Read Southern Kisi Ko̍lo̍ni̍kō Tāso̍o̍ 16 Bible Online

Ko̍lo̍ni̍kō Tāso̍o̍ 16 - Southern Kisi bible

Ko̍lo̍ni̍kō Tāso̍o̍ 16

¹O̍ ko̍ŋ kɔ̍ɔ̍lī, ma̍ hūŋ a̍ kɔ̍fu̍ kpe̍ma̍ Mɛ̄lɛ̄ka̍a̍, ndu̍yɛ̍ ma̍ kɛ̄sī ndu̍ o̍ tɛ̍ndīi̍ Dēēve̍ tāŋgu̍l lo̍ ni᷄ŋ. O̍ ko̍ŋ kɔ̍ɔ̍lī, ma̍ sōlī sa̍lā lūāmāa̍ a̍ sa̍lā kɔ̄l nyūlōo̍ o̍ Mɛ̄lɛ̄ka̍ lo̍.

²O̍ ko̍ŋ kɔ̍ɔ̍lī, mɛ̄ɛ̍ Dēēve̍ ō chīi̍ sa̍lā lūāmāa̍ a̍ sa̍lā kɔ̄l nyūlōo̍ yɔ̄ŋgū o̍ Mɛ̄lɛ̄ka̍ lo̍, mbo̍ ndūāū wāŋnda̍ sa̍lā o̍ dīōla̍ Mɛ̄lɛ̄ka̍ Ya̍a̍wɛ̄ɛ̄ la̍ŋ ni᷄ŋ.

³O̍ ko̍ŋ, mbo̍ pīɔ̄ū I̍sɔ̄lūɛ̍i̍ya̍, wānā pɔ̍nɔ̍ ni̍ wānā la̍nɔ̍, mbo̍ kē wānā o̍ wānā kpūŋgbɛ̄ī bēe̍dīi̍yo̍ nda̍ lūām o̍ pōūta̍ŋ chōo̍ ve̍, a̍ vīsīī kpūŋgbɛ̄i̍, a̍ ke̍kīi̍ nda̍ tōōsīāā a̍ kīle̍pīi̍ma̍ ve̍sɛ̍i̍ya̍ŋ ndo̍.

⁴Ō fūla̍ o̍ ko̍ŋ kɔ̍ɔ̍lī, mbo̍ hɛ̄li̍ Līva̍īya̍ ā ti᷄ŋ, mbo̍ hāndū nda̍ o̍ bɔ̄ŋa᷅ŋnda̍ kɔ̍fū kpe̍ma̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍ la̍ŋ lāchī, mā lūāā nyɛ᷅m chāa̍ŋ, mā sōlī cho̍ndo̍ŋ le̍ Mɛ̄lɛ̄ka̍ sāŋgālāa̍.

⁵O̍ ko̍ŋ, mi̍ Dēēve̍ yūlū A̍sa̍fī māā wāna̍ nda̍ ba̍nā. Mbo̍ yūlū vɛ̄lɛ̄ Sɛ̄kāla̍yā, le̍ mbo̍ wa̍ ndu̍ īkɛ̄i̍. Mbo̍ yūlū vɛ̄lɛ̄ Chɛ̍yɛ̄ɛ̄, a̍ Sīɛ̄mīla̍mɔ̍tī a̍ Chɛ̍yɛ̄ɛ̄, a̍ Mātīti̍yāā, a̍ Ɛ̄li̍a̍a̍bī, a̍ Bɛ̄na̍yā, a̍ Ōbɛ̄ɛ̄ I̍dɔ̄m, Chɛ̍yɛ̄ɛ̄. Nda̍ nda̍ a̍a̍ nɔ̍ le̍ nyɛ̄m chāa̍ŋ īyōō wo̍ŋ lɔ̄ɔ̍ ni̍. Mi̍ A̍sa̍fī pi̍la̍ ndu̍ wa̍ le̍ chɛ̍ŋchɛ̍ŋndo̍ŋ lɔ̄ɔ̍.

