Read Southern Kisi Ko̍lo̍ni̍kō Tāso̍o̍ 27 Bible Online

Ko̍lo̍ni̍kō Tāso̍o̍ 27 - Southern Kisi bible

Ko̍lo̍ni̍kō Tāso̍o̍ 27

¹Wānāa̍ wa̍ bōlīī lāyu̍ŋgu̍e̍i̍ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ nda̍, a̍ pūa̍a̍ chɔ̄ūwāa̍ wa̍ bōlle̍ le̍ wāa̍la̍ŋ a̍ kɛ̄mɛ̄la̍ŋ nda̍, a̍ pūa̍a̍ ndāa̍ chɔ̄ūwāa̍ wa̍ māsā bɛ̍ndōo̍ wa̍llo̍ o̍ bā bɛ̄ŋgu̍ wa̍, ā wa̍ ā pīɔ̄ūwāā a̍ ku̍ndāla̍ŋ kpɛ̍ kpɛ̍, le̍ wa̍li̍ lēlɛ̄ŋndo̍ to̍sāa̍ a̍ pāŋgu̍ŋ yɛ̍ yi̍ɔ̍ɔ̍ŋ o̍ wɔ̄sīo̍o̍ ni᷄ŋ. Ndu̍yɛ̍ ku̍ndā o̍ ku̍nda̍ pūa̍a̍ chɔ̄ūwa̍ ā wa̍ wāa̍la̍ŋ bi̍dīi̍ŋ a̍ lā hīɔ̍ɔ̍lu̍ (24,000). Wānāa̍ wa̍ ku̍ndālā lāŋ chīla̍ŋ nda̍, nda̍ chō ha̍ā ni̍.

²Cha̍si̍ɔ̍bīām, po̍ Sa̍bi̍dīɛ̄ɛ̄ wo̍, ndu̍ wa̍ ku̍ndā tāso̍o̍ chīla̍ŋ le̍ pāŋgi̍i̍ ta̍se̍i̍ ni̍. O̍ ku̍ndā ndɔ̄ɔ̍ chōo̍ pūa̍a̍ chɔ̄ūwa̍ ā wa̍ wāa̍la̍ŋ bi̍dīi̍ŋ a̍ lā hīɔ̍ɔ̍lu̍ (24,000).

³Cha̍si̍ɔ̍bīām ko̍ŋ yɛ̍, o̍ pūlāle̍ Pɛ̍lu̍ɛ̍sī le̍ŋ chōo̍ ndu̍ o̍o̍ fu̍la̍ ni̍. Ndu̍ wa̍ vɛ̄lɛ̄ pūa̍a̍ chɔ̄ūwāa̍ wa̍ wa̍llo̍ māsāa̍ o̍ bā bɛ̍ŋgu̍ le̍ pāŋgi̍i̍ tāse̍i̍ ke̍ŋ nda̍ chīla̍ŋ ni̍.

⁴O̍ ko̍ŋ kɔ̍ɔ̍lī, Dōda̍yī, fūlāa̍ o̍ pūlāle̍ A̍ho̍hīle̍ŋ chōo̍, ndu̍ wa̍ pūa̍a̍ chɔ̄ūwa̍ ku̍ndā dīi̍ŋ ndɔ̄ɔ̍ bōlle̍ŋ le̍ pāŋgi̍i̍ di̍i̍ŋ ndūɛ̍i̍ ni̍. Wāna̍ wa̍ ndu̍ īkɛ̄i̍ yo̍ wa̍ Mi̍ki̍lɔ̍tī ni̍. Ndu̍ bɛ̍ɛ̍ o̍ ku̍ndā ndɔ̄ɔ̍ chōo̍, pūa̍a̍ chɔ̄ūwa̍ wa̍ wāa̍la̍ŋ bi̍dīi̍ŋ a̍ lā hīɔ̍ɔ̍lu̍ (24,000).

⁵Bɛ̄na̍yā, po̍ Chɛ̄hōwa̍dā, wāna̍ so̍lī sa̍lāa̍ o̍ Mɛ̄lɛ̄ka̍ lo̍ wo̍, ndu̍ wa̍ ku̍ndā pūa̍a̍ chɔ̄ūwa̍ ō yāa̍ ndɔ̄ɔ̍ bōlle̍ŋ le̍ pāŋgi̍i̍ ya̍a̍ ndūɛ̍i̍ ni̍. O̍ ku̍ndā ndɔ̄ɔ̍ chōo̍ pūa̍a̍ chɔ̄ūwa̍ wa̍ wāa̍la̍ŋ bi̍dīi̍ŋ a̍ lā hīɔ̍ɔ̍lu̍ (24,000).

