Read Southern Kisi Māsāā Bɛ̍ndūāā Di̍i̍ŋ Ndūa̍a̍ 4 Bible Online

Māsāā Bɛ̍ndūāā Di̍i̍ŋ Ndūa̍a̍ 4 - Southern Kisi bible

Māsāā Bɛ̍ndūāā Di̍i̍ŋ Ndūa̍a̍ 4

¹Pāa̍le̍ pi᷅lɛ̍, mi̍ chūā vīi̍ pīlɛ̍ ō pɔ̍nɔ̍ ndɔ̄ vi᷅ wo̍ ō mālnu᷄ŋ mbo̍ kūā nāa̍ Īla̍a̍sīā chu̍a̍. Ndūyɛ̍ pɔ̍nɔ̍ ndɔ̍ vi᷅ ko̍ŋ ndo̍, ndu̍ bɛ̍ɛ̍ wāna̍ ndu̍ o̍o̍ su̍a̍ā le̍ mɛ̄lɛ̄ka̍ wo̍ o̍ wa̍ ni̍. Nda̍ nda̍ Īla̍a̍sīā wa̍ā wa̍ o̍ ku̍ndā pīlɔ̍ɔ̍ ni᷄ŋ ni̍. Mi̍ chūa̍a̍ ho̍ō dīmūl Īla̍a̍sīā āā, “Fāllo̍, pɔ̍nɔ̍ nūu̍ vī, mbo̍ mɛ̄ī ya̍. Ndu̍yɛ̍ nūm pi̍la̍ si̍nā māā ndu̍ bɛ̍ɛ̍, wāna̍ ndu̍ o̍o̍ nɔ̍ sīōōŋīi̍ Mɛ̄lɛ̄ka̍ Ya̍a̍wɛ̄ɛ̄ ve̍ wo̍ o̍ wa̍ ni̍. Kɛ̍ lɔ̍ɔ̍ pa̍ mbo̍ wū, mbo̍ bīī kūo̍o̍ īnɛ̍. Wāna̍ o̍ bi̍ī kūēē ko̍ŋ o̍ bā wo̍ ō hīŋ mbo̍ dīmī māā mɛ̄ɛ̍ mbō pūu̍ pūa̍a̍ ŋi̍ɔ̍ɔ̍ŋāā pɔ̍nɔ̍ nī ko̍ŋ ō mɛ̄i̍ ya̍ o̍ bā wa̍, mbō sīīŋgu̍u̍ nda̍ chīa̍a̍ sɔ̍ŋgɔ̍ nyɛ̄ ndɔ̄ sɔ̍lāa̍. Le̍la̍ŋ i̍ hi᷅ŋ mā ma̍la̍ ya̍.”

²Mi̍ Īla̍a̍sīā nyu̍nā ndu̍ āā, “Ō yɛ̄ɛ̍nɛ̍ ŋ̄ yēēma̍ yɛ̄ mi̍ to̍sa̍l nu̍m? Chɔ̍m ndɔ̍ ya̍ nyɛ̄ ŋ̄ nɔ̄ o̍ nūmndo̍ chi̍ɛ̍ī ni̍ŋ ndo̍.” Mi̍ chūa̍a̍ dīmūl ndu̍ āā, “I̍ nɔ̍ nyɛ᷅ o̍ nyɛ̄ chīɛ̄ī ni̍ŋ te̍ fāllo̍. Nyɛ̄ ya̍ I̍ nɔ̍ chīɛ̄ī ni̍ŋ ndo̍, mɛ̄ɛ̍ le̍ chūɛ̄īmā ɔ̄li̍fīi̍ya̍ŋ o̍ nyɛ̄ māchūɛ̄īyo̍ ni᷄ŋ nyɛ᷅ pɔ̄mbɔ̄.”

³Mi̍ Īla̍a̍sīā di̍mūl ndu̍ āā, “Kɔ̍ mā kɔ̍ yo̍ū nyɛ̄m lāāndūŋ nda̍ dūāū chūɛ̄īya̍ŋ ni᷄ŋ ndo̍ŋ chāāŋāā nūmnda̍ o̍ lābā ta̍u̍ ta̍u̍.

⁴Tē a̍ yo̍u̍ nyɛ̄m lāāndo᷄ŋ mu᷅ŋ pɛ̍, nūm ni̍, pūa̍a̍ nu̍mnda̍ ni̍, lā lūɛ̄ī chīɛ̄ī ni̍ŋ lā kīnda̍ŋ di̍o̍o̍ kɔ̄ɔ̄lī. Tē lā kīnda̍ŋ di̍o̍o̍ kɔ̄ɔ̄lī pɛ̍, a̍ chu̍a̍ chūɛ̄īmā ŋ̄ nɔ̄ ma̍ŋ o̍ nyɛ̄ māchūɛ̄īyo̍ ni᷄ŋ nda̍ŋ, a̍ ka̍ndu̍ ma̍ŋ mūlīo̍o̍ o̍ nyɛ̄m lāāndūŋ mu᷅ŋ ni᷄ŋ, nyɛ̄ lāāndīi̍ pi̍ā ko̍, ā kɛ̄sī ke̍ŋ ā chūā i̍ che᷅le̍ŋ.”

