Read Southern Kisi Ko̍lo̍ni̍kō Tāso̍o̍ 28 Bible Online

Ko̍lo̍ni̍kō Tāso̍o̍ 28 - Southern Kisi bible

Ko̍lo̍ni̍kō Tāso̍o̍ 28

¹O̍ ko̍ŋ kɔ̍ɔ̍lī, mi̍ Māsā Bɛ̍ndōo̍ Dēēve̍ o̍ ve̍e̍lū wānāā bɛ̄ndūa̍a̍ I̍sɔ̄lūɛ̄ī kpo̍u̍, a̍ bōlīī lāyu̍ŋgu̍e̍i̍, a̍ wānāā ku̍ndālā yɛ̍ yi̍a̍a̍ wa̍ māsā bɛ̍ndōo̍ wa̍llo̍ o̍ bā bɛ̄ŋgu̍ wa̍, a̍ wānāa̍ wa̍ so̍vɛ̄i̍ya̍ wāa̍la̍ŋ a̍ kɛ̄mɛ̄la̍ŋ bōllē wa̍, a̍ wānāa̍ wa̍ chīla̍ŋ le̍ nyɛ̄m ke᷅ŋ māsā bɛ̍ndōo̍, a̍ chɔ̄lūāā ndūa̍a̍, lātūlu̍ a̍ wānāā bɛ̄ndūa̍a̍ wa̍ chīɛ̄ī lēmāsāa̍ chīla̍ŋ nda̍, a̍ so̍vɛ̄i̍ya̍a̍ lēbōlla̍, a̍ so̍vɛ̄i̍ya̍a̍ kɔ̄l sīmūlāa̍ kpo̍u̍, le̍ mā chūūŋgi̍āŋ Chūlu̍sɛ̄lɛ̄m.

²Mɛ̄ɛ̍ wāŋnda̍ chūūŋgi̍āŋ kpo̍u̍, mi̍ māsā bɛ̍ndōo̍ Dēēve̍ o̍ cha᷄ŋ mbo̍ sīm, mbo̍ dīmī āā, “Wānāā nīa̍a̍ a̍ wānāya᷅ŋ nu᷄ŋ fa̍ū lā ya᷄ŋ ya̍ nīla̍ŋ. Ya̍ i̍i̍ kɛ̍ɛ̍si̍a̍a̍ le̍ chīɛ̄īyo̍ tāŋgūllo̍ le̍ kɔ̍fu̍ kpe̍ma̍ Mɛ̄lɛ̄ka̍ Ya̍a̍wɛ̄ɛ̄ wo̍ kɛ̄sīo̍o̍ lēni᷄ŋ. O̍ ko̍ŋ kɔ̍ɔ̍lī, le̍ mī Mɛ̄lɛ̄ka̍ nāa̍, ō nɔ̄ nāa̍ o̍ kɛ̍sī pe̍lo᷄ŋ nda̍. Ndu̍yɛ̍ mi̍ i̍ chu̍u̍ŋgīāā nyɛ̄m tāŋgūla᷄ŋ nāa̍ pi᷅lɛ̍ le̍ chīɛ̄ī kōŋ tāŋgūllo̍.

³Kɛ̍, mi̍ Mɛ̄lɛ̄ka̍ dīmūl la̍ māā, ō cho̍ nu᷅m te̍ cho̍ ya̍ chīɛ̄īyo̍ tēŋgūl te̍, kāni̍ fu̍u̍le̍ ku̍u̍ba̍nɔ̍ chɔ̄ūwo̍ ŋ̄ chō ni̍, ndu̍yɛ̍ a̍ di̍u̍ bɔ̄ɔ̍ wa᷅ŋndā chīe̍e̍ya̍.