⁶Bɛ̄na̍yā ko̍ŋ, ō wa̍ wāna̍ kpāāyā bɛ̍ndū pūa̍a̍ chɔ̄ūwāā ŋ̄wāŋ be̍le̍-ya̍a̍ wa̍ tɛ̄ɛ̄ŋ, ndu̍yɛ̍ nda̍ wa̍ pūa̍a̍ chɔ̄ūwāā ŋ̄wāŋ be̍le̍-ya̍a̍ ka̍ŋ bōlle̍ŋ ni̍. Ndu̍ o̍o̍ ve̍lū pōo̍ dīōla̍ŋ āā Āmīsa̍ba̍dī, ndu̍ bɛ̍ɛ̍ bōllē pūa̍a̍ chɔ̄ūwa̍ o̍ wa̍ ni̍.

⁷O̍ ko̍ŋ kɔ̍ɔ̍lī, A̍sa̍hɛ̄l, pɔ̄mbɔ̄ɔ̍ Cho̍wa̍bī, ndu̍ wa̍ ku̍ndā hi̍ɔ̍ɔ̍lo̍o̍ bōlle̍ŋ le̍ pāŋgi̍i̍ hi̍ɔ̍ɔ̍lu̍e̍i̍ ni̍. Mɛ̄ɛ̍ o̍ fa̍ŋa̍ŋ, mi̍ Sɛ̄bāda̍yā po̍ ndɔ̄ o̍ mi̍i̍ŋgū o̍ fōōfo̍ ndɔ̄ɔ̍. O̍ ku̍ndā ndɔ̄ɔ̍ chōo̍ pūa̍a̍ chɔ̄ūwa̍ wa̍ wāa̍la̍ŋ bi̍dīi̍ŋ a̍ lā hīɔ̍ɔ̍lu̍ (24,000).

⁸Sīāmhu̍tī, ndu̍ wa̍ ku̍ndā ŋūɛ̍ɛ̍no̍o̍ bōlle̍ŋ le̍ pāŋgi̍i̍ ŋu̍ɛ̍ɛ̍nu̍e̍i̍ ni̍. O̍ ku̍ndā ndɔ̄ɔ̍ chōo̍ pūa̍a̍ chɔ̄ūwa̍ wa̍ wāa̍la̍ŋ bi̍dīi̍ŋ a̍ lā hi̍ɔ̍ɔ̍lu̍ (24,000).

⁹I̍lūā, po̍ I̍kɛ̍sīī wo̍, wānā wa̍ā Tɛ̄ko̍wā chīe̍e̍, ndu̍ wa̍ ku̍ndā ŋɔ᷄mpu᷅m ndo̍ bōlle̍ŋ le̍ pāŋgi̍i̍ ŋɔ̍mpu᷅m nde̍ ni̍. Ndu̍ bɛ̍ɛ̍ o̍ ku̍ndā ndɔ̄ɔ̍ chōo̍ pūa̍a̍ chɔ̄ūwa̍ wa̍ wāa̍la̍ŋ bi̍dīi̍ŋ a̍ lā hīɔ̍ɔ̍lu̍ (24,000).

¹⁰Hɛ̍lɛ̍sī, fūlāa̍ o̍ pūlāle̍ E̍fi̍lūēmnde̍ŋ chōo̍, wānā wāā Pɛ̍lɔ̄ŋ chīe̍e̍, ndu̍ wa̍ ku̍ndā ŋɔ᷄mmɛ̍ū wo̍ bōlle̍ŋ le̍ pāŋgi̍i̍ ŋɔ̍mmɛ̍ū ve̍ ni̍. Ndu̍ bɛ̍ɛ̍ o̍ ku̍ndā ndɔ̄ɔ̍ chōo̍, pūa̍a̍ chɔ̄ūwa̍ wa̍ wāa̍la̍ŋ bi̍dīi̍ŋ a̍ lā hīɔ̍ɔ̍lu̍ (24,000).

¹¹Si̍bɛ̍kāī, fūlāa̍ o̍ pūlāle̍ Sɛ̍lūā le̍ŋ chōo̍, wānā wa̍ā Hu̍sīāā, ndu̍ wa̍ ku̍ndā ŋɔ̄ma̍a̍ wo̍ bōlle̍ŋ le̍ pāŋgi̍i̍ ŋɔ̄ma̍a̍ ve̍ ni̍. O̍ ku̍ndā ndɔ̄ɔ̍ chōo̍ pūa̍a̍ chɔ̄ūwa̍ wa̍ wāa̍la̍ŋ bi̍dīi̍ŋ a̍ lā hīɔ̍ɔ̍lu̍ (24,000).

