Read Southern Kisi Māsāā Bɛ̍ndūāā Di̍i̍ŋ Ndūa̍a̍ 6 Bible Online

Māsāā Bɛ̍ndūāā Di̍i̍ŋ Ndūa̍a̍ 6 - Southern Kisi bible

Māsāā Bɛ̍ndūāā Di̍i̍ŋ Ndūa̍a̍ 6

¹Pāa̍le̍ pi᷅lɛ̍, mi̍ wānāa̍ su̍a̍ā le̍ Mɛ̄lɛ̄ka̍ wa̍, ā dīmūl Īla̍a̍sīā āā, “Fāllo̍, fo̍ndāŋ na̍a̍ ŋ̄ chō ho̍ō wo̍, ō cho̍ le̍tu̍u̍ a̍ na̍a̍ le̍.

²Le̍la̍ŋ ŋ̄ kūā wɔ̍ o̍ pi̍o̍o̍ Chɔ̍ɔ̍dāŋ mī ŋ̄ kɔ̍ ki̍o̍lū yɔ̄mnde̍ mī ŋ̄ tōōsi̍a̍a̍ fo̍ndāa̍ lo̍ŋ, o̍ wa᷅ fɛ̍kɛ̄ī le̍ na̍a̍ wo̍ mī ŋ̄ wānu᷄ŋ ndo̍ŋ.” Mi̍ Īla̍a̍sīā di̍mūl nda̍ āā, “Ō bɛ̄nda̍ bɔ̍ɔ̍, lā kɔ̍.”

³Mi̍ wānāa̍ su̍a̍ā le̍ Mɛ̄lɛ̄ka̍ wa̍ ō pīlɛ̍ nda̍ tɛ̄ɛ̄ŋ ō dīmūl Īla̍a̍sīā āā, “Fāllo̍ yāndi̍i̍ ŋ̄ kɔ̄ŋnu᷅ŋ na̍a̍ nya̍ā lātūlu̍.” O̍ ko̍ŋ, mi̍ Īla̍a̍sīā chɛ᷅l,

⁴ma̍ kūā nda̍ nda̍ā lātūlu̍. Mɛ̄ɛ̍ nda̍ fūūlu̍u̍ Chɔ̍ɔ̍dāŋ o̍ pēēlo̍, ma̍ kāndū yɔ̄mnde̍ kīōlɔ̄ɔ̍.

⁵Kɛ̍ mi̍ ī yɔ̄nu᷄ŋ, ō pīlɔ̍ɔ̍ lo̍ yɔ̄mndo̍ lɔ̄wāa̍ mi̍ chūēī ndūɛ̍i̍ bɛ̄ŋi̍ŋ mi̍ ī dēlnu᷄ŋ o̍ pēēlo̍. Mbo̍ dīmūl Īla̍a̍sīā āā, “Fāllo̍, chūēī pi̍lɛ̍i̍ ya̍ I̍ yo̍u̍ ve̍ ī dēlnu᷄ŋ ya̍ o̍ bā o̍ pēēlo̍ fɔ̍, I̍ si̍nā kpe̍e̍kpe̍i̍ mɛ̄ɛ̍ ya̍ I̍ cho̍ he̍ī yɔ̄ŋ te̍.”

⁶Mi̍ Īla̍a̍sīā nyu̍nā ndu̍ āā, “Kūɛ̍ɛ̍nɛ̍ kpe̍e̍kpe̍i̍ chūēī kālɛ̄i̍ ī de᷄l lɛ̍?” Mbo̍ chɔ̄m ndu̍ nāa̍ i̍ de̍l la̍. Mi̍ Īla̍a̍sīā ki̍a̍lū sīōndōōle̍ŋ mbo̍ māl o̍ fo̍ndāŋ kōŋ. O̍ ko̍ŋ, mi̍ chūe̍i̍ hēl ō mɛ̄ŋnda̍ŋ chōo̍.

⁷Mi̍ Īla̍a̍sīā di̍mūl ndu̍ āā, “Mi̍ chē chūēī kālɛ̄i̍.” Mi̍ pōo̍ sīɛ̄ndī bāa̍ mbo̍ chūā.