⁵O̍ ko̍ŋ, mi̍ chūa̍a̍ kūā mbo̍ kɔ̍ yo̍ū nyɛ̄m lāāndo᷄ŋ chāāŋāā ndūa̍a̍ o̍ lābā ta̍u̍ ta̍u̍. Ma̍ kɔ̍ lu̍ɛ̍ī chīɛ̄ī ni̍ŋ nda̍ pūa̍a̍ ndūa̍a̍ ma̍ kīnda᷄ŋ di̍o̍o̍ kɔ̄ɔ̄lī. O̍ ko̍ŋ kɔ̍ɔ̍lī, ma̍ kāndū chūɛ̄īma̍ wa̍ ma᷅ŋ o̍ nyɛ̄ māchūɛ̄īyo̍ ni᷄ŋ nda̍ŋ mūlīo̍o̍ o̍ nyɛ̄m lāāndūŋ mu᷅ŋ ni᷄ŋ, i̍ pi̍ā ko̍, pūa̍a̍ ndūa̍a̍ kɛ̄sī ke̍ŋ i̍kɛ̍i̍ ā kē ndu̍ i̍ che᷅le̍ŋ.

⁶Nyɛ̄m lāāndūŋ nda̍ yōu̍ wo̍ŋ kpo̍u̍, mi̍ ŋ̄ pīā. Mbo̍ nyūnā po̍ ndɔ̄ɔ̍ ō pīlɔ̍ɔ̍ āā, “Nyɛ̄ o̍ nyɛ̄ lāāndīī chēle̍ŋ cho̍ lɛ̍ le̍?” Mi̍ po̍ ndɔ̄ɔ̍ ō dīmūl ndu̍ āā, “Nyɛ̄ o̍ nyɛ̄ fo̍ndō cho̍ lɛ̍ na̍nu᷄ŋ te̍.” O̍ ko̍ŋ kɔ̍ɔ̍lī, mi̍ chūɛ̄īmā pɔ̄mbɔ̄ mā wa̍ ma᷅ŋ o̍ nyɛ̄ māchūɛ̄īyo̍ ni᷄ŋ mbo̍ wā ma̍ŋ mūlīo̍o̍ wa̍ŋ, mā kīōlū kɔ̄ɔ̄lī.

⁷Mi̍ chūa̍a̍ mīīŋgū nāa̍ Īla̍a̍sīā wāna̍ su̍a̍a̍ le̍ Mɛ̄lɛ̄ka̍ wo̍ chūā, mbo̍ kɔ̍ do̍u̍nu᷄ŋ ndu̍ ko̍na̍. Mi̍ Īla̍a̍sīā di̍mūl ndu̍ āā, “Kɔ̍ mā kɔ̍ pi̍sī chūɛ̄īmā māŋ, mā so̍o̍lu̍u̍ kūēēla̍ pi̍la̍la̍ŋ. Nyɛ̄ cho̍ lō wo̍, a̍ ma̍nda̍ chūāūwa̍ a̍ ko̍ŋ.”

⁸Pāa̍le̍ pi᷅lɛ̍, mi̍ Īla̍a̍sīā cha̍ŋ mbo̍ kūā Si̍u̍nīm chi̍e̍e̍. Ndu̍yɛ̍ chūā sūlāā pīlɛ̍ wa̍ o̍ chi̍o̍o̍ ho̍ō ni᷄ŋ. Mɛ̄ɛ̍ chūa̍a̍ ho̍ō chē Īla̍a̍sīā, mbo̍ kɔ̍ yi̍yā ndu̍ mbo̍ kē ndu̍ nyɛ̄ dīa̍a̍ mbo̍ dīā. Chɔ̍ŋ ni᷅ŋ a̍ pāa̍le̍ le̍ŋ, te̍le̍ŋ o̍ te̍le̍ŋ Īla̍a̍sīā ndu̍ o̍o̍ wa̍ ni᷅ŋ hīōūwɔ̄ɔ̍ lo̍ŋ pɛ̍, mɛ̄ɛ̍ mbō kēi̍ nyɛ̄ dīa̍a̍ dīo̍ lo̍ŋ.

⁹Pāa̍le̍ pi᷅lɛ̍, mi̍ chūa̍a̍ ho̍ō dīmūl pɔ̍nɔ̍ ndɔ̄ āā, “I̍ la̍a̍la̍ŋ māā fi̍nyā ke̍ī ho̍ō na̍nu᷄ŋ lɔ̍ɔ̍ o̍ lɔ̍ɔ̍ wo̍, wāna̍ Mɛ̄lɛ̄ka̍a̍ sa̍kpōo̍ o̍ cho̍ ni̍.

¹⁰Ŋ̄ tēŋgu̍l ndu̍ lu̍mūi̍ pɔ̍mbɔ̄ɔ̍ o̍ chīɛ̄īyo̍ lēchōo̍,[1] mī ŋ̄ lūe̍i̍ kpēlōo̍ lo̍ŋ a̍ kpe̍ŋgbo̍o̍, a̍ ti̍bīi̍yo̍ a̍ la̍mbūi̍yo̍. Te̍le̍ŋ o̍ te̍le̍ŋ o̍ ke̍e̍ku̍ ni᷅ŋ na̍nu᷄ŋ pɛ̍ ŋ̄ yīya̍ ndu̍ lo̍ŋ.” O̍ ko̍ŋ, ma̍ bɛ̄ɛ̄ndīāl Īla̍a̍sīā fo̍ndāa̍.

