Read Southern Kisi Ko̍lo̍ni̍kō Tāso̍o̍ 5 Bible Online

Ko̍lo̍ni̍kō Tāso̍o̍ 5 - Southern Kisi bible

Ko̍lo̍ni̍kō Tāso̍o̍ 5

¹Lūbɛ᷅ŋ wa̍ po̍ tāse̍ Che̍kɔ̍pū wo̍ ni̍. Kɛ̍, mi̍ Lūbɛ᷅ŋ su̍u̍nda̍ a̍ la̍nɔ̍ pɔ̍mbɔ̄ fi̍nyā ndɔ̄ wo̍ ō pīlɔ̍ɔ̍, le̍ he̍ī mi̍ di̍ ndu̍ o̍o̍ nɔ̍ māā po̍ tāse̍ wo̍ ō hīālu᷄ŋ ndu̍, mi̍ di̍ ko̍ŋ ō wā ni᷅ŋ ō kēna᷄ŋ pu̍a̍a̍ Chōo̍sɛ̍ wa̍, Che̍kɔ̍pū po̍ ndɔ̄ɔ̍ ō pīlɔ̍ɔ̍. Le̍ sūɛ̍i̍ wɔ̍ɔ̍ŋīī Lūbɛ᷅ŋ to̍sa̍ ke̍ŋ a̍ la̍nɔ̍ɔ̍ fi̍nyā ndɔ̄ ve̍, di̍ po̍ ītāse̍ya̍ ndo̍ o̍o̍ nɔ̍ o̍ yu̍ŋgu̍ ndāa̍ chōo̍ wo̍, mi̍ di̍ ko̍ŋ ō hīālu᷄ŋ ndu̍.

²O̍ ko̍ŋ, mi̍ wānāa̍ fu̍la̍ o̍ pūlāle̍ Chu̍dāle̍ŋ chōo̍ wa̍, ā sīmnu᷄ŋ wānāā kpāāyā bɛ̍ndū pɔ̄mbūāā ndāa̍ chōo̍. Ndu̍yɛ̍ o̍ pūlāle̍ nda̍le̍ŋ chōo̍ Māsā Bɛ̍ndōo̍ le̍ yu̍ŋgu̍ Che̍kɔ̍pū wo̍ kpo̍u̍ o̍ fūla̍ ni̍. Kɛ̍ ndu̍yɛ̍, mi̍ chē bɛ̍ɛ̍ mi̍ wānā bɛ̍ndōo̍ ō fūlā o̍ pūlāle̍ ndāle̍ŋ chōo̍ ni̍, kɛ̍ di̍ po̍ tāse̍ya̍a̍ ndu̍, mbo̍ wā ō kēna᷄ŋ Chōo̍sɛ̍.

³Lūbɛ᷅ŋ, po̍ tāse̍ Che̍kɔ̍pū wo̍, ndu̍ o̍o̍ ve̍lū pūa̍a̍ ā hīɔ̍ɔ̍lu̍, pūa̍a̍ ka̍ŋ nda̍ cho̍ ha̍ā ni̍, Ha̍nɔ̍kī, a̍ Pa̍lū, a̍ Hɛ̍sɔ̍lɔ̄ŋ, a̍ Ka̍a̍mī.

⁴Po̍ pi᷅lɛ̍ wa̍ dīōla̍ŋ āā Cho̍wɛ̄ɛ̄, mbo̍ vīālū pōo̍ dīōla̍ŋ āā Sīɛ̄ma̍yā. Mɛ̄ɛ̍ Sīɛ̄ma̍yā ko̍ŋ ndu̍ ve̍lū Kɔ̍kī ni̍. Kɔ̍kī ndu̍ ve̍lū Si̍mɛ̄ī ni̍.