⁴Kɛ̍, a̍ ko̍ŋ fa̍ū, Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍ ō hɛ̄lī ya̍ yu̍ŋgu̍ fi̍nyā nūu̍ tɛ̄ɛ̄ŋ mbo̍ chūēl la̍ ībūŋgā māā māsāle̍ŋ I̍sɔ̄lūɛ̄ī lē chō wa̍ o̍ pūlāle̍ nīle̍ŋ chōo̍ le̍ fɛ̍ɛ̍ŋ a̍ fɛ̍ɛ̍ŋ. Yu̍ŋgu̍la̍ŋ I̍sɔ̄lūɛ̄ī tɛ̍ɛ̄ŋ kpo̍u̍, mbo̍ hɛ̄lī yu̍ŋgu̍ Chu̍dā wo̍, yu̍ŋgu̍ fi̍nyā nūu̍ le̍ mbō wa̍ yu̍ŋgu̍ lēmāsāa̍ I̍sɔ̄lūɛ̄ī. Ndu̍yɛ̍ o̍ pūa̍a̍ fi̍nyā nūu̍ ō vēlū wa̍ tɛ̄ɛ̄ŋ, mbo̍ chā ya̍ nyīnā mbo̍ sīīŋgūū ya̍ māsā bɛ̍ndōo̍ I̍sɔ̄lūɛ̄ī chōo̍ kpo̍u̍.

⁵Ndu̍yɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ to̍sā mi̍ vi̍a̍lū pūa̍a̍ ta̍u̍. O̍ pūa̍a̍ o̍ ke̍ ya̍ wa̍ tɛ̄ɛ̄ŋ, mbo̍ hɛ̄lī Sɔ̍lɔ̍mɔ̄ŋ po̍ nī le̍ mbō mīīŋgu̍ o̍ kpe̍ŋgbe̍i̍ lēmāsā Mɛ̄lɛ̄ka̍ Ya̍a̍wɛ̄ɛ̄ wo̍ chōo̍, mbō wa̍ māsāa̍ I̍sɔ̄lūɛ̄ī chōo̍ kpo̍u̍.”

⁶O̍ ko̍ŋ kɔ̍ɔ̍lī, “Mbo̍ dīmūl la̍ āā, ‘Sɔ̍lɔ̍mɔ̄ŋ po̍ nu̍m ndu̍ cho̍ chīɛ̄ī nūu̍ a̍ la̍u̍ ba̍lu̍ chīɛ̍i̍ Mɛ̄lɛ̄ka̍a̍ wō tāŋgūl ni̍. Kāni̍ fo̍ndōle̍, I̍ hɛ̍li̍ ndu̍ le̍ mbō sīmnu᷄ŋ po̍ nī, ndu̍yɛ̍ mī ya̍ I̍ wa̍ fi̍nyā ndɔ̄.

⁷Tē ō hīōū lāchī a̍ nyɛ̄ ya̍ di̍mu̍l ndu̍ wo̍ tōsāa̍ pɛ̍, a̍ pɛ̄ɛ̄kūlā nīla̍ŋ chūa̍a̍ mɛ̄ɛ̍ o̍ cho̍ tōsāa̍ nu̍a̍ā yɛ̍ pɛ̍, I̍ to̍sa̍ mi̍ māsāle̍ ndɔ̄ le̍ŋ lē si᷄m le̍ fɛ̍ɛ̍ŋ a̍ fɛ̍ɛ̍ŋ.’”

