Read Southern Kisi Ko̍lo̍ni̍kō Tāso̍o̍ 21 Bible Online

Ko̍lo̍ni̍kō Tāso̍o̍ 21 - Southern Kisi bible

Ko̍lo̍ni̍kō Tāso̍o̍ 21

¹Mi̍ ī yɔ̄nu᷄ŋ, mi̍ māsa̍ nyi̍nāā wɔ̄ɔ̍ŋnda̍ ō yēēmā le̍ mī ndu̍ o̍o̍ hi᷅ŋ a̍ kpūndɔ̍ɔ̍ wāŋnda̍ I̍sɔ̄lūɛ̄ī chōo̍. O̍ ko̍ŋ, mbo̍ tōsā mi̍ Dēēve̍ o̍ kɛ̍ɛ̍sīāā le̍ mbō chɔ᷄m wāŋnda̍ I̍sɔ̄lūɛ̄ī mbō sīna̍ mɛ̄ɛ̍ nda̍ cho̍ bōllē pīlɛ̍ yɛ̍.

²O̍ ko̍ŋ, mi̍ Dēēve̍ dīmūl Cho̍wa̍bī, wāna̍ wa̍ pūa̍a̍ ndūa̍a̍ chɔ̄ūwa̍ bōlle̍ŋ ndo̍ āā, “Kɔ̍ mā chɔ̍m wāŋnda̍ I̍sɔ̄lūɛ̄ī, chɔ̄nɔ᷄ŋndo̍ Bɛ̄ɛ̄si̍ɛ̍bā chīe̍e̍ mbō kūɛ̄ a̍ Da᷅ŋ chīe̍e̍. Ndu̍yɛ̍ mā chu̍u̍ ya̍ ko̍na̍a̍ le̍ mī si̍na̍ mɛ̄ɛ̍ nda̍ chō bōllē pīlɛ̍ yɛ̍.”

³Kɛ̍ mi̍ Cho̍wa̍bī di̍mūl ndu̍ āā, “Fāllo̍, māa̍ Mɛ̄lɛ̄ka̍ Ya̍a̍wɛ̄ɛ̄ ō tōsa̍ a̍ sa̍bū mī wāŋnda̍ I̍sɔ̄lūɛ̄ī a̍ hi̍o̍ū lāchī a̍ kūīyo̍ o̍ kɛ̄mɛ̄la̍ŋ ni᷄ŋ, mbō hīōū bɛ̍ɛ̍ mɛ̄ɛ̍ nda̍ chō nu̍a̍ā yɛ̍ fɔ̍. Wānāā nūmnda̍ nda̍ chō ni̍ māsānɔ̍ nūu̍. Nda̍ kpo̍u̍ wānāā nūm a̍a̍ wa̍lla̍ nda̍ chō ni̍. Kɛ̍, I̍ chi̍ le̍ sa̍bū o̍ sa̍bū ŋ̍ yēēma̍ le̍ wāŋnda̍ ha̍ā chɔ̄mndo̍ wo̍ le̍. Le̍ sa̍bū yɛ̄ɛ̍nɛ̍ ŋ̄ yēēma̍ yɛ̍ mā to̍sa̍ mi̍ Mɛ̄lɛ̄ka̍ dɔ̄ɔ̄nu᷄ŋ tu̍mbe̍ a̍ I̍sɔ̄lūɛ̍i̍ya̍?”

⁴Kɛ̍ Dēēve̍ ye̍ŋ Cho̍wa̍bī lānī le̍. O̍ ko̍ŋ mi̍ Cho̍wa̍bī ma᷅l mbo̍ bālū o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ kpo̍u̍ a̍ wāŋnda̍ chɔ̄mndo̍. Mɛ̄ɛ̍ o̍ chi̍i̍ kpo̍u̍, mbo̍ mīīŋgū Chūlu̍sɛ̄lɛ̄m.