⁶O̍ ko̍ŋ kɔ̍ɔ̍lī, Bɛ̄na̍yā nda̍ Cha̍ha̍sīɛ̄ɛ̄, wānāā sōlīāā lāsa̍lāa̍, mi̍ nda̍ nda̍ wā le̍ pūtɛ̍nɛ̍i̍la̍ŋ hɔ̄ŋndo̍ kɔ̍fū kpe̍ma̍ Mɛ̄lɛ̄ka̍a̍ lāchī lēpāa̍ o̍ lēpāa̍.

⁷O̍ ko̍ŋ, o̍ pāa̍le̍ le̍ŋ chōo̍, mi̍ Dēēve̍ dīmī māā A̍sa̍fī nda̍ wānāya᷅ŋ ndɔ᷄ŋ nda̍ nɔ̍ le̍ chōndi̍i̍ ba̍li̍kɛ̍i̍ sōlīo̍o̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍ ni̍.

⁸O̍o̍, lā me᷄l Mɛ̄lɛ̄ka̍ Ya̍a̍wɛ̄ɛ̄ ba̍li̍ka̍, mī lā pɛ̄l ndu̍ dīōla̍ŋ, ndu̍yɛ̍ mī lā chɔ᷄m a̍ nyɛ̄ o̍ to̍sa̍ wo̍ wāŋndā chīe̍e̍ya̍ tɛ̍ɛ̄ŋ.

⁹Lā sōli̍ cho̍ndo̍ŋ, chōndu̍ŋ sa̍ŋgālā ndu̍ wo̍ŋ, lā chɔ᷄m a̍ wa̍lta̍ kɔ̄ndɔ̄fi̍ltā o̍ to̍sa̍ la̍ŋ.

¹⁰Na̍ŋɔ̄ɔ̍ ō chō o̍ dīōlā ndɔ̄la̍ di̍a̍ndāā la̍ŋ ni᷄ŋ, wānāa̍ cho̍ Mɛ̄lɛ̄ka̍ Ya̍a̍wɛ̄ɛ̄ nūūvīa̍a̍ a̍ kɔ̄l tā ndāla̍ŋ nda̍ ā dɔ̄ɔ̄nu̍ŋ nya̍a̍le̍!

¹¹Lā nu̍u̍vi̍a̍a̍ Mɛ̄lɛ̄ka̍ Ya̍a̍wɛ̄ɛ̄, ndu̍yɛ̍ a̍ kpāāya̍ ndɔ̄ɔ̍, lā hīo̍u̍ la̍chi̍ a̍ ndu̍ wāa̍ o̍ hɔ̄l le̍ te̍le̍ŋ o̍ te̍le̍ŋ!

¹²Lā lōōnu̍ŋ a̍ wa̍lta̍ kɔ̄ndɔ̄fi̍ltā o̍ tāse̍ la̍ŋ, a̍ ka̍a̍ma̍ālā o̍ to̍sa̍, ndu̍yɛ̍ mbo̍ sūāā a̍ kɔ̍ɔ̍sɔ̍ɔ̍ o̍kɔ̄ɔ̄ la̍ŋ.

¹³O̍o̍, nya̍ chūāūwāā māmāa̍ E̍bīlāha᷅mnda̍, bu̍ɛ̍ī Mɛ̄lɛ̄ka̍a̍, a̍ nya̍ pūa̍a̍ Che̍kɔ̍pū wa̍, wānāā o̍ hɛ̍li̍ wa̍!

¹⁴Ndu̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍ ni̍, sa̍kpōyɛ̍ī ndūɛ̍i̍ ī chō ī tīūwāā o̍ chi̍e̍ēŋndo̍ ni᷄ŋ kpo̍u̍.