⁸Mi̍ Dēēve̍ hīāū lāchī a̍ sūɛ̍i̍ mbo̍ dīmī āā, “Le̍la̍ŋ wānāā nīa̍a̍, nya̍ wāŋnda̍ I̍sɔ̄lūɛ̄ī kpo̍u̍, nya̍ si᷅m ha̍ā Mɛ̄lɛ̄ka̍ o̍ hɔ̄l la̍, nya̍ wānāa̍ Mɛ̄lɛ̄ka̍ Ya̍a̍wɛ̄ɛ̄ wa̍, Mɛ̄lɛ̄ka̍ wa̍ māā se̍ī nāā. I̍ di̍mu̍l nya̍ pāa̍le̍ hāūle̍ŋ nde᷅ŋ māā lā mānda̍ŋ mī lā tōsa̍ nyɛ̄ o̍ nyɛ̄ sāwāla̍ Mɛ̄lɛ̄ka̍ Ya̍a̍wɛ̄ɛ̄ la̍ŋ lā dīmī, Mɛ̄lɛ̄ka̍ nāa̍. Ko̍ŋ to̍sā ni̍ mī lɛ̄ŋndē kɛ̄ndɛ̄le̍ŋ nde᷅ŋ lē hīōū lāchī a̍ wāa̍ le̍ nya̍, ndu̍yɛ̍ mī chūāā nyāa̍ ā hu̍ŋ lo̍ō le̍ŋ le̍ fɛ̍ɛ̍ŋ a̍ fɛ̍ɛ̍ŋ.”

⁹O̍ ko̍ŋ kɔ̍ɔ̍lī mbo̍ dīmūl Sɔ̍lɔ̍mɔ̄ŋ āā, “Po̍ nūu̍, si̍na̍ Mɛ̄lɛ̄ka̍ fi̍nyā nūm ndo̍, ndu̍yɛ̍ mā sa̍a̍ŋgi̍a̍l ndu̍ a̍ kɔ̄l nūmndo̍, ndu̍yɛ̍ a̍ yīya᷄ŋ nu̍mndo̍. Kāni̍ fu̍u̍le̍, Mɛ̄lɛ̄ka̍ Ya̍a̍wɛ̄ɛ̄ ndu̍ to̍fā o̍ kɔ̄l tā wāŋndā chīe̍e̍ya̍ ni᷄ŋ mbō sīna̍ tūūlā ndāla̍ŋ a̍ yīya᷄ŋnda̍ ndāla̍ŋ ni̍. Le̍la̍ŋ tē a̍ nu̍u̍vi̍a̍a̍ ndu̍ pɛ̍, ā chō ndu̍ sāālɔ᷄ŋ. Kɛ̍ tē a̍ kɛ̍ɛ̍ ndu̍ pɛ̍, ndu̍ bɛ̍ɛ̍ ō kɛ̄ɛ̍ nu̍m le̍ fɛ̍ɛ̍ŋ a̍ fɛ̍ɛ̍ŋ.

¹⁰Le̍la̍ŋ, si̍mu̍l kɔ̄l lo̍ mā to̍sa̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ dīmu̍l nu̍m ndo̍. O̍ hɛ̄li̍ nu̍m le̍ mā tāŋgu̍l chīɛ̄ī ndɔ̄ɔ̍. Le̍la̍ŋ wa̍ a̍ dīāllūŋ kālā mā ta̍ŋgu̍l ndu̍.”

¹¹Mɛ̄ɛ̍ Dēēve̍ chīi̍ sūɛ̍i̍, mbo̍ chūā yāu̍ ndu̍ o̍o̍ nɔ̍ tūūlā tāŋgūl chīɛ̍i̍ Mɛ̄lɛ̄ka̍a̍ le̍chōo̍ wo̍, mbo̍ kē Sɔ̍lɔ̍mɔ̄ŋ po̍ ndɔ̄. O̍ yāu̍wo̍ ho̍ō chōo̍, ma̍ tūūlīāā kpɛ̍ kpɛ̍ mɛ̄ɛ̍ nda̍ a̍a̍ nɔ̍ le̍ chīɛ̍i̍ Mɛ̄lɛ̄ka̍a̍ ho̍ō tāŋgūllo̍ yɛ̍, ma̍ tūūlīāā mɛ̄ɛ̍ nda̍ a̍a̍ nɔ̍ le̍ lu̍mūi̍la̍ wa̍ le̍ nyɔ̄ɔ̍ŋ kɛ̄sīo̍o̍ la̍ŋ a̍ lu̍mūi̍la̍ŋ lā pīlɛ̍ la̍ŋ tāŋgūllo̍ yɛ̍, ndu̍yɛ̍ a̍ fo̍ndāŋ dīāndāa̍ hi̍o̍ū kpo̍u̍ wo̍, nāa̍ kpe̍ŋgbe̍i̍ īnyīɛ̍ɛ̍yo̍ ndu̍ o̍o̍ nɔ̍ le̍ wāa̍ wa̍.

