Read Southern Kisi Māsāā Bɛ̍ndūāā Di̍i̍ŋ Ndūa̍a̍ 5 Bible Online

Māsāā Bɛ̍ndūāā Di̍i̍ŋ Ndūa̍a̍ 5 - Southern Kisi bible

Māsāā Bɛ̍ndūāā Di̍i̍ŋ Ndūa̍a̍ 5

¹Po̍ pi᷅lɛ̍ wa̍ mā vēēlū ndu̍ āā Na̍a̍māŋ, ndu̍ wa̍ so̍vɛ̄i̍ya̍a̍ māsā bɛ̍ndōo̍ Si̍i̍līāā wa̍ kpo̍u̍ bo̍lle̍ŋ ni̍. Pōo̍ ho̍ō o̍ sa̍bū ndɔ̄ɔ̍ ni᷄ŋ wāŋnda̍ Si̍i̍līāā a̍ nɔ̍la̍ ni̍ ma̍ yām ya̍a̍mɔ̍ɔ̍wa̍a̍ ndāa̍. Fo̍ndōle̍, bā o̍ bā ndu̍ o̍o̍ ku̍ɛ̄ sɔ̍ŋgɔ̄ɔ̍ a̍ pūa̍a̍ ndūa̍a̍ chɔ̄ūwāā o̍ wa̍ bōlle̍ŋ nda̍ pɛ̍, kpāāyāa̍ Mɛ̄lɛ̄ka̍ Ya̍a̍wɛ̄ɛ̄ ndu̍ o̍o̍ ke᷅ ndu̍ ni̍ mbō yēm. Le̍ he̍ī, Mi̍ Māsā Bɛ̍ndōo̍ Si̍i̍līāā o̍ ke̍ ndu̍ bɛ̄ɛ̄le̍ŋ ta̍u̍ ta̍u̍. Pōo̍ ho̍ō ku̍u̍ba̍nɔ̍ chɔ̄ū bɛ̄ndōo̍ pīla̍ o̍ wa̍ ni̍, kɛ̍ ndu̍ o̍o̍ nɔ̍ nāā wɔ̄ɔ̍ŋ pūm lēkɔ̄ɔ̍.

²Bōōndi̍i̍ pi᷅lɛ̍ mɛ̄ɛ̍ wāŋnda̍ Si̍i̍līāā a̍ kɔ̍ de᷅l I̍sɔ̄lūɛ̍i̍ya̍ chōo̍ ma̍ pūŋgā nyɛ̄m nda᷄ŋ, ma̍ bīī chūāāmbɔ̄ I̍sɔ̄lūɛ̍i̍nɔ̍ pi᷅lɛ̍ o̍ sɔ̍ŋgɔ̄ kōŋ ni᷄ŋ ma̍ kūānu᷄ŋ a̍ ndu̍. Mɛ̄ɛ̍ nda̍ kūɛ̄ a̍ ndu̍, mbo̍ kɔ̍ wa᷅ la̍nɔ̍ɔ̍ Na̍a̍māŋ o̍ bā māā bu̍ɛ̍ī.

³Pāa̍le̍ pi᷅lɛ̍, mi̍ chūāāmbɔ̄ɔ̍ ho̍ō dīmūl la̍nɔ̍ɔ̍ Na̍a̍māŋ āā, “Nāa̍ wɔ̄ɔ̍ŋ cho̍ ho̍ō māsānɔ̍ nūu̍ lēkɔ̄ɔ̍ wo̍, wāna̍ Mɛ̄lɛ̄ka̍ pīlɛ̍ chō Sāme̍e̍līāā tē ō kūɛ̄ nāa̍ ndu̍ chu̍a̍ pɛ̍, ō nɔ̄lā mbō sīŋgi̍ ndu̍.”

