍ le̍nde̍ pɛ̍, mɛ̄ɛ̍ ā sōli̍ wa̍nāā sōlīāā lāsa̍lāā nda̍ chɛ᷄ŋ I̍sɔ̄lūɛ̄ī ma̍ hūŋ a̍ nda̍ lo̍ŋ nda̍ ō pīlɛ̍, mā yɔ̍ŋ ndu̍ lo̍ŋ, mbō kɔ̍ wa᷅ a̍ wānāā kāŋ lātūlu̍, mbo̍ wa̍ nda̍ sāwāla̍ cho̍ a̍ mɛ̄lɛ̄ka̍ cho̍ o̍ lɛ̄ŋndē lēŋ ni᷄ŋ ndo̍ o̍kɔ̄ɔ̄ la̍ŋ pɛ̄ɛ̄kōo̍.

²⁸O̍ ko̍ŋ, ma̍ sōlī wānā pi᷅lɛ̍, wānāā sōlīāā lāsa̍lāā nda̍ chɛ᷄ŋ Sāme̍e̍līāā wa̍ tɛ̄ɛ̄ŋ, ma̍ yɔ̄ŋ ndu̍, mbo̍ kɔ̍ wa᷅ Bɛ̍tɛ̄ɛ̄l chi̍e̍e̍, le̍ mbō pɛ̄ɛ̄ku̍ wāŋnda̍ Āsi̍i̍līāā mɛ̄ɛ̍ nda̍ sōōlūū Mɛ̍lɛ̄ka̍ Ya̍a̍wɛ̄ɛ̄ yɛ̍.

²⁹Kɛ̍ a̍ ko̍ŋ kpo̍u̍, wāŋnda̍ Āsi̍i̍līāā a̍ wa̍ wɔ̄ hīōūwɔ̄ɔ̍ lāchī a̍ mɛ̄lɛ̄ka̍ā ndāā yɛ̍ yi̍a̍a̍ nda̍ a̍a̍ so̍o̍lūū o̍ lɛ̄ŋndē ndāle̍ŋ ni᷄ŋ nda̍ tōōsīa̍a̍ mā sōōlūū nda̍. Ma̍ bīī ma̍ tōōsīāā mɛ̄lɛ̄ka̍ā ndāā yɛ̍ yi̍a̍a̍ ka̍ŋ, ma̍ kɛ̄sī nda̍ o̍ chi̍e̍e̍ŋ yɛ̍ yɛ̍ŋ nda̍ wa̍ wo̍ŋ, o̍ fo̍ndāŋndā lāsōōlu̍u̍la̍ wāŋnda̍ Sāme̍e̍līāā nda̍ a̍a̍ ta̍ŋgu̍l ta̍ŋ.

³⁰Wānāa̍ chɛ̍ŋ Ba̍bi̍lɔ̄ŋ chi̍e̍e̍ wa̍ nda̍ ki̍nɛ̍i̍, nda̍ mɛ̄lɛ̄ka̍ nda̍ a̍a̍ so̍o̍lūū wo̍ dīōlā ndɔ̄la̍ŋ la̍ wa̍ ni̍ āā, Sūkɔ̄tī Bɛ̍nɔ̍tī, wānāa̍ chɛ̍ŋ Ku̍tī chi̍e̍e̍ wa̍, nda̍ mɛ̄lɛ̄ka̍ nda̍ a̍a̍ so̍o̍lūū wo̍ dīōla̍ ndɔ̄la̍ŋ la̍ wa̍ ni̍ āā, Nɛ̍kāl. Wānāa̍ chɛ̍ŋ Ha̍ma̍tī wa̍ mɛ̄lɛ̄ka̍ ndāa̍ dīōlā ndɔ̄la̍ŋ la̍ wa̍ ni̍ āā, A̍si̍mā.