¹²O̍ ko̍ŋ kɔ̍ɔ̍lī, mbo̍ kē ndu̍ vɛ̄lɛ̄ tūūla̍ŋ le̍ sāāsa̍ ba̍lu̍ la̍ū chīɛ̍i̍ Mɛ̄lɛ̄ka̍a̍ wo̍, a̍ la̍ū kōŋ, a̍ lu̍mūi̍la̍ wa̍ le̍ nyɔ̄ɔ̍ŋ o̍ chīɛ̍i̍ Mɛ̄lɛ̄ka̍a̍ kɛ̄sīo̍o̍ la̍ŋ tāŋgūllo̍, ndu̍yɛ̍ a̍ fo̍ndāŋnda̍ wa̍ le̍ nyɛ̄m nda̍ a̍a̍ yɔ̍ŋgu̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍ wo̍ŋ kɛ̄sīo̍o̍ la̍ŋ.

¹³O̍ ko̍ŋ kɔ̍ɔ̍lī, mbo̍ kē ndu̍ vɛ̄lɛ̄ tūūla̍ŋ le̍ wānāā sōlīāā lāsa̍lāa̍, a̍ Li̍va̍īya̍ pīɔ̄ūwo̍ a̍ ku̍ndāla̍ŋ, le̍ wa̍lta̍ wa̍ o̍ chīɛ̍i̍ Mɛ̄lɛ̄ka̍a̍ la̍ŋ tōsāa̍ ndu̍yɛ̍ a̍ le̍ nyɛ̄m lāāndu᷄ŋ wa̍ lo̍ŋ ndo̍ŋ māndāa̍.

¹⁴O̍ ko̍ŋ kɔ̍ɔ̍lī, mbo̍ chɔ̄m vɛ̄lɛ̄ Sɔ̍lɔ̍mɔ̄ŋ mɛ̄ɛ̍ kpɛ̍ ko̍o̍līi̍yo̍ŋ ŋ̄ nɔ̄ mī ŋ̄ wa̍ lūsu̍llo̍ le̍ nyɛ̄m lāāndu᷄ŋ nɔ̍ le̍ wāa̍ o̍ chīɛ̍i̍ Mɛ̄lɛ̄ka̍a̍ le̍ kpe̍ku̍ Mɛ̄lɛ̄ka̍a̍ wo̍ŋ tōōsīa̍a̍ yɛ̍, a̍ mɛ̄ɛ̍ kpɛ̍ ka̍ni̍ŋ hu̍mbo̍ŋ ŋ̄ nɔ̄ mī ŋ̄ wa̍ lūsu̍llo̍ le̍ nyɛ̄m lāāndu᷄ŋ nɔ̍ le̍ wāa̍ o̍ chīɛ̍i̍ Mɛ̄lɛ̄ka̍a̍ le̍ kpe̍ku̍ Mɛ̄lɛ̄ka̍a̍ wo̍ŋ tōōsīa̍a̍ yɛ̍.