⁵O̍ ko̍ŋ kɔ̍ɔ̍lī, mi̍ Cho̍wa̍bī do̍u̍nu᷄ŋ Dēēve̍ ko̍na̍ a̍ mɛ̄ɛ̍ wāŋnda̍ ā wa̍ bōllē pīlɛ̍ yɛ̍. Pūa̍a̍ nda̍ a̍a̍ bɛ̍nda̍ le̍ chɔ̄ūwo̍ ma̍ nɔ̄ mɔ̄ɔ̄ŋ fāŋndo̍ŋ ma̍ wā I̍sɔ̄lūɛ̍i̍ya̍, ā wā mi̍i̍līɔ̄ŋndo̍ ō pīlɛ̍ a̍ wāa̍ ō pīlɛ̍ (1,100,000). O̍ ko̍ŋ kɔ̍ɔ̍lī, a̍ wa̍ Chu̍dā wa̍, a̍ wa᷄ wāa̍la̍ŋ kɛ̄mɔ̄ɔ̍ lē hīɔ̍ɔ̍lu̍ a̍ be̍le̍ ŋɔ̍mmɛ̍ū (470,000).

⁶Kɛ̍ Cho̍wa̍bī chɔ̍m ka̍a̍le̍ Līva̍īle̍ŋ a̍ kāa̍le̍ Bɛ̍ŋnja̍mīŋnde̍ŋ te̍. Kāni̍ fu̍u̍le̍, ndu̍ o̍o̍ chɛ̍la᷅ŋ a̍ nyɛ̄ māsāa̍ Dēēve̍ ndu̍ o̍o̍ di̍mu̍l ndu̍ le̍ to̍sāa̍ wo̍ le̍.

⁷Kɛ̍ mi̍ Mɛ̄lɛ̄ka̍ ō tāmbū kɔ̄l a̍ nyɛ᷄ wa̍ yɔ̄nɔ᷄ŋndo̍ wo̍, o̍ ko̍ŋ mbo̍ tūsī I̍sɔ̄lūɛ̍i̍ya̍ dɛ̍nɛ̍ pa̍lāa̍ chōo̍.

⁸O̍ ko̍ŋ kɔ̍ɔ̍lī, mi̍ Dēēve̍ pīɛ̄ī Mɛ̄lɛ̄ka̍ mbo̍ di̍mu̍l ndu̍ āā, “O̍o̍ Mɛ̄lɛ̄ka̍, nyɛ̄ ya̍ to̍sa̍ ho̍ō wo̍, I̍ to̍sa̍ yɔ̄ŋ wɔ̄ɔ̍ŋ bɛ̄ndōo̍ nūm. Kɛ̍ I̍ cho̍ Nu᷄m pīɛ̄īyo̍ le̍ mā ma̍l bu̍ɛ̍ī nūmndo̍ le̍ yɔ̄ŋ ndɔ̄ wɔ̄ɔ̍ŋndo̍. Sūɛ̍i̍ īdīɔ̄mnde̍ pīla̍ ya̍ I̍ to̍sa̍ ni̍.”

⁹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ ō su̍a̍ā nāa̍ Ka̍a̍dī chu̍a̍, wāna̍ di̍mīāā sɔ̄ɔ̍ŋ wa̍ā lāchī Dēēvi̍o̍o̍, mbo̍ dīmi̍ āā,

¹⁰“Kɔ̍, mā kɔ̍ di̍mūl Dēēve̍ āā, ‘Mɛ̄lɛ̄ka̍ Ya̍a̍wɛ̄ɛ̄ di̍mi̍ āā, I̍ chō nu̍m būŋga᷄ŋ kē ŋ̄ ŋgāa̍ mā chu̍a̍ ī pīlɛ̍. Ndu̍yɛ̍, ī kɛ̍ o̍ kɛ̍ ŋ̄ chu̍a̍ pɛ̍, ndi̍ ya̍ I̍ to̍sāl nu̍m ni̍.’ ”

¹¹O̍ ko̍ŋ, mi̍ Ka̍a̍dī ku̍ā nāa̍ Dēēve̍ chu̍ā mbo̍ dīmūl ndu̍ āā, “Mɛ̄lɛ̄ka̍ Ya̍a̍wɛ̄ɛ̄ di̍mi̍ māā būŋgāŋ ō ke̍ nu̍m ndo̍ŋ mu̍ŋ cho̍ mu᷅ŋ ni̍ mā chu̍a̍ ī pīlɛ̍.

