Read Southern Kisi Ko̍lo̍ni̍kō Tāso̍o̍ 11 Bible Online

Ko̍lo̍ni̍kō Tāso̍o̍ 11 - Southern Kisi bible

Ko̍lo̍ni̍kō Tāso̍o̍ 11

¹Ō wa̍ pāa̍le̍ pi᷅lɛ̍, mi̍ wāŋnda̍ I̍sɔ̄lūɛ̄ī kpo̍u̍ a̍ chu̍u̍ŋgi̍āŋ na̍a̍ pi᷅lɛ̍, ma̍ kūā nāa̍ Dēēve̍ chūā Hi̍būlɔ̄ŋ chīe̍e̍. Ma̍ kɔ̍ di̍mūl ndu̍ āā, “Dēēve̍, si̍na̍ pɛ̍ŋgu̍ māā na̍a̍ nyāā wānāā pi̍la̍ na̍a̍ ŋ̄ chō ni̍.

²O̍ pāāndōo̍ ni᷄ŋ, a̍ bōōndi̍i̍ Sɔ̍ɔ̄ wa̍ Māsā Bɛ̍ndōo̍ ve̍, nu᷄m si̍m wāŋnda̍ I̍sɔ̄lūɛ̄ī lāchī o̍ chɔ̄ūwo̍ ni̍. Ndu̍yɛ̍, mi̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nūmndo̍ ō dīmūl nu̍m āā, ‘Nu᷄m cho̍ wā wānāā nīa̍a̍ I̍sɔ̄lūɛ̍i̍ lāchī ni̍, ndu̍yɛ̍ mā wa̍ māsāa̍ nda̍ chōo̍.’ ”

³O̍ ko̍ŋ kɔ̍ɔ̍lī, mi̍ lāŋgba̍ā kālla̍ kpo̍u̍ I̍sɔ̄lūɛ̄ī a̍ hu᷅ŋ nāa̍ Māsā Bɛ̄ndōo̍ Dēēve̍ chūā Hi̍būlɔ̄ŋ. Mbo̍ yīī kpe̍ma̍a̍ a̍ nda̍ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l Hi̍būlɔ̄ŋ ndo̍ŋ. O̍ ko̍ŋ kɔ̍ɔ̍lī, mi̍ wāŋnda̍ I̍sɔ̄lūɛ̄ī a̍ su̍i̍ī Dēēve̍ chūɛ̄īya̍ŋ, mbo̍ sīmnu᷄ŋ Māsā Bɛ̍ndōo̍ I̍sɔ̄lūɛ̄ī chōo̍. O̍ ko̍ŋ, mi̍ ī yɔ̄nu᷄ŋ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ di̍mi̍ sa̍na̍a̍ a̍ wāna̍ su̍a̍ā le̍ Mɛ̄lɛ̄ka̍ wo̍ Sa̍a̍mi̍ɛ̍ɛ̄ yɛ̍.

⁴O̍ ko̍ŋ kɔ̍ɔ̍lī, Dēēve̍ ni̍ nda̍ I̍sɔ̄lūɛ̍i̍ya̍ kpo̍u̍, ma̍ kūā Chūlu̍sɛ̄lɛ̄m. A̍ te̍le̍ŋ ko̍ŋ, nda̍ a̍a̍ ve̍e̍lū Chūlu̍sɛ̄lɛ̄m āā Chɛ̍bu̍sī. Ndu̍yɛ̍ wānāa̍ nda̍ a̍a̍ nɔ̍ lɛ̄ŋndē lēŋ nda̍ wa̍ Chɛ̄bu̍sa̍i̍tīi̍ya̍ ni̍.

⁵Mi̍ Chɛ̄bu̍sa̍i̍tīi̍ya̍ ha̍ā lō o̍ ko̍ŋ ma̍ dīmūl Dēēve̍ āā, “Ŋ̄ chɛ᷅l nu̍m mā hīŋ na̍nu᷄ŋ te̍.” Kɛ̍, a̍ ko̍ŋ kpo̍u̍ mi̍ Dēēve̍ chūā fo̍ndā kālā ka̍lāa̍ Sa̍a̍yɔ̄ŋ, ndu̍ yɔ̍nūŋ māā chīe̍e̍ bɛ̍ndū Dēēvi̍o̍o̍ ni̍.

