Read Southern Kisi Ko̍lo̍ni̍kō Tāso̍o̍ 19 Bible Online

Ko̍lo̍ni̍kō Tāso̍o̍ 19 - Southern Kisi bible

Ko̍lo̍ni̍kō Tāso̍o̍ 19

¹Mɛ̄ɛ̍ te̍le̍ŋ ti̍ŋ hīōū, mi̍ Na̍ha̍sī, o̍ wa̍ Māsā Bɛ̍ndōo̍ le̍ lɛ̄ŋndē A̍mɔ᷅nde̍ŋ ndo̍ ō wū. O̍ ko̍ŋ kɔ̍ɔ̍lī, mi̍ Ha̍nūŋ po̍ ndɔ̄ o̍ mi̍i̍ŋgū māsāa̍ o̍ fōōfo̍ ndɔ̄ɔ̍.

²O̍ ko̍ŋ kɔ̍ɔ̍lī, mɛ̄ɛ̍ Dēēve̍ tūēī māā Na̍ha̍sī o̍ vi᷅, mbo̍ dīmī āā, “I̍ cho̍ Ha̍nūŋ kɛ̄ndɛ̄i̍ tōsāl, le̍ mɛ̄ɛ̍ fi̍nyā ndɔ̄, Na̍ha̍sī wa̍ wānā kɛ̍ndɛ̄ nāa̍ ya̍ chu̍ā, mbo̍ tōsāl la̍ kɛ̄ndɛ̄i̍ yɛ̍.” O̍ ko̍ŋ, mi̍ Dēēve̍ vīām ki̍i̍la̍a̍ ndūa̍a̍ le̍ mā kɔ̍ yi᷅l Ha̍nu᷄ŋ yīlɔ̄ɔ̄ bīīsi̍ fi̍nyā ndɔ̄ɔ̍. O̍ ko̍ŋ, mi̍ ki̍i̍la̍a̍ ha̍ā ā ku̍ā nāa̍ Ha̍nūŋ chu̍ā o̍ lɛ̄ŋndē A̍mɔ᷅nde̍ŋ ni᷄ŋ, le̍ ndu̍ yīlɔ̄ɔ̄.

³Kɛ̍ mɛ̄ɛ̍ nda̍ kūɛ̄, mi̍ wāŋ bɛ̄ndūa̍a̍ A̍mɔ᷅ŋ a̍ kɔ̍ di̍mūl māsāa̍ Ha̍nūŋ āā, “Fāllo̍, a̍ la̍a̍la̍ŋ māā yīlɔ̄ɔ̄ bīīsi̍o̍o̍ pūa̍a̍ Dēēvi̍a̍a̍ ā hīŋ nu̍m ni̍, māā bɛ̄ɛ̄le̍ŋ o̍ cho̍ nu̍m kīo̍o̍ le̍ fi̍nyā nūm ni̍? Ō cho̍ yīlɔ̄ɔ̄ bīīsi̍ le̍ pūa̍a̍ ha̍ā ā hīŋ nu̍a̍ā le̍. Ki̍i̍la̍a̍ ha̍ā ā hīŋ māhūnāā nāa̍ nūm chu̍a̍, le̍ mā mɛ̄ɛ̄ndi̍a̍ŋ lɛ̄ŋnde̍ŋ nde᷅ŋ mā chē mɛ̄ɛ̍ le̍ cho̍ yɛ̍, le̍ mā hu᷄ŋ dēl na̍a̍ chōo̍ a̍ sɔ̍ŋgɔ̄ɔ̍ mā yēm na̍a̍.”

⁴Mɛ̄ɛ̍ Ha̍nūŋ o̍ tu̍e̍ī le̍nde̍, mbo̍ bīī pūa̍a̍ ha̍ā, mbo̍ sēndi̍ nda̍ sīɛ̍i̍yo̍ŋ. O̍ ko̍ŋ kɔ̍ɔ̍lī, mbo̍ kīlī nda̍ dōmāla̍ŋ a̍ mākɔ̄ɔ̄, pɛ̄ŋgu̍ yɔ̄ŋnda̍ŋ chɛ̍chɛ̍, mbo̍ mīŋgī nda̍.

