Read Southern Kisi Ko̍lo̍ni̍kō Tāso̍o̍ 15 Bible Online

Ko̍lo̍ni̍kō Tāso̍o̍ 15 - Southern Kisi bible

Ko̍lo̍ni̍kō Tāso̍o̍ 15

¹O̍ ko̍ŋ kɔ̍ɔ̍lī, mi̍ Dēēve̍ tāŋgūl chīɛ̄īla̍ŋ o̍ chīe̍e̍ ndɔ̄ bɛ̍ndōo̍ ni᷄ŋ le̍ ndu̍ pi̍la̍. O̍ ko̍ŋ kɔ̍ɔ̍lī, mbo̍ tōōsīāā fo̍ndāa̍ le̍ kɔ̍fū kpe̍ma̍ Mɛ̄lɛ̄ka̍a̍, ndu̍yɛ̍ mbo̍ tāŋgūl tɛ̍ndīi̍yo̍ le̍ ndu̍ kɛ̄sīo̍o̍ lēni᷄ŋ.

²O̍ ko̍ŋ, mi̍ Dēēve̍ dīmī āā, “Wānā o̍ wānā che̍le̍ŋ ō nɔ̍ mbō kūɛ̄ a̍ kɔ̍fū kpe̍ma̍ Mɛ̄lɛ̄ka̍a̍ le̍, mɛ̄ɛ̍ Li̍va̍īya̍. Kāni̍ fo̍ndōle̍, nda̍ Mɛ̄lɛ̄ka̍ Ya̍a̍wɛ̄ɛ̄ ō hɛ̄li̍ le̍ mā wa̍ kɔ̄la̍ŋ a̍ ndu̍, ndu̍yɛ̍ mā wa̍ ndu̍ sāāŋgīāllo̍ le̍ fɛ̍ɛ̍ŋ a̍ fɛ̍ɛ̍ŋ ni̍.”

³O̍ ko̍ŋ kɔ̍ɔ̍lī, mi̍ Dēēve̍ chu̍u̍ŋgīāā I̍sɔ̄lūɛ̍i̍ya̍ kpo̍u̍ Chūlu̍sɛ̄lɛ̄m, le̍ mā kɔ̍ hu᷅ŋ a̍ kɔ̍fū kpe̍ma̍ Mɛ̄lɛ̄ka̍ Ya̍a̍wɛ̄ɛ̄ wo̍ o̍ fo̍ndāŋ o̍ to̍o̍si̍a̍a̍ le̍ ndu̍ wo̍.

⁴O̍ ko̍ŋ kɔ̍ɔ̍lī, mi̍ Dēēve̍ chu̍u̍ŋgīāā pūa̍a̍ fu̍la̍ o̍ yu̍ŋgu̍ E̍lɔ̄ŋ ndo̍ chōo̍ wa̍, a̍ pūa̍a̍ fu̍la̍ o̍ pūlāle̍ Li̍va̍īya̍ chōo̍ wa̍ nāa̍ pīlɛ̍.

⁵Pūa̍a̍ fu̍la̍ o̍ pūlāle̍ Līva̍īya̍ chōo̍ o̍ būŋgɛ̄ī Ko̍ha̍tī ve̍ ni᷄ŋ nda̍, nda̍ cho̍ ha̍ā ni̍. Yu̍lūɛ̄l ndu̍ wa̍ māsāa̍ wāŋnda̍ chōo̍ kɛ̄mɛ̄ a̍ bi̍dīi̍ŋ (120), o̍ būŋgɛ̄ī ndɛ̍i̍ ni᷄ŋ.

⁶O̍ ko̍ŋ kɔ̍ɔ̍lī, a̍ Āāsa̍yā, fūlāa̍ o̍ būŋgɛ̄ī Mɛ̍lu̍a̍lī ve̍ ni᷄ŋ, ndu̍ wa̍ māsāa̍ wānāā ndūa̍a̍ chōo̍ kɛ̄mɔ̄ɔ̍ lēdīi̍ŋ a̍ bi̍dīi̍ŋ (220),

⁷a̍ Cho̍wɛ̄ɛ̄, fūlāa̍ o̍ būŋgɛ̄ī Kɛ̍sīɔ̄ŋ nde̍ ni᷄ŋ, ndu̍ wa̍ māsāa̍ wānāā ndūa̍a̍ chōo̍ kɛ̄mɛ̄ a̍ be̍le̍-ya̍a̍ (130),

