Read Southern Kisi Ko̍lo̍ni̍kō Tāso̍o̍ 29 Bible Online

Ko̍lo̍ni̍kō Tāso̍o̍ 29 - Southern Kisi bible

Ko̍lo̍ni̍kō Tāso̍o̍ 29

¹O̍ ko̍ŋ kɔ̍ɔ̍lī, mi̍ Māsā Bɛ̍ndōo̍ Dēēve̍ ō di̍mūl I̍sɔ̄lūɛ̍i̍ya̍a̍ chu̍u̍ŋgi̍āŋ na̍a̍ pi᷅lɛ̍ wa̍ kpo̍u̍ āā, “Sɔ̍lɔ̍mɔ̄ŋ po̍ ni̍, Mɛ̄lɛ̄ka̍ hɛ̄li̍ ndu̍ kɛ̍, ō chō wɔ̄ chūāāmbɔ̄, ndu̍yɛ̍ ō nɔ̍ wɔ̍ ta̍āsi̍ bɔ̍ɔ̍ le̍. Wa̍li̍ o̍ nɔ̍ le̍ tōsāa̍ wo̍ ō chō bɔ̄ɔ̍. Ndu̍yɛ̍ chīɛ̄ī lēmāsā o̍ cho̍ hūnɔ̄ɔ̄ tāŋgūllo̍, ō cho̍ wa̍ le̍ wāna̍ chīe̍e̍ le̍, le̍ Mɛ̄lɛ̄ka̍ Ya̍a̍wɛ̄ɛ̄ o̍ wa᷅ ni̍ŋ ni̍.

²Le̍la̍ŋ, I̍ chu̍u̍ŋgi̍a̍a̍ nyɛ̄m tāŋgūla᷄ŋ nāa̍ pi᷅lɛ̍ le̍ chīɛ̍i̍ Mɛ̄lɛ̄ka̍ nūu̍ tāŋgūllo̍. I̍ chu̍u̍ŋgi̍a̍a̍ ko̍o̍līi̍yo̍ŋ le̍ nyɛ̍m nɔ̍ mī ŋ̄ wa̍ ŋ̄ tōōsīa̍ŋ a̍ ko̍o̍līi̍yo̍ŋ ndo̍ŋ tōōsīa̍a̍, mi̍ chu̍u̍ŋgīāā ka̍ni̍ŋ hu̍mbo᷄ŋ le̍ nyɛ̍m nɔ̍ mī ŋ̄ wa̍ ŋ̄ tōōsīa̍ŋ a̍ ka̍ni̍ŋ hu̍mbo᷄ŋ ndo̍ŋ, a̍ chīli̍ŋu̍ŋ būlɔ᷄ŋsīi̍yo̍ŋ, le̍ nyɛ̍m nɔ̍ mī ŋ̄ wa̍ ŋ̄ tōōsīāā a̍ chīli̍ŋu̍ŋ būlɔ̍ŋsīi̍yo̍ŋ ndo̍ŋ, a̍ chīli̍ŋndo̍ŋ le̍ nyɛ̍m nɔ̍ mī ŋ̄ wa̍ ŋ̄ tōōsīāā a̍ chīli̍ŋndo̍ŋ ndo̍ŋ, a̍ yɔ̄mnde̍, le̍ nyɛ̍m nɔ̍ mī ŋ̄ wa̍ ŋ̄ tōōsīāā a̍ yɔ̄mnde̍ wo̍ŋ. Ndu̍yɛ̍ mi̍ chu̍u̍ŋgīāā vɛ̄lɛ̄ pōūtā ba̍ā kālālā yɛ̍ yɛ̍la̍ che̍le̍ŋ, ɔ̍nɛ̍sī, a̍ Tu̍ku̍ɛ̍i̍sī, a̍ pōūtā ba̍ā kālāla̍ nɔ̍ kɔ̄ɔ̍le̍ yɛ̍ yɛ̍ le̍ŋ nda̍ŋ, a̍ pōūtā ba̍ā kālālā yɛ̍ yɛ̍la̍ che̍le̍ŋ kpo̍u̍, a̍ ma̍bōi̍la̍ŋ.