⁵Si̍mɛ̄ī ndu̍ ve̍lū Ma̍kāl ni̍, Mi̍kāā ndu̍ ve̍lū Lu̍ɛ̍yāā ni̍, Lu̍ɛ̍yāā ndu̍ ve̍lū Bāāl ni̍,

⁶Ba̍a̍l ndu̍ ve̍lū Bɛ̍ɛ̍lūā ni̍. Bɛ̍lūā wo̍ ho̍ō yɛ̍, ndu̍ ndu̍ o̍o̍ wa̍ yu̍ŋgu̍ Lūbɛ᷅ŋ ndo̍ bōlle̍ŋ ni̍. Kɛ̍, mi̍ Tīkīlātī Pi̍lɛ̍sā, māsā bɛ̍ndōo̍ le̍ lɛ̄ŋndē Āsi̍i̍līāāle̍ŋ ndo̍ o̍ bi̍ī ndu̍ mbo̍ kūā a̍ ndu̍ o̍ bīyɔ̄ɔ̍ ni᷄ŋ.

⁷Bɛ̍lūā wo̍ ho̍ō, wānāa̍ fu̍la̍ o̍ pūlālē ndɔ̄le̍ŋ chōo̍ ma̍ wa̍ yu̍ŋgu̍la̍ ndāla̍ yɛ̍ yɛ̍la̍ŋ bōlle̍ŋ wa̍ nda̍ cho̍ ha̍ā lēpūlā ni̍. Chɛ̍yɛ̄ɛ̄, o̍ wa̍ māsāa̍ wo̍, a̍ Sɛ̄kāla̍yā,

⁸a̍ Bɛ̍lā, po̍ A̍sa̍sī wo̍. A̍sa̍sī ko̍ŋ ndu̍ ve̍lū Si̍ɛ̍mā ni̍. Si̍ɛ̍mā ndu̍ ve̍lū Cho̍wɛ̄ɛ̄ ni̍. Wānāa̍ fu̍la̍ ha̍ā o̍ pūlāle̍ Lūbɛ᷅ŋnde̍ŋ chōo̍ wa̍, fo̍ndāŋ nda̍ wa̍ īchāli̍ wo̍ ndu̍ cho̍ ho̍ō ni̍, chɔ̍ŋ A̍lo̍yā chīe̍e̍, mbo̍ kūā a̍ Ni̍bɔ̄ kūmbū bā lūāŋ ndo̍, mbo̍ fūūlūū Bāāl Mīɔ̄ŋ di̍.

⁹Wāŋnda̍ ha̍ā ā ti᷄ŋ ā wa̍ vɛ̄lɛ̄ īchāli̍ ba᷅ pāa̍le̍ŋ lē chāŋ ndo̍ chɔ̍ŋ le̍nde̍ a̍ lɛ̄ŋndē po̍lte̍ŋ hōlnɔ᷄ŋ ndo̍ mbo̍ kūā le̍nde̍ kɛ᷅ a̍ Pēē Bɛ̍ndōo̍ Yūfi̍lu̍a̍tīī, kāni̍ fo̍ndōle̍ bōōndi̍i̍ nda̍ wa̍ ō lɛ̄ŋnde̍ Ki̍li̍a̍a̍dīle̍ŋ ni᷄ŋ nde̍ mi̍ chɔ̄lūāā ndāa̍ ā kūī kūīyo̍ pīla̍.

¹⁰Bōōndi̍i̍ Sɔ̍ɔ̄ o̍ wa̍ Māsā Bɛ̍ndōo̍ le̍ I̍sɔ̄lūɛ̄ī ye̍, mi̍ yu̍ŋgu̍ Lūbɛ᷅ŋ ndo̍ a̍ kɔ̄ dēl Hākīlu̍a̍i̍tīi̍ya̍ chōo̍ a̍ chɔ̄ūwo̍, ndu̍yɛ̍ ma̍ yām Hākīlu̍a̍i̍tīi̍ya̍ ma̍ dīū nda̍ dīūwo̍ pīla̍. O̍ ko̍ŋ kɔ̍ɔ̍lī, ma̍ chālnu᷄ŋ o̍ fo̍ndāŋ wāŋnda̍ ha̍ā ā wa̍ īchāli̍ wo̍, o̍ lɛ̄ŋndē Ki̍li̍a̍a̍dīle̍ŋ ni᷄ŋ bā pāa̍le̍ŋ lē chāŋ ndo̍.