⁴Mɛ̄ɛ̍ Na̍a̍māŋ tu̍e̍ī nyɛ̄ chūāāmbɔ̄ɔ̍ ō dīmi̍ ho̍ō wo̍, mbo̍ kūā nāa̍ māsānɔ̍ ndɔ̄ɔ̍ chūā māsā bɛ̍ndōo̍ Si̍i̍līāā, mbo̍ kɔ̍ do̍u̍nu̍ŋ ndu̍ ko̍na̍ a̍ nyɛ̄ chūāāmbɔ̄ɔ̍ ho̍ō ō dīmi̍ wo̍ o̍kɔ̄ɔ̄.

⁵O̍ ko̍ŋ, mi̍ Māsā bɛ̄ndōo̍ Si̍i̍līāā po̍o̍nyīāā yāu̍wo̍ nāa̍ māsā bɛ̍ndōo̍ le̍ I̍sɔ̄lūɛ̄ī chūā, mbo̍ kē Na̍a̍māŋ le̍ mbō kūɛ̄ a̍ ndu̍. Mbo̍ dīmūl Māsā Bɛ̍ndōo̍ I̍sɔ̄lūɛ̄ī o̍ yāu̍wo̍ ni᷄ŋ āā, “Wānā ya̍ I̍ ve᷅m ho̍ō a̍ yāu̍wo̍ ho̍ō wo̍, ndu̍ yɔ̍nūŋ māā Na̍a̍māŋ ni̍, bu̍ɛ̍ī nūu̍ o̍ cho̍ ni̍. I̍ ve᷅m ndu̍ le̍ mā kɔ̍ chi̍ɔ̍u̍lūl la̍ ndu̍ nāā wɔ̄ɔ̍ŋ cho̍ ndu̍ ho̍ō lēkɔ̄ɔ̍ wo̍.” O̍ ko̍ŋ, mi̍ Na̍a̍māŋ chu̍ā ka̍ni̍ŋ hu̍mbo̍ŋ ŋ̄ lūsu̍l ndɔ̄ɔ̍ wa̍ pa᷅ŋnda̍ŋ kɛ̄mɔ̄ɔ̍ lē ŋɔ᷄mmɛ̍ū a̍ be̍le̍-ŋu̍ɛ̍ɛ̍nu̍ wo̍ŋ, a̍ ko̍o̍līi̍yo̍ŋ lūsu̍llo̍ pa᷅ŋnda̍ŋ kɛ̄mɛ̄ a̍ be̍le̍-ŋu̍ɛ̍ɛ̍nu̍, a̍ dōmāla̍ kɛ̍ndɛ̄ kɛ̍ndɛ̄ la̍ŋ tɔ̍ mbo̍ mālnu᷄ŋ mbo̍ kūā Sāme̍e̍līāā. Mbo̍ kɔ̍ ke᷅ māsā bɛ̄ndōo̍ I̍sɔ̄lūɛ̍i̍ yāu̍ māsā bɛ̄ndōo̍ Si̍i̍līāā o̍ po̍o̍nyi̍a̍l ndu̍ wo̍.

⁶

⁷Mɛ̄ɛ̍ māsā bɛ̍ndōo̍ I̍sɔ̄lūɛ̄ī o̍ to̍fa̍ o̍ yāu̍wo̍ ho̍ō ni᷄ŋ, mbo̍ tāmbū kɔ̄l. Mbo̍ sɛ̄ɛ̄sa᷄ŋ do᷅māa̍ lēkɔ̄ɔ̍. Mbo̍ di̍mī āā, “Vɛ᷅ mī Māsā Bɛ̍ndōo̍ Si̍i̍līāā o̍ ve᷅m wāna̍ nɔ̍ nāā wɔ̄ɔ̍ŋndo̍ wo̍ nāa̍ ya̍ chu̍a̍ le̍ mī hu̍ŋ si̍ŋgī ndu̍, mɛ̄ɛ̍ nda̍ yɔ̄ŋ ko̍ māā ya̍ cho̍ Mɛ̄lɛ̄ka̍ ni̍? Kpāāya̍ Mɛ̄lɛ̄ka̍ nɔ̄ yōōmōo̍ chōo̍ a̍ pīɔ̍mndo̍ wo̍, kpāāyā ko̍ŋ ya̍ I̍ nɔ̍ ni̍? Wāŋnda̍ lā tōfa̍ wɔ̍ i̍sɔ̍ɔ̍! Fi̍nyāa̍ ho̍ō I̍ che᷅ māā nɛ̄īla̍ŋ o̍ cho̍ lɛ̄ nūūwāa̍ nu̍a̍ā ni̍, le̍ mɛ̄ɛ̍ sɔ̍ŋgɔ̄ɔ̍ lōōkū na̍a̍ kīōlū tɛ̄ɛ̄ŋ na̍a̍ nda̍ā yɛ̍.”