³Ō fūla̍ wɔ̍ bɛ̍ɛ̍ o̍ nyɛ̄m ya̍ I̍ chu̍u̍ŋgi̍a̍a̍ mu᷅ŋ ndo̍ŋ kɔ̍ɔ̍lī, ko̍o̍līi̍yo̍ŋ, a̍ ka̍ni̍ŋ hu̍mbū ya̍ pi̍la̍ I̍ nɔ̍ wo̍ŋ, mi̍ I̍ yɔ̍ŋgū ŋ̄ ti᷄ŋ le̍ kāālāa̍ chɔ̄mndo̍ le̍ chīɛ̍i̍ Mɛ̄lɛ̄ka̍a̍ ho̍ō tāŋgūllo̍.

⁴Mi̍ yɔ̍ŋgū ko̍o̍līi̍ŋ di̍a̍nda᷄ŋ ŋ̄ nda̍ tōōsi̍a̍a̍ a̍ O̍fɛ̄ɛ̄ wo̍ŋ, pa᷅ŋnda̍ŋ wāa̍la̍ŋ lā yāa̍ (3,000) a̍ ka̍ni̍ŋ hu̍mbo᷄ŋ ŋ̄ dīānda᷄ŋ, pa᷅ŋnda̍ŋ wāa̍la̍ŋ lā ŋɔ᷄mmɛ̍ū (7,000) ŋ̄ nda̍ tōōsi̍a̍a̍ a̍ O̍fɛ̄ɛ̄ wo̍ŋ le̍ mā tēēŋgi̍a̍a̍ mu̍ŋ, mā sūū mu̍ŋ o̍ chīɛ̍i̍ Mɛ̄lɛ̄ka̍a̍ le̍ ndu̍ nɛ̄ŋīo̍o̍.

⁵Ndu̍yɛ̍ vɛ̄lɛ̄, le̍ mī wānāa̍ cha̍ā nyɔ̍ɔ̍ŋ tōōsīa̍a̍ a̍ lābā wa̍ ā tōōsi̍a̍a̍ nyɛ̍m nɔ̍ le̍ wāa̍ a̍ ko̍o̍līi̍yo̍ŋ ndo̍ŋ, a̍ ko̍o̍līi̍yo̍ŋ, mā tōōsi̍a̍a̍ vɛ̄lɛ̄ nyɛ̍m nɔ̍ le̍ wa̍a̍ a̍ ka̍ni̍ŋ hu̍mbo᷄ŋ ndo̍ŋ, a̍ ka̍ni̍ŋ hu̍mbo᷄ŋ.” O̍ ko̍ŋ kɔ̍ɔ̍lī, mi̍ Dēēve̍ nyu̍na̍ āā, “Ō fāŋa̍ŋ o̍ ya̍ kɔ̍ɔ̍lī, wānā che᷅le̍ŋ o̍ cho̍ na̍nu᷄ŋ mbō nɔ̍ yēēmɛ̍i̍ mbō ke̍ Mɛ̄lɛ̄ka̍ Ya̍a̍wɛ̄ɛ̄ a̍ kɔ̄l ndɔ̄ɔ̍ kpo̍u̍ pa̍a̍le̍ hāūle̍ŋ nde᷅ŋ?”

⁶Mɛ̄ɛ̍ Dēēve̍ o̍ chi̍i̍ sūɛ̍i̍, mi̍ wānāa̍ wa̍ bōlle̍ o̍ yu̍ŋgu̍la̍ fi̍nyāā nda̍ a̍a̍ chōo̍ wa̍, a̍ wānāa̍ wa̍ yu̍ŋgu̍la̍ŋ I̍sɔ̄lūɛ̄ī bōlle̍ wa̍, a̍ wānāā bɛ̄ndūa̍a̍ wa̍ pūa̍a̍ chɔ̄ūwa̍ bōlle̍ wāa̍la̍ŋ a̍ kɛ̄mɛ̄la̍ŋ nda̍, a̍ wānāa̍ wa̍ wa̍li̍ Māsā Bɛ̍ndōo̍ chīla̍ŋ nda̍ bɛ̍ɛ̍, ma̍ yɔ̄ŋgu̍ kēlā nda̍la̍ŋ ā kɔ̄l tā ndāla̍ŋ kpo̍u̍.