¹¹Ō wa̍ a̍ pāa̍le̍ pi᷅lɛ̍ mɛ̄ɛ̍ Īla̍a̍sīā ku̍ɛ̄ Si̍u̍nīm mbo̍ kēī lo̍ŋ, mi̍ chūa̍a̍ ho̍ō ō kɔ̍ yi̍yā ndu̍ o̍ lu̍mūi̍ nda̍ tēŋgu̍l ndu̍ ho̍ō wo̍ ni᷄ŋ le̍ mbō pɛ̄ŋgi̍.

¹²Mi̍ Īla̍a̍sīā lo᷅ o̍ ko̍ŋ mbo̍ vīām Kɛ̍ha̍sī bu̍ɛ̍ī ndɔ̄ mbo̍ dīmūl ndu̍ āā, “Kɔ̍ ve̍e̍lū wɔ̄ chūā kōŋ ō hu᷄ŋ ndɔ̍.” Mi̍ Kɛ̍ha̍sī ku̍ā mbo̍ kɔ̍ ve̍e̍lū ndu̍, mbo̍ hūŋ.

¹³Mɛ̄ɛ̍ o̍ hi᷅ŋ, mbo̍ hu᷄ŋ si᷅m Īla̍a̍sīā lāchī, mi̍ Īla̍a̍sīā di̍mūl bu̍ɛ̍ī ndɔ̄ɔ̍ āā, “Nyu̍na̍ chu̍a̍a̍ ho̍ō, kūɛ̄ɛ̄ bɛ̄ndūīī o̍ cho̍ he̍ī dīo̍o̍ le̍ na̍a̍ ve̍, ō yɛ̄ɛ̍nɛ̍ ya̍ I̍ to̍sa̍l lɛ̍ ndu̍ mbō hīni̍ kɔ̄l? Bāā I̍ kɔ̍ o̍ māsā bɛ̍ndōo̍ lo̍, ɔ̄ɔ̄ o̍ wāna̍ cho̍ pūa̍a̍ chɔ̄ūwa̍ bōlle̍ŋ ndo̍ lo̍, mī kɔ̍ so̍ō le̍ ndu̍?” Mi̍ chūa̍a̍ dīmūl ndu̍ āā, “Mbɔ̄ ō wa̍ le̍nde̍ fāllo̍, I̍ cha̍a̍ wānɔ᷄ŋ nu̍a̍ā. Wānāa̍ nīa̍a̍ tɛ̄ɛ̄ŋ kpo̍so̍ŋ ya̍ I̍ cho̍ ni̍.”

¹⁴Mɛ̄ɛ̍ chūa̍a̍ mīīŋgu̍, mi̍ Īla̍a̍sīā ko̍ma̍ nyu̍nā Kɛ̍ha̍sī bu̍ɛ̍ī ndɔ̄ āā, “Ō yɛ̄ɛ̍nɛ̍ na̍a̍ ŋ̄ tōsa̍l lɛ̍ ni᷅ŋ chūa̍a̍ ho̍ō mbō hīni̍ kɔ̄l?” Mi̍ Kɛ̍ha̍sī di̍mūl ndu̍ āā, “Chūa̍a̍ ho̍ō I̍ sa̍a̍lu̍ŋ māā ō nɔ̍ po̍ o̍ po̍ le̍, ndu̍yɛ̍ pɔ̍nɔ̍ ndɔ̄ cho̍ ni᷅ŋ ō yūvɛ̍i̍.”

¹⁵Mi̍ Īla̍a̍sīā di̍mūl ndu̍ āā, “Kɔ̍ ve̍e̍lū wɔ̄ ndu̍ ō mīīŋgu̍ wɔ̍ na̍nu᷄ŋ.” Mi̍ Kɛ̍ha̍sī ku̍ā mbo̍ kɔ̍ ve̍e̍lū ndu̍, mi̍ chūa̍a̍ hūŋ mbo̍ hu᷄ŋ si᷅m o̍ dīō.

¹⁶Mi̍ Īla̍a̍sīā di̍mūl ndu̍ āā, “Te̍le̍ŋ wa̍ā nu̍a̍ā nyīlāsīāŋ ā chō wā a̍ pōo̍ o̍ bā.” Mi̍ chūa̍a̍ dīmūl ndu̍ āā, “Wāna̍ Mɛ̄lɛ̄ka̍a̍ ŋ̄ chō ni̍ fāllo̍. Hu̍ī ya̍ le̍.”

