Read Southern Kisi Māsāā Bɛ̍ndūāā Di̍i̍ŋ Ndūa̍a̍ 7 Bible Online

Māsāā Bɛ̍ndūāā Di̍i̍ŋ Ndūa̍a̍ 7 - Southern Kisi bible

Māsāā Bɛ̍ndūāā Di̍i̍ŋ Ndūa̍a̍ 7

¹Mi̍ Īla̍a̍sīā di̍mūl māsā bɛ̍ndōo̍ le̍ I̍sɔ̄lūɛ̄ī āā, “Ya̍ŋ ndɔ̍ ni᷅la̍ŋ mā tūēī yōōŋgū Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ māā ya̍ I̍ di̍mu̍l nu̍m ndo̍. Ō dīmi̍ māā sīɔ̄dīi̍ te̍le̍ŋ wa̍ā nu̍a̍ā nyɛ̄ dīa̍a̍ chō wā Sāme̍e̍līāā mbō hɔ̄ba̍. Kōlo̍ ŋ̄wi̍tīi̍ kɛ̍ndɛ̄ kɛ̍ndɔ̄ɔ̍, ō lūsu̍l ndɔ̄ɔ̍ chō le̍ pa᷅ŋnda̍ŋ tɔ̍ ɔ̄ɔ̄, ba̍a̍līi̍ŋ wa᷅ lu̍su̍llo̍ le̍ pa᷅ŋnda̍ŋ bi̍dīi̍ŋ ndo̍ŋ, ā wā ni̍ŋ mu̍ŋ pīsīo̍o̍ sɔ̍ŋgɔ̍ nyɛ̄ fo̍ndō.”

²Mi̍ wāna̍ ma̍ndā ma̍sā bɛ̍ndōo̍ I̍sɔ̄lūɛ̄ī, ma̍ kūā nda̍ ndu̍ wo̍ ō dīmūl Īla̍a̍sīā āā, “Bɔ̄, I̍ la̍a̍la̍ŋ ke̍ŋ te̍. Ā yɔ᷄ŋ bɛ̍ɛ̍ mī Mɛ̄lɛ̄ka̍ Ya̍a̍wɛ̄ɛ̄ o̍ ku̍mbi̍ ha̍la̍a̍ mbō tūsi̍ nyɛ̄ dīa̍a̍ lɛ̄ŋ na̍nu᷄ŋ, nyɛ̄ dīa̍a̍ hɔ̍bā si̍ɔ̍dīi̍ mbō tōl ba̍a̍ le̍nde̍ le̍.” Mi̍ Īla̍a̍sīā di̍mūl ndu̍ āā, “Ā chō he̍ī chɔ̄ a̍ hɔ̄ltē nūmnde̍ŋ pɛ̍ɛ̍ŋ mī ī yɔ̄nu̍ŋ, kɛ̍ nūm a̍ cho̍ nyɛ̍ dīāā kālāa̍ mīɔ̄ɔ̄nɔ᷄ŋ o̍ sōndō le̍.”

³Ndu̍yɛ̍ pūa̍a̍ pūm, ā nāā wɔ̄ɔ̍ŋ pūm ō wa̍ lēkɔ̄ɔ̍ wa̍, ā wa̍ īchāli̍ o̍ dīō kpākīo̍o̍ Sāme̍e̍līāā nda̍ hi̍ɔ̍ɔ̍lu̍. Mi̍ pūa̍a̍ ha̍ā ā dīmu̍la᷅ŋ āā, “Tē ŋ̄ lo̍ cha᷄lle̍ he̍ī pɛ̍, yīa̍a̍ŋ mā chō na̍a̍ dīū.

