Read Southern Kisi Ko̍lo̍ni̍kō Tāso̍o̍ 7 Bible Online

Ko̍lo̍ni̍kō Tāso̍o̍ 7 - Southern Kisi bible

Ko̍lo̍ni̍kō Tāso̍o̍ 7

¹I̍sa̍a̍kā ndu̍ o̍o̍ ve̍lū pūa̍a̍ ā hīɔ̍ɔ̍lu̍. Pūa̍a̍ ka̍ŋ nda̍ cho̍ ha̍ā ni̍, To̍lā, a̍ Pu̍a̍ā, a̍ Cha̍si̍u̍bī, a̍ Si̍mi̍lɔ̄ŋ.

²To̍lā, po̍ I̍sa̍a̍kā wo̍ ō pīlɔ̍ɔ̍, ndu̍ o̍o̍ nɔ̍ pūa̍a̍ ā ŋɔ᷄mpu᷅m, pūa̍a̍ ka̍ŋ nda̍ cho̍ ha̍ā ni̍. Yu̍u̍sī, a̍ Lūɛ̄fa̍i̍yāā, a̍ Chɛ̍lu̍i̍yɛ̄, a̍ Cha̍māī, a̍ I̍bi̍sām, a̍ Si̍ɛ̍mūɛ̄l. Pūa̍a̍ ha̍ā nda̍ wa̍ yu̍ŋgu̍la̍ ndāla̍ŋ bōlle̍ fūlāa̍ o̍ pūlāle̍ To̍lā le̍ŋ chōo̍ ni̍. Ndu̍yɛ̍ vɛ̍lɛ̄ ā wā ku̍u̍ba̍a̍ tɔ̍wa̍a̍ bɛ̍ndū. A̍ bōōndi̍i̍ Dēēve̍ wa᷄ māsā bɛ̍ndōo̍ I̍sɔ̄lūɛ̄ī ye̍, pūa̍a̍ ku̍u̍ba̍a̍ fu̍la̍ o̍ pūlāle̍ To̍lā le̍ŋ chōo̍ wa̍, lātūlu̍ a̍ yu̍ŋgu̍la̍ ndāla̍ŋ ā wa̍ fa̍ū fa̍ū wāa̍la̍ŋ bi̍dīi̍ŋ, a̍ lā tīɔ̍ɔ̍ŋ, a̍ kɛ̄mɔ̄ɔ̍ lē ŋɔ᷄mpu᷅m (22,600).

³Yu̍u̍sī, po̍ To̍lā wo̍ ō pīlɔ̍ɔ̍, ndu̍ pōo̍ ō pīlɛ̍ kpe̍ ndu̍ o̍o̍ ve̍lū ni̍, dīōla̍ŋ āā Īsīlu̍a̍ha̍yā. Īsīlu̍a̍ha̍yā ko̍ŋ yɛ̍ ndu̍ ndu̍ o̍o̍ ve̍lū pūa̍a̍ ā hīɔ̍ɔ̍lu̍. Pūa̍a̍ ka̍ŋ nda̍ cho̍ ha̍ā ni̍, Ma̍i̍kɛ̄l, a̍ Ōbāda̍yā, a̍ Cho̍wɛ̄ɛ̄, a̍ Īsīha̍yā. Ndu̍yɛ̍ pūa̍a̍ ndūa̍a̍ ha̍ā kpo̍u̍, bōlīī lāyu̍ŋgu̍e̍i̍ nda̍ wa̍ o̍ yu̍ŋgu̍la̍ ndāla̍ŋ chōo̍ ni̍.

⁴Pūa̍a̍ Īsīlu̍a̍ha̍yā wa̍ ha̍ā, nda̍ a̍a̍ nɔ̍ lāāndūa̍a̍ ta̍u̍ ta̍u̍, ndu̍yɛ̍ ma̍ vīālū chūāūwa̍ ta̍u̍ a̍ nda̍. Mɛ̄ɛ̍ nyɛ̄ ko̍ŋ to̍sa̍ ni̍ ma̍ nɔ̍ pūa̍a̍ chɔ̄ūwa̍ wāa̍la̍ŋ be̍le̍-ya̍a̍ a̍ lā ŋɔ᷄mpu᷅m (36,000), fūlāa̍ o̍ pūlālē ndāle̍ŋ chōo̍.