⁸Mi̍ ī yɔ̄nu᷄ŋ mi̍ chɔ̄ūwo̍ ō kīōlū I̍sɔ̄lūɛ̍i̍ya̍ tɛ̄ɛ̄ŋ nda̍ wāŋnda̍ Si̍i̍līāā. Mi̍ māsā bɛ̍ndōo̍ le̍ Si̍i̍līāā o̍ ve̍e̍lū bōlīī pūa̍a̍ ndūa̍a̍ chɔ̄ūwa̍ mbo̍ chɔ̄m nda̍ nāa̍ nda̍ nɔ̄ mā kɔ̍ ki̍o̍lū dɔ̍ɔ̍ŋgɔ̍ɔ̍ le̍ I̍sɔ̄lūɛ̍i̍ya̍ kɔ̄la̍ŋ chīŋa̍la᷅ŋndo̍ wa̍.

⁹Kɛ̍ lɔ̍ɔ̍ pa̍ mā fūūlu̍u̍ o̍ fo̍ndāŋ kōŋ, mi̍ Īla̍a̍sīā, wāna̍ su̍a̍ā le̍ Mɛ̄lɛ̄ka̍ mbo̍ wā I̍sɔ̄lūɛ̄ī yo̍ ō yɔ̄ŋ māsā bɛ̄ndōo̍ I̍sɔ̄lūɛ̍i̍ dīōmnde̍ŋ mbo̍ sīlā ndu̍. Mbo̍ chɔ̄m ndu̍ fo̍ndāŋ wāŋnda̍ ha̍ā ā wa̍ kɔ̄la̍ŋ dɔ̍ɔ̍ŋgɔ̍ɔ̍ kīōlɔ̄ɔ̍ wo̍. Mbo̍ sīlā ndu̍ māā ā ke̍e̍kū kpēŋgīī ke̍ŋ te̍.

¹⁰O̍ ko̍ŋ, mi̍ māsā bɛ̄ndōo̍ le̍ I̍sɔ̄lūɛ̄ī o̍ di̍mūl pūa̍a̍ ndūa̍a̍ chɔ̄ūwāa̍ wa̍ kpēŋgīī ke̍ŋ nda̍, le̍ mā wa̍ mɛ̄ŋgɛ̄lāa̍ o̍ fo̍ndāŋ Īla̍a̍sīā di̍mūl ndu̍ ko̍ŋ ndo̍. Ndu̍yɛ̍ mi̍ he̍ī ī hīāū lāchī a̍ yɔ̄nɔ᷄ŋndo̍ nda̍ tɛ̄ɛ̄ŋ le̍ te̍le̍ŋnda̍ fa̍ŋgā.

¹¹Mi̍ sūɛ̍i̍ he̍ī tɛ̄ɛ̄mbūū māsā bɛ̍ndōo̍ Si̍i̍līāā kɔ̄l ta̍u̍ ta̍u̍ le̍ chɔ̄ɔ̄mūū nda̍ wa̍ nda̍ ho̍ō wo̍. Mbo̍ vēēlū bōlīī pūa̍a̍ ndūa̍a̍ chɔ̄ūwa̍ mbo̍ dīmūl nda̍ āā, “Wāŋndo̍ chō nya̍ tɛ̄ɛ̄ŋ o̍ cho̍ kūmbū I̍sɔ̄lūɛ̍i̍ya̍ wo̍, sūɛ̍i̍ na̍a̍ ŋ̄ kɛ̄ɛ̄sīāā ko̍ na̍nu᷄ŋ ndu̍ ma̍lnūŋ, ō kūā ō dīmūl māsā bɛ̍ndōo̍ I̍sɔ̄lūɛ̍i̍ a̍ ndi̍ o̍kɔ̄ɔ̄.”

