Read Southern Kisi Māsāā Bɛ̍ndūāā Di̍i̍ŋ Ndūa̍a̍ 23 Bible Online

Māsāā Bɛ̍ndūāā Di̍i̍ŋ Ndūa̍a̍ 23 - Southern Kisi bible

Māsāā Bɛ̍ndūāā Di̍i̍ŋ Ndūa̍a̍ 23

¹O̍ ko̍ŋ kɔ̍ɔ̍lī, mi̍ Māsā Bɛ̍ndōo̍ Chōōsa̍yā o̍ ve̍e̍lū wāŋ bɛ̄ndūa̍a̍ cho̍ o̍ lɛ̄ŋndē Chu̍dāle̍ŋ ni᷄ŋ nda̍ kpo̍u̍ na̍a̍ pi᷅lɛ̍, a̍ wāŋ bɛ̄ndūa̍a̍ Chūlu̍sɛ̄lɛ̄m, chi̍e̍e̍ le̍bo᷅llo̍ le̍ Chu̍dā.

²O̍ ko̍ŋ kɔ̍ɔ̍lī, nda̍ kpo̍u̍ ma̍ bɔ̄ɔ̄ŋi̍āŋ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍, lātūlu̍ a̍ wānāā sōlīāā lāsa̍lāa̍, ndu̍yɛ̍ a̍ wānāa̍ su̍a̍ā le̍ Mɛ̄lɛ̄ka̍ wā. Wānā o̍ wāna̍ wa̍ Chūlu̍sɛ̄lɛ̄m, chūāāmbɔ̄ ni̍, bɛ̄ndū ni̍, nda̍ kpo̍u̍, ma̍ chūūŋgi̍āŋ lo̍ŋ. O̍ ko̍ŋ kɔ̍ɔ̍lī, mi̍ Māsā Bɛ̍ndōo̍ Chōōsa̍yā chu̍ā yāu̍ kpe̍ma̍ nda̍ sāālu̍ŋ ko̍ŋ o̍ chīɛ̍i̍ Mɛ̄lɛ̄ka̍a̍ ni᷄ŋ ndo̍, mbo̍ tīmbī nda̍ ndu̍ o̍ hɔ̄l mbo̍ tōmbōlāl nda̍ nyɛ̄ o̍ nyɛ̍ wa̍ ō pōōnyīāā lēni᷄ŋ.

³Mɛ̄ɛ̍ o̍ chi̍i̍ kpo̍u̍, mbo̍ kɔ̍ si᷅m o̍ sūŋgbu̍le̍ŋ īkɛ̄i̍ o̍ chīɛ̄ī kōŋ ni᷄ŋ, nāa̍ māsāā bɛ̍ndūa̍a̍ ā nɔ̄ si᷄mnda̍ŋ nda̍, le̍ mbō mīŋgi̍ kpe̍ma̍a̍ yīī nda̍ tɛ̄ɛ̄ŋ nda̍ Mɛ̄lɛ̄ka̍ Ya̍a̍wɛ̄ɛ̄ wa̍ā. Ndu̍yɛ̍ mbo̍ mīŋgī kpe̍ma̍a̍ yīī nda̍ Mɛ̄lɛ̄ka̍ Ya̍a̍wɛ̄ɛ̄ wa̍ā, mbo̍ chūā būŋgɛ̄i̍ māā ō yāŋ ni̍ŋ ni᷅la̍ŋ o̍ nyɛ̄ Mɛ̄lɛ̄ka̍ dīmūl ndu̍ wo̍, ndu̍yɛ̍ nyɛ̄ o̍ nyɛ̄ sāwāla̍ ndɔ̄la̍ŋ lā dīmi̍, a̍ nyɛ̄ o̍ nyɛ̄ ndu̍ Mɛ̍lɛ̄ka̍ ō dīmu̍l nda̍ le̍ mā tōsa̍ mbō wa̍ ndu̍ tōsāa̍ a̍ kɔ̄l ndɔ̄ɔ̍, ndu̍yɛ̍ a̍ yīya᷄ŋ ndɔ̄ɔ̍ kpo̍u̍. Ndu̍yɛ̍, nda̍ kpo̍u̍ ma̍ chūā būŋgɛ̄i̍ māā ā wā ni̍ŋ o̍ kpe̍ma̍ ko̍ŋ bɛ̄ŋgu̍, mā tōsa̍ nyɛ̍ o̍ nyɛ̍ di̍mi̍ŋ mbo̍ wā ō pōōnyīāā o̍ yāu̍ kpe̍ma̍ ko̍ŋ ni᷄ŋ.

⁴O̍ ko̍ŋ kɔ̍ɔ̍lī, mi̍ Chōōsa̍yā ve̍e̍lū Hīlīka̍yā, māsā bɛ̍ndū wānāā sōlīāā lāsa̍lāa̍, a̍ wānāā sōlīāā lāsa̍lāa̍ wa̍ ndu̍ īkɛ̄i̍ ya̍, o̍ ko̍ŋ kɔ̍ɔ̍lī, a̍ wānāa̍ ma̍ndā di̍ō kpākīo̍o̍ le̍ lūɛ̄īyɔ̄ɔ̍ o̍ chīɛ̍i̍ Mɛ̄lɛ̄ka̍a̍ wa̍, mbo̍ dīmūl nda̍ māā nyɛ̄m lāāndū o̍ nyɛ̄m lāāndu᷄ŋ cho̍ o̍ chīɛ̍i̍ Mɛ̄lɛ̄ka̍a̍ ni᷄ŋ, mi̍ ŋ̄ wā le̍ mɛ̄lɛ̄ka̍ā chēle̍ŋnda̍ ndā sōōlūūwo̍, nda̍ yɔ̍nūŋ ni̍ māā Bāāl, a̍ A̍si̍ɛ̍lūā, a̍ nyɛ᷄m cho̍ o̍ ha̍la̍a̍ ni᷄ŋ ndo̍ŋ, māā ā sōli̍ nyɛ᷅m lāāndūŋ mu᷅ŋ o̍ chīɛ̍i̍ Mɛ̄lɛ̄ka̍a̍ ni᷄ŋ. Mi̍ Māsā Bɛ̍ndōo̍ Chōōsa̍yā o̍ to̍sā ma̍ sōlī mu̍ŋ, ma̍ fāŋā mu̍ŋ Chūlu̍sɛ̄lɛ̄m chi̍e̍e̍, ma̍ kūā a̍ mu̍ŋ o̍ chīɔ̍ɔ̍ŋ wa̍ o̍ lɛ̄ŋndē dɛ̍ŋgbɛ̍le̍ŋ Ki̍di̍lɔ̄ŋ ndo̍ŋ ni᷄ŋ, ma̍ kɔ̍ lo᷅m mu̍ŋ ndo̍ŋ. Mɛ̄ɛ̍ nda̍ chīi̍ mu̍ŋ lōmɔ̄ɔ̄ kpo̍u̍, ma̍ kūāndū pūltā lāŋ ma̍ kūā a̍ la̍ŋ Bɛ̍tɛ̄ɛ̄l chi̍e̍e̍.

