Read Southern Kisi Ko̍lo̍ni̍kō Tāso̍o̍ 24 Bible Online

Ko̍lo̍ni̍kō Tāso̍o̍ 24 - Southern Kisi bible

Ko̍lo̍ni̍kō Tāso̍o̍ 24

¹Wānāa̍ fu̍la̍ o̍ pūlāle̍ E̍lɔ̄ŋnde̍ŋ chōo̍ wa̍, nda̍ cho̍ ha̍ā ni̍. Na̍da̍bī, a̍ Ābi̍hū, a̍ Ɛ̄li̍a̍a̍sā, a̍ I̍ta̍māā.

²Kɛ̍ mi̍ Na̍da̍bī nda̍ Ābi̍hū pūa̍a̍ E̍lɔ̄ŋ nda̍ a̍ wu᷅ fi̍nyā nda̍ tāse̍, ndu̍yɛ̍ ā vīlu̍ ŋ̄chu̍a̍u̍ le̍. O̍ ko̍ŋ, mi̍ Ɛ̄li̍a̍a̍sā nda̍ I̍ta̍māā pūa̍a̍ E̍lɔ̄ŋ nda̍ a̍ pīli̍a̍a̍ ā si̍mnu᷄ŋ wa̍nāā sōlīāā lāsa̍lāa̍.

³Mi̍ Māsā Bɛ̍ndōo̍ Dēēve̍ o̍ du̍a̍ū wānāa̍ fu̍la̍ o̍ pūlāle̍ E̍lɔ̄ŋnde̍ŋ chōo̍ wa̍ a̍ ku̍ndāla̍ŋ yɛ̍ yɛ̍, mbo̍ kē ndā wa̍lta̍ nda̍ a̍a̍ nɔ̄ le̍ tōsāa̍ la̍ŋ. Sa̍dɔ̍kī, fūlāa̍ o̍ pūlāle̍ Ɛ̄li̍a̍a̍sāle̍ŋ chōo̍, nda̍ Āhīmɛ̍lɛ̍kī, fūlāa̍ o̍ pūlāle̍ I̍ta̍māāle̍ŋ chōo̍, nda̍ ma̍la̍ Dēēve̍ le̍ ku̍ndālā yɛ̍ yɛ̍la̍ŋ nda᷅ŋ dɔ̄wɔ̄ɔ̍ nāa̍ pi᷅lɛ̍ ni̍.

⁴Ɛ̄li̍a̍a̍sā, po̍ E̍lɔ̄ŋndo̍ ō pīlɔ̍ɔ̍, wānāa̍ fu̍la̍ o̍ pūlāle̍ ndɔ̄le̍ŋ chōo̍ wa̍, mi̍ Dēēve̍ dūāū nda̍ ku̍ndāla̍ŋ tɔ̍ a̍ lā ŋɔ᷄mpu᷅m (16). O̍ ko̍ŋ kɔ̍ɔ̍lī, I̍ta̍māā, pūa̍a̍ E̍lɔ̄ŋnda̍ ō pīlɔ̍ɔ̍ vɛ̄lɛ̄, wānāa̍ fu̍la̍ o̍ pūlāle̍ ndɔ̄le̍ŋ chōo̍ wa̍, nda̍ mi̍ Dēēve̍ du̍a̍ū nda̍ ku̍ndāla̍ŋ lā ŋɔ̄ma̍a̍. Le̍ sa̍bū Dēēve̍ tōsa̍ he̍ī yo̍ cho̍ ni̍, māā o̍ pūlāle̍ Ɛ̄li̍a̍a̍sāle̍ŋ chōo̍ māsāa̍ wa̍ā nda̍ a̍a̍ hi̍o̍ū fu̍lā mbo̍ hīōū pūlāle̍ I̍ta̍māāle̍ŋ.

⁵Ɛ̄li̍a̍a̍sā nda̍ I̍ta̍māā, o̍ pūlāle̍ wānāā ŋīɔ̍ɔ̍ŋnda̍ ha̍ā chōo̍ wa̍nāā to̍sā wa̍llo̍ o̍ chīɛ̍i̍ Mɛ̄lɛ̄ka̍a̍ ni᷄ŋ nda̍, a̍ wānāā sōlīāā lāsa̍lāa̍ ā fūla̍ ni̍.