¹²Mi̍ bōlīī pūa̍a̍ ndūa̍a̍ chɔ̄ūwa̍ ō pīlɛ̍ dīmūl ndu̍ āā, “Wānā o̍ wānā cho̍ na̍nu᷄ŋ mbō wa̍ kūmbū wānāā ka̍ŋ te̍ fāllo̍. Kɛ̍ po̍ pi᷅lɛ̍ chō I̍sɔ̄lūɛ̄ī mā vēēlū ndu̍ āā Īla̍a̍sīā wāna̍ su̍a̍ā le̍ Mɛ̄lɛ̄ka̍ wo̍ o̍ cho̍ ni̍. Po̍ ko̍ŋ ndu̍ chɔ̍ɔ̍mūū ma̍sā bɛ̍ndōo̍ I̍sɔ̄lūɛ̍i̍ sɔ̄ɔ̍ŋ ni̍, ā yɔ᷄ŋ bɛ̍ɛ̍ mī lā dɔ̄ū bāli̍ nya̍ wānā o̍ nūmndo̍ chi̍ɛ̍ī ni̍ŋ, chɔ̄ɔ̄mūūwo̍ o̍ chɔ̍ɔ̍mūū ndi̍ ni̍.”

¹³Mi̍ māsā bɛ̍ndōo̍ Si̍i̍līāā di̍mūl pūa̍a̍ ndūa̍a̍ chɔ̄ūwa̍ āā, “Lā kɔ̍ mī lā kɔ̍ nyu̍u̍nīāā wāŋnda̍ a̍ ndu̍ o̍kɔ̄ɔ̄, mī lā sīna̍ nāa̍ o̍ cho̍ wa̍. Tē lā sīna̍ dɔ̍ɔ̍ nāa̍ o̍ cho̍ wa̍ pɛ̍, lā hu᷄ŋ di̍mūl la̍. I̍ cho̍ pūa̍a̍ chɔ̄ūwa̍ vīōmɔ̄ɔ̄ mā kɔ̍ bi̍ī ndu̍ mā hīŋ a̍ ndu̍.” Mi̍ pūa̍a̍ kɔ᷄ nyu̍u̍nīāā, ma̍ sāālu᷄ŋ māā Do̍tāŋ chi̍e̍e̍ Īla̍a̍sīā wa̍ īchāli̍ ni̍. Ma̍ mīīŋgū ma̍ kɔ̍ di̍mūl māsā bɛ̍ndōo̍ Si̍i̍līāā a̍ ndi̍ o̍kɔ̄ɔ̄.

¹⁴O̍ ko̍ŋ, mi̍ māsā bɛ̍ndōo̍ Si̍i̍līāā o̍ hɛ̍lī pūa̍a̍ chɔ̄ūwa̍ ku̍ndā bɛ̄ndōo̍ mbo̍ vīām nda̍ a̍ su̍a̍a̍ ndu̍yɛ̍, a̍ nyɛ̄lā nyāāna᷄ŋ nda̍ su̍a̍a̍ ā nāŋ nda̍ŋ le̍ mā kɔ̍ bi̍ī Īla̍a̍sīā. Mi̍ pūa̍a̍ ha̍ā mālnu᷄ŋ a̍ nyūmnda̍ŋ, ma̍ kɔ̍ ba̍lū chi̍o̍o̍ kpɔ̍kɔ̍su̍ nāa̍ Īla̍a̍sīā o̍ wa̍ wa̍.

¹⁵Mɛ̄ɛ̍ pāa̍le̍ŋ lē sɛ̄ dīi̍mā ndɔ̄ɔ̍ mi̍ bu̍ɛ̍i̍ Īla̍a̍sīā wo̍ ō fūlā o̍ bɛ̍ɛ̍ īdīi̍yo̍ pu̍ŋ, mbo̍ chā pūa̍a̍ chɔ̄ūwāā māSi̍i̍līāŋnda̍ lātūlu̍ a̍ su̍a̍ā ndāa̍ chɔ̄ūwa̍, a̍ nyɛ̄lā su̍a̍a̍ ā nāŋ nda̍ŋ, ā wa̍ ā bālāā chi̍o̍o̍ kpɔ̍kɔ̍su̍. Mbo̍ mīīŋgū chīɛ̄ī ni̍ŋ kpu᷅lu̍sīūku̍ mbo̍ kɔ̍ di̍mūl māsānɔ̄ ndɔ̄ɔ̍ Īla̍a̍sīā āā, “Kpōkō, fāllo̍ ŋ̄ cha᷄l nu̍a̍ā kɛ̍ Si̍i̍lūīāŋnda̍ hu᷄ŋ ba̍lū na̍a̍ kpɔ̍kɔ̍su̍ bɛ̍ndū. Vɛ̄ɛ̄ na̍a̍ ŋ̄ chō yɛ̄ he̍ī yɔ̄ŋ?”