⁵Mɛ̄ɛ̍ fa̍ū fa̍ū o̍ yu̍ŋgu̍ I̍sa̍a̍kā wo̍ chōo̍, nda̍ a̍a̍ nɔ̍ ku̍u̍ba̍a̍ chɔ̄ūwa̍ wāa̍la̍ŋ be̍le̍-ŋɔ̍ma̍a̍ a̍ lā ŋɔ᷄mmɛ̍ū (87,000), ā dīōlā ndāla̍ŋ lā wa̍ lā pōōnyīāā a̍ yu̍ŋgu̍la̍ ndāla̍ŋ kpɛ̍ kpɛ̍ wa̍.

⁶Bɛ̍ŋnja̍mīŋ ndu̍ o̍o̍ ve̍lū pūa̍a̍ ā yāa̍, nda̍ cho̍ ha̍ā ni̍. Bɛ̍lā, a̍ Bɛ̍chā, a̍ Chɛ̍di̍yāā.

⁷Bɛ̍lā, po̍ Bɛ̍ŋnja̍mīŋ ndo̍ ō pīlɔ̍ɔ̍, ndu̍ o̍o̍ ve̍lū pūa̍a̍ ā ŋūɛ̍ɛ̍nu̍, pūa̍a̍ ka̍ŋ nda̍ cho̍ ha̍ā ni̍. Ɛ̍si̍bɔ̄ŋ, a̍ Yu̍u̍sī, a̍ Yu̍sīɛ̄l, a̍ Chɛ̄lūīmo̍tī, a̍ I̍lūī. Ndu̍yɛ̍ pūa̍a̍ ha̍ā nda̍ wā yu̍ŋgu̍la̍ŋ ndāla̍ŋ chīla̍ŋ o̍ būŋgɛ̄ī kēŋ ni᷄ŋ ni̍. Ndu̍yɛ̍ vɛ̍lɛ̄, ā wa̍ so̍vɛ̄i̍ya̍a̍ tɔ̍ɔ̍wa̍a̍ bɛ̍ndū. Wānāa̍ fu̍la̍ o̍ pūlāle̍ ndā le̍ŋ chōo̍ wa̍ ā wa᷄ wāa̍la̍ŋ bi̍dīi̍ŋ a̍ lā tīɔ̍ɔ̍ŋ, a̍ ŋ̄wāŋ be̍le̍-ya̍a̍ a̍ ā hīɔ̍ɔ̍lu̍ (22,034). Nda̍ kpo̍u̍ ā wa᷄ ā bɛ̄ndāā le̍ kɔ̄l ā wāa̍ o̍ chɔ̄ū.

⁸O̍ ko̍ŋ kɔ̍ɔ̍lī, Bɛ̍chā, po̍ Bɛ̍ŋnja̍mīŋ ndo̍ ō pīlɔ̍ɔ̍, ndu̍ bɛ̍ɛ̍ ndu̍ o̍o̍ ve̍lū pūa̍a̍ ā ŋɔ̄ma̍hīɔ̍ɔ̍lu̍. Pūa̍a̍ ka̍ŋ nda̍ cho̍ ha̍ā ni̍, Sɛ̍mi̍lūāā, a̍ Cho̍wa̍sī, a̍ Ɛ̄li̍a̍a̍sā, a̍ Ɛ̄li̍o̍nāī, a̍ O̍mi̍lī, a̍ Chɛ̄lūīma̍yā, a̍ Ābi̍chā, a̍ A̍na̍tɔ̍tī, a̍ A̍li̍mɛ̍tī.

⁹Pūa̍a̍ chɔ̄ūwāā ku̍u̍ba̍a̍ fu̍la̍ o̍ yu̍ŋgu̍la̍ pūa̍a̍ ha̍ā chōo̍, ndu̍yɛ̍ ma̍ wā bōlīī lāyu̍ŋgu̍e̍i̍ o̍ yu̍ŋgu̍la̍ ndāla̍ŋ chōo̍ mi̍ dīōlā ndāla̍ŋ lā wā lā pōōnyīāā a̍ yu̍ŋgu̍la̍ nda̍la̍ŋ nda̍, ā wa᷄ fa̍ū fa̍ū wāa̍la̍ŋ bi̍dīi̍ŋ, a̍ kɛ̄mɔ̄ɔ̍ lē dīi̍ŋ (20,200). Nda̍ kpo̍u̍ ā wa̍ ā bɛ̄ndāā le̍ kɔ̄l ā wāā o̍ chɔ̄ū.

