Read Southern Kisi Ko̍lo̍ni̍kō Tāso̍o̍ 17 Bible Online

Ko̍lo̍ni̍kō Tāso̍o̍ 17 - Southern Kisi bible

Ko̍lo̍ni̍kō Tāso̍o̍ 17

¹O̍ ko̍ŋ kɔ̍ɔ̍lī, mɛ̄ɛ̍ Dēēve̍ o̍ hīōū o̍ chīɛ̄ī ndɔ̄ lēmāsāa̍ ni᷄ŋ, pāa̍le̍ pi᷅lɛ̍ mbo̍ dīmūl Ne̍tāŋ wāna̍ su̍a̍ā le̍ Mɛ̄lɛ̄ka̍ wo̍ āā, “To̍fa̍ wɔ̍, I̍ cho̍ o̍ chīɛ̄ī yɔ̄mīī si̍dāā wo̍ ni᷄ŋ, kɛ̍ mi̍ kɔ̍fu̍ kpe̍ma̍ Mɛ̄lɛ̄ka̍a̍ Ya̍a̍wɛ̄ɛ̄ wo̍ ndu̍ wa᷅ o̍ tɛ̍ndīi̍yo̍ bɛ̄ŋgu̍.”

²O̍ ko̍ŋ, mi̍ Ne̍tāŋ di̍mūl Dēēve̍ āā, “To̍sa̍ nyɛ̄ o̍ nyɛ̄ cho̍ nu̍m o̍ kɔ̄l, Mɛ̄lɛ̄ka̍ ō chō a̍ nūm la̍tu̍lu̍.”

³Kɛ̍, nyūmmā māŋ mi̍ Mɛ̄lɛ̄ka̍ Ya̍a̍wɛ̄ɛ̄ o̍ sūāā nāa̍ Ne̍tāŋ chu̍a̍ mbo̍ dīmūl ndu̍ āā,

⁴“Kɔ̍ mā di̍mu̍l bu̍ɛ̍ī nūu̍ Dēēve̍ āā, ‘Nyɛ̄ ya̍ Mɛ̍lɛ̄ka̍ Ya̍a̍wɛ̄ɛ̄ dīmi̍ wo̍ cho̍ ho̍ō ni̍, māā ō cho̍ nūm te̍ cho̍ ya̍ chīɛ̄īyo̍ tēŋgūl mī wa̍ lēni᷄ŋ te̍.

⁵Chɔ̍ŋ a̍ te̍le̍ŋ ya̍ I̍ so̍li̍ wāŋnda̍ I̍sɔ̄lūɛ̄ī I̍chi̍pī wo̍, mbo̍ bīī a̍ pāa̍le̍ hāūle̍ŋ nde᷅ŋ, I̍ lu̍e̍i̍ chi̍ɛ̍ī ni̍ŋ te̍, o̍ tɛ̍ndīi̍la̍ŋ ni᷄ŋ ya̍ wa̍ cha᷄lle̍ ni̍. I̍ fu̍la̍ pɛ̍ o̍ ho̍ō ni᷄ŋ, I̍ lu̍ɛ̍ī o̍ ho̍ō ni᷄ŋ, I̍ fa̍ŋa̍ŋ pɛ̍ o̍ nāa̍ cha̍lāa̍ ha̍ā, I̍ hīōū o̍ nāa̍ cha̍lāa̍ a̍ pīli̍a̍a̍.

⁶O̍ fo̍ndāŋ ndā yɛ̍ yɛ̍la̍ ya̍ I̍ ba̍lu̍ a̍ I̍sɔ̄lūɛ̍i̍ya̍ la̍ŋ ki̍nɛ̍i̍, ya̍ i̍i̍ so̍o̍ nāa̍ wānāā ndāā bɛ̍ndūa̍a̍ chūā, ā ya̍ hɛ̍li̍ le̍ mā mānda̍ wānāā nīa̍a̍ wa̍, mi̍ nyu̍na̍ nda̍ ma̍a̍, vɛ᷅ lā te̍ŋgu̍l la̍ chīɛ̄ī yɔ̄mīī si̍dāā wo̍ le̍?’

⁷“Le̍la̍ŋ, di̍mu̍l bu̍ɛ̍ī nūu̍ Dēēve̍ māā, nyɛ̄ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ō dīmi̍ wo̍ cho̍ ho̍ō ni̍ āā, ‘Ya̍ so̍li̍ nu̍m yōndōo̍ ni᷄ŋ nāa̍ ŋ̄ wa̍ sāa̍ māndāa̍ wa̍ ni̍, le̍ mā wa̍ māsāa̍ wānāā nīa̍a̍ I̍sɔ̄lūɛ̍i̍ya̍ chōo̍.