⁶Mi̍ Dēēve̍ lo᷅ o̍ ko̍ŋ mbo̍ dīmī āā, “Wānā o̍ wānā ku̍ɛ̄ pɛ̍ ta̍se̍ mbō dīu̍ Chɛ̄bu̍sa̍i̍tīi̍ya̍ pɛ̍, wānā ko̍ŋ ō sīmnu᷄ŋ ma̍sā, ndu̍yɛ̍ mbō wa᷄ wānā ba̍nāa̍ le̍ pūa̍a̍ chɔ̄ūwa̍.” O̍ ko̍ŋ, Cho̍wa̍bī po̍ Sɛ̄lu̍i̍yā wo̍, ndu̍ wā wāna̍ tāso̍o̍ ni̍ mbo̍ kɔ̍ de̍l Chɛ̄bu̍sa̍i̍tīi̍ya̍ chōo̍ a̍ sɔ̍ŋgɔ̄ɔ̍. Le̍ sa̍bū kōŋ, mbo̍ sīmnu᷄ŋ bo̍llē pūa̍a̍ chɔ̄ūwa̍.

⁷Le̍ mɛ̄ɛ̍ Dēēve̍ chu̍a̍ fo̍ndāŋndā kālā ka̍lāla̍ŋ mbo̍ chāl lo̍ŋ yɛ̍, nda̍ vēēlu̍ fo̍ndāŋ kōŋ ni̍ āā, chi̍e̍e̍ bɛ̍ndū Dēēvi̍o̍o̍.

⁸O̍ ko̍ŋ kɔ̍ɔ̍lī, mbo̍ tāŋgūl chīe̍e̍ bɛ̍ndōo̍ mbo̍ bālū ndu̍ a̍ sāāsāa̍ si̍lɔ̍, chɔ̄nɔ᷄ŋndo̍ bā lɛ̄ŋnde̍ŋ lē wa̍ lē pēēlāā o̍ pēmbēi̍ kūmbū bā pāa̍le̍ŋ lē chāŋ ndo̍ wo̍. O̍ ko̍ŋ kɔ̍ɔ̍lī, mi̍ Cho̍wa̍bī ndu̍ si̍o̍ū fo̍ndāŋndā tɔ̄la̍ lo̍ o̍ chīe̍e̍ bɛ̍ndōo̍ la̍ŋ tōōsīāā.

⁹O̍ ko̍ŋ, mi̍ Dēēve̍ ō sīmnu᷄ŋ wānā kpāāyā bɛ̄ndū bɛ̍ndū, kāni̍ fo̍ndōle̍ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ō wa̍ a̍ ndu̍ la̍tu̍lu̍.

¹⁰So̍vɛ̄i̍ya̍a̍ Dēēvi̍a̍a̍ ā nda̍ a̍a̍ fu̍la̍ tɔ̍ɔ̍, mi̍ nda̍ a̍a̍ ke̍ ndu̍ kpi̍i̍li̍a̍a̍ o̍ māsāle̍ ndɔ̄le̍ŋ ni᷄ŋ nda̍, lātūlu̍ a̍ wāŋnda̍ I̍sɔ̄lūɛ̄ī kpo̍u̍ ma̍ si̍i̍ŋgu̍u̍ ndu̍ Māsā Bɛ̍ndōo̍, mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ ō di̍mi̍ a̍ I̍sɔ̄lūɛ̄ī o̍kɔ̄ɔ̄ yɛ̍. Pūa̍a̍ chɔ̄ūwāā kāŋ nda̍ cho̍ ha̍ā ni̍.

¹¹Cha̍si̍ɔ̍bīām, fūlāa̍ o̍ pūlāle̍ Hāki̍mɔ̄ŋnde̍ŋ chōo̍, ndu̍ wa̍ bōlle̍ŋ le̍ pūa̍a̍ chɔ̄ūwāā tɔ̍ɔ̍ wa̍a̍ yāa̍ wa̍ ni̍. Ndu̍ sɔ̄ŋgā a̍ pūa̍a̍ kɛ̄mɔ̄ɔ̍ lēyāa̍ (300) a̍ ba̍l ndɔ̄ɔ̍ ni̍, ndu̍yɛ̍ mbo̍ dīū nda̍ kpo̍u̍ o̍ sɔ̍ŋgɔ̄ lē pīlɛ̍ kōŋ ni᷄ŋ.