¹²Ābīɛ̍ɛ̍sā, wānā wa̍ā A̍na̍tɔ̍tī, fūlāa̍ o̍ pūlāle̍ Bɛ̍ŋnja̍mīŋ nde̍ŋ chōo̍, ndu̍ wa̍ ku̍ndā ŋɔ̄ma̍hīɔ̍ɔ̍lo̍o̍ bōlle̍ŋ le̍ pāŋgi̍i̍ ŋɔ̍ma̍hīɔ̍ɔ̍lu̍e̍i̍ ni̍. O̍ ku̍ndā chōo̍, pūa̍a̍ chɔ̄ūwa̍ wa̍ wāa̍la̍ŋ bi̍dīi̍ŋ a̍ lā hīɔ̍ɔ̍lu̍ (24,000).

¹³Ma̍ha̍lāī, wānā wa̍ā Nɛ̍to̍fā, fūlāa̍ o̍ pūlāle̍ Sɛ̍lūā le̍ŋ chōo̍, ndu̍ wa̍ ku̍ndā tɔ̍ wo̍ bōlle̍ŋ le̍ pāŋgi̍i̍ tɔ̍ ve̍ ni̍. Ndu̍ bɛ̍ɛ̍ o̍ ku̍ndā ndɔ̄ɔ̍ chōo̍, pūa̍a̍ chɔ̄ūwa̍ wā wāa̍la̍ŋ bi̍dīi̍ŋ a̍ lā hīɔ̍ɔ̍lu̍ (24,000).

¹⁴Bɛ̄na̍yā, wānā wa̍ā Pi̍lu̍a̍tɔ̄ŋ, fūlāa̍ o̍ pūlāle̍ E̍fi̍lūēmnde̍ŋ chōo̍, ndu̍ wa̍ ku̍ndā tɔ̍ a̍ ō pīlɔ̍ɔ̍ bōlle̍ŋ le̍ pāŋgi̍i̍ tɔ̍ a̍ īpīlɛ̍i̍ ni̍. O̍ ku̍ndā ndɔ̄ɔ̍ chōo̍ pūa̍a̍ chɔ̄ūwa̍ wa̍ wāa̍la̍ŋ bi̍dīi̍ŋ a̍ lā hīɔ̍ɔ̍lu̍ (24,000).

¹⁵Hɛ̄li̍bāā, wānā wa̍ā Nɛ̍to̍fā, fūlāa̍ o̍ pūlāle̍ O̍ti̍nīɛ̄l le̍ŋ chōo̍, ndu̍ wa̍ ku̍ndā tɔ̍ a̍ ō dīi̍ŋ ndɔ̄ɔ̍ bōlle̍ŋ le̍ pāŋgi̍i̍ tɔ̍ a̍ mūu̍ŋ nde̍ ni̍. Ndu̍ bɛ̍ɛ̍ o̍ ku̍ndā ndɔ̄ɔ̍ chōo̍, pūa̍a̍ chɔ̄ūwa̍ wā wāa̍la̍ŋ bi̍dīi̍ŋ a̍ lā hīɔ̍ɔ̍lu̍ (24,000).

