Read Southern Kisi Māsāā Bɛ̍ndūāā Di̍i̍ŋ Ndūa̍a̍ 24 Bible Online

Māsāā Bɛ̍ndūāā Di̍i̍ŋ Ndūa̍a̍ 24 - Southern Kisi bible

Māsāā Bɛ̍ndūāā Di̍i̍ŋ Ndūa̍a̍ 24

¹Mi̍ ī yɔ̄nu᷄ŋ a̍ te̍le̍ŋ Chɛ̄hōwa̍kīm o̍ wa̍ māsā bɛ̍ndōo̍ Chu̍dā wo̍, mi̍ Māsā Bɛ̍ndōo̍ Nābi̍u̍kānɛ̍ɛ̍sā, māsāa̍ le̍ Ba̍bi̍lɔ̄ŋ ō chūā pūa̍a̍ ndūa̍a̍ chɔ̄ūwa̍, mbo̍ hu᷄ŋ de᷅l lɛ̄ŋndē Chu̍dāle̍ŋ chōo̍ a̍ sɔ̍ŋgɔ̄ɔ̍. Ndu̍yɛ̍ mbo̍ yām lɛ̄ŋndē Chu̍dāle̍ŋ, mbo̍ tōsā mi̍ Māsā Bɛ̍ndōo̍ Chɛ̄hōwa̍kīm o̍ wa᷅ ni᷅ŋ ndu̍ o̍ bā bɛ̄ŋgu̍. Le̍ wɔ̄sīla̍ŋ lā yāa̍ Māsā Bɛ̍ndōo̍ Chɛ̄hōwa̍kīm o̍ wa̍ Māsā Bɛ̍ndōo̍ Nābi̍u̍kānɛ̍ɛ̍sā o̍ bā bɛ̄ŋgu̍, mbō sāāŋgīāl ndu̍. Kɛ̍ mɛ̄ɛ̍ wɔ̄sīlā yāa̍la̍ la̍ŋ lā hīo̍u̍, mi̍ Māsā Bɛ̍ndōo̍ Chɛ̄hōwa̍kīm o̍ si̍mūl Māsā Bɛ̍ndōo̍ Nābi̍u̍kānɛ̍ɛ̍sā, mbo̍ fūlā ndu̍ o̍ bā bɛ̄ŋgu̍.

²A̍ te̍le̍ŋ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ vi̍ām wānāā dɛ̍nɛ̍ wɔ̄ɔ̍ŋāa̍ ba̍lū ku̍ndāla̍ŋ a̍ nyɛ̄m chɔ̄ūwo̍ŋ o̍ lābā le̍ wāŋnda̍ kēīyo̍ dēlɔ̄ɔ̍ chōo̍, mā pūŋgā nyɛ᷅m nda̍ŋ nda̍ fūlāa̍ Ba̍bi̍lɔ̄ŋ, a̍ Si̍i̍lūīāŋ, a̍ Mo̍wa̍bī, a̍ A̍mɔ᷅ŋ le̍ mā hu᷄ŋ de᷅l lɛ̄ŋndē Chu̍dāle̍ŋ chōo̍ mā tɛ̄ɛ̄mbu̍u̍ le̍ŋ kpo̍u̍ mɛ̄ɛ̍ o̍ di̍mi̍ yɛ̍. Ndu̍yɛ̍, nyɛ̄ Mɛ̄lɛ̄ka̍ dɔ̄ū sīndɛ̄ bu̍ɛ̍i̍yāā ndūa̍a̍ su̍a̍ā le̍ ndu̍ wa̍ o̍ lāsōndō ma̍ dīmī wo̍ ndu̍ wa̍ ko̍ŋ ni̍.

³Tūu̍ Mɛ̄lɛ̄ka̍a̍ Ya̍a̍wɛ̄ɛ̄ wo̍ kpe̍e̍kpe̍i̍ wa̍ ni̍, le̍ mī ndu̍ o̍o̍ tɛ̍ɛ̍mbu̍u̍ wāŋnda̍ Chu̍dā, mbō bāsu̍ nda̍ tɛ̍ɛ̍ ō pīlɛ̍ bɛ̍ɛ̍ ō mɛ̍ī le̍, nyɛ̄ kōŋ o̍ ma̍l nda̍ ya̍a̍mɔ̍ɔ̍wa̍ o̍ bā ni̍. Kāni̍ fo̍ndōle̍, le̍ yɔ̄ŋ wɔ̄ɔ̍ŋ bɛ̍ndū Māsā Bɛ̍ndōo̍ Mānāa̍sē o̍ to̍sa̍ wo̍,