⁷Nyɛ̄m nda̍ yɔ̄ŋgu̍ le̍ wa̍li̍ chīɛ̍i̍ Mɛ̄lɛ̄ka̍a̍ wo̍ŋ, cho̍ mu᷅ŋ ni̍. Ko̍o̍līi̍yo̍ŋ, ku̍ndāa̍ ō pīlɛ̍ ō wa̍ pa᷅ŋnda̍ŋ wāa̍la̍ŋ lā ŋūɛ̍ɛ̍nu̍ (5,000), a̍ ku̍ndāa̍ ō pīlɔ̄ɔ̍ pa᷅ŋnda̍ŋ wāa̍la̍ŋ tɔ̍ (10,000). Ka̍ni̍ŋ hu̍mbo᷄ŋ ŋ̄ wa̍ pa᷅ŋnda̍ŋ wāa̍la̍ŋ tɔ̍ (10,000), būlɔ᷄ŋsīi̍yo̍ŋ ŋ̄ wa̍ pa᷅ŋnda̍ŋ wāa̍la̍ŋ tɔ̍ a̍ lā ŋɔ̄ma̍a̍ (18,000), a̍ chīli̍ŋndo̍ŋ pa᷅ŋnda̍ŋ kɛ̄mɛ̄ (100).

⁸O̍ ko̍ŋ kɔ̍ɔ̍lī, wānā o̍ wānā ndu̍ o̍o̍ nɔ̍ pōūtā ba̍ā kālā la̍ŋ, ma̍ yɔ̄ŋgū la̍ŋ nāa̍ nda̍ kɛ̄sī ka̍ni̍o̍ŋ o̍ chīɛ̍i̍ Mɛ̄lɛ̄ka̍a̍ Ya̍a̍wɛ̄ɛ̄ wo̍ ni᷄ŋ nda̍, mi̍ Chɛ̍yɛ̄ɛ̄, wānā wa̍ā Kɛ̍sīɔ̄ŋ, mi̍ ndu̍ wa̍ mu̍ŋ māndāa̍.

⁹O̍ ko̍ŋ, mi̍ wāŋnda̍ ha̍ā nāŋ kɔ̄l, kāni̍ fo̍ndōle̍ le̍, mɛ̄ɛ̍ wānāā ndāā ba̍nāa̍ yɔ̄ŋgu̍ kēlā ndāla̍ŋ a̍ kɔ̄l tā hīnīāā la̍ŋ le̍ wa̍li̍ Mɛ̄lɛ̄ka̍ Ya̍a̍wɛ̄ɛ̄ wo̍ yɛ̍. Māsā Bɛ̍ndōo̍ Dēēve̍ bɛ̍ɛ̍ mbo̍ dūāūnu᷄ŋ nya̍a̍le̍ ta̍u̍ ta̍u̍ le̍ nyɛ̄ wāŋnda̍ ha̍ā ā tōsa̍ wo̍.

¹⁰O̍ ko̍ŋ kɔ̍ɔ̍lī, mi̍ Dēēve̍ sāŋgālā Mɛ̄lɛ̄ka̍ Ya̍a̍wɛ̄ɛ̄ wānāa̍ wa̍ ā chūūŋgi̍āŋ nda̍ kpo̍u̍ o̍ hɔ̄l, mbo̍ di̍mī āā, “I̍ sa̍ŋga̍la̍ nu̍m Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍, le̍ fɛ̍ɛ̍ŋ a̍ fɛ̍ɛ̍ŋ.