¹⁶Wānāa̍ wa̍ yu̍ŋgu̍la̍ŋ I̍sɔ̄lūɛ̄ī chīla̍ŋ nda̍, nda̍ cho̍ ha̍ā ni̍, a̍ yu̍ŋgu̍la̍ nda̍ wa̍ chīla̍ŋ nda̍ŋ. Īlīɛ̍ɛ̍sā, po̍ Si̍ki̍lī wo̍, ndu̍ wa̍ yu̍ŋgu̍ Lūbɛ᷅ŋndo̍ chīla̍ŋ ni̍. Sīɛ̄fa̍tīāā, po̍ Ma̍a̍kāā wo̍, ndu̍ wa̍ yu̍ŋgu̍ Si̍mīɔ̄ŋ ndo̍ chīla̍ŋ ni̍. Hāsīābi̍yā, po̍ Kɛ̍mūɛ̄l wo̍, ndu̍ wa̍ yu̍ŋgu̍ Li̍va̍īyo̍ chīla̍ŋ ni̍, ndu̍yɛ̍ mi̍ Sa̍dɔ̍kī, wāna̍ so̍lī sa̍lāa̍ o̍ Mɛ̄lɛ̄ka̍ lo̍ wo̍, ndu̍ wa᷅ wānāa̍ fu̍la̍ o̍ pūlāle̍ E̍lɔ̄ŋ nde̍ŋ chōo̍ wa̍ chīla̍ŋ ni̍. Ɛ̄li̍hū, wānāyɛ̍i̍ Dēēve̍i̍, ndu̍ wa̍ yu̍ŋgu̍ Chu̍dā wo̍ chīla̍ŋ ni̍. O̍mi̍lī, po̍ Ma̍i̍kɛ̄l wo̍, ndu̍ wa̍ yu̍ŋgu̍ I̍sa̍a̍kā chīla̍ŋ ni̍. Īsīma̍yā, po̍ Ōbāda̍yā wo̍, ndu̍ wa̍ yu̍ŋgu̍ Sɛ̍bu̍lɔ̄ŋ ndo̍ chīla̍ŋ ni̍. Chɛ̄lūīmo̍tī, po̍ A̍si̍lūɛ̄ɛ̄ wo̍, ndu̍ wa̍ yu̍ŋgu̍ Nāfi̍ta̍lī wo̍ chīla̍ŋ ni̍. Hōōsi̍a̍ā, po̍ A̍sa̍sīāā wo̍, ndu̍ wa̍ yu̍ŋgu̍ E̍fi̍lūēm ndo̍ chīla̍ŋ ni̍. Cho̍wɛ̄ɛ̄, po̍ Pɛ̄da̍a̍yā wo̍, ndu̍ wa̍ yu̍ŋgu̍ Mānāa̍sē wo̍ bā pāa̍le̍ŋ lē dēl lo̍ chīla̍ŋ ni̍. I̍dɔ̄ɔ̄, po̍ Sɛ̄kā(...)

²³Chɔ̄m Dēēve̍ ō chɔ᷄m I̍sɔ̄lūɛ̍i̍ya̍ le̍ mbō sīna̍ mɛ̄ɛ̍ nda̍ chō bōllē pīlɛ̍ yɛ̍ wo̍, wānāa̍ chi̍ŋa̍ wɔ̍sīla̍ŋ bi̍dīi̍ŋ te̍ wa̍ ki̍nɛ̍i̍, ō chɔ᷄m ka̍ŋ te̍. Kāni̍ fu̍u̍le̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ chu̍ēl I̍sɔ̄lūɛ̍i̍ya̍ būŋgɛ̄i̍ māā ō chō tōsā mī I̍sɔ̄lūɛ̍i̍ya̍ ā kūi̍, mɛ̄ɛ̍ lōo̍ŋ ŋ̄ chō nu̍a̍ā o̍ ha̍la̍a̍ ni᷄ŋ ŋ̄ chu̍ū chɔ᷅m te̍ yɛ̍.

²⁴Cho̍wa̍bī, ō Dēēve̍ ndu̍ o̍o̍ di̍mu̍l le̍ wāŋnda̍ I̍sɔ̄lūɛ̄ī chɔ̄mndo̍ wo̍, mi̍ ndu̍ o̍o̍ ka̍ndū wāŋnda̍ chɔ̄mndo̍ kɛ̍ ō chīi̍ le̍. Kāni̍ fu̍u̍le̍, mi̍ Mɛ̄lɛ̄ka̍ dūāūnu᷄ŋ tu̍mbe̍ mbo̍ tūsī nda̍ nyɛ̄ pālāa̍ chōo̍, le̍ mɛ̄ɛ̍ nda̍ kāndu̍ wāŋnda̍ chɔ̄mndo̍ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ yɛ̍. Le̍ he̍ī, wānāā Cho̍wa̍bī chɔ̍m ka̍ŋ nda̍ ki̍nɛ̍i̍, ko̍na̍ le̍bo᷅llo̍ a̍ nda̍ o̍kɔ̄ɔ̄, ō cho̍ o̍ po̍o̍nyīāā o̍ yāu̍ lāko̍na̍ Māsāa̍ Dēēvi̍o̍o̍ ni᷄ŋ te̍.