¹²O̍ pūa̍a̍ chɔ̄ūwāā tɔ̍ɔ̍ wa̍a̍ ya̍a̍ wa̍ ha̍ā tɛ̄ɛ̄ŋ, wāna̍ wa̍ ndu̍ īkɛ̄i̍ yo̍ ndu̍ wa̍ Ɛ̄li̍a̍a̍sā, po̍ Do̍dō wo̍ ni̍. Do̍dō ko̍ŋ yɛ̍, A̍hɔ̍hi̍tīi̍nɔ̍ɔ̍ o̍ wa̍ ni̍.

¹³Ō wa̍ a̍ Dēēve̍ lātūlu̍ Pāsī Da̍mīm, te̍le̍ŋ Fīli̍i̍tīāŋnda̍ ā chūūŋgi̍āŋ lo̍ŋ le̍ chɔ̄ūwo̍ wo̍. Ndu̍yɛ̍ kpe̍le̍ ŋ̄ba̍a̍līi̍yo̍ ō wa̍ o̍ fo̍ndāŋ kōŋ. O̍ ko̍ŋ, mi̍ pūa̍a̍ chɔ̄ūwāa̍ Dēēvi̍a̍a̍ ā nyāānu᷄ŋ Fīli̍i̍tīāŋnda̍.

¹⁴Kɛ̍, mi̍ Ɛ̄li̍a̍a̍sā nda̍ Dēēve̍ a̍ lo᷅ o̍ ko̍ŋ ma̍ sīm o̍ kpe̍lo̍o̍ ko̍ŋ tɛ̍ɛ̄ŋ, ma̍ sīmūl Fīli̍i̍tīāŋnda̍ lo̍ŋ a̍ sɔ̍ŋgɔ̄ɔ̍. O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ bāŋā nda̍ a̍ kpāāyā ya̍māā bɛ̄ndōo̍.

¹⁵Ō wa̍ pāa̍le̍ pi᷅lɛ̍, mi̍ pūa̍a̍ wa̍ bōllīī so̍vɛ̄i̍ya̍ wa̍ ā yāa̍, a̍ fu̍lā bōlīī pūa̍a̍ chɔ̄ūwāā be̍le̍-ya̍a̍ wa̍ tɛ̄ɛ̄ŋ. Ma̍ kūā o̍ pōūwo̍ nāa̍ Dēēve̍ wa̍ o̍ būūlōo̍ A̍du̍lām nda̍. A̍ te̍le̍ŋ ko̍ŋ, so̍vɛ̄i̍ya̍a̍ Fīli̍i̍tīāŋnda̍ ā wa̍ o̍ dɔ̍ɔ̍ŋgɔ̍ɔ̍ o̍ lɛ̄ŋndē dɛ̍ŋgbɛ̍le̍ŋ pēmbo᷄ŋ tɛ̄ɛ̄ŋ Lu̍ɛ̍fēm.

¹⁶A̍ te̍le̍ŋ ko̍ŋ, Dēēve̍ wa̍ o̍ fo̍ndāŋ ka̍lā ka̍lāa̍ tɛ̄ɛ̄ŋ. O̍ ko̍ŋ kɔ̍ɔ̍lī, mi̍ Fīli̍i̍tīāŋnda̍ nda̍ kɔ̍ hi̍ɔ̍lū Bɛ̍ti̍lɛ̍hɛ̄m chīe̍e̍.

¹⁷Dēēve̍ lo̍ o̍ fo̍ndāŋ kōŋ mi̍ kōlɔ̄ɔ̍ bīī ndu̍. Mbo̍ lō o̍ ko̍ŋ mbo̍ dīmī āā, “O̍o̍ ya̍, tē ya̍ i̍i̍ sɔ̍la̍ wāŋndo̍ pɛ̍, mi̍ ndu̍ o̍o̍ kɔ̍ chu̍ū ya̍ mɛ̄ŋnda̍ŋ mī ko̍l, fūlāa̍ o̍ so̍o̍ŋ cho̍ o̍ dīō sāāsāa̍ Bɛ̍ti̍lɛ̍hɛ̄m i̍kɛ̍i̍ yo̍.”

¹⁸O̍ ko̍ŋ, mi̍ so̍vɛ̄i̍ya̍a̍ tɔ̍ɔ̍ wa̍a̍ yāa̍ wa̍ ha̍ā fūlā, ma̍ kīndī kīndī ma̍ kēī o̍ dɔ̍ɔ̍ŋgɔ̍ Fīli̍i̍tīāŋnda̍ tɛ̍ɛ̄ŋ, ma̍ kɔ̍ kɔ̍ndū mɛ̄ŋnda̍ŋ o̍ so̍o̍ŋ wa̍ o̍ dīō sāāsāa̍ Bɛ̍ti̍lɛ̍hɛ̄m īkɛ̄i̍ yo̍, ma̍ chūū Dēēve̍. Kɛ̍, Dēēve̍ ko᷄l te̍. O̍ ko̍ŋ, mbo̍ tālā ma̍ŋ lɛ̄ŋ māā kē o̍ Mɛ̄lɛ̄ka̍ Ya̍a̍wɛ̄ɛ̄ lo̍.