⁸a̍ Sīɛ̄ma̍yā, fūlāa̍ o̍ būŋgɛ̄ī Ɛ̄līsa̍fāŋ nde̍ ni᷄ŋ, ndu̍ wa̍ māsāa̍ wānāā ndūa̍a̍ chōo̍ kɛ̄mɔ̄ɔ̍ lēdīi̍ŋ (200),

⁹a̍ I̍līɛ̄ɛ̄l fūlāa̍ o̍ būŋgɛ̄ī Hi̍būlɔ̄ŋ nde̍ ni᷄ŋ, ndu̍ wa̍ māsāa̍ wānāā ndūa̍a̍ chōo̍ ŋ̄wāŋ be̍le̍ ŋɔ̍ma̍a̍ (80),

¹⁰a̍ Āmi̍na̍da̍bī, fūlāa̍ o̍ būŋgɛ̄ī Yu̍sīɛ̄l le̍ ni᷄ŋ, ndu̍ wa̍ māsāa̍ wānāā ndūa̍a̍ chōo̍ kɛ̄mɛ̄ a̍ tɔ̍ a̍ ā ŋīɔ̍ɔ̍ŋ (112).

¹¹O̍ ko̍ŋ kɔ̍ɔ̍lī, mi̍ Dēēve̍ vēēlū Sa̍dɔ̍kī nda̍ Ābīa̍a̍tā nāa̍ pi᷅lɛ̍, wānāā nda̍ a̍a̍ so̍lī sa̍lāa̍ o̍ Mɛ̄lɛ̄ka̍ lo̍ wa̍, ndu̍yɛ̍ a̍ Līva̍īya̍, nda̍ yɔ̍nūŋ ni̍ māā, Yu̍lūɛ̄l, a̍ Āāsa̍yā, a̍ Cho̍wɛ̄ɛ̄, a̍ Sīɛ̄ma̍yā, a̍ I̍līɛ̄ɛ̄l, a̍ Āmi̍na̍da̍bī.

¹²Mbo̍ dīmūl nda̍ āā, “Nya̍ cho̍ bōlle̍ o̍ yu̍ŋgu̍la̍ fi̍nyāā nyāa̍ chōo̍ o̍ būŋgāŋ Li̍va̍īya̍ ni᷄ŋ ni̍. Le̍la̍ŋ, lā dīndi̍ nya̍ pi̍lā, nya̍ ni̍ a̍ wānāya᷅ŋ nyāa̍ŋ. O̍ ko̍ŋ kɔ̍ɔ̍lī, mī lā kɔ̍ hu᷅ŋ a̍ kɔ̍fū kpe̍ma̍ Mɛ̄lɛ̄ka̍a̍ Ya̍a̍wɛ̄ɛ̄ wo̍, Mɛ̄lɛ̄ka̍ I̍sɔ̄lūɛ̍i̍ya̍, o̍ fo̍ndāŋ ya̍ to̍o̍si̍a̍a̍ le̍ ndu̍ wo̍.

¹³Kāni̍ fu̍u̍le̍, mɛ̄ɛ̍ na̍a̍ ŋ̄ kīndi̍ o̍ tāse̍la̍ ndɔ̄ɔ̍ le̍ hūnɔ̄ɔ̍ a̍ kɔ̍fū kpe̍ma̍ Mɛ̄lɛ̄ka̍a̍ ho̍ō Chūlu̍sɛ̄lɛ̄m, ŋ̄ nyūna̍ Mɛ̄lɛ̄ka̍ Ya̍a̍wɛ̄ɛ̄ dīōm le̍ mī ndu̍ o̍o̍ chɔ̍m na̍a̍ nyɛ̍ na̍a̍ ŋ̍ nɔ̍ le̍ tōsāa̍ wo̍ le̍. Le̍ he̍ī, mbo̍ dūāūnu᷄ŋ tu̍mbe̍ a̍ na̍a̍. Kāni̍ fu̍u̍le̍, nya̍ Līva̍īya̍ lā ve̍ lo̍ŋ le̍ kɔ̄la̍ŋ a̍ kɔ̍fū kpe̍ma̍a̍ ho̍ō le̍.”

