Read Southern Kisi Ko̍lo̍ni̍kō Di̍i̍ŋ Ndɔ̄ɔ̍ 16 Bible Online

Ko̍lo̍ni̍kō Di̍i̍ŋ Ndɔ̄ɔ̍ 16 - Southern Kisi bible

Ko̍lo̍ni̍kō Di̍i̍ŋ Ndɔ̄ɔ̍ 16

¹Ō wa̍ a̍ te̍le̍ŋ pi᷅lɛ̍, wɔ̄sī Māsāa̍ A̍sā o̍ chi̍ŋa̍ wɔ̄sīla̍ŋ be̍le̍-ya̍a̍ a̍ lā ŋɔ᷄mpu᷅m o̍ lēmāsā Chu̍dā wo̍, mi̍ Māsā Bɛ̍ndōo̍ Ba̍a̍sīā o̍ wa̍ I̍sɔ̄lūɛ̄ī yo̍ o̍ kɔ̍ de᷅l lɛ̄ŋndē Chu̍dāle̍ŋ chōo̍ a̍ sɔ̍ŋgɔ̄ɔ̍, mbo̍ bīī Lu̍a̍mā chi̍e̍e̍ ndā bɛ̍ndōo̍. Mɛ̄ɛ̍ o̍ bi̍ī chi̍o̍o̍ ho̍ō, mbo̍ bɛ̄ɛ̄ndīāā ndu̍ ō kālā ka̍lā, mbō tōsa̍ wānā o̍ wānā ndu̍ o̍o̍ lu̍e̍ī lɛ̍ Chu̍dā le̍, ndu̍yɛ̍ vɛ̍lɛ̄, wānā o̍ wānā ndu̍ o̍o̍ fu̍lā le̍.

²Mɛ̄ɛ̍ Ma̍sā Bɛ̍ndōo̍ A̍sā o̍ che᷅ māā Māsāa̍ Ba̍a̍sīā o̍ kɔ̍ de᷅l ndu̍ chōo̍ a̍ sɔ̍ŋgɔ̄ɔ̍, mbo̍ chūā nyɛ̄ sɔ̄lāa̍ o̍ chīɛ̄ī Mɛ̄lɛ̄ka̍a̍ ni᷄ŋ, a̍ o̍ chīɛ̄ī ndɔ̍ lēmāsāa̍ ni᷄ŋ, ka̍ni̍ŋ hu̍mbo̍ŋ, a̍ ko̍o̍līi̍yo̍ŋ, mbo̍ kē pūa̍a̍ ndūa̍a̍ chɔ̄ūwa̍ le̍ mā yōo̍ Māsā Bɛ̍ndōo̍ Bɛ̄nīha̍da̍dī Dāma̍si̍kɔ̍ɔ̄ chi̍e̍e̍. Ndu̍yɛ̍ a̍ te̍le̍ŋ ko̍ŋ, Bɛ̄nīha̍da̍dī ko̍ŋ, ndu̍ wa̍ Māsāa̍ Si̍i̍līāā ni̍, mbo̍ wā īchāli̍ Dāma̍si̍kɔ̍ɔ̄, o̍ wa̍ chi̍e̍e̍ le̍bo᷅llo̍ le̍ lɛ̄ŋndē Si̍i̍lūīāle̍ŋ ndo̍. Mi̍ Māsāa̍ A̍sā o̍ di̍mūl Māsā Bɛ̍ndōo̍ Bɛ̄nīha̍da̍dī āā,