¹⁹O̍ ko̍ŋ kɔ̍ɔ̍lī, mbo̍ dīmī āā, “I̍ ti̍ū ba̍ mī ko̍l mɛ̄ŋnda̍ŋ ma᷅ŋ Mɛ̄lɛ̄ka̍ nūu̍ o̍ hɔ̄l te̍. Tē I̍”

²⁰O̍ ko̍ŋ kɔ̍ɔ̍lī, Ābi̍sīāā, wānāyɛ̍ī Cho̍wa̍bī ve̍, ndu̍ wa̍ māsāa̍ so̍vɛ̄i̍ya̍ chōo̍ ŋ̄wāŋ be̍le̍-ya̍a̍. Ō wa̍ pāa̍le̍ pi᷅lɛ̍, mbo̍ chūā ba̍l ndɔ̄ɔ̍ mbo̍ sɔ̄ŋgā o̍ pūa̍a̍ kɛ̄mɔ̄ɔ̍ lēyāa̍ (300) mbo̍ dīū nda̍. Ndu̍ bɛ̍ɛ̍ mbo̍ fūlā tɔ̍ɔ̍ māā so̍vɛ̄i̍ya̍a̍ be̍le̍-ya̍a̍wa̍ ā pīli̍a̍a̍.

²¹Ndu̍yɛ̍ mi̍ tɔ̍ɔ̍ ndɔ̄ɔ̍ ō hēl mbo̍ hīāū so̍vɛ̄i̍ya̍a̍ be̍le̍-ya̍a̍, a̍ fu̍la̍ ha̍ā tɔ̍ɔ̍ wa̍. O̍ ko̍ŋ, mbo̍ sīmnu᷄ŋ ma̍sāa̍ nda̍ chōo̍. Kɛ̍ a̍ ko̍ŋ kpo̍u̍, ndu̍ o̍o̍ si̍i̍ma᷅ŋ tɔ̍ɔ̍ a̍ pūa̍a̍ ya̍a̍ wa̍ ā pi᷅li̍a̍a̍ le̍, ndu̍yɛ̍ mbo̍ sīmnu᷄ŋ bōlle̍ŋ le̍ pūa̍a̍ chɔ̄ūwāā be̍le̍-ya̍a̍ wa̍.

²²O̍ ko̍ŋ kɔ̍ɔ̍lī, Bɛ̄na̍yā, po̍ Chɛ̄hōwa̍dā wo̍, ndu̍ bɛ̍ɛ̍ wāna̍ kɔ̄l sīmūlāa̍ le̍ sɔ̍ŋgɔ̄ɔ̍ o̍ wa̍ ni̍. Ka̍bi̍sɛ̄ɛ̄l o̍ fu̍la̍ ni̍. Ndu̍yɛ̍, mbo̍ tōsā sɔ̄ɔ̍ŋ dīāllūŋ kālāŋ, mbo̍ dīī wānāā chɔ̄ūwāā dīāllūŋ kālāā Mo̍wa̍bi̍tīi̍ya̍ ā ŋīɔ̍ɔ̍ŋ. O̍ ko̍ŋ kɔ̍ɔ̍lī, mbo̍ kūā vɛ̄lɛ̄ o̍ so̍o̍ŋndo̍ ni᷄ŋ o̍ pāa̍le̍ mɔ᷄m ŋ̍kpu̍ŋgbāa̍ ō dēli̍ le̍ŋ chōo̍, mbo̍ kɔ̍ dīī kpɔ̍kūŋndo̍.

