Read Southern Kisi Ko̍lo̍ni̍kō Tāso̍o̍ 14 Bible Online

Ko̍lo̍ni̍kō Tāso̍o̍ 14 - Southern Kisi bible

Ko̍lo̍ni̍kō Tāso̍o̍ 14

¹Mi̍ ī yɔ̄nu᷄ŋ, mi̍ Hi̍lūām, māsā bɛ̍ndōo̍ Ta̍a̍yā, o̍ vi̍ām ki̍i̍la̍a̍ nāa̍ Dēēve̍ chūā. O̍ ko̍ŋ kɔ̍ɔ̍lī, mbo̍ yɔ̄ŋ yɔ̄mīī si̍dāā ve̍, a̍ me̍si̍nɛ̄i̍ya̍, a̍ ka̍a̍pi̍ndɛ̄i̍ya̍, le̍ mī nda̍ a̍a̍ kɔ̍ te̍ŋgūl Dēēve̍ chīɛ̄ī lēmāsāa̍.

²O̍ ko̍ŋ, mi̍ Dēēve̍ sɔ̄lā sīnā pɛ̄ŋgo̍o̍ māā, Mɛ̄lɛ̄ka̍ Ya̍a̍wɛ̄ɛ̄ o̍ sīīŋgu̍u̍ ndu̍ māsā bɛ̍ndōo̍ le̍ I̍sɔ̄lūɛ̄ī kpo̍u̍. Ndu̍yɛ̍ mi̍ Mɛ̄lɛ̄ka̍ tōsā mī māsāle̍ ndɔ̄ le̍ŋ le̍ sīmnu᷄ŋ māsāle̍ kpāāyā bɛ̍ndū, le̍ sa̍bū wānāā ndūa̍a̍ I̍sɔ̄lūɛ̄ī.

³O̍ ko̍ŋ kɔ̍ɔ̍lī, mi̍ Dēēve̍ chūā lāāndūa̍a̍ ta̍u̍ Chūlu̍sɛ̄lɛ̄m. Ndu̍yɛ̍ mbo̍ vīālū chūāūwa̍ ta̍u̍, wāŋ pīāāndūa̍a̍, a̍ wāŋ lāāndūa̍a̍.

⁴Chūāūwāā o̍ ve̍lū Chūlu̍sɛ̄lɛ̄m nda̍ dīōlā ndāla̍ŋ la̍ cho̍ la᷅ŋ ni̍. Si̍a̍a̍mūā, a̍ Sīōba̍bī, a̍ Ne̍tāŋ, a̍ Sɔ̍lɔ̍mɔ̄ŋ,

⁵a̍ I̍bi̍hāā, a̍ Ɛ̄li̍sūāā, a̍ Ɛ̄līfɛ̍lɛ̍tī,

⁶a̍ No̍kāā, a̍ Nɛ̍fɛ̍kī, a̍ Chāfi̍yā,

⁷a̍ Ɛ̄līsi̍a̍mā, a̍ Bɛ̄ɛ̄li̍a̍dā, a̍ Ɛ̄līfɛ̍lɛ̍tī.

⁸O̍ ko̍ŋ kɔ̍ɔ̍lī, mɛ̄ɛ̍ Fīli̍i̍tīāŋnda̍ ā tūēī māā Dēēve̍ ō sīmnu᷄ŋ ma̍sā bɛ̍ndōo̍ le̍ I̍sɔ̄lūɛ̄ī kpo̍u̍, ma̍ kūā ndu̍ nūūvīa̍a̍. O̍ ko̍ŋ, mɛ̄ɛ̍ Dēēve̍ tu̍e̍ī māā ā chō ndu̍ nūūvīa̍a̍, mbo̍ kūā le̍ mbo̍ kɔ̍ chīŋa̍la᷅ŋ nda̍ a̍ sɔ̍ŋgɔ̄ɔ̍.

⁹O̍ ko̍ŋ, mi̍ Fīli̍i̍tīāŋnda̍ ā kɔ̍ kīōlū dɔ̍ɔ̍ŋgɔ̍ɔ̍ o̍ lɛ̄ŋndē dɛ̍ŋgbɛ̍le̍ŋ o̍ pēmbo᷄ŋ tɛ̍ɛ̄ŋ Lu̍ɛ̍fēm, ma̍ pōōndīāā wāŋnda̍ nyɔ̄ɔ̍ŋ o̍ lābā o̍ chi̍e̍e̍ŋ ba̍lu̍ nda̍ wo̍ŋ.

¹⁰O̍ ko̍ŋ kɔ̍ɔ̍lī, mi̍ Dēēve̍ ō nyūnā Mɛ̄lɛ̄ka̍ dīōm āā, “Bāā I̍ kɔ̍ mī chīŋa̍la᷅ŋ Fīli̍i̍tīāŋnda̍? Ā māl nda̍ ni̍ŋ ya̍ o̍ bā?” O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ mu̍lī ndu̍ dīōm āā, “Kɔ̍ chīŋa̍la᷅ŋ nda̍, I̍ cho̍ nda̍ mālɔ̄ɔ̄ nu̍m o̍ bā.”