¹⁰Chɛ̍di̍yāā, po̍ Bɛ̍ŋnja̍mīŋ ndo̍ ō pīlɔ̍ɔ̍ ndu̍ ndu̍ o̍o̍ ve̍lū pōo̍ ō pīlɛ̍, dīōla̍ŋ āā, Bi̍li̍hāŋ. Bi̍li̍hāŋ ko̍ŋ yɛ̍, ndu̍ o̍o̍ ve̍lū pūa̍a̍ ā ŋɔ᷄mmɛ̍ū, pūa̍a̍ ka̍ŋ nda̍ cho̍ ha̍ā ni̍. Chɛ̍hu̍sī, a̍ Bɛ̍ŋnja̍mīŋ, a̍ I̍hu̍dī, a̍ Chɛ̄na̍a̍nā, a̍ Sɛ̍tāŋ, a̍ Ta̍a̍sī, a̍ Āhīsi̍a̍hāā.

¹¹Ndu̍yɛ̍ pūa̍a̍ Chɛ̍di̍yāā wa̍ ha̍ā kpo̍u̍ bōlīī lāyu̍ŋgu̍e̍i̍ nda̍ wa̍ o̍ yu̍ŋgu̍la̍ ndāla̍ŋ chōo̍ ni̍. Ndu̍yɛ̍ ā wa᷄ ku̍u̍ba̍a̍ chɔ̄ūwāā tɔ̍ɔ̍ bɛ̍ndū. Pūa̍a̍ fu̍la̍ o̍ pūlāle̍ ndāle̍ŋ chōo̍ wa̍, ā wa̍ fa̍ū fa̍ū wāa̍la̍ŋ tɔ̍ a̍ lā ŋɔ᷄mmɛ̍ū a̍ kɛ̄mɔ̄ɔ̍ lē dīi̍ŋ (17,200). Ndu̍yɛ̍ nda̍ kpo̍u̍ ā wa᷄ ā bɛ̄ndāā le̍ kɔ̄l ā wāā o̍ chɔ̄ū.

¹²Si̍u̍pīm ni̍, a̍ Hu̍pīm, o̍ yu̍ŋgu̍ I̍lūī vī chōo̍, fūlāa̍ o̍ būŋgɛ̄i̍ yu̍ŋgu̍ Bɛ̍ŋnja̍mīŋ ndo̍ chōo̍. Da᷅ŋ ndu̍ ndu̍ o̍o̍ ve̍lū pōo̍ ō pīlɛ̍, dīo̍la̍ŋ āā, Hu̍sīm.

¹³Nāfi̍ta̍lī ndu̍ o̍o̍ ve̍lū pūa̍a̍ ā hīɔ̍ɔ̍lu̍. Pūa̍a̍ ka̍ŋ nda̍ cho̍ ha̍ā ni̍. Cha̍hi̍sīɛ̄ɛ̄, a̍ Ku̍nī, a̍ Chɛ̍sā, a̍ Si̍a̍lūm. Pūa̍a̍ ha̍ā māmā nda̍ wa̍ Bi̍li̍hāā ni̍.

¹⁴Mānāa̍sē ndu̍ o̍o̍ nɔ̍ la̍nɔ̍ pɔ̍mbɔ̄ɔ̍, mbo̍ vīlūl ndu̍ pōo̍ dīōla̍ŋ āā, A̍si̍lūɛ̄ɛ̄. O̍ ko̍ŋ kɔ̍ɔ̍lī, mbo̍ vīlūl ndu̍ vɛ̄lɛ̄ pōo̍ dīōla̍ŋ āā, Māka̍yā. Māka̍yā yɛ̍, ndu̍ ve̍lū Ki̍li̍a̍a̍dī ni̍.