⁶Mɛ̄ɛ̍ Dēēve̍ chīi̍ ku̍ndālā yɛ̍ yɛ̍la̍ŋ nda᷅ŋ hɛ̄lī, mbo̍ chɔ̄m nda̍ wa̍lta̍ yɛ̍ yɛ̍la̍ nda̍ a̍a̍ nɔ̍ le̍ tōsāa̍ la̍ŋ, mi̍ Sīɛ̄ma̍yāā po̍ Nɛ̄ta̍a̍nīɛ̄ɛ̄l wō, ō ndu̍ o̍o̍ wa̍ Li̍va̍ītīi̍nɔ̍ɔ̍ wo̍, ō pōōnyīāā wānāa̍ wa̍ bōlīī lāyu̍ŋgu̍e̍i̍, ma̍ wā ku̍ndālā nda᷅ŋ bōlle̍ wa̍ dīōla̍ŋ. Māsā bɛ̍ndōo̍ o̍ hɔ̄l, a̍ wānāā bɛ̄ndūāā lēlɛ̄ŋnda̍, a̍ Sa̍dɔ̍kī, wānā so̍līāā lāsa̍lāa̍, a̍ Āhīmɛ̍lɛ̍kī, po̍ Ābīa̍a̍tā wo̍, a̍ wānāā cho̍ bōlle̍ o̍ yu̍ŋgu̍la̍ wānāā sōlīāā lāsa̍lāa̍, a̍ yu̍ŋgu̍la̍ Li̍va̍īya̍ chōo̍ wa̍, ā nda̍ hɛ̍li̍ o̍ pūlāle̍ Ɛ̄li̍a̍a̍sāle̍ŋ, a̍ pūlāle̍ I̍ta̍māāle̍ŋ chōo̍ wa̍.

⁷Ku̍ndālā bi̍dīi̍ŋ a̍ lāhīɔ̍ɔ̍lu̍ la̍ Dēēve̍ dɔ̄ū la̍ŋ na̍a̍ pi᷅lɛ̍ a̍ yu̍ŋgu̍la̍ŋ kpɛ̍ kpɛ̍, mbo̍ chɔ̄m nda̍ wa̍lta̍ nda̍ nɔ̄ le̍ tōsāa̍ la̍ŋ nda̍, bōlīī lāyu̍ŋgu̍e̍i̍ o̍ ku̍ndālā lāŋ chōo̍, nda̍ chō ha̍ā ni̍. 1) Chɛ̄hōya̍lu̍i̍bī, ndu̍ wa̍ ku̍ndā tāso̍o̍ bōlle̍ŋ ni̍. 2) Chɛ̄da̍yāā, ndu̍ wa̍ ku̍ndā dīi̍ŋ ndɔ̄ɔ̍ bōlle̍ŋ ndi̍. 3) Ha̍lūīm, ndu̍ wa̍ ku̍ndā yāa̍ ndɔ̄ɔ̍ bōlle̍ŋ ndi̍. 4) Sɛ̍ho̍lūīm, ndu̍ wa̍ ku̍ndā hīɔ̍ɔ̍lo̍o̍ bōlle̍ŋ ni̍. 5) Mālīki̍chā, ndu̍ wa̍ ku̍ndā ŋūɛ̍ɛ̍no̍o̍ bo̍lle̍ŋ ni̍. 6) Mi̍cha̍mīŋ ndu̍ wa̍ ku̍ndā ŋɔ᷄mpu᷅mndo̍ bōlle̍ŋ ni̍. 7) Hāki̍kɔ̍ɔ̍sī, ndu̍ wa̍ ku̍ndā ŋɔ᷄mmɛ̍ū wo̍ bōlle̍ŋ ni̍. 8) A̍bi̍chā, ndu̍ wa̍ ku̍ndā ŋɔ̄ma̍a̍ wo̍ bōlle̍ŋ ni̍. 9) Chɛ̍sūāā, ndu̍ wa̍ ku̍nda̍ ŋɔ̄ma̍hīɔ̍ɔ̍lo̍o̍ bōlle̍ŋ ni̍. 10) Sīɛ̄kāna̍yā, ndu̍ wa̍ ku̍ndā tɔ̍ wo̍ bōlle̍ŋ ni̍. 11) Īlīa̍a̍si̍bī, ndu̍ wa̍ ku̍ndā tɔ̍ a̍ ō pīlɔ̍ɔ̍ bōlle̍ŋ ni̍. 12) Cha̍kīm, ndu̍ wa̍ ku̍ndā tɔ̍ a̍ dīi̍ŋ ndɔ̄ɔ̍ bōlle̍ŋ ni̍. 13) Hu̍pāā, ndu̍ wa̍ ku̍ndā tɔ̍ a̍ (...)