¹⁶Mi̍ Īla̍a̍sīā di̍mūl ndu̍ āā, “Sīōōŋīī bi̍ī nu̍m te̍. Pūa̍a̍ chɔ̄ūwāā na̍a̍ ŋ̄ nɔ̄ wa̍ ā hīōū a̍ ba̍lu̍ na̍a̍ ha̍ā wa̍.”

¹⁷Mi̍ Īla̍a̍sīā lo᷅ o̍ ko̍ŋ mbo̍ pīɛ̄ī Mɛ̄lɛ̄ka̍ mbo̍ dīmī āā, “O̍o̍ Mɛ̄lɛ̄ka̍ Ya̍a̍wɛ̄ɛ̄, yāndi̍i̍ ku̍mbi̍ bu̍ɛ̍ī nūu̍ hɔ̄lta̍ŋ mbō chē.” O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ to̍sā a̍ sa̍bū mi̍ lāŋu̍nɔ̄ bu̍ɛ̍īyo̍ ho̍ō ō chā nyɛ̍ wa̍ nda̍ o̍ bālāā wo̍. Mɛ̄ɛ̍ o̍ to̍fa̍ pēmbīi̍ ba̍lu̍ Īla̍a̍sīā ve̍ chōo̍, mbo̍ chā su̍a̍ā a̍ nyɛ̄lā nyāāna᷄ŋnda̍ su̍a̍a̍ ā nāŋ nda̍ŋ ā chō o̍ pēmbēi̍ he̍ī chōo̍ a̍ ti̍u̍wāā si̍lɔ̍. Yīŋnde̍ŋ lē wa̍ su̍a̍a̍ ha̍ā a̍ nyɛ̄la̍ŋ nda᷅ŋ lā kūmbāā kpo̍u̍.

¹⁸Mɛ̄ɛ̍ Si̍i̍lūīāŋnda̍ hīŋ le̍ Īla̍a̍sīā dēlɔ̄ɔ̍ chōo̍, mi̍ Īla̍a̍sīā pi̍ɛ̍ī Mɛ̄lɛ̄ka̍, mbo̍ dīmī āā, “O̍o̍ Mɛ̄lɛ̄ka̍ Ya̍a̍wɛ̄ɛ̄, to̍sa̍ mī pūa̍a̍ chɔ̄ūwa̍ ha̍ā ā sūma̍ o̍ lē pīlɛ̍ ni᷄ŋ kpe̍.” O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ mu̍lī Īla̍a̍sīā dīōm, mbo̍ tōsā nda̍ kpo̍u̍ ma̍ sūmā.

¹⁹Mi̍ Īla̍a̍sīā ku̍ā nāa̍ nda̍ chūā ā chō ā sūmɛ̍i̍ya̍ le̍nde̍, mbo̍ kɔ̍ di̍mūl nda̍ āā, “Wāna̍ nya̍ chō nūūwāa̍ wo̍ ō cho̍ chi̍e̍e̍ na̍nu᷄ŋ te̍ o̍ cho̍ le̍, lā pūɛ̄ɛ̄nu̍ŋ nɛ̍īyo̍. Lā hu᷄ŋ mī kɔ̍ chɔ᷅m nya̍ nāa̍ o̍ cho̍ wa̍.” Mi̍ Īla̍a̍sīā chu̍ā nda̍ mbō kūā a̍ nda̍ Sāme̍e̍līāā chi̍e̍e̍ le̍bo̍llo̍ le̍ I̍sɔ̄lūɛ̄ī.

²⁰Mɛ̄ɛ̍ nda̍ fūūlu̍u̍ Sāme̍e̍līāā, ma̍ hēl chi̍e̍e̍, mi̍ Īla̍a̍sīā pi̍ɛ̍ī Mɛ̄lɛ̄ka̍ mbo̍ dīmī āā, “O̍o̍ Mɛ̄lɛ̄ka̍ Ya̍a̍wɛ̄ɛ̄, yāndi̍i̍ ku̍mbi̍ wāŋnda̍ ha̍ā hɔ̄lta̍ŋ mā mīīŋgu̍ vɛ̄lɛ̄ chɔ̄ɔ̍.” O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ ku̍mbī nda̍ hɔ̄lta̍ŋ ma̍ chā vɛ̄lɛ̄. Mɛ̄ɛ̍ nda̍ tōfa̍, ma̍ sāālu᷄ŋ māā Sāme̍e̍līāā chi̍e̍e̍ kɔ᷅llo̍ kpe̍e̍kpe̍i̍ nda̍ chō ni̍.