¹⁵O̍ ko̍ŋ kɔ̍ɔ̍lī, mi̍ Māka̍yā o̍ pu̍u̍lūl Hu̍pīm a̍ Si̍u̍pīm lāāndūa̍a̍. Māka̍yā ndu̍ o̍o̍ nɔ̍ yēmāa̍ dīōla̍ŋ āā, Ma̍a̍kāā. O̍ ko̍ŋ, mi̍ Māka̍yā vi̍a̍lū vɛ̄lɛ̄ po̍ di̍i̍ŋ ndɔ̄ɔ̍ dīōla̍ŋ āā, Sɛ̄lōfɛ̍ha̍dī. Ndu̍yɛ̍, Sɛ̄lōfɛ̍ha̍dī ko̍ŋ yɛ̍, wāŋ lāāndūa̍a̍ ko̍ni̍ ndu̍ ndu̍ o̍o̍ ve̍lū ni̍.

¹⁶O̍ ko̍ŋ kɔ̍ɔ̍lī, mi̍ Ma̍a̍kāā, la̍nɔ̍ɔ̍, Māka̍yā o̍ vi̍a̍lū pūa̍a̍ ā ŋīɔ̍ɔ̍ŋ. Po̍ ndɔ̄ɔ̍ ō pīlɔ̍ɔ̍ dīōla̍ŋ āā Pɛ̍lu̍ɛ̍sī. Pɔ̄mbɔ̄ ndɔ̄ ndu̍ ma̍ kē ndu̍ dīōla̍ŋ āā, Si̍ɛ̍lu̍ɛ̍sī. Pɛ̍lu̍ɛ̍sī ve̍lū Yu̍lām nda̍ Lu̍a̍kɛ̄m ni̍.

¹⁷Yu̍lām, po̍ Pɛ̍lu̍ɛ̍sī wo̍ mbo̍ vīālū pōo̍ dīōla̍ŋ āā Bɛ̍dāŋ. Ki̍li̍a̍a̍dī, po̍ Māka̍yā wo̍, ndu̍ yɔ̍nūŋ māā po̍ māmā Mānāa̍sē wo̍ ni̍, wānāa̍ fu̍la̍ o̍ pūlālē ndɔ̄le̍ŋ chōo̍ wa̍ nda̍ wa̍ ka̍ŋ ni̍.

¹⁸Ki̍li̍a̍a̍dī ndu̍ o̍o̍ nɔ̍ yēmāa̍, dīōla̍ŋ āā, Hāmīmōlɛ̄chɛ̍tī. Hāmīmōlɛ̄chɛ̍tī ko̍ŋ yɛ̍ mbo̍ vīālū pūa̍a̍ ā yāa̍, nda̍ yɔ̍nūŋ ni̍ māā I̍si̍hɔ̍dī, a̍ Ābīɛ̍ɛ̍sā, a̍ Ma̍a̍lāā.

¹⁹Po̍ pi᷅lɛ̍ wa̍ dīōla̍ŋ āā Si̍ɛ̍mi̍dā. Ndu̍ ndu̍ o̍o̍ ve̍lū pūa̍a̍ ā hīɔ̍ɔ̍lu̍, nda̍ yɔ̍nūŋ ni̍ māā A̍hīāŋ, a̍ Si̍ɛ̍kɛ̄m, a̍ Li̍ki̍hī, a̍ A̍nīām.

²⁰Wānāa̍ fu̍la̍ pūlāle̍ E̍fi̍lūēmnde̍ŋ chōo̍ wa̍, nda̍ cho̍ ha̍ā ni̍. E̍fi̍lūēm ndu̍ o̍o̍ ve̍lū pōo̍ ō pīlɛ̍ dīōla̍ŋ āā, Sīūtɛ̍lāā. Sīūtɛ̍lāā ve̍lū Bɛ̍lu̍ɛ̍dī ni̍, Bɛ̍lu̍ɛ̍dī ve̍lū Ta̍ha̍tī ni̍, Ta̍ha̍tī ndu̍ ve̍lū Īlīa̍a̍dāā ni̍, Īlīa̍a̍dāā ndu̍ ve̍lū Ta̍ha̍tī ni̍,