⁵Ndu̍yɛ̍, nyɛ̄ o̍ nyɛ̄ wāŋnda̍ ha̍ā nda̍ a̍a̍ so̍o̍lūū māā mɛ̄lɛ̄ka̍ā ndā, ō nda̍ vēēlū āā Bāāl wo̍ ni̍, lōo̍ŋ cho̍ o̍ ha̍la̍a̍ ni᷄ŋ cho̍o̍ cho̍o̍ wo̍ŋ ni̍, a̍ pāa̍le̍ŋ, a̍ pāŋge̍i̍, o̍ ko̍ŋ kɔ̍ɔ̍lī, a̍ nyɛ̄m yɛ̍ yɛ̍ŋ che᷅le̍ŋ o̍ ha̍la̍a̍ ni᷄ŋ, mi̍ wānāa̍ ke̍e̍ku̍ o̍ lēmāsā Chu̍dā Chōōsa̍yā lāchī wa̍ nda̍ a̍a̍ hɛ̄lī wānāā sōlīāā lāsa̍lāa̍, ma̍ kɛ̄sī nda̍ o̍ fo̍ndāŋnda̍ŋ kpɛ̍ kpɛ̍, le̍ sa̍lāla̍ŋ sōlīo̍o̍ o̍ nyɛ̄m mu᷅ŋ ndo̍. Bā o̍ bā nda̍ āā nɔ̍ sōōlu̍u̍la̍ŋ o̍ chi̍o̍o̍ŋ Chu̍dā, a̍ o̍ chi̍e̍e̍ŋ pɔ̍mbɔ᷄ŋ ba̍lu̍ Chūlu̍sɛ̄lɛ̄m ndo̍ŋ, nda̍ a̍a̍ nɔ̍ wānāā sōlīāā lāsa̍lāa̍ ha̍ā lo̍ŋ kpɛ̍ kpɛ̍. Mi̍ Māsā Bɛ̍ndōo̍ Chōōsa̍yā lo᷅ o̍ ko̍ŋ, mbo̍ fāāŋīāā wānāā sōlīāā lāsa̍lāā kāŋ o̍ fo̍ndāŋndā la̍ŋ kpo̍u̍.

⁶O̍ ko̍ŋ kɔ̍ɔ̍lī, sūŋgbu̍le̍ wa̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ ni᷄ŋ le̍ mɛ̄lɛ̄ka̍ ndāa̍ A̍si̍ɛ̍lūā sōōlūūwo̍ o̍ lēŋ ndo̍, mi̍ Māsā Bɛ̍ndōo̍ Chōōsa̍yā di̍mūl wāŋnda̍ mā kɔ̍ so̍lī sūŋgbu̍le̍ le̍ŋ ma̍ fāŋā le̍ŋ chi̍e̍e̍, ma̍ kɔ̍ lo᷅m nde̍ŋ Ki̍di̍lɔ̄ŋ o̍ lɛ̄ŋndē dɛ̍ŋgbɛ̍le̍ŋ. O̍ ko̍ŋ kɔ̍ɔ̍lī, mbo̍ dīmūl nda̍ ma̍ chūī pūltā sūŋgbu̍le̍ nda̍ lōm nde̍ŋ nda̍ŋ ma̍ kɔ̍ sa᷅ŋ nda̍ŋ nāa̍ fa̍ū fa̍ūwāā nda̍ chɔ̄ wa᷅ŋnda̍ wa̍.

⁷Ndu̍yɛ̍ o̍ ko̍ŋ kɔ̍ɔ̍lī, wāŋ pīāāndūāā tīāmāā[10] nda̍ a̍a̍ cha᷅l o̍ chīɛ̍i̍ Mɛ̄lɛ̄ka̍a̍ wa̍, chīɛ̄īlā nda̍ wa̍ ni᷄ŋ nda̍ŋ mbo̍ pēsī pēsī la̍ŋ kpo̍u̍. Ndu̍yɛ̍, dōmāla̍ wāŋnda̍ nda̍ a̍a̍ wo̍u̍nūŋ le̍ mɛ̄lɛ̄ka̍ ndāa̍ A̍si̍ɛ̍lūā sōōlūūwo̍ la̍ŋ, o̍ chīɛ̄īlā lāŋ wāŋ lāāndūāā nda̍ a̍a̍ bɛ̍ɛ̍ndīāā la̍ŋ nda̍ ā wa̍ la̍ŋ bɛ̄ɛ̄ndīa̍a̍ ni̍.

⁸Wānāā nda̍ a̍a̍ so̍lī sa̍lāla̍ŋ o̍ Mɛ̄lɛ̄ka̍ Ya̍a̍wɛ̄ɛ̄ lo̍, ma̍ wā o̍ chi̍e̍e̍ŋ yɛ̍ yɔ̍ŋ o̍ lɛ̄ŋndē Chu̍dāle̍ŋ ni᷄ŋ nda̍ kpo̍u̍, mi̍ Chōōsa̍yā o̍ hu᷅ŋ a̍ nda̍ kpo̍u̍ Chūlu̍sɛ̄lɛ̄m. O̍ ko̍ŋ kɔ̍ɔ̍lī, bā o̍ bā sōōlu̍u̍la̍ŋ lā wa̍ o̍ lɛ̄ŋndē Chu̍dāle̍ŋ ni᷄ŋ, mā lūām nyɛ᷅m chūŋ kɛ̄ndɔ᷄ŋ lo̍ŋ, chɔ̍ŋ Ɛ̄sīɔ̄ŋkɛ̍bɛ̄ chi̍e̍e̍ mbo̍ kūā Bɛ̄ɛ̄si̍ɛ̍bā chi̍e̍e̍, mi̍ Māsā Bɛ̍ndōo̍ Chōōsa̍yā tɛ̍ɛ̍mbūū la̍ŋ kpa̍ta̍ kpa̍ta̍. Ndu̍yɛ̍ o̍ ko̍ŋ kɔ̍ɔ̍lī, dīō kpākī nda̍ a̍a̍ ve̍e̍lū āā, Dīō kpāki̍ Chɔ̄ɔ̍sūāā wo̍ wo̍, ma̍āŋnda̍ wa̍ o̍ dīō kōŋ sōndōo̍ la̍ŋ, mi̍ Māsā Bɛ̍ndōo̍ Chōōsa̍yā pe̍sī pēsī la̍ŋ kpo̍u̍. Ndu̍yɛ̍ Chɔ̄ɔ̍sūāā ko̍ŋ ō ndu̍ o̍o̍ ta̍ŋgu̍l dīō kpākī kōŋ ndo̍, ndu̍ wa̍ māsa̍ chi̍o̍o̍ le̍ Chūlu̍sɛ̄lɛ̄m ni̍. Tē wāna̍ a̍a̍ lu̍ɛ̍ī dɔ̍ɔ̍ o̍ dīō kpāki̍ chi̍o̍o̍ pɛ̍, o̍ bā mīāllo̍ chōo̍ dīō kpāki̍ Chɔ̄ɔ̍sūāā ko̍ŋ ō wa̍ ni̍.