¹²Yīa̍a̍ŋ mā chō dēlɔ̄ɔ̄ o̍ lɛ̄ŋndē nūmnde̍ŋ ni᷄ŋ le̍ wɔ̄sīla̍ŋ lā yāa̍. I̍ dīi̍ŋ ndūɛ̍i̍, le̍ pāŋgo̍ŋ ŋgāa̍, ā chō wā ya̍a̍mɔ̍ɔ̍wa̍a̍ nu̍mnda̍ kīlta̍ŋ. Ī yāa̍ ndūɛ̍i̍, Mɛ̄lɛ̄ka̍ Ya̍a̍wɛ̄ɛ̄ cho̍ ki̍i̍la̍nɔ̍ ndɔ̄ɔ̍ vīōmɔ̄ɔ̄ a̍ nāā wɔ̄ɔ̍ŋndo̍ mbō dīu̍ wāŋnda̍ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ kpo̍u̍. O̍ būŋgāŋ ŋ̄gāa̍ wo̍ŋ mu᷅ŋ tɛ̄ɛ̄ŋ ki̍nɛ̍i̍, kɛ̍ɛ̍si̍a̍a̍, ī ŋ̄ chō chūā ve̍, a̍ di̍mu̍l la̍, I̍ kɔ̍ di̍mūl wāna̍ ve᷅m ya̍ wo̍.”

¹³O̍ ko̍ŋ, mi̍ Dēēve̍ dīmūl Ka̍a̍dī āā, “Kpūndɛ̍ bɛ̄ndōo̍ kōma̍l la̍ fɔ̍. Kɛ̍ ndu̍yɛ̍ ō wa̍ bɛ̍ɛ̍ le̍nde̍ ni̍, yɔ̄ŋi̍ wāna̍ chi̍o̍o̍ tūsi̍ ya̍ nyɛ̄ pālāa̍ chōo̍ yɛ̍, ō na᷄ŋ mī Mɛ̄lɛ̄ka̍ Ya̍a̍wɛ̄ɛ̄ pi̍la̍ o̍ tu̍si̍ ya̍ nyɛ̄ pālāa̍ chōo̍. Kāni̍ fo̍ndōle̍, ndu̍ wāna̍ īnyīɛ̍ɛ̍ yo̍ o̍ cho̍ ni̍.”

¹⁴O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ ō yɔ᷅ŋ nāā wɔ̄ɔ̍ŋ wɔ̄ɔ̍ŋ bɛ̄ndōo̍ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ kpo̍u̍. Mi̍ wāŋndā wū wāa̍la̍ŋ be̍le̍ ŋɔ̍mmɛ̍ū (70,000).

¹⁵O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ yɔ̄ŋ ki̍i̍la̍nɔ̍ ndɔ̄ɔ̍ le̍ kɔ̄la̍ŋ Chūlu̍sɛ̄lɛ̄m tɛ̄ɛ̄mbūūwo̍. Kɛ̍ mɛ̄ɛ̍ o̍ ku̍ɛ̄ le̍ ndu̍ tɛ̄ɛ̄mbūūwo̍, mi̍ nyīɛ̍ɛ̍ye̍ bīī Mɛ̄lɛ̄ka̍ Ya̍a̍wɛ̄ɛ̄, mbo̍ māŋgālā kɔ̄l lo̍. Mbo̍ dīmūl ki̍i̍la̍nɔ̍ ndɔ̄ ko̍ŋ āā, “Hi̍a̍ū lɛ̍ lāchī le̍, nyɛ̄ ŋ̄ tōsa̍ wo̍ chō tūu̍le̍ŋ.” Ki̍i̍la̍nɔ̍ ko̍ŋ ō wa̍ īsīsi̍ nāa̍ Ālu̍a̍nā Chɛ̄bu̍sa̍i̍tīi̍nɔ̍ɔ̍ ndu̍ o̍o̍ lu̍a̍ā wi̍tīi̍ŋ ndɔ᷄ŋ nda̍.

