Read Southern Kisi Māsāā Bɛ̍ndūāā Di̍i̍ŋ Ndūa̍a̍ 18 Bible Online

Māsāā Bɛ̍ndūāā Di̍i̍ŋ Ndūa̍a̍ 18 - Southern Kisi bible

Māsāā Bɛ̍ndūāā Di̍i̍ŋ Ndūa̍a̍ 18

¹Wɔ̄sī Hōōsi̍a̍ā, po̍ Ɛ̍lāā wo̍ ō chīŋa̍ wɔ̄sīla̍ŋ lā yāa̍ o̍ lēmāsā I̍sɔ̄lūɛ̄ī yo̍, wɔ̄sī kōŋ Hɛ̄sɛ̄ki̍yā po̍ E̍ha̍a̍sī wo̍ ō sīmnu᷄ŋ ma̍sāa̍ le̍ lɛ̄ŋndē Chu̍dāle̍ŋ ni̍.

²Hɛ̄sɛ̄ki̍yā wa̍ wɔ̄sīla̍ŋ bi̍dīi̍ŋ a̍ lā ŋūɛ̍ɛ̍nu̍ mbo̍ sīmnu᷄ŋ ma̍sāa̍ le̍ Chu̍dā. Ndu̍yɛ̍ mbo̍ tōsā māsāle̍ŋ Chūlu̍sɛ̄lɛ̄m le̍ wɔ̄sīla̍ŋ bi̍dīi̍ŋ a̍ lā ŋɔ̄ma̍hīɔ̍ɔ̍lu̍, chi̍e̍e̍ le̍bo᷅llo̍ le̍ lɛ̄ŋndē Chu̍dāle̍ŋ. Hɛ̄sɛ̄ki̍yā ko̍ŋ yɛ̄, kāla̍ ndɔ̍ wa̍ Ābi̍chā ni̍, chūa̍ Sɛ̄kāla̍yā wo̍.

³Ndu̍yɛ̍ Hɛ̄sɛ̄ki̍yā o̍ wa̍ sa̍kpō Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l. Nɛ̄i̍ Dēēve̍ fi̍nyā ndɔ̄ ma̍mā o̍ wa̍ chōo̍ wo̍, nɛ̄ī ko̍ŋ ko̍ni̍ ndu̍ bɛ̍ɛ̍ to᷅l kɔ̄ɔ̄lī ni̍.

⁴Fo̍ndāŋndā lāsōōlu̍u̍la̍ wāŋnda̍ nda̍ a̍a̍ ta̍ŋgu̍l le̍ mɛ̄lɛ̄ka̍ā ndāa̍ yɛ̍ yi̍a̍a̍ sōōlūūwo̍ la̍ŋ, mbo̍ tɛ̄ɛ̄mbūū la̍ŋ kpo̍u̍. O̍ ko̍ŋ kɔ̍ɔ̍lī, nyɛ̄lā nda̍ sīmi̍ a̍ pōūta̍ŋ māā māsūŋgbu̍ mā sōōlūū la̍ŋ māā mɛ̄lɛ̄ka̍ā ndā la̍ŋ, mbo̍ pēsī pēsī la̍ŋ kpo̍u̍. Nyɛ̄lā wāŋnda̍ nda̍ a̍a̍ to̍o̍si̍a̍a̍ māā māsūŋgbu̍, le̍ mɛ̄lɛ̄ka̍ nda̍ nɔ̍ dīōla̍ŋ āā, A̍si̍ɛ̍lūā wo̍ sōōlūūwo̍ lo̍ŋ nda̍ŋ, mbo̍ tɛ̄ɛ̄mbūū la̍ŋ kpo̍u̍. O̍ ko̍ŋ kɔ̍ɔ̍lī, kɛ̄ū Mūu̍sē ndu̍ o̍o̍ tu̍u̍la̍ sīndɛ̄ a̍ chīli̍ŋi̍i̍ būlɔ̍ŋsīi̍ye̍,[9] mbo̍ hēēlū ndu̍ o̍ po̍llo̍ ni᷄ŋ ndo̍, mbo̍ pēsī pēsī kɛ̄ū tūūlāā kōŋ kpo̍u̍. Kāni̍ fo̍ndōle̍, wāŋnda̍ I̍sɔ̄lūɛ̄ī nda̍ a̍a̍ chu̍a̍ ni᷅ŋ kɛ̄ū tūūlāā kōŋ māā mɛ̄lɛ̄ka̍ nda̍, mā lūām nyɛ᷅m chūŋ kɛ̄ndɔ᷄ŋ o̍ ndu̍ lo̍. Ma̍ kē ndu̍ dīōla̍ŋ āā Nɛ̄hu̍si̍tāŋ.