⁹Ndu̍yɛ̍ wānāā sōlīāā lāsa̍lāa̍ Mɛ̄lɛ̄ka̍a̍, ā nda̍ āā so̍lī ha̍ā sa̍lāla̍ŋ o̍ sōōlu̍u̍la̍ŋ nda᷅ŋ nda̍, nda̍ a̍a̍ chɛ᷅l nda̍ mī nda̍ a̍a̍ to̍sa̍ wa̍llo̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ ni᷄ŋ te̍. Kɛ̍ ndu̍yɛ̍, bēe̍dīi̍ wa̍ le̍ wānāā sōlīāā lāsa̍lāa̍ wo̍, ō nda̍ do̍ū yi̍i̍sīi̍ le̍ni̍ŋ te̍ wo̍, nda̍ bɛ̍ɛ̍ mī nda̍ a̍a̍ chɛ̍l nda̍ mā dē ndu̍ nda̍ nda̍ā lātūlū.

¹⁰Fo̍ndā lāsōōlu̍u̍ pi᷅lɛ̍ wa̍ o̍ lɛ̄ŋndē dɛ̍ŋgbɛ̍le̍ŋ Hi̍nɔ̄m dīōla̍ŋ āā To̍fɛ̍tī. Fo̍ndā lāsōōlu̍u̍wo̍ ho̍ō, lo̍ŋ wāŋnda̍ nda̍ a̍a̍ ku̍ā chu̍a̍u̍wāā ndāa̍ sa̍lālā lūāmāāla̍ŋ sōlīo̍o̍ o̍ mɛ̄lɛ̄ka̍ ndāa̍ Mo̍lɛ̍kī lo̍ ni̍. Mi̍ Māsā Bɛ̍ndōo̍ Chōōsa̍yā lo᷅ o̍ ko̍ŋ mbo̍ tɛ̄ɛ̄mbūū fo̍ndāa̍ ho̍ō. Mbo̍ tōsā wāŋnda̍ nda̍ a̍a̍ so̍lī lɛ̍ pūa̍a̍ ndāa̍, a̍ chūāūwāā ndāā wa᷅ŋ lāāndūa̍a̍ sa̍lālā lūāmāā la̍ŋ lo̍ŋ te̍.

¹¹Ndu̍yɛ̍ wāŋnda̍ Chu̍dā nyɛ̄m yɛ̍ yɛ̍ŋ nda̍ a̍a̍ so̍o̍lūū māā mɛ̄lɛ̄ka̍ā ndā wo̍ŋ, ō pīlɛ̍ wa̍ pāa̍le̍ŋ ni̍. Ndu̍yɛ̍ mi̍ māsāā bɛ̍ndūa̍a̍ Chu̍dā nda̍ a̍a̍ hɛ̍lī su̍a̍a̍ ma̍ kɛ̄sī nda̍ te̍ŋge̍le̍ŋ, lātūlu̍ a̍ nyɛ̄m nyāāna᷄ŋ su̍a̍a̍ ā nāŋ ndo̍ŋ ŋ̄ ti᷄ŋ, le̍ mɛ̄lɛ̄ka̍ ndāa̍ ho̍ō sōōlūūwo̍. Dīo̍ wa̍ le̍ lūɛ̄īyɔ̄ɔ̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ wo̍, bɛ̍ɛ̍ wa̍ o̍ dīō kōŋ sōndōo̍ wo̍, lo̍ŋ su̍a̍a̍ ha̍ā ā wa̍ ā kɛ̄sīāā ni̍. Wānā bɛ̍ndū pīlɛ̍ wa̍ dīōla̍ŋ āā Nātāŋ Mo̍lɛ̍kī, o̍ lu̍mūi̍ ndɔ̄ɔ̍ īkɛ̄i̍ kpe̍e̍kpe̍i̍ su̍a̍a̍ ha̍ā ā wa̍ ni̍. Mi̍ Māsā Bɛ̍ndōo̍ Chōōsa̍yā lo᷅ o̍ ko̍ŋ mbo̍ fāāŋīāā su̍a̍ā kāŋ lo̍ŋ kpo̍u̍, o̍ ko̍ŋ kɔ̍ɔ̍lī, nyɛ̄lā nyāāna᷄ŋnda̍ su̍a̍a̍ ā nāŋ la̍ŋ nda̍ŋ, mbo̍ lūmī la̍ŋ kpo̍u̍.

¹²O̍ ko̍ŋ kɔ̍ɔ̍lī, Māsā Bɛ̍ndōo̍ E̍ha̍a̍sī lu̍mūi̍ ndɔ̄ɔ̍ wa̍ o̍ chīɛ̄ī lēmāsāa̍ wo̍, ma̍āŋndā māsāā yɛ̍ yi̍a̍a̍ ke̍e̍ku̍ Chu̍dā wa̍ a̍ ta̍ŋgu̍l o̍ lu̍mūi̍ ko̍ŋ chōo̍ la̍ŋ ni̍, ma̍āŋndā Māsā Bɛ̍ndōo̍ Mānāa̍sē ndu̍ o̍o̍ ta̍ŋgu̍l o̍ la̍ūlā tīɔ̍ɔ̍ŋ nda̍ŋ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ la̍ŋ ni̍, mi̍ Māsā Bɛ̍ndōo̍ Chōōsa̍yā pe̍sī pēsī la̍ŋ, mbo̍ chūī la̍ŋ mu̍lu̍lu̍. O̍ ko̍ŋ kɔ̍ɔ̍lī, mbo̍ kūāndū pūūlū ko̍ŋ kpo̍u̍, mbo̍ kɔ̍ vi̍o̍ū ndu̍ o̍ lɛ̄ŋndē dɛ̍ŋgbɛ̍le̍ŋ ni᷄ŋ Ki̍di̍lɔ̄ŋ.