⁴Ndu̍yɛ̍ ŋ̄ kɔ̍ bɛ̍ɛ̍ vɛ̍lɛ̄ chi̍e̍e̍, nyɛ̄ dīāā cho̍ lo̍ŋ te̍, chūūwo̍ ko̍ni̍ na̍a̍ ŋ̄ chō a̍ yīa̍a̍ŋ ni̍. Ŋ̄ cha᷄l vɛ̍lɛ̄ bɛ̍ɛ̍ na̍nu᷄ŋ wūo̍o̍ ko̍ni̍ na̍a̍ ŋ̄ chō ni̍. Le̍la̍ŋ ŋ̄ kɔ̄ŋnu᷅ŋ o̍ dɔ̍ɔ̍ŋgɔ̍ Si̍i̍lūīāŋnda̍ ni᷄ŋ. Kɛ̄lɛ̄ŋgāā mā kɔ̍ yi̍ya᷄ŋ na̍a̍ chōo̍ mā chīīndi̍a̍a̍ yōōmūlā nāāla̍ŋ. Tē ā wa̍ yɛ̄ na̍a̍ dīyɔ̄ɔ̄ pɛ̍, ā dīī na̍a̍. Kāni̍ pīɔ̍m ka̍lāa̍ ndu̍ ŋ̄ nɔ̄ le̍ ndu̍ sɔ̄la̍a̍.

⁵Nyūmnda̍ŋ kāndɔ̄ɔ̍ tōlɔ̄ɔ̍ ki̍nɛ̍i̍, mi̍ pūa̍a̍ ha̍ā ā cha᷄ŋ ma̍ kūā o̍ dɔ̍ɔ̍ŋgɔ̍ Si̍i̍lūīāŋnda̍. Kɛ̍ mɛ̄ɛ̍ nda̍ fūūlu̍u̍ o̍ dɔ̍ɔ̍ŋgɔ̍ Si̍i̍lūīāŋnda̍ īkɛ̄i̍ a̍ se̍e̍lu̍ŋ wānā pi᷅lɛ̍ bɛ̍ɛ̍ le̍. Mi̍ ī yɔ̄nu᷄ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ to̍sā mi̍ wāŋnda̍ Si̍i̍līāā a̍ tu̍e̍ī bɔ̄ɔ̄lūū bɛ̄ndōo̍, mɛ̄ɛ̍ pūa̍a̍ chɔ̄ūwa̍ ā wā nu̍a̍ā kɔ̄la̍ŋ ku̍ndā bɛ̄ndōo̍ o̍ su̍a̍ā chōo̍, a̍ o̍ nyɛ̄lā su̍a̍a̍ ā nāŋ nda̍ŋ ni᷄ŋ mī īdīkī dīkīī bɛ̄ndūīī ī wa̍ sūɛ̍i̍ yɛ̍.” O̍ ko̍ŋ mī sīōōŋīī bɛ̄ndūe̍i̍ bīī pūa̍a̍ Si̍i̍līāā, ma̍ dīmu̍la᷅ŋ āā, “Kpōkō kpōkō, kpūndɛ̍ bɛ̄ndōo̍ kōma̍l na̍a̍ fɔ̍. Māsā Bɛ̍ndōo̍ I̍sɔ̄lūɛ̄ī o̍ kɔ̍ hi̍o̍ū māsa̍ Hi̍ta̍i̍tīi̍ya̍ kɔ̄ɔ̄lī, a̍ māsā bɛ̍ndōo̍ I̍chi̍pī le̍ na̍a̍ hūnɔ̄ɔ̍ dēlɔ̄ɔ̍ chōo̍, nda̍ kpo̍so̍ŋ cho̍ hūnɔ̄ɔ̍ ho̍ō īdīkī dīkīe̍i̍ ni̍.”

⁶

⁷O̍ ko̍ŋ, ma̍ yōm a̍ kīlta̍ŋ ma̍ mɛ̄ī dɔ̍ɔ̍ŋgɔ̍ɔ̍ le̍nde̍ yɛ̍lɛ̍kɛ̍lɛ̍ɛ̍ bɛ̍ndū, ā chūe̍ nyɛ᷅ o̍ nyɛ̄ le̍. Tɛ̍ndīi̍la̍ ndāla̍ lɔ̍lāā la̍ŋ ni̍, a̍ su̍a̍ā ndāa̍, a̍ sōfɛ̍li̍a̍a̍ ndāa̍, mu̍ŋ bɛ̍ɛ̍ kpo̍u̍ ma̍ mɛ̄ī ma̍ nyāānu᷄ŋ le̍ mā chīīndi̍a̍a̍ yōōmūlā ndāla̍ŋ. Wāŋndo̍ ō pīlɛ̍ bɛ̍ɛ̍ o̍ lo̍ o̍ dɔ̍ɔ̍ŋgɔ̍ɔ̍ ni᷄ŋ i̍chɔ̍l ko̍ŋ te̍, nda̍ kpo̍u̍ ma̍ nyāānu̍ŋ.