²³Pāa̍le̍ pi᷅lɛ̍ vɛ̄lɛ̄, mbo̍ kūā mbo̍ kɔ̍ di̍ī I̍chi̍pīnɔ̄ɔ̍, ō wa̍ bānde̍i̍ le̍ nɛ̄īyo̍ lē ŋɔ᷄mmɛ̍ū a̍ tɛ̄ndāa̍ tɛ̄ɛ̄ŋ. Ndu̍yɛ̍, I̍chi̍pīnɔ̄ɔ̍ ho̍ō bɛ̍ɛ̍, ku̍u̍ba̍nɔ̍ dīāllūŋ kālāa̍ pi̍la̍ o̍ wa̍ ni̍. I̍chi̍pīnɔ̄ kōŋ ba̍l ndɔ̄ɔ̍ ō wa᷄ ō bɛ̄ndū kpi᷅, wāna̍ a̍a̍ che᷅ ndu̍ pɛ̍ āā, kpēsēlā lu̍a̍ā kōlāa̍ ni̍. Kɛ̍, mi̍ Bɛ̄na̍yā ku̍ā a̍ tīnda̍a̍ mbo̍ kɔ̍ chīŋa̍la᷅ŋ ndu̍ a̍ sɔ̍ŋgɔ̄ɔ̍ mbo̍ pūū ndu̍ ba̍l ko̍ŋ o̍ bā, ndu̍yɛ̍ mbo̍ dīī ndu̍ a̍ bāl ndɔ̍ ndu̍ pi̍la̍a̍.

²⁴Sɔ̄ɔ̍ŋ mu᷅ŋ Bɛ̄na̍yā, po̍ Chɛ̄hōwa̍dā wo̍ ō tōsa̍ ni̍. O̍ ko̍ŋ kɔ̍ɔ̍lī, ndu̍ bɛ̍ɛ̍ mbo̍ fūlā tɔ̍ɔ̍, māā pūa̍a̍ chɔ̄ūwāā be̍le̍-ya̍a̍wa̍ ā pīli̍a̍a̍.

²⁵Mi̍ Bɛ̄na̍yā fu̍lā tɔ̍ɔ̍ mbo̍ hīāū bɛ̍ɛ̍ pūa̍a̍ tɔ̍ɔ̍ wa̍a̍ be̍le̍-ya̍a̍ wa̍. Kɛ̍ a̍ ko̍ŋ kpo̍u̍, ndu̍ o̍o̍ si̍i̍ma᷅ŋ tɔ̍ɔ̍ a̍ pūa̍a̍ ya̍a̍wa̍ ā pīli̍a̍a̍ le̍. O̍ ko̍ŋ kɔ̍ɔ̍lī, mi̍ Dēēve̍ hāndū ndu̍ bōlle̍ŋ pūa̍a̍ wa̍ ndu̍ māndāa̍ wa̍ chōo̍.

²⁶So̍vɛ̄i̍ya̍a̍ nda̍a̍ fu̍la̍ tɔ̍ɔ̍ wa̍ ā pīli̍a̍a̍ nda̍ cho̍ ha̍ā ni̍. A̍sa̍hɛ̄l, wānāyɛ̍ī Cho̍wa̍bī ve̍, a̍ Ɛ̄līha̍nāŋ, po̍ Do̍dō wo̍, fūlāa̍ Bɛ̍ti̍lɛ̍hɛ̄m chi̍e̍e̍,

²⁷a̍ Si̍a̍mo̍tī, fūlāa̍ Ha̍lɔ̍dī chi̍e̍e̍, a̍ Pɛ̍lu̍ɛ̍sī, fūlāa̍ Pɛ̍lɛ̍tī chi̍e̍e̍,

²⁸a̍ I̍lūā, po̍ I̍kɛ̍sīī wo̍ fūlāa̍ Tɛ̄ko̍wā, a̍ Ābīɛ̍ɛ̍sā, fūlāa̍ A̍na̍tɔ̍tī,

²⁹a̍ Si̍bɛ̍kāī, fūlāa̍ Hu̍sīāā a̍ I̍lā, fūlāa̍ A̍hɔ̄ɔ̄,

³⁰a̍ Ma̍ha̍lāī, fūlāa̍ Nɛ̍to̍fā, a̍ Hɛ̍lɛ̍dī, po̍ Ba̍nāā wo̍ fūlāa̍ Nɛ̍to̍fā,

³¹a̍ I̍tāī, po̍ Lu̍i̍bāī wo̍, fūlāa̍ Ki̍bīāā o̍ būŋgɛ̄ī Bɛ̍ŋnja̍mīŋnde̍ ni᷄ŋ, a̍ Bɛ̄na̍yā, fūlāa̍ Pīlu̍a̍tɔ̄ŋ,