¹³Mi̍ Sɔ̍lɔ̍mɔ̄ŋ ndu̍ o̍o̍ ta̍ŋgūl fo̍ndāŋndā lāsōōlu̍u̍la̍ŋ Chūlu̍sɛ̄lɛ̄m bā pāa̍le̍ŋ lē chāŋndo̍, le̍ kɔ̄la̍ŋ o̍ Pēmbīī Ɔ̍līfīi̍ve̍ bā tōūwo̍ le̍ mɛ̄lɛ̄ka̍a̍ yɛ̍ yi̍a̍a̍ sōōlūūwo̍, mɛ̄lɛ̄ka̍a̍ Mɛ̄lɛ̄ka̍ ndu̍ o̍o̍ tu̍l yɛ̄le̍ŋ tūl bɛ̄ndōo̍ mi̍ wāŋnda̍ I̍sɔ̄lūɛ̄ī a̍ wa᷅ nda̍ sōōlūūwo̍ wa̍. Ndu̍yɛ̍ mɛ̄lɛ̄ka̍a̍ ndāā ka̍ŋ nda̍ wa̍ ha̍ā ni̍. Āsīta̍tɛ̄ɛ̄, ō wāŋnda̍ Sa̍i̍dɔ̄ŋ nda̍ a̍a̍ so̍o̍lūū wo̍, a̍ Chɛ̍mɔ̍sī, mɛ̄lɛ̄ka̍ wāŋnda̍ Mo̍wa̍bī nda̍ a̍a̍ so̍o̍lūū wo̍, a̍ Mo̍lɛ̍kī, mɛ̄lɛ̄ka̍ wāŋnda̍ A̍mɔ᷅ŋ nda̍ a̍a̍ so̍o̍lūū wo̍. O̍ ko̍ŋ kɔ̍ɔ̍lī, mi̍ Chōōsa̍yā o̍ tɛ̍ɛ̍mbūū fo̍ndāŋndā lāsōōlu̍u̍la̍ŋ kpo̍u̍.

¹⁴Sūŋgbu̍ma̍ wāŋnda̍ I̍sɔ̄lūɛ̄ī nda̍ a̍a̍ ta̍ŋgu̍l a̍ pōūta̍ŋ mā sōōlūū ma̍ŋ māā mɛ̄lɛ̄ka̍a̍ ndā wa̍ŋ, mi̍ Māsā Bɛ̍ndōo̍ Chōōsa̍yā pēsī pēsī ma̍ŋ wɔ̍ wɔ̍. O̍ ko̍ŋ kɔ̍ɔ̍lī, sūŋgbu̍ma̍ nda̍ a̍a̍ to̍o̍si̍a̍a̍ le̍ mɛ̄lɛ̄ka̍ nɔ̍ dīōla̍ŋ āā, A̍si̍ɛ̍lūā wo̍ sōōlūū wo̍ lo̍ŋ nda̍ŋ, mbo̍ kīīŋūū ma̍ŋ kpo̍u̍. Ndu̍yɛ̍ o̍ ko̍ŋ kɔ̍ɔ̍lī, fo̍ndāŋndā mɛ̄lɛ̄ka̍ā ndāā ka̍ŋ ā wa̍ la̍ŋ, mbo̍ pēī pāālā wāŋndā chīe̍e̍ya̍ lo̍ŋ cha̍ cha̍.[11]

¹⁵O̍ ko̍ŋ kɔ̍ɔ̍lī, Māsā Bɛ̍ndōo̍ Chɛ̄lōbo̍wām, po̍ Ne̍ba̍tī wo̍ o̍ fa̍ŋa̍ wāŋnda̍ I̍sɔ̄lūɛ̄ī o̍ nɛ̄i̍ tōnya̍a̍ chōo̍ mbo̍ tōsā ma̍ tōsā yɔ̄ŋ wɔ̄ɔ̍ŋndo̍ Mɛ̄lɛ̄ka̍ o̍ hɔ̄l lo̍, fo̍ndā lāsōōlu̍u̍ ndu̍ o̍o̍ ta̍ŋgu̍l Bɛ̍tɛ̄ɛ̄l wo̍, mi̍ Māsā Bɛ̍ndōo̍ Chōōsa̍yā o̍ tɛ̍ɛ̍mbūū ndu̍ kpo̍u̍. Ma̍āŋ wa̍ o̍ fo̍ndā kōŋ ndo̍ mbo̍ pēsī pēsī ma̍āŋ ko̍ŋ, ndu̍yɛ̍ o̍ ko̍ŋ kɔ̍ɔ̍lī, mbo̍ chūī pōūtā ndɔ̄la̍ŋ mu̍lu̍lu̍. O̍ ko̍ŋ kɔ̍ɔ̍lī, su̍ŋgbu̍le̍ nda̍ sīmi̍ le̍ mɛ̄lɛ̄ka̍ nɔ̍ dīōla̍ŋ āā A̍si̍ɛ̍lūā wo̍ sōōlūūwo̍ lo̍ŋ nde̍ŋ, mi̍ Māsā Bɛ̍ndōo̍ Chōōsa̍yā o̍ ki̍āŋ sūŋgbu̍le̍ le̍ŋ mbo̍ lūām.