⁵Mi̍ Hɛ̄sɛ̄ki̍yā o̍ du̍a̍ū tīīnda᷄ŋ ndɔ̄ɔ̍ kpo̍u̍ o̍ Mɛ̄lɛ̄ka̍ Ya̍a̍wɛ̄ɛ̄ ni̍ŋ, Mɛ̄lɛ̄ka̍ I̍sɔ̄lūɛ̍i̍ya̍ ā pīɛ̄ī yo̍. Māsāa̍ ke̍e̍ku̍ o̍ lɛ̄ŋndē Chu̍dāle̍ŋ ni᷄ŋ nda̍ ki̍nɛ̍i̍, a̍ ke̍e̍ku̍ ndu̍ lāchī o̍ māsāle̍ŋ chōo̍ wa̍ ni̍, a̍ mɛ̍ɛ̍lu̍ sīmnɔ᷄ŋ ma̍sāa̍ ndu̍ kɔ̄ɔ̄lī wa̍ ni̍, māsā o̍ māsā o̍ do̍u̍ ti̍i̍nda᷄ŋ ndɔ̄ɔ̍ o̍ Mɛ̄lɛ̄ka̍ ni᷄ŋ māā Hɛ̄sɛ̄ki̍yā le̍.

⁶Mi̍ Hɛ̄sɛ̄ki̍yā o̍ yɔ̄ŋgu᷄ŋ o̍ Mɛ̄lɛ̄ka̍ Ya̍a̍wɛ̄ɛ̄ lo̍ a̍ kɔ̄l ndɔ̄ɔ̍ kpo̍u̍. Ndu̍yɛ̍ ha̍a̍a̍ yōōmū ndɔ̄ɔ̍ mɛ̄ɛ̄lu̍la̍ŋ, ō fēŋa̍ŋ o̍ nɛ̄i̍ ndɔ̄ɔ̍ chōo̍ le̍. Nyɛ̄ o̍ nyɛ̄ sāwāla̍ Mɛ̄lɛ̄ka̍ ke̍ Mūu̍sē la̍ŋ lā dīmi̍ le̍ tōsāa̍, ō pīlɛ̍ bɛ̍ɛ̍ ō mɛ̄i̍ ndu̍ mbō kɛ̄ɛ̍ ndu̍ tōsā le̍.

⁷Ndu̍yɛ̍ Mɛ̄lɛ̄ka̍ Ya̍a̍wɛ̄ɛ̄ o̍ wa̍ ndu̍ kɔ̄ɔ̄lī. Nyɛ̄ o̍ nyɛ̄ ndu̍ o̍o̍ yɔ̍ɔ̍ ba᷅ le̍ tōsāa̍ bāa̍ ndu̍ o̍o̍ ti̍ū ni̍. Mbo̍ sīmūl māsā bɛ̍ndōo̍ Āsi̍i̍līāā, ndu̍yɛ̍ mbo̍ fūlā ndu̍ o̍ bā bɛ̄ŋgu̍, ndu̍ o̍o̍ me᷅l lɛ̍ māsāa̍ Āsi̍i̍līāā pāāwā o̍ pāāwā o̍ bā le̍.

⁸Mbo̍ yām chi̍e̍e̍ŋ Fīli̍i̍tīāŋnda̍ kpo̍u̍, chɔ̍ŋ a̍ chi̍e̍e̍ŋ ndāŋ pɔ̍mbɔ᷄ŋ, mbo̍ kūā a̍ chi̍e̍e̍ŋ nda᷄ŋ nɔ̍ kpākīla̍ ka̍lā ka̍lālā bɛ̄ŋnda̍ŋ ndo̍ŋ, mbo̍ fu̍u̍lūū le̍nde̍ a̍ Ka̍a̍sā chi̍e̍e̍, ndu̍yɛ̍ a̍ būŋgāŋ ndɔ᷄ŋ.

⁹Wɔ̄sī Hɛ̄sɛ̄ki̍yā māsāa̍ Chu̍dā o̍ chi̍ŋa̍ wɔ̄sīla̍ŋ lā hīɔ̍ɔ̍lu̍ o̍ lēmāsā Chu̍dā wo̍, wɔ̄sī kōŋ Māsā Bɛ̍ndōo̍ Sīālīma̍nɛ̍ɛ̍sā, o̍ wa̍ Āsi̍i̍līāā wo̍ ō hu᷄ŋ chi᷅ŋa̍la᷅ŋ I̍sɔ̄lūɛ̍i̍ya̍ a̍ sɔ̍ŋgɔ̍ɔ̍ ni̍, mbo̍ dūāū Sāme̍e̍līāā chi̍e̍e̍ le̍bo᷅llo̍ le̍ I̍sɔ̄lūɛ̄ī o̍ pi̍ŋndo̍ ni᷄ŋ kpɔ̍kɔ̍su̍. Wɔ̄sī māsāa̍ Hōōsi̍a̍ā, o̍ chi̍ŋa̍ wɔ̄sīla̍ŋ lā ŋɔ᷄mmɛ̍ū o̍ lēmāsā I̍sɔ̄lūɛ̄ī yo̍, wɔ̄sī kōŋ sūɛ̍i̍ he̍ī ī yɔ̄nu̍ŋ ni̍.

