Read Southern Kisi Ko̍lo̍ni̍kō Tāso̍o̍ 18 Bible Online

Ko̍lo̍ni̍kō Tāso̍o̍ 18 - Southern Kisi bible

Ko̍lo̍ni̍kō Tāso̍o̍ 18

¹Mɛ̄ɛ̍ te̍le̍ŋ ti̍ŋ hīōū, mi̍ Dēēve̍ kɔ̍ de̍l Fīli̍i̍tīāŋnda̍ chōo̍ a̍ sɔ̍ŋgɔ̄ɔ̍, ndu̍yɛ̍ mbo̍ yām nda̍. O̍ ko̍ŋ, mbo̍ pōōndā chīe̍e̍ nda̍ vēēlu̍ āā Ka̍tī wo̍ a̍ sɔ̄ndɔ̄kɔ̍ltā ndɔ̄la̍ŋ Fīli̍i̍tīāŋnda̍ o̍ bā.

²O̍ ko̍ŋ kɔ̍ɔ̍lī, mbo̍ yām vɛ̄lɛ̄ lɛ̄ŋndē Mo̍wa̍bīle̍ŋ, o̍ ko̍ŋ mi̍ wāŋnda̍ Mo̍wa̍bī ā sīmnu᷄ŋ wa̍nāā wa̍lla̍ le̍ Dēēve̍, ndu̍yɛ̍ mā māl ndu̍ pāāwāa̍ o̍ bā.

³O̍ ko̍ŋ kɔ̍ɔ̍lī, mi̍ Dēēve̍ yām vɛ̄lɛ̄ Hādādɛ̍sɛ̄ɛ̄, māsā bɛ̍ndōo̍ le̍ So̍bāā, nāa̍ ndu̍ o̍o̍ ku̍ɛ̄ le̍ wūndu̍le̍ ndɔ̄le̍ŋ sīmīo̍o̍ Ha̍ma̍tī o̍ Pīo̍o̍ Yūfi̍lu̍a̍tīī wa̍.

⁴O̍ ko̍ŋ kɔ̍ɔ̍lī, mi̍ Dēēve̍ ō bīī ndu̍ nyɛ̄lā chɔ̄ūlā su̍a̍ā ā nāŋ nda̍ŋ o̍ bā wāa̍ pīlɛ̍ (1,000), a̍ pūa̍a̍ sɔ̍ŋgā o̍ su̍a̍ā chōo̍ wa̍ wāa̍la̍ŋ lā ŋɔ᷄mmɛ̍ū (7,000), a̍ so̍vɛ̄i̍ya̍a̍ sɔ̍ŋgā lɛ̄ŋ nda̍ wāa̍la̍ŋ bi̍di̍i̍ŋ (20,000). O̍ ko̍ŋ kɔ̍ɔ̍lī, mi̍ Dēēve̍ mɛ̄ī su̍a̍a̍ nyɛ̄lā nyāāna᷄ŋnda̍ kɛ̄mɛ̄ (100). Kɛ̍ ā tūa̍a̍ kpo̍u̍ mbo̍ yīmī nda̍ pēlo̍ŋ.

⁵O̍ ko̍ŋ kɔ̍ɔ̍lī, mɛ̄ɛ̍ wāŋnda̍ Si̍i̍līāā, a̍ wa̍ Dāma̍si̍kɔ̍ɔ̄ chīe̍e̍ wa̍ ā hīŋ le̍ Hādādɛ̍sɛ̄ɛ̄, Māsā Bɛ̍ndōo̍ So̍bāā mālāa̍ a̍ sɔ̍ŋgāa̍, mi̍ Dēēve̍ dīī so̍vɛ̄i̍ya̍a̍ ndāa̍ wāa̍la̍ŋ bi̍dīi̍ŋ a̍ lā tīɔ̍ɔ̍ŋ (22,000).

⁶O̍ ko̍ŋ, mi̍ Dēēve̍ ki̍a̍lū fo̍ndāŋndā so̍vɛ̄i̍ya̍ ā wā la̍ŋ Dāma̍si̍kɔ̍ɔ̄, o̍ lɛ̄ŋndē Si̍i̍līāā le̍ŋ ni᷄ŋ. O̍ ko̍ŋ, mi̍ wāŋnda̍ Si̍i̍līāā a̍ wa̍ ni̍ko̍ Dēēve̍ o̍ bā bɛ̄ŋgu̍, mā māl ndu̍ pāāwāa̍ o̍ bā. Ndu̍yɛ̍, bā o̍ bā Dēēve̍ ndu̍ o̍o̍ ku̍ɛ̄ a̍ sɔ̍ŋgɔ̄ɔ̍ pɛ̍, kīo̍o̍ Mɛ̄lɛ̄ka̍ Ya̍a̍wɛ̄ɛ̄ ndu̍ o̍o̍ ke̍ ndu̍ kpāāyāa̍ ni̍ mbō yēm.