³¹Wānāa̍ chɛ̍ŋ I̍vāā wa̍ mɛ̄lɛ̄ka̍ā ndāa̍ ō pīlɔ̍ɔ̍ dīōla̍ŋ āā Nībīha̍a̍sī, ō pīlɔ̍ɔ̍ dīōla̍ŋ āā, Tāāta̍kī. Wānāa̍ chɛ̍ŋ Sɛ̍fa̍a̍vēm nda̍ mɛ̄lɛ̄ka̍ā ndāa̍ ō pīlɔ̍ɔ̍ dīōla̍ŋ āā, Ādūlūāmɛ̍lɛ̍kī, ō pīlɔ̍ɔ̍ dīōla̍ŋ āā, Ānāmɛ̍lɛ̍chī. Wāŋnda̍ ha̍ā nda̍ nda̍, chūāūwāā ndāa̍ nda̍ a̍a̍ so̍lī sa̍lālā lūāmāāla̍ŋ o̍ mɛ̄lɛ̄ka̍ā ndāā ka̍ŋ lo̍ ni̍.

³²Wāŋnda̍ Āsi̍i̍līāā a̍ wa̍ bɛ̍ɛ̍ o̍ lɛ̄ŋndē I̍sɔ̄lūɛ̍i̍le̍ŋ nde᷅ŋ ni᷄ŋ ni̍, kɛ̍ ā pūɛ̄ɛ̄nu̍ŋ a̍ ka̍a̍ wa̍ o̍ lɛ̄ŋndē ndāle̍ŋ ni᷄ŋ ndo̍ le̍. Ā wa̍ Mɛ̄lɛ̄ka̍ Ya̍a̍wɛ̄ɛ̍ sōōlūūwo̍, mā sōōlūū vɛ̍lɛ̄ mɛ̄lɛ̄ka̍ā ndāā yɛ̍ yi̍a̍a̍ ha̍ā. Ndu̍yɛ̍ ku̍ndā, o̍ ku̍ndā nda̍ a̍a̍ nɔ̍ wānāā sōlīāā lāsa̍lāa̍, ā nda̍ a̍a̍ so̍lī sa̍lāla̍ŋ o̍ sōōlu̍u̍la̍ ndāla̍ yɛ̍ yɛ̍la̍ŋ o̍ mɛ̄lɛ̄ka̍ā ndāa̍ ha̍ā lo̍ wa̍.

³³

³⁴Pāa̍le̍ hāūle̍ŋ nde᷅ŋ bɛ̍ɛ̍, wāŋnda̍ ha̍ā ā chō wɔ̄ o̍ ka̍ā ndāa̍ ho̍ō chōo̍. Ā chō Mɛ̄lɛ̄ka̍ Ya̍a̍wɛ̄ɛ̍ sōōlūūwo̍, ā chō vɛ̄lɛ̄ mɛ̄lɛ̄ka̍ā ndāa̍ ha̍ā sōōlūūwo̍. Che̍kɔ̍pū, ō Mɛ̄lɛ̄ka̍ ndu̍ o̍o̍ ke̍ vɛ̄lɛ̄ dīōla̍ŋ āā I̍sɔ̄lūɛ̄ī yo̍, wānāa̍ fu̍la̍ o̍ pūlāle̍ ndɔ̄le̍ŋ chōo̍ wa̍, nda̍ yɔ̍nūŋ māā wāŋnda̍ I̍sɔ̄lūɛ̄ī ni̍, sāwā o̍ sāwā Mɛ̄lɛ̄ka̍ Ya̍a̍wɛ̄ɛ̄ o̍ ke̍ nda̍, a̍ nyɛ̄ o̍ nyɛ̄ o̍ di̍mu̍l nda̍ le̍ tōsāa̍, wāŋnda̍ Āsi̍i̍līāā a̍ chɛ̍l mā chūa̍ sāwāla̍ la̍ŋ, ndu̍yɛ̍ mā tōsa̍ nyɛ̄ Mɛ̄lɛ̄ka̍ dīmi̍ ko̍ŋ le̍ tōsāa̍ wo̍ le̍.