³“Chɛ̄la᷅ŋ kɔ̄l nyūlu̍ wa̍ fi̍nyāā nāa̍ tɛ̄ɛ̄ŋ nda̍ ŋi̍ɔ̍ɔ̍ŋ ndo̍, I̍ ye̍e̍ma̍ mī chɛ̄la᷅ŋ kōŋ ō mīīŋgu̍ na̍a̍ tɛ̄ɛ̄ŋ na̍a̍ nūm. Ka̍ni̍ŋ hu̍mbo᷄ŋ mu᷅ŋ ni̍, ko̍o̍līi̍yo̍ŋ mu᷅ŋ ni̍, nūm ya̍ I̍ yɔ̍ŋ ni̍ māā kē. Māsāa̍ Ba̍a̍sīā o̍ hi᷅ŋ mbo̍ hu᷄ŋ de᷅l la̍ chōo̍ o̍ lɛ̄ŋndē nīle̍ŋ ni᷄ŋ a̍ sɔ̍ŋgɔ̍ɔ̍. Le̍la̍ŋ I̍ ye̍e̍ma̍ mā tɛ̍ɛ̍mbu̍u̍ chɛ̄la᷅ŋ kɔ̄l nyūlu̍ cho̍ nya̍ tɛ̄ɛ̄ŋ nya̍ ndu̍ wo̍. Ko̍ŋ to̍sā ni̍ mbō sōli̍ pūa̍a̍ ndūa̍a̍ chɔ̄ūwa̍ o̍ lɛ̄ŋndē nīle̍ŋ ni᷄ŋ.”

⁴O̍ ko̍ŋ, mi̍ Māsāa̍ Bɛ̄nīha̍da̍dī o̍ chɛ᷅l nyɛ̄ Māsā Bɛ̍ndōo̍ A̍sā o̍ di̍mu̍l ndu̍ wo̍. Mbo̍ yɔ̄ŋ pūa̍a̍ wa̍ pūa̍a̍ ndūa̍a̍ chɔ̄ūwa̍ bōlle̍ŋ nda̍, lātūlu̍ a̍ pūa̍a̍ ndūa̍a̍ chɔ̄ūwa̍, ma̍ kɔ̍ de᷅l I̍sɔ̄lūɛ̍i̍ya̍ chōo̍ a̍ sɔ̍ŋgɔ̄ɔ̍. Ndu̍yɛ̍ ma̍ yām I̍sɔ̄lūɛ̍i̍ya̍ ma̍ bīī chi̍e̍e̍ŋ nda᷄ŋ ŋ̄ ti᷄ŋ a̍ fo̍ndāŋndā ndāla̍ŋ. Chi̍e̍e̍ŋ nda̍ bīī yo̍ŋ cho̍ mu᷅ŋ ni̍, A̍i̍chɔ̄ŋ, a̍ Da᷅ŋ, a̍ E̍bɛ̄ɛ̄l Bɛ̄tī Ma̍a̍kāā, a̍ chi̍o̍o̍ŋ o̍ būŋgɛ̄ī Nāfi̍ta̍līīye̍ ni᷄ŋ ki̍nɛ̍i̍, nāa̍ nda̍ a̍a̍ kɛ̍sī nyɔ̍ɔ̍ŋ nda̍.

⁵Mɛ̄ɛ̍ Māsāa̍ Ba̍a̍sīā o̍ tu̍e̍ī a̍ sūɛ̍i̍ he̍ī o̍kɔ̄ɔ̍, bɛ̄ɛ̄ndīāā o̍ wa̍ Lu̍a̍mā o̍ ka̍lā ka̍lā wo̍, mbo̍ māl, ō hīu̍ lɛ̍ lāchī le̍.

⁶O̍ ko̍ŋ kɔ̍ɔ̍lī, mi̍ Māsā Bɛ̍ndōo̍ A̍sā o̍ chu̍ā wāŋnda̍ Chu̍dā kpo̍u̍, ma̍ kūā Lu̍a̍mā, ma̍ kɔ̍ chūā pōūta̍ŋ a̍ yɔ̄mnde̍, ī Māsāa̍ Ba̍a̍sīā o̍ wa̍ Lu̍a̍mā tāŋgūllo̍ ō kālā ka̍lā ve̍. Pōūtā lāŋ a̍ yɔ̄mīī kēŋ nda̍ kɔ̍ bɛ̍ɛ̍ndīāā Ɛ̄sīɔ̄ŋkɛ̍bɛ̄ a̍ Mi̍si̍pā ŋ̄ kālā ka̍lā ni̍.