²⁰Dīōlā Li̍va̍īya̍ a̍ fūla̍ o̍ pūlāle̍ Līva̍īle̍ŋ chōo̍ wa̍, la̍ŋ la̍ cho̍ la᷅ŋ ni̍. Chɛ̄da̍yāā nda̍ Si̍ɛ̍būɛ̄l fūlāa̍ o̍ yu̍ŋgu̍ A̍mi̍lūām ndo̍ chōo̍. A̍ I̍sīāā, fūlāa̍ o̍ yu̍ŋgu̍ Lūēha̍a̍bīāā wo̍ chōo̍. A̍ Cha̍ha̍tī nda̍ Sīɛ̄lōmo̍tī, fūlāa̍ o̍ yu̍ŋgu̍ Ɛ̍sɛ̄ɛ̄ wo̍ chōo̍. A̍ Chɛ̄lu̍i̍yā, a̍ Āmālu̍i̍yā, a̍ Chɛ̄ha̍sīɛ̄ɛ̄, a̍ Chɛ̄kāme̍yā, pūa̍a̍ Hi̍būlɔ̄ŋ nda̍ wa̍ ka̍ŋ ni̍. A̍ Si̍ɛ̍mā nda̍ Mi̍kāā fūlāa̍ o̍ yu̍ŋgu̍ Yu̍sīɛ̄ɛ̄l wo̍ chōo̍. A̍ wānāyɛ̍i̍ Mi̍kāā ve̍, ndu̍ yɔ̍nūŋ māā I̍sīāā ni̍, po̍ Sɛ̄kāla̍yā wo̍. A̍ Ma̍a̍lī, a̍ Mu̍sī, a̍ Cha̍a̍si̍yā, fūlāa̍ o̍ yu̍ŋgu̍ Mɛ̍lu̍a̍lī wo̍ chōo̍. A̍ Si̍o̍hām, a̍ Sa̍kɔ̄ɔ̄, a̍ I̍bi̍lūī, pūa̍a̍ ya̍a̍ wa̍ ha̍ā Ɛ̄li̍a̍a̍sā ndu̍ ve̍lū ni̍.

²⁸A̍ Māhi̍lī, ndu̍ ndu̍ o̍o̍ ve̍lū pūa̍a̍ ā ŋīɔ̍ɔ̍ŋ, Ɛ̄li̍a̍a̍sā nda̍ Ki̍sī. Ɛ̄li̍a̍a̍sā po̍ Māhi̍lī wo̍ ho̍ō ndu̍ o̍o̍ vi̍lu̍ chu̍a̍ le̍. Kɛ̍ Ki̍sī ndu̍, mbo̍ vīālū pōo̍, ndu̍ yɔ̍nūŋ ni̍ māā Chɛ̍lu̍a̍mɛ̄ɛ̄l.

³⁰A̍ Mu̍sī, ndu̍ ndu̍ o̍o̍ nɔ̍ pūa̍a̍ ā yāa̍, nda̍ cho̍ ha̍ā ni̍, Ma̍a̍lī, a̍ Ɛ̍dā, a̍ Chɛ̄lūīma̍yā. Yu̍ŋgu̍la̍ Li̍va̍īya̍ lā ki̍nɛ̍i̍ la̍ fu̍la̍ o̍ pūlāle̍ Līva̍īle̍ŋ chōo̍ la̍ŋ, la̍ŋ la̍ cho̍ la̍ŋ ni̍.

³¹Li̍va̍īya̍ ha̍ā ki̍nɛ̍i̍, ma̍ kē nda̍ wa̍lta̍ nda̍ a̍a̍ nɔ̍ le̍ tōsāa̍ la̍ŋ tu᷅, mɛ̄ɛ̍ nda̍ ke̍ wānāā sōlīāā lāsa̍lāa̍ yɛ̍, ā nda̍ fūla̍ o̍ pūlāle̍ pi᷅lɛ̍ le̍ŋ chōo̍ wa̍. Ndu̍yɛ̍ sɔ̄ɔ̍ŋ mu᷅ŋ kpo̍u̍, Māsā Bɛ̍ndōo̍ Dēēve̍, a̍ Sa̍dɔ̍kī, a̍ Āhīmɛ̍lɛ̍kī, a̍ bōlīī lāyu̍ŋgu̍i̍i̍ wānāā sōlīāā lāsa̍lāa̍, a̍ Li̍va̍īya̍ o̍ hɔ̄l ŋ̍ yɔ̍nu̍ŋ ni̍.