¹⁷Kɛ̍ mi̍ ī yɔ̄nu᷄ŋ mɛ̄ɛ̍ Īla̍a̍sīā dīmi̍ yɛ̍. Mɛ̄ɛ̍ pa̍ŋgu̍ŋ ti̍ŋ hīo̍u̍ mi̍ chūa̍a̍ ho̍ō chūā yo᷄llo̍ mbo̍ vīālū wānā pɔ̍nɔ̍ɔ̍. Ndu̍yɛ̍ a̍ te̍le̍ŋ Īla̍a̍sīā di̍mu̍l ndu̍ ko̍ŋ ndo̍ kpe̍e̍kpe̍i̍ o̍ ve̍lū ni̍.

¹⁸Mi̍ pōo̍mbɔ̄ɔ̍ ho̍ō ō sūl mbo̍ yɔ̄nu᷄ŋ so̍ko̍lo̍. Pāa̍le̍ pi᷅lɛ̍ lē wa̍, mi̍ fi̍nyā ndɔ̄ ku̍ā wi̍tīi̍yo̍ŋ kīōlɔ̄ɔ̍ o̍ chīɛ̄ī ndūɛ̍i̍ ni᷄ŋ a̍ wāŋ wa̍lla̍. O̍ ko̍ŋ, mi̍ pōo̍mbɔ̄ɔ̍ ho̍ō kūā nāa̍ fi̍nyā ndɔ̄ chu̍a̍ o̍ chīɛ̍i̍ ni᷄ŋ nāa̍ nda̍ wa̍ wi̍tīi̍yo̍ŋ kīōlɔ̄ɔ̍ wa̍.

¹⁹Kɔ̄la̍ŋ lo̍ŋ, mi̍ bōlle̍ŋ lē kɔ̍ ka̍ndū pōo̍mbɔ̄ɔ̍ ho̍ō nɛ̄īyo̍. Mbo̍ dīmūl fi̍nyā ndɔ̍ āā, “Kɛ̄kɛ̍, bōlle̍ŋ lē chō ya̍ nɛ̄īyo̍. Lē chō ya̍ bɔ̍ɔ̍ nɛ̍īyo̍.” Mi̍ fi̍nyā ndɔ̄ di̍mūl bu̍ɛ̍i̍yāā ndūa̍a̍ ō pīlɛ̍ āā, “Mi̍ŋgi̍ ndu̍ chi̍e̍e̍ nāa̍ kāla̍ ndɔ̄ chu̍a̍.”

²⁰Mi̍ po̍ bu̍ɛ̍īyo̍ ho̍ō chūā ndu̍, mbo̍ mīīŋgū a̍ ndu̍ chi̍e̍e̍ nāa̍ kāla̍ ndɔ̄ chu̍a̍. Mi̍ kāla̍ ndɔ̄ kɔ̍ bi̍ī ndu̍ o̍ bɛ̄ŋgu̍, mbo̍ yāāŋgāā ndu̍ o̍ bɛ̄ŋgu̍ kpe̍e̍. Pāa̍le̍ŋ si᷄mnda̍ŋ o̍ bōlle̍ŋ chōo̍ ki̍nɛ̍i̍, mi̍ pōo̍mbɔ̄ɔ̍ ho̍ō ō wūnu᷄ŋ.

²¹Mi̍ chūa̍a̍ ho̍ō chūā pōo̍mbɔ̄ɔ̍ ho̍ō mbo̍ kūā a̍ ndu̍ o̍ lu̍mūi̍ nda̍ tēŋgu̍l ko̍ŋ Īla̍a̍sīā wāna̍ Mɛ̄lɛ̄ka̍a̍ wo̍ ni᷅ŋ, mbo̍ kɔ̍ ya̍mbū ndu̍ o̍ kpēlē lo̍ŋ mbo̍ fūla᷄ŋ mbo̍ kīndā ndu̍ dīo̍o̍ kɔ̄ɔ̄lī.

²²O̍ ko̍ŋ kɔ̍ɔ̍lī, mbo̍ vēēlū pɔ̍nɔ̍ ndɔ̍ mbo̍ dīmūl ndu̍ āā, “Yɔ̍ŋ ya̍ bu̍ɛ̍īyo̍ ō pīlɛ̍ a̍ sōfɛ̍lɔ̍ɔ̍, I̍ ye̍e̍ma̍ mī kɔ̍ chɔ᷅ wāna̍ Mɛ̄lɛ̄ka̍a̍ chu᷅ke̍ mī mi̍i̍ŋgu̍ na̍nu᷄ŋ.”

²³Mi̍ pɔ̍nɔ̍ ndɔ̄ di̍mūl ndu̍ āā, “Ō cho̍ yɛ̍ bɔ̄ŋa᷅ŋ pāŋgi̍i̍ sɛ̍nɛ̄ī[2] le̍ cho̍ hāū le̍, ō cho̍ yɛ̍ vɛ̄lɛ̄ pāa̍le̍ pɛ̍ŋgīāāle̍, Mɛ̄lɛ̄ka̍ le̍, le̍ cho̍ hāū le̍, le̍ yɛ̄ɛ̍nɛ̍ ŋ̄ yēēma̍ yɛ̄ le̍ ndu̍ kɔ̄la̍ŋ hāū chɔ̍ɔ̍?” Mbo̍ dīmūl pɔ̍nɔ̍ ndɔ̍ āā, “Bu̍u̍la᷄ŋ te̍, ō cho̍ i̍sɔ̍ɔ̍ o̍ īsɔ̄ɔ̍ le̍. I̍ ye̍e̍ma̍ tu̍ŋ mī kɔ̍ chɔ᷅ ndu̍.”