⁷A̍ te̍le̍ŋ ko̍ŋ, mi̍ Ha̍na̍nī, wāna̍ su̍a̍ā le̍ Mɛ̄lɛ̄ka̍ wo̍, o̍ ku̍ā nāa̍ Māsā Bɛ̍ndōo̍ A̍sā chu̍a̍, māsāa̍ le̍ Chu̍dā, mbo̍ dīmūl ndu̍ āā, “Le̍ chɛ̄la᷅ŋ ŋ̄ tōsa̍ a̍ Māsā Bɛ̍ndōo̍ Si̍i̍līāā, ma̍ kɛ̄ɛ̄ le̍ tīīnda᷄ŋ nu̍mndo̍ dɔ̄wɔ̄ɔ̍ o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nūm ndo̍ ni᷄ŋ ndo̍, pūa̍a̍ chɔ̄ūwa̍ Si̍i̍līāā a̍ ma̍l nu̍m, ma̍ kūānu᷄ŋ.

⁸Lo̍o̍nu̍ŋ ndɔ̍ a̍ bōōndi̍i̍ wāŋnda̍ Īto̍o̍pīāā, a̍ wāŋnda̍ Li̍bīāā, a̍ hu̍ŋ chi᷅ŋa̍la᷅ŋ nya̍ a̍ sɔ̍ŋgɔ̄ɔ̍ ve̍. Mi̍ chē bɛ̍ɛ̍ mi̍ wāŋnda̍ ha̍ā, pūa̍a̍ ndāa̍ chɔ̄ūwa̍ hūŋ sɛ̍lɛ̍ bɛ̍ndōo̍, a̍ nyɛ̄lā ndāla̍ chɔ̄ūlā su̍a̍a̍ ā nāŋ nda̍ŋ, ndu̍yɛ̍ a̍ pūa̍a̍ ndāa̍ sɔ̍ŋgā o̍ su̍a̍a̍ chōo̍ wa̍ ni̍, kɛ̍ le̍ tīīnda᷄ŋ nūm o̍o̍ dɔ̍ū o̍ Mɛ̄lɛ̄ka̍ Ya̍a̍wɛ̄ɛ̄ ni̍ŋ ndo̍, mbo̍ kē nu̍m kpāāyāa̍ ma̍ yām nda̍.

⁹Hɔ̄lte̍ Mɛ̄lɛ̄ka̍ Ya̍a̍wɛ̄ɛ̄ lēŋ lē chō bā o̍ bā fe̍e̍ o̍ chi̍e̍ēŋndo̍ ho̍ō chōo̍. Wānāa̍ cho̍ ndu̍ o̍ hɔ̄l sa̍kpō ma̍ tōsa̍ nyɛ᷅ o̍ di̍mūl nda̍ wo̍ wa̍, dīāllūŋ kāla᷄ŋ o̍ ke᷅ nda̍ ni̍. Kɛ̍ nūm a̍ to̍sa̍ sūɛ̍i̍ dīɔ̄mīī bɛ̄ndū. Le̍ he̍ī, chɔ̍ŋ a̍ hāū mbō kūɛ̄ a̍ lāchī kɛ᷅, chɔ̄ūla̍ŋ lā chō nu̍m wā chōo̍, kɔ̄l nyūlū o̍ kɔ̄l nyūlū cho̍ wa᷅ o̍ māsāle̍ nu̍mnde̍ŋ bɛ̄ŋgu̍ le̍.”