¹¹O̍ ko̍ŋ kɔ̍ɔ̍lī, mi̍ yu̍ŋgu̍ Ka̍a̍dī wo̍ nda̍ kɔ̍ cha᷅l o̍ būŋgɛ̄ī Ba̍a̍sīāŋ nde̍ ni᷄ŋ, o̍ būŋgɛ̄ī yu̍ŋgu̍ Lūbɛ᷅ŋ ndo̍ īkɛ̄i̍. Ndu̍yɛ̍ mi̍ būŋgɛ̄ī ndɛ̄i̍ ī kūā le̍nde̍ kɛ᷅ a̍ Sa̍lɛ̍kāā chīe̍e̍ ba᷅ pāa̍le̍ŋ lē chāŋndo̍.

¹²Cho̍wɛ̄ɛ̄ wa̍ māsāa̍ le̍ būŋgɛ̄ī Ba̍a̍sīāŋnde̍ ni̍. Wāna̍ wa̍ ndu̍ īkɛ̄i̍ o̍ lēmāsā wo̍ wa̍ Si̍a̍fām ni̍. Wānāā bɛ̄ndūa̍a̍ pīli̍a̍a̍ wa̍ Cha̍nāī nda̍ Si̍a̍fa̍tī ni̍.

¹³Wānāa̍ fu̍la̍ o̍ pūlāle̍ Ka̍a̍dī le̍ŋ chōo̍ ndu̍yɛ̍ ma̍ wā yu̍ŋgu̍la̍ yɛ̍ yɛ̍la̍ŋ bōlle̍ wa̍ ā pīli̍a̍a̍ nda̍ cho̍ ha̍ā lēpūlā ni̍. Ma̍i̍kɛ̄l, a̍ Mɛ̄si̍u̍lām, a̍ Si̍ɛ̍bā, a̍ Cho̍lāī, a̍ Cha̍kāŋ, a̍ Si̍a̍ā, a̍ Ɛ̍bɛ̍dī. Yu̍ŋgu̍la̍ wāŋnda̍ ha̍ā ā wa̍ bōlle̍ la̍ŋ lā wa̍ fa̍ū fa̍ū lā ŋɔ᷄mmɛ̍ū.

¹⁴Ndu̍yɛ̍ yu̍ŋgu̍la̍ ŋɔ̍mmɛ̍ū la̍ŋ nda᷅ŋ kpo̍u̍ o̍ pūlāle̍ A̍bi̍hēē le̍ŋ chōo̍ la̍ fu̍la̍ ni̍. A̍bi̍hēē ko̍ŋ yɛ̍, fi̍nyā ndɔ̍ wa̍ Hu̍lūī ni̍. Hu̍lūī yɛ̍ ndu̍ ve̍lū Cha̍lu̍o̍yā ni̍, Cha̍lu̍o̍yā ve̍lū Ki̍li̍a̍a̍dī ni̍, Ki̍li̍a̍a̍dī ve̍lū Ma̍i̍kɛ̄l ni̍, Ma̍i̍kɛ̄l ve̍lū Chɛ̄si̍sāī ni̍, Chɛ̄si̍sāī ve̍lū Cha̍a̍dō ni̍, Cha̍a̍dō ve̍lū Bu̍u̍sī ni̍.