⁵O̍ ko̍ŋ, mi̍ pūa̍a̍ ha̍ā mīīŋgū. Mɛ̄ɛ̍ Dēēve̍ tu̍e̍ī nyɛ̍ yɔ̍nu̍ŋ a̍ pūa̍a̍ ha̍ā wo̍, mbo̍ yɔ̄ŋ ki̍i̍la̍a̍ nāa̍ nda̍ chūā, kāni̍ fu̍u̍le̍ si̍ɔ̍mbu̍la̍ŋ lā wa̍ nda̍ le̍ mīīŋgōo̍. O̍ ko̍ŋ kɔ̍ɔ̍lī, mbo̍ dīmūl nda̍ āā, “Lā cha᷄l Chɛ̄lu̍i̍kō, ha̍a̍a̍ mbō lo̍ o̍ ko̍ŋ mī sīɛ̍i̍yo̍ŋ mīīŋgu̍ nya̍ wūlɔ̄ɔ̄. Tē ŋ̄ vīl pɛ̍, lā mīīŋgu̍ ni̍ko̍ na̍nu᷄ŋ.”

⁶Mɛ̄ɛ̍ wāŋnda̍ A̍mɔ᷅ŋ a̍ che᷅ māā ā ti̍ŋ Dēēve̍ a̍ sɔ̍ŋgɔ̄ɔ̍, mi̍ Ha̍nūŋ nda̍ wāŋnda̍ A̍mɔ᷅ŋ a̍ chūā ka̍ni̍ŋ hu̍mbo̍ŋ wāa̍la̍ŋ be̍le̍-ya̍a̍ a̍ lā hi̍ɔ̍ɔ̍lu̍ (34,000) ma̍ yɔ̄ŋgū le̍ mā ke̍ nda̍ nyɛ̄lā chɔ̄ūlā su̍a̍a̍ ā nāŋ nda̍ŋ, a̍ pūa̍a̍ chu̍ā o̍ su̍a̍ā chɔ̄ūwa̍ chōo̍ wa̍ chɔ̄nɔ᷄ŋndo̍ Mɛ̄sōpōte̍e̍mīāā, a̍ Ma̍a̍kāā, a̍ So̍bāā le̍ mā kɔ̍ ma̍lā nda̍ sɔ̍ŋgɔ̄ɔ̍.

⁷O̍ ko̍ŋ, ma̍ kē nda̍ nyɛ̄lā nyāāna᷄ŋnda̍ su̍a̍ā ā nāŋ nda̍ wāa̍la̍ŋ be̍le̍-ya̍a̍ a̍ lā tīɔ̍ɔ̍ŋ (32,000), a̍ Māsā Bɛ̍ndōo̍ Ma̍a̍kāā lātūlu̍ a̍ pūa̍a̍ ndūa̍a̍ chɔ̄ūwa̍, ā nda̍ā hi᷅ŋ ma̍ hu᷄ŋ di̍i̍nu᷄ŋ ku̍ndāa̍ Mɛ̍di̍bā i̍kɛ̍i̍ ya̍. O̍ ko̍ŋ kɔ̍ɔ̍lī, mi̍ pūa̍a̍ chɔ̄ūwa̍ A̍mɔ᷅ŋ a̍ bɛ̍ɛ̍ndīa̍ŋ o̍ chīe̍e̍ ndāŋ bɛ̍ndo᷄ŋ ma̍ kūā le̍ sɔ̍ŋgɔ̄ɔ̍.

⁸Mɛ̄ɛ̍ Dēēve̍ tūēī māā wāŋnda̍ ha̍ā ā bɛ̍ɛ̍ndi̍a̍ŋ le̍ sɔ̍ŋgɔ̄ɔ̍ a̍ ndu̍, mbo̍ vīām Cho̍wa̍bī nda̍ pūa̍a̍ ndūa̍a̍ chɔ̄ūwāā dīāllūŋ kālā ka̍lāa̍, le̍ mā kɔ̍ chi᷅ŋa̍la᷅ŋ nda̍ a̍ sɔ̍ŋgɔ̄ɔ̍.