¹⁰Le̍ wɔ̄sīla̍ŋ lā yāa̍ pūa̍a̍ chɔ̄ūwa̍ Āsi̍i̍līāā a̍ wa̍ Sāme̍e̍līāā ā bālāā kpɔ̍kɔ̍su̍, mā chīŋa̍la᷅ŋ wa᷅ŋnda̍ Sāme̍e̍līāā. Mɛ̄ɛ̍ wɔ̄sīla̍ŋ lā hīōū lā tīɔ̍ɔ̍ŋ, o̍ yāa̍ ndɔ̄ɔ̍ mɛ̄ɛ̄lu̍la̍ŋ Āsi̍i̍līāŋnda̍ bīī Sāme̍e̍līāā ni̍. Wɔ̄sī Hɛ̄sɛ̄ki̍yā māsāa̍ Chu̍dā o̍ chi̍ŋa̍ wɔ̄sīla̍ŋ lā ŋɔ᷄mpu᷅m o̍ lēmāsā wo̍, wɔ̄sī kōŋ Āsi̍i̍līāŋnda̍ bīī Sāme̍e̍līāā ni̍. Wɔ̄sī kōŋ kpe̍e̍kpe̍i̍ Hōōsi̍a̍ā māsāa̍ I̍sɔ̄lūɛ̄ī ō chīŋa̍ wɔ̄sīla̍ŋ lā ŋɔ̍ma̍hīɔ̍ɔ̍lu̍ o̍ lēmāsā ni̍.

¹¹Mi̍ māsā bɛ̍ndōo̍ Āsi̍i̍līāā o̍ bi̍ū I̍sɔ̄lūɛ̍i̍ya̍, mbo̍ kūā a̍ nda̍ o̍ chɛ̄le̍ŋ ni᷄ŋ o̍ lɛ̄ŋndē Āsi̍i̍līāāle̍ŋ ni᷄ŋ, mbo̍ kɛ̄sī nda̍ o̍ fo̍ndāŋndā yɛ̍ yɛ̍la̍ŋ. Mɛ̄ɛ̍ o̍ kɛ̍si̍ ā ti᷄ŋ Ha̍lā chi̍e̍e̍, mbo̍ kɛ̄sī ha̍ā o̍ Pīo̍o̍ Ha̍bɔ̄ɔ̄ kɔ̍ŋgɔ̍ o̍ būŋgɛ̄ī Ko̍sāŋnde̍ ni᷄ŋ, o̍ ko̍ŋ kɔ̍ɔ̍lī, mbo̍ kɛ̄sī ha̍ā o̍ chi̍o̍o̍ŋ o̍ būŋgɛ̄ī Me̍dīāā ve̍ ni᷄ŋ.

¹²Le̍ sa̍bū he̍ī ī yɔ̄nu̍ŋ a̍ I̍sɔ̄lūɛ̍i̍ya̍ wo̍ cho̍ ni̍ māā le̍ mɛ̄ɛ̍ I̍sɔ̄lūɛ̍i̍ya̍ ā sōli̍ Mɛ̄lɛ̄ka̍ Ya̍a̍wɛ̄ɛ̄, o̍ cho̍ Mɛ̄lɛ̄ka̍ ndāa̍ wo̍ dīōm ma̍ tɛ̄ɛ̄mbūū kpe̍ma̍ o̍ yi̍i̍ a̍ nda̍ wo̍ yɛ̍. Nyɛ̄ o̍ nyɛ̄ Mūu̍sē, bu̍ɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ ī dīmu̍l nda̍ le̍ tōsāa̍ o̍ sāwāla̍ Mɛ̄lɛ̄ka̍ ke̍ ndu̍ la̍ŋ ni᷄ŋ, ā chɛ᷄l mā tōsa̍ ndu̍ le̍. Ā ye̍ŋ bɛ̍ɛ̍ ni᷅la̍ŋ o̍ nyɛ̄ sāwāla̍ la̍ŋ lā dīmi̍ wo̍ le̍.

¹³Wɔ̄sī Māsā Bɛ̍ndōo̍ Hɛ̄sɛ̄ki̍yā o̍ chi̍ŋa̍ wɔ̄sīla̍ŋ tɔ̍ a̍ lā hīɔ̍ɔ̍lu̍ o̍ lēmāsā Chu̍dā wo̍, wɔ̄sī kōŋ mi̍ Sɛ̄nāchɛ̍lu̍i̍bī, Māsā Bɛ̍ndōo̍ le̍ Āsi̍i̍līāā o̍ chu̍ā pūa̍a̍ ndūa̍a̍ chɔ̄ūwa̍ ma̍ hu᷄ŋ chi᷅ŋa̍la᷅ŋ chi̍e̍e̍ŋ wa̍ ŋ̄ bɛ̄ɛ̄ndīāā ŋ̄ kālā ka̍lā o̍ lɛ̄ŋndē Chu̍dāle̍ŋ ni᷄ŋ ndo̍ŋ, ndu̍yɛ̍ ma̍ bīī mu̍ŋ kpo̍u̍.