¹⁶O̍ ko̍ŋ, mɛ̄ɛ̍ Dēēve̍ hēēlu̍ hɔ̄lla̍ mbo̍ chā ki̍i̍la̍nɔ̍ Mɛ̄lɛ̄ka̍ Ya̍a̍wɛ̄ɛ̄ wo̍ ho̍ō īsīsi̍ chōo̍ cho̍o̍ o̍ hūēīye̍ ni᷄ŋ a̍ mūɛ̄ī fāŋnde̍ ndu̍ o̍ bā. Mbo̍ yūlū ndi̍ Chūlu̍sɛ̄lɛ̄m chōo̍. O̍ ko̍ŋ, mi̍ Dēēve̍ nda̍ lāŋgba̍ā kāla̍ ā wōōnu᷄ŋ nyɛ̍lā lābɛ̍kīla̍ŋ, ma̍ bāŋ wūla̍ŋ, ma̍ fūūlūū hɔ̄lla̍ lɛ̄ŋ mɛ̍ɛ̄, le̍ kɔ̄l nda̍ ta̍mbɛ̍i̍yo̍ chɔ̄mndo̍.

¹⁷O̍ ko̍ŋ kɔ̍ɔ̍lī, mi̍ Dēēve̍ pīɛ̄ī Mɛ̄lɛ̄ka̍ mbo̍ dīmī āā, “O̍o̍ Mɛ̄lɛ̄ka̍, ya̍ tɛ̍ɛ̍mbu̍u̍ a̍ nūm ni̍, mi̍ to̍sā yɔ̄ŋ wɔ̄ɔ̍ŋ bɛ̄ndōo̍ ho̍ō a̍ nūm. Ya̍ di̍mi̍ ni̍ māā ā chɔ᷄m wa᷅ŋnda̍ I̍sɔ̄lūɛ̄ī. Le̍la̍ŋ, Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nūu̍, tu̍si̍ ya̍ dɛ̍nɛ̍ pa̍lāa̍ chōo̍ a̍ yu̍ŋgu̍ nūu̍. Le̍la̍ŋ chɛ᷅l mī nāā wɔ̄ɔ̍ŋndo̍ ho̍ō ō chīi̍ wānāā nūmnda̍ le̍.”

¹⁸O̍ ko̍ŋ kɔ̍ɔ̍lī, mi̍ ki̍i̍la̍nɔ̍ Mɛ̄lɛ̄ka̍ Ya̍a̍wɛ̄ɛ̄ ko̍ŋ ō dīmūl Ka̍a̍dī le̍ mbō kɔ̍ dīmūl Dēēve̍ māā ō kɔ̍ mbō kɔ̍ ta̍ŋgūl ma̍āŋndo̍ o̍ fo̍ndāŋ Ālu̍a̍nā ō lu̍a̍ā wi̍tīi̍ŋ ndɔ᷄ŋ ndo̍ le̍ Mɛ̄lɛ̄ka̍ Ya̍a̍wɛ̄ɛ̄.

¹⁹O̍ ko̍ŋ, mi̍ Dēēve̍ tōsā mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ ō di̍mu̍l Ka̍a̍dī mi̍ Ka̍a̍dī di̍mūl ndu̍ yɛ̍.

²⁰O̍ ko̍ŋ kɔ̍ɔ̍lī, Ālu̍a̍nā wa̍ wi̍tīi̍ŋ ndɔ̍ŋ lɔ̄ɔ̍, mɛ̄ɛ̍ o̍ mu̍li̍ŋ mbo̍ chā ki̍i̍la̍nɔ̍ɔ̍, ndu̍ ni̍ a̍ pūa̍a̍ ndūāā hi̍ɔ̍ɔ̍lu̍a̍a̍ mi̍ sīōōŋnde̍ bīī nda̍ ma̍ vīāŋnu᷄ŋ.