¹⁴Le̍ sa̍bū kōŋ, mi̍ wānāā sōlīāā lāsa̍lāa̍, a̍ Līva̍īya̍ ā dīndī nda̍ pi̍la̍ le̍ mā hu᷄ŋ kɔ̍ a̍ kɔ̍fū kpe̍ma̍ Mɛ̄lɛ̄ka̍ Ya̍a̍wɛ̄ɛ̄ wo̍, Mɛ̄lɛ̄ka̍ I̍sɔ̄lūɛ̍i̍ya̍.

¹⁵O̍ ko̍ŋ kɔ̍ɔ̍lī, mi̍ Līva̍īya̍ ā hāndū kɔ̍fū kpe̍ma̍ Mɛ̄lɛ̄ka̍a̍ o̍ yɔ̄mīī vīlɛ̄īye̍ chōo̍, ma̍ hāndu᷄ŋ ndu̍ o̍ lāchōŋgu̍ ma̍ kūā a̍ ndu̍ mɛ̄ɛ̍ dīo̍m Mɛ̄lɛ̄ka̍ Ya̍a̍wɛ̄ɛ̄ wo̍ ō dīmi̍ mi̍ Mūu̍sē di̍mūl nda̍ yɛ̍.

¹⁶O̍ ko̍ŋ, mi̍ Dēēve̍ ō dīmūl māsāa̍ wa̍ Li̍va̍īya̍ bōlle̍ wa̍ le̍ mā hɛ̄li̍ wānāya᷅ŋ nda᷄ŋ a̍ so̍lī cho̍ndo̍ŋ, ndu̍yɛ̍ mā lūāā nyɛ᷅m chāā lē yōō wo̍ŋ, a̍ che᷅ŋ chɛ̍ŋndo̍ŋ nda̍ le̍ mā sōli̍ chōndu̍ŋ kɔ̄l kɛ̄ndɔ᷄ŋ chōo̍ cho̍o̍.

¹⁷Le̍la̍ŋ, mi̍ Līva̍īya̍ ā hɛ̄lī Hɛ̍māŋ, po̍ Cho̍wɛ̄ɛ̄ wo̍, a̍ wānāyɛ̍ī ndūɛ̍i̍, A̍sa̍fī, po̍ Bɛ̍lu̍ɛ̍chīāā wo̍, o̍ ko̍ŋ kɔ̍ɔ̍lī, a̍ I̍tāŋ, po̍ Ku̍si̍a̍yā wo̍, fūlāa̍ o̍ būŋgɛ̄ī Mɛ̍lu̍a̍lī ve̍ ni᷄ŋ,

¹⁸a̍ wānāya᷅ŋ nda᷄ŋ ā nda̍ hɛ̄li̍ le̍ nda̍ wāa̍ īkɛ̄i̍ ya̍. Nda̍ yɔ̍nūŋ ni̍ māā, Sɛ̄kāla̍yā, a̍ Cha̍a̍sīɛ̄ɛ̄, a̍ Sīɛ̄mīla̍mɔ̍tī, a̍ Chɛ̍yɛ̄ɛ̄, a̍ Yu̍nī, a̍ Ɛ̄li̍a̍a̍bī, a̍ Bɛ̄na̍yā, a̍ Māāsɛ̍yā, a̍ Māti̍tīāā, a̍ Ɛ̄līfɛ̍le̍hū, a̍ Mīkīnɛ̍i̍yā, a̍ wānāā nda̍ a̍a̍ ma̍ndā dīō sāāsāa̍ wa̍, nda̍ yɔ̍nūŋ ni̍ māā, Ōbɛ̄ɛ̄ I̍dɔ̄m nda̍ Chɛ̍yɛ̄ɛ̄.

¹⁹Hɛ̍māŋ, a̍ A̍sa̍fī, a̍ I̍tāŋ, nda̍ wa̍ le̍ chɛ̍ŋchɛ̍ŋ ībūlɔ̍ŋsīi̍yo̍ŋ lɔ̄ɔ̍ ni̍.