²¹Ta̍ha̍tī ve̍lū Sa̍ba̍dī, Sa̍ba̍dī ve̍lū Sīūtɛ̍lāā. E̍fi̍lūēm ndu̍ o̍o̍ ve̍lū vɛ̄lɛ̄ pūa̍a̍ che᷅le̍ŋ ā ŋīɔ̍ɔ̍ŋ, ō pīlɔ̍ɔ̍ dīōla̍ŋ āā E̍sɔ̄, ō pīlɔ̍ɔ̍ dīōla̍ŋ āā, Īli̍a̍a̍dī. O̍ wa̍ te̍le̍ŋ pi᷅lɛ̍, mi̍ pūa̍a̍ ha̍ā ā kūā le̍ chɔ̄lūāā pi̍la̍a̍ chīīmbūūwo̍ wo̍ o̍ būŋgɛ̄ī Ka̍a̍dī ve̍ ni᷄ŋ, kɛ̍ mi̍ wāŋnda̍ Ka̍a̍dī a̍ dīī nda̍.

²²Mɛ̄ɛ̍ nda̍ dīī pūa̍a̍ ha̍ā, mi̍ E̍fi̍lūēm fi̍nyā ndā o̍ cha᷅ŋ le̍ pālɛ̍i̍ fa̍ŋgā. O̍ ko̍ŋ, mi̍ wānāya᷅ŋ ndɔ᷄ŋ hūŋ le̍ mā nyɔ̄ɔ̄lu̍ ndu̍.

²³O̍ ko̍ŋ kɔ̍ɔ̍lī, mi̍ E̍fi̍lūēm bɔ̍ŋā vɛ̄lɛ̄ nɔ̄ɔ̍ nda̍ la̍a̍ndɔ̄, mi̍ la̍a̍ndɔ̄ chu̍ā yo᷄llo̍ mbo̍ vīālū pōo̍. Mi̍ E̍fi̍lūēm ke᷅ po̍ ndɔ̄ ko̍ŋ dīōla̍ŋ āā, Bɛ̄lu̍i̍yā. Kāni̍ fo̍ndōle̍, le̍ mɛ̄ɛ̍ pōo̍ ho̍ō ō vēlu᷄ŋ a̍ te̍le̍ŋ dɛ̍nɛ̍ pa̍lāa̍ ō wa̍ o̍ yu̍ŋgu̍ ndāa̍ chōo̍ wo̍ yɛ̍.[4]

²⁴E̍fi̍lūēmndo̍ ho̍ō, ndu̍ o̍o̍ vɛ̄lɛ̄ wānā la̍nɔ̍ɔ̍ dīōla̍ŋ āā, Si̍ɛ̍ɛ̍lūā. Si̍ɛ̍ɛ̍lūā ko̍ŋ ndu̍ ta̍ŋgu̍l chi̍o̍o̍ŋ Bɛ̄tī Ho̍lɔ̄ŋ bā lūāŋ ndo̍ a̍ bā tōūwo̍ ni̍, a̍ Yūsɛ̄ŋ Si̍ɛ̍ɛ̍lūā.

²⁵Ndu̍yɛ̍ E̍fi̍lūēm ndu̍ o̍o̍ ve̍lū vɛ̄lɛ̄ po̍ che᷅le̍ŋ dīōla̍ŋ āā, Lu̍ɛ̍fāā. Lu̍ɛ̍fāā ko̍ŋ yɛ̍, wānāa̍ fu̍la̍ o̍ pūlāle̍ ndɔ̄le̍ŋ chōo̍ wa̍ nda̍ cho̍ ha̍ā ni̍. Lu̍ɛ̍si̍ɛ̍fī, ndu̍ ve̍lū Tɛ̍lāā ni̍, Tɛ̍lāā ndu̍ ve̍lū Ta̍hāŋ ni̍,

²⁶Ta̍hāŋ ndu̍ ve̍lū La̍dāŋ ni̍, La̍dāŋ ndu̍ ve̍lū Āmi̍hu̍dī, Āmi̍hu̍dī ndu̍ ve̍lū Īlīsi̍a̍mā ni̍,

²⁷Īlīsi̍a̍mā ndu̍ ve̍lū Nu᷅ŋ ni̍, Nu᷅ŋ ndu̍ ve̍lū Chɔ̄ɔ̍sūāā ni̍.