²⁴O̍ ko̍ŋ, ma̍ chūū ndu̍ sōfɛ̍lɔ̍ɔ̍. Mbo̍ lō o̍ ko̍ŋ mbo̍ bɛ̄ɛ̄ndīāā sōfɛ̍lɔ̍ɔ̍ chɔ̍chɔ̍. Mbo̍ dīmūl lāŋu̍nɔ̄ bu̍ɛ̍i̍ wa̍ kɔ̄la̍ŋ a̍ sōfɛ̍lɔ̍ɔ̍ wo̍ āā, “I̍ ye̍e̍ma̍ mī ke̍le̍ŋa̍ fūūlūū chɔ̍chɔ̍. Le̍la̍ŋ to̍sa̍ mī sōfɛ̍lɔ̍ɔ̍ nyāānu̍ŋ nya̍a̍nɔ᷄ŋndo̍ pīla̍. Mɛ̄ɛ̍ mī di̍mu̍l nu̍m ma̍a̍ to̍sa̍ mbō dɛ̄ɛ̄na̍ ti᷄ŋ kīlta̍ŋ ma̍lāŋ ŋ̄ tōsā le̍nde̍.”

²⁵O̍ ko̍ŋ, mi̍ chūa̍a̍ ho̍ō mālnu᷄ŋ mbo̍ kūā o̍ Pēmbīī Ka̍mɛ̄lve̍ chōo̍ nāa̍ Īla̍a̍sīā wa̍ wa̍. Ō lo̍ la̍nda̍ŋ mi̍ Īla̍a̍sīā cha᷅ ndu̍ hūnɔ̄ɔ̍. Mi̍ Īla̍a̍sīā di̍mūl Kɛ̍ha̍sī bu̍ɛ̍ī ndɔ̄ āā, “I̍ cho̍ chūa̍a̍ Si̍u̍nɛ̄m chɔ̄ɔ̍ hūnɔ̄ɔ̍, ko̍ yɛ̄ɛ̍nɛ̍ yɔ̍nu̍ŋ yɛ̍?

²⁶De̍mu̍l lɔ̍ ndu̍ a̍ kīlta̍ŋ mā kɔ̍ nyu̍nā ndu̍, ndu̍ ni̍, pɔ̍nɔ̍ ndɔ̄ ni̍, po̍ ndāa̍ ni̍, tē ā chō kɛ̄ndɛ̄.” Mi̍ Kɛ̍ha̍sī nya̍a̍nu᷄ŋ mbo̍ kɔ̍ yi᷅l ndu̍, mbo̍ nyūnā ndu̍ tē ā chō kɛ̄ndɛ̄. Mi̍ chūa̍a̍ dīmūl ndu̍ māā nda̍ kpo̍u̍ ā chō pɛ̍ kɛ̄ndɛ̄.

²⁷Mi̍ chūa̍a̍ kūā sa̍na̍a̍ nāa̍ Īla̍a̍sīā wa̍ īchāli̍ pe̍mbēi̍ chōo̍ wa̍, mbo̍ kɔ̍ tu̍ndu᷄ŋ ndu̍ o̍ lābɛ̄ŋgu̍ ni̍ŋ, mbo̍ sāā ndu̍ pēlo̍ŋ. Mi̍ Kɛ̍ha̍sī ku̍ā le̍ ndu̍ nyīndɔ̄ɔ̍. Kɛ̍ mi̍ Īla̍a̍sīā di̍mūl ndu̍ āā, “Ma̍l ndu̍ nyi̍ndū ndu̍ le̍. A̍ cho̍ chɔ᷅ māā a̍ kɔ̄l tāmbɛ̍i̍ bɛ̍ndōo̍ kpo̍sōŋ te̍ o̍ cho̍ nu̍a̍ā le̍? Ndu̍yɛ̍ Mɛ̄lɛ̄ka̍ Ya̍a̍wɛ̄ɛ̄ o̍ chɔ̍m ndɔ̍ ya̍ bɛ̍ɛ̍ nyɛ᷅ o̍ nyɛ̄ yɔ̍nu̍ŋ a̍ ndu̍ o̍kɔ̄ɔ̄ le̍, ō bīī mbo̍ vīŋ ya̍ ndi̍ kpi̍ŋ.”

²⁸Mi̍ chūa̍a̍ nyūnā Īla̍a̍sīā āā, “Fāllo̍, ya̍ ya̍ i̍i̍ nyu̍na̍ nu̍m ni̍ māā to̍sa̍ mī sɔ̄la̍ pōo̍? Ya̍ i̍i̍ di̍mu̍l nu̍m nu̍a̍ā māā lu̍e̍ī ya̍ yēēmɛ̍i̍ wa̍ā le̍nde̍ o̍ kɔ̄l te̍ le̍?”