⁸Mɛ̄ɛ̍ Īla̍a̍sīā tu̍e̍ī nyɛ᷄ yɔ̍nu̍ŋ ndo̍, mbo̍ yɔ̄ŋ dīōmnde̍ŋ nāa̍ māsā bɛ̍ndōo̍ I̍sɔ̄lūɛ̄ī chu̍a̍ mbo̍ dīmūl ndu̍ āā, “Sīōōŋīī bi̍ī nu̍m le̍ ke̍ŋ te̍ fāllo̍. Yɔ̍ŋ la᷅ŋu̍nɔ̄ kōŋ nāa̍ ya̍ chu̍a̍ na̍nu᷄ŋ, ō cho̍ hūnɔ̄ɔ̍ sīnā māā wa᷅na̍ su̍a̍ā le̍ Mɛ̄lɛ̄ka̍ wo̍ ō chō I̍sɔ̄lūɛ̄ī.”

⁹O̍ ko̍ŋ, mi̍ Na̍a̍māŋ ku̍ā a̍ su̍a̍ā ndūa̍a̍, a̍ nyɛ̄ ndɔ̄ nya̍a̍na᷄ŋ su̍a̍a̍ ā nāŋndo̍, o̍ Īla̍a̍sīā lo̍ bɛ̍ɛ̄, ma̍ kɔ̍ si᷅m o̍ dīō.

¹⁰Mi̍ Īla̍a̍sīā vi̍ām bu̍ɛ̍ī ndɔ̄ɔ̍, māā o̍ kɔ̍ mbō kɔ̍ di̍mūl Na̍a̍māŋ mbō kūɛ̄ Chɔ̍ɔ̍dāŋ o̍ pēēlo̍ mbō kɔ̍ pu̍lu̍ŋ le̍ ŋɔ᷄mmɛ̍ū, ndu̍yɛ̍ māā ō chō sīōŋgɔ̄ɔ̍ sɔ̄lā mī dīāllūŋ ndɔ̍ŋ mīīŋgu̍ kpɔ̍lɔ̄kɔ̍.

¹¹Kɛ̍ mɛ̄ɛ̍ nda̍ kɔ̍ di̍mūl Na̍a̍māŋ sūɛ̍i̍ he̍ī, mbo̍ dūāūnu᷄ŋ tu̍mbe̍. Mbo̍ dīmī āā, “Fi̍nyāa̍ ho̍ō, I̍ cha᷅ ko̍ bɛ̍ɛ̍ a̍a̍ hūnɔ̄ɔ̍ o̍ cho̍ o̍ bɛ̍ɛ̄ na̍nu᷄ŋ ni̍ mbō hu᷄ŋ pi̍ɛ̍ī Mɛ̄lɛ̄ka̍ Ya̍a̍wɛ̄ɛ̄, o̍ cho̍ Mɛ̄lɛ̄ka̍ ndɔ̄ɔ̍ wo̍ le̍ ya̍, o̍ ko̍ŋ kɔ̍ɔ̍lī, mbō kēēlīa̍a̍ ya̍ bāa̍ o̍ nāā wɔ̄ɔ̍ŋ cho̍ ya̍ ho̍ō lēkɔ̄ɔ̍ wo̍ chōo̍ mī se̍ŋgū, ndu̍ o̍ ku̍ā ya̍ he̍ī dīmūl ni̍? Tē ō wa̍ lē lāpēē pɛ̍, ŋ̄ nɔ̄ pēēla̍ŋ Dāma̍si̍kɔ̍ɔ̄, Pīo̍o̍ A̍ba̍nā, a̍ Pīo̍o̍ Fa̍a̍pāā, la̍ŋ la̍ na̍nu᷄ŋ mi̍ lā hīāū bɛ̍ɛ̍ pe̍ēla̍ŋ I̍sɔ̄lūɛ̄ī na̍nu᷄ŋ. Vɛ᷅ ni̍ko̍ ya̍ i̍i̍ pu̍lūŋ o̍ pēēla̍ la̍ŋ mī ya̍ i̍i̍ sɔ̍la̍ sīōŋgɔ̄ɔ̍ le̍, mɛ̄ɛ̍ mī hi᷅ŋ ndɔ̄ Chɔ̍ɔ̍dāŋ na̍nu᷄ŋ?” O̍ ko̍ŋ, mbo̍ mūli̍ŋ kɔ᷄ŋnda̍ŋ o̍ tu̍mbe̍ ka̍lā ka̍lāa̍.