¹⁰O̍ ko̍ŋ, mi̍ A̍sā o̍ ta̍mbū kɔ̄l a̍ dīōmnda̍ wāna̍ su̍a̍ā le̍ Mɛ̄lɛ̄ka̍ wo̍ ō dīmu̍l ndu̍ la̍ŋ. O̍ ko̍ŋ, mbo̍ dūāūnu᷄ŋ tu̍mbe̍ a̍ ndu̍ o̍ ka̍lā ka̍lā, mbo̍ bīī ndu̍ mbo̍ bāŋ ndu̍ o̍ kpi̍ɔ̍ɔ̍, mbo̍ dūāū ndu̍ o̍ chīɛ̄ī mānyūmndo̍ ni᷄ŋ. Ndu̍yɛ̍ a̍ te̍le̍ŋ pi᷅lɛ̍ kōŋ kpe̍, mi̍ A̍sā o̍ sa̍ā wāŋnda̍ ā ti᷄ŋ nyɛ̄ kīndīlāā bɛ̄ndōo̍ hāndɔ̄ɔ̍ chōo̍.

¹¹Sɔ̄ɔ̍ŋ yɔ̍nu̍ŋ o̍ māsāle̍ A̍sā le̍ŋ bɛ̄ŋgu̍ wo̍ŋ ki̍nɛ̍i̍, chɔ̍ŋ o̍ kāndɔ᷄ŋndo̍ ha̍a̍a̍ mbo̍ fūūlūū o̍ mɛ̄ɛ̄lu̍la̍ŋ, mu̍ŋ kpo̍u̍ ŋ̄ chō ŋ̄ pōōnyīāā o̍ yāu̍ sɔ̍ɔ̍ŋ pa̍a̍ndu̍ cho̍ a̍ māsāa̍ Chu̍dā, a̍ māsāa̍ I̍sɔ̄lūɛ̄ī o̍kɔ̄ɔ̄ wo̍ ni᷄ŋ.

¹²Wɔ̄sī A̍sā chi̍ŋa̍ wɔ̄sīla̍ŋ be̍le̍-ya̍a̍ a̍ lā ŋɔ̄ma̍hīɔ̍ɔ̍lu̍ o̍ lēmāsā wo̍, mbo̍ sɔ̄lā nāā ŋ̄pēlōo̍. Ndu̍yɛ̍ mi̍ nāa̍ ho̍ō ō kīndīlā ndu̍ kīndīlāa̍ pīla̍. Kɛ̍, a̍ nāā kōŋ kpo̍u̍, ō nyūna̍ Mɛ̍lɛ̄ka̍ Ya̍a̍wɛ̄ɛ̍ dīōm le̍ mbō māla̍ ndu̍ le̍, mbo̍ tūāl wānāā chīɔ̄ūwāā chēle̍ŋ nda̍ kɔ̄ɔ̄lī, le̍ mā māla̍ ndu̍.

¹³O̍ ko̍ŋ kɔ̍ɔ̍lī, mi̍ Māsāa̍ A̍sā o̍ wu᷅. Ō tōsa̍ wɔ̄sīla̍ŋ be̍le̍ hi̍ɔ̍ɔ̍lu̍ a̍ ō pīlɛ̍ o̍ lēmāsā mbo̍ wū.

¹⁴Mɛ̄ɛ̍ o̍ vi᷅, ma̍ chɔ̄ ndu̍ o̍ sɛ̄i̍ būūlū ndu̍ pi̍la̍ to̍o̍si̍a̍a̍ wo̍ ni᷄ŋ, o̍ Māsāa̍ Dēēve̍ lo̍ chi̍e̍e̍. Ma̍ dūāū nyɛ̄m chūŋ kɛ̄ndɛ̄ŋ yɛ̍ yɔ̍ŋ o̍ sɛ̄i̍ būūlū ko̍ŋ ni᷄ŋ, ŋ̄ wānāa̍ to̍o̍sīāā nyɛ᷅m chūŋ kɛ̄ndɔ᷄ŋ nda̍ ā tōōsi̍a̍a̍ wo̍ŋ, ma̍ chɔ̄ ndu̍ a̍ mu̍ŋ. Mi̍ wāŋnda̍ mɛ̄ndūl yīŋnde̍ bɛ̍ndūle̍ŋ, le̍ ndu̍ bɛ̄ɛ̄le̍ŋ kīo̍o̍.