¹⁶Ndu̍yɛ̍ fo̍ndā lāsōōlu̍u̍ Māsāa̍ bɛ̍ndōo̍ Chɛ̄lōbo̍wām o̍ bɛ̍ɛ̍ndi̍a̍a̍ ko̍ŋ ndo̍, sɛ̄īla̍ŋ lā wa̍ īkɛ̄i̍ lo̍ŋ. Bōōndi̍i̍ Māsā Bɛ̍ndōo̍ Chōōsa̍yā o̍ wa̍ fo̍ndāa̍ ho̍ō tɛ̄ɛ̄mbūūwo̍ ve̍, mɛ̄ɛ̍ o̍ mu̍li̍ŋ a̍ mākɔ̄ɔ̍, mbo̍ chā sɛ̄īla̍ŋ pēmbēi̍ chōo̍. O̍ ko̍ŋ, mbo̍ vīām wāŋnda̍ ma̍ kɔ̍ ka̍a̍līāā pāālā wāŋ vīlɛ̍i̍ya̍a̍ ka̍ŋ, ma̍ hūŋ a̍ la̍ŋ mbo̍ hu᷄ŋ lo᷅m nda̍ŋ o̍ ma̍āŋ kōŋ chōo̍. O̍ ko̍ŋ, mbo̍ tōsa̍ mī ma̍āŋ kōŋ ō sīmnu᷄ŋ fo̍ndāŋ nɔ̄ɔ̄lɛ̍i̍. O̍ ko̍ŋ, mi̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ dɔ̍ū sīndɛ̄ bu̍ɛ̍ī ndɔ̍ su̍a̍ā le̍ ndu̍ wo̍ o̍ sōndō, mbo̍ dīmī a̍ ma̍āŋndo̍ Bɛ̍tɛ̄ɛ̄l o̍kɔ̄ɔ̄ wo̍ ō chīŋā lāsōndō. Ndu̍yɛ̍ wāna̍ Mɛ̄lɛ̄ka̍ so̍ō ho̍ō a̍ ma̍āŋndo̍ ho̍ō o̍kɔ̄ɔ̄ wo̍, Bɛ̍tɛ̄ɛ̄l lo̍ŋ sɛ̄i̍ ndɔ̄ɔ̍ ō wa̍ ni̍. Mɛ̄ɛ̍ Chōōsa̍yā che᷅ sɛ̄i̍ fi̍nyāa̍ ho̍ō,

¹⁷mbo̍ nyūnā wāŋnda̍ āā, “Sɛ̄i̍ nɛ̄ɛ̍nɛ̍ cho̍ yɛ̄ ho̍ō?” Mi̍ wāŋnda̍ dīmu̍l ndu̍ āā, “Nyɛ̄ ŋ̄ tōsa̍ ho̍ō a̍ ma̍āŋndo̍ Bɛ̍tɛ̄ɛ̄l wo̍, wāna̍ Mɛ̄lɛ̄ka̍ chɛ̍ŋ si̍ndɛ̄ Chu̍dā mbo̍ hu᷄ŋ so̍ō a̍ ndu̍ o̍kɔ̄ɔ̄ wo̍ sɛ̄i̍ ndɔ̄ɔ̍ cho̍ ko̍ŋ ni̍.”

¹⁸Mi̍ Māsā Bɛ̍ndōo̍ Chōōsa̍yā di̍mūl nda̍ āā, “Mɛ̄ɛ̍ lā ma᷄l ndu̍ le̍nde̍ ki̍nɛ̍i̍, lā so̍lī pāālā ndɔ̄la̍ŋ te̍.” O̍ ko̍ŋ, wāna̍ Mɛ̄lɛ̄ka̍ kōŋ ni̍, wāna̍ su̍a̍ā le̍ Mɛ̄lɛ̄ka̍ wo̍ o̍ chɛ̍ŋ Sāme̍e̍līāā wo̍ ni̍, sɛ̄īla̍ ndāla̍ŋ ki̍nɛ̍i̍ ā kūmbi̍ la̍ŋ mā sōli̍ pāālā ndāla̍ŋ te̍.

¹⁹Ndu̍yɛ̍ mi̍ māsāā bɛ̍ndūa̍a̍ ke̍e̍ku̍ I̍sɔ̄lūɛ̄ī ya̍ nda̍ a̍a̍ ti̍ū fo̍ndāŋ nda̍ lāsōōlu̍u̍la̍ŋ tāŋgūllo̍ o̍ chi̍o̍o̍ŋ Sāme̍e̍līāā. O̍ ko̍ŋ, ma̍ tōsā mi̍ Mɛ̄lɛ̄ka̍ Ya̍a̍wɛ̄ɛ̄ o̍ du̍a̍u̍nu᷄ŋ tu̍mbe̍ a̍ I̍sɔ̄lūɛ̍i̍ya̍. Bā o̍ bā sōōlu̍u̍la̍ la̍ŋ lā wa̍, mi̍ Māsā Bɛ̍ndōo̍ Chōōsa̍yā o̍ pe̍sī pēsī la̍ŋ mbo̍ tɛ̄ɛ̄mbūū la̍ŋ kpo̍u̍, mɛ̄ɛ̍ o̍ tɛ̍ɛ̍mbu̍u̍ la᷅ŋ Bɛ̍tɛ̄ɛ̄l yɛ̍.

²⁰O̍ ko̍ŋ kɔ̍ɔ̍lī, wānāā sōlīāā lāsa̍lāa̍ wa̍ o̍ sōōlu̍u̍la̍ la̍ŋ, mā sōlī sa̍lāla̍ŋ o̍ nyɛ̄m mu᷅ŋ ndo̍ wa̍, mbo̍ dīū nda̍ kpo̍u̍, ō o̍ bi̍ī ko̍ ō dīī ndu̍ o̍ ma̍āŋ o̍ so̍lī sa̍lāa̍ wo̍ chōo̍. Ndu̍yɛ̍ o̍ ko̍ŋ kɔ̍ɔ̍lī, mbo̍ chūā pāālā wāŋndā chīe̍e̍ya̍ mbo̍ lūām nda̍ŋ o̍ ma̍āŋndā lāŋ chōo̍. Mɛ̄ɛ̍ Māsā Bɛ̍ndōo̍ Chōōsa̍yā o̍ che᷅ māā ō chīi̍ nyɛ̄ o̍ nyɛ̄ tɛ̄ɛ̄mbu̍u̍, mbo̍ mīīŋgū ni̍ko̍ Chūlu̍sɛ̄lɛ̄m.

²¹O̍ ko̍ŋ kɔ̍ɔ̍lī, mi̍ Māsā Bɛ̍ndōo̍ Chōōsa̍yā di̍mūl wāŋnda̍ Chu̍dā kpo̍u̍, āā, “Lā nɔ̄ mī lā bīī bɔ̄ŋa᷅ŋndo̍ le̍ lōōnɔ᷄ŋndo̍ a̍ hīōūwɔ̄ɔ̄ chōo̍ wo̍ o̍kɔ̄ɔ̄, mɛ̄ɛ̍ i̍ cho̍ ī pōōnyīa̍ŋ o̍ ya̍u̍ kpe̍ma̍a̍ ni᷄ŋ yɛ̍, le̍ mī lā ke̍ Mɛ̄lɛ̄ka̍ Ya̍a̍wɛ̄ɛ̄ o̍ cho̍ Mɛ̄lɛ̄ka̍ nyāa̍ wo̍ bɛ̄ɛ̄le̍ŋ.”