²⁰Sɛ̄kāla̍yā, a̍ A̍sīɛ̄ɛ̄, a̍ Sīɛ̄mīla̍mɔ̍tī, a̍ Chɛ̍yɛ̄ɛ̄, a̍ Yu̍nī, a̍ Ɛ̄li̍a̍a̍bī, a̍ Māāsɛ̍yā, a̍ Bɛ̄na̍yā, nda̍ wa̍ le̍ nyɛ̄ chāā lēyōō wo̍ lɔ̄ɔ̍ ni̍, mɛ̄ɛ̍ chōmu̍l ndɔ̄ɔ̍ ndu̍ o̍o̍ nɔ̍ mbō he᷄l le̍.

²¹Kɛ̍, Mātīti̍yāā ni̍, a̍ Ɛ̄līfɛ̍le̍hū, a̍ Mīkīnɛ̍i̍yā, a̍ Ōbɛ̄ɛ̄ I̍dɔ̄m, a̍ Chɛ̍yɛ̄ɛ̄, a̍ A̍sa̍sīāā, nda̍ nda̍ā nɔ̍ le̍ nyɛ̄ chāā lēyōō wo̍ lɔ̄ɔ̍, mɛ̄ɛ̍ chōmu̍l ndɔ̄ɔ̍ ō nɔ̄ le̍ wāa̍ tōōlō yɛ̍ ni̍.

²²O̍ ko̍ŋ kɔ̍ɔ̍lī, Chɛ̄nāni̍yā, ndu̍ wa̍ bōllē Li̍va̍īya̍ ni̍, ā nda̍ a̍a̍ so̍lī cho̍ndo̍ŋ nda̍. Ndu̍yɛ̍ ndu̍ ko̍ni̍ wa̍ nyɛ̄m chāa̍ŋ bōlle̍ŋ ni̍, kāni̍ fu̍u̍le̍, ndu̍ ndu̍ o̍o̍ si̍nā a̍ mu̍ŋ o̍kɔ̄ɔ̄ ni̍.

²³O̍ ko̍ŋ kɔ̍ɔ̍lī, Bɛ̄lu̍i̍chīāā nda̍ Ɛ̄li̍ka̍nāā, nda̍ nda̍ a̍a̍ nɔ̍ le̍ dīo̍o̍ māndāa̍ nāa̍ kɔ̍fū kpe̍ma̍ Mɛ̄lɛ̄ka̍a̍ ō wa̍ ō kɛ̄sīāā wa̍ ni̍.

²⁴O̍ ko̍ŋ, wānāā sōlīāā lāsa̍lāa̍ nda̍ yɔ̍nūŋ ni̍ māā, Sīɛ̄bāna̍yā, a̍ Chōōsi̍a̍fa̍tī, a̍ Nɛ̄ta̍a̍nīɛ̄ɛ̄l, a̍ A̍ma̍sa̍i̍, a̍ Sɛ̄kāla̍yā, a̍ Bɛ̄na̍yā, a̍ Īlīɛ̍ɛ̍sā, nda̍ wa̍ le̍ pūtɛ̍nɛ̍i̍la̍ŋ hɔ̄ŋndo̍ kɔ̍fū kpe̍ma̍ Mɛ̄lɛ̄ka̍a̍ lāchī ni̍. O̍ ko̍ŋ kɔ̍ɔ̍lī, Ōbɛ̄ɛ̄ I̍dɔ̄m nda̍ Chɛ̍yɛ̄ɛ̄, nda̍ bɛ̍ɛ̍ ma̍ hɛ̄lī nda̍ le̍ dīo̍o̍ māndāa̍ nāa̍ kɔ̍fū kpe̍ma̍ Mɛ̄lɛ̄ka̍a̍ ō wa̍ ō kɛ̄sīāā wa̍.

²⁵Le̍la̍ŋ, Dēēve̍ ni̍, nda̍ lāŋgba̍ā kālla̍ I̍sɔ̄lūɛ̄ī, a̍ pūa̍a̍ wa̍ bōlīī pūa̍a̍ chɔ̄ūwa̍ wa̍ o̍ wāa̍la̍ŋ ni᷄ŋ nda̍, ma̍ kūā o̍ chīɛ̍i̍ Ōbɛ̄ɛ̄ I̍dɔ̄m ndo̍, ma̍ kɔ̍ chu̍ā kɔ̍fū kpe̍ma̍ Mɛ̄lɛ̄ka̍ Ya̍a̍wɛ̄ɛ̄ wo̍ ma̍ hūŋ a̍ ndu̍ a̍ nya̍a̍lo̍o̍.