¹⁵Po̍ pi᷅lɛ̍ wa̍ dīōla̍ŋ āā A̍hī, fi̍nyā ndɔ̍ dīōla̍ŋ āā, A̍bi̍dɛ̄ɛ̄, ndu̍ wa̍ yu̍ŋgu̍la̍ wāŋnda̍ ha̍ā kpo̍u̍ chi᷅la̍ŋ ni̍. A̍hī ko̍ŋ yɛ̍ fi̍nyā ndɔ̄ ma̍mā wa̍ Ku̍nī ni̍.

¹⁶Yu̍ŋgu̍la̍ fu̍la̍ o̍ pūlāle̍ Ka̍a̍dī le̍ŋ chōo̍ la̍ŋ, nda̍ wa̍ īchāli̍ o̍ būŋgɛ̄ī Ki̍li̍a̍a̍dī ve̍ ni᷄ŋ ni̍, a̍ o̍ būŋgɛ̄ī Ba̍a̍sīāŋnde̍ ni᷄ŋ ndu̍yɛ̍ a̍ sɔ̄ndɔ̄kɔ̍lta̍ ba̍lu̍ būŋgɛ̄ī Ba̍a̍sīāŋnde̍ la̍ŋ, lātūlu̍ a̍ fo̍ndāŋndā chɔ̄lūa̍a̍ ā kūā di̍o̍la̍ŋ o̍ būŋgɛ̄ī Si̍a̍lɔ̄ŋ nde̍ ni᷄ŋ nda̍ŋ.

¹⁷Bōōndi̍i̍ Cho̍tām o̍ wa̍ māsā bɛ̍ndōo̍ le̍ Chu̍dā, ndu̍yɛ̍ mi̍ Chɛ̄lōbo̍wām di̍i̍ŋ ndɔ̄ɔ̍ o̍ wa̍ māsāa̍ le̍ I̍sɔ̄lūɛ̄ī ye̍, a̍ bōōndi̍i̍ ke̍ŋ nda̍ pōōnyi̍a̍a̍ yu̍ŋgu̍la̍ŋ nda᷅ŋ dīōla̍ŋ a̍ lēpūlā kpɛ̍ kpɛ̍ ni̍.

¹⁸O̍ ko̍ŋ kɔ̍ɔ̍lī, yu̍ŋgu̍ Lūbɛ᷅ŋndo̍ ni̍, a̍ yu̍ŋgu̍ Ka̍a̍dī wo̍, a̍ yu̍ŋgu̍ Mānāa̍sē wo̍ tɛ̄ndāa̍ tɛ̄ɛ̄ŋ, nda̍ a̍a̍ nɔ̍ so̍vɛ̄i̍ya̍ wāa̍la̍ŋ be̍le̍-hi̍ɔ̍ɔ̍lu̍ a̍ lā hīɔ̍ɔ̍lu̍ a̍ kɛ̄mɔ̄ɔ̍ lē ŋɔ᷄mmɛ̍ū, a̍ ŋ̄wāŋ be̍le̍-ŋɔ̍mpu᷅m (44,760) ā nda̍ a̍a̍ pɛ̍ɛ̍ku̍ a̍ chɔ̄ūwo̍ o̍kɔ̄ɔ̄ mā sɔ̄ŋgā a̍ nyɛ̄lā kālā ka̍la̍ so̍vɛ̄i̍ya̍ ā sɔ̄ŋgā o̍ lābā māā bo̍o̍la̍ bɛ̍ndū le̍ nda̍ māndāa̍ ndu̍yɛ̍ mā sɔ̄ŋgā vɛ̍lɛ̄ a̍ mɔ̄ɔ̄ŋ fāŋndo̍ŋ, ndu̍yɛ̍ a̍ chīɔ̄ūla̍ŋ nda̍.

¹⁹Mi̍ yu̍ŋgu̍la̍ŋ nda᷅ŋ pūa̍a̍ ndāa̍ chɔ̄ūwa̍ ā kɔ̍ chi᷅ŋa̍la᷅ŋ Hākīlu̍a̍i̍tīi̍ya̍, ā wāŋnda̍ Chɛ̍tu̍lō, a̍ wāŋnda̍ Na̍fi̍i̍sī, a̍ ha̍ā Nɔ̍da̍bī a̍ sɔ̍ŋgɔ̄ɔ̍.