¹⁵Ndu̍yɛ̍, ō pūɛ̄ɛ̄nu̍ŋ a̍ kpe̍ma̍ ndɔ̍ o̍ yi̍i̍ le̍ fɛ̍ɛ̍ŋ a̍ fɛ̍ɛ̍ŋ, mbō wa̍ nda̍ tɛ̄ɛ̄ŋ nda̍ wāŋnda̍ yu̍ŋgu̍la̍ŋ o̍ yu̍ŋgu̍la̍ŋ ni᷄ŋ ndo̍ le̍,

¹⁶a̍ kpe̍ma̍ o̍ yi̍i̍ nda̍ E̍bīlāha᷅m ndo̍, a̍ sēndi̍ o̍ me̍na̍la̍ŋ Āa̍se̍ wo̍,

¹⁷ndu̍yɛ̍, mbo̍ kɛ̄sī sēndi̍ kōŋ māā kpe̍ma̍ nda̍ tɛ̄ɛ̄ŋ nda̍ Che̍kɔ̍pū, mbo̍ dīmī māā kpe̍ma̍ fɛ̍ɛ̍ŋ fɛ̍ɛ̍ŋ ndo̍ o̍ cho̍ le̍ I̍sɔ̄lūɛ̄ī ni̍.

¹⁸Mbo̍ dīmī āā, “I̍ cho̍ nya̍ lɛ̄ŋndē Ke̍nāŋnde̍ŋ kē, māā būŋgɛ̄ī nyā le̍ mī lā cha᷄l lēni᷄ŋ.”

¹⁹Te̍le̍ŋ wānāa̍ Mɛ̄lɛ̄ka̍a̍ ā ve̍ wɔ̍ a̍ bɔ̄ɔ̍ le̍ wo̍, te̍le̍ŋ ko̍ŋ ā wa̍ īchāli̍ o̍ lɛ̄ŋndē Ke̍nāŋnde̍ŋ ni᷄ŋ māā lāmīāl.

²⁰Ndu̍yɛ̍, a̍ te̍le̍ŋ ko̍ŋ, ā wa̍ bālɔ̄ɔ̍ o̍ lɛ̄ŋnde̍ ni᷄ŋ, ā chɛ᷄ŋ pɛ̍ o̍ māsāle̍ŋ, ā kūɛ̄ vɛ̄lɛ̄ o̍ māsāle̍ŋ lēpīlɛ̍le̍ŋ.

²¹Kɛ̍ a̍ te̍le̍ŋ ko̍ŋ kpo̍u̍, Mɛ̄lɛ̄ka̍ ō chɛ᷄l mī wānā o̍ wānā tu̍si̍ nda̍ dɛ̍nɛ̍ pa̍lāā chōo̍ le̍, mbo̍ māndā nda̍, ndu̍yɛ̍ mbo̍ tōsā māsāa̍ bɛ̍ndūa̍a̍ ā yɔ᷄ŋ nda̍ nyɛ̄ o̍ nyɛ̄ le̍.

²²Mbo̍ dīmī āā, “La̍ pi̍la᷄ŋ wāna̍ ya̍ pi̍la̍ Mɛ̍lɛ̄ka̍a̍ ō hɛ̄li̍ wo̍ le̍, ndu̍yɛ̍ la̍ to̍sā nyɛ̄ o̍ nyɛ̄ wɔ̄ɔ̍ŋ nāa̍ wānāa̍ su̍a̍ā le̍ ya̍ wa̍ chūā le̍!”

²³Nya̍ wāŋnda̍ o̍ chi̍e̍ēŋndo̍ ni᷄ŋ kpo̍u̍, lā so̍li̍ chōnde̍i̍ nāa̍ Mɛ̄lɛ̄ka̍ Ya̍a̍wɛ̄ɛ̄ chūā! Lā chɔ̍m a̍ bāŋā ndɔ̍ o̍ ba̍ŋa̍ nya̍ wo̍ o̍kɔ̄ɔ̄ lēpāa̍ o̍ lēpāa̍.

²⁴Lā chɔ᷄m wāŋnda̍ a̍ nāŋɔ̄ɔ̄ ndɔ̄ɔ̍ o̍kɔ̄ɔ̄ o̍ lɛ̄ŋnde̍ ni᷄ŋ kpo̍u̍, lā chɔ̄ɔ̄mu̍u̍ wa̍lta̍ ndɔ̄la̍ kɛ̍ndɛ̄la̍ o̍ to̍sa̍ la̍ŋ wāŋnda̍ kpo̍u̍ tɛ̍ɛ̄ŋ!