²⁵Wānāa̍ wa̍ nyɛ̄m ke᷅ŋ māsā bɛ̍ndōo̍ chīla̍ŋ nda̍ ki̍nɛ̍i̍, nda̍ cho̍ ha̍ā ni̍, ndu̍yɛ̍ a̍ nyɛ̄m yɛ̍ yɛ̍ŋ nda̍ wa̍ chīla̍ŋ ndo̍. A̍si̍ma̍vɛ̄ɛ̄, po̍ A̍dīɛ̄ɛ̄ wo̍, ndu̍ wa̍ fo̍ndāŋndā nda̍ a̍a̍ kɛ̍sī nyɛ᷅m māsā bɛ̍ndōo̍ wo̍ŋ chīla̍ŋ ni̍. Chōna̍ta᷅ŋ, po̍ Yūsa̍yā wo̍, ndu̍ wa̍ fo̍ndāŋndā nda̍ a̍a̍ kɛ̍sī nyɛ᷅m lēlɛ̄ŋndo̍ŋ o̍ fo̍ndāŋndā yɛ̍ yɛ̍la̍ŋ chīla̍ŋ, o̍ būŋgāŋ yɛ̍ yɔ̄ŋ ni᷄ŋ, a̍ o̍ chi̍e̍e̍ŋ bɛ̍ndo̍ŋ ni᷄ŋ, a̍ o̍ sɔ̄ndɔ̄kɔ̍lta̍ŋ, ndu̍yɛ̍ a̍ o̍ fo̍ndāŋndā vīlɛ̄īlā nda̍ a̍a̍ mɛ̍ŋgɛ̄lā le̍ ya̍a̍mɔ̍ɔ̍wa̍ la̍ŋ ni̍. Ɛ̄si̍lūī, po̍ Chɛ̍lu̍bī wo̍, ndu̍ wa̍ wa̍lta̍ ŋ̄chīɛ̄ɛ̄lā Māsā Bɛ̄ndōo̍ kpo̍u̍ chi᷅la̍ŋ ni̍. Si̍mɛ̄ī, wānā wa̍ā Lu̍a̍mā chīe̍e̍, ndu̍ wa̍ kpe̍le̍la̍ yɔ̄mīī mākīle̍pīi̍ya̍ŋ chīla̍ŋ ni̍. Sa̍bi̍dī, wānā wa̍ā Si̍ɛ̍fām, ndu̍ wa̍ chīla̍ŋ le̍ mūɛ̄īmā mākīle̍pīi̍ya̍ŋ tōōsīa̍a̍ mā kɛ̄si̍ ma̍ŋ o̍ fo̍ndāŋ kɛ̄sīāā māmūɛ̄īyo̍ ni̍. Bāāl Ha̍nāŋ, wānā wa̍ā Kɛ̍dɛ̄ɛ̄, ndu̍ wa̍ chīla̍ŋ le̍ yɔ̄mīī ɔ̄li̍fīi̍ ve̍, a̍ yɔ̄mīī si̍ka̍mɔ̄ɔ(...)

³²Dēēve̍ bōm ndɔ̄ ndu̍ yɔ̍nūŋ māā Chōna̍ta᷅ŋ ni̍, wānā si̍lāa̍ Dēēvi̍o̍o̍ ō pīlɛ̍ o̍ wa̍ ni̍. Ō wa̍ wāna̍ tāāsi̍, ndu̍yɛ̍ wāna̍ ndu̍ o̍o̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍ la̍ŋ ndo̍ o̍ wa̍ ni̍. Chōna̍ta᷅ŋ ko̍ŋ ni̍, a̍ Chɛ̍yɛ̄ɛ̄, po̍ Hākīmɔ̍nī wo̍, nda̍ wa̍ ti̍chɛ̄i̍ya̍ le̍ pūa̍a̍ Dēēve̍ ve̍lū wa̍ pɛ̄ɛ̄kōo̍ ni̍.

³³O̍ ko̍ŋ kɔ̍ɔ̍lī, Āhīto̍fɛ̄l bɛ̍ɛ̍ wānā si̍lāa̍ o̍ wa̍ le̍ Māsā Bɛ̍ndōo̍ ni̍. O̍ ko̍ŋ kɔ̍ɔ̍lī, Hu̍sāī, wānā wa̍ā A̍ki̍tīī, ndu̍ ndi̍a̍a̍mɔ̍ɔ̍ Māsā Bɛ̄ndōo̍ Dēēvi̍o̍o̍ o̍ wa̍ ni̍.

³⁴Mɛ̄ɛ̍ Āhīto̍fɛ̄l o̍ fa̍ŋa̍ŋ, mi̍ Chɛ̄hōwa̍dā po̍ Bɛ̄na̍yā wo̍, Ābīa̍a̍tā a̍ mi̍i̍ŋgū o̍ fōōfo̍ ndɔ̄ɔ̍. Mi̍ Cho̍wa̍bī ndu̍ wa̍ pūa̍a̍ chɔ̄ūwāa̍ Māsāa̍ Dēēvi̍a̍a̍ bōlle̍ŋ.