²¹O̍ ko̍ŋ, mi̍ Dēēve̍ ku̍ā nāa̍ Ālu̍a̍nā chu̍a̍. Mɛ̄ɛ̍ Ālu̍a̍nā che᷅ Dēēve̍ hūnɔ̄ɔ̍, mbo̍ fūlā o̍ fo̍ndāŋ ndɔ̍ o̍ lūāā wi̍tīi̍ŋ ndɔ᷄ŋ ndo̍ mbo̍ kɔ̍ tu̍ndu᷄ŋ Dēēve̍ o̍ lābɛ̄ŋgu̍ ni̍ŋ, mbo̍ fūūlūū hɔ̄lla̍ lɛ̄ŋ mɛ̍ɛ̄, le̍ ndu̍ bɛ̄ɛ̄le̍ŋ kīo̍o̍.

²²O̍ ko̍ŋ, mi̍ Dēēve̍ dīmūl Ālu̍a̍nā āā, “Ke̍ ya̍ fo̍ndāŋ ŋ̄ lūāā ho̍ō wi̍tīi̍yo̍ŋ ndo̍ mī pe̍ndū. I̍ ye̍e̍ma̍ mī te̍ŋgu̍l Mɛ̄lɛ̄ka̍ Ya̍a̍wɛ̄ɛ̄ ma̍āŋndo̍ na̍ŋnu᷄ŋ, le̍ mī nyɔ̍ɔ̍lu̍ ndu̍ mī nāā wɔ̄ɔ̍ŋndo̍ ho̍ō ō pɛ̄ŋgi̍ wāŋnda̍ dīūwo̍.”

²³O̍ ko̍ŋ, mi̍ Ālu̍a̍nā di̍mūl ndu̍ āā, “Tē le̍ fo̍ndāa̍ ho̍ō ni̍ chu̍a̍, Fāllo̍. To̍sa̍ nyɛ̍ hi̍ni̍ nūm kɔ̄l lo̍. Ā chē nāūwāā ni̍a̍ā wa̍a̍ na̍nu᷄ŋ, tē a̍ ye̍e̍ma̍ sa̍lā lūāmāā sōlī pɛ̍ ā bīī ā dīī. Yɔ̄mīī na̍a̍ ŋ̍ lūāā wi̍tīi̍yo̍ŋ nde̍ bɛ̍ɛ̍, I̍ ke̍ nu̍m le̍ yɔ̄mīī lūāmāā sa̍lɛ̍i̍. O̍ ko̍ŋ kɔ̍ɔ̍lī a̍ wi̍tīi̍yo̍ŋ le̍ sa̍lā ku̍llo̍. Mu᷅ŋ kpo̍u̍ I̍ cho̍ nu̍m kē.”

²⁴Kɛ̍ mi̍ Māsā Bɛ̍ndōo̍ Dēēve̍ di̍mūl Ālu̍a̍nā, āā, “Sāko̍, chɔ̍m ya̍ ba̍a̍ mī pe̍ndū. I̍ ye̍e̍ma̍ mī chu̍ā nyɛ̍ cho̍ le̍ nūm ndo̍ fo̍ndō mī ke̍ Mɛ̄lɛ̄ka̍ Ya̍a̍wɛ̄ɛ̄ le̍. Kɛ̄lɛ̄ŋgāā ni᷅ŋ te̍ mī so̍li̍ sa̍lā lūāmāā ō ya̍ I̍ pa̍a̍wā le̍ ndu̍ le̍ wo̍.”

²⁵O̍ ko̍ŋ, mi̍ Dēēve̍ pīāndū Ālu̍a̍nā fo̍ndāŋ kōŋ o̍ bā a̍ ko̍o̍līi̍yo̍ŋ ŋ̄ wa̍ lūsu̍llo̍ pa᷅ŋnda̍ŋ kɛ̄mɔ̄ɔ̍ lē ŋɔ᷄mpu᷅m (600).