¹⁴O̍ ko̍ŋ, mi̍ Hɛ̄sɛ̄ki̍yā o̍ yɔ᷅ŋ māsāa̍ Āsi̍i̍līāā dīōmnde̍ŋ nāa̍ o̍ wa̍ La̍ki̍sī chi̍e̍e̍ wa̍, mbo̍ dīmūl ndu̍ āā, “Fāllo̍, I̍ tɛ̍ɛ̍mbu̍u̍ a̍ nūm. Yāndi̍i̍ chu̍a̍ pu̍a̍a̍ nu̍m ā chɔ̄ūwa̍ mī lā mīīŋgu̍. Nyɛ̄ o̍ nyɛ̄ ŋ̄ vēēlu̍ ya̍ chōo̍ pɛ̍ I̍ nɔ̍lā mī yɔ̍ŋgu̍.” Ndu̍yɛ̍ mi̍ māsāa̍ Āsi̍i̍līāā o̍ lo᷅ o̍ ko̍ŋ, mbo̍ vēēlū ndu̍ nyɛ̄ sɔ̄lāa̍ chōo̍ ka̍ni̍ŋ hu̍mbo᷄ŋ lūsu̍llo̍ le̍ pa᷅ŋnda̍ŋ wāa̍la̍ŋ bi̍dīi̍ŋ a̍ lā tīɔ̍ɔ̍ŋ, a̍ kɛ̄mɔ̄ɔ̍ lē ŋūɛ̍ɛ̍nu̍ (22,500), o̍ ko̍ŋ kɔ̍ɔ̍lī, a̍ ko̍o̍līi̍yo̍ŋ lūsu̍llo̍ le̍ pa᷅ŋnda̍ŋ wāa̍la̍ŋ lā tīɔ̍ɔ̍ŋ, a̍ kɛ̄mɔ̄ɔ̍ lē dīi̍ŋ a̍ be̍le̍-ŋu̍ɛ̍ɛ̍nu̍ (2,250).

¹⁵Ka̍ni̍ŋ hu̍mbu᷄ŋ wa̍ o̍ chīɛ̍i̍ Mɛ̄lɛ̄ka̍a̍ ni᷄ŋ ndo̍ŋ ni̍, ŋ̍ wa̍ o̍ fo̍ndā kɛ̄sīāā nyɛ̄ sɔ̄lāa̍ o̍ chīɛ̄ī lēmāsāa̍ ni᷄ŋ ndo̍ŋ ni̍, mi̍ Hɛ̄sɛ̄ki̍yā o̍ chu̍u̍ŋgīāā mu̍ŋ kpo̍u̍, mbo̍ kē māsāa̍ Āsi̍i̍līāā.

¹⁶O̍ ko̍ŋ kɔ̍ɔ̍lī, dīōla̍ wa̍ o̍ chīɛ̍i̍ Mɛ̄lɛ̄ka̍a̍ la̍ŋ, ko̍o̍līi̍ŋ Māsā Bɛ̍ndōo̍ Hɛ̄sɛ̄ki̍yā ndu̍ o̍o̍ ho̍li̍ ho̍li̍ o̍ dīōla̍ lāŋ ndu̍yɛ̍, a̍ o̍ dīōlā lāŋ chōo̍ wo̍ŋ, mu̍ŋ bɛ̍ɛ̍ mbo̍ yāūvīāā mu̍ŋ kpo̍u̍, mbo̍ kē māsā bɛ̍ndōo̍ Āsi̍i̍līāā.

¹⁷Kɛ̍ mi̍ māsāa̍ Āsi̍i̍līāā o̍ lo᷅ o̍ ko̍ŋ, mbo̍ yɔ̄ŋ pūa̍a̍ ya̍a̍wa̍a̍ wa̍ pūa̍a̍ ndūa̍a̍ chɔ̄ūwa̍ kpo̍u̍ bo᷅lle̍ŋ nda̍, a̍ pūa̍a̍ chɔ̄ūwa̍ ku̍ndā bɛ̄ndōo̍, chɔ̄nɔ᷄ŋndo̍ La̍ki̍sī chi̍e̍e̍. Mɛ̄ɛ̍ pūa̍a̍ chɔ̄ūwāā nda̍ vēm nda̍ ā fūūlu̍u̍ Chūlu̍sɛ̄lɛ̄m, ma̍ chūā nɛ̄ī bɛ̍ndu̍ ku̍ɛ̄ o̍ fo̍ndā tōōsīāā lākōlāa̍ wo̍, ma̍ sīm lo̍ŋ. Ku̍a̍tɛ̄i̍ nda̍ tōū o̍ nɛ̄ī ko̍ŋ mī mɛ̄ŋnda̍ŋ mā chāŋ o̍ pīo̍o̍ mālūāŋ mī mā kēēkū lo̍ŋ ndo̍, o̍ ku̍a̍tɛ̄i̍ ko̍ŋ īkɛ̄i̍ nda̍ si᷄m ni̍.

¹⁸O̍ ko̍ŋ kɔ̍ɔ̍lī, ma̍ yɔ̄ŋ le̍ Māsā Bɛ̍ndōo̍ Hɛ̄sɛ̄ki̍yā. Mi̍ Hɛ̄sɛ̄ki̍yā o̍ lo᷅ o̍ ko̍ŋ, mbo̍ vi̍ām lāŋgba̍ā ndūāā ka᷅lla̍ nda̍ ya̍a̍ le̍ mā kōma̍l nda̍. Lāŋgba̍ā ndūāā ka̍lāā o̍ ve᷅m nda̍ nda̍ wa̍ ha̍ā ni̍. Īlīa̍a̍kīm, po̍ Hɛ̄li̍kīāā wo̍, o̍ wa̍ chīɛ̄ī lēmāsāa̍ bōlle̍ŋ ndo̍, a̍ Si̍ɛ̍bi̍nā, wānā po̍o̍nyīa̍a̍ o̍ tōŋgo̍ kɔ̍ɔ̍sɔ̍ɔ̍ ni᷄ŋ, a̍ Cho̍wāā, po̍ A̍sa̍fī wo̍, wāna̍ ndu̍ o̍o̍ ma̍ndā ya̍u̍la̍ sɔ̍ɔ̍ŋ lēlɛ̄ŋndo̍ŋ ndo̍.