⁸Mɛ̄ɛ̍ pūa̍a̍ hi̍ɔ̍ɔ̍lu̍a̍a̍ ha̍ā ā fūūlu̍u̍ o̍ dɔ̍ɔ̍ŋgɔ̍ kōŋ īkɛ̄i̍, ma̍ chā māā dɔ̍ɔ̍ŋgɔ̍ɔ̍ lo̍ fo̍ndō fu̍u̍, māā wāŋndo̍ ō pīlɛ̍ bɛ̍ɛ̍ ō ve̍ lo̍ŋ te̍. O̍ ko̍ŋ, ma̍ lūɛ̄ī o̍ tɛ̍ndīi̍yo̍ ō pīlɛ̍ ni᷄ŋ, nyɛ̄ dīa̍a̍ wa̍ lo̍ŋ ndo̍ ni̍, a̍ mūɛ̄īma̍ wa̍ lo̍ŋ nda̍ŋ, ma̍ chāl ma̍ dīā nyɛ̄ dīāā kōŋ ma̍ kōl vɛ̄lɛ̄ mūɛ̄īmā māŋ. O̍ ko̍ŋ kɔ̍ɔ̍lī, ka̍ni̍ŋ hu̍mbu᷄ŋ wa̍ lo̍ŋ ndo̍ŋ ni̍, a̍ ko̍o̍līi̍yo̍ŋ, a̍ nyɛ̄lā chūɛ̄ɛ̄na᷄ŋnda̍ nda̍ kōma̍l la̍ŋ, ma̍ chūā ma̍ kɔ̍ vi̍ōŋ, ma̍ hūŋ vɛ̄lɛ̄. Ma̍ lūɛ̄ī vɛ̄lɛ̄ o̍ tɛ̍ndīi̍yo̍ ō pīlɛ̍ ni᷄ŋ, nyɛ̄ o̍ nyɛ̍ wa̍ lo̍ŋ ma̍ chūā kpo̍u̍ ma̍ kɔ̍ vi̍ōŋ.

⁹O̍ ko̍ŋ kɔ̍ɔ̍lī, ma̍ dīmu̍la᷅ŋ āā, “Ō cho̍ nyɛ᷅ kɛ̄ndɛ̄ le̍ na̍a̍ ŋ̄ chō ho̍ō tōsāa̍ le̍. Yōōŋgū kɛ̄ndɔ̄ɔ̍ ho̍ō, ō cho̍ yo̍ōŋgu̍ lo̍ na̍a̍ tɛ̄ɛ̄ŋ na̍a̍ hi̍ɔ̍ɔ̍lu̍, wānāā chēle̍ŋ ā si̍nā a̍ ndu̍ o̍kɔ̄ɔ̄ le̍ le̍. Chɔ̍ŋ na̍nu᷄ŋ a̍ pāa̍le̍ŋ sīɔ̄dīi̍ tē ŋ̄ dīmu̍l wa̍nā o̍ wānā a̍ ndi̍ o̍kɔ̄ɔ̄ le̍, mī ī lo̍ na̍a̍ tɛ̄ɛ̄ŋ le̍nde̍, dɛ̍nɛ̍ pa̍lāa̍ na̍a̍ ŋ̄ sɔ̄lā ni̍. Le̍la̍ŋ ŋ̄ kɔ̄ŋnu᷅ŋ mī ŋ̄ kɔ̍ di̍mūl wānāa̍ cho̍ o̍ chīɛ̄ī lēmāsāa̍ ni᷄ŋ nda̍, yōōŋgū kɛ̄ndɔ̄ɔ̍ ho̍ō.”

