Read Southern Kisi Ko̍lo̍ni̍kō Tāso̍o̍ 20 Bible Online

Ko̍lo̍ni̍kō Tāso̍o̍ 20 - Southern Kisi bible

Ko̍lo̍ni̍kō Tāso̍o̍ 20

¹O̍ ko̍ŋ kɔ̍ɔ̍lī, a̍ te̍le̍ŋ wɔ̄ɔ̄lē pɔ̄mbɔ̄le̍ŋ, bōōndi̍i̍ māsāā bɛ̍ndūa̍a̍ ā kūā o̍ chɔ̄ūwo̍ o̍ wɔ̄sīo̍o̍ ni᷄ŋ nde̍, mi̍ Cho̍wa̍bī ō si᷅m pūa̍a̍ chɔ̄ūwāā I̍sɔ̄lūɛ̍i̍ya̍ lāchī ma̍ kɔ̍ dēl wāŋnda̍ A̍mɔ᷅ŋ chōo̍, chi̍e̍e̍ŋ ndāŋ bɛ̍ndo᷄ŋ a̍ pɔ̄mbɔ᷄ŋ. Mbo̍ kɔ̍ dēl Lu̍a̍bā chōo̍ a̍ sɔ̍ŋgɔ̄ɔ̍, o̍ wa̍ chīe̍e̍ le̍bo᷅llo̍ le̍ lɛ̄ŋndē A̍mɔ᷅nde̍ŋ ndo̍. Kɛ̍ mi̍ Dēēve̍ ndu̍ lo̍ŋnu᷄ŋ Chūlu̍sɛ̄lɛ̄m. O̍ ko̍ŋ, mi̍ Cho̍wa̍bī sɔ̍ŋgā a̍ Lu̍a̍bā, ndu̍yɛ̍ mbo̍ tɛ̄ɛ̄mbūūwo̍ ndu̍.

²O̍ ko̍ŋ kɔ̍ɔ̍lī, mi̍ Dēēve̍ chūā mɔ̍si̍l lēmāsa̍ wa̍ mɛ̄lɛ̄ka̍ nda̍ā Mo̍lɛ̍kī o̍ lēbōl lo̍. Mɔ̍si̍l ko̍ŋ a̍ ko̍o̍līi̍yo̍ŋ o̍ wa̍ ō tōōsīāā ni̍. O̍ ko̍ŋ kɔ̍ɔ̍lī, pōūtā ba̍ā kālālā bɛ̄ndūla̍ŋ lā wa̍ lā hōlīāā o̍ mɔ̍si̍llo̍ ho̍ō chɛ̍chɛ̍. Mɔ̍si̍llo̍ ho̍ō ō wa̍ lūsu̍llo̍ le̍ pa᷅ŋnda̍ŋ be̍le̍ ŋɔ̍mmɛ̍ū lā ŋūɛ̍ɛ̍nu̍ (75). Mɔ̍si̍l ko̍ŋ Dēēve̍ chu̍a̍ ni̍, mbo̍ sīīŋgūū ndu̍ mɔ̍si̍l ndɔ̍ lēmāsā. Ndu̍yɛ̍, mi̍ Dēēve̍ chūā vɛ̄lɛ̄ nyɛ̄m chēle̍ŋ ta̍u̍ ta̍u̍ o̍ chīe̍e̍ ko̍ŋ ni᷄ŋ mbō kūānu᷄ŋ a̍ mu̍ŋ.

³Wānā o̍ wāna̍ wa̍ o̍ chīe̍e̍ ko̍ŋ ni᷄ŋ mi̍ Dēēve̍ to̍sā mā wa̍ ndu̍ sāāŋgīāllo̍. Le̍ mā wa̍ wa̍llo̍ tōsāa̍ a̍ sūɛ̍i̍la̍ŋ, a̍ dɛ̄ndɛ̄la̍ŋ, ndu̍yɛ̍ a̍ chūo̍o̍ŋ. Ndu̍yɛ̍ chīe̍e̍ o̍ chīe̍e̍ Dēēve̍ bīī o̍ lɛ̄ŋndē A̍mɔ᷅nde̍ŋ ni᷄ŋ, le̍nde̍ ko̍ni̍ o̍ to̍sa̍ a̍ wāŋnda̍ o̍ chi̍e̍e̍ŋ mu̍ŋ ni᷄ŋ tu᷅ ni̍. O̍ ko̍ŋ kɔ̍ɔ̍lī, mi̍ Dēēve̍ chūā pūa̍a̍ ndūa̍a̍ kpo̍u̍ ma̍ mīīŋgū Chūlu̍sɛ̄lɛ̄m.