¹⁹Mi̍ bōlīī pūa̍a̍ chɔ̄ūwāā māsāa̍ Āsi̍i̍līāā o̍ ve᷅m nda̍, ō pīlɛ̍ dīmūl lāŋgba̍ā kālāā Hɛ̄sɛ̄ki̍yā o̍ ve᷅m nda̍ āā, “Lā kɔ̍ di̍mūl Hɛ̄sɛ̄ki̍yā māā nyɛ̄ māsā bɛ̍ndōo̍ Āsi̍i̍līāā o̍ di̍mi̍ wo̍ ndu̍ cho̍ ho̍ō ni̍. Ō dīmi̍ āā, ‘Hɛ̄sɛ̄ki̍yā, ō yɛ̄ɛ̍nɛ̍ ŋ̄ tīīnda̍ŋ yɛ̍ ma̍ yīya᷄ŋ māā i̍ ti̍ū nu̍m bā le̍?

²⁰Ā nɔ̄ o̍ kɔ̄l māā sōndō bɛ̄ndōo̍ ndu̍ cho̍ tāāsi̍o̍o̍ nɔ̄ɔ̍, a̍ kpāāyāa̍ le̍ chɔ̄ūwo̍ ni̍? Ō nɛ̄ɛ̍nɛ̍ ŋ̄ tīīnda̍ŋ yɛ̍, māā ō nɔ̄lā mbō māla̍ nu̍m mā si̍mu̍l Āsi̍i̍līāŋnda̍ mā fu̍la̍ nda̍ o̍ bā bɛ̄ŋgu̍?

²¹Bāā I̍chi̍pī ŋ̄ tīīnda̍ŋ le̍ nya̍ mālāa̍ ni̍? Lēlɛ̄ŋ o̍ lēlɛ᷄ŋ le̍ dɔ̍ū tīīnda᷄ŋndo̍ o̍ māsāa̍ I̍chi̍pī ni̍ŋ le̍ ndu̍ mālāa̍ sɔ̄lāa̍ o̍ bā pɛ̍, lɛ̄ŋndē lēŋ lē hūīnu̍ŋ, fo̍ndōle̍, mɛ̄ɛ̍ wāŋndo̍ ō lō nu̍a̍ā kɔ̄la̍ŋ a̍ tīnda̍a̍, mī tīnda̍ ko̍ŋ ō yo᷄m ndu̍ o̍ bā, mbō tɛ̄nda̍ ndu̍ bāa̍ yɛ̍, le̍nde̍ māsāa̍ I̍chi̍pī o̍ cho̍ ni̍. Ō cho̍ wa᷅na̍ wānā dɔ̍ū tīīnda᷄ŋ o̍ ndu̍ ni̍ŋ le̍ nu̍m mālā le̍.’ ”

²²Mi̍ bōllē pūa̍a̍ chɔ̄ūwa̍ Āsi̍i̍līāā ō hīāū lāchī a̍ sūɛ̍i̍, mbo̍ dīmī āā, “Yālāā nya̍ dīmī māā Mɛ̄lɛ̄ka̍ Ya̍a̍wɛ̄ɛ̄ o̍ cho̍ Mɛ̄lɛ̄ka̍ nyāa̍ wo̍, māā ndu̍ nya̍ tīīnda̍ŋ le̍ nya̍ mālāa̍ ni̍, mɛ̄ɛ̍ lā hūīnu̍ŋ vɛ̍lɛ̄. Kāni̍ fo̍ndōle̍, Mɛ̄lɛ̄ka̍ Ya̍a̍wɛ̄ɛ̄ ko̍ŋ, sōōlu̍u̍la̍ ndɔ̄la̍ŋ, a̍ ma̍āŋndā ndɔ̄la̍ŋ, la̍ŋ Hɛ̄sɛ̄ki̍yā o̍ tɛ̍ɛ̍mbu̍u̍ ni̍, mbo̍ dīmūl wāŋnda̍ Chu̍dā, a̍ wāŋnda̍ Chūlu̍sɛ̄lɛ̄m, māā o̍ ma̍āŋndo̍ Chūlu̍sɛ̄lɛ̄m ndu̍ pīlɛ̍ kpe̍ nda̍ nɔ̄ ni᷅ŋ ni̍ mā sōōlu̍u̍.

²³I̍ si̍m mi̍ ki̍a̍lū nya̍ īchīɛ̄ɛ̄ le̍ māsā bɛ̍ndōo̍ le̍ Āsi̍i̍līāā. O̍ lɛ̄ŋndē I̍sɔ̄lūɛ̍i̍le̍ŋ ni᷄ŋ ki̍nɛ̍i̍, tē lā nɔ̄ pɛ̍ pu̍a̍a̍ chɔ̄ūwāa̍ sɔ̍ŋgā o̍ su̍a̍a̍ chōo̍ wa̍ wāa̍la̍ŋ lā tīɔ̍ɔ̍ŋ, i̍ nɔ̍lā mī ke̍ pūa̍a̍ chɔ̄ūwāā ka̍ŋ su̍a̍ā chɔ̄ūwa̍ wāa̍la̍ŋ lā tīɔ̍ɔ̍ŋ (2,000) mā wa̍ sɔ̍ŋgɔ̄ɔ̍ lēcho̍ō.