²⁹Mi̍ Īla̍a̍sīā di̍mūl Kɛ̍ha̍sī bu̍ɛ̍ī ndɔ̄ āā, “Bɛ̍ɛ̍ndi̍a̍ŋ chɔ̍ chɔ̍ mā chūā tīnda̍ nūu̍ mā kūɛ̄ Si̍u̍nīm. Bɔ̍ŋa᷅ŋ bɛ̍ɛ̍ a̍ wānā yi᷅l ndu̍ le̍, ndu̍yɛ̍ wānā yi̍l nu̍m bɛ̍ɛ̍ vɛ̍lɛ̄ mi̍ŋgī le̍. Tē a̍ fu̍u̍lu̍u̍ chi̍e̍e̍ pɛ̍, ā kūɛ̄ sa̍kpō nāa̍ pōo̍mbɔ̄ɔ̍ chō īhīni̍ o̍ vi̍lɛ̍i̍yo̍ wa̍, a̍ kɔ̍ ha̍ndū ndu̍ tīnda̍ nūu̍ ho̍ō o̍ hɔ̄l.”

³⁰Kɛ̍ mi̍ pōo̍mbɔ̄ɔ̍ ho̍ō kāla̍ ndɔ̄ di̍mūl Īla̍a̍sīā āā, “Fāllo̍, I̍ me̍na̍ŋ o̍ Mɛ̄lɛ̄ka̍ Ya̍a̍wɛ̄ɛ̄ po̍, Mɛ̄lɛ̄ka̍ cho̍ yōōmū ndu̍yɛ̍ mbo̍ tōsā mi̍ nūm bɛ̍ɛ̍ wa᷅ yōōmū wo̍, I̍ mɛ̍ī nu̍m kɔ̄ɔ̄lī le̍, na̍a̍ nu᷄m ku̍ā ni̍.” O̍ ko̍ŋ, mi̍ Īla̍a̍sīā cha̍ŋ ma̍ bīī kɔ̄la̍ŋ.

³¹Mi̍ Kɛ̍ha̍sī hi̍a̍ū nda̍ lāchī. Mɛ̄ɛ̍ o̍ fu̍u̍lu̍u̍ mbo̍ kɔ̍ ha̍ndū pōo̍mbɔ̄ɔ̍ tīnda̍a̍ o̍ hɔ̄l mɛ̄ɛ̍ Īla̍a̍sīā di̍mu̍l ndu̍ yɛ̍. Kɛ̍ kpɛ̍kɛ̍lɛ̍ bɛ̍ɛ̍ pōo̍mbɔ̄ɔ̍ kpēŋa̍ŋ te̍. O̍ ko̍ŋ, mbo̍ mīīŋgū Īla̍a̍sīā o̍ ībūŋ, mbo̍ kɔ̍ di̍mūl ndu̍ āā, “I̍ kɔ̍ hāndū pōo̍mbɔ̄ɔ̍ tīnda̍a̍ o̍ hɔ̄l, kɛ̍ ō tēndu̍l te̍.”

³²Mɛ̄ɛ̍ Īla̍a̍sīā fu̍u̍lu̍u̍ o̍ chīɛ̄ī chūa̍a̍ ho̍ō, mbo̍ kūā o̍ lu̍mūi̍ nda̍ tēŋgu̍l ndu̍ Īla̍a̍sīā wo̍ ni᷄ŋ ndu̍ pīlɛ̍ kpe̍, nāa̍ pōo̍mbɔ̄ɔ̍ ō wa̍ īhīni̍ o̍ vi̍lɛ̍i̍yo̍ wa̍, mbo̍ mīŋgi᷄ŋ di̍o̍o̍ kīnda᷄ŋ a̍ mākɔ̄ɔ̄. Mbo̍ lō o̍ ko̍ŋ mbo̍ pīɛ̄ī Mɛ̄lɛ̄ka̍ Ya̍a̍wɛ̄ɛ̄.

³³

³⁴Mɛ̄ɛ̍ o̍ chi̍i̍ pīɛ̄īle̍ŋ, mbo̍ kɔ̍ hi̍nī pōo̍mbɔ̄ɔ̍ chōo̍ sa̍kpō. Mbo̍ chi̍ŋa̍ sōndō ndɔ̄ɔ̍ a̍ sōndō pōo̍mbɔ̄ɔ̍, mbo̍ chīŋā vɛ̄lɛ̄ hɔ̄ltā ndɔ̄la̍ŋ a̍ hɔ̄ltā pōo̍mbɔ̄ɔ̍, o̍ ko̍ŋ kɔ̍ɔ̍lī, mbo̍ bɔ̄ŋā vɛ̄lɛ̄ bālā ndɔ̄la̍ŋ a̍ bālā pōo̍mbɔ̄ɔ̍. Mɛ̄ɛ̍ o̍ hi̍ni̍ ndu̍ chōo̍ le̍nde̍ la̍u̍, mi̍ dīāllo̍ŋ yɔ̄nu᷄ŋ po̍o̍mbɔ̄ɔ̍ la̍fūū.

³⁵O̍ ko̍ŋ kɔ̍ɔ̍lī, mbo̍ cha᷄ŋ mbo̍ bālū o̍ lu̍mūi̍yo̍ ni᷄ŋ, mbo̍ mīīŋgū vɛ̄lɛ̄ mbo̍ kɔ̍ hi̍nī ndu̍ chōo̍ le̍nde̍. O̍ ko̍ŋ, mi̍ pōo̍mbɔ̄ɔ̍ kpīsīŋā lē ŋɔ᷄mmɛ̍ū, o̍ ko̍ŋ kɔ̍ɔ̍lī mbo̍ tōfā.