⁴tāāma̍ fa̍ū le̍ wānāā o̍ di̍u̍ dīū bɛ̄ndōo̍ Chūlu̍sɛ̄lɛ̄m chi̍e̍e̍ o̍ fo̍ndō fu̍u̍wo̍ chōo̍, mi̍ kōo̍ma̍ nda᷄ŋ mā kūā kōŋgi̍la̍ŋ nda̍. Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mī māā ō me᷅l Māsā Bɛ̍ndōo̍ Mānāa̍sē le̍ yɔ̄ŋndā wɔ̄ɔ̍ŋndā o̍ to̍sa̍ la̍ŋ te̍.

⁵Sɔ̄ɔ̍ŋ tɔ᷅ŋ chēle̍ŋ yɔ̍nu̍ŋ o̍ māsāle̍ŋ Chɛ̄hōwa̍kīm nde̍ŋ bɛ̄ŋgu̍ wo̍ŋ ki̍nɛ̍i̍, a̍ nyɛ̄ o̍ nyɛ̄ o̍ to̍sa̍ o̍ māsāle̍ ndɔ̄le̍ŋ ni̍ŋ, mu̍ŋ kpo̍u̍ ŋ̄ chō ŋ̄ pōōnyīāā o̍ yāu̍ sɔ̄ɔ̍ŋ pa̍a̍ndu̍ cho̍ a̍ māsāā bɛ̍ndūa̍a̍ Chu̍dā o̍kɔ̄ɔ̄ wo̍ ni᷄ŋ.

⁶O̍ ko̍ŋ kɔ̍ɔ̍lī, mi̍ Māsā Bɛ̍ndōo̍ Chɛ̄hōwa̍kīm o̍ wu᷅. Mɛ̄ɛ̍ o̍ vi᷅, mi̍ Chɛ̄hōwa̍chīŋ po̍ ndɔ̄ o̍ mi̍i̍ŋgū māsā bɛ̍ndōo̍ o̍ fōōfo̍ ndɔ̄ɔ̍.

⁷Ndu̍yɛ̍ lɛ̄ŋndē Chu̍dāle̍ŋ kpo̍u̍, māsā bɛ̍ndōo̍ I̍chi̍pī o̍ bā bɛ̄ŋgu̍ le̍ wa̍ pāāndū ni̍, chɔ̍ŋ Yūfi̍lu̍a̍tīī o̍ pēēlo̍, mbo̍ kɔ̍ mɛ̍ɛ̍lū a̍ pēē pɔ̍mbɔ̍ wa̍ o̍ pɛ̄ŋgu̍la̍ŋ a̍ lɛ̄ŋndē I̍chi̍pīle̍ŋ ndo̍. Kɛ̍ mi̍ Māsā Bɛ̍ndōo̍ Ba̍bi̍lɔ̄ŋ o̍ chu̍ā ni᷅ŋ lɛ̄ŋnde̍ŋ nde᷅ŋ kpo̍u̍, mi̍ lē wā le̍ ndu̍. O̍ ko̍ŋ, Māsāa̍ I̍chi̍pī bɛ̍ɛ̍ ndu̍ o̍o̍ me̍lnūŋ ndɛ̍ I̍chi̍pī māā pāāndū mbō kūɛ̄ a̍ sɔ̍ŋgɔ̍ɔ̍ o̍ lɛ̄ŋndē Chu̍dāle̍ŋ ni᷄ŋ te̍.

⁸Chɛ̄hōwa̍chīŋ, o̍ wa̍ wɔ̄sīla̍ŋ tɔ̍ a̍ lā ŋɔ̄ma̍a̍, mbo̍ sīmnu᷄ŋ ma̍sāa̍ le̍ Chu̍dā. Ndu̍yɛ̍ o̍ tōsa̍ māsāle̍ŋ Chūlu̍sɛ̄lɛ̄m chi̍e̍e̍ le̍ lɛ̄ŋndē Chu̍dāle̍ŋ le̍ pāŋgo̍ŋ ŋ̄ ŋgāa̍. Ndu̍yɛ̍ Chɛ̄hōwa̍chīŋ ko̍ŋ kāla̍ ndɔ̍ wa̍ Nɛ̄hūsi̍tā ni̍, Ɛ̄līna̍tāŋ, wānā wa̍ā Chūlu̍sɛ̄lɛ̄m chi̍e̍e̍ chūā ndɔ̄ɔ̍.