²⁴Ā yɔ᷄ŋ bɛ̍ɛ̍ mī lā chūūŋgi̍a̍a̍ pūa̍a̍ nyāa̍ chɔ̄ūwa̍ kpo̍u̍ na̍a̍ pi᷅lɛ̍, ku̍ndā so̍vɛ̄i̍ya̍a̍ māsānɔ̍ nūu̍ o̍ nɔ̍ bɛ̍ɛ̍ kpa̍a̍yā le̍ wo̍, lā nɔ̍lā mī lā sīmu̍l ndu̍ mī lā yēm ndu̍ le̍. Māsāa̍ I̍chi̍pī o̍ ke̍ nya̍ bɛ̍ɛ̍ nyɛ̍lā su̍a̍a̍ ā nāŋ nda̍ŋ, o̍ ko̍ŋ kɔ̍ɔ̍lī, mbō ke̍ nya̍ pūa̍a̍ chɔ̄ūwāa̍ sɔ̍ŋgā o̍ su̍a̍a̍ chōo̍ wa̍, lā nɔ̍lā mī lā yēm ku̍ndā pūa̍a̍ nāa̍ nɔ̍ ko̍ŋ kpa̍a̍yā le̍ wo̍ le̍.

²⁵Yīya᷄ŋ nyāa̍ cho̍ ni̍ māā, a̍ kpāāya̍ nāa̍ na̍a̍ pi̍la̍a̍ na̍a̍ ŋ̄ hu᷄ŋ de᷅l lɛ̄ŋndē nyāle̍ŋ chōo̍ ni̍, mi̍ ŋ̄ tɛ̄ɛ̄mbu̍u̍ le̍ŋ, māā ō cho̍ Mɛ̍lɛ̄ka̍ Ya̍a̍wɛ̄ɛ̄ le̍ o̍ ke̍ na̍a̍ kpāāyā ko̍ŋ te̍? Lā sīna̍ pɛ̍ŋgu̍ māā Mɛ̄lɛ̄ka̍ Ya̍a̍wɛ̄ɛ̄ pi̍la̍ kpe̍e̍kpe̍i̍ o̍ ve᷅m na̍a̍ ni̍, le̍ mī ŋ̄ hu᷄ŋ de᷅l lɛ̄ŋndē nyāle̍ŋ chōo̍ mī ŋ̄ tɛ̄ɛ̄mbu̍u̍ le̍ŋ.”

²⁶O̍ ko̍ŋ, mi̍ Īlīa̍a̍kīm, a̍ Si̍ɛ̍bi̍nā a̍ Cho̍wāā, lāŋgba̍ā kālāā Māsā Bɛ̍ndōo̍ Hɛ̄sɛ̄ki̍yā o̍ ve᷅m nda̍ ā di̍mūl bōllē pūa̍a̍ chɔ̄ūwa̍ Āsi̍i̍līāā āā, “Yāndi̍i̍ fāllo̍, so̍o̍ nāa̍ na̍a̍ chūā o̍ A̍lu̍a̍ma̍i̍kīi̍ye̍ ni᷄ŋ. Na̍a̍ bɛ̍ɛ̍ ŋ̄ tūɛ̄ī Ālu̍a̍ma̍i̍kīi̍ye̍. Su̍a̍ā o̍ Hi̍būlūi̍ye̍ ni᷄ŋ te̍, yɔ̄ŋi̍ wānāa̍ cho̍ o̍ kpākīo̍o̍ chōo̍ wa̍ kpo̍u̍ ā tu̍e̍i̍ nyɛ᷅ ŋ̄ chō dīmīo̍o̍ wo̍.”

²⁷Kɛ̍ mi̍ bōllē pūa̍a̍ chɔ̄ūwa̍ Āsi̍i̍līāā o̍ di̍mūl nda̍ āā, “Yīya᷄ŋ nyāa̍ cho̍ ni̍, māā nya̍ cho̍ ha̍ā na̍nu᷄ŋ nda̍ a̍ māsa̍ nyāa̍, māā o̍ nya̍lo̍ ko̍ni̍ māsāa̍ ō vēm na̍a̍ ni̍ le̍ mī ŋ̄ hu᷄ŋ di̍mūl nya̍ dīōmnda̍ŋ nda᷅ŋ? Ō cho̍ ko̍ o̍ nya̍lo̍ le̍ o̍ ve᷅m na̍a̍ le̍. Nya̍ ni̍, a̍ wānāa̍ cha̍l ha̍ā o̍ kpākīo̍o̍ chōo̍ wa̍, o̍ nya̍lo̍ kpo̍u̍ o̍ ve᷅m na̍a̍ ni̍, le̍ mī ŋ̄ hu᷄ŋ di̍mūl nya̍ dīōmnda̍ŋ nda᷅ŋ mī wānā o̍ wānā fe̍e̍ o̍ tu̍e̍ī. Wānāa̍ cha̍l ka̍ŋ o̍ kpākīo̍o̍ chōo̍ wa̍ ni̍, nya̍ ni̍, te̍le̍ŋ cho̍ fūūlūū nya̍ kpo̍u̍ mī lā hu᷄ŋ di̍ō pōōlā nyāla̍ŋ, o̍ ko̍ŋ kɔ̍ɔ̍lī, mī lā ko᷄l tūīīli̍mā nyāa̍ŋ.”