¹²

¹³Kɛ̍ mi̍ bu̍ɛ̍i̍yāā ndūa̍a̍ kūā nāa̍ ndu̍ chu̍a̍, ma̍ dīmūl ndu̍ āā, “Fāllo̍, nda̍ a̍a̍ yɔ̍ŋ bɛ̍ɛ̍ āā kpe̍ku̍ ka̍lā ka̍lā bɛ̄ndōo̍ wāna̍ Mɛ̄lɛ̄ka̍a̍ ho̍ō ndu̍ o̍o̍ ke̍ nu̍m le̍ tōsāa̍ ni̍, māā tē a̍ to̍sa̍ ndu̍ pɛ̍ a̍ sɔ̍la̍ sīōŋgɔ̄ɔ̍, tōsāa̍ ŋ̄ wa̍ ndu̍ ni̍ le̍ hāli̍ kpe̍ŋ mā sēŋgū. Tē ō dīmu̍l nu̍m pɛ̍ āā, kɔ̍ mā kɔ̍ pu̍lu̍ŋ o̍ pēēlo̍, mā sēŋgū a̍ ku̍ē le̍ fāllo̍?”

¹⁴Mɛ̄ɛ̍ nda̍ dīmu̍l ndu̍ le̍nde̍, mi̍ Na̍a̍māŋ ku̍ā Chɔ̍ɔ̍dāŋ o̍ pēēlo̍, mbo̍ kɔ̍ mɛ̍ɛ̍yā lē ŋɔ᷄mmɛ̍ū mɛ̄ɛ̍ Īla̍a̍sīā di̍mu̍l ndu̍ yɛ̍. Ndu̍yɛ̍ mi̍ nāā wɔ̄ɔ̍ŋ wa̍ ndu̍ le̍kɔ̍ɔ̍ wo̍ ō sīāŋgū, mi̍ dīāllūŋ ndɔ᷄ŋ mīīŋgū mi̍ ŋ̄ kpɔ̄lɔ̄kā mɛ̄ɛ̍ dīāllūŋ chūāāmbɔ̄ɔ̍ ŋ̄ wā nu̍a̍ā yɛ̍.

¹⁵O̍ ko̍ŋ kɔ̍ɔ̍lī, mi̍ Na̍a̍māŋ chu̍ā pūa̍a̍ o̍ ku̍ɛ̄ kɔ̄ɔ̄lī wa̍, ma̍ mīīŋgū nāa̍ Īla̍a̍sīā chu̍a̍. Mbo̍ kɔ̍ si᷅m Īla̍a̍sīā lāchī mbo̍ dīmūl ndu̍ āā, āā, “Fāllo̍, I̍ si̍na̍ ni᷅ŋ kpe̍e̍kpe̍i̍ māā ō fūla̍ o̍ Mɛ̄lɛ̄ka̍ I̍sɔ̄lūɛ̍i̍ya̍ kɔ̄ɔ̄lī, māā mɛ̄lɛ̄ka̍ o̍ mɛ̄lɛ̄ka̍ chēle̍ŋ cho̍ lɛ̍ o̍ chi̍e̍ēŋndo̍ chōo̍ le̍.” O̍ ko̍ŋ kɔ̍ɔ̍lī, mbo̍ sōlī nyɛ̄m o̍ ku̍ɛ̄ wo̍ŋ mbo̍ kē Īla̍a̍sīā. Mbo̍ dīmūl ndu̍ āā, “Nyɛ̄ ya̍ I̍ chu̍u̍ nu̍mndo̍ cho̍ ho̍ō ni̍ fāllo̍.”