³⁶Mi̍ Īla̍a̍sīā ve̍e̍lū Kɛ̍ha̍sī bu̍ɛ̍ī ndɔ̄, mbo̍ dīmūl ndu̍ āā, “Kɔ̍ mā kɔ̍ ve̍e̍lūl lɔ̄ ya̍ kālāa̍ pōo̍mbɔ̄ɔ̍ ho̍ō mbō hīŋ ndɔ̄.” Mi̍ Kɛ̍ha̍sī ku̍ā mbo̍ kɔ̍ ve̍e̍lū kālāa̍ pōo̍mbɔ̄ɔ̍ mbo̍ hūŋ nāa̍ Īla̍a̍sīā o̍ wa̍ wa̍. Mi̍ Īla̍a̍sīā di̍mūl ndu̍ āā, “Ā chē po̍ nu̍mndo̍.”

³⁷Mi̍ wāna̍ chi̍o̍o̍ ho̍ō kūā mbo̍ kɔ̍ tu̍ndu᷄ŋ Īla̍a̍sīā o̍ lābɛ̄ŋgu̍ ni᷄ŋ le̍ ndu̍ ba̍li̍ka̍a̍ mēllo̍ mbo̍ fūūlūū hɔ̄lla̍ lɛ̄ŋ mɛ̍ɛ̄. O̍ ko̍ŋ kɔ̍ɔ̍lī, mbo̍ chūā po̍ ndɔ̄ɔ̍ mbo̍ fūlā a̍ ndu̍.

³⁸Ō wa̍ a̍ te̍le̍ŋ pi᷅lɛ̍, mi̍ Īla̍a̍sīā mi̍i̍ŋgū Ki̍lkāl chi̍e̍e̍. Ndu̍yɛ̍ yīa̍a̍ŋ pīla̍ ma̍ wa̍ o̍ lɛ̄ŋndē lēŋ ni᷄ŋ wɔ̍sī kōŋ ni̍. Pāa̍le̍ pi᷅lɛ̍ mi̍ Īla̍a̍sīā wa᷅ wānāa̍ su̍a̍ā le̍ Mɛ̄lɛ̄ka̍ wa̍ pɛ̄ɛ̄kōo̍ Ki̍lkāl lo̍ŋ. Mi̍ Īla̍a̍sīā di̍mūl bu̍ɛ̍ī ndɔ̄ɔ̍ le̍ mbō kɛ̄si̍ kpɛ̍ɛ̍nɛ̍i̍ bɛ̍ndūe̍i̍ o̍ yīŋ, mbō yōu̍ wāŋnda̍ ha̍ā kpɔ̄ndɔ̄mɛ̄i̍yo̍. Mi̍ lāŋu̍nɔ̄ bu̍ɛ̍īyo̍ ho̍ō kɛ̄sī kpɛ̍ɛ̍nɛ̍i̍ o̍ yīŋ mbo̍ wā kpɔ̄ndɔ̄mɛ̄i̍yo̍ ho̍ō yāūwo̍.

³⁹Mɛ̄ɛ̍ ō wa̍ kpɔ̄ndɔ̄mɛ̄i̍yo̍ ho̍ō yāūwo̍, mi̍ wānāa̍ su̍a̍ā le̍ Mɛ̄lɛ̄ka̍ wa̍ ō pīlɛ̍ kūā yōndōo̍ ni᷄ŋ le̍ mbo̍ kɔ̍ ke̍ndī bīltā pūm mbō hu᷄ŋ dɔ̍ū lēchōo̍. Mɛ̄ɛ̍ o̍ ku̍ɛ̄, mbo̍ kōmāl tɔ̄lɔ̄ɔ̄ pūm ō kūāmāā yōndōo̍ ni᷄ŋ. Kɛ̍ ndu̍ o̍o̍ si̍nā tɔ̍lɔ̄ɔ̄ ho̍ō pɛ̄ŋgu̍ le̍. Mbo̍ kēndī kōmɔ̄ɔ̄ tɔ̄lɔ̄ɔ̍ ho̍ō mbo̍ dūāū o̍ dōma̍ ndɔ̄ɔ̍ ni᷄ŋ, mbo̍ pēī dōmāa̍ cha̍ mbo̍ kūā a̍ ndu̍ chi̍e̍e̍. Mbo̍ kɔ̍ ki̍lī kīlī ndu̍, mbo̍ dūāū o̍ kpɔ̄ndɔ̄mɛ̄i̍yo̍ nda̍ wa̍ ho̍ō yāūwo̍ wo̍ chōo̍.