²⁸O̍ ko̍ŋ kɔ̍ɔ̍lī, wānāa̍ fu̍la̍ ha̍ā o̍ pūlāle̍ E̍fi̍lūēmnde̍ŋ chōo̍ wa̍, fo̍ndāŋ ndā ndāla̍ nda̍ wa̍ īchāli̍ a̍ nyɛ̄m nda᷄ŋ nda̍ŋ ki̍ɔ̍ɔ̍ŋ nda̍ la̍ŋ la̍ cho̍ la᷅ŋ ni̍. Bɛ̍tɛ̄ɛ̄l chīe̍e̍ a̍ sɔ̄ndɔ̄kɔ̍lta̍ ba̍lu̍ ndu̍ la̍ŋ, mbo̍ kūā le̍nde̍ ha̍a̍a̍ a̍ Na̍a̍lūāŋ bā pāa̍le̍ŋ lē chāŋ ndo̍, a̍ Kɛ̍sɛ̄ɛ̄ bā pāa̍le̍ŋ lē dēl lo̍, a̍ sɔ̄ndɔ̄kɔ̍ltā ba̍lu̍ ndu̍ la̍ŋ. Ma̍ chāl vɛ̄lɛ̄ Si̍ɛ̍kɛ̄m a̍ A̍yāā chīe̍e̍, a̍ sɔ̄ndɔ̄kɔ̍ltā ba̍lu̍ mu̍ŋ nda̍ŋ.

²⁹O̍ ko̍ŋ kɔ̍ɔ̍lī, wānāa̍ fu̍la̍ o̍ pūlāle̍ Mānāa̍sēle̍ŋ chōo̍ wa̍, chi̍e̍e̍ŋ nda̍ wa᷄ īchāli̍ la̍ŋ la̍ŋ la̍ cho̍ la᷅ŋ ni̍. Bɛ̄tī Si̍āŋ chīe̍e̍, a̍ Tāāna̍kī, a̍ Mɛ̍ki̍dɔ̄ɔ̄, a̍ Dɔ̍ɔ̄ a̍ sɔ̄ndɔ̄kɔ̍ltā ba̍lu̍ mu̍ŋ nda̍ŋ. Chōo̍sɛ̍ po̍ Che̍kɔ̍pū wo̍, wānāa̍ fu̍la̍ o̍ pūlāle̍ ndɔ̄le̍ŋ chōo̍ wa̍ ki̍nɛ̍i̍, o̍ chi̍o̍o̍ŋ mu᷅ŋ wa̍ īchāli̍ ni̍.

³⁰Wānāa̍ fu̍la̍ o̍ pūlāle̍ A̍sīɛ̄ɛ̄ le̍ŋ chōo̍ wa̍, nda̍ cho̍ ha̍ā ni̍. A̍sīɛ̄ɛ̄ ndu̍ o̍o̍ ve̍lū pūa̍a̍ ā hi̍ɔ̍ɔ̍lu̍, pūa̍a̍ ka̍ŋ nda̍ cho̍ ha̍a̍ ni̍. I̍mi̍nā, a̍ I̍si̍vāā, a̍ I̍si̍vī, a̍ Bɛ̄lu̍i̍yā. Mbo̍ vīālū vɛ̄lɛ̄ wānā la̍nɔ̍ɔ̍ dīōla̍ŋ āā Sɛ̍lūā.

³¹Bɛ̄lu̍i̍yā, po̍ A̍sā wo̍, ndu̍ o̍o̍ ve̍lū pūa̍a̍ ā ŋīɔ̍ɔ̍ŋ, pūa̍a̍ ka̍ŋ nda̍ cho̍ ha̍ā ni̍. Hɛ̍bā, a̍ Ma̍li̍kīɛ̄l. Ma̍li̍kīɛ̄l ko̍ŋ ndu̍ ke̍lū Bɛ̍sa̍i̍tī chīe̍e̍ ni̍.

³²Hɛ̍bā, po̍ Bɛ̄lu̍i̍yā wo̍, ndu̍ o̍o̍ ve̍lū pūa̍a̍ ā yāa̍, pūa̍a̍ ka̍ŋ nda̍ cho̍ ni̍. Cha̍fi̍lɛ̍tī, a̍ Si̍o̍mā, a̍ Ho̍tām. Mbo̍ vīālū vɛ̄lɛ̄ wānā la̍nɔ̍ɔ̍ dīōla̍ŋ āā Su̍a̍ā.