¹¹Nu᷄m cho̍ Mɛ̄lɛ̄ka̍ Kpu̍ŋgūlu̍ma̍a̍ ni̍, ndu̍yɛ̍ ma̍ nɔ̄ kpāāyāa̍, a̍ nāŋɔ̄ɔ̍ bɛ̄ndōo̍. Nu᷄m cho̍ wānā ya̍māa̍ ni̍, ndu̍yɛ̍ māsāle̍ nu̍mnde̍ŋ lē nɔ̍ la̍mɛ̍ɛ̍lu̍ le̍. Nyɛ̄ o̍ nyɛ̄ cho̍ o̍ fo̍ndāŋ nūmndo̍ a̍ chi̍e̍ēŋ na̍nu᷄ŋ nu᷄m nɔ̍ ni̍. Wa̍ ni̍ko̍ ma̍sāa̍ ŋ̄wāŋndā chīe̍e̍ cho̍o̍ kpo̍u̍, ndu̍yɛ̍ mā wa̍ māsā nyɛ̄ o̍ nyɛ̄ fɔ̍ cho̍o̍.

¹²Sūllo̍ a̍ bɛ̄ɛ̄le̍ŋ o̍ nūmndo̍ ŋ̍ fu̍la̍ ni̍. Ndu̍yɛ̍ ma̍ wā māsā mu̍ŋ chōo̍ kpo̍u̍. Nu᷄m nɔ̍ kpāāyāa̍ o̍ bā ni̍ a̍ dīāllūŋ kāla᷄ŋ. Ndu̍yɛ̍ nu̍m o̍ bā kpāāyāa̍ a̍ di̍a̍llūŋ kāla᷄ŋ ŋ̄ fūla̍ le̍ wānā o̍ wānā ni̍.

¹³Le̍la̍ŋ ŋ̄ me̍l nu̍m ba̍li̍ka̍ mi̍ ŋ̄ sāŋgālā dīōlā nūm nda̍ di̍a̍ndāā la̍ŋ, Mɛ̄lɛ̄ka̍ nāa̍.

¹⁴“Kɛ̍ wāna̍ māāvɛ̄ɛ̍nɛ̍ ya̍ I̍ cho̍ yɛ̍, ndu̍yɛ̍ wānāā māāvɛ̄ɛ̄ wānāā nīa̍a̍ a̍ chō yɛ̍, le̍ mī ŋ̄ yɔ̄ŋgu̍ ke̍la̍ nāā la̍ŋ a̍ kɔ̄l hīnīāā o̍ nu̍mndo̍? Kāni̍ fu̍u̍le̍, nyɛ̄ o̍ nyɛ̄ nāa̍ ŋ̄ ke̍ nu̍m, nu̍m o̍ bā ŋ̍ fu̍la̍ ni̍.

¹⁵Na̍a̍ na̍a̍, mīālla̍ ɔ̄ɔ̄, wānāā lēkāa̍wa̍ na̍a̍ ŋ̄ chō nu̍m o̍ hɔ̄l ni̍. Le̍ te̍le̍ŋ bi̍ŋgī ko̍ni̍ na̍a̍ ŋ̄ chō o̍ chi̍e̍ēŋndo̍ ho̍ō chōo̍ ni̍. Mɛ̄ɛ̍ fi̍nyāā nāā ma̍māa̍ ā wa̍ nu̍m o̍ hɔ̄l māā lāmīāl le̍ te̍le̍ŋ bi̍ŋgī yɛ̍ ko̍ni̍ na̍a̍ ŋ̄ chō ni̍. Pālɛ̍i̍ nɛ̄i̍ o̍ chi̍e̍ēŋndo̍ ho̍ō chōo̍, ī chō ko̍ mɛ̄ɛ̍ wūndu̍le̍ nyɔ̄ɔ̍ lē fūlā nu̍a̍ā o̍ lēpīlɛ̍ ni᷄ŋ mī le̍ lo̍ pɛ̍ yɛ̍ i̍ cho̍ ni̍.