⁹O̍ ko̍ŋ, mi̍ wāŋnda̍ A̍mɔ᷅ŋ ā fūlā le̍ sɔ̍ŋgɔ̄ɔ̍ a̍ nda̍ o̍ nɛ̄i̍ he̍l chīe̍e̍ wo̍ sōndōo̍, mi̍ māsāā bɛ̍ndūa̍a̍ nda̍ā hi᷅ŋ le̍ sɔ̍ŋgɔ̄ɔ̍ wa̍ nda̍ kɔ̍ si᷅m o̍ fo̍ndāŋ kūmbīa̍ŋ ndo̍ nāa̍ kpe̍nde̍ke̍lla̍.

¹⁰Mɛ̄ɛ̍ Cho̍wa̍bī sa̍a̍lu̍ŋ māā ā bālu̍ nda̍ vēllāa̍ vēllē, mbo̍ hɛ̄lī so̍vɛ̄i̍ya̍a̍ pɛ̍ɛ̍ku̍ a̍ chɔ̄ūwo̍ nyɛ̄ kɛ̄ndɛ̄ kɛ̍ndɛ̄ I̍sɔ̄lūɛ̍i̍ya̍, mbo̍ sīmī nda̍ ku̍mbū pūa̍a̍ Si̍i̍līāā a̍ wa̍ wo̍.

¹¹O̍ ko̍ŋ kɔ̍ɔ̍lī, mbo̍ chūā Ābi̍sīāā pɔ̍mbɔ̄ ndɔ̄, mbo̍ hāndū ndu̍ so̍vɛ̄i̍ya̍a̍ tūa̍a̍ bōlle̍ŋ, mbo̍ sīmī ka̍ŋ ku̍mbū wāŋnda̍ A̍mɔ᷅ŋ a̍ wa̍ wo̍ le̍ sɔ̍ŋgɔ̄ɔ̍ a̍ nda̍.

¹²O̍ ko̍ŋ kɔ̍ɔ̍lī, mbō dīmūl A̍bi̍sa̍ī pɔ̍mbɔ̄ ndɔ̄ āā, “Tē ā chē pɛ̍ māā wāŋnda̍ Si̍i̍līāā ā chō le̍ ya̍ bā tīū, ā hīŋ a̍ hu̍ŋ ma̍lā ya̍. Tē ya̍ che᷅ ni̍ māā wāŋnda̍ A̍mɔ᷅ŋ ā chō le̍ nu̍m bā tīū, I̍ ku̍ɛ̄ I̍ kɔ̍ ma̍lā nu̍m.

¹³Le̍la̍ŋ, si̍mu̍l kɔ̄l, mā chi̍e̍i̍ chīēīyo̍ pīla̍, mī ŋ̄ pīŋi̍ yōōmūlā wānāā nāa̍, a̍ chi̍e̍e̍ŋ Māsānɔ̄ɔ̍ Mɛ̄lɛ̄ka̍ nāa̍. Ndu̍yɛ̍ I̍ pi̍ɛ̍i̍ māā, Mɛ̄lɛ̄ka̍ Ya̍a̍wɛ̄ɛ̄ to̍sa̍ nyɛ᷅ o̍ hɛ̄na̍ŋ ndo̍ fɔ̍.”

¹⁴O̍ ko̍ŋ, mi̍ Cho̍wa̍bī nda̍ so̍vɛ̄i̍ya̍a̍ ndūa̍a̍ hɛ̍li̍ ka̍ŋ nda̍ ā kɔ̍ chi᷅ŋa̍la᷅ŋ Si̍i̍lūīāŋnda̍, ndu̍yɛ̍ mi̍ Si̍i̍lūīāŋnda̍ nyāānu̍ŋ nda̍.

¹⁵Mɛ̄ɛ̍ wāŋnda̍ A̍mɔ᷅ŋ a̍ chē māā Si̍i̍lūīāŋnda̍ nyāānu̍ŋ, nda̍ bɛ̍ɛ̍ ma̍ nyāānu᷄ŋ Ābi̍sīāā pɔ̄mbɔ̄ɔ̍ Cho̍wa̍bī, ma̍ mīīŋgū ā kīlta̍ŋ o̍ nda̍ lo̍ chīe̍e̍. O̍ ko̍ŋ, mi̍ Cho̍wa̍bī nda̍ so̍vɛ̄i̍ya̍a̍ ndūa̍a̍ ā mīīŋgu᷄ŋ Chūlu̍sɛ̄lɛ̄m.