²⁵Kāni̍ fo̍ndōle̍, Mɛ̄lɛ̄ka̍ Ya̍a̍wɛ̄ɛ̄ ō chō wāna̍ bɛ̄ndū bɛ̍ndū, le̍la̍ŋ ō nɔ̄ mbō sɔ̄la̍ sāŋgālā tɔ̍ɔ̍ma̍ bɛ̄ndōo̍, o̍ ko̍ŋ kɔ̍ɔ̍lī, bɛ̄ɛ̄le̍ŋ lē nɔ̄ mī lē wa̍ ndu̍ lē kēna᷄ŋ mbo̍ hīāū mɛ̄lɛ̄ka̍ā chēle̍ŋ nda̍ kpo̍u̍.

²⁶Kāni̍ fo̍ndōle̍, mɛ̄lɛ̄ka̍ā wāŋndā chi̍e̍e̍ya̍ nɔ̄ wa̍ ki̍nɛ̍i̍, pīɔ̄mnda̍ nda̍ chō ni̍, kɛ̍, Mɛ̄lɛ̄ka̍ Ya̍a̍wɛ̄ɛ̄ ndu̍ to̍o̍si̍a̍a̍ ha̍la̍a̍ chōo̍ cho̍o̍ ni̍.

²⁷Bɛ̄ɛ̄le̍ŋ a̍ sāŋgālāa̍ ō chō le̍ ndu̍, kpāāyāa̍ a̍ nya̍a̍lo̍o̍ ō chō o̍ fo̍ndāŋ ndɔ̄ɔ̍.

²⁸Lā sa̍ŋga̍la̍ Mɛ̄lɛ̄ka̍ Ya̍a̍wɛ̄ɛ̄, nya̍ wāŋnda̍ o̍ chi̍e̍ēŋndo̍ chōo̍, lā sa̍ŋga̍la̍ ndu̍ le̍ nāŋɔ̄ɔ̄ ndɔ̄ɔ̍ a̍ kpāāya̍ o̍ nɔ̍ o̍ fo̍ndāŋ ndɔ̄ɔ̍ wo̍.

²⁹Lā sāŋga̍la̍ dīōlā kɛ̄ndɛ̄lā bɛ̄ndūla̍ Mɛ̄lɛ̄ka̍ Ya̍a̍wɛ̄ɛ̄ la̍ŋ, lā hu᷄ŋ a̍ kēla̍ŋ, ndu̍yɛ̍ mī lā hīŋ o̍ chīɛ̍i̍ Mɛ̄lɛ̄ka̍a̍ ni᷄ŋ, lā so̍o̍lu̍u̍ Mɛ̄lɛ̄ka̍ Ya̍a̍wɛ̄ɛ̄ o̍ dīōndɔ̄ɔ̍ ndɔ̄ɔ̍ ni᷄ŋ,

³⁰lā hu᷄ŋ a̍ nyīīyāa̍ ndu̍ o̍ hɔ̄l, nya̍ chi̍e̍ēŋndo̍ kpo̍u̍, ō tōōsi̍a̍a̍ chi̍e̍ēŋndo̍ mbo̍ si᷄m yi̍, ō fe̍ŋāŋ ni̍ŋ o̍ fōōfō chōo̍ le̍.

³¹Ha̍la̍a̍ ō wa̍ a̍ kɔ̄l kɛ̄ndɛ̄, ndu̍yɛ̍ mī chi̍e̍ēŋndo̍ ō dɔ̄ɔ̄nu᷄ŋ nya̍a̍le̍, ndu̍yɛ̍ mbō lo̍ o̍ ko̍ŋ mā dīmi̍ o̍ lɛ̄ŋnde̍ ni᷄ŋ, āā, “Mɛ̄lɛ̄ka̍ Ya̍a̍wɛ̄ɛ̄ cho̍ Māsā Bɛ̍ndōo̍ ni̍”

³²Pēe̍ Mɛ̄ŋmā Īhɛ᷄llo̍ ō hīīlu̍ŋ, ndu̍yɛ̍ a̍ nyɛ̄ o̍ nyɛ̄ yōōmāa̍ cho̍ lēni᷄ŋ, lɛ̄ŋnde̍ŋ lē kpēēŋi̍a̍ŋ, a̍ nyɛ̄ o̍ nyɛ̄ cho̍ lēni᷄ŋ.