⁸O̍ ko̍ŋ kɔ̍ɔ̍lī, I̍ wa̍ lātūlu̍ a̍ nūm bā o̍ bā nūm o̍o̍ kɔ̍. Ndu̍yɛ̍ mi̍ I̍ ya᷅m ya̍a̍mɔ̍ɔ̍wa̍ nu̍m nda̍ nu̍m lāchī. Ndu̍yɛ̍ I̍ cho̍ nu̍m sīīŋgūū wāna̍ tɔ̍ɔ̍ mī dīōlā nūmnda̍ŋ lā fūla̍ tɔ̍ɔ̍ māā wānāā kpāāyāā bɛ̄ndū bɛ̍ndūa̍a̍ o̍ chi̍e̍ēŋndo̍ chōo̍.

⁹O̍ ko̍ŋ kɔ̍ɔ̍lī, mī I̍ hɛ̍li̍ fo̍ndāŋ ndo̍ le̍ wānāā nīa̍a̍ I̍sɔ̄lūɛ̍i̍ya̍, le̍ mī fo̍ndāŋ kōŋ ō wā nyɛ̄ ndā, ndu̍yɛ̍ mā wa̍ lo̍ŋ a̍ kɔ̄l nyūlū. O̍ ko̍ŋ, sīōōŋīī bi̍i̍ le̍ nda̍ mā nyīīya̍ le̍, ndu̍yɛ̍ lɛ̄ŋīī dɛ̍nɛ̍ wɔ̄ɔ̍ŋ i̍ hu᷅ŋ nda̍ dēlɔ̄ɔ̍ chōo̍ ve̍, ī dēl le̍ nda̍ chōo̍ le̍.

¹⁰Chɔ̍ŋ a̍ te̍le̍ŋ ya̍ I̍ hɛ̍li̍ māsāa̍ kɔ̍ɔ̍sā a̍ wāŋnda̍ wa̍ le̍ mā wa̍ wānāā nīa̍a̍ I̍sɔ̄lūɛ̍i̍ya̍ chōo̍ wo̍, mi̍ I̍ ya᷅m ya̍a̍mɔ̍ɔ̍wa̍a̍ nyāa̍. O̍ ko̍ŋ kɔ̍ɔ̍lī, mī I̍ di̍mu̍l nu̍m vɛ̄lɛ̄ māā, Mɛ̄lɛ̄ka̍ Ya̍a̍wɛ̄ɛ̄ o̍ cho̍ nu̍m chīɛ̄īyo̍ tēŋgūl.

¹¹O̍ ko̍ŋ kɔ̍ɔ̍lī, tē te̍le̍ŋ nu̍m pīɔ̍mndo̍ ō fūūlu̍u̍ pɛ̍ mā vī, mā kɔ̍ chɔ᷅ nu̍m nāa̍ nda̍ chɔ̍ fi̍nyāā nūm a̍ ma̍māa̍ wa̍, I̍ cho̍ po̍ nu̍mndo̍ ō pīlɛ̍ sīīŋgūū māsā bɛ̍ndū, ndu̍yɛ̍ mī māsāle̍ ndɔ̄le̍ŋ lē nɔ̄ kpāāyāa̍.

¹²Ndu̍ cho̍ chīɛ̄īyo̍ tāŋgūl le̍ ya̍ ni̍, ndu̍yɛ̍ mī I̍ to̍sa̍ mī kpe̍ŋgbe̍i̍ ndɔ̍ lēmāsāa̍ ō wa̍ le̍ fɛ̍ɛ̍ŋ a̍ fɛ̍ɛ̍ŋ.

¹³I̍ cho̍ wā fi̍nyā ndɔ̄, ndu̍yɛ̍ mī ndu̍ wa̍ po̍ ni̍. I̍ cho̍ ndu̍ ka̍a̍lā ni̍ cho̍ le̍ fɛ̍ɛ̍ŋ a̍ fɛ̍ɛ̍ŋ ndo̍ fāŋā kɔ̄ɔ̄lī, mɛ̄ɛ̍ ya̍ I̍ fa̍ŋa̍ ndu̍ wāna̍ wa̍ pāāndū o̍ māsāle̍ le̍ŋ chōo̍ nu̍m lāchī wa̍ kɔ̄ɔ̄lī yɛ̍ le̍.