²²Ndu̍yɛ̍ ō fūla̍ o̍ te̍le̍ŋ māsāā bɛ̍ndūa̍a̍ kɔ̍ɔ̍sā a̍ wāŋnda̍ wa̍ ā wa̍ māsāa̍ lɛ̄ŋndē I̍sɔ̄lūɛ̍i̍le̍ŋ chōo̍ wo̍ kɔ̄ɔ̄lī, kɛ̍ chɔ᷅ŋ ni᷅ŋ a̍ bōōndi̍i̍ māsāā bɛ̍ndūa̍a̍ ā mīīŋgu̍ lɛ̄ŋndē I̍sɔ̄lūɛ̍i̍le̍ŋ chīla̍ŋ ndo̍ mbo̍ bīya᷅ŋ a̍ te̍le̍ŋ Chōōsa̍yā wo̍, bɔ̄ŋa᷅ŋ su̍u̍ wa̍ā le̍nde̍ ndu̍ o̍o̍ bi̍i̍nu̍ŋ ndɔ̍ I̍sɔ̄lūɛ̄ī le̍.

²³Kɛ̍ mɛ̄ɛ̍ Māsā Bɛ̍ndōo̍ Chōōsa̍yā o̍ si̍mnu᷄ŋ ma̍sāa̍ I̍sɔ̄lūɛ̍i̍, wɔ̄sī o̍ chi̍ŋa̍ wɔ̄sīla̍ŋ lā ŋɔ̄ma̍a̍ o̍ lēmāsā wo̍, mbo̍ tōsā mi̍ wāŋnda̍ kpo̍u̍ a̍ chu̍ūŋgi̍āŋ Chūlu̍sɛ̄lɛ̄m le̍ bɔ̄ŋa᷅ŋndo̍ ho̍ō bīyɔ̄ɔ̍ le̍ Mɛ̄lɛ̄ka̍ Ya̍a̍wɛ̄ɛ̍ bɛ̄ɛ̄le̍ŋ kīo̍o̍.

²⁴O̍ ko̍ŋ kɔ̍ɔ̍lī, wānāa̍ wa̍ wānāā vīāmāā lāyāwāa̍ wa̍ ni̍, wānāā ŋ̄wāŋ vīlɛ̍i̍ya̍ ni̍, o̍ ko̍ŋ kɔ̍ɔ̍lī, a̍ wānāa̍ to̍sā sɔ̍ɔ̍ŋ wɔ̍ɔ̍ŋ Mɛ̄lɛ̄ka̍ tu᷄l yɛ̄le̍ŋ tūl bɛ̄ndōo̍ wo̍ŋ nda̍, nda̍ kpo̍u̍, mi̍ Māsā Bɛ̍ndōo̍ Chōōsa̍yā o̍ tu̍a̍ū nda̍, mbo̍ sōlī nda̍ Chūlu̍sɛ̄lɛ̄m chi̍e̍e̍, a̍ o̍ lɛ̄ŋndē Chu̍dāle̍ŋ ni᷄ŋ kpo̍u̍. O̍ ko̍ŋ kɔ̍ɔ̍lī, pīɔ̄māā lāyu̍ŋgu̍a̍a̍ nda̍ a̍a̍ nɔ̍ chīɛ̄īla̍ŋ ni᷄ŋ nda̍, mbo̍ pēsī pēsī nda̍ kpo̍u̍. Nyɛ̄ o̍ nyɛ̄ wāŋnda̍ wa̍ sōōlūūwo̍ māā mɛ̄lɛ̄ka̍ā ndā, mbo̍ tɛ̄ɛ̄mbūū mu̍ŋ kpo̍u̍, ō pīlɛ̍ bɛ̍ɛ̍ ō mɛ̄i̍ le̍. Yāu̍ lāsāwā wāna̍ so̍lī sa̍lāa̍ o̍ Mɛ̄lɛ̄ka̍ lo̍ wo̍ Hɛ̄li̍kīāā o̍ sa̍a̍lu̍ŋ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ ni᷄ŋ ndo̍, sāwā o̍ sāwa̍ wa̍ o̍ yāu̍ ko̍ŋ ni̍, mi̍ Māsā Bɛ̍ndōo̍ Chōōsa̍yā to̍sā mi̍ wāŋnda̍ tōsā nyɛ̄ la̍ di̍mi̍ wo̍.

²⁵Māsāā bɛ̍ndūa̍a̍ ke̍e̍ku̍ I̍sɔ̄lūɛ̍i̍ya̍ tɛ̄ɛ̄ŋ ki̍nɛ̍i̍ ya̍, a̍ ke̍e̍ku̍ Chōōsa̍yā lāchī wa̍ ni̍, a̍ mɛ̍ɛ̍lu̍ sīmnɔ᷄ŋ ma̍sāa̍ ndu̍ kɔ̄ɔ̄lī wa̍ ni̍, māsā o̍ māsā ve̍ mbō sāāŋgi̍a̍l Mɛ̄lɛ̄ka̍ Ya̍a̍wɛ̄ɛ̄ a̍ kɔ̄l ndɔ̄ɔ̍ kpo̍u̍, mbō tōsa̍ nyɛ̄ o̍ di̍mu̍l ndu̍ wo̍ a̍ kpāāya̍ ndɔ̍ɔ̍ ndu̍yɛ̍ a̍ nyi̍nā ndɔ̄ɔ̍, kpo̍u̍, māā Chōōsa̍yā le̍. Nyɛ̄ o̍ nyɛ̄ sāwāla̍ Mɛ̄lɛ̄ka̍ ke̍ Mūu̍sē la̍ŋ lā dīmi̍ le̍ tōsāa̍, mi̍ Māsā Bɛ̍ndōo̍ Chōōsa̍yā to̍sā ndu̍ kpo̍u̍.

²⁶Kɛ̍ ndu̍yɛ̍ a̍ ko̍ŋ kpo̍u̍, Mɛ̄lɛ̄ka̍ Ya̍a̍wɛ̄ɛ̄ ndu̍ o̍o̍ pɔ̍lu̍l lɔ̍ kɔ᷅l a̍ wāŋnda̍ Chu̍dā le̍. Tu̍mbe̍ ka̍lā ka̍lā o̍ dɔ̄ɔ̄nu᷄ŋ a̍ nda̍, le̍ nyɛ̄ Māsā Bɛ̍ndōo̍ Mānāa̍sē o̍ to̍sa̍ a̍ ndu̍ wo̍, ō wa̍ wɔ̄ a̍ tu̍mbe̍ ko̍ŋ kɛ᷅.