³³O̍ ko̍ŋ kɔ̍ɔ̍lī, mī yɔ̄mnde̍ sōli̍ chōndi̍i̍ kɔ̄l kɛ̄ndɛ̄i̍ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l, kāni̍ fo̍ndōle̍, ndu̍ hi᷅ŋ le̍ mbo̍ kɔ̄ɔ̄sa̍ a̍ chi̍e̍ēŋndo̍ ni̍.

³⁴Lā me᷄l Mɛ̄lɛ̄ka̍ Ya̍a̍wɛ̄ɛ̄ ba̍li̍ka̍a̍, kāni̍ fo̍ndōle̍, ō chō wānā kɛ̄ndɛ̄, kāālā ndɔ̄ɔ̍ ō chō le̍ fɛ̍ɛ̍ŋ a̍ fɛ̍ɛ̍ŋ!

³⁵Lā kōŋu̍l mī lā dīmī āā, “Pi̍ŋi̍ na̍a̍, O̍o̍ Mɛ̄lɛ̄ka̍ wāna̍ nāā pi̍ŋīa̍a̍, chu̍u̍ŋgi̍a̍a̍ na̍a̍ mā pi̍ŋi̍ na̍a̍ lɛ̄ŋnde̍ tɛ̍ɛ̄ŋ, le̍ mī ŋ̄ me᷄l dīōlā nūmnda̍ di̍a̍ndāā la̍ŋ ba̍li̍ka̍, ndu̍yɛ̍ māā mī ŋ̄ ke᷄ nu̍m sāŋgālāa̍ o̍ nāŋɔ̄ɔ̄ nūmndo̍ ni᷄ŋ.”

³⁶“Sāŋgālāa̍ chō le̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍, le̍ fɛ̍ɛ̍ŋ a̍ fɛ̍ɛ̍ŋ!” O̍ ko̍ŋ kɔ̍ɔ̍lī, mɛ̄ɛ̍ Dēēve̍ chīi̍ sūɛ̍i̍, mi̍ wāŋnda̍ kpe̍de̍ a̍ de̍ŋī chōo̍ cho̍o̍ ma̍ dīmī āā, “Āmi̍i̍nā!” Ma̍ sāŋgālā Mɛ̄lɛ̄ka̍ Ya̍a̍wɛ̄ɛ̄.

³⁷O̍ ko̍ŋ kɔ̍ɔ̍lī, mi̍ Dēēve̍ yūlū A̍sa̍fī nda̍ Līva̍īya̍ ā pīli̍a̍a̍, le̍ mā wa̍ kpe̍ku̍ cho̍ a̍ kɔ̍fu̍ kpe̍ma̍ Mɛ̄lɛ̄ka̍a̍ wo̍ tōsāa̍ lēpāa̍ o̍ lēpāa̍, mɛ̄ɛ̍ o̍ nɔ̍ le̍ to̍sa᷄ŋndo̍ yɛ̍.

³⁸O̍ ko̍ŋ kɔ̍ɔ̍lī, mi̍ O̍bɛ̄ɛ̄ I̍dɔ̄m nda̍ Li̍va̍īya̍ ŋ̄wāŋ be̍le̍ ŋɔ̍mpu᷅m a̍ wānāā ŋɔ̄ma̍a̍ (68), mi̍ nda̍ wā le̍ wānāā o̍ hɛ̍li̍ ha̍ā wa̍ mālāa̍. Mi̍ Ōbɛ̄ɛ̄ I̍dɔ̄m ndo̍ ō pīlɔ̄ɔ̍, po̍ Chɛ̍du̍tɔ̄ŋ ndo̍, nda̍ Ho̍sāā, mi̍ nda̍ wa̍ le̍ dīō sāāsāa̍ māndāa̍.