¹⁴Kɛ̍, I̍ cho̍ po̍ nu̍mndo̍ hāndɔ̄ɔ̄ chīɛ̄ī nūu̍ a̍ māsāle̍ nīle̍ŋ lāchī le̍ fɛ̍ɛ̍ŋ a̍ fɛ̍ɛ̍ŋ. Ndu̍yɛ̍ māsāle̍ ndɔ̄le̍ŋ lē nɔ᷅ ni̍ŋ la̍mɛ̍ɛ̍lu̍ le̍.’”

¹⁵O̍ ko̍ŋ kɔ̍ɔ̍lī, mi̍ Ne̍tāŋ di̍mu̍l Dēēve̍ nyɛ̄ o̍ nyɛ̄ Mɛ̄lɛ̄ka̍ dīmūl ndu̍, a̍ nyɛ̄ o̍ nyɛ̄ Mɛ̄lɛ̄ka̍ chɔ̄ɔ̄mu̍u̍ nāa̍ ndu̍ chu̍a̍.

¹⁶O̍ ko̍ŋ kɔ̍ɔ̍lī, mi̍ Māsā Bɛ̍ndōo̍ Dēēve̍ kūā o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ o̍ cho̍ a̍ nda̍ la̍tu̍lu̍ wo̍ ni᷄ŋ, mbo̍ kɔ̍ cha᷅l mbo̍ pīɛ̄ī Mɛ̄lɛ̄ka̍, mbo̍ dīmī āā, “O̍o̍ Mɛ̄lɛ̄ka̍, Mɛ̄lɛ̄ka̍ Ya̍a̍wɛ̄ɛ̄, ya̍ ni̍, wānāā nīa̍a̍ ni̍, ŋ̄ cho̍ a̍ sɔ᷅vɛ̍ mā to̍sa̍l na̍a̍ kɛ̄ndɛ̄ī bɛ̍ndūī wāā nu̍a̍ā le̍.

¹⁷Ndu̍yɛ̍ ma̍ wa̍ hīōūwɔ̄ɔ̍ lāchī kɛ̍, a̍ ya̍ chɔ̄mndo̍ mɛ̄ɛ̍ pūlāle̍ nīle̍ŋ lē wā ni̍ŋ o̍ sīɔ̄dīi̍ lāchīo̍o̍ ni᷄ŋ yɛ̍. O̍o̍ Mɛ̄lɛ̄ka̍.

¹⁸Bāā yɛ̄ɛ̍nɛ̍ chēle̍ŋ ya̍ Dēēve̍ nɔ̍ yɛ̍ mī I̍ di̍mu̍l nu̍m a̍ bɛ̄ɛ̄le̍ ŋ̄ ke̍ bu̍ɛ̍ī nūmndo̍ le̍ŋ? Kāni̍ fo̍ndōle̍, nūm pi̍la̍ si̍nā bu̍ɛ̍ī nūmndo̍.

¹⁹Le̍ sa̍bu̍ bu̍ɛ̍ī nūmndo̍, O̍o̍ Mɛ̄lɛ̄ka̍ Ya̍a̍wɛ̄ɛ̄, mɛ̄ɛ̍ nūm pi̍la̍ kɛ̍ɛ̍si̍a̍ŋ ndi̍ o̍ kɔ̄l ma̍ si̍i̍ŋgu̍u̍ ya̍ wānā bɛ̍ndū ma̍ chɔ̄m ya̍ nyɛ̄m tɔ̍ɔ̍ma̍a̍ mu᷅ŋ.

²⁰Wānā o̍ wānā cho̍ māā nūm te̍, O̍o̍ Mɛ̄lɛ̄ka̍ Ya̍a̍wɛ̄ɛ̄, ndu̍yɛ̍ mɛ̄lɛ̄ka̍ o̍ mɛ̄lɛ̄ka̍ chēle̍ŋ cho̍ o̍ nūm kɔ̍ɔ̍lī le̍. Nyɛ̄ o̍ nyɛ̄ na̍a̍ tūēī a̍ nīlā nāā la̍ŋ a̍ nūm o̍kɔ̄ɔ̄, tōnya̍ o̍ cho̍ ni̍.

²¹Lēkāa̍ o̍ lēkāa̍ cho̍ mī lē wa̍ māā I̍sɔ̄lūɛ̄ī le̍. Nu᷄m kɔ̍ so̍lī nda̍ o̍ chɛ̄lē nda̍ wa̍ bɛ̄ŋgu̍ le̍ŋ ni̍, ma̍ sīīŋgūū nda̍ wānāā nūm. O̍ ko̍ŋ, le̍ sɔ̍ɔ̍ŋ tɔ̍ɔ̍ma̍ŋ a̍ sɔ̄ɔ̍ŋ kɔ̄ndɔ̄fi̍li̍ŋ ŋ̄ tōsa̍ wo̍ŋ, mi̍ dīōlā nūmnda̍ŋ lā fūlā tɔ̍ɔ̍ o̍ chi̍e̍ēŋndo̍ chōo̍. Nu᷄m kɔ̍ ba̍ŋā nda̍ I̍chi̍pī ni̍, ma̍ tu̍a̍ū ya̍a̍mɔ̍ɔ̍wa̍a̍ ndāa̍ nda̍ lāchī.