¹⁶O̍o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍, ŋ̄ hīŋ a̍ nyɔ̄ɔ̍ŋ ta̍u̍ le̍ mī ŋ̄ tāŋgu̍l chīɛ̄īyo̍ le̍ mī ŋ̄ ke̍ dīōlā nūmnda̍ŋ bɛ̄ɛ̄le̍ŋ, kɛ̍ ō chō bɛ̍ɛ̍ le̍nde̍ ni̍, nyɔ̄ɔ̍ŋ mu᷅ŋ kpo̍u̍ nu̍m o̍ bā ŋ̄ fu̍la̍ ni̍, ndu̍yɛ̍ nu᷄m nɔ̍ mu̍ŋ ni̍.

¹⁷Ndu̍yɛ̍ nūm Mɛ̄lɛ̄ka̍ nūu̍, I̍ si̍nā māā nūm Mɛ̄lɛ̄ka̍ kɔ̄l lo̍ ŋ̄ tōfā wāŋndo̍ ni̍, ndu̍yɛ̍ mā na̍ŋ kɔ̄l a̍ wānā ko̍ŋ le̍ sa̍kpōyɛ̍ī ndūɛ̍i̍. Le̍ mɛ̄ɛ̍ kɔ̄l nūu̍ ō chō sa̍kpō yɛ̍, le̍la̍ŋ ya̍ I̍ yɔ̍ŋgu̍ nyɔ̄ɔ̍ŋ mu̍ŋ kpo̍u̍ a̍ kɔ̄l chɛ̄lāa̍ le̍ wa̍li̍ nu̍mndo̍ ni̍. Le̍la̍ŋ I̍ chē wānāā nīa̍a̍ a̍ cho̍ hāū na̍nu᷄ŋ nda̍, ma̍ wā kēla̍ ndāla̍ŋ yɔ̄ŋgōo̍ a̍ kɔ̄l chɛ̄lāa̍, ndu̍yɛ̍ a̍ nya̍a̍lo̍o̍ nāa̍ nūm chu̍a̍.

¹⁸O̍o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ E̍bīlāha᷅mndo̍, a̍ Āa̍se̍, a̍ Che̍kɔ̍pū fi̍nyāā nāā ma̍māa̍, māa̍ hi̍o̍u̍ la̍chi̍ a̍ wānāā nūmnda̍ kpāāyāa̍ kīo̍o̍, a̍ yīya̍ŋ nda̍ kɛ̍ndɛ̄la̍ŋ nda̍ kīo̍o̍ o̍ kɔ̄l tā ndāla̍ŋ ni᷄ŋ, ndu̍yɛ̍ mā hīōū lāchī a̍ tīīnda᷄ŋndo̍ nɔ̄ɔ̍ o̍ nūm ni̍ŋ.

¹⁹Kɛ̍ Sɔ̍lɔ̍mɔ̄ŋ po̍ nī kɔ̄l o̍ bīī sāwāla̍ nu̍mnda̍ŋ ndo̍. O̍ ko̍ŋ kɔ̍ɔ̍lī, mbō tāŋgu̍l chīɛ̄ī ya̍ I̍ bɛ̍ɛ̍ndi̍a̍a̍ nyɔ̄ɔ̍ŋ kpo̍u̍ mi̍ I̍ ke̍ ndu̍ le̍ mbō tēŋgu̍l nūm ndo̍.”

²⁰O̍ ko̍ŋ kɔ̍ɔ̍lī, mi̍ Dēēve̍ mūli᷄ŋ o̍ I̍sɔ̄lūɛ̍i̍ya̍a̍ chu̍u̍ŋgi̍āŋ na̍a̍ pi᷅lɛ̍ wa̍ lo̍, mbo̍ dīmūl nda̍ āā, “Lā sāŋga̍la̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍.” O̍ ko̍ŋ mi̍ wāŋnda̍ kpo̍u̍ a̍ sāŋgālā Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ fi̍nyāā ndāa̍, ma̍ tūndū bōlle̍ le̍ Mɛ̄lɛ̄ka̍ Ya̍a̍wɛ̄ɛ̄, nda̍ māsā bɛ̍ndōo̍ bɛ̄ɛ̄le̍ŋ kīo̍o̍.