³⁵Mi̍ Mɛ̄lɛ̄ka̍ Ya̍a̍wɛ̄ɛ̄ o̍ yi̍ī kpe̍ma̍a̍ a̍ wāŋnda̍ I̍sɔ̄lūɛ̄ī, mbo̍ dīmūl nda̍ āā, “Ō fūla̍ o̍ ya̍ kɔ̍ɔ̍lī, lā tu̍ndu᷄ŋ mɛ̄lɛ̄ka̍ o̍ mɛ̄lɛ̄ka̍ chēle̍ŋ lāchī mī lā sōōlu̍u̍ ndu̍ le̍. Lā sa̍a̍ŋgīāl mɛ̄lɛ̄ka̍ o̍ mɛ̄lɛ̄ka̍ chēle̍ŋ mī lā sōli̍ lāsa̍lā o̍ ndu̍ lo̍ le̍.

³⁶Ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ so̍li̍ nya̍ o̍ lɛ̄ŋndē I̍chi̍pīle̍ŋ ni᷄ŋ a̍ kpāāya̍ nī bɛ̍ndōo̍ wo̍, ya̍ pīlɛ̍ kpe̍ nya̍ nɔ̄ ni̍ mī lā tūndu᷄ŋ la̍chi̍, mī lā sōōlu̍u̍ ya̍, ndu̍yɛ̍ mī lā sōli̍ sa̍lāla̍ŋ o̍ ya̍ lo̍.

³⁷Kɛ̍ ō fūla̍ o̍ ya̍ Mɛ̍lɛ̄ka̍ kɔ̄ɔ̄lī, lā so̍o̍lūū mɛ̄lɛ̄ka̍ o̍ mɛ̄lɛ̄ka̍ chēle̍ŋ te̍. Nyɛ̄ o̍ nyɛ̄ sāwāla̍ nīla̍ ya̍ I̍ po̍o̍nyi̍a̍l nya̍ la̍ŋ lā dīmi̍, a̍ nyɛ̄ o̍ nyɛ̄ ya̍ I̍ di̍mi̍ le̍ tōsāa̍, lā wa̍ ndu̍ tōsāa̍ le̍ te̍le̍ŋ o̍ te̍le̍ŋ.

³⁸Lā wa̍ lōōnɔ᷄ŋndo̍ a̍ kpe̍ma̍ ya̍ I̍ yi̍i̍ a̍ nya̍ wo̍ o̍kɔ̄ɔ̄ pɛ̄ŋgu̍ o̍ pɛ̄ŋgu̍, lā so̍o̍lūū mɛ̄lɛ̄ka̍ o̍ mɛ̄lɛ̄ka̍ chēle̍ŋ te̍.

³⁹Mɛ̄ɛ̍ ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ mī lā sōōlu̍u̍. Ya̍ Mɛ̍lɛ̄ka̍ ya̍ ba̍ŋā nya̍ ya̍a̍mɔ̍ɔ̍wa̍a̍ nyāa̍ o̍ bā ni̍.”

⁴⁰Kɛ̍ wāŋnda̍ Āsi̍i̍līāā, a̍ ku̍ɛ̄ ha̍ā cha᷄lle̍ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ nda̍, ā tōsa̍ nyɛ᷅ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l ho̍ō I̍sɔ̄lūɛ̍i̍ya̍ le̍ tōsāa̍ wo̍ le̍. Ka̍ālā ndāla̍ nda̍ wa̍ chōo̍ o̍ lɛ̄ŋndē ndāle̍ŋ ni᷄ŋ ndo̍, ā fēŋa̍ŋ le̍cho̍ō le̍.

⁴¹Wāŋnda̍ ha̍ā, ā wa̍ Mɛ̄lɛ̄ka̍ Ya̍a̍wɛ̄ɛ̍ sōōlūūwo̍, kɛ̍ ndu̍yɛ̍, ā pūɛ̄ɛ̄nu̍ŋ a̍ mɛ̄lɛ̄ka̍ā ndāa̍ nda̍ a̍a̍ so̍o̍lūū o̍ lɛ̄ŋndē ndāle̍ŋ ni᷄ŋ nda̍ o̍kɔ̄ɔ̄ le̍. Ndu̍yɛ̍ a̍ pāa̍le̍ hāūle̍ŋ nde̍ŋ bɛ̍ɛ̍ wāŋnda̍ ha̍ā, chūāā ndāa̍, a̍ chūāā ndāā ma̍māa̍ ā chō wɔ̄ o̍ ka̍ā fi̍nyāā ndāā ka̍ŋ chōo̍.