⁹Kɛ̍ Chɛ̄hōwa̍chīŋ bɛ̍ɛ̍ mbo̍ tōsā yɔ̄ŋ wɔ̄ɔ̍ŋndo̍ Mɛ̍lɛ̄ka̍ Ya̍a̍wɛ̄ɛ̄ o̍ hɔ̄l. Ka̍ālā wɔ̄ɔ̍ŋndā fi̍nyā ndɔ̄ wa̍ tōsāa̍ la̍ŋ, ndu̍ bɛ̍ɛ̍ la̍ŋ ko̍ni̍ o̍ to᷅l kɔ̄ɔ̄lī ni̍.

¹⁰Mɛ̄ɛ̍ Chɛ̄hōwa̍chīŋ o̍ si̍mnu᷄ŋ ma̍sāa̍ ō bēndu̍ a̍ ti᷅ŋ te̍, mi̍ Māsā Bɛ̍ndōo̍ Nābi̍u̍kānɛ̍ɛ̍sā o̍ wa̍ Ba̍bi̍lɔ̄ŋ ndo̍ ō vīām pūa̍a̍ ndūa̍a̍ chɔ̄ūwa̍, le̍ mā kɔ̍ chi᷅ŋa̍la᷅ŋ Chūlu̍sɛ̄lɛ̄m a̍ sɔ̍ŋgɔ̄ɔ̍. Ndu̍yɛ̍ ma̍ kɔ̍ ba̍lū Chūlu̍sɛ̄lɛ̄m ma̍ dūāū ndu̍ o̍ pi̍ŋndo̍ ni᷄ŋ kpɔ̍kɔ̍su̍.

¹¹O̍ ko̍ŋ kɔ̍ɔ̍lī, mi̍ Nābi̍u̍kānɛ̍ɛ̍sā pi̍la̍ o̍ ma̍lnu᷄ŋ mbo̍ kūā Chūlu̍sɛ̄lɛ̄m, pūa̍a̍ ndūa̍a̍ chɔ̄ūwa̍ ā wa̍ chi̍o̍o̍ ā bālāā le̍nde̍ kpɔ̍kɔ̍su̍, ma̍ dūāū ndu̍ o̍ pi̍ŋndo̍ ni᷄ŋ.

¹²O̍ ko̍ŋ, Māsā Bɛ̍ndōo̍ Chɛ̄hōwa̍chīŋ ni̍, kāla̍ ndɔ̄ ni̍, bu̍ɛ̍i̍yāa̍ wa̍ ndu̍ wa̍llo̍ o̍ bā bɛ̄ŋgu̍ wa̍ ni̍, a̍ wānāā bɛ̄ndūa̍a̍ wa̍ ndu̍ o̍ bā bɛ̄ŋgu̍ wa̍, a̍ pūa̍a̍ chɔ̄ūwāa̍ wa̍ o̍ chīɛ̄ī lēmāsāa̍ ni᷄ŋ nda̍, nda̍ kpo̍u̍ ma̍ kɔ̍ yɔ̍ŋgu᷄ŋ o̍ Māsā Bɛ̍ndōo̍ Nābi̍u̍kānɛ̍ɛ̍sā lo̍, ho̍ō Ba̍bi̍lɔ̄ŋ. O̍ ko̍ŋ, nda̍ kpo̍u̍ mi̍ Māsā Bɛ̍ndōo̍ Nābi̍u̍kānɛ̍ɛ̍sā o̍ chu̍ā nda̍ mbo̍ kūā a̍ nda̍ o̍ chɛ̄le̍ŋ ni᷄ŋ Ba̍bi̍lɔ̄ŋ. O̍ ko̍ŋ kɔ̍ɔ̍lī, nyɛ̄ o̍ nyɛ̄ sɔ̄lāa̍ wa̍ o̍ chīɛ̍i̍ Mɛ̄lɛ̄ka̍a̍ ni᷄ŋ, a̍ o̍ chīɛ̄ī lēmāsāa̍ ni᷄ŋ, mi̍ māsā bɛ̍ndōo̍ Ba̍bi̍lɔ̄ŋ o̍ chu̍ā ndu̍ kpo̍u̍, mbo̍ kūānu᷄ŋ a̍ ndu̍. Wɔ̄sī Nābi̍u̍kānɛ̍ɛ̍sā o̍ chi̍ŋa̍ wɔ̄sīla̍ŋ lā ŋɔ̄ma̍a̍ o̍ lēmāsā Ba̍bi̍lɔ̄ŋ ndo̍, wɔ̄sī kōŋ sūɛ̍i̍ he̍ī ī yɔ̄nu̍ŋ ni̍. Ndu̍yɛ̍ mi̍ ī yɔ̄nu᷄ŋ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ yɛ̍, nyɛ̄m lāāndūŋ Māsā Bɛ̍ndōo̍ Sɔ̍lɔ̍mɔ̄ŋ ndu̍ o̍o̍ to̍o̍si̍a̍a̍ a̍ ko̍o̍līi̍yo̍ŋ, mbo̍ kɛ̄sī mu̍ŋ o̍ chīɛ̍i̍ Mɛ̄lɛ̄ka̍a̍ le̍ wa̍li̍ Mɛ̄lɛ̄ka̍a̍ wo̍ŋ, mi̍ Māsā Bɛ̍ndōo̍ Nābi̍u̍kā(...)