³³Cha̍fi̍lɛ̍tī, po̍ Hɛ̍bā wo̍, ndu̍ o̍o̍ ve̍lū pūa̍a̍ ā yāa̍, pūa̍a̍ ka̍ŋ nda̍ cho̍ ha̍ā ni̍. Pa̍sa̍kī, a̍ Bi̍mi̍hāā, a̍ A̍si̍va̍tī.

³⁴Si̍o̍mā, po̍ Hɛ̍bā wo̍ ō pīlɔ̍ɔ̍, ndu̍ ndu̍ o̍o̍ ve̍lū pūa̍a̍ ā yāa̍, pūa̍a̍ ka̍ŋ nda̍ cho̍ ha̍ā ni̍. Lo̍hi̍kāā, a̍ Chɛ̍hu̍bāā, a̍ A̍lūām.

³⁵Ho̍tām, po̍ Hɛ̍bā wo̍ ō pīlɔ̍ɔ̍, ndu̍ bɛ̍ɛ̍ ndu̍ o̍o̍ ve̍lū pūa̍a̍ ā hīɔ̍ɔ̍lu̍, pūa̍a̍ ka̍ŋ nda̍ cho̍ ha̍ā ni̍. So̍fāā, a̍ I̍mi̍nāā, a̍ Sīɛ̄lɛ̍sī, a̍ A̍māl.

³⁶So̍fāā, po̍ Ho̍tāmndo̍, pūa̍a̍ o̍ ve̍lū wa̍ nda̍ cho̍ ha̍ā ni̍. Su̍a̍ā, a̍ Ha̍nɛ̍fā, a̍ Si̍a̍ūl, a̍ Bɛ̍lūī, a̍ I̍mi̍lūā,

³⁷a̍ Bɛ̍sā, a̍ Ho̍dī, a̍ Si̍a̍mɛ̄ɛ̄, a̍ Si̍li̍sīāā, a̍ I̍ti̍lūāŋ, a̍ Bɛ̍ɛ̍lūā.

³⁸Po̍ pi᷅lɛ̍ wa̍ dīōla̍ŋ āā Chɛ̍tɛ̄ɛ̄, pūa̍a̍ o̍ ve̍lū wa̍ nda̍ cho̍ ha̍ā ni̍. Chɛ̍fu̍nɛ̄ɛ̄, a̍ Pi̍si̍pā, a̍ A̍lūā.

³⁹Po̍ pi᷅lɛ̍ wa̍ vɛ̄lɛ̄ dīōla̍ŋ āā Yu̍lā, pūa̍a̍ o̍ ve̍lū wa̍ nda̍ cho̍ ha̍ā ni̍. A̍lūāā, a̍ Ha̍a̍nīɛ̄ɛ̄, a̍ Lu̍i̍sīā.

⁴⁰Pūa̍a̍ ha̍ā kpo̍u̍, o̍ pūlāle̍ A̍sīɛ̄ɛ̄ le̍ŋ chōo̍ nda̍ fūla̍ ni̍. Nda̍ wa̍ yu̍ŋgu̍la̍ ndāla̍ŋ bōlle̍ ni̍. Ndu̍yɛ̍ ma̍ wā ku̍u̍ba̍a̍ chɔ̄ūwāā bɛ̄ndūa̍a̍ fu̍la̍ tɔ̍ɔ̍. Ndu̍yɛ̍ mi̍ wāŋnda̍ kē nda̍ bɛ̄ɛ̄le̍ŋ māā wānāā bɛ̄ndū o̍ yu̍ŋgu̍la̍ ndāla̍ŋ chōo̍. Mɛ̄ɛ̍ fa̍u̍ fa̍u̍ pūa̍a̍ fu̍la̍ o̍ yu̍ŋgu̍ A̍sīɛ̄ɛ̄ wo̍ chōo̍, ma̍ wā ā bɛ̄ndāā le̍ kɔ̄l ā wāā o̍ chɔ̄ū wa̍, ā wa̍ wāa̍la̍ŋ bi̍dīi̍ŋ a̍ lā ŋɔ᷄mpu᷅m (26,000).