²¹Mɛ̄ɛ̍ māsā bɛ̍ndōo̍ I̍sɔ̄lūɛ̄ī o̍ che᷅ nda̍, mbo̍ nyūnā Īla̍a̍sīā āā, “Fāllo̍, vɛ᷅ I̍ di̍u̍ nda̍? I̍ di̍u̍ nda̍ kpo̍u̍?”

²²Kɛ̍ mi̍ Īla̍a̍sīā di̍mūl ndu̍ āā, “Sāko̍, di̍ū nda̍ le̍. A̍ bi̍i̍ wa᷅ŋnda̍ ha̍ā o̍ chɔ̄ū ni᷄ŋ te̍. Le̍la̍ŋ a̍ nɔ̍ di̍ mā di̍u̍ nda̍ le̍. Nyɛ̄ ŋ̄ tōsa̍ wo̍, ke̍ nda̍ nyɛ̄ dīa̍a̍ a̍ mɛ̄ŋnda̍ŋ, tē ā dē pɛ̍, a̍ ma̍l nda̍ ā mīīŋgu̍ nāa̍ māsānɔ̍ ndāa̍ chūā.”

²³O̍ ko̍ŋ, mi̍ māsā bɛ̍ndōo̍ I̍sɔ̄lūɛ̄ī o̍ bɛ̍ɛ̍ndīāā nyɛ̄m dīa̍ŋ ta̍u̍ ta̍u̍ le̍ pūa̍a̍ chɔ̄ūwa̍ ha̍ā, mbo̍ kē nda̍ ma̍ dīā. Mɛ̄ɛ̍ nda̍ chīi̍ nyɛ̄ dīa̍a̍ di̍o̍, mbo̍ māl nda̍ ma̍ mīīŋgū o̍ māsānɔ̍ ndāa̍ lo̍. Mɛ̄ɛ̍ wāŋnda̍ Si̍i̍līāā a̍ che᷅ nyɛ̍ yɔ̍nu̍ŋ ndo̍, mā pɛ̄ŋgī I̍sɔ̄lūɛ̍i̍ya̍ kɔ̄la̍ŋ dēlɔ̄ɔ̍ chōo̍ a̍ sɔ̍ŋgɔ̍ɔ̍.

²⁴Mɛ̄ɛ̍ te̍le̍ŋ ti̍ŋ hīo̍u̍, mi̍ Māsā Bɛ̍ndōo̍ Bɛ̄nīha̍da̍dī, o̍ wa̍ Si̍i̍līāā wo̍, ō chūūŋgīāā pūa̍a̍ ndūa̍a̍ chɔ̄ūwa̍ kpo̍u̍ na̍a̍ pi᷅lɛ̍, mbo̍ chūā nda̍ ma̍ kɔ̍ ba̍lū Sāme̍e̍līāā, ma̍ dūāū ndu̍ o̍ pi̍ŋndo̍ ni᷄ŋ.

²⁵Nyɛ̄ o̍ nyɛ̄ ndu̍ o̍o̍ lu̍e̍ī Sāme̍e̍līāā le̍, ndu̍yɛ̍ nyɛ̄ ndu̍ o̍o̍ che᷅ŋ vɛ̍lɛ̄ lo̍ŋ te̍. O̍ ko̍ŋ, mi̍ nyɛ̄ dīa̍a̍ chūū wāŋnda̍ Sāme̍e̍līāā o̍ bā, mi̍ yīmā bɛ̄ndūa̍ŋ mā dēl Sāme̍e̍līāā kpu̍lɛ̄ŋ. Bōllē sōfɛ̍lɔ̍ɔ̍, ā wa̍ ni᷅ŋ le̍ŋ pīsīo̍o̍ Sāme̍e̍līāā le̍ ka̍ni̍ŋ hu̍mbo̍ŋ lūsu̍llo̍ pa᷅ŋnda̍ŋ lā tīɔ̍ɔ̍ŋ. O̍ ko̍ŋ kɔ̍ɔ̍lī, pōōlā pīīŋnda̍ŋ ko̍bo̍o̍ cha̍ ā wa̍ ndu̍ pīsīo̍o̍ le̍ ka̍ni̍ŋ hu̍mbo̍ŋ lūsu̍llo̍ pa᷅ŋndo̍ nyɛ̄ɛ̄mbɔ̄.