⁴Mɛ̄ɛ̍ te̍le̍ŋ ti̍ŋ hīōū, mi̍ sɔ̍ŋgɔ̄ɔ̍ kīōlū I̍sɔ̄lūɛ̍i̍ya̍ tɛ̄ɛ̄ŋ nda̍ Fīli̍i̍tīāŋnda̍ Kɛ̍sɛ̄ɛ̄ chi̍e̍e̍. O̍ sɔ̍ŋgɔ̄ɔ̍ ho̍ō ni᷄ŋ, mi̍ Si̍bɛ̍kāī, wānā wa̍ā Hu̍sīāā chīe̍e̍, o̍ di̍ī ku̍u̍ba̍nɔ̍ pu̍m dīōla̍ŋ āā, Si̍pāī. O̍ ko̍ŋ, ma̍ yām Fīli̍i̍tīāŋnda̍.

⁵O̍ ko̍ŋ kɔ̍ɔ̍lī, mi̍ sɔ̍ŋgɔ̄ chēle̍ŋ kīōlū vɛ̄lɛ̄ I̍sɔ̄lūɛ̍i̍ya̍ tɛ̄ɛ̄ŋ nda̍ Fīli̍i̍tīāŋnda̍. O̍ sɔ̍ŋgɔ̄ kōŋ ni᷄ŋ, mi̍ Ɛ̄līha̍nāŋ po̍ Cha̍yāā wo̍ ō dīī La̍a̍mī, wānāyɛ̍ī Kōōla̍yɛ̄i̍. La̍a̍mī wo̍ ho̍ō, ba̍l wa̍ ndu̍ o̍ bā wo̍ ō bɛ̄ndū kpi̍, wānā a̍a̍ che᷅ ndu̍ pɛ̍, āā sūŋ chūāā ŋ̄māllo̍ ni̍.

⁶O̍ ko̍ŋ kɔ̍ɔ̍lī, mi̍ chɔ̄ū chēle̍ŋ ō kīōlū vɛ̄lɛ̄ I̍sɔ̄lūɛ̍i̍ya̍ tɛ̄ɛ̄ŋ nda̍ Fīli̍i̍tīāŋnda̍ Ka̍tī chīe̍e̍. Po̍ pi᷅lɛ̍ wa̍ o̍ sɔ̍ŋgɔ̄ kōŋ ni᷄ŋ fūlāa̍ Ka̍tī chīe̍e̍, ō wa̍ ō bɛ̄ndū he̍u̍. Ndu̍ o̍o̍ nɔ̍ sōōŋ lābāa̍ŋ ŋ̄ ŋɔ᷄mpu᷅m, a̍ sōōŋ lābɛ̄ŋgo̍ŋ ŋ̄ ŋɔ᷄mpu᷅m. Fa̍ū fa̍ū, sōo̍ŋ bi̍di̍i̍ŋ a̍ ŋ̄hīɔ̍ɔ̍lu̍. Pōo̍ ho̍ō, o̍ pūlāle̍ ku̍u̍ba̍a̍ chōo̍ ndu̍ o̍o̍ fu̍la̍ ni̍.

⁷O̍ ko̍ŋ kɔ̍ɔ̍lī, mi̍ po̍ ku̍u̍ba̍nɔ̍ɔ̍ ho̍ō ō kīālū I̍sɔ̄lūɛ̍i̍ya̍ īchīɛ̄ɛ̄ le̍ sɔ̍ŋgɔ̄ɔ̍. Kɛ̍, mi̍ Chōna̍ta᷅ŋ po̍ Si̍a̍māā, wānāyɛ̍i̍ Dēēve̍i̍ ō dīī ndu̍.

⁸Mi̍ Dēēve̍ nda̍ pūa̍a̍ ndūa̍a̍ chɔ̄ūwa̍ ā dīī pūa̍a̍ Fi̍li̍tīāŋāā yāa̍ wa̍a̍ fu̍la̍ ha̍ā Kātī chīe̍e̍ wa̍.