¹¹O̍ ko̍ŋ, mi̍ Dēēve̍ kūā nda̍ pūa̍a̍ ndūa̍a̍ chɔ̄ūwa̍ ma̍ kɔ̍ chīŋa̍la᷅ŋ nda̍ a̍ sɔ̍ŋgɔ̄ɔ̍ Bāāl Pɛ̍lu̍a̍sīm, ndu̍yɛ̍ ma̍ yām nda̍ lo̍ŋ. O̍ ko̍ŋ kɔ̍ɔ̍lī, mi̍ Dēēve̍ dīmī āā, “Mɛ̄lɛ̄ka̍ ke̍ ya̍ kpāāyāa̍ mi̍ pi̍āl ya̍a̍mɔ̍ɔ̍wa̍a̍ nīa̍a̍ mɛ̄ɛ̍ mɛ̄ŋnda̍ŋ mā pīāl nu̍a̍ā nyɔ̄ɔ̍ mī mā hīōū a̍ ndu̍ yɛ̍.” Le̍ sa̍bū kōŋ, fo̍ndāŋ kōŋ ō nɔ̄ dīōla̍ŋ ni̍ āā, Bāāl Pɛ̍lu̍a̍sīm.

¹²O̍ ko̍ŋ kɔ̍ɔ̍lī, mi̍ Fīli̍i̍tīāŋnda̍ ā nyāānu᷄ŋ ma̍ mɛ̄ī mɛ̄lɛ̄ka̍ā ndāa̍ lo̍ŋ. O̍ ko̍ŋ, mi̍ Dēēve̍ dīmī māā ā lo᷄m mɛ̍lɛ̄ka̍ā ndāā ka̍ŋ.

¹³Ō bēndu̍ bɛ̍ɛ̍ ti᷅ŋ te̍, mi̍ Fīli̍i̍tīāŋnda̍ ā kɔ̍ dēl vɛ̄lɛ̄ chi̍o̍o̍ŋ wa̍ o̍ lɛ̄ŋndē dɛ̍ŋgbɛ̍le̍ wa̍ o̍ pēmbo᷄ŋ tɛ̍ɛ̄ŋ nde̍ŋ chōo̍.

¹⁴O̍ ko̍ŋ kɔ̍ɔ̍lī, mi̍ Dēēve̍ ō nyūnā vɛ̄lɛ̄ Mɛ̄lɛ̄ka̍ māā pāāndū. Kɛ̍, mi̍ Mɛ̄lɛ̄ka̍ dīmūl ndu̍ āā, “Ku̍ā nda̍ lāchī ma̍ kɔ̍ chīŋa̍la᷅ŋ nda̍ le̍. Kɔ̍ nda̍ a̍ mākɔ̄ɔ̄ mā dɔ̄ū nda̍ o̍ pi̍ŋndo̍ ni᷄ŋ kūmbūe̍i̍ ī pīlɛ̍i̍ bā yɔ̄mīī bāli̍sām nde̍, mā chīŋa̍la᷅ŋ nda̍ lo̍ŋ.

¹⁵Ndu̍yɛ̍, te̍ ā tūēī wāŋnda̍ nīɔ̄ūwo̍ o̍ yɔ̄mīī bāli̍sām chōo̍ pɛ̍, mɛ̄ɛ̍ kɔ̍ le̍ sɔ̍ŋgɔ̄ɔ̍. Kāni̍ fu̍u̍le̍ ko̍ŋ chɔ᷅m ni̍ māā ya̍ Mɛ̄lɛ̄ka̍ hīōū nu̍m lāchī, le̍ mbō yēm pūa̍a̍ chɔ̄ūwāā Fīli̍i̍tīāŋnda̍.”

¹⁶O̍ ko̍ŋ, mi̍ Dēēve̍ ō tōsā mɛ̄ɛ̍ Mɛ̄lɛ̄ka̍ dīmūl ndu̍ yɛ̍. Ndu̍yɛ̍, ma̍ yām pūa̍a̍ chɔ̄ūwāā Fīli̍i̍tīāŋnda̍, chɔ̍ŋ Ki̍bīɔ̄ŋ mbo̍ kūā le̍nde̍ ha̍a̍a̍ a̍ Kɛ̍sɛ̄ɛ̄.

¹⁷O̍ ko̍ŋ kɔ̍ɔ̍lī, mi̍ tɔ̍ɔ̍ Dēēve̍ wo̍ ō tīū o̍ lɛ̄ŋnde̍ ni᷄ŋ kpo̍u̍. Ndu̍yɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ ō tōsā mi̍ sīōōŋnde̍ ī bīī lɛ̄ŋnde̍ kpo̍u̍ a̍ ndu̍.