⁷O̍ ko̍ŋ kɔ̍ɔ̍lī, mi̍ Dēēve̍ ō bīī nyɛ̄lā so̍vɛ̄i̍ya̍ ā bīī o̍ lābā māā bōo̍la̍ bɛ̍ndū la̍ŋ, lā bu̍ɛ̍i̍yāa̍ Hādādɛ̍sɛ̄ɛ̄ wa̍ nda̍ a̍a̍ nɔ̍, mi̍ lā wā lā tōōsīāā a̍ ko̍o̍līi̍yo̍ŋ nda̍ŋ, mbo̍ kūā a̍ la̍ŋ Chūlu̍sɛ̄lɛ̄m.

⁸O̍ ko̍ŋ kɔ̍ɔ̍lī, mi̍ Dēēve̍ chūā vɛ̄lɛ̄ būlɔ̍ŋsīi̍yo̍ŋ ta̍u̍ ta̍u̍, o̍ chi̍e̍e̍ŋ bɛ̍ndo᷄ŋ mu᷅ŋ, Tībi̍ha̍tī a̍ Ku᷅ŋ. Ŋ̍ wa̍ Māsā Bɛ̍ndōo̍ Hādādɛ̍sɛ̄ɛ̄ o̍ bā bɛ̄ŋgu̍ wo̍ŋ. Būlɔ᷄ŋsīi̍ mu̍ŋ Sɔ̍lɔ̍mɔ̄ŋ o̍ hu̍ŋ to̍o̍sīāā hɛ̄ŋgɛ̍i̍ bɛ̍ndū nda̍ a̍a̍ ve̍e̍lū āā, pēe̍ Mɛ̄ŋmā īhɛ᷄llo̍ wo̍ ni̍, a̍ sūŋgbu̍a̍ŋ, a̍ nyɛ̄m lāāndu᷄ŋ wa̍ o̍ chīɛ̍i̍ Mɛ̄lɛ̄ka̍a̍ ni᷄ŋ ndo̍ŋ.

⁹Mɛ̄ɛ̍ To̍ū, Māsā Bɛ̍ndōo̍ Ha̍ma̍tī o̍ tu̍e̍ī māā Dēēve̍ yēm pūa̍a̍ chɔ̄ūwāa̍ Hādādɛ̍sɛ̄ɛ̄ wa̍ Māsā Bɛ̍ndōo̍ So̍bāā,

¹⁰mbo̍ yɔ̄ŋ Cho̍lūām po̍ ndɔ̄ le̍ mbō kɔ̍ yi᷅l Māsā Bɛ̍ndōo̍ Dēēve̍, mbō me̍l ndu̍ ba̍li̍ka̍ le̍ sɔ̍ŋgɔ̄ o̍ sɔ̍ŋga̍ a̍ Hādādɛ̍sɛ̄ɛ̄ ndu̍yɛ̍ mbo̍ yām ndu̍ wo̍. Kāni̍ fu̍u̍le̍, Hādādɛ̍sɛ̄ɛ̄, o̍ wa̍ sɔ̍ŋgɔ̄ɔ̍ a̍ ndu̍ le̍ te̍le̍ŋ o̍ te̍le̍ŋ. O̍ ko̍ŋ kɔ̍ɔ̍lī, mi̍ Māsāa̍ To̍ū o̍ yɔ᷅ŋ Dēēve̍ nyɛ̄m yɛ̍ yɛ̍ŋ wa̍ ŋ̄ tōōsīāā a̍ ko̍o̍līi̍yo̍ŋ, a̍ ka̍ni̍ŋ hu̍mbo̍ŋ, a̍ būlɔ̍ŋsīi̍yo̍ŋ ndo̍ŋ,

¹¹nyɔ̄ɔ̍ŋ mu᷅ŋ kpo̍u̍ mi̍ Māsā Bɛ̄ndōo̍ Dēēve̍ ō ma᷅l mu̍ŋ Mɛ̄lɛ̄ka̍ Ya̍a̍wɛ̄ɛ̄ o̍ bā, lātūlu̍ a̍ nyɛ̄m o̍ chu̍a̍ o̍ lɛ̄ŋīī o̍ ye᷅m nde̍ ni᷄ŋ ndo̍ŋ, ka̍ni̍ŋ hu̍mbo᷄ŋ, a̍ ka̍ni̍ŋ si̍a̍ŋa᷄ŋ. Lɛ̍ŋīī Dēēve̍ yēm ke̍ŋ nde̍ cho̍ he̍ī ni̍. I̍dɔ̄m, a̍ Mo̍wa̍bī, o̍ ko̍ŋ kɔ̍ɔ̍lī a̍ A̍mɔ᷅ŋ, a̍ Fīli̍i̍tīāā, a̍ A̍ma̍lɛ̍kī.