¹⁰O̍ ko̍ŋ, ma̍ cha᷄ŋ ma̍ mīīŋgū Sāme̍e̍līāā chi̍e̍e̍. Mɛ̄ɛ̍ nda̍ fūūlu̍u̍ o̍ dīō kpāki̍ chi̍o̍o̍, ma̍ vēēlū wānāa̍ wa̍ dīō kpāki̍ chi̍o̍o̍ māndāa̍ wa̍, ma̍ dīmūl nda̍ āā, “ŋ̄ mālnu̍ŋ mi̍ ŋ̄ kūā o̍ dɔ̍ɔ̍ŋgɔ̍ pūa̍a̍ Si̍i̍līāā, kɛ̍ ŋ̄ kōma̍l wa̍nā pi᷅lɛ̍ bɛ̍ɛ̍ le̍. Su̍a̍ā ndāa̍, a̍ sōfɛ̍li̍a̍a̍ ndāa̍ ko̍ni̍ na̍a̍ ŋ̄ kōma̍l ā bāāyīāā ni̍, kɛ̍ kpɛ̍kɛ̍lɛ̍ bɛ̍ɛ̍ ŋ̄ tūi̍i̍ wa̍nā i̍sɔ̍ɔ̍ le̍. Ndu̍yɛ̍ tɛ̍ndīi̍la̍ ndāla̍ mālɔ̄la̍ŋ lā chō īsīsi̍ le̍nde̍ mɛ̄ɛ̍ nda̍ sīmi̍ la̍ŋ yɛ̍.”

¹¹O̍ ko̍ŋ, mi̍ wānāa̍ ma̍ndā di̍ō kpāki̍ chi̍o̍o̍ wa̍, ā yōndā sūɛ̍i̍ he̍ī chōo̍ cho̍o̍ kpe̍le̍ŋ. Mi̍ wānāa̍ wa̍ o̍ chīɛ̄ī lēmāsāa̍ ni᷄ŋ nda̍ ā tūɛ̄ī a̍ ndi̍ o̍kɔ̄ɔ̄.

¹²Ndu̍yɛ̍ pāa̍le̍ŋ le̍e̍ se̍ wɔ̍ le̍, wāŋnda̍ wa̍ wɔ̄ īhīni̍. Mɛ̄ɛ̍ māsā bɛ̍ndōo̍ I̍sɔ̄lūɛ̄ī o̍ tu̍e̍ī sūɛ̍i̍ he̍ī, mbo̍ fūlā, mbo̍ dīmūl bōlīī pūa̍a̍ ndūa̍a̍ chɔ̄ūwa̍ āā, “I̍ chɔ᷅m ndɔ̍ nyā nyɛ̄ wāŋnda̍ Si̍i̍līāā a̍ yi̍ya̍ŋ ndo̍. Le̍ mɛ̄ɛ̍ nda̍ sīna̍ māā yīa̍a̍ŋ mā chō na̍a̍ chōo̍ yɛ̍, nyɛ̄ kōŋ nda̍ kūɛ̄ ni̍ ma̍ kɔ̍ vi̍ŋi᷄ŋ, māā tē ŋ̄ fūla̍ dɔ̍ɔ̍ pɛ̍ mī ŋ̄ kūɛ̄ kēlā nyɛ̄ dīa̍a̍, ā de᷄l na̍a̍ chōo̍ ā bīu̍ na̍a̍, o̍ ko̍ŋ kɔ̍ɔ̍lī, ā hu᷄ŋ bi̍ī chi̍o̍o̍.”

¹³Mi̍ bōlīī pūa̍a̍ ndūa̍a̍ chɔ̄ūwa̍ ō pīlɛ̍ dīmūl ndu̍ āā, “Fāllo̍, ŋ̄ sōli᷅ŋ ndɔ̄ pūa̍a̍ mī ŋ̄ vēm nda̍ a̍ su̍a̍a̍ lo̍ ha̍ā na̍a̍ o̍ bā wa̍ ā ŋūɛ̍ɛ̍nu̍ mā kɔ̍ mɛ̍ɛ̍nda᷄ŋ mā sīna̍ nyɛ̍ yɔ̍nu̍ŋ ndo̍. Tē ā kɔ̍ di̍ī yɛ̍ nda̍ pɛ̍ mɛ̄ɛ̍ pīɔ̍m pi᷅lɔ̍ɔ̍ ko̍ni̍, kāni̍ ā lo̍ bɛ̍ɛ̍ na̍nu᷄ŋ na̍a̍ kpo̍u̍ ŋ̄ chō pīɔ̍mndo̍ sɔ̄lā na̍a̍ nda̍ā lātūlu̍.”