³⁹O̍ ko̍ŋ kɔ̍ɔ̍lī, mi̍ Dēēve̍ ō yūlū vɛ̄lɛ̄ Sa̍dɔ̍kī, wānā so̍līāā sa̍lāa̍, nda̍ wānāya᷅ŋ ndɔ᷄ŋ wānāā sōlīāā lāsa̍lāa̍ ā pīli̍a̍a̍, le̍ mā wa̍ Mɛ̄lɛ̄ka̍ sōōlūūwo̍ o̍ chīɛ̍i̍ Mɛ̄lɛ̄ka̍a̍ ni᷄ŋ Ki̍bīɔ̄ŋ.

⁴⁰Nda̍ nda̍ a̍a̍ nɔ̍ le̍ sa̍lālā lūāmāāla̍ŋ sōlīo̍o̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍, o̍ ma̍āŋndo̍ chōo̍, ō nda̍ a̍a̍ lu̍ām sālālā lūāmāāla̍ŋ lɔ̍ɔ̍ o̍ lɔ̍ɔ̍, īdīi̍ a̍ īchɔ̄l lo̍ ni̍, a̍ mɛ̄ɛ̍ i̍ wa̍ ī pōōnyīāā o̍ yāu̍ lā sāwa̍ Mɛ̄lɛ̄ka̍a̍ ni᷄ŋ yɛ̍, mɛ̄ɛ̍ Mɛ̄lɛ̄ka̍ di̍mu̍l I̍sɔ̄lūɛ̍i̍ya̍ yɛ̍.

⁴¹Hɛ̍māŋ nda̍ Chɛ̍du̍tɔ̄ŋ, nda̍ wa̍ wānāā ndāā ma̍lāa̍ ni̍. O̍ ko̍ŋ kɔ̍ɔ̍lī, a̍ wānāā tūa̍a̍, a̍ wa̍ ā hɛ̄līa̍ŋ le̍ mā mēl Mɛ̄lɛ̄ka̍ Ya̍a̍wɛ̄ɛ̄ ba̍li̍ka̍, le̍ kāālā ndɔ̍ chō le̍ fɛ̍ɛ̍ŋ a̍ fɛ̍ɛ̍ŋ ndo̍ wa̍.

⁴²Hɛ̍māŋ nda̍ Chɛ̍du̍tɔ̄ŋ nda̍ ndā yūlū le̍ pūtɛ̍nɛ̍i̍la̍ŋ hɔ̄ŋndo̍, a̍ chɛ̍ŋchɛ̍ŋndo̍ŋ lɔ̄ɔ̍, a̍ nyɛ̄m chāāŋ yɛ̍ yi̍ɔ̍ɔ̍ŋ lɔ̄ɔ̍ le̍ chōndu̍ŋ sa̍ŋgāla᷄ŋ sōlīo̍o̍ te̍le̍ŋ so̍o̍lāa̍ ni̍. O̍ ko̍ŋ kɔ̍ɔ̍lī, Līva̍īya̍ a̍ fu̍la̍ o̍ būŋgɛ̄ī Chɛ̍du̍tɔ̄ŋ nde̍ ni᷄ŋ nda̍, nda̍ wa̍ ā hɛ̄līāā le̍ dīō sāāsāa̍ māndāa̍, ni̍.

⁴³O̍ ko̍ŋ kɔ̍ɔ̍lī, mi̍ wāŋnda̍ kpo̍u̍ a̍ pi̍ɔ̄l ma̍ mīīŋgū o̍ chīɛ̄īlā ndāla̍ŋ. O̍ ko̍ŋ, Dēēve̍ bɛ̍ɛ̍ mbo̍ mīīŋgū o̍ ndu̍ lo̍, le̍ mbō kɔ̍ wa᷅ nda̍ yu̍ŋgu̍ ndɔ̄ɔ̍ lātūlu̍ le̍ te̍le̍ŋ ti̍ŋ.