¹⁶Kɛ̍ mi̍ Īla̍a̍sīā di̍mūl ndu̍ āā, “Mɛ̄lɛ̄ka̍ Ya̍a̍wɛ̄ɛ̄ o̍ cho̍ yōōmū le̍ fɛ̍ɛ̍ŋ a̍ fɛ̍ɛ̍ŋ ndo̍, bu̍ɛ̍ī ndɔ̄ɔ̍ ya̍ I̍ cho̍ ni̍, I̍ me̍na̍ŋ po̍, I̍ bi̍ī nu̍m nyɛ̄ o̍ nyɛ̄ o̍ bā le̍.” Mi̍ Na̍a̍māŋ nyɔ̍ɔ̍lū ndu̍ le̍ mbō bīī nyɛ̄ sɔ̄lāa̍ ho̍ō a̍ dōmāla̍ la̍ŋ, kɛ̍ Īla̍a̍sīā chɛ̍l te̍.

¹⁷Mi̍ Na̍a̍māŋ lo̍ o̍ ko̍ŋ mbo̍ dīmūl ndu̍ āā, “Mɛ̄ɛ̍ ŋ̄ kɛ̄ɛ̍ nyɛ̄ sɔ̄lāa̍ ho̍ō a̍ dōmāla̍ŋ ndāŋ ya̍ o̍ bā yɛ̍, mɛ̄ɛ̍ yāndi̍i̍ I̍ ku̍a̍ndū wɔ̍ pūūlu̍ sōfɛ̍li̍a̍a̍ ŋi̍ɔ̍ɔ̍ŋ ā nɔ̄la̍ mā chūa̍ mī ku̍ɛ̄ a̍ ndu̍ o̍ bā mī kɔ̍ wa᷅ Mɛ̄lɛ̄ka̍ Ya̍a̍wɛ̄ɛ̄, o̍ cho̍ Mɛ̄lɛ̄ka̍ I̍sɔ̄lūɛ̍i̍ya̍ wo̍ sōōlūūwo̍ lēchōo̍ o̍ lɛ̄ŋndē nāāle̍ŋ ni᷄ŋ. Kāni̍, chɔ̍ŋ ni᷅ŋ a̍ hāū, sa̍lā lūāmāā ni̍, sa̍lā yɔ̄ŋāā chēle̍ŋ ni̍, I̍ so̍lī lɛ̍ la̍ŋ o̍ mɛ̄lɛ̄ka̍ o̍ mɛ̍lɛ̄ka̍ chēle̍ŋ ndo̍ le̍, mɛ̄ɛ̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍, o̍ cho̍ Mɛ̄lɛ̄ka̍ I̍sɔ̄lūɛ̍i̍ya̍ wo̍.

¹⁸Kɛ̍ ndu̍yɛ̍, nyɛ̄ ya̍ I̍ ye̍e̍ma̍ mī nyɔ̍ɔ̍lu̍ Mɛ̄lɛ̄ka̍ Ya̍a̍wɛ̄ɛ̍ le̍ ndu̍ wo̍ cho̍ ho̍ō ni̍, te̍le̍ŋ o̍ te̍le̍ŋ tē māsānɔ̍ nūu̍ ō wa̍ kɔ̄la̍ŋ mɛ̄lɛ̄ka̍ Lu̍i̍mɔ̄ŋ sōōlūūwo̍ pɛ̍, ya̍ li̍i̍lā ndu̍ ni̍. Ndu̍yɛ̍ tē I̍ li̍i̍la̍ ndu̍ pɛ̍, ya̍ bɛ̍ɛ̍ mɛ̄ɛ̍ mī tu̍ndu᷄ŋ mī so̍o̍lu̍u̍ ndu̍. Le̍la̍ŋ ā yɔ᷄ŋ bɛ̍ɛ̍ mī ke̍ŋ i̍ wa̍ ī yɔ̄ŋna᷄ŋ, I̍ cho̍ Mɛ̄lɛ̄ka̍ nyɔ̄ɔ̄lōo̍ mbō mēlnu̍ŋ ya̍ le̍ ke̍ŋ.”