²⁶Pāa̍le̍ pi᷅lɛ̍ lē wa̍, mi̍ māsā bɛ̍ndōo̍ I̍sɔ̄lūɛ̄ī o̍ wa᷅ bālɔ̄ɔ̍ o̍ kpāki̍ ba̍lu̍ chi̍o̍o̍ wo̍ chōo̍. Mɛ̄ɛ̍ o̍ wa̍ bālɔ̄ɔ̍, mi̍ chūā pīlɛ̍ vēēlū ndu̍ chōo̍ cho̍o̍ mbo̍ dīmūl ndu̍ āā, “Yāndi̍i̍ fāllo̍ māsāa̍ ma̍la̍ ya̍ fɔ̍.”

²⁷Mi̍ māsā bɛ̍ndōo̍ I̍sɔ̄lūɛ̄ī di̍mūl ndu̍ āā, “Tē Mɛ̄lɛ̄ka̍ Ya̍a̍wɛ̄ɛ̄ o̍ māla̍ nu̍m te̍, ya̍ nɔ̍lā nu̍m mālā ni̍? I̍ nɔ̍ yɛ̍ nyɛ̄ dīāā, ɔ̄ɔ̄ ma̍mu̍ɛ̍i̍[3] le̍ mī ke̍ nu̍m te̍, vɛ̄ɛ̍nɛ̍ ya̍ I̍ ma̍lā yɛ̍ nu̍m?”

²⁸Mi̍ māsā bɛ̍ndōo̍ I̍sɔ̄lūɛ̄ī o̍ nyu̍nā ndu̍ āā, “Ō yɛ̄ɛ̍nɛ̍ cho̍ yɛ̄ bā nūm ha̍vɛ̍i̍yo̍?” Mi̍ chūa̍a̍ dīmūl ndu̍ āā, “Na̍a̍ chāa̍ŋ nī pi᷅lɛ̍ ŋ̍ mɛ̍i̍ ni̍ le̍ mī ŋ̄ dīu̍ pūa̍a̍ nāa̍ mī ŋ̄ dē. Mbo̍ dīmūl la̍ māā na̍a̍ ŋ̄ di̍o̍ fɛ̍lɛ̍ŋ o̍ nu̍u̍, māā dīi̍mā ndɔ̄ɔ̍ pīlɔ̍ɔ̍ ŋ̄ dē vɛ̄lɛ̄ o̍ ndɔ̍ɔ̍.

²⁹O̍ ko̍ŋ, mi̍ ŋ̄ dīā po̍ nūu̍ pāa̍le̍ tāse̍le̍ŋ, dīi̍mā ndɔ̄ɔ̍ mɛ̄ɛ̍ ya̍ I̍ di̍mu̍l ndu̍ le̍ mī ŋ̄ dē vɛ̄lɛ̄ po̍ ndɔ̍ɔ̍, mbo̍ kɛ̄ɛ̄, mbo̍ chūā ndu̍ mbo̍ kɔ̍ vi̍ōŋ ndu̍.”