⁴⁰Mɛ̄ɛ̍ kpɔ̄ndɔ̄mɛ̄i̍yo̍ ho̍ō ō chūū yāu̍, ma̍ pīɔ̄ū wānāā su̍a̍ā le̍ Mɛ̄lɛ̄ka̍ wa̍ ma̍ kāndū dīo̍o̍. Kɛ̍ mɛ̄ɛ̍ nda̍ mɛ̄ɛ̄nu᷄ŋ ndu̍ o̍ lāsōndō, ma̍ sāālu᷄ŋ māā ō bɛ̄nda̍ le̍. Ma̍ dīmūl Īla̍a̍sīā āā, “Nyɛ̄ dīa̍a̍ ho̍ō, nyɛ̄ wɔ̄ɔ̍ŋndo̍ chō lēni᷄ŋ fāllo̍, ō bɛ̄nda̍ le̍ dīo̍ le̍.” O̍ ko̍ŋ, ma̍ sōlī bāla̍ŋ, ā di̍ ndu̍ le̍.

⁴¹Mi̍ Īla̍a̍sīā di̍mūl bu̍ɛ̍ī ndɔ̄ɔ̍ āā, “Kɔ̍ chu̍ū ya̍ kōlo̍ nda̍ tōōsīāā bēe̍dīi̍yo̍ wo̍.” Mɛ̄ɛ̍ bu̍ɛ̍īyo̍ chūu̍ ndu̍ kōlōo̍ ho̍ō, mbo̍ chūā kōlō ko̍ŋ, mbo̍ kɔ̍ chu̍chū ndu̍ o̍ nyɛ̄ dīāā kōŋ chōo̍ o̍ kpɛ̍ɛ̍nɛ̍i̍ ni᷄ŋ. Mbo̍ dīmūl bu̍ɛ̍ī ndɔ̄ɔ̍ āā, “Pi̍ɔ̍u̍ ni̍ko̍ wa᷅ŋnda̍ a̍ dīo̍.” Mi̍ bu̍ɛ̍ī ndɔ̄ɔ̍ dōvī nyɛ̄ dīa̍a̍ ho̍ō, mbo̍ kē wāŋnda̍, ma̍ kāndū dīo̍o̍. O̍ ko̍ŋ, ma̍ sāālu᷄ŋ māā nyɛ̄ dīa̍a̍ ho̍ō, ō bɛ̄nda̍ ni᷅ŋ le̍ dīo̍o̍.

⁴²Pāa̍le̍ pi᷅lɛ̍ mi̍ lāŋu̍nɔ̄ pīlɛ̍ cha᷄ŋ Bāāl Sīāli̍i̍sīāā chi̍e̍e̍, mbo̍ hūŋ Īla̍a̍sīā yīlɔ̄ɔ̄. Mi̍ lāŋu̍nɔ̄ɔ̍ ho̍ō chūū Īla̍a̍sīā bēe̍ndīi̍ nda̍ tōōsi̍a̍a̍ a̍ ba̍a̍līi̍ŋ ta̍se̍ŋ nda̍ kōū o̍ wɔ̄sīo̍o̍ ni᷄ŋ ndo̍ kpūŋgba᷄ŋ bi̍di̍i̍ŋ, a̍ ba̍a̍līi̍ŋ tāse̍ŋ nda̍ kōū wo̍ŋ ŋ̄ ti᷄ŋ o̍ bɔ̄lɔ̄ɔ̍ ni᷄ŋ. Mi̍ Īla̍a̍sīā chu̍ā nyɛ̄ dīa̍a̍ ho̍ō mbo̍ kē bu̍ɛ̍ī ndɔ̄ɔ̍, mbo̍ dīmūl ndu̍ āā, “Pi̍ɔ̍u̍ wa̍nāa̍ su̍a̍ā ha̍ā le̍ Mɛ̄lɛ̄ka̍ wa̍ ā dīo̍.”

⁴³Kɛ̍ mi̍ bu̍ɛ̍ī ndɔ̄ɔ̍ dīmūl ndu̍ āā, “Fāllo̍, ō cho̍ nyɛ̄ dīāā wānā so̍li̍ ŋ̄wāŋ kɛ̄mɛ̄ o̍ hɔ̄l te̍ cho̍ ho̍ō le̍, kāni̍ fo̍ndōle̍, ō cho̍ o̍ bɔ̍ɔ̍ a̍ nda̍.” Mi̍ Īla̍a̍sīā di̍mūl ndu̍ āā, “Nūm ke̍ nda̍ tu̍ŋ, Mɛ̄lɛ̄ka̍ Ya̍a̍wɛ̄ɛ̄ di̍mi̍ māā wāŋnda̍ ha̍ā chō nyɛ̄ dīa̍a̍ ho̍ō dīo̍ nda̍ kpo̍u̍ mā pīm, ndu̍yɛ̍ mā dēma̍.”

⁴⁴O̍ ko̍ŋ, mi̍ lāŋu̍nɔ̄ bu̍ɛ̍īyo̍ ho̍ō chūā nyɛ̄ dīa̍a̍ ho̍ō mbo̍ pīɔ̄ū wāŋnda̍. Ndu̍yɛ̍ mi̍ ī yɔ̄nu᷄ŋ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ yɛ̍. Mi̍ wāŋnda̍ ha̍ā dīā nyɛ̄ dīa̍a̍ ho̍ō nda̍ kpo̍u̍ ma̍ pūm, ndu̍yɛ̍ ma̍ dēmā.