²⁶O̍ ko̍ŋ kɔ̍ɔ̍lī, mi̍ Dēēve̍ tāŋgūl ma̍āŋndo̍ lo̍ŋ le̍ Mɛ̄lɛ̄ka̍ Ya̍a̍wɛ̄ɛ̄ kɔ̄l lo̍ nɛ̄ŋīo̍o̍. Ndu̍yɛ̍ mbo̍ sōli̍ sa̍lālā lūāmāa̍ la̍ŋ, a̍ sa̍lā kɔ̄l nyūlūla̍ŋ. O̍ ko̍ŋ mbo̍ pīɛ̄ī Mɛ̄lɛ̄ka̍ Ya̍a̍wɛ̄ɛ̄. Ndu̍yɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ ō mūlī pīɛ̄īlē ndɔ̄le̍ŋ, a̍ yīŋnde̍ŋ fūlāa̍ o̍ fo̍nda᷄ŋ Mɛ̄lɛ̄ka̍ā chōo̍ cho̍o̍, mi̍ lē hu᷄ŋ lo᷅m sa̍lā lūāmāa̍ wa̍ o̍ ma̍āŋndo̍ chōo̍ wo̍.

²⁷O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ dīmūl ki̍i̍la̍nɔ̍ ndɔ̄ɔ̍ mbo̍ mīŋgī mūɛ̄ī ndūɛ̍i̍ fāŋnde̍ o̍ bōo̍ ni᷄ŋ.

²⁸A̍ te̍le̍ŋ ko̍ŋ, mɛ̄ɛ̍ Dēēve̍ chē māā Mɛ̄lɛ̄ka̍ Ya̍a̍wɛ̄ɛ̄ ō mūli̍ pīɛ̄īlē ndɔ̄le̍ŋ o̍ fo̍ndāŋ Ālu̍a̍nā Chɛ̄bu̍sa̍i̍tīi̍nɔ̍ɔ̍ ndu̍ o̍o̍ lu̍a̍ā wi̍tīi̍ŋ ndɔ᷄ŋ ndo̍, mbo̍ sōlī vɛ̄lɛ̄ sa̍lāla̍ŋ ndo̍ŋ ta̍u̍.

²⁹Tɛ̍ndīi̍ Mɛ̄lɛ̄ka̍ Ya̍a̍wɛ̄ɛ̄ wo̍, ō Mūu̍sē ndu̍ o̍o̍ ta̍ŋgu̍l o̍ lɛ̄ŋndē po̍lte̍ŋ ni᷄ŋ, mbō chɔ̄m māā Mɛ̄lɛ̄ka̍ Ya̍a̍wɛ̄ɛ̄ o̍ cho̍ a̍ nda̍ lātūlu̍ wo̍, a̍ ma̍āŋ nda̍ a̍a̍ sōlī sa̍lāla̍ŋ lēchōo̍ wo̍, a̍ te̍le̍ŋ ko̍ŋ lā wa̍ wɔ̄ o̍ fo̍ndāŋ nda̍ a̍a̍ so̍o̍lūū Mɛ̄lɛ̄ka̍ o̍ pēmbēi̍ Ki̍bīɔ̄ŋ ndo̍.

³⁰Kɛ̍ Dēēve̍ nɔ̄la̍ mī ndu̍ o̍o̍ ku̍ɛ̄ mbo̍ kɔ̍ pi̍ɛ̍ī Mɛ̄lɛ̄ka̍ Ya̍a̍wɛ̄ɛ̄ lo̍ŋ te̍, kāni̍ fu̍u̍le̍ sīōōŋnde̍ wa̍ ndu̍ le̍ mūɛ̄ī fāŋīī wa̍ ki̍i̍la̍nɔ̍ Mɛ̄lɛ̄ka̍ Ya̍a̍wɛ̄ɛ̄ wo̍ o̍ bā ve̍.