¹⁴O̍ ko̍ŋ, ma̍ sōlī pūa̍a̍ ma̍ vīām nda̍ a̍ nyɛ̄lā su̍a̍ā ā nāŋ nda̍ŋ lā tīɔ̍ɔ̍ŋ le̍ mā kɔ̍ si̍nā nyɛ̍ cho̍ yɔ̄nɔ᷄ŋ ndo̍ wo̍. Mi̍ māsā bɛ̍ndōo̍ I̍sɔ̄lūɛ̄ī o̍ di̍mūl pūa̍a̍ nda̍ vēm a̍ nyɛ̄lā lāŋ nda̍ āā, “Lā kɔ̍ mī lā kɔ̍ mɛ̍ɛ̍nda᷄ŋ, mī sīna̍ nyɛ̄ kpe̍e̍kpe̍i̍ yɔ̍nu̍ŋ ndo̍.”

¹⁵Mi̍ pūa̍a̍ ha̍ā mālnu᷄ŋ ma̍ kūā, mā lō nɛ̄i̍ pūa̍a̍ Si̍i̍līāā a̍ ku̍ɛ̄ wo̍ dīōmɔ̄ɔ̍ ha̍a̍a̍ ma̍ fūūlūū pɔ̍ɔ̍li̍ Chɔ̍ɔ̍dāŋ o̍ pēēlo̍. Ndu̍yɛ̍ ā fūūlu̍u̍ le̍nde̍ Chɔ̍ɔ̍dāŋ, dōmāla̍ pūa̍a̍ Si̍i̍līāā a̍ mɛ̍li̍ nu̍a̍ā o̍ nɛ̄ī a̍ wōlɔ̄ɔ̄lā ndāla̍ chɔ̄ūla̍ŋ o̍ kīlta̍ŋ ni᷄ŋ nda̍ŋ, ā wa̍ la̍ŋ kōmāllo̍ lā mɛ̄līāā lɛ̄ŋ. O̍ ko̍ŋ kɔ̍ɔ̍lī, mi̍ pūa̍a̍ ki̍i̍la̍a̍ nda̍ vēm ha̍ā wa̍ ā mīīŋgū, ma̍ kɔ̍ do̍u̍nu᷄ŋ ma̍sā bɛ̍ndōo̍ ko̍na̍.

¹⁶Mɛ̄ɛ̍ wāŋnda̍ Sāme̍e̍līāā a̍ tu̍e̍ī ko̍na̍ pūa̍a̍ ā dɔ̄ɔ̄nu᷄ŋndo̍, ma̍ fu̍lā a̍ kīlta̍ŋ ma̍ kɔ̍ de᷅l dɔ̍ɔ̍ŋgɔ̍ Si̍i̍lūīāŋnda̍ chōo̍, ma̍ pūŋgā nyɛ̄ o̍ nyɛ̍ wa̍ lo̍ŋ, ma̍ kūānu᷄ŋ a̍ mu̍ŋ. Ndu̍yɛ̍ mi̍ ī yɔ̄nu᷄ŋ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ yɛ̍, mi̍ wāŋnda̍ Sāme̍e̍līāā a̍ sɔ̄lā nyɛ̄ dīa̍a̍ mi̍ nyɛ̄ dīa̍a̍ hɔ̄bā nda̍ o̍ bā. Mɛ̄ɛ̍ nyɛ̄ dīa̍a̍ hɔ̄ba̍ nda̍ o̍ bā te̍i̍, kōlo̍ ŋ̄wi̍tīi̍ kɛ̍ndɛ̄ kɛ̍ndɔ̄ɔ̍ pa᷅ŋnda̍ŋ tɔ̍ ɔ̄ɔ̄ ba̍a̍līi̍ŋ lūsu̍l ndɔ̄ɔ̍ wā le̍ pa᷅ŋnda̍ŋ bi̍dīi̍ŋ ndo̍ŋ, mi̍ ŋ̄ dēl ba̍a̍ sɔ̍ŋgɔ̍ nyɛ̄ fo̍ndō fu̍u̍.