²¹Dīi̍mā ndɔ̄ɔ̍, ma̍ dīī nāūwa̍ wāa̍ ō pīlɛ̍ (1,000) a̍ sāa̍ fɔ̍ŋndu̍a̍a̍ wāa̍ ō pīlɛ̍ (1,000), a̍ sāā ko̍ndu̍a̍a̍ wāa̍ o̍ pīlɛ̍ (1,000), ma̍ sōlī sa̍lālā lūāmāāla̍ŋ, lātūlu̍ a̍ sa̍lālā mūɛ̄īmā kīle̍pīi̍ya̍ŋ, o̍ ko̍ŋ a̍ sa̍lālā chēle̍ŋ nda̍ŋ hɔ̍lɔ̄bi̍ le̍ I̍sɔ̄lūɛ̍i̍ya̍ kpo̍u̍.

²²O̍ ko̍ŋ kɔ̍ɔ̍lī, ma̍ di̍ā nyɛ̄ dīa̍a̍, ma̍ kōl mūɛ̄īya̍ŋ a̍ nya̍a̍lo̍o̍ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l pāa̍le̍ le̍ŋ. O̍ ko̍ŋ kɔ̍ɔ̍lī, ma̍ sīīŋgūū Sɔ̍lɔ̍mɔ̄ŋ, po̍ Dēēve̍ wo̍, Māsā Bɛ̍ndōo̍ te̍le̍ŋ di̍i̍ŋ ndɔ̄ɔ̍ vɛ̄lɛ̄. O̍ ko̍ŋ kɔ̍ɔ̍lī, ma̍ sūēī ndu̍ chūɛ̄īya̍ŋ ma̍ sīīŋgūū ndu̍ po̍ māsā bɛ̄ndōo̍ le̍ Mɛ̄lɛ̄ka̍ Ya̍a̍wɛ̄ɛ̄. O̍ ko̍ŋ, mi̍ Sa̍dɔ̍kī ndu̍ si̍mnu᷄ŋ wāna̍ sōlīāā lāsa̍lāa̍ o̍ Mɛ̄lɛ̄ka̍ lo̍.

²³O̍ ko̍ŋ kɔ̍ɔ̍lī, mi̍ Sɔ̍lɔ̍mɔ̄ŋ o̍ mi̍i̍ŋgū o̍ kpe̍ŋgbe̍i̍ lēmāsa̍ fi̍nyā ndɔ̄ wo̍ chōo̍. Mbo̍ sīmnu᷄ŋ ma̍sā bɛ̍ndōo̍ I̍sɔ̄lūɛ̄ī kpo̍u̍. Ndu̍yɛ̍ mi̍ māsāle̍ ndɔ̄le̍ŋ lē sɔ̄lā hīōūwɔ̄ɔ̄ lāchīo̍o̍ ta̍u̍ ta̍u̍. Ndu̍yɛ̍ mi̍ I̍sɔ̄lūɛ̍i̍ya̍ kpo̍u̍ a̍ tu̍ɛ̍ī ndu̍ dīōm.

²⁴Lāŋgba̍ā kāla̍ I̍sɔ̄lūɛ̄ī kpo̍u̍, a̍ so̍vɛ̄i̍ya̍a̍ dīāllūŋ kālāa̍, o̍ ko̍ŋ kɔ̍ɔ̍lī, a̍ pūa̍a̍ māsā bɛ̍ndōo̍ Dēēve̍ o̍ ve̍lū wa̍, ma̍ chɛ̄l māsāle̍ Māsā Bɛ̍ndōo̍ Sɔ̍lɔ̍mɔ̄ŋ nde̍ŋ.