²⁰Bōōndi̍i̍ nda̍ wa̍ sɔ̍ŋgɔ̄ɔ̍ a̍ wāŋnda̍ ha̍ā ve̍, ma̍ pīɛ̄ī Mɛ̄lɛ̄ka̍ le̍ mbo̍ māla̍ nda̍ mā yēm. Ndu̍yɛ̍ le̍ tīīŋnda᷄ŋ nda̍ dɔ̄ū o̍ Mɛ̄lɛ̄ka̍ ni᷄ŋ ndo̍, mi̍ Mɛ̄lɛ̄ka̍ mūlī pīɛ̄īlē nda̍le̍ŋ, mbo̍ tōsā ma̍ yām Hākīlu̍a̍i̍tīi̍ya̍ a̍ wānāa̍ wa̍ nda̍ sɔ̍ŋgɔ̄ɔ̍ mālāa̍ wa̍.

²¹Mɛ̄ɛ̍ nda̍ yēm wāŋnda̍ ha̍ā a̍ chɔ̄ūwo̍, ma̍ bīū chɔ̄lūāā ndāa̍ ma̍ kūānu᷄ŋ a̍ nda̍. Chɔ̄lūāā kāŋ nda̍ cho̍ ha̍ā ni̍. Nyɔ̍mi̍a̍a̍ wa̍ wāa̍la̍ŋ be̍le̍-ŋu̍ɛ̍ɛ̍nu̍ (50,000), a̍ sāa̍ wāa̍la̍ŋ kɛ̄mɔ̄ɔ̍ lēdīi̍ŋ a̍ be̍le̍-ŋu̍ɛ̍ɛ̍nu̍ (250,000), a̍ sōfɛ̍li̍a̍a̍ wāa̍la̍ŋ lā tīɔ̍ɔ̍ŋ (2,000). O̍ ko̍ŋ kɔ̍ɔ̍lī, ma̍ bīī vɛ̄lɛ̄ wāŋndā chīe̍e̍ya̍ wāa̍la̍ŋ kɛ̄mɛ̄ (100,000) ma̍ kūā a̍ nda̍ o̍ bīyɔ̄ɔ̍ ni᷄ŋ.

²²Ma̍ dīū wānāā ka̍ka̍ o̍ chɔ̄ū kōŋ ni᷄ŋ, kāni̍ fo̍ndōle̍ Mɛ̄lɛ̄ka̍ pīla̍ kpe̍e̍kpe̍i̍ wa̍ sɔ̍ŋgɔ̄ɔ̍ le̍ nda̍ ni̍. O̍ ko̍ŋ kɔ̍ɔ̍lī, ma̍ hīāū lāchī a̍ cha᷄lle̍ o̍ būŋgɛ̄ī kēŋ ni᷄ŋ ha̍a̍a̍ mbo̍ bīī a̍ te̍le̍ŋ nda̍ kūɛ̄ a̍ wāŋnda̍ o̍ bīyɔ̄ɔ̍ ni᷄ŋ ndo̍.

²³Ndu̍yɛ̍, yu̍ŋgu̍ Mānāa̍sē wo̍ tɛ̄ndāa̍ tɛ̄ɛ̄ŋ ma̍ kūī kūīyo̍ pīla̍. Le̍ he̍ī, mi̍ nda̍ kɔ̍ cha᷅l o̍ būŋgɛ̄ī Ba̍a̍sīāŋ nde̍ ni᷄ŋ chɔ̍ŋ bā lūāŋndo̍ mbo̍ kūā Ba̍a̍l Hɛ̍mɔ̄ŋ, ndu̍yɛ̍ a̍ Sɛ̍nɛ̄ɛ̄, a̍ o̍ Pēmbīī Hɛ̍mɔ̄ŋ nde̍ di̍.