¹²O̍ ko̍ŋ kɔ̍ɔ̍lī, Ābi̍sīāā po̍ Sɛ̄lu̍i̍yā wo̍, ndu̍ bɛ̍ɛ̍ mbo̍ dīī wāŋnda̍ I̍dɔ̄m wāa̍la̍ŋ tɔ̍ a̍ lā ŋɔ̄ma̍a̍ (18,000) o̍ fo̍ndāŋ nda̍ vēēlū āā, hɛ᷄lle̍ wo̍, o̍ lɛ̄ŋndē dɛ̍ŋgbɛ̍le̍ŋ o̍ pēmbo᷄ŋ tɛ̄ɛ̄ŋ.

¹³O̍ ko̍ŋ, mi̍ Dēēve̍ tīū fo̍ndāŋndā pūa̍a̍ chɔ̄ūwa̍ kīōlɔ̄ɔ̍ o̍ lɛ̄ŋndē I̍dɔ̄mnde̍ŋ ni᷄ŋ kpo̍u̍. Mi̍ wāŋnda̍ I̍dɔ̄m a̍ wa̍ ni̍ko̍ Dēēve̍ o̍ bā bɛ̄ŋgu̍. Ndu̍yɛ̍ bā o̍ bā Dēēve̍ ndu̍ o̍o̍ ku̍ɛ̄ a̍ sɔ̍ŋgɔ̄ɔ̍ pɛ̍, kīo̍o̍ Mɛ̄lɛ̄ka̍ Ya̍a̍wɛ̄ɛ̄ ndu̍ o̍o̍ ke᷅ ndu̍ kpāāyāa̍ ni̍ mbo̍ yēm.

¹⁴O̍ ko̍ŋ kɔ̍ɔ̍lī, mi̍ Dēēve̍ sīmnu᷄ŋ ma̍sāa̍ lɛ̄ŋndē I̍sɔ̄lūɛ̍i̍le̍ŋ chōo̍ kpo̍u̍. Ndu̍yɛ̍ mbo̍ wā sa̍kpō o̍ māsāle̍ ndɔ̄le̍ŋ ni᷄ŋ wa̍nāā ndūa̍a̍ tɛ̄ɛ̄ŋ, o̍ ve̍ wa᷅na̍ lāka̍fā le̍.

¹⁵Cho̍wa̍bī, po̍ Sɛ̄lu̍i̍yā wo̍, ndu̍ wa̍ bōllē pūa̍a̍ ndūa̍a̍ chɔ̄ūwa̍ ni̍. Chɛ̄hōsi̍a̍fa̍tī, po̍ A̍hi̍lūū wo̍ yɛ̍, ndu̍ wa̍ wānā po̍o̍nyīāā lēlɛ̄ŋ ndo̍ ni̍.

¹⁶O̍ ko̍ŋ kɔ̍ɔ̍lī, Sa̍dɔ̍kī, po̍ A̍hi̍tu̍bī wo̍, nda̍ Āhīmɛ̍lɛ̍kī, po̍ Ābīa̍a̍tā wo̍, nda̍ wa̍ wānāa̍ so̍lī sa̍lāa̍ o̍ Mɛ̄lɛ̄ka̍ lo̍ wa̍ ni̍. Sɛ̄lu̍a̍yā wa̍ wānā po̍o̍nyīa̍a̍ o̍ tōŋgo̍ kɔ̍ɔ̍sɔ̍ɔ̍ ni᷄ŋ ni̍.

¹⁷O̍ ko̍ŋ kɔ̍ɔ̍lī, Bɛ̄na̍yā po̍ Chɛ̄hōwa̍dā wo̍, ndu̍ wa̍ bōllē pūa̍a̍ nda̍ a̍a̍ ma̍ndā Dēēve̍ wa̍ ni̍, ndu̍yɛ̍ mi̍ Dēēve̍ pūa̍a̍ ndūa̍a̍ o̍ ve̍lū wa̍ nda̍ nda̍ wa̍ o̍ fo̍ndāŋndā bɛ̄ndūla̍ yɛ̍ yɛ̍la̍ŋ māsāa̍ Dēēve̍ o̍ bā bɛ̄ŋgu̍.