³²a̍ Hu̍lūāī fūlāa̍ o̍ lɛ̄ŋndē dɛ̍ŋgbɛ̍le̍ŋ o̍ Pīo̍o̍ Ka̍a̍sī īkɛ̄i̍, a̍ A̍bīɛ̄ɛ̄ fūlāa̍ A̍a̍bā,

³³a̍ A̍si̍ma̍vɛ̄ɛ̄, fūlāa̍ Ba̍hu̍lūm, a̍ Ɛ̄li̍a̍a̍bā, fūlāa̍ Si̍a̍a̍lbɔ̄ŋ,

³⁴a̍ Ha̍sīɛ̄m fūlāa̍ Ki̍sīɔ̄ŋ, a̍ Chōna̍ta᷅ŋ, po̍ Si̍a̍kīī wo̍, fūlāa̍ Ha̍lūāŋ,

³⁵a̍ A̍hīām, po̍ Sa̍kāā wo̍ fūlāa̍ Ha̍lūāŋ, a̍ Ɛ̄li̍fāā, po̍ Ɔ̍ɔ̄ wo̍,

³⁶a̍ Hɛ̍fā fūlāa̍ Mɛ̍chɛ̍lūā, a̍ A̍hi̍chā, fūlāa̍ Pɛ̍lɔ̄ŋ,

³⁷a̍ Hɛ̍si̍lɔ̄, fūlāa̍ Ka̍mɛ̄l, a̍ Na̍a̍lūāī, po̍ Ɛ̄si̍bāī wo̍,

³⁸a̍ Cho̍wɛ̄ɛ̄, wānāyɛ̍ī Ne̍tāŋ nde̍, a̍ Mi̍bi̍hāā, po̍ Hāki̍lūī wo̍,

³⁹a̍ Sɛ̍lɛ̍kī, fūlāa̍ A̍mɔ᷅ŋ, a̍ Nāha̍lūāī, wāna̍ ndu̍ o̍o̍ bi̍ī wōlɔ̄ɔ̄la̍ chɔ̄ūla̍ Cho̍wa̍bī la̍ŋ ndo̍, fūlāa̍ Bīɛ̄ɛ̄lɔ̍tī. Na̍ha̍lūāī ko̍ŋ yɛ̍, po̍ Sɛ̄lu̍i̍yā wo̍ o̍ wa̍ ni̍.

⁴⁰O̍ ko̍ŋ kɔ̍ɔ̍lī, a̍ I̍lūā nda̍ Ka̍lūɛ̄ɛ̄, fūlāa̍ Cha̍tɛ̄ɛ̄,

⁴¹a̍ Yūla̍yā, Hi̍ta̍i̍tīi̍nɔ̍ɔ̍, a̍ Sa̍ba̍dī, po̍ Āhi̍lāī wo̍,

⁴²a̍ Ādi̍nā, po̍ Si̍sā wo̍, Lūbɛ᷅na̍i̍tīi̍nɔ̍ɔ̍, mbo̍ wā Lūbɛ᷅na̍i̍tīi̍ya̍ bōlle̍ŋ ŋ̄wāŋ be̍le̍-ya̍a̍,

⁴³a̍ Ha̍nāŋ, po̍ Ma̍a̍kāā wo̍, a̍ Chōōsi̍a̍fa̍tī, fūlāa̍ Mi̍tāŋ,

⁴⁴a̍ Yu̍si̍a̍ā, fūlāa̍ Āsītɛ̍lūā, a̍ Si̍a̍mɛ̄ɛ̄ nda̍ Chɛ̍yɛ̄ɛ̄, pūa̍a̍ Hɔ̍tām nda̍ fūlāa̍ A̍lo̍yā,

⁴⁵a̍ Chɛ̍di̍yāā nda̍ Cho̍hā pɔ̍mbɔ̄ ndɔ̄, pūa̍a̍ Si̍mi̍lī wa̍, fūlāa̍ Ti̍sī,

⁴⁶a̍ I̍līɛ̄ɛ̄l, fūlāa̍ Māha̍va̍i̍tīi̍nɔ̄, a̍ Chɛ̄lu̍i̍bāī nda̍ Chōōsi̍a̍fa̍tī, pūa̍a̍ Ɛ̄li̍nāām nda̍, a̍ I̍ti̍māā, fūlāa̍ Mo̍wa̍bī,

⁴⁷a̍ I̍li̍ɛ̍ɛ̍, a̍ O̍bɛ̄ɛ̄, a̍ Cha̍a̍sīɛ̄ɛ̄ fūlāa̍ So̍bāā.