¹⁹Mi̍ Īla̍a̍sīā di̍mūl ndu̍ āā, “Tē le̍ ke̍ŋ ni̍, bu̍u̍la̍ŋ te̍, kɔ̍.” O̍ ko̍ŋ, mi̍ Na̍a̍māŋ o̍ ma᷅l mbo̍ bīī mīīŋgōo̍. Mɛ̄ɛ̍ o̍ ma᷄l mbo̍ bīī kɔ̄la̍ŋ, ō kūe̍ bɛ̍ɛ̍ le̍vi᷅l te̍,

²⁰mi̍ Kɛ̍ha̍sī, bu̍ɛ̍i̍ Īla̍a̍sīā wo̍ ō dīmī o̍ kɔ̄l ni᷄ŋ āā, “Māsānɔ̍ nūu̍, le̍ yɛ̄ɛ̍nɛ̍ o̍ cho̍ yɛ̄ lāŋu̍nɔ̄ Si̍i̍lūīānɔ̄ɔ̍ ho̍ō mālɔ̄ɔ̍ mbo̍ wā mīīŋgɔ᷄ŋndo̍ a̍ nyɛ̄m ndɔ̄ŋ mu̍ŋ le̍nde̍ yɛ̍lɛ̍kɛ̍lɛ̍ɛ̍ bɛ̍ndū ō bīi̍ ndu̍ nyɛ̄ o̍ nyɛ̄ o̍ bā le̍. Mu̍ŋ mu̍ŋ ō ku̍ē a̍ mu̍ŋ le̍nde̍ le̍. I̍ me̍na̍ŋ o̍ Mɛ̄lɛ̄ka̍ Ya̍a̍wɛ̄ɛ̄ po̍, Mɛ̄lɛ̄ka̍ cho̍ yōōmū le̍ fɛ̍ɛ̍ŋ a̍ fɛ̍ɛ̍ŋ ndo̍, mɛ̄ɛ̍ mī to᷅l ndu̍ kɔ̄ɔ̄lī mī kɔ̍ sɔ̍lā ŋ̍ ti᷄ŋ.”

²¹O̍ ko̍ŋ, mi̍ Kɛ̍ha̍sī tu̍āl Na̍a̍māŋ kɔ̄ɔ̄lī a̍ kīlta̍ŋ. Mɛ̄ɛ̍ Na̍a̍māŋ to̍fa̍ŋ a̍ mākɔ̄ɔ̄, mbo̍ chā Kɛ̍ha̍sī hūnɔ̄ɔ̍ ndu̍ kɔ̄ɔ̄lī a̍ kīlta̍ŋ. Mi̍ Na̍a̍māŋ o̍ tu̍āl o̍ nyɛ̄ nyāāna᷄ŋ su̍a̍a̍ ā nāŋ ndo̍ chōo̍, mbo̍ kūā ndu̍ lāchī. Mbo̍ nyūnā ndu̍ āā, “Vɛ᷅ hūnɔ̄ɔ̍ ho̍ō, īsɔ̄ɔ̍ ni̍?”