²⁸O̍ ko̍ŋ kɔ̍ɔ̍lī, mi̍ bōllē pūa̍a̍ chɔ̄ūwa̍ Āsi̍i̍līāā o̍ cha̍ŋ i̍si̍si̍, mbo̍ vēēlū wānāa̍ wa̍ o̍ sāāsa̍ chi̍o̍o̍ chōo̍ wa̍ chōo̍ cho̍o̍ o̍ Hi̍būlūi̍ye̍ ni᷄ŋ. Mbo̍ dīmūl nda̍ āā, “Lā ya᷄ŋ ni᷅la̍ŋ, mī lā tūēī nyɛ̄ māsā bɛ̍ndōo̍ kpo̍u̍, o̍ cho̍ māsāa̍ le̍ Āsi̍i̍līāā wo̍ ō dīmi̍ wo̍.

²⁹Ō dīmi̍ māā lā chɛ᷅l mī Māsā Bɛ̍ndōo̍ Hɛ̄sɛ̄ki̍yā o̍ hu̍i̍ nya̍ le̍. Hɛ̄sɛ̄ki̍yā o̍ nɔ̍lā mbō chīīndi̍a̍a̍ yōōmūlā nyāla̍ŋ te̍.

³⁰Ō dīmu̍l nya̍ bɛ̍ɛ̍ māā, Mɛ̄lɛ̄ka̍ Ya̍a̍wɛ̄ɛ̄ o̍ cho̍ na̍a̍ chīīndīāā, ō cho̍ chɛ̍lɔ̄ɔ̄ mī māsā bɛ̍ndōo̍ Āsi̍i̍līāā o̍ hu̍ŋ bi̍ī chi̍o̍o̍ ho̍ō le̍. Ō dīmu̍l nya̍ bɛ̍ɛ̍ le̍nde̍, lā la̍a̍la᷄ŋ a̍ nyɛ̄ o̍ di̍mi̍ ko̍ŋ ndo̍ mī lā tīīnda̍ŋ Mɛ̍lɛ̄ka̍ Ya̍a̍wɛ̄ɛ̄ māā ō chō nya̍ chīīndīāā le̍.

³¹Nyɛ̄ o̍ nyɛ̄ Hɛ̄sɛ̄ki̍yā o̍ di̍mu̍l nya̍, lā ya᷅ŋ ndu̍ lānī le̍. Nyɛ̄ māsā bɛ̍ndōo̍ Āsi̍i̍līāā o̍ ye̍e̍ma̍ mī lā tōsa̍ wo̍ ndu̍ cho̍ ho̍ō ni̍. Ō dīmi̍ māā, lā tōsa̍ chɛ᷅la᷅ŋ kɔ̄l nyūlōo̍ a̍ ya̍, mī lā fūla̍ mī lā hu᷄ŋ yɔ̍ŋgu᷄ŋ o̍ ya̍lo̍. Tē lā chɛ᷄l pɛ̍, mī lā yɔ̄ŋgu̍ŋ o̍ ya̍lo̍, I̍ cho̍ nya̍ mālɔ̄ɔ̄ mī wānā o̍ wānā o̍ de᷅ kpe̍le̍ ndɔ̍ mākīle̍pīi̍yo̍, a̍ kpe̍le̍ ndɔ̍ māfi̍kīi̍yo̍ tɔ̄nɔ̄, o̍ ko̍ŋ kɔ̍ɔ̍lī, so̍o̍ŋnda̍ nyāla̍ māmɛ̄ŋndā nya̍ tōū la̍ŋ mī lā ko᷄l mɛ̄ŋmā māŋ. Lā lō ni̍ŋ lɛ̍ŋndē nyāle̍ŋ tɔ̄nɔ̄ɔ̍ dīo̍,

³²ha̍a̍a̍ mbō lo̍ o̍ ko̍ŋ mī hu̍ŋ kɔ᷅ a̍ nya̍ o̍ lɛ̄ŋndē chēle̍ŋ ni᷄ŋ, lɛ̄ŋnde̍ ve̍la᷅ŋ na̍ŋɔ̄ɔ̍ a̍ lɛ̄ŋndē nyāle̍ŋ nde̍ŋ. O̍ lɛ̄ŋndē lēŋ ni᷄ŋ, nyɛ̄ o̍ nyɛ̄ fe̍e̍ nya̍ yēēma̍ ō wā ni̍ŋ ndo̍ŋ, lātɔ̄lɔ̄ɔ̄ ni̍, mūɛ̄īmā sɛ̄nɛ̄ī ni̍, nyɛ̄ dīāā ni̍, yɔ̄mīī mākīle̍pīi̍ ni̍, yɔ̄mīī ɔ̄li̍fīi̍ ni̍, mālɛ̄ ni̍, kpo̍u̍, nyɛ̄ o̍ nyɛ̄ ō wā ni̍ŋ ndo̍ŋ o̍ hɔ̍bɛ̍i̍ yo̍. Le̍la̍ŋ tē lā yēēma̍ mī lā wa̍ yōōmū pɛ̍, mɛ̄ɛ̍ lā tōsa̍ nyɛ᷅ ya̍ I̍ di̍mu̍l nya̍ wo̍, kɛ̍ tē ō cho̍ ko̍ŋ te̍, lā chō pīɔ̍mndo̍ sɔ̄lā. “Le̍la̍ŋ nyɛ̄ o̍ nyɛ̄ Hɛ̄sɛ̄ki̍yā o̍ di̍mu̍l nya̍, lā ya᷅ŋ ndu̍ lānī le̍, fo̍ndōle̍, hūīyo̍ ko̍ni̍ o̍ cho̍ nya̍ ni̍, mbo̍ wā nya̍ chōōla̍ŋ dīmūllo̍ māā Mɛ̄lɛ̄ka̍ Ya̍a̍wɛ̄ɛ̄ o̍ cho̍ nya̍ chīīndīāā.