²⁶O̍ ko̍ŋ kɔ̍ɔ̍lī, le̍ mɛ̄ɛ̍ Mɛ̍lɛ̄ka̍a̍ ō māla̍ Līva̍īya̍ ma̍ kūā a̍ kɔ̍fū kpe̍ma̍ Mɛ̄lɛ̄ka̍a̍ yɛ̍, ma̍ sōlī sa̍lāa̍ a̍ nāūwa̍ ā ŋɔ᷄mmɛ̍ū, a̍ sāā fɔ̍ŋndu̍a̍a̍ ā ŋɔ᷄mmɛ̍ū.

²⁷O̍ ko̍ŋ kɔ̍ɔ̍lī, mi̍ Dēēve̍ wōōnu᷄ŋ do᷅mā vi̍lɛ̄ī nda̍ tōōsi̍a̍a̍ ā kōlā kɛ̍ndɛ̄ kɛ̍ndɔ̄ɔ̍ wo̍. Līva̍īya̍ a̍ kūā a̍ kɔ̍fū kpe̍ma̍ Mɛ̄lɛ̄ka̍a̍ wa̍ ni̍, a̍ wānāā ŋ̄chōndu̍a̍a̍, o̍ ko̍ŋ kɔ̍ɔ̍lī, a̍ Chɛ̄nāni̍yā, o̍ wa̍ bōllē wānāā nyɛ̄ chāa̍ a̍ wānāā ŋ̄chōndu̍a̍a̍ wo̍, nda̍ bɛ̍ɛ̍ ma̍ wōōnu᷄ŋ do᷅māla̍ vi̍lɛ̄īla̍ wa̍ lā tōōsīāā a̍ kōlāla̍ kɛ̍ndɛ̄ kɛ̍ndɛ̄ la̍ŋ nda̍ŋ. O̍ ko̍ŋ kɔ̍ɔ̍lī, mi̍ Dēēve̍ wōōnu᷄ŋ vɛ̍lɛ̄ dōmā bi̍ŋgi̍ wānāā sōlīāā lāsa̍lāa̍ ā wōūnūŋ ndo̍, o̍ wa̍ ō tōōsīāā a̍ kōlā kɛ̍ndɛ̄ kɛ̍ndɔ̄ɔ̍ wo̍.

²⁸Mɛ̄ɛ̍ nda̍ wa̍ kɔ̄la̍ŋ a̍ kɔ̍fū kpe̍ma̍ Mɛ̄lɛ̄ka̍a̍ ho̍ō Chūlu̍sɛ̄lɛ̄m, mi̍ I̍sɔ̄lūɛ̍i̍ya̍ kpo̍u̍ a̍ wa᷅ kɔ̄la̍ŋ a̍ nya̍a̍lo̍o̍, mā dēŋī cho̍o̍ cho̍o̍, mā hūāŋ pu᷅tɛ̍nɛ̍i̍la̍ŋ, mā lūāā nyɛ᷅m chāāŋ yɛ̍ yi̍ɔ̍ɔ̍ŋ. Mu̍ŋ yɔ̍nūŋ ni̍ māā chɛ̍ŋchɛ̍ŋndo̍ŋ, a̍ nyɛ̄m chāā īyōō wo̍ŋ.

²⁹Mɛ̄ɛ̍ nda̍ wa̍ hūnɔ̄ɔ̍ a̍ kɔ̍fu̍ kpe̍ma̍ Mɛ̄lɛ̄ka̍a̍ o̍ chīe̍e̍ bɛ̍ndū Dēēve̍ wo̍ ni᷄ŋ, Ma̍kāl, chūa̍ Sɔ̍ɔ̄ wo̍, mbo̍ wā tōfāa̍ o̍ wu̍ndɛ̄i̍yo̍ nāa̍ o̍ wa̍ chīɛ̄ī ni̍ŋ nda̍. Mɛ̄ɛ̍ o̍ che᷅ Māsā Bɛ̍ndōo̍ Dēēve̍ hūnɔ̄ɔ̍ a̍ yōla̍ŋ, ndu̍yɛ̍ mbo̍ wa̍ a̍ nya̍a̍lo̍o̍, mbo̍ pɛ̄ɛ̄sā ndu̍ o̍ kɔ̄l ni᷄ŋ.