¹³

¹⁴Wānā o̍ wāna̍ wa̍ Chūlu̍sɛ̄lɛ̄m, wāŋ bɛ̄ndūāā lēlɛ̄ŋnda̍ ni̍, wānāā sūlāā bɛ̄ndūa̍a̍ wa̍ lo̍ŋ nda̍ ni̍, a̍ wānāa̍ cha̍ā nyɔ̍ɔ̍ŋ chāā bɛ̄ndōo̍ a̍ lābā wa̍, a̍ sūmnda̍, nda̍ kpo̍u̍ mbo̍ chūā nda̍, mbo̍ kūā a̍ nda̍ o̍ chɛ̄le̍ŋ ni᷄ŋ Ba̍bi̍lɔ̄ŋ. Wānāā o̍ ku̍ɛ̄ o̍ chɛ̄le̍ŋ ni᷄ŋ nda̍, ā wa̍ kpo̍u̍ kpo̍u̍ wāa̍la̍ŋ tɔ̍ (10,000). Wānāā o̍ mɛ̍i̍ o̍ lɛ̄ŋndē Chu̍dāle̍ŋ ni᷄ŋ su̍e̍e̍ ō kūe̍ a̍ nda̍ le̍ wa̍, mɛ̄ɛ̍ le̍ wānāa̍ wa̍ lo̍ŋ ma̍ tāmbū tāmbi̍i̍ bɛ̍ndūe̍i̍, nda̍ a̍a̍ nɔ̍ nyɛ᷅ o̍ nyɛ̄ le̍ wa̍.

¹⁵O̍ ko̍ŋ, Māsā Bɛ̍ndōo̍ Chɛ̄hōwa̍chīŋ ni̍, a̍ kāla̍ ndɔ̄, a̍ lāāndāā ndūa̍a̍, a̍ wānāā bɛ̄ndūa̍a̍ wa̍ ndu̍ o̍ bā bɛ̄ŋgu̍ wa̍, o̍ ko̍ŋ kɔ̍ɔ̍lī, a̍ wāŋ bɛ̄ndūāā lēlɛ̄ŋnda̍, nda̍ kpo̍u̍ mi̍ Māsā Bɛ̍ndōo̍ Nābi̍u̍kānɛ̍ɛ̍sā o̍ ku̍ā a̍ nda̍ o̍ chɛ̄le̍ŋ ni᷄ŋ Ba̍bi̍lɔ̄ŋ.

¹⁶Pūa̍a̍ chɔ̄ūwāa̍ wa̍ Chūlu̍sɛ̄lɛ̄m wāa̍la̍ŋ lā ŋɔ᷄mmɛ̍ū ma̍ nɔ̄ dīāllūŋ kāla᷄ŋ, ndu̍yɛ̍ ma̍ wā ā bɛ̄ndāā le̍ kɔ̄lā wāā o̍ chɔ̄ū wa̍, mi̍ Nābi̍u̍kānɛ̍ɛ̍sā o̍ ku̍a̍ndū nda̍ kpo̍u̍, mbo̍ kūā a̍ nda̍ o̍ chɛ̄le̍ŋ ni᷄ŋ Ba̍bi̍lɔ̄ŋ. O̍ ko̍ŋ kɔ̍ɔ̍lī, sūmnda̍ ni̍ a̍ wānāa̍ cha̍ā nyɛ᷅ a̍ lābā wa̍, nda̍ bɛ̍ɛ̍ mbo̍ kūā a̍ nda̍, nda̍ wa̍ wāa̍ ō pīlɛ̍ (1,000).