²⁴Ndu̍yɛ̍ wānāa̍ wa̍ yu̍ŋgu̍la̍ ndāla̍ŋ bōlle̍ wa̍ nda̍ cho̍ ha̍ā ni̍. Ɛ̍fāā, a̍ I̍sīī, a̍ I̍līɛ̄ɛ̄l, a̍ A̍si̍līɛ̄l, a̍ Chɛ̄lūīma̍yā, a̍ Hōda̍vīāā, a̍ Cha̍a̍dīɛ̄l. Pūa̍a̍ ha̍ā, ku̍u̍ba̍a̍ bɛ̍ndūa̍a̍ pīla̍ nda̍ wa̍ ni̍, ndu̍yɛ̍ ma̍ wa̍ vɛ̄lɛ̄ wānāā tɔ̍ɔ̍ a̍ bɛ̄ndū. Ndu̍yɛ̍, nda̍ wa̍ vɛ̄lɛ̄ yu̍ŋgu̍la̍ fi̍nyāā ndāa̍ bōlle̍ ni̍.

²⁵Kɛ̍, mi̍ wāŋnda̍ ha̍ā ā tōsā yɔ̄ŋ wɔ̄ɔ̍ŋndo̍ a̍ Mɛ̄lɛ̄ka̍ fi̍nyāā ndāā ma̍māa̍ nda̍ āā pīɛ̄īyo̍. Ma̍ mūli᷄ŋ mɛ̍lɛ̄ka̍ā chēle̍ŋ nda̍ pīɛ̄īyo̍, mɛ̄lɛ̄ka̍ā wāŋnda̍ o̍ lɛ̄ŋndē lēŋ ni᷄ŋ nda̍ a̍a̍ pi̍ɛ̍īya̍, wānāa̍ wa̍ nda̍ lāchī mi̍ Mɛ̄lɛ̄ka̍ tūāū nda̍ wa̍.

²⁶O̍ ko̍ŋ, mi̍ Mɛ̄lɛ̄ka̍ I̍sɔ̄lūɛ̍i̍ya̍ ō kē Pu᷅l, ō ndu̍ o̍o̍ nɔ̍ vɛ̄lɛ̄ dīōla̍ŋ āā, Tīkīlātī Pi̍lɛ̍sā, mbo̍ wā māsāa̍ A̍si̍i̍līāā wo̍ kpāāyāa̍, mbo̍ kɔ᷄ dēl yu̍ŋgu̍ Lūbɛ᷅ŋndo̍ chōo̍, a̍ yu̍ŋgu̍ Ka̍a̍dī wo̍, a̍ yu̍ŋgu̍ Mānāa̍sē wo̍ tɛ̄ndāa̍ tɛ̄ɛ̄ŋ a̍ sɔ̍ŋgɔ̍ɔ̍, ndu̍yɛ̍ mbo̍ bīī nda̍, mbo̍ kūā a̍ nda̍ o̍ bīyɔ̄ɔ̍ ni᷄ŋ o̍ būŋgɛ̄ī Ha̍lāāve̍ ni᷄ŋ, a̍ o̍ būŋgɛ̄ī Ha̍bɔ̄ɔ̄ ve̍ ni᷄ŋ, ndu̍yɛ̍ a̍ o̍ būŋgɛ̄ī Ha̍lūāā ve̍ ni᷄ŋ, a̍ o̍ Pīo̍o̍ Ko̍sāŋ hōlnɔ᷄ŋndo̍. Ndu̍yɛ̍ a̍ pāa̍le̍ hāūle̍ŋ nde᷅ŋ bɛ̍ɛ̍ ā chō wɔ̄ o̍ bīyɔ̄ɔ̍ ni᷄ŋ.