²²Mi̍ Kɛ̍ha̍sī di̍mūl ndu̍ āā, “Nyɛ̄ o̍ nyɛ̄ yɔ̄nu̍ŋ te̍ fāllo̍. Vīōmɔ̄ɔ̍ māsānɔ̍ nūu̍ vēm ya̍ nāa̍ nūm chu̍a̍ ni̍. Wānāa̍ su̍a̍ā le̍ Mɛ̄lɛ̄ka̍ wa̍ a̍ cho̍ o̍ lɛ̄ŋndē īpēmbūle̍ŋ E̍fi̍lūēm nda̍ ā ŋīɔ̍ɔ̍ŋ lāŋga̍ ko̍māl ndu̍ su̍ŋ su̍ŋ le̍ mbō māla̍ nda̍. Le̍la̍ŋ āā ya̍ I̍ hu̍ŋ nyu̍nā nu̍m mī nūm ke̍ ya̍ ka̍ni̍ŋ hu̍mbo᷄ŋ ŋ̄ wa᷅ lu̍su̍llo̍ le̍ pa᷅ŋnda̍ŋ be̍le̍-ŋɔ̍mmɛ̍ū a̍ lā ŋūɛ̍ɛ̍nu̍ wo̍ŋ a̍ dōmāla̍ kɛ̍ndɛ̄ kɛ̍ndɛ̄la̍ŋ lā tīɔ̍ɔ̍ŋ mī yo̍o̍ ndu̍ mbō kɔ̍ ke᷅ nda̍.”

²³Mi̍ Na̍a̍māŋ di̍mūl ndu̍ āā, “Mɛ̄ɛ̍, I̍ ha̍ndū wɔ̍ pa᷅ŋnda̍ŋ be̍le̍-ŋɔ̍mmɛ̍ū a̍ lā ŋūɛ̍ɛ̍nu̍ le̍cho̍ō, mbō kūɛ̄ ka̍ni̍ŋ hu̍mbo̍ŋ pa᷅ŋnda̍ŋ kɛ̄mɛ̄ a̍ be̍le̍-ŋu̍ɛ̍ɛ̍nu̍ (150).” Kɛ̍ha̍sī ndu̍ o̍o̍ ye̍e̍ma̍ mī ndu̍ o̍o̍ kɛ̍ɛ̍ nyɛ̄ o̍ di̍mi̍ wo̍. Kɛ̍ mi̍ Na̍a̍māŋ lo̍ sūɛ̍i̍ nāā ndu̍ chu̍a̍ mbo̍ tīū ndu̍ bā. Mi̍ Na̍a̍māŋ chu̍ā nyɛ̄ sɔ̄lāa̍ ka̍ni̍ŋ hu̍mbo᷄ŋ ŋ̍ wa̍ lūsu̍llo̍ pa᷅ŋnda̍ŋ kɛ̄mɛ̄ a̍ be̍le̍-ŋu̍ɛ̍ɛ̍nu̍ (150) wo̍ŋ mbo̍ dōvī o̍ bɔ̄lɔ̄la̍ŋ ni᷄ŋ la̍ŋ ti̍ɔ̍ɔ̍ŋ mbo̍ yīī. O̍ ko̍ŋ kɔ̍ɔ̍lī mbo̍ chūā dōmāla̍ŋ lā tīɔ̍ɔ̍ŋ mbo̍ hāndū lēchōo̍. Mbo̍ chūā wōlɔ̄ɔ̄lā lāŋ, mbo̍ hāndū bu̍ɛ̍i̍yāā ndūa̍a̍ ā ŋīɔ̍ɔ̍ŋ o̍ lēbōl le̍ mā līīla̍ Kɛ̍ha̍sī. Mi̍ Na̍a̍māŋ o̍ dīmūl nda̍ le̍ mā hīōū pɔ̍ɔ̍ Kɛ̍ha̍sī lāchī a̍ la̍ŋ.

²⁴Mɛ̄ɛ̍ pūa̍a̍ bu̍ɛ̍i̍ya̍a̍ Na̍a̍māŋ nda̍ ā fūūlu̍u̍ o̍ pēmbēi̍ nāa̍ chīɛ̄īyo̍ ō wa̍ wa̍, mi̍ Kɛ̍ha̍sī bi̍ī nda̍ bɔ̄lɔ̄la̍ ti̍ɔ̍ɔ̍ŋndā lāŋ o̍ bā a̍ dōmāla̍ la̍ŋ mbo̍ lūēī o̍ ndu̍ lo̍ chi̍ɛ̍ī ni̍ŋ. O̍ ko̍ŋ kɔ̍ɔ̍lī, mbo̍ dīmūl pu̍a̍a̍ bu̍ɛ̍īya̍ māā ā mīīŋgu᷄ŋ. Mi̍ pūa̍a̍ ā mīīŋgu᷄ŋ.