¹⁶Kɛ̍ mɛ̄ɛ̍ Si̍i̍lūīāŋnda̍ chē māā I̍sɔ̄lūɛ̍i̍ya̍ yēm nda̍, ma̍ yɔ̄ŋ ki̍i̍la̍a̍ ma̍ kɔ̍ hu᷅ŋ a̍ so̍vɛ̄i̍ya̍ Si̍i̍līāā ā pīli̍a̍a̍, a̍ wa̍ o̍ Pēē Bɛ̍ndōo̍ Yūfi̍lu̍a̍tīī le̍e̍lōo̍ wa̍, ndu̍yɛ̍ Si̍o̍ba̍kī, wāna̍ wa̍ so̍vɛ̄i̍ya̍a̍ Hādādɛ̍sɛ̄ɛ̄ wa̍ bōlle̍ŋ ndo̍, ndu̍ si̍m nda̍ lāchī le̍ kɔ̄la̍ŋ A̍mɔ᷅ŋ ni̍.

¹⁷O̍ ko̍ŋ kɔ̍ɔ̍lī, mɛ̄ɛ̍ Dēēve̍ tūēī a̍ ndi̍ o̍kɔ̄ɔ̄, ndu̍ bɛ̍ɛ̍ mbo̍ chūūŋgīāā so̍vɛ̄i̍ya̍ I̍sɔ̄lūɛ̄ī kpo̍u̍ na̍a̍ pi᷅lɛ̍ ma̍ tāŋ Chɔ̍ɔ̍dāŋ nda̍ŋ. Mɛ̄ɛ̍ nda̍ ta᷄ŋ, mi̍ sɔ̍ŋgɔ̄ɔ̍ kāndu᷄ŋ. O̍ ko̍ŋ, mi̍ Dēēve̍ di̍mu̍l so̍vɛ̄i̍ya̍a̍ ndūa̍a̍ le̍ mā sīmu̍l Si̍i̍lūīāŋnda̍ a̍ sɔ̍ŋgɔ̄ɔ̍.

¹⁸Kɛ̍ mi̍ Si̍i̍lūīāŋnda̍ ā nyāānu᷄ŋ I̍sɔ̄lūɛ̍i̍ya̍. Ndu̍yɛ̍ mi̍ Dēēve̍ dīī so̍vɛ̄i̍ya̍a̍ sɔ̍ŋgā o̍ nyɛ̄lā su̍a̍a̍ ā nāŋ nda̍ŋ chōo̍ wa̍ wāa̍la̍ŋ lā ŋɔ᷄mmɛ̍ū (7,000), a̍ so̍vɛ̄i̍ya̍a̍ sɔ̍ŋgā lɛ̄ŋ nda̍ wāa̍la̍ŋ be̍le̍-hi̍ɔ̍ɔ̍lu̍ (40,000). O̍ ko̍ŋ kɔ̍ɔ̍lī, ma̍ dīī Si̍o̍ba̍kī, wāna̍ wa̍ so̍vɛ̄i̍ya̍ Si̍i̍līāā kpo̍u̍ bōlle̍ŋ ndo̍.

¹⁹O̍ ko̍ŋ kɔ̍ɔ̍lī, mɛ̄ɛ̍ bu̍ɛ̍i̍yāa̍ wa̍ Hādādɛ̍sɛ̄ɛ̄ o̍ bā bɛ̄ŋgu̍ wa̍ ā chē māā I̍sɔ̄lūɛ̍i̍ya̍ yēm nda̍, nda̍ kpo̍u̍ ma̍ kɔ̍ to̍sā chɛ̄la᷅ŋ kɔ̄l nyūlōo̍ a̍ Dēēve̍, ndu̍yɛ̍ ma̍ wā ni̍ko̍ Dēēve̍ o̍ bā bɛ̄ŋgu̍. O̍ ko̍ŋ, Si̍i̍lūīāŋnda̍ nda̍ a̍a̍ chɛ᷅l le̍ mī nda̍ a̍a̍ ma̍lā wāŋnda̍ A̍mɔ᷅ŋ a̍ sɔ̍ŋgɔ̄ɔ̍ le̍.