¹⁵O̍ ko̍ŋ kɔ̍ɔ̍lī, mbo̍ chɔ̄m vɛ̄lɛ̄ mɛ̄ɛ̍ kpɛ̍ ko̍o̍līi̍yo̍ŋ ŋ̄ nɔ̄ mī ŋ̄ wa̍ lūsu̍llo̍ le̍ nyɛ̄ kɛ̄sīāālā la̍mūi̍ ŋ̄ko̍o̍līi̍yo̍ tōōsīa̍a̍ a̍ la̍mbūi̍la̍ ndɔ̄la̍ŋ yɛ̍, ndu̍yɛ̍ a̍ mɛ̄ɛ̍ kpɛ̍ ka̍ni̍ŋ hu̍mbo̍ŋ ŋ̄ nɔ̄ mī ŋ̄ wa̍ lūsu̍llo̍ le̍ nyɛ̄ kɛ̄sīāālā la̍mūi̍ ka̍ni̍i̍ hu̍mbōo̍ tōōsīa̍a̍ a̍ la̍mbūi̍la̍ ndɔ̄la̍ŋ yɛ̍. Nyɛ̄lā kɛ̄sīāālā la̍mūi̍la̍ŋ nda᷅ŋ, ō kɛ᷅ o̍ kɛ᷅ mbo̍ chɔ̄m mɛ̄ɛ̍ nda̍ a̍a̍ nɔ̍ le̍ kpe̍ko̍o̍ sōlīo̍o̍ a̍ ndu̍ yɛ̍.

¹⁶Mbo̍ chɔ̄m mɛ̄ɛ̍ kpɛ̍ ko̍o̍līi̍yo̍ŋ ŋ̄ nɔ̄ mī ŋ̄ wa̍ lūsu̍llo̍, le̍ ti̍bīi̍ ŋ̄ko̍o̍līi̍ wa̍ le̍ bēe̍dīi̍yo̍ wa᷅ o̍ yɔ̍ŋga᷄ŋ o̍ Mɛ̄lɛ̄ka̍ lo̍ wo̍ kɛ̄sīo̍o̍ lēchōo̍ wo̍ tōōsīa̍a̍ yɛ̍, ndu̍yɛ̍ a̍ mɛ̄ɛ̍ kpɛ̍ ka̍ni̍ŋ hu̍mbo̍ŋ ŋ̄ nɔ̄ mī ŋ̄ wa̍ lūsu̍llo̍ le̍ ti̍bīi̍la̍ ka̍ni̍i̍ hu̍mbūla̍ŋ tōōsīa̍a̍ yɛ̍.

¹⁷O̍ ko̍ŋ kɔ̍ɔ̍lī, mbo̍ chɔ̄m vɛ̄lɛ̄ Sɔ̍lɔ̍mɔ̄ŋ mɛ̄ɛ̍ kpɛ̍ ko̍o̍līi̍ŋ kɛ̍ndɛ̄ kɛ̍ndɔ᷄ŋ ŋ̄ nɔ̄ mī ŋ̄ wa̍ lūsu̍llo̍ le̍ chūlā sa̍ŋgi̍la̍ŋ, a̍ hɛ̄ŋgɛ̍i̍la̍ pɔ̍mbɔ̄la̍ŋ, a̍ kpɛ̍ɛ̍nɛ̍ŋ ŋ̄ko̍o̍līi̍yo̍ŋ tōōsīa̍a̍ yɛ̍, ndu̍yɛ̍ a̍ mɛ̄ɛ̍ kpɛ̍ ko̍o̍līi̍yo̍ŋ ŋ̄ nɔ̄ mī ŋ̄ wa̍ lūsu̍llo̍ le̍ hɛ̄ŋgɛ̍i̍la̍ ŋ̄ko̍o̍līi̍la̍ŋ ō kɛ᷅ o̍ kɛ᷅ tōōsīa̍a̍ yɛ̍, ndu̍yɛ̍ vɛ̍lɛ̄ a̍ mɛ̄ɛ̍ kpɛ̍ ka̍ni̍ŋ hu̍mbo᷄ŋ ŋ̄ nɔ̄ mī ŋ̄ wa̍ lūsu̍llo̍ le̍ hɛ̄ŋgɛ̍i̍la̍ ka̍ni̍i̍ hu̍mbūla̍ŋ ō kɛ᷅ o̍ kɛ᷅ tōōsīa̍a̍ yɛ̍.