²⁷Mi̍ Mɛ̄lɛ̄ka̍ Ya̍a̍wɛ̄ɛ̄ di̍mī āā, “Mɛ̄ɛ̍ mī to̍sa̍ a̍ lɛ̄ŋndē Chu̍dāle̍ŋ mɛ̄ɛ̍ ya̍ I̍ to̍sa̍ a̍ lɛ̄ŋndē I̍sɔ̄lūɛ̍i̍le̍ŋ yɛ̍. Wānā o̍ wāna̍ cho̍ Chu̍dā, I̍ cho̍ nda̍ hūnɔ̄ɔ̄ bāsɔ̄ɔ̄ tɛ̍ɛ̍, mī fa̍ŋa̍ nda̍ ya̍ o̍ hɔ̄l. Mi̍ chē bɛ̍ɛ̍ mi̍ hɛ̍lī Chūlu̍sɛ̄lɛ̄m māā chi̍e̍e̍ ni̍, mi̍ di̍mī māā chīɛ̄ī ni̍ nda̍ sōōlūū ya̍ wo̍, māā lo̍ŋ o̍ wa᷅ ni̍ŋ le̍ fɛ̍ɛ̍ŋ a̍ fɛ̍ɛ̍ŋ ni̍, kɛ̍ I̍ cho̍ ndu̍ hūnɔ̄ɔ̄ kɛ̄ɛ̄ ō ve᷅ lɛ̍ chi̍e̍e̍ nī le̍.”

²⁸Sɔ̄ɔ̍ŋ tɔ᷅ŋ chēle̍ŋ yɔ̍nu̍ŋ o̍ māsāle̍ Chōōsa̍yāle̍ŋ bɛ̄ŋgu̍ wo̍ŋ ki̍nɛ̍i̍, a̍ nyɛ̄ o̍ nyɛ̄ o̍ to̍sa̍ o̍ māsāle̍ ndɔ̄le̍ŋ ni̍ŋ, mu̍ŋ kpo̍u̍, ŋ̄ chō ŋ̄ pōōnyīāā o̍ yāu̍ sɔ̄ɔ̍ŋ pa̍a̍ndu̍ cho̍ a̍ māsāā bɛ̍ndūa̍a̍ Chu̍dā o̍kɔ̄ɔ̄ wo̍ ni᷄ŋ.

²⁹Mi̍ ī yɔ̄nu᷄ŋ te̍le̍ŋ pu᷅m, mi̍ Māsā Bɛ̍ndōo̍ Ni̍kō, o̍ wa̍ I̍chi̍pī wo̍ ō chūā pūa̍a̍ ndūa̍a̍ chɔ̄ūwa̍, ma̍ kūā Yūfi̍lu̍a̍tīī o̍ pēēlo̍, le̍ mā kɔ̍ ma̍lā māsā bɛ̍ndōo̍ Āsi̍i̍līāā sɔ̍ŋgɔ̄ɔ̍ a̍ wāŋnda̍ Chu̍dā. O̍ ko̍ŋ, mi̍ Māsā Bɛ̍ndōo̍ Chōōsa̍yā chu̍ā pūa̍a̍ chɔ̄ūwa̍ ma̍ kɔ̍ chi᷅ŋa̍la᷅ŋ nda̍ Mɛ̍ki̍dɔ̄ɔ̄ chi̍e̍e̍. Kɛ̍ mi̍ ī yɔ̄nu᷄ŋ mi̍ Māsā Bɛ̍ndōo̍ Ni̍kō o̍ di̍ī Māsā Bɛ̍ndōo̍ Chōōsa̍yā o̍ sɔ̍ŋgɔ̄ɔ̍ ho̍ō ni᷄ŋ.

³⁰O̍ ko̍ŋ, mi̍ pūa̍a̍ chɔ̄ūwāa̍ Māsā Bɛ̍ndōo̍ Chōōsa̍yā wa̍ ā chūā Chōōsa̍yā Mɛ̍ki̍dɔ̄ɔ̄ chi̍e̍e̍ lo̍ŋ nāa̍ nda̍ dīī ndu̍ wa̍, ma̍ dūāū ndu̍ o̍ nyɛ̄ nyāāna᷄ŋ su̍a̍a̍ ā nāŋ ndo̍ ni᷄ŋ, ma̍ mīīŋgū a̍ ndu̍ Chūlu̍sɛ̄lɛ̄m chi̍e̍e̍, ma̍ kɔ̍ chɔ᷅ ndu̍ lo̍ŋ o̍ sɛ̄i̍ ndɔ̍ būūlōo̍ ni᷄ŋ. O̍ ko̍ŋ kɔ̍ɔ̍lī, mi̍ wāŋnda̍ Chu̍dā a̍ hɛ̍lī Chōwāha̍a̍sī, po̍ Chōōsa̍yā wo̍, ma̍ tālā ndu̍ chūɛ̄īya̍ŋ o̍ lēbōl le̍ mbō mīīŋgu̍ māsā bɛ̍ndōo̍ o̍ fōōfo̍ fi̍nyā ndɔ̄ɔ̍.

³¹Chōwāha̍a̍sī o̍ wa̍ wɔ̄sīla̍ŋ bi̍dīi̍ŋ a̍ lā yāa̍, mbo̍ sīmnu᷄ŋ ma̍sā bɛ̍ndōo̍ le̍ Chu̍dā. Ndu̍yɛ̍ mbo̍ tōsā māsāle̍ŋ Chūlu̍sɛ̄lɛ̄m chi̍e̍e̍ le̍ lɛ̄ŋndē Chu̍dāle̍ŋ le̍ pāŋgo̍ŋ ŋ̄ ŋgāa̍. Chōwāha̍a̍sī ko̍ŋ yɛ̄, kāla̍ ndɔ̍ wa̍ Hāmu̍tāl ni̍, Chɛ̄lūīma̍yā[12] wānā wa̍ā Li̍bi̍nāā chi̍e̍e̍ chūā ndɔ̄ɔ̍.

³²Kɛ̍ mi̍ Chōwāha̍a̍sī to̍sā yɔ̄ŋ wɔ̄ɔ̍ŋndo̍ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l. Ka̍ālā wɔ̄ɔ̍ŋndā fi̍nyāā ndūāā ma̍māa̍ ā wa̍ tōsāa̍ la̍ŋ, ndu̍ bɛ̍ɛ̍ ka̍ālā lāŋ ko̍ni̍ o̍ to᷅l kɔ̄ɔ̄lī ni̍.