²²O̍ ko̍ŋ kɔ̍ɔ̍lī, ma̍ sīīŋgūū nda̍ wānāā nūm le̍ fɛ̍ɛ̍ŋ a̍ fɛ̍ɛ̍ŋ, ndu̍yɛ̍ nūm Mɛ̄lɛ̄ka̍ Ya̍a̍wɛ̄ɛ̄, ma̍ sīmnu᷄ŋ Mɛ̄lɛ̄ka̍ ndā.

²³“Le̍la̍ŋ su̍ŋsu̍ŋ Mɛ̄lɛ̄ka̍ Ya̍a̍wɛ̄ɛ̄, būŋgɛ̄ī ŋ̄ chu̍a̍ a̍ bu̍ɛ̍ī nūmndo̍ o̍kɔ̄ɔ̄ a̍ yu̍ŋgu̍ ndɔ̄ɔ̍ ve̍, ī wa̍ le̍ fɛ̍ɛ̍ŋ a̍ fɛ̍ɛ̍ŋ, ndu̍yɛ̍ mā hīōū lāchī a̍ nyɛ̄ ŋ̄ chu̍e̍l na̍a̍ būŋgɛ̄i̍yo̍ to̍sāa̍.

²⁴Ko̍ŋ to̍sa̍ ni̍, mi̍ dīōlā nūmnda̍ŋ lā hīōū lāchī a̍ tɔ̍ɔ̍ nɔ̄ɔ̍, le̍ fɛ̍ɛ̍ŋ a̍ fɛ̍ɛ̍ŋ. O̍ ko̍ŋ mī wānā o̍ wānā di̍mi̍ āā, ‘Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, māā nu᷄m cho̍ māsāa̍ le̍ I̍sɔ̄lūɛ̄ī ni̍, ndu̍yɛ̍ ma̍ wā Mɛ̄lɛ̄ka̍ ndā.’ Ndu̍yɛ̍ ma̍ to̍sa̍ mī bu̍ɛ̍ī nūmndo̍ Dēēve̍, a̍ yu̍ŋgu̍ ndɔ̄ɔ̍ mā hīōū lāchī a̍ wāa̍ lāmāsā I̍sɔ̄lūɛ̄ī le̍ fɛ̍ɛ̍ŋ a̍ fɛ̍ɛ̍ŋ.

²⁵Nūm pi̍la̍ chɔ̍m ya̍ bu̍ɛ̍ī nūmndo̍ sɔ̄ɔ̍ŋ mu᷅ŋ ni̍, Mɛ̄lɛ̄ka̍ nūu̍, māā ā chō ya̍ chīɛ̄īyo̍ tēŋgūl, le̍ sa̍bū kōŋ ya̍ I̍ sɔ̍la̍ kɔ̄l sīmūlāa̍ ni̍ mi̍ wa᷅ nu̍m pīɛ̄īlē wāā nu̍a̍ā.

²⁶O̍o̍ Mɛ̄lɛ̄ka̍ Ya̍a̍wɛ̄ɛ̄, nūm pi̍la̍ chūe̍l ya̍ bu̍ɛ̍ī nūmndo̍ būŋgɛ̄ī kɛ̄ndɛ̄i̍ he̍ī ni̍.

²⁷Le̍la̍ŋ yāndi̍i̍, dɔ̍u̍ yu̍ŋgu̍ nūu̍ sa̍lā le̍ fɛ̍ɛ̍ŋ a̍ fɛ̍ɛ̍ŋ mā to̍sa̍ mā hīōū lāchī a̍ wāa̍ māsāā bɛ̍ndū ā nūm pi̍la̍ hɛ̍li̍ wa̍. Ndu̍yɛ̍ a̍ chi̍i̍ ni᷅ŋ yu̍ŋgu̍ nūu̍ sa̍lā dɔ̄wɔ̄ɔ̍, ndu̍yɛ̍ I̍ si̍nā māā sa̍lā kōŋ ō chō wa̍ le̍ fɛ̍ɛ̍ŋ a̍ fɛ̍ɛ̍ŋ.”