²⁵Mɛ̄ɛ̍ Kɛ̍ha̍sī lu̍ɛ̍ī chīɛ̄ī ni̍ŋ nāa̍ Īla̍a̍sīā chu̍a̍, mi̍ Īla̍a̍sīā nyu̍nā ndu̍ āā, “Kūɛ̍ɛ̍nɛ̍ ŋ̄ wa̍ yɛ̍ Kɛ̍ha̍sī?” Mbo̍ dīmūl Īla̍a̍sīā āā, “I̍ ve̍ bā o̍ bā le̍ fāllo̍.”

²⁶Mi̍ Īla̍a̍sīā di̍mūl ndu̍ āā, “Kɛ̍ha̍sī, I̍ si̍nā nāa̍ ŋ̄ wa̍ wa̍. Mi̍ chē bɛ̍ɛ̍ I̍ ve̍ lo̍ŋ nu̍a̍ā kpe̍nde̍ke̍le̍ le̍, kɛ̍ nyi̍nā nūu̍ wa̍ lo̍ŋ. Bōōndi̍i̍ Na̍a̍māŋ to᷅l bɛ̍ɛ̍ o̍ nyɛ̄ ndɔ̍ su̍a̍a̍ ā nāŋ ndo̍ chōo̍ mbo̍ kūā nu̍m lāchī ve̍, nyi̍nā nūu̍ wa̍ nya̍ chɔ̄ɔ̍. Kɛ̍ ndu̍yɛ̍ mī di̍mu̍l nu̍m Kɛ̍ha̍sī, chɔ̍ŋ a̍ nyɛ̄ sɔ̄lāā ni̍, kpe̍le̍ yɔ̄mīī ɔ̄li̍fīi̍ ni̍, kpe̍le̍ yɔ̄mīī kūāmāā chēle̍ŋ ni̍, nyɔ̄ɔ̍ŋ mu᷅ŋ ki̍nɛ̍i̍, kɔ̍ bi̍ī a̍ chɔ̄lū, sāā ni̍, nāū ni̍, kɛ̄lɛ̄ŋgāā bu̍ɛ̍ī wa̍li̍, ō cho̍ o̍ ŋ̄ wāā nu̍a̍ā chōo̍ le̍ ŋ̄ nɔ̄ mā bīī mu̍ŋ wānā o̍ wānā o̍ bā le̍.

²⁷Le̍la̍ŋ le̍ nyɛ̄ ŋ̄ tōsa̍ ko̍ŋ ndo̍, nāā wɔ̄ɔ̍ŋ wa̍ Na̍a̍māŋ lēkɔ̄ɔ̍ wo̍, nūm bɛ̍ɛ̍ ā chō nāā kōŋ sɔ̄lā, ndu̍yɛ̍ mī nāā kōŋ ta᷄ŋ a̍ wānāa̍ fu̍lā o̍ yu̍ŋgu̍ nu̍mndo̍ chōo̍ wa̍, mbō sīmnu᷄ŋ na̍ā nya̍ yu̍ŋgu̍ le̍ fɛ̍ɛ̍ŋ a̍ fɛ̍ɛ̍ŋ.” Ndu̍yɛ̍ mi̍ ī yɔ̄nu᷄ŋ mɛ̄ɛ̍ Īla̍a̍sīā di̍mi̍ yɛ̍, dīmīo̍o̍ nu̍a̍ā mi̍ Kɛ̍ha̍sī fa̍ŋa᷄ŋ Īla̍a̍sīā o̍ hɔ̄l lo̍ŋ, mi̍ nāā wɔ̄ɔ̍ŋ wa̍ ko̍ŋ Na̍a̍māŋ lēkɔ̄ɔ̍ wo̍ ō dēl ndu̍ lēkɔ̄ɔ̍, mi̍ kɔ̄ɔ̍le̍ŋ lē mūli᷄ŋ ndu̍ be̍lu᷄ŋ, mi̍ lē dīāndū ndu̍ fo̍ fo̍.