³³Lɛ̄ŋīi̍ ba̍lu̍ nya̍ he̍ī ye̍ ki̍nɛ̍i̍, lā chɔ᷄m ndɔ̍ ya̍ lɛ̄ŋndē mɛ̄lɛ̄ka̍ ndāa̍ ō chīīndi̍a̍a̍ ni᷅ŋ mbo̍ sōlī nda̍ māsā bɛ̍ndōo̍ Āsi̍i̍līāā o̍ bā le̍ŋ. Lɛ̄ŋndē lēŋ lē cho̍ le̍.

³⁴Wāŋnda̍ Ha̍ma̍tī chi̍e̍e̍ ni̍, a̍ wāŋnda̍ A̍pa̍a̍dī chi̍e̍e̍, ō yɛ̄ɛ̍nɛ̍ yɔ̍nu̍ŋ yɛ̍ a̍ mɛ̄lɛ̄ka̍ā ndāa̍ bōōndi̍i̍ ya̍ I̍ ye᷅m chi̍e̍e̍ŋ ndāŋ mūu̍ŋ ndo̍ŋ mu᷅ŋ nde̍? Wāŋnda̍ Sɛ̄fa̍a̍vēm chi̍e̍e̍ ni̍, a̍ wāŋnda̍ Hɛ̍nā chi̍e̍e̍, a̍ wāŋnda̍ I̍vāā chi̍e̍e̍, kūɛ̍ɛ̍nɛ̍ mɛ̄lɛ̄ka̍ā ndāa̍ ā chō yɛ̄ hāū? Ɔ̍ɔ̄ mɛ̄lɛ̄ka̍ nɔ̍la̍ mbo̍ chīīndīāā Sāme̍e̍līāā mbo̍ sōlī ndu̍ ya̍ o̍ bā wo̍?”

³⁵Mɛ̄lɛ̄ka̍ā cho̍ o̍ lɛ̄ŋīī yɛ̍ yɛ̍ ya̍ I̍ ye᷅m nde̍ ni᷄ŋ nda̍ ki̍nɛ̍i̍, lā chɔ᷄m ndɔ̍ ya̍ lɛ̄ŋnde̍ŋ lē pīlɛ̍ kpe̍, lē mɛ̄lɛ̄ka̍ ndāa̍ ō nɔ̄la̍ mbo̍ chīīndīāā nda̍ ya̍ o̍ bā le̍ŋ, tē lē chō pɛ̍. Lɛ̄ŋndē lēŋ lē cho̍ le̍. Mɛ̄ɛ̍ ɔ̍ɔ̄ le̍ sa̍bū nya̍ tīīndāŋ Mɛ̍lɛ̄ka̍ Ya̍a̍wɛ̄ɛ̄ māā ō chō Chūlu̍sɛ̄lɛ̄m chīīndīāā mbō sōli̍ ndu̍ ya̍ o̍ bā wo̍?

³⁶Kɛ̍ wānā o̍ wānā o̍ mu̍li̍ ndu̍ dīōm te̍, nda̍ kpo̍u̍, ma̍ mēī do̍ŋ do̍ŋ, fo̍ndōle̍, le̍nde̍ Māsā Bɛ̍ndōo̍ Hɛ̄sɛ̄ki̍yā ndu̍ o̍o̍ si̍la̍ nda̍ ni̍, māā wānā o̍ wānā o̍ mu̍lūl ndu̍ nyɛ̄ o̍ nyɛ̄ le̍.

³⁷Īlīa̍a̍kīm ni̍, Si̍ɛ̍bi̍nā ni̍, a̍ Cho̍wāā, ma̍ tūɛ̄ī nyɛ̄ o̍ nyɛ̄ bōlīī pūa̍a̍ chɔ̄ūwa̍ Āsi̍i̍līāā ā dīmi̍. O̍ ko̍ŋ kɔ̍ɔ̍lī, ma̍ mīīŋgū a̍ nyɛ̄la̍ŋ nda̍ lā sɛ̄ɛ̄si̍ɛ̍i̍ le̍kɔ̍ɔ̍ le̍ kɔ̄l nda̍ tāmbɛ̍i̍yo̍ chɔ̄mndo̍ ma̍ kɔ̍ do̍u̍nu᷄ŋ Ma̍sāa̍ Hɛ̄sɛ̄ki̍yā ko̍na̍.