¹⁸O̍ mɛ̄ɛ̄lu̍la̍ŋ kpɔ̍ŋ, mbo̍ chɔ̄m ndu̍ mɛ̄ɛ̍ kpɛ̍ ko̍o̍līi̍ŋ kɛ̍ndɛ̄ kɛ̍ndɔ᷄ŋ ŋ̄ nɔ̄ mī ŋ̄ wa̍ lūsu̍llo̍ le̍ ma̍āŋ nda̍ lūām nyɛ᷅m chūŋ kɛ̄ndɔ᷄ŋ lēchōo̍ wo̍ tōōsīa̍a̍ yɛ̍. O̍ ko̍ŋ kɔ̍ɔ̍lī, mbo̍ chɔ̄m ndu̍ vɛ̄lɛ̄ mɛ̄ɛ̍ kpɛ̍ ko̍o̍līi̍yo̍ŋ ŋ̄ nɔ̄ mī ŋ̄ wa̍ lūsu̍llo̍ le̍ nyāā lākūmba᷅ŋnda̍ tōōsīa̍a̍ yɛ̍, nyāā lākūmba᷅ŋāā kūmba᷅ŋndā ndāla̍ŋ lā nɔ̄ mī lā wa̍ lā pɛ̄ɛ̄ŋgāā o̍ kɔ̍fū kpe̍ma̍ Mɛ̄lɛ̄ka̍a̍ chōo̍ wa̍.

¹⁹Mi̍ Māsā Bɛ̍ndōo̍ Dēēve̍ lo᷅ o̍ ko̍ŋ mbo̍ dīmūl Sɔ̍lɔ̍mɔ̄ŋ po̍ ndɔ̄ āā, “Nyɛ̄ o̍ nyɛ̄ ya̍ I̍ ke̍ nu̍m mbo̍ wā ō tūūlīāā o̍ yāu̍ chōo̍, Mɛ̄lɛ̄ka̍ Ya̍a̍wɛ̄ɛ̄ pi̍la̍ chɔ̍m ya̍ ni̍ māā I̍ tu̍u̍li̍a̍a̍ ndu̍ le̍nde̍.”

²⁰O̍ ko̍ŋ kɔ̍ɔ̍lī, mi̍ Dēēve̍ dīmūl Sɔ̍lɔ̍mɔ̄ŋ āā, “Wa̍ a̍ dīāllūŋ kālā, mā nɔ̄ kɔ̄l sīmūlāa̍, mā to̍sa̍ wa̍llo̍ ho̍ō. Yɔ̍ŋ īsīōōŋ kɛ̄lɛ̄ŋgāā mī kɔ̄l hīīlu̍ŋ nu̍m te̍. Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nūu̍, ō chō a̍ nūm la̍tu̍lu̍ ha̍a̍a̍ mī chīɛ̍i̍ Mɛ̄lɛ̄ka̍a̍ ho̍ō ō chūū tāŋgūl. Ndu̍yɛ̍ ō cho̍ nu̍m hūī le̍, kɛ̄lɛ̄ŋgāā mbō kɛ̄ɛ̍ nu̍m.

²¹Le̍la̍ŋ, wānāa̍ sōlīāā lāsa̍lāa̍ ni̍, a̍ Li̍va̍īya̍, nda̍ fa̍ū ā chō wā wa̍llo̍ o̍ chīɛ̍i̍ Mɛ̄lɛ̄ka̍a̍ ni᷄ŋ. Ndu̍yɛ̍ a̍ nɔ̍ tāāsi̍o̍o̍ le̍ wa̍lta̍ yɛ̍ yɛ̍la̍ŋ tōsāa̍ wa̍ ā wā ni̍ŋ a̍ yēēmɛ̍i̍ ta̍u̍ le̍ nu̍m tāŋgūllo̍ ho̍ō mālāa̍. Ndu̍yɛ̍ wānāā bɛ̄ndūa̍a̍ a̍ wāŋnda̍ kpo̍u̍, a̍ tūɛ̄ī ni̍ŋ nu̍m di̍ōm, ndu̍yɛ̍ mā wa̍ nu̍m o̍ bā bɛ̄ŋgu̍.”