³⁰Mɛ̄ɛ̍ māsā bɛ̍ndōo̍ I̍sɔ̄lūɛ̄ī o̍ tu̍e̍i̍ sūɛ̍i̍ he̍ī, mi̍ kɔ̄l ndɔ̄ɔ̍ tāmbū, mbo̍ sɛ̄ɛ̄sīa̍ŋ do᷅māa̍ lēkɔ̄ɔ̍ le̍ kɔ̄l ndɔ̄ tāmbɛ̍i̍yo̍ chɔ̄mndo̍. Ndu̍yɛ̍ nyɛ̄lā lābɛ̍kīla̍ŋ lā wa̍ ndu̍ lēkɔ̄ɔ̍ o̍ dōmāa̍ bɛ̄ŋgu̍, bālɔ̄ɔ̄ o̍ wa̍ ko̍ŋ o̍ kpākīo̍o̍ chōo̍ wo̍. Wānāa̍ wa̍ o̍ kpākīo̍o̍ hōlnɔ᷄ŋndo̍ wa̍, mɛ̄ɛ̍ nda̍ nu̍a̍, ma̍ chā ndu̍ ō chō bālɔ̄ɔ̍ o̍ kpākīo̍o̍ chōo̍ a̍ nyɛ̄lā lābɛ̍kīlā lāŋ lēkɔ̄ɔ̍.

³¹Mi̍ māsā bɛ̍ndōo̍ I̍sɔ̄lūɛ̄ī lo᷅ o̍ ko̍ŋ mbo̍ mēna᷄ŋ mbo̍ dīmī āā, “Īla̍a̍sīā ndu̍ fɔ̍, tē ō lɔ᷄l hāū le̍ ndu̍ bōlle̍ŋ kīōlɔ̄ɔ̍ pɛ̍ Mɛ̄lɛ̄ka̍ dīi̍ ya̍ pɛ̍.”

³²O̍ ko̍ŋ kɔ̍ɔ̍lī, mbo̍ sōlī wāŋndo̍ mbo̍ vīām ndu̍ Īla̍a̍sīā kɔ̄ɔ̄lī. Īla̍a̍sīā wa̍ īchāli̍ o̍ ndu̍ lo̍ chi̍ɛ̍ī ni̍ŋ. Wāŋ bɛ̄ndūāā chi̍e̍e̍ya̍ nda̍ a̍a̍ ku̍ɛ̄ ndu̍ yīlɔ̄ɔ̍ a̍ te̍le̍ŋ ko̍ŋ ki̍nɛ̍i̍, ā wa̍ īchāli̍ nda̍ nda̍ā. Lɔ̍ɔ̍ pa̍ mi̍ wāna̍ māsā bɛ̍ndōo̍ vēm Īla̍a̍sīā kɔ̄ɔ̄lī wo̍ ō fūūlūū, mi̍ Īla̍a̍sīā di̍mūl wāŋ bɛ̄ndūāā chi̍e̍e̍ya̍a̍ ku̍ɛ̄ ndu̍ yīlɔ̄ɔ̍ wa̍ āā, “Fi̍nyā dīyāā ko̍ŋ ō yēēma̍ le̍ ya̍ dīyɔ̄ɔ̍. Ō vēm wāŋndo̍ le̍ mbō hu᷄ŋ ki̍o̍lū ya̍ bōlle̍ŋ. Kɛ̍ tē wāna̍ o̍ ve᷅m ko̍ŋ ndo̍ hīŋ pɛ̍, lā chɛ᷅l ndu̍ mbō lūɛ̄ī chīɛ̄ī ni̍ŋ te̍, lā kīnda̍ di̍o̍o̍. I̍ si̍nā māā ō cho̍ wa̍nā ko̍ŋ ndu̍ pīlɛ̍ le̍ cho̍ hūnɔ̄ɔ̍ le̍, māsānɔ̍ ndɔ̄ɔ̍ chō ndu̍ kɔ̄ɔ̄lī.”

³³Īla̍a̍sīā o̍ me̍i̍ bɛ̍ɛ̍ so̍ndō le̍, mi̍ māsā bɛ̍ndōo̍ I̍sɔ̄lūɛ̄ī fu̍lā lēbōl. Mi̍ māsā bɛ̍ndōo̍ I̍sɔ̄lūɛ̄ī di̍mī āā, “Mɛ̄lɛ̄ka̍ Ya̍a̍wɛ̄ɛ̍ to̍sa̍ ni̍ mi̍ dɛ̍nɛ̍ pa̍lāā bɛ̄ndōo̍ ho̍ō ō tūāl na̍a̍ chōo̍. Le̍ yɛ̄ɛ̍nɛ̍ ya̍ I̍ cha᷅l lɛ̍ vɛ̄lɛ̄ ndu̍ chūm le̍ mbō māla̍ na̍a̍?”