¹⁷O̍ ko̍ŋ kɔ̍ɔ̍lī, mi̍ Māsā Bɛ̍ndōo̍ Nābi̍u̍kānɛ̍ɛ̍sā o̍ hɛ̍lī Mātāni̍yāā, Chɛ̄hōwa̍chīŋ bōm ndɔ̄ mbo̍ kɛ̄sī ndu̍ māsā bɛ̍ndōo̍ Chu̍dā o̍ fōōfo̍ Chɛ̄hōwa̍chīŋ ndo̍. O̍ ko̍ŋ kɔ̍ɔ̍lī, mi̍ Māsā Bɛ̍ndōo̍ Nābi̍u̍kānɛ̍ɛ̍sā o̍ ke᷅ ni᷅ŋ Mātāni̍yāā dīōla̍ chēle̍ŋ āā Sɛ̄dīka̍yā.

¹⁸Sɛ̄dīka̍yā o̍ wa̍ wɔ̄sīla̍ŋ bi̍dīi̍ŋ a̍ ō pīlɛ̍, mbo̍ sīmnu᷄ŋ māsā bɛ̍ndōo̍ le̍ Chu̍dā. Ndu̍yɛ̍ mbo̍ tōsā māsāle̍ŋ le̍ lɛ̄ŋndē Chu̍dāle̍ŋ Chūlu̍sɛ̄lɛ̄m chi̍e̍e̍ le̍ lɛ̄ŋndē Chu̍dāle̍ŋ, le̍ wɔ̄sīla̍ŋ tɔ̍ a̍ ō pīlɛ̍. Sɛ̄dīka̍yā ko̍ŋ, kāla̍ ndɔ̍ wa̍ Hu̍mu̍tāl ni̍, Chɛ̄lūīma̍yā, o̍ wa̍ Li̍bi̍nāā wo̍ chūā ndɔ̄ɔ̍.

¹⁹Kɛ̍ Sɛ̄dīka̍yā bɛ̍ɛ̍, mbo̍ tōsā yɔ̄ŋ wɔ̄ɔ̍ŋndo̍ Mɛ̍lɛ̄ka̍ Ya̍a̍wɛ̄ɛ̄ o̍ hɔ̄l. Sɔ̄ɔ̍ŋ wɔ̄ɔ̍ŋ Māsā Bɛ̍ndōo̍ Chɛ̄hōwa̍kīm fi̍nyā ndɔ̄ o̍ wa̍ tōsāa̍ wo̍ŋ ndu̍ bɛ̍ɛ̍ mu̍ŋ ko̍ni̍ o̍ to᷅l kɔ̄ɔ̄lī ni̍.

²⁰Nyɛ̍ yɔ̍nu̍ŋ a̍ wāŋnda̍ Chūlu̍sɛ̄lɛ̄m, ndu̍yɛ̍ a̍ wāŋnda̍ o̍ lɛ̄ŋndē Chu̍dāle̍ŋ ni᷄ŋ le̍ tu̍mbe̍ Mɛ̄lɛ̄ka̍ Ya̍a̍wɛ̄ɛ̄ o̍ dɔ̍u̍nu᷄ŋ a̍ nda̍ wo̍, ko̍na̍ ndɔ̄ɔ̍ cho̍ ho̍ō ni̍. Mi̍ Mɛ̄lɛ̄ka̍ Ya̍a̍wɛ̄ɛ̄ o̍ to̍sā mi̍ sɔ̄ɔ̍ŋ pa̍lāŋ ŋ̄ tūāl nda̍ chōo̍. Ndu̍yɛ̍ o̍ mɛ̄ɛ̄lu̍la̍ŋ kpɔ̍ŋ, mbo̍ bāsū nda̍ tɛ̍ɛ̍, mbo̍ fāŋā nda̍ ndu̍ o̍ hɔ̄l. Mbo̍ kūā a̍ te̍le̍ŋ ti̍ŋ lɛ̄ŋndē Chu̍dāle̍ŋ lē wa̍ Māsā Bɛ̍ndōo̍ Nābi̍u̍kānɛ̍ɛ̍sā ō bā bɛ̄ŋgu̍. Kɛ̍ mi̍ ī yɔ̄nu᷄ŋ mi̍ Māsā Bɛ̍ndōo̍ Sɛ̄dīka̍yā o̍ wa̍ Chu̍dā wo̍ ō sīmūl Nābi̍u̍kānɛ̍ɛ̍sā, mbo̍ fūlā ndu̍ o̍ bā bɛ̄ŋgu̍.