²⁵O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ hēēlū Sɔ̍lɔ̍mɔ̄ŋ mbo̍ sīmnu᷄ŋ wāna̍ tɔ̍ɔ̍ I̍sɔ̄lūɛ̍i̍ya̍ kpo̍u̍ o̍ hɔ̄l, mbo̍ tōsā mi̍ māsāle̍ ndɔ̄le̍ŋ lē hīāū lēmāsā o̍ lēmāsā le̍ē ke̍e̍ku̍ ni᷅ŋ I̍sɔ̄lūɛ̄ī.

²⁶Dēēve̍, po̍ Chɛ̄ɛ̍se̍ wo̍, ndu̍ wa̍ māsāa̍ lɛ̄ŋndē I̍sɔ̄lūɛ̍i̍le̍ŋ kpo̍u̍ chōo̍ ni̍.

²⁷Mbo̍ tōsa̍ māsāle̍ŋ lɛ̄ŋnde̍ I̍sɔ̄lūɛ̍i̍le̍ŋ chōo̍ le̍ wɔ̄sīla̍ŋ be̍le̍-hi̍ɔ̍ɔ̍lu̍ (40). Ō chīi̍ wɔ̄sīla̍ŋ lā ŋɔ᷄mmɛ̍ū Hi̍būlɔ̄ŋ chīe̍e̍, o̍ ko̍ŋ kɔ̍ɔ̍lī, mbo̍ chīī wɔ̄sīla̍ŋ be̍le̍-ya̍a̍ a̍ lā yāa̍ (33) Chūlu̍sɛ̄lɛ̄m chīe̍e̍.

²⁸Ndu̍yɛ̍, mi̍ Dēēve̍ yu̍wā nyɛ̄ kɛ̄ndɛ̄ ku̍dɛ̄ɛ̄ ma̍lāŋ o̍ wu᷅. A̍ te̍le̍ŋ o̍ wa̍ māsāa̍ wo̍, mbo̍ sūl, ndu̍yɛ̍ mbo̍ pīā lābā cha̍cha̍, mbo̍ sɔ̄lā bɛ̄ɛ̄le̍ŋ. O̍ ko̍ŋ kɔ̍ɔ̍lī, mi̍ Sɔ̍lɔ̍mɔ̄ŋ po̍ ndɔ̄ o̍ mi̍i̍ŋgū māsāa̍ o̍ fōōfo̍ ndɔ̄ɔ̍.

²⁹Nyɛ̄ o̍ nyɛ̄ cho̍ a̍ Māsā Bɛ̍ndōo̍ Dēēve̍ o̍kɔ̄ɔ̄, chɔ̍ŋ o̍ kāndɔ᷄ŋndo̍ mbo̍ fūūlūū o̍ mɛ̄ɛ̄lu̍la̍ŋ, ō chō ō pōōnyīāā o̍ yāu̍la̍ wānāa̍ su̍a̍ā le̍ Mɛ̄lɛ̄ka̍ wa̍ ni᷄ŋ. Nda̍ yɔ̍nūŋ ni̍ māā, Sa̍a̍mi̍ɛ̍ɛ̄, a̍ Ne̍tāŋ, a̍ Ka̍a̍dī.

³⁰Sɔ̄ɔ̍ŋ cho̍ ŋ̄ pōōnyīāā o̍ yāu̍la̍ la̍ŋ ni᷄ŋ ndo̍ŋ, mi̍ ŋ̄ sūāā a̍ māsāle̍ ndɔ̄le̍ŋ o̍kɔ̄ɔ̄. Mi̍ ŋ̄ sūāā vɛ̄lɛ̄ mɛ̄ɛ̍ o̍ wa̍ māsa̍ kpāāyā bɛ̍ndū yɛ̍. O̍ ko̍ŋ kɔ̍ɔ̍lī, mi̍ ŋ̄ sūāā vɛ̄lɛ̄ a̍ nyɛ̄ o̍ nyɛ̍ yɔ̍nu̍ŋ ndu̍ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ, ndu̍yɛ̍ a̍ māsɛ̄ī ī pīlɛ̍i̍ o̍ lɛ̄ŋīī chēle̍ŋ ni᷄ŋ.