³³Kɛ̍ ō ku̍e̍ a̍ te̍le̍ŋ vi̍lɛ̄ī le̍, mi̍ māsāle̍ ndɔ̄le̍ŋ lē mɛ̄ɛ̄lū. Mɛ̄ɛ̍ o̍ si̍mnu᷄ŋ ma̍sāa̍, ō chu̍e̍ te̍le̍ŋ vi̍lɛ̄ī le̍ mi̍ Māsā Bɛ̍ndōo̍ Ni̍kō, māsāa̍ le̍ I̍chi̍pī ō bīī ndu̍ Lu̍i̍bi̍lā chi̍e̍e̍, o̍ lɛ̄ŋndē Ha̍ma̍tīle̍ŋ ni᷄ŋ. O̍ ko̍ŋ, mi̍ Māsā Bɛ̍ndōo̍ Ni̍kō o̍ to̍sā Chōwāha̍a̍sī mi̍i̍ŋgu̍ lɛ̍ māsāa̍ Chu̍dā le̍. O̍ ko̍ŋ kɔ̍ɔ̍lī, mbo̍ tōsā mi̍ wāŋnda̍ Chu̍dā a̍ wa᷅ ndu̍ ni᷅ŋ pāāwāa̍ mālɔ̄ɔ̍ o̍ bā. Wɔ̄sī o̍ wɔ̄sī wāŋnda̍ Chu̍dā nda̍ a̍a̍ ma̍l pāāwāa̍ ka̍ni̍ŋ hu̍mbo᷄ŋ lūsu̍llo̍ pa᷅ŋnda̍ŋ wāa̍la̍ŋ lā ŋɔ᷄mmɛ̍ū, a̍ kɛ̄mɔ̄ɔ̍ lē ŋūɛ̍ɛ̍nu̍ (7,500) a̍ ko̍o̍līi̍yo̍ŋ lūsu̍llo̍ pa᷅ŋnda̍ŋ be̍le̍-ŋɔ̍mmɛ̍ū a̍ lā ŋūɛ̍ɛ̍nu̍.

³⁴O̍ ko̍ŋ kɔ̍ɔ̍lī, mi̍ Māsā Bɛ̍ndōo̍ Ni̍kō o̍ hɛ̍lī pūa̍a̍ Chōōsa̍yā wa̍ ō pīlɛ̍, dīōla̍ŋ āā Īlīa̍a̍kīm, mbo̍ sīīŋgūū ndu̍ māsā bɛ̍ndōo̍ o̍ fōōfo̍ Chōōsa̍yā fi̍nyā ndā wo̍. Ndu̍yɛ̍ o̍ ko̍ŋ kɔ̍ɔ̍lī, mbo̍ fāŋā ndu̍ Īlīa̍a̍kīm nda̍ŋ chōo̍, mbo̍ kē ndu̍ ni᷅ŋ dīōla̍ŋ āā, Chɛ̄hōwa̍kīm. O̍ ko̍ŋ kɔ̍ɔ̍lī, mi̍ Māsā Bɛ̍ndōo̍ Ni̍kō o̍ kūā a̍ Māsā Bɛ̍ndōo̍ Chōwāha̍a̍sī o̍ chɛ̄le̍ŋ ni᷄ŋ I̍chi̍pī. Chōwāha̍a̍sī o̍ lo̍ ni᷅ŋ o̍ chɛ̄lē lēŋ ni᷄ŋ mbo̍ wū.

³⁵Wɔ̄sī o̍ wɔ̄sī Māsā Bɛ̍ndōo̍ Chɛ̄hōwa̍kīm o̍ wa̍ Māsā Bɛ̍ndōo̍ Ni̍ko̍ pāāwāa̍ mālɔ̄ɔ̍ o̍ bā. Mbo̍ pīɔ̄ū wāŋnda̍ nyɛ̄ sɔ̄lāa̍ kpɛ̍ kpɛ̍ mɛ̄ɛ̍ wānā pi᷅lɛ̍ ndu̍ o̍o̍ yɔ̍ŋgū le̍ mī nyɛ̄ sɔ̄lāā Māsā Bɛ̍ndōo̍ Ni̍kō o̍ ke̍lū nda̍ chōo̍ le̍ yɔ̄ŋgōo̍ wɔ̄sī o̍ wɔ̄sī wo̍ ō chīŋa̍ yɛ̍. Ndu̍yɛ̍ mɛ̄ɛ̍ wāŋndo̍ ndu̍ o̍o̍ nɔ̍ o̍ bā yɛ̍, le̍nde̍ ndu̍ o̍o̍ ki̍lūl ndu̍ nyɛ̄ sɔ̄lāa̍ le̍ yɔ̄ŋgōo̍ ni̍.

³⁶Chɛ̄hōwa̍kīm o̍ wa̍ wɔ̄sīla̍ŋ bi̍dīi̍ŋ a̍ lā ŋūɛ̍ɛ̍nu̍, mbo̍ sīmnu᷄ŋ ma̍sāa̍ le̍ Chu̍dā. Ndu̍yɛ̍ mbo̍ tōsā māsāle̍ŋ Chūlu̍sɛ̄lɛ̄m chi̍e̍e̍ le̍ lɛ̄ŋndē Chu̍dāle̍ŋ le̍ wɔ̄sīla̍ŋ tɔ̍ a̍ ō pīlɛ̍. Chɛ̄hōwa̍kīm ko̍ŋ yɛ̄, kāla̍ ndɔ̍ wa̍ Sɛ̍bi̍dāā ni̍, Pɛ̄da̍a̍yā wānā wa̍ā Lu̍māā chi̍e̍e̍ chūā ndɔ̄ɔ̍.

³⁷Kɛ̍ Chɛ̄hōwa̍kīm bɛ̍ɛ̍ mbo̍ tōsā yɔ̄ŋ wɔ̄ɔ̍ŋndo̍ Mɛ̍lɛ̄ka̍ Ya̍a̍wɛ̄ɛ̄ o̍ hɔ̄l. Ka̍ālā wɔ̄ɔ̍ŋndā fi̍nyāā ndūa̍a̍ ma̍māa̍ ā wa̍ tōsāa̍ la̍ŋ, ndu̍ bɛ̍ɛ̍ mbo̍ bīī mbo̍ tūāl ka̍ālā lāŋ kɔ̄ɔ̄lī.