¹⁷Ndu̍yɛ̍ wāna̍ ndu̍ o̍o̍ ma̍ndā ma̍sāa̍ bɛ̍ndōo̍ I̍sɔ̄lūɛ̄ī mi̍ nda̍ a̍a̍ ku̍ā nda̍ māsāa̍ lātūlu̍ o̍ Īla̍a̍sīā lo̍ wo̍, ndu̍ māsāa̍ ndu̍ o̍o̍ kɛ̍si̍ pāa̍le̍ le̍ŋ le̍ dīō kpāki̍ chi̍o̍o̍ māndāa̍ ni̍. Kɛ̍ bōōndi̍i̍ wāŋnda̍ wa̍ kɔ̄la̍ŋ le̍ dɔ̍ɔ̍ŋgɔ̍ Si̍i̍lūīāŋnda̍ dēlɔ̄ɔ̍ chōo̍ ve̍, wāŋnda̍ lo̍ hīōūwɔ̄ɔ̍ a̍ kīlta̍ŋ ma̍ kēī lāŋu̍nɔ̄ɔ̍ ho̍ō chōo̍ ma̍ dīī ndu̍. O̍ ko̍ŋ, mi̍ nyɛ̄ Īla̍a̍sīā, wāna̍ su̍a̍ā le̍ Mɛ̄lɛ̄ka̍ wo̍ ō dīmi̍ wo̍, ō chīŋā lāsōndō.

¹⁸Bōōndi̍i̍ māsā bɛ̍ndōo̍ I̍sɔ̄lūɛ̄ī o̍ ku̍ɛ̄ le̍ Īla̍a̍sīā dīyɔ̄ɔ̍ ve̍, fi̍nyāa̍ ho̍ō o̍ ku̍ɛ̄ kɔ̄ɔ̄lī ni̍. Mɛ̄ɛ̍ Īla̍a̍sīā di̍mu̍l māsā bɛ̍ndōo̍ I̍sɔ̄lūɛ̄ī āā, “Sīɔ̄dīi̍ kōlo̍ ŋ̄wi̍tīi̍ kɛ̍ndɛ̄ kɛ̍ndɔ̄ɔ̍, o̍ cho̍ lūsu̍llo̍ le̍ pa᷅ŋnda̍ŋ tɔ̍ wo̍ ō chō wā ba̍a̍ ka̍ni̍i̍ hu̍mbūe̍i̍ ī pīlɛ̍, ɔ̄ɔ̄ ba̍a̍līi̍ŋ lūsu̍l ndɔ̄ɔ̍ chō le̍ pa᷅ŋnda̍ŋ bi̍dīi̍ŋ ndo̍ŋ ā wā ni̍ŋ mu̍ŋ pīsīo̍o̍ sɔ̍ŋgɔ̍ nyɛ̄ fo̍ndō fu̍u̍,

¹⁹fi̍nyāa̍ ho̍ō ndu̍ ndu̍ o̍o̍ sɛ̍ɛ̍ŋgi̍a̍a̍ ni̍, mbo̍ dīmūl Īla̍a̍sīā māā, ā yɔ᷄ŋ bɛ̍ɛ̍ mī Mɛ̄lɛ̄ka̍ Ya̍a̍wɛ̄ɛ̄ o̍ ku̍mbi̍ ha̍la̍a̍, mbō tūsi̍ nyɛ̄ dīa̍a̍ lɛ̄ŋ na̍nu᷄ŋ, māā ke̍ŋ i̍ yɔ̍nūŋ te̍.” O̍ ko̍ŋ, mi̍ Īla̍a̍sīā di̍mūl ndu̍, māā ō chō he̍ī chɔ̄ a̍ hɔ̄ltē ndɔ̄le̍ŋ pɛ̍ɛ̍ŋ, kɛ̍ ndu̍yɛ̍ māā ndu̍ cho̍ nyɛ᷅ dīāā kālāa̍ mīɔ̄ɔ̄nɔ᷄ŋ o̍ sōndō le̍.

²⁰Ndu̍yɛ̍ mi̍ ī yɔ̄nu᷄ŋ kpe̍e̍kpe̍i̍ mɛ̄ɛ̍ Īla̍a̍sīā di̍mi̍ yɛ̄, wāŋnda̍ lo̍ hīōūwɔ̄ɔ̍ o̍ dīō kpāki̍ chi̍o̍o̍ a̍ kīlta̍ŋ ma̍ kēī ndu̍ chōo̍ ma̍ dīī ndu̍.